皮蛋豆腐的个人专页

作為孕媽媽嘅我，出街食嘢都特別小心。好想食甜品，但係又驚啲嘢太高糖份。想食燉蛋，但係又驚佢煮唔熟。呢度嘅熱蛋白燉鮮奶係即叫即整，師傅見到我大腹便便，好細心，知道我唔可以食流心，要全熟。食落去感覺非常良好，因為知道佢冇另外加糖，材料只有蛋白同埋奶，感覺好健康。蛋同奶有BB需要嘅營養，同時又可以滿足我想食甜品嘅慾望😊整體甜品做得啱啱好，唔會太實，雖然叫咗全熟但係依然好滑，味道好香濃，感覺無添加，起碼自己食得放心。…查看更多

今日約左皮蛋喺尖沙咀等, 都無唸定食咩好~ 唸住行去好多韓國菜果邊睇下有無野啱食~ 行下行下行到街尾就見到呢間叫Lab Eat 嘅餐廳~ 見佢個dinner menu 大概二百幾一個set 好似都幾多野揀, 就試下佢啦~裝修還不錯, 都幾適合小情侶或者三五知己摸下酒杯底~ 野飲方面有wine, cocktail 等. 豆腐就叫左杯red wine~ dinner set 加HKD38 就可以 upgrade la~Dinner set 係5-course, 有appetizer, soup of the day, main, dessert 同埋coffee/tea.Appetizer 是指定的煙三文魚雜菜沙律, 雜菜新鮮, 三文魚大大塊, 都幾足料.Soup of the day 係蕃茄雜菜湯, 賣相不錯. 湯中有真蕃茄茸, 好醒胃, 又唔會太酸.Main course選擇了法式香草牛油焗鮑魚~ 端上來的時候已經聞到佢D香味同感受到佢嘅新鮮滾熱辣啦~ 兩隻鮑魚連埋殼遠看好像兩個大蘑菇~ 鮑魚好入味好有鮮牛油香味, 加上少量香草, 唔油唔膩, 推介~!!!Dessert 係香橙芝士蛋糕, 芝士味不算太濃, 橙味亦比較淡.Overall 覺得呢度環境ok, 坐得幾舒服, waiter 服務亦ok, 價錢化算.…查看更多

豆腐唔算好熟悉銅鑼灣, 通常喺呢頭飲野去開都係果幾條街或者幾間舖頭. 朋友話feel like 飲杯野, search 下先知原來咁近地鐵站就有間喺左梗. 入到去燈光好柔和, 音樂同裝修都好舒服, 最搶眼就係個粉紅巴黎鐵塔反轉再反轉. 首先點了支Chardonnay, 再點了一人四隻生蠔. Order 了四隻Coffin Bay, 四隻Gillardeau, 同樣都係$148四隻, 即叫即開. 通常唔同品種生蠔會唔同價錢, 呢度全部劃一, 感覺好抵食. Coffin Bay 海水味濃, 肉質較爽口. 豆腐一向都愛吃Gillardeau, 鐘意佢蠔味夠濃又有d咬口. 兩款都好新鮮, 估唔到一家本以為主要是飲酒的地方可以有咁新鮮又抵食嘅生蠔, 誠意推介!!點了白酒, 又點了個白酒忌廉煮大蜆送下酒. 大蜆同樣新鮮, 肉質鮮美. 這種煮法好像比較少見, 通常外面都係清酒煮蜆, 呢度嘅就比較creamy, 有d似忌廉湯嘅質感, 用黎點附送的蒜蓉包就啱哂.見到佢有好多唔同拼盤和小食選擇, 海鮮拼盤賣相和價錢都超吸引可惜正餐個胃已經滿左. 兩個女仔最後都係抵受唔住佢個甜品拼盤嘅誘惑決定要挑戰一下. 甜品拼盤係貌似某間high tea要成個月前book的餐廳咁都係用木盒裝載, 令豆腐一見到就好想食. 木盒內約有六個甜品杯, 三款macaroon, 三款一口蛋糕, 三件手造朱古力和一個creme brûlée, 認真豐富. 蛋糕有chocolate cake 同cheese cake, 甜品杯有芒果味mousse, chocolate mousse, 宇治金時味布甸等. Generally 呢度嘅甜品比較淡味, 唔會太甜. 豆腐今餐最滿意係d生蠔, 這裡service 亦不錯. 見到隔離枱d海鮮拼盤個樣都好新鮮, 仲要$288就有半隻lobster同另外幾樣海鮮, 下次一定要試下. …查看更多

