ss5d14的个人专页

本身其實唔係諗住食呢間餐廳，不過原定嗰間walk-in冇位，係正呢間餐廳嘅附近，所以就入嚟試吓。漢堡嘅選擇都有差唔多10款以上，我哋揀咗至尊漢堡特賣侯斯頓漢堡再加$25轉套餐有薯條/薯格揀，$33就可以有洋蔥圈/炸雞嗰啲。其實咩係至尊漢堡呢？其實就係兩層嘅牛肉配合洋蔥蘑菇芝士煙肉同埋煎蛋。一聽就知成個包啲料非常之多😂 一啖擺唒落口有少少困難😂😂 首先個包帶甜味，都鬆軟嘅，食到尾因為吸得太多肉汁所以就淋晒。牛肉初初第一啖咬到個邊皮位係有少少乾，但係食食吓又發現都唔錯，都多肉汁。本身諗住有洋蔥就冇蘑菇，但係竟然兩樣都有有啲驚喜。成個包食起上嚟都唔錯，算係幾高質素。薯條係連埋薯皮加埋一啲辣辣地嘅粉非常之惹味。Houston 其實都非常之好，bbq加埋啲煙肉都係非常之正。薯格都好食，但係唔及薯條出色。如果覺得至尊漢堡太大的話，呢個都係一個唔錯嘅選擇。整體來講質素係幾高嘅一間漢堡餐廳，如果喺將軍澳想食漢堡呢間係一間值得推薦。…查看更多

Weekend book 咗位去到都接近滿座。其實 flames我之前係鰂魚涌食過，覺得唔錯，性價比幾高所以決定食吓呢間分店。觀塘分店有室內同室外，室內多數係矮櫈，而且好迫，感覺唔太舒適。室外就好啲啲，所以天氣唔熱可以考慮坐室外。蟹肉份量ok，調味唔錯，蕃茄味唔係好重，整體可以算係好食賣相都算係咁，點知一切落去….😨😨 靭到嚇死人… 我都已經算係接受到生啲所以叫三成，如果大多數人會叫嗰啲五成或者七成… 真係唔敢想像… 薯蓉都算滑嘅，不過你嘅主角咁樣再好食都冇用啦本身我想加薯條，點知佢話賣晒 （七點幾就冇薯條，我覺得有啲誇張… 令我覺得係餐廳準備不足多過真係咁受歡迎）所以我叫咗燒粟米，咁都係正常啦，冇乜特別。整體嚟講，我覺得可以話係非常失望，如果你問我會唔會俾多次機會佢，我諗都真係未必會😅😅 當然其他分店我都係試吓嘅，不過呢間我就唔會再返嚟🤦🏻‍♂️…查看更多

平日接近兩點嚟到，唔使等位嘅 （不過我個friend 都有book到😂）menu入面好多款set lunch都好吸引，不過似乎都係A4和牛最吸引我哋🤣A4和牛燒到大約五成 （冇特別問我哋想要幾成），個口感同油份都係正到爆，再食啖飯，真係冇得輸！其他配菜同蒸蛋都唔錯👍🏼我自己其實好鍾意食壽喜燒，但係唔知點解通常喺香港食到嘅都係呢種一大鍋湯嘅壽喜燒。呢鍋其實係好食嘅 （咁梗係啦話晒係A4和牛喎）只不過我自己都係鍾意少啲湯個汁燶好多嘅嗰種壽喜燒。整體嚟講我非常滿意個lunch，當然俾得呢個價錢要有返呢個質素先得，所以性價比嚟講唔算好高，不過味道就真係唔錯！呢餐飯有個小插曲，話說其實呢餐飯係我個friend請我食生日飯，佢喺book位嘅時候已經講咗話甜品想寫happy birthday 同埋我個名，後來打嚟confirm Booking嘅時候我個friend忙冇聽到電話，結果最後到出席嘅時候話甜品冇得寫字，因為要預先準備，所以我喺服務上扣咗少少分，雖然我個friend冇複佢哋電話係唔啱，咁但係一開始就講咗嘅時候咁我覺得作為呢啲級數嘅餐廳唔應該assume唔要，而係準備咗先。Anyway，除咗呢樣嘢之外，現場服務係唔錯嘅。…查看更多

星期六晚上到嚟唔使等位，坐低先發現主打食豚肉，唔怪之得叫呢個名😂先嚟前菜，個汁唔錯配合好 fresh嘅蕃茄幾開胃溫泉蛋豚肉飯，幾香口，熱辣辣有飯焦，整體幾balanced 燒豚肉，油份高但唔油膩，食落幾香口，唔錯味道唔差嘅，不過基本上就係英式Sunday roast會食到果啲gammon嘅味道燒豬大腸，成餐飯最正，香口，脆脆哋，油份唔算好高亦冇乜豬穌味豬脷都唔錯嘅但係我都係鍾意食牛舌多啲整體呢間係一間唔錯嘅居酒屋，當然我自己係比較鍾意食牛多啲，所以唔係話樣樣嘢都咁識欣賞，但係我覺得整體係唔錯！…查看更多

