ilovefood1314的个人专页

之前去台灣旅行最鍾意喺夜市食吓滷味,貪佢選擇夠多,自己鍾意食咩配搭都得。之前一向都有喺朗豪坊食開燈籠滷味,但係原來新都會廣場都開咗分店,見佢難得唔使排隊就食返個lunch。嚟到當然要食佢哋招牌嘅滷味啦,我就揀咗牛筋肉,白蘿蔔,甜不辣同經典嘅台灣王子麵。幾款配料都滷得入晒味,牛筋肉入口軟淋,白蘿蔔清甜得嚟仲要冇根,必食。見到隔籬枱食緊人氣蔥蛋手抓餅好似幾吸引所以忍唔住都嗌咗個試吓,我就揀咗奶油芋泥,肉鬆,芝士嘅配搭,手抓餅煎得香脆,內裏嘅芋泥同埋肉鬆餡料一D都唔孤寒,不過略嫌芋泥甜咗少少。眷村懷舊排骨滷肉飯上枱嗰陣時真係俾佢嚇親,因為都幾大碗,除咗有大大塊嘅排骨同滷肉之外,配料仲有椰菜,粟米,半隻滷水蛋同酸菜。…查看更多

再一次嚟到呢間好chill嘅餐廳,今次一收工大約6:30就嚟到,見到好多人都係放工過嚟happy hour。佢哋嘅環境的確令人覺得好relax,飲杯酒同朋友食吓嘢,的確係一個唔錯嘅選擇。首先嗌咗個避風塘雞翼同黑松露薯條,一路同朋友吹水一路食下小食。避風塘雞翼炸得香脆,面頭仲有D麵包糠,豆豉同炸蒜粒,配搭更惹味。黑松露薯條亦都係新鮮炸起,不過我就覺得可以多番少少黑松露味。食到咁上下仲嗌咗個巴馬火腿凱撒沙律同燒大蝦三文魚子龍蝦汁扁意粉。沙律份量都幾多,食極都仲有,沙律菜都好新鮮,醬汁方面佢亦都唔會落得太多,啱啱好。燒大蝦三文魚籽龍蝦汁扁意粉有2大隻燒大蝦,肉質都幾爽甜,蝦殼仲有微微嘅燒焦香。扁意粉亦都煮得啱啱好而且好掛汁,龍蝦汁亦都好creamy。唯一美中不足就係真係唔係好覺佢有三文魚籽。…查看更多

趁住放假去南豐紗廠行下街,點知無意間俾我發現呢間餐廳,吾小心俾佢地門口餐牌上嘅吉列玉子燒三文治吸引住。吉列牛,吉列豬扒就食過,吉列玉子燒都係第一試。玉子燒新鮮熱辣辣炸起,被簿簿嘅麵包糠包住,多士亦用牛油煎香,三文治整體外脆內軟,幾好食同特別,不過如果自己一個人食晒4件就有啲膩,最好就同朋友開心share。朋友就叫咗卡邦尼烏冬,烏冬選用左稻庭烏冬,都幾掛汁,卡邦尼醬汁好creamy,而且都有唔少嘅煙肉片。…查看更多

正當同老公諗緊究竟食燒肉定係火鍋嘅時候,就經過家樂坊見到呢間八歌仙,見到佢可以一次過滿足晒我地2個要求,有齊燒肉同火鍋放題。我地揀咗中等價錢嘅澳洲和牛放題,揀完套餐之後店員即刻送上日本A4和牛同埋刺身拼盤,不過呢2款拼盤就冇得encore。本身我哋叫嘅套餐澳洲和牛亦都好高質,油花分佈平均,好香牛味。佢哋個爐好方便,可以同時火鍋同燒肉。火鍋湯底亦都有6種選擇,我哋就揀咗黑蒜豬骨同埋龍蝦蕃茄。除咗火鍋同燒肉之外,仲有任食壽司,天婦羅,炸物,一品料理同海鮮,超級豐富。佢哋嘅天婦羅都非常之高質,炸粉好薄。炸物新鮮熱辣辣,最鍾意食就係芝士年糕同蒜片雞軟骨。海鮮方面,我哋都encore左好幾次帆立貝同番薯蜆,帆立貝好鮮甜,番薯蜆亦好大粒,而且吐晒沙。…查看更多