之前已經聽過元朗既朋友講過: ”想食新派韓國野唔使諗, 去119”, 當時都唔知係咩. 但好好彩佢近排係上環開左分店 119 Plus. 勁愛韓風既我緊係即刻收工同我既FOOD BUDDY一齊去試啦!119 Plus 係正新紀元入面,位置超方便亦都岩哂我地放工想醫肚既上班族個鋪位唔算大, 但裝修好特別, 以韓國交通為主題, 感覺幾新鮮朋友話必食既一定係十分出名既大鐵鎚系列, 我地揀左大鐵鎚炸醬面, 應該最能代表韓國菜吧? 用鎚仔剝開脆脆既外皮, 同入面既炸醬面攪拌一齊食真係第一次見, 好有特色. 更值得一讚既係個炸醬面本身已經炒得好香, 有微微既黑椒味, 材料十足亦都唔見油膩, 一向怕油膩既我都食左好幾碗喔跟住叫左芝士豬肋骨, 之前都有係第2D餐廳食過, 大多都有好濃烈既芝士味, 其實只要鍾意食CHEESE既人都會好鍾意食, 而119 Plus 既RIBS做得算係比較好, 芝士感覺冇好黃好肥既感覺, 個RIBS本身都有整得好入味好軟身. 冇比芝士搶哂本身既味道. 如果能夠再放多少少粟米增加口感就PERFECT了食到咁上下就緊係要叫番杯119既特飲, 唔飲酒既我地叫左HATAI RITA, 我自己就幾鍾意波蘿RITA. 唔太甜得黎果味較重, 兩個人SHARE一大杯其實已經好足夠最後上炸雞沙律, 本身想像將炸物連埋咁FRESH既沙律菜一齊食好似有D怪, 但原來配上甜甜酸酸既莓汁就大大減輕炸雞既油膩感. 不失沙律既清新, 真係幾好既新配搭, 沙律唔再係單單既一堆菜既MIXTURE, 而且雞都炸得唔錯, 讚!總括黎講真係一個幾好既新派韓國菜, 價錢亦算十分合理, 幾有自成一格既特色. 以後係上環想食韓國野又多一個好選擇LU!!…查看更多

原本想再到旬菜富食個有根子 (一餅過的魚子) 的北海丼或懷石料理, 才發現同一位置現已搖身一變變了做上岸料理. 上岸料理的裝潢大致跟以前旬菜富一樣, 桌椅的擺放也相同, 全店大概可容納五枱客約二十人.先點一杯梅酒, 再想想要吃什麼吧. 梅酒為自家製, 琥珀色的酒梅味芳香濃郁, 甜酸適中, 還附送原粒青梅. 一邊飲一邊聽著店長和店員誠意的推介, 他們說餐廳剛開業兩個多月, menu之後或會加入更多食品, 晚市可能會加入omakase/懷石料理等.前菜是牛舌, 牛舌好腍身, 加上芝麻和蔥花食落去更香口更醒胃.刺身拼盆共有9款刺身, 食材都是日本直送, 大部分來自北海道. 拼盆最中心的是otoro (Toro大腹), 看上去已經見到肥美的魚脂, 厚厚的一塊放進口在口中溶化實在滿足. 魚類都好新鮮, 赤貝, 帆立貝, 牡丹蝦, 海膽等都很甜, 刀功細緻. 第一次黎樣樣都想試下, 壽司我地試左魷魚同穴子. 魷魚壽司上面有紅紅的梅子, 下面則有綠綠的大葉. 大葉香料味濃, 梅子清新, 卻沒有埋沒魷魚的鮮味. 另一邊廂, 穴子(海鰻) 完全地把壽司飯包圍了, 師傅把穴子壽司分成兩件, 一味是用海盬調味, 另一味是用上了鰻魚汁, 各有千秋, 不用再蘸醬油都很夠味了.想試多D野又唔想咁飽, 食下佐酒小食邊食邊飲慢慢閒聊下就最好~ 吉列忌廉蟹餅賣相很不錯, 咬落去熱騰騰的. 除了一絲絲的蟹肉外吉列脆波波內還充滿了忌廉, 食落去較一般crab cake滑口.蔥金槍魚腩蔥多士: 蔥一向都是金槍魚腩(吞拿的朋友, 簡單的配搭令厚厚的一層金槍魚味道更出色, 少量沙律醬吊一吊味, 使香脆的多士多一份軟滑.串燒分別點了牛小排, 羊架和青椒仔. 牛小排油花不少, 肉質鮮嫩, 外層煎得香口, 亦鎖住了豐富的肉汁. 羊架肉味濃厚香甜, 入口幼嫩不羶,肉質細緻鬆軟. 甜而不辣的青椒仔則是一個很好的點綴.甜品係for第二個胃, 縱然已經好飽, 還是不能放過佢個自家製杏仁豆腐. 很喜歡這裡的杏仁豆腐, 滑得黎杏仁味又夠香濃, 為這頓豐富的晚餐作了個清新的結尾.Overall 喺度的dining experience 都幾唔錯, 除了食物質素良好外, 店員得閒會過黎同我地吹下水, 感覺親切. 豆腐都是比較鍾愛這類小店, 可以有多點與師傅和店員的交流.…查看更多

