唯他的个人专页

消費證明，食個快餐，冇影食物。以下圖片請小心睇。手放喺枱食野，食食下野覺得痕，以為有蚊咬，點知食完見係成排粒粒，就知係蝨。一睇d木枱隙，幾隻行下行下探頭出嚟。我嚇到即走，唔敢影相，太嘔心，起晒雞皮。走咗幾分鐘，d粒粒發起嚟紅晒，影相留證。手肘都有但得幾粒，唔夠下面兩張圖震撼。呢篇野第二日打，仲係好痕，時不時發作。以後都唔會再去呢間店。大家小心。有興趣睇下係咪真嘅，可以留意有得充電嘅獨食位，d木板嘅隙就可以見到小昆蟲。…查看更多

見到附近幾間食店都排晒大隊，得呢間比較冷清，決定反其道而行之，入去一試究竟。當時嗌漢堡仲有九折添湯、沙律、飯可以任食，質素正常合理，都相當有誠意。兩個主角嚟啦！佢直徑唔大但係都幾高身，可以見到咬開後牛扒中間煎得都幾靚，包身香脆鬆軟。薯條都相當香脆。整體來講都算滿意，服務正常。希望大家除咗排附近啲餐廳，都可以試吓呢間小餐廳啦。…查看更多

陪爺爺一齊飲茶，一行五人。環境都企理舒服，以前係茶餐廳格局。先上價錢，可以接受啦，少少貴。呢個多士最特別，但係佢好熱氣，非常脆，食一件已經覺得好夠。荷香飯都唔錯，有石斑所以比較貴。整體而言都滿意，不過就唔算留低好深印象啦。…查看更多

星期日食下午茶。叫咗嘢食先至上嚟睇食評，即刻唔敢抱太大期望。不過好彩出品都正正常常。迷你蕃茄雞肉焗飯（$38）朋友話相當唔錯，不過份量真係相當迷你。迷你天婦羅拼盤飯（$32）水準不錯，有南瓜、多春魚仔、茄子、炸蝦。當中炸蝦非常抵食，大隻得來脆卜卜。凍熱蜂蜜蘆薈茶各一杯，我覺得略為過甜但係都明白係沖出嚟嘅飲品冇辦法。朋友就覺得都幾唔錯。好彩冇想像中咁伏，出品都算符合心目中嘅性價比。侍應哥哥都禮貌嘅。缺點位係水機出水好猛，撳兩秒啲水就沖曬出嚟，要多次少量咁㩒。…查看更多

抵食下午茶，拉麵+小食+飲品套餐一向覺得一風堂係貴嘢，點知今日放工經過，竟然邊度有抵食下午茶，價錢竟然只係比味千拉麵下午茶貴幾蚊！大概$48一set.我哋叫咗「拉麵+餃子+日式煎茶」同埋「拉麵+炸雞+日式煎茶」。餃子細粒得誇張，可能同瘦嘅女仔嘅拇指差唔多size，上面有薑蓉同埋蔥，好似雞醬咁XD正常豬肉餃。炸雞好食好多，比較大件，拎上嚟嗰陣熱到辣咀。拉麵嘅面底可能同正價差唔多份量，但叉燒就得一至兩小片。不過下午茶黎講都已經足夠。特別提提服務，店員專登將客人座位安排比較大嘅間距，私隱度好高。其中一位年輕男店員仲主動留意到有嘢食未上。值得一讚。…查看更多

三層架下午茶，鹹點唔錯但甜品較弱經過六國酒店門口先至知道有呢個品魅下午茶。$268 for 2,要加一，3-5pm,可以早少少入去飲定自助餐茶。全場得我哋一台客，仲有兩個男人飲杯酒好快就離開，所以我哋包咗場！店員都好休閒，但該做嘅服務都做得齊，成個場地嘅氣氛都好休閒慵懶XD第一層同最尾嗰層嘅鹹點唔錯，尤其第一層係最值錢，帶子煎得恰當，蝦同牛肉都不錯吃。炸雞同咖喱角出現喺三層下午茶，雖然睇落頹頹地，但其實係好飽足。海鮮酥盒入面有蜆、青口、魷魚，意外地豐富。中間嘅甜品就麻麻哋，醬料太甜，餅底過硬或者軟，達唔到脆嘅效果。志在有地方靜靜地渡過下午，輕輕鬆鬆傾吓計係唔錯嘅，不過就唔好期待超版嘅食物水準。…查看更多

