hkbbq的个人专页

冇嚟呢間酒樓一排，始終念念不忘佢個叉燒頭，總係想一個人食晒一碟。冇來一段日子叉燒頭改咗用黑毛豬，價錢貴咗，但依然好味。本來我最喜歡食嘅係佢哋嘅上湯虎蝦煎米粉底，佢落錯單變咗伊麵，算啦都幾好食。虎蝦夠彈牙，炸完之後更顯乾身，加埋濃郁嘅上湯就好好味。呢度其中一個我最鍾意嘅特色菜係炒花膠。平時花膠都係用嚟煲湯或者炆， 呢個花膠用瓦煲炒，有特色又夠香口。另外驚上湯時蔬同陳醋排骨一啲都冇揸流攤，用料都好好。呢度座位都擺得好寬鬆，坐得好舒服，係同朋友食飯嘅好選擇。…查看更多

附近想食一個快嘅午餐，我一向喜歡食叉燒飯，仲有出名嘅凍奶茶，雖然坐吧枱唔係好舒服，但我都諗住入去食個簡單嘅午餐填飽個肚。隻蛋煎得有燶邊堅係幾好食嘅，但叉燒唔靚唔好味，而且乾得滯，所以對呢個飯我係極度嘅失望。另外不得不提喺呢度嘅奶茶好出名，但老實講我又唔覺得特別滑，茶底唔特別好，反正全部都只係普普通通，咁嘅份量同埋質素，價錢實在又貴又唔抵，甚至有啲覺得浪費自己食嘢quota嘅感覺，而且名大過實，非常一般。…查看更多

千樂燒味響附近唔算係一間好平嘅選擇，最貴亦都唔係，價錢在燒味店之間算係中位吧。午餐時間$60左右一個套餐，質素也高，算是物有所值。我最鍾意食嘅係佢呢個無雙乳豬飯，乳豬皮脆，肉嫩，而且唔會過鹹。套餐可以選擇湯或熱飲，佢嘅湯好足料，冇落味精，每星期有唔同嘅選擇，雖然唔係昂貴嘅湯款，但返工嘅上班族冬天吃平平常常嘅套餐都有啖湯飲，實在好開心。而且小店每星期都安排派飯，有善長人翁捐贈，老人家可以免費攞一盒燒味飯，幫助長者，利益社會。…查看更多

週末總想遠離市區，所以今次選擇咗入流浮山，食我最鍾意嘅海鮮，仲可以去附近行吓同埋手信。泊完車，停車飛上有幾間酒樓係食完有泊車費回贈，所以我就根據泊車飛上嘅酒樓名稱，隨意選擇左一間未試過嘅。店面唔算好大，裝修亦比較舊，不過店員好熱情。喺外面揀完海鮮，佢就已經上咗一個海鮮湯，材料有豆腐、菜、魚、龍蝦、大蜆，非常鮮味，而且喺屋企整唔到，因為你唔會買咁多種材料為咗整一碗湯。呢排澳洲龍蝦真係好平，雖然喺呢度食已經比外面街市買貴，但價格依然非常吸引，今次叫咗芝士焗，極鮮味，肉嘅質感真係唔係波士頓龍蝦可以媲美。另一個我好鍾意叫嘅餸係砵酒局焗蠔，呢度做得非常之好，雖然今次我哋揀嘅本地號係比較細隻，但亦都不失美味。建議下次嚟呢度可以揀比較大隻嘅桶蠔。另外我哋叫咗蒜蓉粉絲蒸北寄貝。唔知係唔係北寄貝本身質感問題，蒸完出嚟始終有點銀，比唔上食刺身嘅口感，亦都唔似蟶子既嫰滑。睇嚟北寄貝都唔係一個適合蒜蓉蒸嘅品種。…查看更多

疫症持續，外出食飯減少，返工日子既午餐而家多咗買返公司食。而見到開飯有個外賣折扣，而且星期四買滿$80 ，用Mastercard找數就會再減$20。響OpenRice app度落單，行到去餐廳就剛剛有得攞，唔使點等，慳到錢亦都慳到時間。叫咗一個小食椒鹽豆腐同埋小菜麻油爆雞，好有台灣風味，夠香口亦都夠濃味，麻油爆雞既薑蔥落得好足料，所以非常香口，甚有滿足感。椒鹽豆腐小食都唔錯，不過相對來講就冇咁特別啦。…查看更多

