<食神>的个人专页

我都幾鐘意食謝謝儂的回鍋肉, 因為都真係做得唔錯! 又唔會因為係午巿套餐會比少啲你食! 其實都算係咁, 連加一就$66不過大家都要注意就係午巿唔夠$200佢就只收現金的! 所以中午一個人去食飯就記得要帶現金... 如果想食麵, 佢都有麵餐跟下小籠包, 所以我都覺得佢都係午餐可以選擇的好地方... 仲有個鱔糊我都食過唔錯! 大家可以考慮下!…查看更多

好耐都無食過泰國野... 見到附近有得食! 於是就試下呢間啦! 冬蔭公係值得飲的! 起碼個味道係對版的! 其實佢開响個 Food Court裡面, 我對佢的期望都唔係好大. 預左都唔會好得去邊.... 但個冬蔭公係有驚喜的! 再黎都要讚下個生蝦, 個擺盆都算好有誠意吧! 再加上個新鮮同味道... 都好過好多泰菜, 因為大多用的蝦都係好細隻, 食落無咬口. 佢收 $88 有6隻,  咬落啲肉一般厚肉.... 算對得起消費者!  絕對食得過.... 黎到個明爐燒烏頭, 味道係完全無問題... 不過食材就好一般! 個魚肚裡面都未完全洗乾淨. 魚的肉質都係好淋... 只能講有形而無實. 如果佢肯買好少少的材料回來. 用番呢個整法! 食落已經係二回事.... 希望佢可以改進!仲有個咖哩軟殼蟹, 呢個仲要話係招牌, 我就真係真心覺得係 [伏] ... 個 麵包 本身唔知係咪放左好耐! 個包殼係好硬! 個咖哩汁我相信佢仲要啲時間改良, 因為而家呢個汁我上枱果時已經係 [傑] 到一個點! 即係去到一個 [糊] 狀... 完全唔合格! 可能佢話係招牌, 我對佢的期望亦高左啲! 食落佢個雪藏軟殼蟹, 我唔知係咪再用萬年油再加上厚厚的粉去炸... 吸晒啲油益味! 真係唔知係咪我唔好彩! 所以我完全覺得係失敗.... 唔建議食! 啤酒 $28 - 330ml 本身亦都定價太貴了! 食泰菜本身想飲下啤酒... 但呢個定價如果個720ml 我會接受... 但係330ml  ... 大家可以自己諗了 …查看更多

每年一到呢個時候, 稻香都會有$1雞... 今年無左$1雞就變左 一蚊乳鴿. 同場加影呢期好多人話抵食的澳龍... 連埋伊底都係$168, 每隻話太約一斤. 咁聽落去都抵食的. 於是乎就去試下啦! 供應時間由晚上1830 - 2030 ... 但都要視乎會唔會賣晒! 我昨晚食的時候唔使2030就話賣晒咯... 成個池的龍蝦都賣晒.... 真係勁! 想食真係要早少少去排隊, 食唔到頭輪..... 恐怕都難食到! 不過可能都要睇一間稻香, 我有啲朋友話佢果面無咩人等位. 所以都要睇彩數...講番個食物質素先, 乳鴿確實係另人失望... 之前都唔會做得咁差! 可能係一次過炸的關係... 食物的水準就維持唔到了! 可能係屯門呢間個司傅問題, 我見佢乳鴿係出得好快, 但係上枱已經凍同埋軟晒, 啲肉亦都好軟.... 可能大家講 $1 啫... 咁又係! 我只係覺得個廚師咁樣對待食物有啲浪費!至於個龍蝦, 我就一定要讚.... 因為確係得! 雖然由我落單到有得食起碼等左一個鐘, 但係我食完確實無投訴... 個乳鴿算啦! 反正都係做前菜啫! 個龍蝦上枱仲係熱, 好香... 上湯煮仲有伊麵吸番個汁! 諗起都想食... 個澳龍好新鮮, 肉質彈牙! 真心好味.... 如果個伊麵再多啲就正... 因為啲汁真係好好味呀!要再揾日去食多次先.. 不過我會去另一間試! 因為呢間個乳鴿真心唔得!…查看更多

