yymickay的个人专页

嗰度幾個商場連接住，平時通常都係去嗰度買完衫，就順便食埋嘢就走，間間都係小店，唔係酸辣米線，就係好出名餃子喺嗰度，今日路經諗緊食乜嘢好之際，見到佢個裝修好特別好簡潔，比個碲花湯好吸引住，即係叫豬手，食完真係覺得好好食，我仲同老闆講好好食好啱我食，食完啲嘢唔口渴，碗碲花湯真係要讚，豬手好腍好正好正，個湯滿口膠質，女士恩物，淡淡胡椒香味，唔搶口非常道位，一路食一路諗，究竟師傅係咪隱世廚神嚟嘅呢？好耐冇食過啲咁好味嘅嘢食，呢餐非常大滿足，好感恩老闆煮咗啲咁好食嘅嘢。…查看更多

食過幾次lunch，啲嘢食係咪真係咁好食呢，其實都有少少商榷餘地，我只能夠覺得係大份，第一次去食豬手飯，真係一個男人都未必食得晒，但可惜佢豬手飯係冇酸菜嘅，另外豬頸肉飯，個汁唔算太突出囉，燒雞扒配木瓜沙律要跟飯，我略嫌木瓜沙律唔夠酸同辣，味道平庸，雞扒係好食，其實佢真係啲嘢太大份，根本上冇可能食到，炒河粉就唔好食，唔得囉，飲品方面味道唔覺得佢特別，泰式奶茶唔香，佢啲餐由60幾蚊至80幾蚊，咁跟埋嘢飲，又無加一，啲份量又大大份咁，係超值嘅，呢度食嘢就真係要快食快走囉，因為都好多人等位，食完你就唔好諗住喺度hea下先，因為啲職員都會虎視眈眈你呀，都有些少壓力，佢開中午12:00有時未開門，已經有人排緊隊，有次12:15樓下已經坐滿人，真係好誇張。👉啲汁醬放埋係碟飯到就唔係咁好囉…查看更多

未食之前，睇食評講到點好食，仲有好多人都大推芋角好好食，亦都抱住好大期望，食到啦，唔係講到咁誇張，係，芋角炸得好鬆脆好鬆化，但餡料味道唔特別，平平無奇，最失敗個灌湯餃，直情無餡料，個湯淨係濃烈乾瑤柱味，飲完呢餐茶，只係食咗點心，都唔打算再去試晚飯。有時食嘢，外在環境因素影響都會影響食慾，隔離枱個男人係咁，咳吐，咳吐，講嘢又大聲，又無枱可以換，已經無謂口去品嘗，食嘢真係好講彩數，遇著有呢啲客係隔離，真係….👍我好鍾意張櫈，可以拉出塊板放袋，呢樣我好欣賞。…查看更多

經過如心睇到有一個一人燉湯套餐，包一個小菜一個飯一碗燉湯，套餐$138，叫咗個XO醬茄子魚塊，燉湯係響螺淮山，我都知道食茄子同埋XO醬呢一啲嘢，一定係會好油嘅，咁接受嘅，呢個餸基本上諗住佢係好惹味，香香辣辣，但係完全係平淡，魚塊又乾，簡直失敗。燉響螺湯好濃郁，足料，食完呢餐飯之後，可能啲響螺味太搶，個口有啲好唔舒服感覺，飲茶都沖唔到，見天氣有啲乾，叫碗糖水比自己滋潤吓，就叫咗碗蓮子蛋白杏仁茶（$44蚊），職員放上枱，嗰刻我有啲呆咗，見到一碗漿糊嘅狀態，正所謂三行佬做門過得人都要過得自己，你比客人食呢個蓮子蛋白杏仁茶，但你比咗碗漿糊，你覺得過唔過到自己呢？我即管試吓，點知啲蓮子重要係酸嘅，真係好離譜。…查看更多

路經上水時間夾到，專登去珍苑食返一碗我的至愛嘅雞翼粗麵，一場嚟到，叫多一碗淨水餃先，食完今次唔知又要等幾耐先可以再嚟過，所以我要好好珍惜。雞翼真係永遠都咁滑，真係好滑，永遠都咁好味道，佢嘅雞翼係我心目中一定排頭一，二位，粗麵好爽口，真係冇得頂，水餃仍然都係咁好食，水餃入面啲筍絲好香好爽脆，個湯底好清澈好好飲，好順口，最鍾意佢個湯有放韭黃。今日簡直係大滿足，一個人食咗兩碗嘢，再飲樽忌廉，飽一飽，好開心。…查看更多