韓流長期襲港, 韓星韓國食物化妝品等都受香港人追捧, 愛嚐新又支持小店的豆腐就順道來拜訪一下吧.自從西營盤港鐵開通後, 一街二街三街都陸陸續續增添了不少新食店, Seoulmate亦是其中一間.到訪時間是平日夜晚, 寧靜的街上這小店可算擠湧, 幸好我們到達時間尚早, 如果唔係企喺外面排隊嘅可能係我地lu.行完上個小山坡黎到叫返杯濟州橙果茶飲下先~ 果茶除左濟州橙之外仲用了智異山蜂蜜, 好濃郁嘅橙香, 甜到入心, 仲好足料潻~ 雖然呢度有熱食提供, 不過今次主要係黎填飽第二個胃所以無試到. 這裡的menu頗有心思, 有一頁名叫”Relax”, 可以有board games, 旅遊書等提供, 全部免費.睇住佢地將Haagen Dazs綠茶雪糕放上精緻的多士, 再灑上綠茶粉, 放上南瓜籽, 杏仁片等, 已經滿心期待這個亞朱媽年糕多士大戰綠茶雪糕會被端到我面前. 這個吸晴度都有8分, Haagen Dazs雪糕本身綠茶味夠濃, 加上紅豆, 成件事就係一個宇治金時多士. 冰凍的雪糕加上微熱的多士, 口感不俗. 夏日炎炎當然要試下佢個韓冰雪系列~ 原本是order 2-4人份量的那個, 最後黎左本身只供外賣的細size Marshmallow and Oreo 冰冰. 覺得賺左, 堂食都可以食到呢個外賣一人份量version haha~ 好可愛的一個甜點, 棉花糖包圍著一顆mini oreo, 棉花糖下層是oreo雪糕和餅碎, 望落去有D似而家果D盆栽雪糕/蛋糕. oreo餅碎下面就是chocolate flavor 的碎冰~ 唔會太甜, 口感又好, 讚 =) 此店室內空間大約可以容納十人, 從室內有一扇門可以通往秘密花園. 原來內有乾坤, 天外有天, 可以多容納十多人. …查看更多

觀塘附近返工, 見上次有同事集體下午茶喺度叫外賣糖水到公司都ok, 就唸住今日lunch試下佢其他甜品. 十二點幾到, 唔駛等位. 原來lunch time 只係做lunch set, 甜品兩點先開始, 無綠一試.Lunch set 有三款選擇, 豆腐選了香草白汁海蝦天使麵. 天使麵有麵包在旁邊, 賣相不俗. 白汁天使麵煮得不錯, 軟硬適中, 麵中放了洋蔥絲, 味道剛好, 個汁不是罐頭湯白汁那種, 應該是自己調味的, 不會太咸又入味. 蝦的份量其實不少, 挺足料的, 但個人認為如果可以蝦份量或許少一點但中間切一切開去腸再加多少少調味煎一煎想必錦上添花.是日甜品是vanilla ice cream. 雪糕上放了 些脆脆, 挺有心思的.$44 有野食, 餐飲 (咖啡/奶茶/檸茶/檸水/華田/horlicks) 同是日甜品, 幾抵食.…查看更多

