Lin Rose的个人专页

約咗朋友食午餐，好彩一早book定位如果唔係又要等好耐，我哋今日早咗去，所以有得揀位。入到去好少女心，周圍都係粉紅色同d花花。我哋叫咗兩個set lunch，一份野菌意大利飯同一份係菠蘿豬扒漢堡包。喺銅鑼灣用呢個價錢食到呢啲嘢我都覺得算係咁。個野菌意大利飯唔算太大份，忌廉好香食到有蒜香味，唔錯。另外個漢堡包呢我就覺得個豬扒有啲硬。食完之後，我哋都忍唔住嗌咗個窩夫同樣都係打卡一流，味道都一般啦，好難唔好食嘅。…查看更多

今日帶埋狗狗出街想搵一間可以帶狗隻入去食嘅餐廳，由於住喺附近，所以我哋就選擇去華嫂。仲有今日係閑日，相信會容易等位，我哋知道星期六日華嫂呢度一定係排晒隊。果然，我哋到咗之後，等咗一兩張枱就有位。我哋嗌咗個鹹牛肉豬仔包，外脆內軟，啲蛋炒得好鬆軟仲有蛋汁，好食！兩碗湯麵都係皮蛋芫荽嘅，個湯底好鮮甜，芫荽又夠多，份量非常之大！原來食到最尾係食唔晒，因為佢好足料皮蛋有三大件，食唔晒！整體係好食嘅，不過如果天氣太熱坐室外有啲滴汗啦！…查看更多

今日約咗朋友一齊去海港城行街，好彩一早有book定，因為呢段時期如果唔book定真係好難搵位，尤其是星期六日。今日我哋一人點咗一份午餐，我最鍾意嘅就係鰻魚飯，我老公點咗天婦羅。鰻魚飯十分足料，有兩大片鰻魚，另外有個蛋蓋係鰻魚上面。成個presentation係非常之好！我老公點咗天婦羅飯，份量亦都非常之大，粉漿非常之薄，又鬆脆，另外炸蛋亦都做得好出色，因為佢入邊仲係流心嘅！基本上一人一份係食唔晒，我本身細食嘅同人share一份應該係啱啱好！…查看更多

有客人來自遠方想食意大利野，搵暈晒全個尖沙咀，覺得呢間無論環境，地點，都好適合，價錢又，適中所以決定試吓呢間餐廳。圓方平台呢個位置有好多餐廳，其實都試過好幾間，覺得環境唔錯，所以當日我哋選擇咗坐戶外，因為天氣開始涼幾舒服。我哋點左兩個頭盤，一份係牛肉，一份係蝦；另外嗌咗一個燒海鮮盤同埋一份青口。頭盤嗰份生牛肉份量都算唔錯，四個人分都夠，牛肉非常之新鮮。另外，燒海鮮盤好正，鍾意嗰陣炭燒味，雖然份量唔多，但係三百幾蚊算係咁。青口就一般，不過個茄汁就點麵包一流。去到主菜，我哋點左一份牛柳，一個pizza。份牛柳簡直完美，又淋，煮佢半成又煮得啱啱好，出色！另外個Pizza都好意大利風味，所以呢一餐真係抵讚！…查看更多

今晚去咗圓方行街，順便上去平台望有什麼東西好吃，四位朋友都想吃日本串燒，所以選擇了這間居酒屋。入邊環境有d似喺日本嘅居酒屋，可能好耐冇去過旅行所以感覺好親切其實今晚我哋order咗好多串燒，當中牛脷，雞翼，雞軟骨串燒好出色，入邊好Juice，外邊又脆皮，鹽又啱啱好。另外仲有雞皮餃子，蝦天婦羅，炸軟殼蟹同天婦羅海苔。雞皮餃子好特別，雖然用雞皮包住但係個食落個雞皮唔覺得油膩。另外，天婦羅海苔都好特別，好香脆，送酒一流！不過炸軟殼蟹比較失色，個人覺得好腥。…查看更多

星期四約咗好朋友到圓方行街，諗起Cafe DECO pizzeria呢間食肆，坐得算係舒舒服服，所以就揀咗喺呢度食。我哋兩個人今日揀咗四道菜，有凱撒沙律，鵝肝酥皮盒子，仲有一個Parma ham薄餅，最尾仲有嗌左一份pancake。沙律果醬好濃，有夠多，所以非常好吃。令人驚喜係個鵝肝入邊有蘑菇配上酥皮非常美味。至於個薄餅都不過不失，食到最尾加多一個pancake，呢個都係令人驚喜嘅，因為佢個pancake算做得有蛋香味，加埋自選雪糕正!而且而家用AR卡星期一至四仲有半價，抵！…查看更多

一直以為ICC 101樓上啲食肆價錢會相對昂貴，因為環境優美，但係發現原來呢間Boss廳101個價目一啲都唔算離地。其實都食過好幾次，今次係第一次寫食評，因為都係想讚下呢間食肆嘅食物。中午分開兩個時段，我就book咗11:30，點心精美，每一樣食物都很有水準，而且可以按人頭計，幾方便。本人最欣賞過芋角，唔油之餘入面仲有芝士，可能其他人會覺得肥膩，不過我還可以。佢嘅炒粉麵飯都唔錯，我哋點左個乾炒牛河，唔係好油，又有鑊氣，而且份量都大。另外最尾仲有甜品送。以呢個價錢又望到海景，係物有所值。…查看更多