晚餐時間去，不斷有人排緊隊堂食。環境方面麻麻哋，真係好迫，店員出出入入都會掂到你。所以介意舒適程度嘅人比較適合外賣。花雕醉雞刀削麵（$55）走味濃郁，雞就算大件都唔嚡口，相當出色。而且份量唔細，大件夾抵食，推薦！刀削麵湯底濃郁，識落正常舒服。過橋刀削麵（$56）款式多但唔係特別突出，有一灘醬料令到成碗湯底非常重口味。以上各包熱飲一杯。…查看更多

暑假就完，黎紗廠行下hea下. 一直都想試下坐喺啲舒服茶座度chill chill,假期太多人，今日平日就好多位。坐喺common嗰度可以嗌埋隔離coffee shop嘅嘢食。紅奶茶味道正常，帶一啲鹹味，都幾得意。但凍飲就抵飲好多，比較高身，奶蓋夠稠密。茶味都幾清香，不過嗰兩款珍珠我就食唔出同普通珍珠嘅分別啦，珍珠分量頗多，煙韌嘅，連平時一粒不漏嘅我都食淨五六粒，好鬼過癮。比起其他茶飲店可能略貴，但我當個價錢包埋無限任坐時間。好多人都做嘢同埋帶埋寵物黎。地瓜球一份有八粒，入面係糯米糰子feel，地瓜味明顯，不過喺呢啲地方食，分量預咗較少。最後坐咗兩三個鐘先走，上面天花採光不錯，係輕鬆嘅一Day.…查看更多

姊妹聚會來大排檔。叫咗一個三餸套餐再散嗌幾樣嘢。最後一人約$207。係雞肉嚟㗎，上面好多蔥絲同脆嘅配料，雞份量亦唔少。招牌蝦多士，我又覺得唔係真係咁好食喎，28蚊一件未加一，兩秒就冇咗，都幾矜貴，不過老實講蝦係彈牙而多士係脆嘅，但唔至於好食到嘩一聲囉。金沙魷魚，外脆內軟，不俗。雜菜粉絲煲，蝦乾都幾多，水偏鹹，粉絲呢啲平價料我覺得可以再放多啲。龍蝦大蝦湯泡飯，反而覺得呢個有驚喜過蝦多士。湯底極濃，蝦又大隻，返唔多不過有碗脆脆，令到個口感好豐富，相當惹味。蝦乾同肉，燒得幾香，蝦乾非常多。士多啤梨骨，肥膏都幾多，食咗兩三嚿都係得表面有啲肉。食物都算大份同唔常見。服務方面，值得一提係有位姐姐非常好，同我哋有傾有講，見到我哋有咩需要都即時幫手。但另一方面師傅上菜有啲粗魯，唔知係咪太重，上菜係喺枱邊推入枱中間，無視途中啲碗筷同茶杯，開頭上兩碟餸嗰陣時嚇到即刻扶住啲嘢，我諗至少嗌句小心會冇咁突兀。…查看更多

冇入去食火鍋，但對珍珠有興趣，買咗一杯坐喺店舖門口嘅仙氣位飲，做生招牌。下面有啲乾冰噴出嚟圍住自己，唔怕醜嘅話都幾過癮。珍珠偏細粒，奶味比茶濃，個人覺得中上啦，唔係特別出色。係K11個環境大加分。…查看更多