一陣子沒有來, 今次又有其他朋友話想食Spanish 又想地方可以private d, 小妹就決定encore. 由於之前幾次黎都係點chef tapas menu, 今次一於試下Sabor mixed menu. 前者有6個tapas, 後者則是3個tapas, 一個湯, sherbet, 再加個main course. Main course 我地揀左seafood paella. 餐前麵包同上次黎一樣是蕃茄蒜蓉包好開胃.3 個Tapas都是encore番上次食過比較鍾愛的幾款. 由於上次寫過, 詳情請參閱上一篇皮蛋豆腐的食評. 魚湯煮蜆鮮味依然, 今次個煱冇咁熱, 溫度啱啱好, 魚湯唔會好快蒸發晒, 留有足夠魚湯送啲蜆, 更加好味(唔通大廚參考左皮蛋豆腐上一篇食評? =P). 豆腐還是最欣賞炒墨魚粒的意大利蕃茜和生蒜頭醬, 超級輕巧薄身但係又好夠味. 第三個encore的tapas是grilled薯仔+黑毛豬火腿+sunny side up+cheese+蕃茄蓉, 味道同上次一樣咁討好. 論到試新野嘅時候, 湯有兩款選擇, 豆腐揀咗Gazpacho. 記得之前有一次夏天喺西班牙有飲過呢種凍湯, 因而印象特別深刻所以好想再回味下. 呢度個湯同我喺西班牙飲過嘅大都相似, 都係番茄味作為湯嘅主打再加上一啲新鮮蔬菜味道. 呢度個凍湯番茄味不算重, 生蒜味好濃郁, 所以飲落去會有啲辣味, 感覺好清新好特別, 我鍾意. 然後出場的是mixed fruit sherbet. 見到黎之前店員寫比我的email內第五道菜是sherbet, 好奇之下想知下佢同sorbet有咩分別. 原來sherbet 係少啲奶架. 個sherbet 我食到有西柚同埋d mixed berries味.清一清味蕾之後主菜就要登場了. 終於食到呢度嘅seafood paella, 香噴噴熱辣辣的端上. 很喜歡這裡西班牙飯的口感, 米粒圓渾, 飯完全吸收哂海鮮和蕃茄的鮮味之餘又唔會太濕, 不用加上檸檬汁已經好夠味了. 雖然飯上面沒有滿滿的舖上海鮮, 飯裡面卻幾乎每一口都食到海鮮. 甜品為Catalonia Cream, 無論賣相同味道都與較香港人為熟悉的crème brulee非常相似. 不同的是前者可能只是煮熟, 未必會焗, 用料除了蛋外可能還會加上奶, 麵粉等. 相同的地方是它們面都會蓋上一層火炙焦糖. 這裡的Catalonia Cream味道不錯不過比較流質, 如果可以硬身一點又保留現有的香滑就更加好啦~…查看更多

豆腐呢排返中環又想再explore一下d仲未去過嘅地鐵站. 皮蛋話不如去西營盤站順便去近排果幾棵無故被斬嘅百年老樹遺址度懷緬一番. 去之前皮蛋都有睇過下附近有咩食, 皮蛋豆腐都唔係好肚餓就唸住搵d可以輕食嘅地方落腳. 入到去覺得環境都幾舒服~首先叫左杯mango lassi 邊飲邊睇下食咩, 原來呢度除左印度野仲有海鮮拼盤, 生蠔等等, 選擇好多元化, 睇落都幾吸引. 一開始未係好餓, 點左d串燒先. 燒物中廚師推介的有燒菠蘿. 菠蘿新鮮, 燒完之後好甜好juicy, 份量亦唔少, 如果可以再切厚d就好lu. 食食下串燒就點左碗蘑菇湯飲, 蘑菇湯大大碗, 裡面有蘑菇粒粒. 見到枱枱都點Tandoori Chicken, 隱約又望到廚房入面廚師都係印度人樣, 我地就點左黎試下. 一上菜已經聞到好香嘅印度烤雞味道, 與一般Tandoori Chicken 一樣呈獨特的紅色及沒有雞皮, 似是用上傳統的Garam Masala Curry 醃製. 香氣四溢的雞鎚帶點兒辛辣, 不是食肉獸的豆腐都KO了兩隻. …查看更多