Lady M呢間嘢無論堂食定係外賣，成日都會見到一棚人喺度排隊，視乎人多定少姐。佢一件餅要$60-70幾蚊，其實係偏貴。不過海港城有coupon，咁就抵食呀。唔使講，佢個千層蛋糕一定係signature，乜嘢味都好，都幾好食，我本人最鍾意玫瑰味，仲有新出嘅爆谷味，另外仲有栗子蛋糕同埋芝士蛋糕，我都幾鍾意，不過栗子蛋糕啲栗子就比較淡同creamy，因為通常出面d栗子蛋糕上面嗰d栗子蓉真係好濃嘅，係純栗子，冇乜加cream，不過lady M就cream 重d。值得一提係個芝士蛋糕，竟然出色，似New York cheesecake，濃味，同上面有層yogurt ，令到成件餅冇咁漏，非常好！…查看更多

將軍澳呢排開咗好多食肆，中午同同事行過，望到入面幾靚，個menu 價錢又合理，所以一齊入去食。我點咗一客韓式醬油豬腩肉飯，同事點咗炸雞配紫菜飯卷，仲有一人一杯飲品。我個客飯一嚟到就電話食先，因為個presentation 真係幾好，我以為呢種飯會用石鍋上，但係佢用木碗。配料好足，腩肉少咗d，不過我ok，少肉多菜。拌好之後，啖啖都有配料，汁又夠，我就額外叫侍應攞多少少韓式辣醬，佢好快比到我仲要好多，正！冇石鍋個問題係食到最後就凍咗。不過呢個價錢係好ok嘅！ …查看更多

因為屋企人生日，諗住高高興興book 間房食個生日飯，所以諗到嚟呢度食，因為之前食過，環境又靚，食物又可以，所一行10人決定係星期日嚟呢度食。不過如果星期日book房，最低消費要$5000，同埋要比deposit。間房其實好正，有privacy ，服務都唔差。我哋點咗2個海鮮拼盤，魚生，生菜豬腩片，馬沙文牛臉，煎十隻老虎蝦，仲有開咗三支酒。其實食物質素幾好，每個人都食得津津有味，最尾我哋都有order左一個朱古力蛋糕。點知食完之後個晚，各位原來都返到屋企之後肚痾。其實之前同我老公食過3次，佢2次都有痾，我就冇事，所以冇為意。不過經過今次真係冇下次啦！…查看更多

今日同事話happy Friday ，一齊買珍珠奶茶，諗住試吓附近個間花想茶，見到佢近排開，都有人買，所以大家都好興奮咁叫外賣。我就點咗一杯芋香奶茶，少甜少冰。都有d期待，但係見到實物個陣，OMG，係一杯紫色嘅嘢，一飲落去，水一般的味道，又稀，想點呀，冇茶味，冇芋頭味，個顏色好明顯係用粉沖出嚟嘅，好心就比多少少heart啦。我飲咁多年珍珠奶茶，真係未試過衰到咁！講真呢啲嘢好難唔好飲，咁都攪成咁真係恭喜晒！ …查看更多

今晚唔想煮飯，又想近近地，就嚟咗呢度食晚餐。知道呢度老闆10分好人，有好招呼，又鍾意同人傾計，所以過嚟呢度食。今日點了一份羊架同埋一份牛脷。份羊架要左五成熟，等咗一陣，好快就上菜啦！個羊煮得啱啱好，五成，味道一流，冇羊嘅蘇味，又嫩！另外，薯菜入邊嘅薯蓉又好好味，係新鮮薯造嘅，食到粒粒薯仔唔係開粉！食到停唔到口～～另外份牛脷一樣出色，外脆內軟，配上特別嘅汁又係食到停唔到口！另外其實呢度有新鮮法國生蠔，又係非常美味，不過今日實在太飽了。留返下次！…查看更多

今日得閒經過元朗，知道呢度開咗一間錦麗，所以上嚟試吓！好彩未到食飯時間，所以快快脆脆入去坐低。因為一到食飯時間，就會大排長龍，所以今日好好彩！佢哋冇set lunch，只有散叫。所以我就叫咗一碗生熟牛肉湯河。侍應放咗一杯仔芽菜喺枱，另外仲有生辣椒。勁正，因為本人係勁食辣椒嘅，平時一般越南河要叫佢攞辣椒，仲要得幾粒。我等左10分鐘左右熱辣辣嘅湯河就送上，湯底牛肉味非常清甜，另外牛肉嘅量都好多！有四件牛腩，另外仲有三片牛肉。牛腩好淋，非常好!…查看更多

The cheesecake factory開咗咁耐未入去食過，因為人實在太多！由於今日放早，所以過嚟試一試。未到六點已經有人開始排，由於我個friend未到，所以我去攞位先。過咗六點後，啲人係瘋狂地排隊！果然利害！我先入座，點咗一份凱撒沙律加烤雞，仲有一份墨西哥脆片，當然唔少得一件士多啤梨cheese cake啦！食物size都幾大，個凱撒沙律個汁夠多，所以好好味。另外加上烤雞又夠juicy，唔錯！另外，個墨西哥脆片係超大份，芝士醬又多，加埋其他牛油果醬，番茄醬，仲有酸乳酪，好味！最後壓軸係件cheesecake，濃濃芝士味加埋則邊啲忌廉，原來可以溝淡件餅的甜味，非常好👍🏻…查看更多

星期六上午，竟然約咗朋友去幸福班戟食早餐！因為早上比較人少，所以一早11點鐘就去到！果然人唔太多，所以等左10分鐘就有位了。我哋一人點了一份。一份原味加雲呢拿雪糕，另一份熱朱古力果仁。以為真係要等20分鐘，其實10分鐘就到，可能因為人唔多。原味果一份配有蜜糖，如果唔加就可以完全食到原味啲蛋香味！個班戟又鬆又軟，加上雲呢拿雪糕，超正！另外嗰份熱朱古力班戟，個熱朱古力醬超好味，又唔甜，啲果仁焗得好脆，我超鍾意朱古力醬！…查看更多