Lpkoi的个人专页

天陰陰落雨天突然間好想食拉麵，呢一種天氣食一碗有湯暖笠笠嘅粉麵係特別有溫暖嘅感覺。台風拉麵一直都有聽朋友講個質素好好就趁機會去試下。點咗濃厚蟹蝦豚骨拉麵，份量同配菜都係揀普通。鋪頭都有溫馨提示佢哋普通嘅份量係比一般舖頭多，實驗證明係！我係正常食量嘅女仔，出街食嘢盡量唔浪費會洗碟果種，但係佢麵嗰份量真係多，食完之後差啲飽到有啲反胃。如果大家係細食嘅女仔，就可以揀"少 "。講返拉麵，湯底好濃郁，好香蝦油味道， 但飲落好唔會一口都係油膩嘅感覺同埋無豬骨臭。麵質係個人比較喜歡偏少少硬度，比較粗嘅麵。如果下次去我可能睇下有冇機會要求要硬麵。肉，唔係傳統拉麵舖圓碌碌一片片嘅醬油叉燒。佢係比較入口鬆軟即溶嘅薄片，我個人其實比較偏好呢種。銅鑼灣灣仔分店餐牌上嘅拉麵都係全日供應，呢方面比起旺角店方便，咩時間都有得食拉麵同沾麵。…查看更多

地理位置方便，係正生記對面。入去食飯嘅時候剛好六點，見到老闆同老闆娘食緊佢哋嘅晚飯阻住佢哋真係有啲唔好意思。坐低之後剛好有一個客人入嚟堂食，聽到佢叫羊肉餃子同朋友發現新大陸一樣，覺得比較少見所以都同朋友決定要點一份試下。兩個人分別叫咗兩碗雙拼餃，分別有羊肉餃子、鮮肉韭菜餃、香菇粟米餃、鮮肉芝士餃。 外加一份酸辣土豆絲，土豆絲口感清爽，佢哋嘅版本辣係偏辣油而唔係椒麻，但亦唔會太辣。羊肉餃帶羊肉應有嘅騷味，但如果唔鍾意食羊嘅人就可以唔使叫，你一定頂唔順。我同朋友都係超級鍾意食羊肉嘅人，食到意猶未盡。鮮肉韭菜餃正常。香菇粟米-個人就唔係太鍾意有粟米嘅餃子，整體偏甜同埋蔬菜感滿足。鮮肉芝士餃就純粹想試下新派嘢，試一次就夠因為本人都係鍾意食傳統嘅餃子。永樂嘅餃子皮係偏厚北方口味，麵粉感較強，一碗八隻落肚，我食完之後真係飽到差啲企唔穩。性價比好高，最後離開鋪頭嘅時候見到可以外賣一打羊肉生餃，如果以後經開呢頭都會再幫襯。…查看更多

銅鑼灣價格晚市泰菜，環境比較細但因為本身澳門逸園嘅建築面積唔係大，但仍然都坐得舒服，枱之間有隔板保持食客嘅衛生同安全。三個人分別叫咗3前菜2主菜1甜品，HKD900賣單。八隻生蝦，海鮮我無食，同枱友人形容蝦肉比較無味，要靠一同上嘅5種唔同醬汁輔助一下 ，呢個可以選擇唔叫 。豬肉沙爹串，豬肉非常之"林"，唔會柴亦都保持到豬肉裏面嘅肉汁，豬肉外邊有做到焦脆，加埋沙嗲汁 perfect。同埋每一串肉唔會細細粒，件頭都幾大，呢個性價比幾高。炸通菜， 個感覺就是你去食日式蔬菜天婦羅，我食唔到本身通菜原有嘅味道同埋質感，食到一口脆漿嘅感覺，比較似下酒菜或炸洋蔥。咖哩雞配薄餅2份，正常冇乜非常之特別亦都唔差，反而係個薄餅煎得較為油咗少少。雞肉炒河粉，呢個做得幾好，如果唔係食得辣嘅人可能要睇吓師傅做唔做到少辣，因為一放入口之後個辣勁都幾犀利，但係非常之惹味 。最驚喜就係佢嘅泰式芒果煎糯米飯，係冇錯，係煎。所以佢比起傳統嘅糯米飯多咗個香脆嘅效果，就好似新年大家食煎年糕嘅感覺，配上比較甜嘅椰漿同埋酸嘅芒果，呢個配搭我覺得非常之加分。整體嚟講價錢亦都符合返銅鑼灣嘅價格，或者我會比較偏向食佢嘅午市套餐，會比較抵食同埋性價比會比較高。…查看更多

