AC1116的个人专页

喺中大行萬倫學生中心2樓入邊嘅paper and coffee Cafe已經想試好耐！以大學嘅Cafe嚟講水準非常高！日式餐有唔同嘅選擇，我今日就揀咗野菜加雞扒！我朋友就揀咗野菜飯加法式牛肉！野菜係好多唔同嘅雜菜新鮮高質素，但個人口味覺得太清淡，加咗一啲鹽之後就即刻變得好好味！其他餸包括豆腐，煎雞扒都值得推薦，今日未試傳說中嘅炸雞，下次可以試！法式牛肉都有驚喜，而且份量所有份量都好多，十分抵食！最出色嘅應該係咖啡啦，估唔到一杯加$25鮮奶咖啡本身嘅咖啡豆好香！但係傳說中嘅甜品Tiramisu我就覺得失準啦，之前見到人哋嘅相片係非常之大件，點知原來係比較細件，而且冇咖啡酒味！呢個可以唔使試！總括嚟講都係一間好有水準嘅Cafe ！…查看更多

（補發）中大和聲書院裏便一間Cafe ，大部份室外嘅環境對住吐露港，比你有好開心感覺！食物性價比好高，而且質素經常保持水準！最喜歡雜菜墨西哥脆片沙律加慢煮雞胸肉，加多每一份雞胸肉都係10幾蚊性價比非常之高，而且佢個沙律醬，調味好特別，非常美味，所以對於想免澱粉質加蛋白質嘅人士，呢個就最適合啦！另外仲有一個窩夫套餐可以自選沙律，在家不同的食物配搭！甜品一定要食嘅就係窩夫加Movenpick雪糕，佢呢度有好多種Movenpick雪糕，你可以選擇！跟餐咖啡及甜品必選！咖啡好味好味！尤其係我偏好玫瑰咖啡！甜品我會推薦cream brûlée！好香好滑又唔係太甜！…查看更多

提早同屋企人慶祝做節，記得之前朋友介紹過佐敦有間順德河鮮傳統酒樓，所以就試吓！我哋一家人試咗個六人餐！份量全部都好大，我哋七個人食都非常足夠！呢間傳統酒樓真係好有舊式酒樓嘅風味，我覺得帶外國朋友嚟食都係有一啲特別嘅體驗！1. 蟲草花鮮響螺頭雞湯 （5/5）首先上個螺頭雞湯就俾佢一大盤湯料嚇親，因為真係好足料！嗰啖湯係極之濃郁！我哋七個人分每人一碗之餘仲可以分多兩至三碗！2. 啫啫西芹焗魚卜煲 （5/5）全晚我覺得呢個係最最最好食個煲，入邊真係好多魚卜，全部都大大條，覺得好多骨膠原啊！味道煮得非常之入味，一啲都唔會覺得腥，而且魚卜係爽、脆、滑！呢味菜應該喺其他地方都好難食到，所以呢個係極致推介！👏🏻👏🏻👏🏻3. 蒜子山扣脆肉風鱔皇 （4/5）鱔皇都係用煲，好肥厚嘅鱔片，但係我自己個人口味我會鍾意係脆炸燒口味多少少，同埋鱔有啲骨，但味道濃郁香滑嘅！4. 金牌得獎銅盤污糟雞 （5/5）呢個見佢個名都係比較期待嘅，賣相就係銅盤上，望落去好似好一般，但係你一食個雞你就會覺得知道…..係非常之滑，同埋入味！呢個我都會推介！5. 太子成名脆皮咕嚕肉 （5/5）咕嚕肉真係非常之脆，一夾落去都已經知㗎啦，食落去就更加係外脆內軟！6. 籠仔荷葉梅菜蒸菜遠 （4.5/5）呢個應該都係招牌菜式，我好喜歡佢個甜梅菜，又唔會搶咗本身菜心嗰個鮮味，我試過喺其他地方食可能梅菜嘅味太強，但係呢個係啱啱好！整體嚟講，一大班人做節或者平時宵夜晚飯都值得嚟，因為而家呢啲順德菜式又要有水準，好難喺其他地方食到！而且價錢都係合理！六人餐$2880！…查看更多

住了錦田一段時間，成日見到呢間餐廳，但係都冇試過！今晚再去門口睇吓，負責人就好有心咁介紹每一個唔同嘅套餐，而且星期六仲有live Band演唱我哋兩個人結果試咗一個最輕盈嘅海鮮套餐$158一位真係好抵！有蝦、有扇貝、有蟲草花蒸雞、有小籠包、蟹柳，我哋自己加咗一隻波士頓龍蝦，都係加$158！另外蔬菜係任食！所有海鮮都非常之新鮮龍蝦都有膏，好滿足！兩個人完全食唔晒，飽到最後！好好味嘅海鮮精華粥都只係可以食到一碗！服務非常之周到，服務員全部都好友善，提我哋每一樣海鮮應該蒸幾耐。最後建議我哋打包啲粥返去個餐之後仲有糖水送！而家真係好少有現場演唱，當晚歌手都唱得幾好，而且成個氣氛好開心好輕鬆，值得去！非常好嘅體驗，適合一家大細或者慶祝活動！…查看更多