想試好耐，睇食評覺得平靚正。座位比想像中少，但因為好多人只係外賣，所以都幾易搵到位。番薯條同薯格都賣曬。炸燒賣係魚肉燒賣，約八粒，幾脆。薯條正常。分量正常嘅漢堡，有肉味，生菜都幾爽。得意嘅係呢度有豬牛羊雞四種肉類，有機會要試下羊係點。比起漢堡，我覺得呢度嘅飲品比較得意。飲品選擇都幾多，例如熱茉莉花茶等都唔使加錢。我揀嘅薑蜜就甜咗啲。最值得一提嘅係加十蚊嘅千里烏龍茶。明明寫住無糖，但每啖後都會有強烈嘅甜味滲出嚟，好得意嘅體驗，唔知係咪甘草嘅作用。…查看更多

灣仔啲嘢食感覺偏貴又高檔，一見到呢間就覺得好彩。估唔到幾有驚喜。素春捲好脆，分量六條都算唔少啦，熱辣辣就算冇肉都好好味。蒜泥燻蹄啲蒜磨得好細密，蹄嘅肥膏唔多，加埋個醋，強烈嘅辣、鹹、酸湧入鼻腔，好刺激。刀削麵唔算粗身但都幾煙韌，夠曬過癮。餸同面嘅份量都夠曬飽肚，喺灣仔嚟講都算幾抵玩。…查看更多

夜晚八點半去女人街，想快d食完返屋企，見呢間最少人，排5分鐘就入得。先講個食得過嘅。$6x 鰻魚炒飯可以，味道同份量都恰當，鰻魚比五十嵐大粒d。$98 鐵板雜扒見到推介就試試，點知中伏。鐵板完全唔熱，d汁倒落去就一野撻係度，同膠碟上無分別。份量唔算多。材料如蛋、薯角、腸不貴。最重頭嘅豬牛扒，豬係普通薄豬扒。牛鋸唔開。整體用餐感覺極差，真係可以我行我上。收成百蚊只係食咗個空虛同遺憾，仲要冇野飲。已經無興趣再試其他食物。…查看更多

妹中意蛋，話想試下。lunch免費轉set,配沙律同餐湯。湯係一細杯蘑菇湯，忌廉味重但好稀冇乜料。妹嘅親子丼都幾高身，佢食唔晒。我就要咗個金鎗魚碎蛋拌飯。個蛋發泡之後好高身，幾得意。我唔食生野，黎到先發現魚碎係生，頂硬上試下。但其實倒晒d調味料落去搞勻，係完全食唔到d魚生嘅味同口感，對我黎講係好事。妹俾咗d洋蔥我，幾好食。其實食落係飯素+蛋拌飯，餐廳都話係日常食物，不過物離鄉貴。另外要咗杯啫喱花茶 $30啫喱都唔少，不過甜咗d，變咗花茶糖水。整體黎講份量食得飽，座位舒服，但實在貴同唔驚喜。兩人lunch $170。…查看更多

book咗2人晚飯套餐，包發球練習。打之前先食個早飯。啡茶水任裝。樓底好高好舒服，本身想坐室外，但唔鍾意聞到煙味，唯有坐室內。小菜有八款可揀，呢個係海參雞絲豆腐，份量足，撈飯食一流。湯大大碗，飲得過，畀啲湯料大家睇下。xo醬蜜糖豆炒花姿，花姿爽口，但冇雞絲嗰個咁豐富。食到一半，成個室內突然光咗，原來係電動簾拉起曬向太陽嗰邊嘅窗簾，畀大家喺室內都睇到日落嘅美景。booking仲係用紙筆嘅傳統方式做，呢啲位反而幾跟得上現代科技，佩服。套餐仲有包甜品，同男朋友討論緊可能係一嚿桂花糕或者蛋糕嘅時候就上菜：居然個甜品都咁精彩，一次過滿足三個願望！嚟呢度試晚飯套餐加打波真係令我開咗眼界，亦都捧住個肚走！呢個景真係唔話得，手機都影出個廣告感覺。…查看更多