星期六晚大約7:00嚟到，第一眼見到嘅係一條喺住宅區入邊嘅細細的日本街，好快咁行咗一轉，其實好多舖頭都冇乜人比較冷清，唯一有幾台客嘅就係呢間拉麵店同埋再入啲嘅一間Cafe。咁二揀一之下我哋就決定咗食拉麵。本身有諗過會食佢嘅蝦味噌豬骨，不過俾個魚乾吸引咗，所以就叫咗鳴虎 （日本魚乾豬骨湯拉麵）。湯係好普通嘅豬骨湯，味道就普通啦，至於所謂嘅魚乾就係倒咗啲魚乾粉落去咁上下，非常失望。麵質係OK嘅，正常。叉燒都係正常，隻蛋就煮嘅時間處理得唔錯，可惜好似浸得唔夠耐唔係好入味。黑蒜油，同一個湯底，今次唔係魚乾粉而係落咗黑蒜油咁樣。好味過第一碗嘅，但係都係普普通通啦。餃子反而有驚喜，香趣有肉汁，做得唔錯👍🏼整體嚟講，你問我嘅話我唔會特別去食呢碗拉麵，如果住喺附近或者咁啱去開附近都可以食下嘅，不過就唔好期望太高。如果去開就一定要叫呢個餃子個餃子真係唔錯！…查看更多

喺附近踢完波行到過嚟食飯已經差唔多9點，諗住有啲餐廳都差唔多關門都係食返啲類似大排檔嘅應該營業時間會長啲，結果就行到嚟見到呢間呀餐廳式嘅大排檔乳鴿咬落好多肉汁好香口絕對係比係出邊好多餐廳好食好多估唔到火腩唔係配豆腐，而係配鱔，出奇地夾！而且一個煲有五舊都算幾多，幾抵食。呢個又係意想不到嘅配搭麻辣鴨血食得多，配合埋鵝腸，真係一次過滿足晒兩個願望。麻辣嘅程度我覺得係唔錯，整體會令你想不停咁食配合埋白飯迅速食唒。四季豆都OK，即係比起其他嘢冇乜特別。整體呢間嘢都幾抵食，味道又唔錯，想嘆住冷氣食大排檔嘅呢間都係唔錯嘅選擇。四個人，飲埋啤酒，每人都係$178。…查看更多

平日大約兩點嚟到，因為係我個friend攞位所以我唔知佢有冇等位，但係去到出邊冇人排隊我估都唔使。叫咗個3 course meal，$158 +10%首先就係呢個柚子醋糖潰小蕃茄藜麥沙律配蕃茄清果凍 （個名好長😅）味道都唔錯，都幾得意，幾開胃。獨子蒜蕃茄蓉意大利辣腸肉醬扁意粉，個人來講冇乜辣味，味道係好食嘅，蒜味好重。明太子奶油龍萵大蝦扁意粉唔算好特別但係都OK嘅，有啲明太子嘅味道，隻蝦好大隻，幾爽口彈牙。焦糖蛋糕唔錯，唔會太甜又有焦糖嘅香味Mocha 拉出嚟嘅羊仔幾得意，味道我就唔知啦因為冇飲。至於Iced Americano，淡咗少少。連埋個環境同埋間舖頭嘅裝修其實係唔錯嘅，價錢都算係合理。你話使唔使專登去食呢就未必，但係經過可以食下。…查看更多

咁啱去開呢頭我見到呢間都幾出名嘅茶記，就決定試吓佢。星期五2:00嚟到都算多人，但又未去到要等位。我見到呢度好似出名食沙嗲牛肉麵梗係揀返個沙嗲牛肉麵餐 （其實即係沙嗲牛肉麵再加兩個自選嘅餸），我就揀咗餐蛋，將佢變成沙嗲牛肉餐蛋麵，一次過食晒我最鍾意食嘅兩個茶餐廳麵🤣餐蛋就唔特別講啦，都係平時咁樣，但係啲沙嗲牛肉真係好正！感覺就好似你去食串燒啲沙嗲醬直接放咗落碗麵度咁樣，好香嘅花生味。配合埋牛肉一齊真係perfect match 。公仔麵佢個硬度亦都控制得非常好，都好啱我嘅口味。$50蚊連野飲價錢都算係咁，值得推介！…查看更多