今次同朋友慶祝生日,揀咗呢間之前食過lunch,又好高質嘅樓上餐廳。好彩預先book左位,去到已經好爆場,同埋今次喺OpenRice 訂咗位所以有75折,都幾抵食。我哋第一件事就嗌左杯嘢飲,呢杯Rainbow smoothie都幾好飲,佢用咗乳酪,雜莓同牛奶blend成。唔會太甜,幾fresh,而且打卡一流。香煎北海道帶子龍蝦汁扁意粉配三文魚子,刺身級嘅帶子輕輕煎過,外微脆內嫩,扁意粉充滿濃郁嘅龍蝦香味,而且好creamy。燒豬腩肉鹽味焦糖汁配青蘋果沙律絕對係必食,豬腩肉燒到外皮香脆,脂肪比例啱啱好,唔會太油膩,配埋青蘋果沙律更清新開胃。黑松露薯條熱辣辣新鮮炸起,每條薯條都沾滿黑松露,食落好香口。最後仲叫咗個甜品作為Happy Ending,叫咗個朱古力布朗尼配法式馬卡龍。布朗尼囗感比較濕潤,濃郁嘅朱古力味,面頭亦佈滿棉花糖粒,再配曲奇雪糕,味道亦都唔會太甜。…查看更多

同朋友食,佢極力推介嘅Bella Shine,朋友話食過幾次,話覺得係觀塘區內有咁上下水準嘅西餐廳。我哋每人叫咗一個dinner set,個set除咗主菜之外仲包左餐湯,餐飲同甜品。當日嘅餐湯就係甘筍湯,本身見到個湯好似好稀咁,諗住冇咩味道,點知原來甘筍味都幾重,個餐湯同配埋一片蒜蓉包。主菜方便朋友就叫咗香煎紐西蘭肉眼扒8oz配燒汁,肉眼扒雖然唔係好厚,但係好大塊。佢就order左7成熟,切開出嚟帶有嫩粉紅色,而且都有肉汁流出,肉質都幾軟淋。我就叫咗個輕煎日本帶子配黑松露忌廉汁意大利飯,刺身帶子被輕微地煎過,有少少焦香,裏面依然嫩滑鮮味。意大利飯軟硬度啱啱好,黑松露味都幾突出而且裏面仲有好多蘑菇作為配菜,醬汁亦都好creamy。甜品方面其實只係一口size嘅芝士蛋糕同埋忌廉泡芙,咩都亦都正正常常,冇咩特別。…查看更多

好耐冇食過泰國菜,早幾日就同朋友食呢間係銅鑼灣性價比幾高嘅泰國菜。泰式小食拼盤啱晒我哋,各種小食都有齊,最好食嘅就係串燒,本身已經有少少蜜汁味道,加埋沙嗲醬就更惹味。黃咖喱牛肉用嘅係牛腩而且仲有好多雜菜,不過味道就略為偏甜咗少少。食咖喱當然要配埋香酥薄餅。豬頸肉嘅份量都幾多,配埋酸酸甜甜嘅醬汁幾開胃。泰式鮮蝦炒金邊粉俾我想像中嘅份量多好多,本身一上枱仲諗緊D蝦到底係邊,原來喺晒底,蝦妙得幾爽口,仲有唔少豆乾做配菜,配埋花生粉好香口。…查看更多