最近經過網媒及電視報道後，好多人都去搵懷舊小食，而今多款懷舊小食當中，有一款係我細個嘅時候食過，不過從來冇諗過佢叫咩名嘅食物 — 炸油糍，有人叫佢做炸蘿蔔絲。呢間小食店經常有人排隊，老闆娘係咁喺度炸都冇停手... 專注地做一件事，感覺有啲似日本嘅吉列店或者天婦羅店除咗炸油詞，呢度最多人叫嘅係酥炸生蠔同酥炸海蝦，另外仲有炸蠔餅。由於係即叫即炸，所以等待都需要少少耐性。$13都算好大件一攞上手非常咁熱，等返5至10分鐘放涼之後食就剛剛好。粉漿入邊有蘿蔔絲少少蔥同蝦米，好香口之餘亦都好夠味。入流浮山除咗去海鮮店之外，咁特色嘅小食店都好值得去試吓。…查看更多

銅鑼灣嘅大渣哥茶記開咗差唔多一個月，日日都排長龍我就真係冇心機等啦，剛好今日早咗起身返工前可以食一個早餐，咁就行咗入去啦。首先呢度嘅食品名稱聽到都真係令人會心微笑，例如呢個外國勢力早餐。豬扒好大塊好足料，丹麥多士亦都好香口，所以作為茶餐廳， $45 一個早餐係有少少貴，但我覺得係值回票價嘅。另外想一提嘅係呢度嘅員工大部份都好有禮貌，亦都好有效率。由於要返工所以我嘅時間唔多，我同佢哋講我想快少少，佢哋真係係一個好短嘅時間就攞到個餐出嚟，我響15分鐘之內食完個早餐，所以返工亦都冇遲到。而且有別於一般茶餐廳佢哋嘅員工都好有禮貌，唔會好似其他茶餐廳咁鬧人，所以貴少少我都覺得係值得嘅。…查看更多

一到大時大節，就會諗起食盆菜。方便唔使自己整，一盤過，碟都洗少幾隻。只需要加熱，上枱就會熱辣辣。依家啲盆菜成日見到都要過千蚊，不過最近見到一個疫情下嘅推廣震撼價，仲要係由老牌有名嘅酒樓推出。$188四人用，平均每位唔使$50 ，平時食個叉燒飯都唔止啦。不過無論點都睇咗個質素先。用料都唔係矜貴嘅材料，不過燒味妹覺得佢嘅叉燒同貴妃雞都好唔錯。鵝掌煮得好淋，南乳豬手幾唔錯，冬菇好大隻，就連豬皮都整得好入味。唯一就係椒鹽蝦始終係乾爭爭，就如大部份盆菜一樣。少少建議，直接擺上爐火加熱下面浸住湯汁嘅嘢食熱，但上邊既都唔會熱，建議成個盤攞去蒸完先上爐，咁就上面嘅嘢都會熱了。$188絕對交到功課，四個人我哋冇食飯都食唔晒。聽酒樓姐姐講盆菜預訂成日都爆滿，建議早啲打電話去預訂。…查看更多

銅鑼灣呢個商業中心雖然冇中環咁高貴，但由於租金唔便宜，大部份開喺大商場同附近嘅餐廳價位都唔低。不過行過少少就會發現其實都有好多經濟實惠嘅選擇。響時代廣場旁邊，穿過鵝頸橋另一邊就已經係灣仔，位於街市旁邊有間其貌不揚嘅燒味店。附近有好幾間比較有名嘅燒味店，一個雙拼飯，點要$50-$60，而呢度嘅雙拼飯，平過佢哋好多，等我試吓先。我叫咗個叉油雞少飯，裝飯嘅叔叔好可愛，再三問我係唔係真係夠食（可能我個樣真係好大食）。而且可能因為我叫咗少飯，所以佢比多左幾條菜我。一食舊叉燒就好失望，又乾又柴，反而豉油雞就相當唔錯，夠香口而且雞肉都叫做幾滑。朋友去過都話佢嘅叉燒好難食不過雞同我就幾好，去嘅朋友強烈建議唔好食佢嘅叉燒。呢個價格嘅但我唔會有投訴，但就要小心避咗啲伏位啦。…查看更多