放咗半日假決定去將軍澳南慢慢嘆返個lunch relax吓估唔到平日都唔少人，雖然我未去到需要等位但係都有九成full，而且我食緊嘅時候時不時都會見到有人要等幾分鐘先有位。環境方面係簡簡單單幾舒服，still/sparking water 係self service，唯一就係啲枱嘅擺位有啲奇怪，擺到有少少迫，但係行嘅地方就好闊落，可能因為要就返啲梳化櫈。叫咗個all day breakfast慢慢食，啲蛋賣相都靚仔，食落就唔算好滑，有啲進步空間。煙肉煎到夠脆，合格。腸仔就正正常常啦，至於沙律佢有少少汁，食唔出係咩但係冇乜味。新鮮無花果夠晒fresh。potato gratin (我唔知佢中文叫咩），感覺好似落咗少少芝士，味道唔錯，調味啱啱好。Iced black, 雖然咁樣試其實已經淡咗好多，但係我覺得個味道都非常啱我，苦味同埋酸味都啱啱好，係香味唔算好夠，不過其實咁樣唔fair，因為始終沖淡左咁多，但係整體我係鍾意嘅。我仲專登買咗一pack capsules返屋企認真啲試吓。整體嚟講佢嘅嘢食同埋咖啡都唔錯，環境都算係好舒服，非常適合休閒嘅上午或者下午。$148一個all day breakfast雖然都唔平，但係我覺得我會再嚟。…查看更多

8:00去到諗住都要等下位點知發現入邊即刻就有位，即刻9秒9衝入去霸咗個靚位先。呢度其實係好似快餐店咁自己攞位然後去返門口買，買完比部機仔你整好就叫你過去。首先叫咗個最基本嘅芝士牛堡，個包係軟熟嘅，個牛就唔算好多肉汁但係味道都唔錯，當然你同嗰啲手打牛就冇得比但係呢個價錢性價比都好高。另外我哋仲叫咗香辣煙肉蘑菇芝士牛堡，我個人食burger係比較鍾意有煙肉，呢個煙肉辣辣地再配合埋切碎咗嘅蘑菇非常之夾。相比起最基本嘅芝士牛堡呢個的確係好食好多，呢$12係抵比嘅。另外加$16就有套餐，套餐包括一個嘢飲同埋一款小食，我哋今次就叫咗薯條同埋炸燒賣。先講炸燒賣因為比較特別唔係度度有得食，其實如果真係貪佢叫做特別啲，咁都可以食下嘅，否則我自己其實都係鍾意蒸燒賣配合豉油同埋辣油。呢個炸燒賣出邊脆脆地但係感覺有少少黐住啲牙，雖然口感幾過癮但係味道就普通啲。薯條方面係厚切，都幾脆，除此之外就冇乜特別啦。整體嚟講雖然你唔可以同嗰啲賣到好貴嘅手打牛堡相比但係以呢個價錢講真喺邊度搵，佢可能只係貴麥記少少但係味道就好食好多，所以呢間嘅性價比非常高。…查看更多

想試吓寫食評好耐，作為第一篇梗係寫間好嘢😂雖然間舖頭要行一段斜坡有啲攰但係我覺得絕對值得去！今日平日同埋可能中秋節前夕大家要做節唔算好多人，接近7:00都唔使等位。我叫咗佢最出名嘅雞白湯拉麵🤤佢用blender打過啲雞湯，令佢呈現奶白色，一望就覺得佢好creamy，好滑。啲湯飲落除咗滑之外仲係好濃好鮮甜嘅雞味，啲麵亦都唔錯成功做到掛湯。炸牛蒡就咁食都OK但係如果浸一浸啲湯成個感覺唔同晒，即刻升級咗好多，可以話除咗湯之外係呢碗嘢嘅主角之一！個低溫叉燒同埋個雞都係非常之軟熟。整體嚟講成碗麵非常出色，雖然相比起出邊嘅拉麵價錢係偏貴，但係絕對值得一食。然後因為食嘅時候冇諗住寫食評所以有兩樣嘢係冇影到相嘅… （下次要開始記住先得）anyway, 呢兩樣嘢我都想講吓其中一樣就係我哋加咗一份糖心蛋，首先當然糖心係做到嘅，但係特別之處係你會食到淡淡嘅煙熏味另外一樣就係炸雞，咬開都有肉汁，佢冇特別嘅醬汁只係比蔥花你送，但係我覺得已經非常之好整體嚟講我覺得呢間拉麵係絕對值得一試，係唔係全港最好食嘅拉麵我唔敢講，但係佢絕對係全港最好食嘅雞白湯之一！…查看更多