呢間舖頭真係睇佢唔出，第一次去幫襯，食咗個藥膳醉雞米粉，米粉好爽口，老細話佢哋用霸王花米粉，所以好爽口，個醉雞湯好好味，藥材酒香味好夠，雞有雞味，個湯飲完唔會口乾，涸喉，呢個藥膳醉雞湯完全係女士因物，得閒去食好過自己煮。食完之後我第二日lunch再去食過，叫咗個霸王雞飯配蔥油汁再配肉骨茶，嘩….碗肉骨茶令到我真係好有驚喜，一啲都唔馬虎，比起出面嗰啲話肉骨茶專門店好味道多多聲，碗肉骨茶好香濃，又非常足料，有骨，有豆卜，枝竹，蒜頭，霸王雞個蔥油汁又係好好味，平時我食飯都係食少少，因為有呢個汁我成碗飯食晒。始終佢哋喺荃昌呢邊，啲舖頭都係細細間，座位有限，所以我自己都會揀一啲唔太忙繁忙嘅時間去食。佢賣嘅嘢唔貴，係物超所值，用心製作，我仲有好多嘢未試，會成為我嘅飯堂。…查看更多

好開心終於可以嚟幫襯，叫咗個套餐，日式輕芝士蛋糕加一杯凍美式咖啡$51蚊，蛋糕軟錦錦，如果你勁鍾意芝士味嘅話，可能你會覺得唔夠香，因為佢係輕芝士。店舖好易搵到，係西營盤街市對面，對出嗰段路係無車行，可以好放心係斜路影相，店舖好有特色。最近心情好沉重，去完高円堂真係放鬆咗心情，短暫忘記傷痛。臨走時決定買多一隻蛋糕返屋企食，全隻$118，我大貪啲，好想個貓貓logo大隻啲。職員哥哥同妹妹好nice，唔知點解覺得佢哋同店舖好match，一到舖頭好似去咗日本。🐱🐱因為我係貓奴，所以好開心🐱🐱…查看更多

見到街邊有易拉架介紹有啲午市套餐，又唔知食咩好，猶豫咗一陣，好啦咪試吓啦，唔試過又唔知點。$78午市酸菜魚套餐跟白飯我加$8轉咗米線另加$5叫咗罐無糖可樂有加一埋單剛好$100服務環境係好好，有壺暖嘅清淡菊花茶，送咗碟餐前小食-雲耳，又幾好味喎，但個酸菜魚點解係咁嘅，係咩風味，魚係好滑，味道就唔係食開嗰種酸菜魚嘅酸辣味道，係無咗嗰種味，酸菜得極少極少極少，有啲啲芽菜，另外仲有啲青瓜，青瓜份量接受。…查看更多

環境舒適，味道失色，職員服務嚇到我無面無血色（青晒），啲職員個個都死氣沈沈，郁都唔想郁，係個男職員正常返少少，嗰幾個阿姐，我得罪咗你咩，我哋坐低時你又唔提我哋掃Qcode落單，行多幾步埋嚟我哋張枱講唔得，個送餐機械人勤力過你，入門口掃針咭部機hang機，話比你知，你就係咁係櫃枱叫我哋放低啲放低啲。海南雞飯套餐$90，雞的確係好滑，但醬汁無咩味，個湯好油。肉骨茶套餐$86，有兩嚿骨，一字排骨，好腍，有幾塊豆卜，胡椒味好勁，湯好濃，好搶口，涸喉，唔好飲，唔香，呢個餐男人實食唔飽。馬拉盞炒通菜$38，就咁係普通清炒，一啲馬來風味都無。…查看更多

行到攰好多都要等位，仲要條人龍都幾長吓，見到呢間有位唔洗等，是但就去幫襯，消費要$90一位，各叫咗一杯凍，熱Latte，一個辣肉腸pizza，埋單$279。😋第一次幫襯，原來佢杯Latte好好飲，咖啡好夠香濃，有一種厚實質感，味道好豐富。個辣肉腸pizza真係有驚喜，真係3mm餅底，落order 先做，好熱辣辣，個餅底食落好似食緊薄脆，西椒好香，芝士好多，仲可以拉絲，呢個pizza我好鐘意，一上枱已經聞到好香噴噴嘅pizza味，原來有時無人排隊等位都未必係有伏嘅危機。…查看更多

