G飲G食的個人專頁

約咗朋友去將軍澳傾偈食飯，撞啱係中午放飯時間，行過見到呢間坐滿人又唔係好多人排隊，就入咗去試吓。入邊環境都唔錯，坐得都幾舒服，見到大枱唔多，估計比較適合兩人或者四人好啲。先嗌咗個牛油果青瓜蕃茄茄沙律伴芝士配檸檬醋醬，點餐過程係覺得啲名比較長，如果加個號碼會更加方便，先講份量非常足夠，比想像中大份，味道亦都非常唔錯，好適合素食主義嘅人。另外再叫咗個紅咖喱鴨胸肉忌廉長通粉，份量亦都係比想像中大，味道亦都非常之好，最特別係加咗菠蘿入邊，令到個味豐富咗。嗌完兩碟嘢先知道原來係當兩個餐所以有兩杯嘢飲，其中一杯叫返Single Origin Brew, 免費跟嘅。另外仲要咗一杯Uji Ceremonial Matcha Latte, 味道唔錯。最後仲加咗一個藍莓合桃Homemade Loaf cake.整體嚟計無論價錢份量味道同埋環境都係有驚喜嘅。…查看更多

同朋友做完嘢之後趁有時間去食啲嘢，其中一個朋友話想食點心，尖東地鐵站行出嚟就見到呢間金功夫，所以就入咗去食多次。都係時間關係，下晝冇乜人，所以無論搵位坐同等嘢食嚟嘅時間都相對快。分別嗌咗生煎包、蝦餃、馬拉糕、鳳爪、叉燒腸、燒賣、小籠包、山竹牛肉、同埋甜品。生煎包就要問佢先有比到醋我哋，唔知係咪平時本身唔預我哋要點儲食。蝦餃亦都係我哋問佢攞辣椒油先至有，味道還可以。馬拉糕熱辣辣出嚟，所以都算唔錯。 鳳爪還可以冇乜特別評價。叉燒腸都係普通酒樓腸粉嘅質素。燒賣比想像中足料，但係有一粒有少少筋。 小籠包係屬於比較乾身嗰種，即係裏面冇乜湯嘅，依個係個人口味要求。山竹牛肉亦都冇乜特別，喼汁要特別問佢攞多啲。甜品唔記得咗叫乜嘢名，食落去有少少乾咗啲，同埋咁啱朋友唔係太鍾意食椰絲，所以對佢哋嚟講就爭咗少少。…查看更多

有一次去尖東附近做嘢，趁有時間同個朋友再去覆桌食多一次呢間潮州麵館，因為想試吓其他湯底嘅味道，可能因為仲係算做農曆新年假期附近，所以唔算太多人。今次就想試吓佢個豬油撈飯，所以叫咗一個豬什拼豬油撈飯，豬油嚟到其實都幾大碗，裏面真係幾足料同幾多唔同嘅款式，豬油撈飯基本上個香味實有嘅，簡簡單單豬油加豉油，雖然都明白會好唔健康同埋比較肥，但係都係希望豬油可以再多少少，因為撈起上嚟啲飯感覺唔係好夠豬油味。朋友就叫咗個豬骨湯底嘅麵，加咗腐竹，魚角，同埋牛肉，我試過個湯底都好香，下次我都會食呢個湯底。另外叫咗個清湯牛肉餅做小食，同埋一個冰鎮墨魚頭小食，兩個嘅味道都好好。…查看更多

又係趕住去做嘢嘅關係，所以同朋友經過啲地方叫外賣就算數，簡單經過見到牛奶冰室就直接響嗰度叫外賣，等嘅時間都唔算太耐，可以接受嘅。第一個飯個名實在太長，其實個人覺得個名改得有啲實在太誇張，去到尾都係叉燒煎蛋飯。全名叫做蒜香蜜汁叉燒煎半焗流心雙蛋飯，成個飯其實都幾好食，蛋亦都真係做到留心嘅，雖然其實都係太陽蛋咁上下，叉燒亦都唔錯，蜜汁味都幾濃，我諗唯一唔滿意就係佢個名實在太無謂地咁長。上海嫩雞米線，朋友話食落都唔錯嘅，只不過唔會有啲乜嘢驚喜，我淨係想話個名簡簡單單咪幾好囉。仲有一個就係惹味中式牛柳，配埋白飯，呢個中式牛柳都係用蜜桃唔用菠蘿，所以味道會偏甜多個酸味，不過配落牛柳到其實都可以接受，份量亦都唔錯，個名亦都唔會太浮誇。…查看更多

農曆新年假期下晝去又一城飲咖啡食甜品，趁住時間比較早去嘗試睇吓會唔會唔使排隊，新一年好運氣唔使排隊就有位，坐低冇耐之後就見到開始有人龍出現。地點係其中一個優勢，就響九龍塘地鐵站出嚟又一城入邊，位置方面其實有少少隱蔽，如果本身唔知道或者冇去附近行開shopping未必會發現到，其實係一個唔錯嘅食飯地方，唯一係平時排隊嘅人真係唔少，所以今次好好彩。你都主打都係食pancake，一款係時令版去核車厘子pancake，另外一款就係朱古力pancake。基本上就係水準好穩定同埋好味，唔會太甜，亦都唔會太漏，加上幾個人可以叫唔同款一齊share嚟食更加好。咖啡方面個人覺得都係一般coffee shop嘅水準，絕對唔差，但係又唔算印象特別深。當然有部份飲品係唔錯嘅，但係真係冇試過好多，所以唔敢亂講…查看更多