喺MegaBox行完街,又諗唔到MegaBox有咩食,所以就search下附近嘅餐廳,見到呢間餐廳好似唔錯,所以就一於去試吓,好彩去到都仲有位。除咗室內嘅座位之外佢仲有戶外座位,今次因為主要係食晚餐,所以我就揀咗室內。室外更適合樓上寫字樓嘅辦公室人士,放工之後同同事聚餐或者飲番杯chill下。就係見到個環境已經覺得好relax。Menu上嘅食物種類唔算太多,小食方面我就揀咗芝士肉醬焗粟米片,份量都幾多,一上台就見到大量嘅肉醬鋪喺面,但係原來每層都鋪滿晒Mozzarella芝士,每食一啖都充滿芝士同肉醬,而且Mozzarella芝士拉絲能力超高,不過就一定要趁熱食,如果唔係啲芝士就會變咗一餅。Main course 就叫咗兩個,分別係炸魚薯條同蟹肉香草忌廉蕃茄扁意粉。炸魚好大件,俾我手掌更加大,魚肉嘅肉質疑都好厚身。炸粉夠薄而且一D都唔油膩,魚肉依然嫩滑,薯條嘅份量都好多,多到食唔晒。蟹肉香草忌廉蕃茄扁意粉面頭鋪滿大量嘅蟹肉,醬汁除咗有蕃茄嘅鮮甜帶有微酸之外,仲好creamy,扁意粉嘅軟硬度適中,最重要嘅係大量嘅蟹肉令到每一啖意粉都食到。…查看更多

同老公撐枱腳,所以搵咗間有情調D嘅西餐廳,入到黎環境有少少昏暗，每張枱都點左蠟燭,有少少浪漫氣氛。因為實在太肚餓所以首先就嗌D小食先, 我哋叫咗個炸薯條配黑松露醬同香脆魷魚圈。薯條比我想像中大份好多,新鮮熱辣辣炸,起炸得好香脆同埋本身已經有調味粉,再加埋黑松露沙律醬,好好食,不過就略嫌個沙律醬底偏甜咗少少。香脆魷魚圈一份都有1X舊,外層嘅炸粉唔會太厚,確實係好香脆,配埋泰式甜辣醬, Perfect match。主菜方面老公就叫咗照燒美國穀飼牛肩胛,相反主菜嘅份量唔算太多,有2塊牛肩胛肉,肉質都幾軟淋,切開仲係粉紅色,牛味都算幾突出。而我主菜就揀咗香煎厚切鵝肝牛肝菌意大利飯,意大利飯軟硬度適中,裏面嘅菇菌都幾多。香煎厚切鵝肝都幾大塊,而且煎得外脆內嫩充滿油香,配上意大利飯真係啱啱好。…查看更多

每次經過城中鴨子都大排長龍,今次一早拎定飛,諗住食餐好, 點知真係超失望。叫咗半隻招牌烤北京填鴨,點知上枱原來係凍嘅,鴨皮一D都唔香脆,而且好油冇鴨香。用嚟包鴨肉嘅薄餅皮相反就熱辣辣,但係亦都好油。生煎包亦煎得一D脆嘅效果都冇,咬開又冇爆汁效果,完全同蒸包冇咩分別。上海粗炒麵質超淋,肉絲好難先搵到一條,而且亦都係超油,又冇味。城中鴨子定價都吾算平,但係完全估唔到質素會係咁,食物質素甚至比一般酒樓更差。…查看更多

又黎到一間我幾鍾意嘅西餐廳,一坐低就即刻為我地送上墨西哥脆片配千島醬作為開胃菜。小食我就揀咗個超邪惡嘅鹹蛋黃薯角,每舊薯角都沾滿鹹蛋黃醬,香脆鹹香雙重滿足。椰香菠蘿沙冰夠晒Fresh ,沙冰打得好幼細,椰子同菠蘿兩者嘅味道都好平均。熱熔芝士牛肉漢堡都係邪惡之選,芝士醬超級澎湃, 牛肉漢堡煎到5分熟,超juicy,一切開D肉汁即刻流, 漢堡包上仲好有心思咁印上「香港」。仲嗌左個DIY Pasta套餐,包左餐湯,沙律同餐飲。雖然係pasta套餐,但係我選擇咗意式燴飯配黑松露忌廉汁,配料我就揀咗煙肉同煙鴨胸。忌廉汁好creamy,醬汁裏面本身都有少少蘑菇片作為配料,黑松露味道好突出。…查看更多