一直都好想試下呢間京都勝牛... 因為見到佢有京都既吉列牛食! 原本又想睇下 Openrice 有無得訂位, 可惜又無得訂... 心諗可能係太受歡迎, 所以就只好自己早啲去等位囉... 要食好野就係要等啦! 好正常啫.... 今次我係去食午餐的, 佢1200開門, 我地1140就到... 攞左票! 排第一... 真係開心到呢! 跟住就一直有好多人黎攞飛等食了! 心諗.... 咁多人等應該都真係好有水準喎!坐低左佢係自助點餐的, 我地就當然要點三味套餐啦! 可以試晒三隻味喎! 再加左個吉烈豬豚肉, 温泉蛋, 仲有吉烈蠔 .... 開心期待著!先講個三味....  如果我再去就只會點菲力牛,  睇你本身係咪想食牛味重啲啦.. 唔係都可以點翼板牛的! 至於醬味薄牛我就真係唔建議, 佢係破壞晒全碟的完整性... 吉烈本身真係好蝦人整. 整得唔好就會好油... 呢個醬味薄牛, 就係因為太薄, 再加左麵包屑去炸, 一凍左就會好油. 食落去真係唔知似乜咁!其他二個牛都係有相同問題... 吉烈就係做得唔夠好! 但係個吉烈豬豚肉又唔係太差, 我無特別影出來了... 但係差一皮就係差一皮.... 雖然佢都大致做到個脆身效果.... 起碼唔會好似吉烈牛咁油晒! 但係夾起身食到中間果二舊, 發現皮肉分離.... 呢個係另我失望的原因...反而個吉烈蠔係做得最好的.... 好好味! 炸出來唔會油... 夠乾身... 咬落有汁仲係熱! 呢個要讚.....…查看更多

其實一直都覺得屯門店既越棧出品好一般, 仲記得以前我會成日响機場幫襯! 起碼砌出黎碗河粉都係好靚仔.... 而家屯門呢間唔知係咪疫情關係, 生意又無咁好. 就直情都唔鬼理你.. 掉晒落個碗跟手放湯就算.... 味道整體係無問題既, 都係平時果個味道, 材料都唔係太差, 問心, 佢都算抵食. 但係個賣相我諗係要正視下...另外個三色冰, 老實講就真係都算差, 佢叫椰汁三色冰, 但係椰汁味唔夠.... 唔知佢用邊隻椰汁, 我下次寧願飲番青檸梳打算了.…查看更多

星期六日出去郊遊下都唔錯... 今次去左大埔既森林Cafe, 都係朋友介紹既....  真係好似去左外國咁! 又可以楂車泊門口食野... 真係唔錯!下次都要去... 佢1200先開, 但係我地就早左到.... 週圍睇下影下相, 都好舒服... 最正係食食下仲會見到好多松鼠走黎走去.... 仲居然比我影到相呀! 好開心... 估唔到香港都有咁既地方! 今次我地點左個安格斯牛扒漢堡, 好好味... 啲肉汁咬落去就流出黎. 加上即叫即做... 一定新鮮夠熱!再點多個魚手指, 其實就好似自己買盒魚手指返屋企食果隻咁, 勝價比就一定係食安格斯感覺抵好多咁! 不過都係好食既!其實我地仲點左二杯凍Latte ... 不過無影相! 都好飲嫁! 整體食物好好食! 又加上有環境, 有泊車... 絕對值得去既地方!親親大自然... 好正呀!…查看更多

响而家疫情的時候... 旅行又去唔到!  而家深水埗咁多咖啡廳, 去扮下文青都好喎..... 星期六出去深水埗想揾間咖啡店坐下, 最後選左呢間, 我覺得空間感夠大. 唔似得其他果啲太細間... 呢度仲有二樓, 但要外賣上去飲. 可以就等番樓下, 好Feel 好多..... 由於我地已經食左野, 但係坐低又好想試下佢啲食物, 所以就叫左個All Day Breakfast. 貪佢乜都有... 賣相都唔錯... 咖啡我本來想試佢個貴既冰滴 $78 但佢話已經無咯... 所以就叫左個 House Coffee.... 呢個我要推薦. 如果喜歡咖啡既, 相信大家都會喜歡呢個冰滴.等我下次試埋個$78睇下有咩分別先...成間舖都好舒服... 樓底又夠高, 真係無揀錯... 最衰就無得坐近門口啦! 不過坐裡面都好有Feel 好似去左台灣旅行咁! 正呀!個All Day Breakfast都見佢好細心擺碟, 因為見到幾個人叫左出品都差唔多一樣... 睇到廚師既細心! 讚一個...…查看更多