晚上與友人在附近happy hour 後吃下不少乾爭爭油炸熱氣小食，正需要找個甜品舒緩一下...便遇上了這家驚喜小店。本以為現在旺角西式甜品店大都不外乎賣吓心太軟或waffle 配雪糕之類，睇完menu後點了這個外型特別嘅test tube 型甜點，三支有不同口味，啱晒我呢啲又多心又怕食唔晒嘅人...1. 咖啡泡沫配伯爵茶布甸 - 咖啡泡沫濃郁配上伯爵茶嘅味道非常match!朋友講笑好似飲緊鴛鴦，但呢杯一定係鬼佬版，幼滑濃郁，大滿足！2. Mojito - 有三種層次嘅享受！面層薄菏啫哩清甜可口，中層滑滑嘅青檸mousse配合底層較甜嘅Rum酒jelly,味道又特別又唔會太搶，感覺清新！3. 青瓜山葵沙冰 - 第一口會用一個字嚟形容：爽！入口冰凍清涼，青瓜味清香，山葵味唔重，吃下一口即時洗走整晚吃完煎炸食物油膩感...加上喺三十多度嘅氣溫下即時感覺熱氣全消！正！…查看更多

好幾年前仲係長駐中環的時候, 每逢想起天婦羅時都會想起位於蘭桂芳附近的高日本料理(Saikou Japanese Restaurant). 曾幾何時我覺得果度係香港食到嘅天婦羅數一數二做得出色嘅地方. 最愛坐吧枱看著日本師傅即叫即做天婦羅, 香脆又新鮮, 可惜此情不再... 忘了何時此店悄悄地消失了.. 往事只能回味.直到我遇到佢, 佢令我勾起失落了的回憶. 佢私隱度還挺高的, 雖然營業中, 但大門是關上, 要按制才會開, 進內後還要掀起門簾才看到人客. 舖面頗有日本味道, 全店大約可客納十多人, L字形bar 枱約有10個坐位, 旁邊卡位則大概可容納4人.上次到訪時有人包了場, 無緣一試. 今次幸好訂了位, 是晚是週四都全場爆滿. 全店有兩三個員工和兩位師傅, 一進去服務員很貼心地把皮蛋的西裝褸掛好放進櫃裡, 又把豆腐的包包收好. 晚餐menu 主要有三款set menu可以選擇, 分別有10, 15或16款tempura. 另外亦有a la carte 的menu, 有咩想追加或單點都可以. 夜晚較細食的豆腐點了"竹", 套餐包括10件即做天婦羅, appetizer, salad, 飯和甜點. 飯本來已經有茶漬飯等三種選擇, 貪心的豆腐又想試下佢d sashimi, 就選擇加$80轉北海道二色丼.Appetizer 是溫泉蛋柚子jelly, 上面加了八爪魚絲. 看著師傅在面前把一大條八爪魚快速切成極幼細的絲, 心想師傅的刀功還真不賴. 然後師傅把少量柚子皮磨成粉狀放上面, 一道簡單的前菜就像藝術品般端在我面前. 蛋在日本料理中有舉足輕重的地位, 它的處理可是足以見證師傅的功架. 溫泉蛋蛋白很嫩滑, 與柚子jelly一拚送進口感覺好清新.開開胃之後枱面瞬間就變得好豐富. 有好可愛圓碌碌一粒波似的蘿蔔粒粒, 檸檬, 玫瑰岩鹽, 和天婦羅汁. 還有檸檬汁夾夾和小兜子用來盛載蝦尾, 牙簽等. 師傅向我們展示了食材, 就開始預備油, 炸粉等. In the meantime, 服務員就端上了柚子dressing的水菜salad讓我們邊吃邊期待.首先出場的tempura是車海老 (花竹蝦), 炸粉非常薄, 是僅僅薄薄的一層剛好覆蓋食材表面. 海老很新鮮, 口感彈牙肉質結實. 平時劣質的天婦羅除了炸粉粗糙和厚之外, 通常都是炸完之後粉肉分離. 呢度嘅即炸即上, 一來新鮮滾熱辣, 二來炸粉夠貼身, 剛好為食物加潻了脆口的感覺, 又無損本身食物的質感. 蝦頭都很讚, 非常酥脆, 一點沒有蝦頭可能有的苦味.然後就有日本白露筍, 舞茸菇, 粟米和小番薯. 每道菜上時師傅都會一邊放下食物, 一邊跟我們講解那道菜及蘸什麼最適合. 蔬菜多是蘸天婦羅汁或玫瑰岩鹽. 白露筍外脆內軟, 爽口得來又充滿肉汁. 舞茸菇是一大個像繡球花模樣的蘑切出來的, 是日本東北部常見的珍貴蘑菇品種之一, 營養價值高又清香味美. 粟米非常清甜, 喜歡它一大塊粟米而又一點粟米芯都沒有, 一口咬落去整塊粟米在口裡就慢慢分開做一顆顆, 又甜又多汁. 小蕃薯口感也很不錯, 也是外脆內軟, 柔軟的甜甜的番薯心把我的心溶化了. 好奇吃了好幾道菜半點油膩感都沒有, 原來油的用料都一絲不苛, 用上了日本紅花油, 油亦不會番用. 之前聽說食用紅花油是可以減肥和降低脂肪的, 雖不知是真是假, 只知道素來不太愛吃deep fried食物的豆腐都吃得很開懷.皮蛋和豆腐邊談邊吃, 豆腐吃的比較慢, 師傅就因應我們進食速度煮食. 坐吧枱和師傅是在日本學廚的香港人原來感覺很親切. 通常食日本料理都是日本師傅, 雖然坐吧枱可以近距離欣賞佢地手藝, 但不擅日文的豆腐卻難以與師傅溝通. 在這裡吧枱只坐十人, 師傅可以全面照顧不同客人需要和進食速度, 豆腐又可以容易與師傅交流, 是個不錯的dinning experience.看著師傅把食物蘸炸粉, 拭去多餘的然後放落冰水, 再放落攝氏180的滾油炸, 都是一種視覺享受. 海鮮當然是tempura 中很重要的食材. 沙錐魚(kisu) 沒有絲毫魚腥味, 肉貿鮮嫩. 飛魚子昆布的魚子有嚼勁, 較未煮過的煙韌.師傅先問我們是否吃蔥才放蔥花上海鰻. 海鰻本身沾了七味粉和醬油, 不用蘸其他調味都足夠入味. 其他海鮮主要都是蘸鹽或加檸檬汁. 鱈場蟹腳很新鮮, 不過蟹肉的纖維始終不是很密集, 豆腐覺得用來做天婦羅可能無其他煮法咁出色.Among這幾款海鮮豆腐比較喜歡北海道帶子. 師傅首先用熟練的手勢把紫菜包好帶子再去炸. 帶子沒有不被紫菜cover的地方, 紫菜厚薄均一, 香脆可口. 最令豆腐不禁心裡大叫好好味呀的是那半熟的帶子, 帶子心還是生的, 軟綿綿卻富彈性的肉質跟鬆脆可口的紫菜簡直是絕配.飽到捧住個肚嘅豆腐突然驚覺原來自己點了北海道二色丼, 幸好sashimi多飯量不多. 海膽鮮甜肥美, 肉質豐厚, 魚子富咸香. 店員說幾乎每天都有食材由日本直送, 通常下午來到, 所以晚餐食材多是特別新鮮.The very last course是甜品. 幸好甜品是第二個胃, 豆腐還是對它滿心期待. 甜點為士多啤梨奶凍, 仲有超甜嘅密瓜, 巨峰提子同奇異果, 為這頓豐富的晚餐畫上了完美的句號.…查看更多