同屋企人兩個人食，分別嗌咗晚市套餐嘅燒味雙拼、琵琶豆腐、皮蛋一客。服務唔錯，佢啖茶值得一讚，唔係普通嘅普洱茶佢係帶啲陳皮味，我覺得比起一般小菜餐館呢一點解係優勝嘅。先講燒味雙拼飯，燒肉拼燒鵝。聽屋企人講佢嘅燒鵝出名，但係有對比之後覺得燒肉反而更加出色，超級脆皮唔會話太多肥膏而油膩，咬落去肉係鬆軟唔會實的的。 燒鵝正常，睇你要同咩舖頭比，個同好出名嘅燒鵝店比可能佢冇咁出色，但依然做到皮脆有鵝香。琵琶豆腐，原本見到menu上面寫要預訂，所以本身想叫鵝汁浸鵝肝，但係平日嘅晚上反而佢冇，一問之下發現原來今晚會做琵琶豆腐當然要試一試。外皮炸得香口，但係裏面依然嫩滑，個汁的調味亦好好，送飯好。皮蛋裏面有啲流心，本身我唔係特別好皮蛋，至少我放落口佢冇嗰陣可怕嘅石油味。據屋企人話皮蛋都唔錯。呢間餐廳我會encore, 會同屋企人去試午市同晚飯，因為其他嘅小菜同埋佢砂鍋飯我都有興趣。…查看更多

笑林寺， 今次入寺唔係想做十八銅人，亦都唔係想做食神。入寺都係想輕輕鬆鬆食個早餐飲杯咖啡，再同店名和裝修 fusion 一陣。入去見到枱櫈偏古風中式，店入面有金庸小說會形容到嘅裝飾擺設。咖啡杯有心思，上面印有古裝劇見到嘅畫卷 Patten。餐牌設計都有心思，嘢食同埋咖啡嘅名都精心設計過，食之前睇得開心。 店舖後門位於後行所以如果度門閂得唔好就會好容易有蚊，呢個係唯一少少嘅不足之處。咖啡分別點咗 Flat White 同 Americano。 店員會主動提供建議用邊種口味嘅豆比較合適，喺牆上都有大塊黑板寫咗佢哋會用嘅豆同埋每一種豆有嘅特性同埋味道。咖啡反而我覺得食物更加出色同更加有驚喜。食物分別叫咗黃金堅壁-香蕉西多士，同埋桃花島 - sour cream意粉配煙三文魚。先講香蕉西多，香蕉上面嘅焦糖做得非常之好，加埋煙肉整體又甜又鹹層次好好，伴碟有田園沙律。 意粉嘅sour cream唔會太酸都唔會太膩。要一讚意粉嘅口感，有彈性有咬口但唔會起骨，掌握嘅時間做得好好，係我個人非常之喜歡嘅意粉口感。醬汁亦都唔會整到成隻碟都係，但每條意粉都能夠沾上醬汁。另外唔知店主有冇機會睇到呢個食評，我私心好喜歡店員或店主嘅playlist，有機會concert現場見 🤗…查看更多

因為有事要去葵涌先有機會試到呢一間咖啡小店 。商場嘅指示牌令到整個過程有啲難搵，其實佢就係位於人哋大廈二期坐𨋢位對面。星期六去到一點鐘多啲，就叫咗個牛肝菌大蝦扁意粉，另外加 $14就可以將普通咖啡轉為冷萃咖啡或者咖啡梳打，我揀咗佢哋嘅cold brew。意粉唔會太軟係有咬口，係我個人比較鍾意嘅生熟程度 ，少硬但唔係起骨。牛肝菌同醬汁非常之香，反而大蝦就有少少失色。呢個價錢你唔會expect佢哋係用新鮮大蝦，所以大蝦不免會有少少嘅雪藏味，如果可以將陣雪味都完全覆蓋咁就100分。Cold brew 正常，唔會過酸亦都唔會有奇怪嘅味道，性價比非常之高，只係加 $14 就可以享用到，我覺得成個用餐嘅體驗係非常之好。…查看更多