而家週末可以做嘅嘢唔係好多，而且想遠離人群，最好就係離開市中心，講啲九唔搭八嘅時間食嘢。今日嘅限聚令依然係晚上六時後唔可以堂食，於是我哋就喺下午4:30到達深井，食一個我都唔知係下午茶定係晚餐嘅嘢。呢度最好嘅係如果你好彩嘅話車係可以停喺門口，我哋今日還算好彩，落車行入去就有得食。呢度大部份係做四人枱，中間房$1屏風，雖然2人限聚，一台總算坐到四個人。不過如果兩個人去食，就會覺得坐得唔係咁舒服。上枱嘅碗碟好油膩，雖然我本身對佢嘅要求已經唔係好高，但碗碟有油漬，我始終覺得食得唔係好舒暢。叫咗¼隻燒鵝，雖然下裝比上裝貴，但食隻脾總係開心啲，於是就叫咗一個下裝。雖然天氣好凍，但係燒鵝上枱依然熱辣辣，皮脆，而且唔算好油膩，中間嘅脂肪唔算太多，而且都叫有肉食。燒鵝當然最好係全隻叫，因為一定會一隻熱辣辣拎出嚟，如果散叫就好睇多唔多人，多人order嘅時段，一隻燒鵝攞出嚟好快就會被切晒，自然都會好食。今日雖然唔係人多嘅時間，但出品水準尚算唔錯。椒鹽鮮魷做得都唔錯，炸得酥脆，調味剛剛好，魷魚也新鮮。始終食呢類型講究鑊氣嘅餸菜都係傳統酒家做得好。總括嚟講傳統中菜唔講環境講鑊氣同味道，呢度總算唔錯，不過衛生就扣好多分了。…查看更多

今次係開始寫OpenRice之後第九次食燒味。我估計，如果我真係寫到100篇燒味， 千樂應該係我食得最多嗰一間。曾經聽講過佢同出名嘅一樂燒鵝有啲關係，我冇證實過，我只證實到佢嘅燒味唔止燒鵝，其他嘢都好好食。下午茶時段由2:30開始，一份迷你燒鵝飯再加一杯熱飲（或者例湯）係$40。對比起其他店舖，佢唔算好平，但非常有水準。一份迷你燒鵝飯入邊都有八件燒鵝，加上而家食少咗好多飯，就算係迷你，作為一個late lunch，分量來講對我都已經好足夠。燒鵝份量好夠，被香肉或，脂肪唔算太多，飲杯有少少澀味嘅檸檬茶， 正好中和燒鵝嘅油脂。唯一係店舖唔算好寬敞，所以外賣係比較理想嘅選擇。收銀嘅姐姐好有友，和藹可親，無論有幾忙面上都總帶着笑容，實在好喜歡佢哋。佢哋仲係一間良心店舖，會定期派飯比老人家，食飯以外，大家都可以支持一下。…查看更多

灣仔街坊話有間新開嘅一人火鍋，今日同同事一齊，趁仲有四人限聚，一行四人食一餐午餐。火鍋同火山石燒係日韓系列，午市$78起。豚肉火鍋有兩盤豚肉，蔬菜同肉丸籃，湯底可以揀泡菜鍋或者牛奶鍋，我哋揀咗泡菜鍋。一人食感覺清爽乾淨。加$8仲有嘢飲，同事揀咗個抹茶紅豆冰，我就飲咗薏米水，唔太甜亦都清熱。白飯任裝之餘仲有飯素火山石燒極上牛小排，有我喜歡嘅芝麻汁沙律菜，牛小排放喺火山石上面燒，食到後來都仲有溫度，響寒冷嘅日子特別開心。牛排好厚，夠大份。我試過幾間火山石燒包括牛極同另一間，我比較欣賞呢度，肉質唔錯之餘又有牛香，價錢都唔貴。近鏡睇，都的確唔錯。火山石燒嘅另外一個好處就係可以自行控制生熟度，喜歡熟啲就自己切薄牛扒再將薄片繼續燒，鍾意生食就直接切開食就OK。食慣西餐牛扒，用牛扒配白飯的確唔係好慣，但不失係新嘗試。價錢相宜坐得舒服又唔多人，係午餐嘅好選擇。下次真係有興趣試吓佢個晚市任食。…查看更多