Sohofama 是位於西環的Locofama的姊妹店. Locofama主要是做西餐, 而Sohofama 則是以中菜為主. 兩店均以organic 食材作招徠, 並用上本地農產品、走地雞等港產材料.這裡是與G.O.D. 合作的一家餐廳, G.O.D.住好D, 呢度就食好D~ 同G.O.D.一樣, 這裡的裝修都富玩味, 如這座”吊燈”則是以水槍造成.被安排了坐在酒吧附近的位置, 這兒酒的選擇可真不少, 而且許多都是自家製的. 好像這些plum wine, chamomile infused wine, 都用上了本地食材, 再加上organic wine製成的.Cocktail 種類繁多, cocktail 名字同樣富本地色彩, 記得有杯Hong Kong Sling 中文名是叫香港689的, 另外又有叫龍的傳人, 捱騾仔等等. 豆腐見佢洋甘菊酒是自家製, 就試下佢杯”花落誰家”啦~ 睇住bartender 沖自己杯野功架十足, 一問之下原來是調酒學校的師傅, 唔怪得知啦~“花落誰家”除左洋甘菊酒外, 仲用左有機黑糖, 和記米酒, 檸檬汁, 蘋果汁等, 連黑糖都用有機, 認真一絲不苟. 聞落去好似菊花茶, 飲落去就好清新好舒服, 好啱女仔飲.平時出街食飯多, 比較少湯水飲~ 黎得呢度唸住食得健康D, 就要個燉湯啦~ 點了個猴頭菇瘦肉牛蒡淮山栗子湯. Menu 話呢個湯可以增強免疫力, 又可以補腎健脾, 啱哂我啦~ 個湯非常足料, 連個名無寫嘅料如粟米都喺個湯入面出現~ 飲得出佢係無添加, 無味精.支持本土文化又祟尚健康的豆腐當然要試下由港人港農田種出黎嘅有機菜啦~ 驟眼睇可能會覺得呢個上湯浸時菜無乜特別, 翻開原來入面有黑蒜ga~ 而家咁興食黑蒜養生, 相信大家都知道黑蒜是健康食品和味道是酸酸甜甜的吧. 黑蒜是發酵了的白蒜, 佢抗氧化比白蒜高五至十倍又對三高很有效. 平時買幾粒黑蒜都要七八十蚊, 呢個菜入面有咁多粒大大粒黑蒜, 即刻覺得抵左.主食點了”醬茶醜小鴨”, 唔知呢個係唔係都係由自家農場提供呢~ 鴨肉好嫩滑, 鴨皮夠酥脆, 皮下脂肪不多, 食落唔會膩, 有煙燻過的味道. 最鍾意佢個秘製醬汁, 有少少似食北京填鴨嗰個醬不過無咁甜, 多一份茶香味. 仲配有自家製酸瓜, 食完件鴨食條酸瓜, 可以清清味蕾中和下, 好不錯.香港serve organic wine/spirit, 又有organic 食材及用local ingredients的店可不算多, 仲要係中菜嘅真係獨市咁滯. 今次兩個人食得唔多野, 注重健康的豆腐下次再同多D朋友黎試下其他酒同野食先~~…查看更多