大家年初一想出街食素菜午飯，就諗起依啲時間出中環可能仲冇咁多人，所以就嚟依度食，仲要本身地點響蘭桂坊隔離，由地鐵站行上嚟都唔係遠。同埋本身裏便好多窗光猛開陽，裝修亦都唔錯，所以響呢度食午餐感覺都特別精神爽利。但係掛住食真係唔記得叫咗啲乜嘢菜，淨係記得呢度個數叉燒做得又靚又好味，從來都唔會失望。佢個栗子煲就係穩陣之選，唔會點樣失手，味道亦都唔錯。素咕嚕肉又係另外一個一定會叫嘅餸，都係因為佢整得又脆又好味。豆腐又係另一個穩陣之選。佢個炒飯味道都好香，飯粒都好有咬感，唯一係個份量希望可以多少少。剩返呢個唔記得咗係乜嘢餸，淨係記得都係好味嘅。…查看更多

又係去開尖沙咀嗰頭做嘢行到去尖東嗰度想同個朋友坐低食啲嘢，不過上次講咗唔會再去食嗰間牛腩牛雜，所以就行過少少試吓，呢一間粉麵店，其實個人嚟講個外表裝修真係唔係好吸引，嗰種懷舊風味有少少尷尬，不過重點當然其實係講緊佢嘅食物。我叫咗個胡椒湯底牛脷豬脷墨魚頭麵，第一樣嘢係胡椒湯底有驚喜，跟住有得選擇嘅呢三個餸亦都唔係成日都有，所以係食得開心好味嘅。另外叫咗個牛肉湯餅做餸，佢嗰個湯亦都唔錯，牛肉餅本身係有驚喜嘅。跟住仲有叫咗個醉雞，份量方面有啲偏少，但係味道方面都係唔錯。最後忍唔住加咗個炸鰻魚皮，呢個味道都好香，亦都好夠脆又唔唔會太韌。總括嚟講全部都係比想像中好，所以好大機會會再返嚟食過。…查看更多

因為工作關係去開紅磡嗰頭做嘢，但係之後又要趕住時間，所以都係決定買外賣，行落去附近睇咗一陣唔同嘅舖頭突然間見到呢一間小店，醒起曾經有人同我提過話佢嘅味道好有四川嘅感覺，所以就買來試吓。主菜叫咗個冒菜泉水雞，佢個湯啱啱開始唔知道，食咗兩啖發現要撈得勻循先至會更加好食，主要個味道真係好有正宗四川嘅感覺，泉水雞方面可能有少少辣，所以唔係好食得出有乜嘢特別嘅味道，同埋份量會比較少，下次可能都係會試吓嗌幾個餸，睇吓感覺會唔會唔同啲。另外加咗一個青瓜絲川北涼粉，睇落好似好辣咁但係食落其實都唔算太辣，味道都有中國風味，整體嚟講應該仲會返去試吓第二啲菜。…查看更多

同個朋友去咗深水埗嗰邊搵啲嘢同埋買嘢，深水埗知道有好多好食嘅嘢，但係因為攞住好多嘢唔想走太遠，同埋亦都唔係好熟啲地方，所以就行過附近見到邊間睇落比較唔錯嘅就隨便入咗去食。嚟咗呢間主要係因為佢靠近西九龍中心方便我朋友食完之後去攞車。因為係下午茶時間，個人都係比較鍾意食炸雞髀沙律，所以結果都係點咗呢個做下午茶餐，隻雞髀炸得都唔錯幾好味，仲會有心機加粒蕃茄同菜墊底睇落好抵啲，沙律亦都有傳統嗰種沙律薯仔雜果味道。另外仍然鍾意飲紅豆冰，呢度返過嚟紅豆嘅份量都幾多，足足有半杯，最重要係飲落去紅豆亦都唔會太甜，加埋奶味都幾足，所以都算可以嘅。…查看更多

響尖東同朋友做完嘢要講下一場，所以諗住響附近隨便搵個地方叫個外賣快啲搞掂佢就算，跟住同朋友再試吓食呢間牛腩，其實之前已經試過一次佢嘅魚麵，口感有啲偏韌，有種未煮熟嘅感覺，湯亦都偏向普通，最重要係幾個朋友食得我一個中獎，有隻中型嘅烏蠅響入邊，不過呢方面我覺得香港飲食唔會太大問題，我只係簡單撈走咗去繼續食落去，只不過重點味道真係比較普通。今次即管比多個機會試吓外賣牛腩牛雜飯，牛腩牛雜嘅份量一般般，只係生菜墊咗底睇落好似多啲咁。因為我唔係叫湯飯，所以佢真係冇湯嘅，不過唔緊要，但係佢都冇另外俾多少少牛汁或者其他配料，所以啲餸加落個飯度除咗有少少鹹味之外都係覺得好淡，唔係好明白點解可以咁樣就俾人食，所以基本是埋呢次之後應該都唔會再去食。…查看更多

