malingchi's Profile

今日唔敢周圍出去食lunch，唯有叫外賣返公司食。今次同埋班同事一齊叫咗阿里山便當外賣，我就揀咗阿里山便當最出名嘅「鹽酥雞扒肉燥飯套餐」，呢個套餐包一杯台式茶，都只係$55。我就唔係咁鍾意飲茶，轉左一杯黑糖珍珠「鮮奶」。都只係加多$16。由於返工地方近呢間店，佢哋有包送服務，送到黎個盒都仲係熱辣辣，個套餐真係好大份，兩個人一齊share都仲得。我好鍾意食呢一間鹽酥雞扒嘅皮，佢呢個炸皮好特別，感覺有啲似鹹蛋黃鹽酥雞扒超正。至於杯黑糖珍珠鮮奶，仲諗住黑糖會係好甜甜到漏，搖勻佢之後飲原來真係好好飲，值得推介。…Read More

呢間江仔記粉麵專家，去德福廣場二期Foodie foodcourt, 唔知同出邊街舖嘅江仔記係唔係同一個公司。正話下午五點幾匆匆忙忙趕去呢間江仔記粉麵專家，叫咗碗招牌魚蛋粉，單點$40。個服務員話如果再加配多一樣例如牛丸例如魚皮餃，就加多$8。加牛腩牛筋牛肚就會貴啲要10幾蚊。今次就訊息佢個招牌魚蛋粉，落埋辣椒油炸蒜蔥。個招牌魚蛋唔夠熱辣辣同埋偏細粒，冇乜味。但係個河粉超正，非常滑，辣椒油都唔錯，由於個河粉真係好滑好味最後我成碗食晒，下次試吓叫魚皮餃睇吓又好唔好食😋…Read More

呢間Chimac 韓國餐廳, 係九龍灣德福廣場二期Foodie food court裡面。德福廣場想食炸雞，除咗M字頭嗰間就係K字頭嗰間。終於搵到一間係可以食到韓國炸雞嘅餐廳。我叫咗呢個無骨嘅芝士炸雞套餐，配卡邦尼意粉，送一杯飲品我就揀咗Zero。餐牌上睇到嘅芝士炸雞套餐，我仲以為係好多炸雞，但出到嚟見到係只有幾兩三少塊，同埋我冇諗過佢係放埋喺卡邦尼意粉裏面。我問個服務員乜唔係跟個餐牌相一機用個籃出嘅咩？個服務員話係要叫單點先至會用個藍出。成個賣相冇咗食韓國餐廳feel有點失望。好彩個芝士炸雞味道都唔錯，如果芝士粉可以再多啲就好了。成個套餐$62都算抵食。…Read More

海濱匯呢間越式餐廳「葫越」，話就話係觀塘區，但佢其實係屬於九龍灣區，基本上如果喺九龍灣地鐵站行過去幾分鐘就到啦。呢場我第二次去食，其實喺九龍灣要搵越式餐廳又要真係好越南地度嘅質素。除咗呢一間都應該冇第二間啦，佢個春卷同埋扎肉我係超鍾意。個扎肉係好新鮮後來先知原來佢哋嘅春卷同埋扎肉係真係喺越南空運到港。我平時食開新世紀廣場嗰間日式餐廳都已經好好味。而呢一間其實真係拍得住。另外呢間嘅越式咖啡好好飲，如果可以調校到冇濃嘅話會更加好飲。價錢又大眾化，值得推介。…Read More

壽司店香港有好多間，但真係令到我會自己一個人入去糖食嘅就只有元氣壽司🍣。首先元氣壽司嘅裝修同埋店內格局入到去真係感受到好似去咗日本。其次就係佢擺放嘅餐具擺放嘅位置好就手。另外我係超鍾意佢嘅旋轉壽司吧，啱晒我呢啲鍾意靜靜地一個人去食嘢嘅人。有旋轉壽司吧嘅壽司🍣店，先至似身在日本嘅感覺。每次去親元氣，我都指定叫某幾款壽司。包括火炙三文魚腩壽司，三文魚子壽司，珍寶帆立貝壽司，仲有海膽壽司。呢個組合簡直係Perfect match。超滿足😛…Read More