今日返中環, 放工同同事唸住食少少~ 呢幾日食得超heavy, 所以唸住晚餐食菜就算~ 同事就話佢去到邊都必須要食肉乜乜乜. 唸住一路行下睇下食咩, 同事見到呢度門口有個牌$399就有6個course, 我之前又食過西環果間分店都唔錯, 就入左去.微熱的餐前麵包我只點了ceasar salad (HKD88), 同上次食有少少分別, 呢度嘅多了一隻溫泉蛋. 最鍾意食原條羅馬生菜, 原條就更能肯定它是新鮮的, 因為切好了的經處理過的會比較易貯存, 通常咬落口都不及原條的香脆爽口. 不夠新鮮的經處理羅馬生菜通常可能會放大量沙律醬令人不覺得菜腍左, 呢度就沒有這個問題, 配了少量沙律醬, parmasen cheese, 再加上煙肉粒, 銀魚, 感覺較健康. 餐廳介紹了今日精選羊腿(HKD268)給同事, 所以試試, 就無叫到dinner set. 羊腿好香肉味, 唔羶, 本身羊腿比較瘦, 無連皮煮, 所以無咩脂肪, 大家都知羊羶味主要來自脂肪ga la. 但羊肉無左脂肪會唔會好硬呢? 又無wor, 羊腿因為是用慢煮的方式煮, 羊肉好腍身, 唔肥之餘又一d都唔硬, 反而吃到肉香和香草的味道, 肉汁加香草的濃味再放在香滑的配菜及薯溶上簡直係perfect match. 我自己本身好鐘意食薯茸, 尤其法國菜的薯溶係特別香滑, 仲有佢d紅蘿蔔同車厘茄都好入味, 我係咁攞同事d配菜黎食=p餐廳原來有兩層, 下層都幾大, 可能可以包場一班人食野都得.…查看更多