我已經幫襯過幾次， 不論係買返公司請同事食、去人哋屋企唔可以兩梳蕉上去同埋買畀屋企人。我已經試過佢唔同嘅味道，分別有朱古力、士多啤梨、綠茶、玄米、烏龍、伯爵茶等。我最鍾意係呢個泡芙係一次過可以滿足你兩個願望，食到泡芙同cream之餘仲有煙煙韌韌嘅麻糬。佢嘅泡芙皮唔會脆到戒口，個面係比較酥脆而咬落去之後係有空氣感同少鬆軟，同裏面嘅cream和麻糬形成咗個對比，多一個層次。麻糬其實都幾大嚿唔會話得一小塊，佢嘅賣點係自家製麻糬，我覺得佢呢方面都做得幾出色。而且泡芙麻糬同cream嘅配搭唔會話統一都係同一隻味，佢會有唔同mix and match。單件計通常都係25至28蚊，可能唔同嘅味道有些少出入。呢個份量同製作嚟講我覺得其實唔可以話佢貴，因為佢真係好大份而且一個人食曬好飽肚。佢每日嘅出爐時間會喺社交平台度update，未必會每日都開門，通常出爐時間都係一點三同五點幾。…查看更多

天氣太熱，所以想搵越南嘢食。喺鰂魚涌抵食嘅越南嘢唔多，我食過另一間但係要受氣，所以今次就嚟越順試試。發現依家外賣有九折，仲抵食。叫咗個香茅豬扒撈檬，份量都唔少，正常女仔食量會食唔曬。墊底嘅係青瓜絲同埋菜，跟住先至將檬粉擺上面 ，豬扒切幼條上面有花生碎。個汁就另外用紙杯裝 ，今次冇叫到嘢飲所以可能平咗兩蚊。好似跟餐係送黑糯米甜品或者其他冰飲品。豬扒香茅名唔算超級突出但係算係好鬆軟，而且份量真係唔少，$41算係幾抵玩。呢間我會encore。 至少入面啲姐姐都有禮貌，無咩客會同你R水吹。…查看更多

Green Saturday。性價比高嘅日式咖哩飯， 因為有事要去附近嘅工廈先有機會嚟到葵涌食飯 。單點 $38，加 $8 可以轉有味冰茶。我要咗白桃冰茶。，Total $46，加錢轉嘢飲個人認為依然係抵食。野菜同咖哩互補，蔬菜的甜味令日式咖哩多個層次。 白飯唔係粗糙嘅白米，都係用珍珠米，粒粒分明有咬口亦都有少少黏口。 擺盤亦都唔會好隨便，唔似某啲茶餐廳師父就咁倒個汁上白飯面。野菜分別有: 蕃茄，翠玉瓜，秋葵，西蘭花與莖，三色椒，茄子，紅蘿蔔，薯仔，豆。基本上每種蔬菜各一。 大大舊，整體蔬菜都係甜嘅只係秋葵個皮有少少渣。白桃冰茶唔會好甜，佢茶味比較重唔係嗰啲放好多醣漿落去嘅有味茶。平日出街食飯師傅都係隨便搭條菜心，喺呢度食就一次過可以補充唔同嘅維他命同纖維，但放心唔會唔夠飽，因為飯同蔬菜嘅份量都好足。堂食枱唔多，都係鋪面出面放幾張摺枱同凳，大部分嘅人都係外賣拎走，如果堂食就會對住馬路或者路人食。位置亦唔難搵，a出口一出上天橋行一兩分鐘就到。如果行地面就直行轉右，我呢啲路痴都搵到。…查看更多

我由29蚊食到佢而家33蚊，九記一直都係銅鑼灣裏面抵食嘅車仔麵之選。如果你係糧尾咁就非常之合適啦！九記必定要揀嘅就一定係佢哋最出名嘅煎魚餅， 煎得非常之香，老細亦都會幫你剪開佢一條條方便食。份量都唔細，大概有2/3隻平時茶餐廳裝隻奶茶嘅碟咁大。而另外其他餸我通常都係食白蘿蔔，份量都唔少，大概有5舊，抵玩。今次就嗌咗牛筋腩，炆得好冧好易咬。九記我通常都會選擇食撈麵多過食有湯嘅，今次就揀咗撈粗，加埋佢嘅炸蒜同醬，大滿足。…查看更多

第2次幫襯，原本諗住叫黑白墨魚丸河試吓，嗰陣係晚市八點左右，姐姐同我講黑色墨魚丸已經賣曬😭😭😭所以大家想食黑色墨魚丸嘅話，可能就要早少少，同埋睇吓彩數。咁我今次照舊食返普通墨丸河。麵(河粉)嘅份量好足，同一般麵鋪嘅有少少唔一樣，比較窄身少少同埋透薄啲。四粒墨魚丸，粒粒夠紮實咬落口唔會淨係得粉，墨魚丸入面唔係墨魚膠，仲有'啄'唔到細細嘅墨魚粒，有咬口。湯底好味，唔會死咸死味精。對於我呢啲食量唔係好大嘅人嚟講已經非常足夠。…查看更多