一開始見到餐廳名叫祥仔辣辣好搞笑,後尾先知道原來係名廚Ricky開嘅。近期唔知點解好鍾意食酸菜魚,所以一坐低我就首先決定要叫佢哋嘅招牌酸菜魚,佢哋選用咗鱸魚,魚肉非常之嫩滑,加上去左骨,啖啖肉食落又方便。佢哋嘅湯底用咗雞骨同豬骨之製,酸菜帶有微爽嘅口感,配菜仲有芽菜,蓮藕同萵萵。呢個酸菜魚令我相當滿意,特別係呢個天氣,酸辣令我更有胃口。同老公各嗌咗個lunch set,我就揀咗麻婆豆腐石鍋飯,麻婆豆腐香香辣辣送飯一流,石鍋熱辣辣上枱,令到蛋炒飯可以keep住保溫。略嫌麻婆豆腐唔夠嫩滑,不過整體調味唔錯。老公就揀咗去骨海南雞飯,油飯本身已帶有鹹香,海南雞去晒骨食落啖啖肉超方便,略嫌雞肉有少少柴,唔夠嫩滑。…查看更多

依間一生懸麵其實都食過幾次,比起拉麵我更鐘意佢哋嘅沾麵。麵可以揀冷熱同埋硬度,沾麵嘅湯味道夠濃,咸淡度亦適中。特濃豚骨沾麵湯底濃厚,配菜方面亦有大量筍片,最值得一讚係佢哋嘅豚肉,經過火炙後帶有炭香,為豚肉添加多一番風味。期間限定嘅檸檬柚子沾麵更令我有驚喜,除咗沾麵外,仲有滿滿嘅蔬菜,感覺更健康,沾麵湯底散發柚子清香,味道清新。小食方面亦選擇咗雞軟骨棒,一份有2件,軟淋嘅雞肉加上雞軟骨粒,有口感,係一款唔錯嘅小食。…查看更多

晚市禁堂食真係好唔方便,仲要唔知會禁到幾時,有時想同朋友食質素好少少嘅打邊爐都要通常等到晚市先有,好彩比我發現原來而家午安市都有得食高質嘅火鍋套餐。價錢唔貴＄788仲包埋加一同埋醬料費,湯底嘅選擇都幾多,呢排天氣咁凍我就揀咗養生嘅花雕醉雞鍋,湯底好濃嘅花雕酒香,呢個湯底仲跟咗半隻雞。小食方面我揀咗自家製椒鹽墨魚腐。肉類方面有4種選擇,有豬或牛,我揀咗頂級手切安格斯肥牛,油脂分布平均,有牛味。另外火鍋配料嘅選擇都幾多可以自選6款,雖然份量係半份,不過其實兩個人食真係超夠依家原來仲要送乾杯蠔,D杯鮮甜肥美。個套餐仲包2杯生啤或者特飲。…查看更多

本身諗住開開心心食返餐點知變咗完全係超級失望嘅一餐,本身係諗住食敏華招牌嘅黯然銷魂飯,點知原來依家旺角分店冇得食。咁都算啦,我記得之前喺九龍灣分店食過嘅蔥油豬扒雙蛋飯都相當唔錯,就叫咗蔥油豬扒雙蛋飯,明明之前食過有兩大塊厚切豬扒,點知今次得一塊普通size豬扒。最嬲嘅係2隻本應係太陽蛋嘅雙蛋竟然變咗2隻煎熟蛋。冇任何蛋汁可以伴飯,成個飯超乾。完全根本上唔係嗰回事,成個飯質素即刻下降。呢間分店絕無下次。…查看更多