比起隔離勝利道, 想搵間寧靜D坐得舒服嘅餐廳, 呢度都係個幾好嘅選擇.如果坐到窗台果邊就會舒服D, 不過假日通常都要等, 其他坐位大多是木椅.點了Eggs Benedict, 呢度的餡只有bacon 選擇, 是一般都會用黎做eggs benedict 的食材~ 不過我最鍾意都係smoked salmon eggs benedict. Poached eggs 做得啱啱好, 個hollandaise sauce 唔知係咪homemade, 不過味道都幾好.Lunch set eggs benedict HKD89, 加 HKD15 就有呢杯cinnamon latte. 雖然無拉花, 不過D奶都打得夠滑, 同D咖啡都混合得幾好.另外再點了tiramisu, 五十幾蚊, 比起個main or lunch set 呢個dessert有D貴. 不過都幾好食. 好滑嘅cheese 入面插了一條soak滿了rum的手指餅~ 加埋灑上面的咖啡粉, 味道好濃郁好到位. 而且佢有兩層, 下層仲有咖啡jelly, 夾埋一齊食唔會覺得好滯.…查看更多

“Niku” 是日文”肉”的意思, 故名思義這家店主打應該是肉類吧. 對, 這裡是一家日式燒肉店. 我可不想只說它是一間燒肉店, 這好像有點把它降格了, 因為日式燒肉店或許會讓我想起那些大型連鎖店如盛x那些吧.這裡不算難找, 遠看也能見到這家在角落的小店. 進去店內, 舖面不算很大, 有三張枱, 每張有一個爐, 大概可以容納十二人吧. 雖然只有三張枱, 但服務員也有三位, 所以基本上一人serve一張枱. 服務員說上層其實還有其他枱, 不過暫時未對外開放.服務員挺殷勤的, 由添茶到點菜到上菜, 都照顧周到. 餐牌上除了牛肉或其它肉類, 也有海鮮, 菜, 湯, bibimbap等. 朋友已經到訪過, 點菜就由他負責吧, 另外店員也推薦了餐牌上還未有的京蔥牛小排.先點了個長葉生菜沙律(HKD35)清清腸開開胃, 也點了個泡菜拼盤(HKD80)去開始這一餐.豆腐晚餐通常不吃太多肉, 朋友最後選擇了他認為最值得encore 的特上和牛西冷, 和牛橫格膜（看前幾篇食評大家都點這個應該不錯吧）, 及是日廚師誠意推介的京蔥牛小排.京蔥牛小排(HKD320)和特上和牛西冷(HKD340)出場了~!! 只看賣相已經很吸睛.這裡用上的全是日本A5宮崎牛. 近年除了後起之秀岐阜的飛驒牛, 較老牌的九州宮崎牛當然也在和牛界中地位超然. 宮崎牛於五年一度的「全國和牛能力共進會」競賽在500款和牛中脫穎而出更連續兩屆稱霸, 又被日本人視為和牛之首, 地位不容忽視.服務員問我們想牛要多熟後便悉心地替我們燒肉. 牛小排外面半熟, 像個袋子一樣裡面盛載了京蔥. 服務員技術很不錯, 把'袋子'倒轉頭燒, 京蔥都沒有倒出. 京蔥燒了後沒有半點青草味, 多了一份香味去襯托細嫩的牛小排.特上和牛西冷品質無可置疑, 油花分佈平均, 入口鮮嫩無根，輕輕用力咬就如雪糕溶化口中, 卻沒半點油膩感. 說有點因食物帶來的一下感動並不誇張吧, 這可是我久遺了的日本和牛味道. 牛肉在口裏慢慢分解, 整個人沉醉在滿溢的肉香裡, 或許以後懷念在日本的日子時便來吃一口吧.最後一道牛是和牛橫隔膜厚切(HKD290), 吃這刁鑽部位可是豆腐的第一次呢. 吃前大鄉里的很好奇到底橫隔膜會否很難咬, 質感會否像膠一樣? 意想不到肉質很軟滑, 不用什麼力咀嚼, 卻不會嚼到半點筋肉黏在牙縫. 牛就是愈往裡面吃牛肉味愈濃郁, 味道充滿驚喜.和牛全沒有醃過, 師傅只是把少量醬汁淋上面, 配合這裡的白飯簡直天衣無縫. 豆腐晚上通常少吃澱粉質, 但都忍不住把整碗飯倒入口. 好奇一問之下, 原來這是混合了三種珍珠米做成的, 難怪黏度比平時的較少一點, 吃多了也不覺'蹓'. 很滿足地完成整頓晚餐後皮蛋在附近等豆腐, 嗅覺靈敏的皮蛋一點嗅不出豆腐吃過燒肉哈哈. 下次同食肉獸皮蛋一齊再來挑戰多點和牛吧.…查看更多