位於尖沙咀K11呢家牧羊少年，每次由尖沙咀地鐵站K11入口行入去K11，離遠都見到呢間牧羊少年排晒長龍，門面望落去好靚好吸引好友文青cafe感覺。裡面燈光有好柔和環境好靚。為咗唔想排長龍又可以入去試吓，今朝決定早啲起身的起心肝等佢一開舖就即刻衝入去。真係好好彩終於唔使排隊就可以輕鬆咁入去坐低。坐低後服務員俾個餐牌俾我地。我哋選擇了套餐「龍蝦汁鳳尾蝦意大利粉」$108，加$38「酸忌廉番薯條」，個套餐送餐湯。另外叫咗一杯ice mocha 。啲食物仲未送到我哋都好興奮好期待一邊感受一下店內環境氣氛。當食物送到枱面我哋仲不斷打卡，食物賣相同埋個器皿真係幾吸引幾靚，至於食物質素以及味道我完全有點失望。就連杯飲品我飲唔夠一半都已經唔飲了。整體環境靚，但價錢貴得黎唔好食。…Read More

尋日朝早約咗個客喺尖沙咀食早餐，好懷念元朗冰室嘅全日早餐，就決定入嚟再回味。入到黎諗都唔使諗就叫咗個雞扒嘅全日早餐。其實佢呢度最好食嘅就係豬扒，但是早餐食豬扒怪怪地所以就選擇咗雞扒。呢間嘅雞扒其實都好好食佢煎得好香。另外佢呢一度個蒜蓉包超級正，好香濃嘅蒜蓉味。佢嘅腸仔唔同一般茶餐廳嘅腸。唔知點解呢間嘅腸仔特別好食。同埋我幾鍾意佢呢一個全日早餐用大嘅圓形碟去裝飾物。呢個擺法幾靚幾吸引，感覺似去西餐廳。價錢都係$50-60，值得推介。…Read More

九龍灣想搵一間食日式嘅餐廳，除咗商場裏面嗰幾間大品牌壽司店，同埋嗰間好貴嘅大品牌日式餐廳之外。就諗唔到仲有邊間啦。開Google Maps搵到呢間日式餐廳，位於德福廣場戲院行落去德福大廈，落電梯玻璃門望過對面就見到。呢間具有好多唔同嘅日式嘢食。有鍋物又有濱燒，濱燒套餐可以加配海鮮類，呢幾款海鮮都幾新鮮，服務員見到我哋雞手鴨腳仲幫我哋燒埋。服務態度都算唔錯。濱燒餐確實食得唔係太飽。後來叫多個土佐豆腐。夠晒滿足。…Read More

九龍灣德福廣場二期呢間三哥譚仔，無論外賣又好堂食又好都係長期好多人要等。入到黎呢間分店，佢哋嘅服務不是太好，服務員成日都當啲食客透明。我叫咗個米線，加腐皮，湯底要清湯$34，另外叫咗一碟蒜泥白肉（小）$26，同埋一碟雲耳麻辣涼拌汁$12。蒜泥白肉裏面啲蒜同埋辣油一齊放入個清湯底辣度適中又好味。今次值得一讚就係佢哋嘅米線應該係同之前唔同，米線比上次食口感進步咗米線好滑。雲耳麻辣涼拌汁試咁多次佢質素都好穩定。但服務質素真係要改善一下。…Read More

水門雞飯喺尖沙咀金馬倫道，不倫什麼時候成日經過都見到佢好多人排隊。旺角呢間下午茶臨近六點前就唔需要排隊可以入去坐低食。其實一直都想試好耐但係次次經過都真係好多人排隊。一直好想知佢係咪真係咁好食，今次有機會俾我入去試吓，我就叫咗個水門雞飯$54，呢個套餐賣相望落去好似泰國街市食檔feel一啲都唔吸引。本來諗住失望而回，但既然入得來俾咗錢都唔好嘥，即管試吓。食落去發現佢啲雞真係好好味，只係農場雞雞味好濃，個飯又真係幾好食喎。碗湯味道似黑椒豬肚湯,都幾好味。佢嘅食物質素係值得推介…Read More