唔明佢有咁多好評係邊度嚟，食完覺得唔值比呢價錢，好搵笨，馬場景？係要行到埋窗邊先睇到，佢個室內格局好奇怪，窗簾布又檔住，唔識點形容，可能我哋唔係係29樓包房掛，又無服務，真係可以用零服務嚟形容，啲點心又唔好食，做埋啲多餘嘢，根本唔值比呢個價錢，成日食嘢都好黑仔，唔係蟲蟲就係頭髮，今次又中，一上金魚餃，籠邊攝住條頭髮，食完晒所有嘢覺得可以用（奶嘢）嚟形容，埋單$469。仲比我大開眼界見到呢間嘢，隔離枱叫咗個冰鎮生炒骨，上枱嗰吓好靚，好大個玻璃盤裝住，啲乾冰製造好多煙霧，好有意境，點知佢哋食食吓，唔知係咪啲冰溶晒又溶得特別快定唔知點解，啲生炒骨跌晒落啲水到，個職員用大匙羹逐粒逐粒撈返上嚟放係個碟仔到，叫佢哋繼續食，睇到我眼都凸埋，咁仲點食，好似將啲生炒骨過冷河。😔芹香鮮蝦金魚餃（好硬）$88黑豚肉咸水角（塊皮好厚，餡料又少）$88虎皮尖椒（超級勁搵笨）$98XO醬蒸鳳爪（正常）$58、兩週年優惠價原價$68黑炭杏汁飽（杏汁好甜）$58 、兩週年優惠價原價$68…查看更多

叫咗個$468套餐兩位起，好多嘢食，好抵食，職員聽到我哋話好想食豆腐花，幫我哋留定先，埋單$1117，環境好有氣氛，一早book定海景位，如果沒有90分鐘用餐時間，就真係非常圓滿，但我哋用餐超過時間無被催埋單交枱，全部嘢食都好好味，但我個人覺得酸菜魚就唔夠味道，不過啲魚肉好厚身。呢度乳鴿真係好好好味👍👍👍，係一定要叫，原本想再叫多隻乳鴿，但真係好飽，唯有下次。😋介紹下個套餐有咩好嘢食：四川口水雞（好正）炸豆腐（普通）鮮椒海鮮滙（酸酸辣辣好開胃，好正）辣子炒蝦（好食）淮杞響螺燉雞湯（好正）酸菜桂魚（一般）乳鴿（非常正，入味）炒菜（正常）擔擔麵（麻-我鍾意）四川冰粉（好得意，凍啲會更好）另額外叫咗三碗豆腐花（如果熱啲，更加好食）…查看更多

之前食brunch 送咗兩張$100 coupon六月底到期，book咗今晚再去，$300就可以用一張$600就可以用晒兩張，我哋叫咗炸蝦餅，香辣海鮮炒河粉，紅咖喱荔枝炆鴨，再加個法飽，最後嚟個甜品拼盤。晚餐好食好多，幾樣餸淨係蝦餅覺得就唔對路啦，好似食緊炸肉餅，紅咖喱荔枝炆鴨好好味，可惜啲鴨肉好少好少，今晚最驚喜係個法飽，個皮脆仆仆入面好鬆軟，仲熱辣辣，上次午市時間個包係冇溫度，軟晒，另外甜品佢真係好出色今次個芒果糯米飯好正啊，糯米暖笠笠煙煙韌韌，原來晚餐嘅質素好更多。…查看更多

第一次夜晚去幫襯，環境好好，望住靚靚維港一路睇住夜景一路食飯，佢價又唔係好貴，又有咁好環景都好值得，當晚叫咗辣肉腸Pizza，白酒蜆肉意粉，燒春雞，兩杯特飲，好滿意，意粉同pizza好好食，雞就普通無特別。同經理傾開，佢話佢哋午餐好抵食，我哋就搵咗有日再去食午餐，叫咗龍蝦及牛小排，餐湯蘑菇湯好香，好creamy ，當日下午天氣有雨，望住濛濛瀧瀧嘅維港，好浪漫，如果天氣好可以坐戶外，又係同戶外座位無緣，都有好多人嚟食午餐。…查看更多

非常好味的雞湯麵，新鮮雞好滑，湯又好飲，濃郁雞嘅精華，唔油膩，好清晰，加幾粒葱花，一條青菜，加埋佢嘅酸菜，已經好香，成碗麵好好食，我鍾意配幼麵，粗麵我就唔太啱啦，碗麵同相片都係一樣，係有雞髀嘅，雞皮好黃，唔知係咪三黃雞呢，唔係喎台灣佢哋係放山雞，呢排成日落雨，所以又心思思去食，食完呢碗雞湯麵個人都暖笠笠。有時見佢人多等位，都唔想排隊，但隔耐咗無食又掛住佢，好想飲嗰啖湯，好想食佢隻雞髀，所以就會避開某啲繁忙時間去食。…查看更多