Food Combo 都開左一段時間了, 每次經過都有諗下好唔好去試下. 今次下定決心去幫襯下啦! 所以就去試下個午餐先. 先講個門面就好清新下, 乾乾淨淨, 舖面就唔係大, 不過地方四四正正. 都尚算可以! 不過餐廳本身就細, 座個位亦都窄, 所以食完你唔想走都唔得. 大家當快餐店咁食就得! 如果想坐下傾下偈, 呢間舖就未必係個好選擇了.我今次同個同事一齊去試左二個午餐,  芝士白汁海鮮焗飯 / 芝士茄汁牛肉焗飯. 老實講, 二個既味道都好一般. 先講白個海鮮焗飯, 佢係用珍珠米, 本來都好地地, 但係佢個焗飯的米又濕, 即係唔夠乾身, 食落去好似糊仔咁! 失敗....  咁煮咪就係浪費左個米囉! 然後個海鮮, 好似平時去超巿買一包雜錦海鮮果啲料咁, 唔都方係好野! 個白汁自己煮又調得唔好味, 再去焗放啲芝士响面! 成件事真係好錯... 個份量亦都唔大. $68 一個飯, 連杯餐飲都唔跟, 叫你自己响出面攞已經預備好既飲料. 即係連服務都慳番, 水吧都唔使安排. 如果佢個飯會炒下底, 個米唔好咁濕, 啲用料比番好少少, 就算細碟啲我都可以接受. 但係食水咁深, 同埋唔知係咪個廚本身都唔係好掂. 所以.... 都係算吧啦!個蕃茄牛肉焗飯就, 個汁都係用蕃茄煮出來, 整體都係果句, 牛肉又唔係咩靚部位, 收你$68 我真心覺得貴, 同唔值. 呢個價我不如去返 VCity 啲餐廳食, 可能都仲有水準. 無下次..... …查看更多

現在真係好難得仲有燒臘舖有燒鵝肝, 金錢雞同鴨腳扎賣. 仲要係好食... 今次我都係搭朋友幫我買, 可惜到我手時啲蜜汁都倒左一半. 大家如果去買不如自己帶個合去裝就更好了. 佢個燒鵝肝我覺得好抵食. $60有半斤, 呢個圖其實我已經食左4舊, 所以其實好足料, 買番屋企再焗番熱去食, 加罐啤酒. 你話係唔係人間美食.金錢雞現在都好似得番好小酒樓肯做, 仲要話預定同最少要4件, 每件收好似$28.  如果仲想試下呢啲又好食既懷舊野. 建議大家可以幫襯友聯發, 佢日日燒好出來, 保証新鮮又好味!有時我都會專登楂車出去買黎食! 令願買多少少, 放雪櫃, 要食可以焗番去. 真係好好味嫁....…查看更多

旺角泉章居, 其實好耐都無去, 因為又要等位又要 Book. 又要指定時間交枱. 昨天去到唔限時, 唔使訂就立即有位, 全晚都唔滿座. 其實呢啲時候對食巿既影響就一定有的. 今次叫左個4人套餐, 改左個粟米魚肚湯, 其實整體既食物質素都可以保持到! 而個粟米斑塊我覺得係最好味既! 本來個朋友一心想食雞, 我就覺得霸王雞同鹽焗, 我可能會選擇後者. 因為佢個霸王雞同我响出面食既有一段距離紅燒豆腐其實又唔知點解每次都會點, 仲有個梅菜扣肉, 我都覺得佢做得好出色. 今次無點係因為大家都怕肥.... 我自己就好喜歡食! 送飯真係一流 ...今次試左個骨髓, 本身一個無味既食物, 佢靠個蠔油汁另到佢有味... 個人覺得一般. 我下次都未必會叫.…查看更多