喺旺角想搵一間冇咁港式嘅Cafe，呢間J.co Donuts & Coffee絕對係一間值得推介嘅Cafe. 呢間Cafe俾我一入到去嘅感覺就好似去咗外國嘅Donut shop. 佢有啲似香港冇幾大名牌嘅連鎖式咖啡店。但呢間Cafe店內裝修相對嗰兩間名牌連鎖式咖啡店更加似外國feel。佢嘅Donuts可以話係全香港最好味有最多款式嘅，價錢仲要係大眾化價錢。依家嘅Donuts唔會好似外國嗰啲冬甩咁甜。啱晒香港人嘅口味，值得推介.…Read More

九龍灣德福呢間美心快餐高級版，最近裝修過，生裝修環境好舒服，唔知係咪因為佢新裝修原故，覺得裏便好乾淨好整齊同之前好唔同。佢哋新出左一個雲南米線套餐，好似好吸引，又有好多配料俾你選擇。我就係比呢一個雲南米線套餐吸引住入嚟幫襯。一般餐牌影啲食物相都好靚，我都係以博下嘅心態入嚟試吓係咪真係同相一樣賣相咁吸引。講真$42又唔貴不妨一試。 今次我叫咗兩餸嘅雲南米線$42，揀咗榨醬同堆水鮫。出餐賣相望落去水質同相中真係有點落差。但係又真係幾好味，水餃同米線真係好味，炸醬就冇乜味啦。整體來講都算OK啦湯底味道都幾好。…Read More

旺角區原來都有一間紅茶喺彌敦道，同一班朋友去咗紅茶食下午茶，之前去開太子嗰間坐得又迫又唔舒服仲要搭枱。旺角呢間超大間終於唔使搭枱啦。幾個朋友揀嚟揀去，最後都不約而同撰咗「吉列豬扒湯烏冬」$42，配埋杯凍奶茶。紅茶來來去去其實真係得呢一個吉列豬扒湯烏冬係可以食極都唔厭。佢個炸豬扒真係好好食，個烏冬好滑，個湯底感覺上好似魚湯都幾入味。另外佢杯凍奶茶我飲過好多次，無論去到邊間紅茶分店個奶茶質素都依然咁穩定，佢呢間嘅奶茶有啲似台式奶茶真係唔錯。…Read More

旺角區呢間湊湊鍋喺新世紀廣場裡面，環境真係好靚，香港真係好少有啲咁靚嘅環境嘅餐廳。同埋佢出餐每一個器皿都好特別好吸引。每次入座途中都會忍唔住望下其它食客枱上嘅食物同埋高檔器皿罷設。今次去叫咗個麻辣湯底，鴨血係呢間餐廳嘅主打菜式，因為呢間嘅鴨血佢係可以無限添加，出面仲有一個自助嘅小食吧，都係無限添加。令我哋叫咗兩杯凍嘅珍珠奶茶，呢間嘅珍珠奶茶真係好好飲，佢個珍珠奶茶嘅茶係好香相信佢係用靚茶葉，同埋又夠大杯。食完辣嘢再飲奶最佳配搭.…Read More

之前去親敏華食，都一定叫個豬扒蛋飯，佢個豬扒真係幾好食，隻蛋個蛋黃好靚。但後來發現原來佢仲有一個餐「榨菜肉絲雞翼公仔麵」$42都好好食。雖然係一個好普通嘅公仔麵，但係佢呢一個榨菜肉絲雞翼公仔麵裏面嘅榨菜係比一般嘅楞菜爽口，口味，有啲似潮洲榨菜。另外敏華咁多款公仔麵只有呢一款係落足麻油，在配搭埋雞翼成個組合食落去個口感真係好好味。再配埋一杯凍奶茶簡田係一流嘅配搭。可惜佢供應時間只係去到下午六點，如果夜晚都有得食，我諗我一星期都會去幫襯兩，三次。…Read More