好幾年前去星加坡旅行，去過當地文華酒店chatterbox，對於佢個海南雞飯我嘅印象唔深刻，反而好鍾意食佢個喇沙。今日行經K11 Musea，本來想食間牛油果餐廳行嚟行去都搵唔到，見到佢又唔使排隊，所以就入咗去食，回味下星加坡嘅味道。兩份豆漿味都唔錯，唔會太甜，幾有特色，而且豆漿同涼粉嘅味道算好夾。諗諗吓自己都可以係屋企整相比起海南雞飯，我自己比較喜歡Chatterbox嘅喇沙，雖然美中不足係佢嘅喇沙冇落螄蚶，但味道濃郁，極度足料。有三隻帶子，起碼係日本帶子最少3S大小，帶子生熟剛好，但鮮味不足。湯底好味到我全部都飲晒。之前響新加坡都冇食過佢哋嘅鹹蛋雞翼， $78一碟雞翼聽落有啲貴，但佢足足有六隻，仲要size一啲都唔細，其實唔係貴過快餐廳好多，而且調味都做得幾好。佢嘅座位都相對舒適，價錢有少少貴啦，不過行開嚟呢頭都可以試吓。…查看更多

上兩個星期以前已經訂左響呢度食飯，但因為今個星期疫情關係又唔想取消訂枱，於是我哋就決定響度唔食火鍋食海鮮。漁一係其中一個打邊爐用料非常好嘅地方，所以今次喺度食海鮮其實都有啲信心。上湯焗龍蝦上湯做得好好，味道夠濃又唔會太鹹，而且龍蝦爽口，焗得好靚，賣相亦都好好。成晚我最鍾意係蒸蟶子皇，呢個係一個好簡單嘅菜式，但就唔係間間都做得好。聖子夠大隻蒸得剛好唔銀，下面鋪咗好多粉絲，而粉絲亦都用咗熟油、生熟蒜同金菇調味，粉絲吸收晒聖子嘅鮮味，真係好想再食多一隻。竹笙扒雙疏既竹笙好好，好過平時喺其他酒樓度食嘅好多，竹笙吸收晒啲湯汁，一道清淡嘅健康菜式今日食咗兩次西芹炒海鮮，呢度嘅炒相蚌更具層次。用咗珊瑚蚌同桂花蚌。炒桂花蚌食10次有10次都過熟，但今次係第11次，桂花蚌依然嫰滑。鮑魚煲我估唔到佢竟然攞豬膶嚟炒，我唔食豬潤只係食咗鮑魚，同埋旁邊嘅洋蔥，好有特色。不過相對來講我就比較喜歡港大同學會嘅砂礓鮑魚雞煲。馳名蔥油雞絕對冇名大過實，蔥油好香，雞亦夠嫰，就連雞胸都唔會鞋。大家都食到飽飽地，海鮮炒烏冬叫做係單尾，味道都唔錯，但海鮮就唔係好多。下次嚟呢度唔一定係打邊爐，或者打邊爐之餘都可以試吓佢哋唔同嘅小菜同小食。…查看更多

雖然我好鍾意食西餐，但同朋友食飯我都好鍾意叫餸share嚟食。大排檔小炒嘅晚市好出色，午市套餐一個價錢已經包左一碗湯、一碟小菜、一碗白飯同一杯嘢飲，平均$70就買到單。今日嘅例湯係花生眉豆雞腳湯，煲得好入味，雞腳都煲到好林。蝦干蒸肉餅嘅肉餅好有質感，唔太肥亦都唔太瘦，我特別喜歡上面嘅蝦乾，夠大隻又有鹹鮮味，而且肉餅本身調味已經足夠，所以都唔使落豉油。黑松露西芹炒蝦仁都炒得好食，而且有菜有肉食起上嚟好健康，亦都唔會好似出面啲酒樓咁吵完就加生粉水落去。蜜椒薯仔牛柳粒，甜甜辣辣，薯仔係炸過先攞去炒所以好香口，反而牛肉我就覺得一般一般因為用嘅牛肉比較瘦唔夠油香味。響呢度食飯仲可以儲印仔，儲夠12個就免費一餐。…查看更多