結婚週年, 撞正出面好多社會運動進行中, 想揾個地方安安靜靜咁食飯都好困難. 最後選擇左蟠龍餐廳. 當晚人唔多, 得二枱客人, 老闆好親切, 好好人, 又介紹啲食物比我地, 我地最後點左二個晚餐, 再開左支紅酒.  其實整體上我都覺得好不錯. 有得泊車, 食物質量都煮得唔錯.  價錢就大概由 $200 - $400 一個餐. 睇妳叫咩食啦~~ 我地點左個 Resottio 同埋一件肉眼扒.  二樣野都好好味, 所以下次大家想揾個靜既地方, 呢個絕對係心水選擇.食下 High Tea 又得, 晚餐靜靜地, 傾下偈都可以. 唔使成日都去酒店食嘛... …查看更多

昨天晚上出去食飯, 都唔知食乜好, 好耐都無食稻香, 又見到有羊腩煲, 咁就不如試下啦! $98 好似好抵食咁, 如果平時再減 $10, 都真係可以去試既. 整體今次既出品真心唔差, 仲記得舊年個羊腩好咸, 今年唔會, 不過可能都一間間手勢會唔一樣....加生菜要另外比$28, 我都加左, 因為食羊腩煲無個生菜好似唔係好得! 另外再點左個鼓汁蒸大膳, 新鮮既又大件,  有 12件都算係咁咯! 不過就唔係好夠味, 我本身都食得偏淡, 都覺得唔夠味就真係太淡了. 好彩佢又夠新鮮, 都算幫佢爭番唔少分. 算啦....最後就係個糯米飯, 翠怡呢間炒既糯米飯無失手過! 粒粒分明, 我地一家人都好鬼喜歡食, 又平又抵食... 大大碟! 食唔晒打包番去再蒸都好好味... 唔會爛晒. 所以大家有機會去食就一定要叫黎試下. 如果人多有時佢唔會炒比你... …查看更多

總括黎講, 新興麵家係一間相當唔錯既小店. 大家都應該支持下呢啲舖, 唔係好快就會比啲大集團取替晒. 而最大既問題係大集團永遠都唔會整到呢啲要用心煮既麵. 可能大家覺得麵舖週圍都有, 亦都唔係間間小店都好味! 我當然亦都明白. 所以大家更家要支持一啲好食既本地食店. 令到佢地可以响本地巿場發光發亮..…查看更多

我想講整體既用餐感覺都唔良好... 唔知係咪因為响Food Court既原因, 我地已經係經 Openrice 訂位, 去到個服務員仲有Mark低我地到左. 咁由於我地今次係想試佢個放題, 諗住可以式多啲野! 不過原來佢個放題 $158 都無乜野可以食, 咁就唯有加多 $40 變左 $198 囉! 但係居然都仲要唔包虾餃, 仲有好多其他野都唔包既. 如果一心諗住想影下佢啲食物相打下咭既話, 大家就唔好食放題了... 因為大家都見到我影既食物相... 跟普通茶樓無分別, 但係個價錢就係天同地... 老實講可能普通茶樓仲好過佢! 我記得佢初開既時候, 服務同食物既質素都好高, 我都有叫啲朋友去試! 不過經過今次, 我就會叫大家可以唔使去了. 因為可能出左名, 啲食物就 Keep 唔到! 得個樣既包還好... 其他食物同點心, 比得呢個錢, 不如果 W-Hotel 食星宴, 可能大家會有驚喜! 起碼明碼實價, 唔會呢啲又唔比點, 果啲又唔比叫....…查看更多

昨天去了深水埗，其實經過好多次都一直無幫襯，見到對面文記排晒隊，泰國人唔使等，咪入去試下囉！點知咁就出事了。所以大家如果係想食泰菜就最好揾番間正常餐廳食，反正價錢亦唔係平得好多，証明呢間野食水好深! 仲有就係佢好似快餐店咁，如果唔係叫餐就無跟野飲，散叫都要廿幾三十，又無主動比水你，即係迫你叫野飲，個例湯$10，好似水咁。我都費事post出來了，費事大家睇完講粗口。…查看更多