響尖東做完嘢同朋友搵嘢食，行吓行吓就過咗去尖沙咀，跟住諗起好耐冇去過厚福街，就過去睇吓有乜嘢食，結果去咗記憶裏面都係開咗一段時間同埋性價比好高嘅越南嘢，環境方面就係好家庭式嘅小店感覺，地點方面始終都係厚福街就係方便。套餐價錢實在好抵，先嚟咗個越南新鮮牛肉河，雖然牛肉會比較熟咗少少，但係份量都算係好夠，洋蔥都唔錯，香菜好似見唔到，湯嘅味道都可以接受，當然我都係會自己加魚露落去令到佢香味多啲。跟住叫咗一杯好耐冇飲過嘅珍多冰，珍多冰真心唔識評論，主要係覺得飲落去好睇好開心就已經足夠。仲有當然就係佢哋個餐嘅配菜份量實在超級足夠，越南春卷，泰國雞卷，鮮蝦米紙卷，三款嘅味道都唔錯，真心冇乜嘢挑剔，仲要有糖水同芒果糯米飯！份量仲唔係少添！性價比實在高到一個點！…查看更多

上環區同朋友做完嘢午飯時間搵嘢食，難度超高，完全要靠朋友帶路去睇吓邊度有機會可以唔使等太耐位就已經好滿足，結果佢帶咗我去食越南嘢，可能時間比較好，所以都唔使等好耐就有位坐，地方同環境都唔錯，附近行過嘅人亦都唔多，當然位置會離開地鐵站稍為遠咗少少，但係仲可以接受嘅。叫咗個餐首先杯話梅鹹桔水份量同味道都唔錯，好醒神。至於主角生牛肉湯粉各方面都幾好，第一樣係好難得啲牛肉都真係半生熟狀態，因為有啲會整到熟晒，有香葉有洋蔥，湯嘅味道亦都幾好，不過個人口味問題，自己都係會加魚露落去啲湯度令到個湯在鮮味啲。…查看更多

喺黃埔嗰邊做完嘢，有啲肚餓同個朋友去搵啲下午茶食吓，唔算識好多地方咁啱喺個商場裏面行過見到呢間百分百，亦都見到裏面有位坐所以就入咗去啦。地方環境都算幾好，食完去返地鐵站都唔算好遠。五分鐘左右。我就叫咗個炸魚柳加薯條，塊魚柳都算幾大塊同炸得幾好，唔會好油膩，薯條份量同味道還可以咁啦。嘢飲方面我都係叫返我最鍾意嘅紅豆冰，佢就叫咗個奶茶紅豆冰，紅豆冰味道都算還可以，奶茶紅豆冰飲落可能係自己唔習慣，特別得來都幾得意。…查看更多

同個朋友工作完之後一路傾偈傾得太開心，發覺傾極都傾唔完，結果決定一齊食晚飯繼續傾落去，地區就係尖沙咀，亦都係因為比較懶嘅關係諗住搵個比較方便嘅地方坐低食，結果就去咗iSquare搵吓有啲乜嘢食，就搵到呢間星怡。見到佢環境都幾企理，人亦都唔算太多。叫咗個桔仔話梅水，味道方面真心冇乜特別，但係都叫做夠大杯同埋望落去賣相唔錯。仲有要咗一份斑蘭咖央多士，份量同醬料都足夠，其實食落去都幾飽，都算好好味嘅。新加坡魚蛋喇沙麵份量都算足夠，喇沙嘅味道都會出到嚟，魚蛋都算彈口，整體嚟講算幾好。至於個星洲麥皮蝦份量，亦都算係比較有特色嘅一個菜，甜甜香香咁樣，因為朋友唔係食好多蝦，所以成碟連埋啲麥皮俾我清晒，係好味嘅。仲有個邪惡嘅鹹蛋黃炸魚皮，望落去鹹蛋份量好似唔係好夠咁，不過食落去都食到鹹蛋黃味道，炸得好好味啱啱好，實在好邪惡。…查看更多

朋友約我下午茶傾啲嘢，響旺角附近想搵個企理啲冇咁多人嘅地方，不過朋友又貪心想試吓啲新嘢，所以就行咗一陣睇吓有乜嘢地方可以選擇，結咗就揀咗嚟呢間soffee, 好明顯佢俾啲蛋糕Sell到，不過講真，就算未講味道係點，淨係睇到啲蛋糕我都覺得好吸引。而且佢嘅環境都算幾好，下午茶時間亦都嚮旺角區嚟講唔算多人，亦都算安靜，所以方便傾偈。蛋糕係乜嘢款式我就講唔出因為係朋友叫嘅，不過食落去都幾香幾好味，唔會覺得太甜，呢個份量都算唔錯。咖啡方面唔算覺得太突出，就係響水準之上，不過同蛋糕一樣，咖啡嘅presentation都好好，起碼睇落去個人都已經開心咗先，整體嚟講特別嚮旺角區真係幾好。…查看更多