慕名而來係打卡嘅好地方少少坐得舒服，但係食物一般！性價比唔高！環境有少少特色係靚嘅！午餐叫咗一個豬架賣相非常之好有沙律同薯條，但係豬本身非常之乾同嚡！我哋兩個都比較細食，但係都完全唔飽！另外叫咗一份油封鴨腿窩夫！賣相都係非常之好，但係嗰個油封鴨腿完全係好似烚嘅一樣，只係表面用火槍燒一燒！午餐就確實有啲失望，普通一間西餐廳差唔多！我覺得應該係食下午茶甜品飲返杯咖啡或茶會比較適合！見到佢個英式鬆餅好似好吸引，所以叫咗一份英式鬆餅同埋特色咖啡玫瑰latte唔錯，同埋黑糖薑latte！ 鬆餅都鬆脆好食，只係覺得果jam及奶油可以多一點！兩杯咖啡無論相同味道都非常之好！所以我係會推薦大家嚟食下午茶閨蜜或者朋友小聚一下！…查看更多

我哋慶祝週年紀念，想試吓新嘢！原來喺灣仔有一間咁高質素嘅餐廳，新開嘅，大家可以試試，我哋就一試難忘！AERA用嘅食材質素好好，唔同季節會有唔同tasting menu! 今次材料主要係來自日本同埋本地嘅高級食材！原來廚師團隊係十分之用心，每一道菜你會感受到，都係用足心機嘅手工製作💗！非常之獨特，同埋喺其他餐廳食唔到㗎！服務嘅團隊亦都非常之貼心，細心！每一道菜都會換餐具不在話下，細緻到每一道菜都會預備抹手嘅濕紙巾！而且仲會關心我哋食得開唔開心，舒唔舒服！超六星級嘅服務！讚！🌟昨晚嘅Testing Menu有差唔多10道菜！1. Amuse Bouche一共有三款，首先試咗春卷！裏邊有好清新嘅味道幾特別！最欣賞係紅蘿蔔撻，皮脆餡靚！入面嘅餡係混合左紅蘿蔔醬汁同埋有少少辣嘅感覺，層次口感非常多！另外一個係好似甜麵包嘅感覺，有少少麵豉味，同埋蜜糖味配上椰絲，都係食得出廚師利用唔同色材嘅味道同埋口感，一開始就已經好有驚喜！2. Starter:呢道前菜見到都唔捨得食，最喜愛之一！試咗佢個Panna係非常之滑，混合左喺個底下面嘅青口，加埋魚子係鮮味無窮！3. 2nd Starter 呢道望落去好似冇乜特別，但唔係一般嘅小雲吞。小雲吞裏便有好香口嘅腸同埋菌類，加上面頭嘅farm to table 芫荽BB，混合上嚟係成口都係濃香，你會想再食多啲！連個湯底都飲清晒！4. Bread 麵包就真係只此一家，因為佢哋係自己特製嘅麵包！麵包本身已經有浸清淡嘅豉油香味！淨食已經覺得好香，配合佢哋自己調配mustard butter 令到味道再提升咗！5. 3rd Course起初見到覺得好得意，有兩隻小雞腿，原來係用本地黃土雞，慢煮出嚟，所以非常之入味，外皮係脆到不得了，入邊啲肉係非常之滑！少食多滋味！6. 4th Course呢道菜係其中最喜歡㗎，本身係用馬友魚做底，上面有非常之新鮮來自日本嘅北海道海膽賣相非常之好之餘，鮮味甜味充滿口腔！7. Main Pigeon 佢哋用嘅Pigeon係好嫩滑，一啲都唔鞋口，煮法都係其他餐廳未食過，半生熟，咁好似食緊魚生一樣，我自己本身唔係太食生食物，所以就覺得麻麻地，但係個味道係好好！A3 Wagyu Sirloin呢度主菜我自己個人就好鍾意，因為最鍾意食和牛。材料靚一定就冇得輸！配合一個酸酸地嘅醬汁都幾特別！8. Pre-Dessert 驚喜陸續來，估唔到甜品都係非常之特別創作！呢個係用藍莓整到好滑嘅，好似雪糕咁樣！自家製嘅雲呢拿油，唔會冚左個藍莓味要你自己嚟試吓先至可以講到個感受！9. Dessert 呢個原來係受一個傳統馬來西亞飲品嘅靈感，啟發轉化成一個唔同形式展現嘅甜品！淨係睇佢製作嘅手法已經好吸引，再加上裏面個普洱茶雪糕加小麥草醬汁，估唔到混合起上嚟係好特別嘅味道，兩樣非常之配合！10. Petit Four 唔係一般嘅四件餅仔，每一件都仲係繼續去到最後用心嘅製作，同埋創意真係要比滿分！貝殼餅皮脆內軟，熱辣辣嘅！另外有一個好似以前舊式嗰啲蜜餞油皮，當然佢呢個好食好多啦！最欣賞嗰個望落去好似好硬，其實係青檸味嘅棉花糖甜酸度非常之合適！由一開始食到尾真係用咗兩個半鐘，每一道菜都係廚師都會介紹！實在感受到嗰份熱誠！對食物質素要求嘅熱誠！我哋覺得今次周年紀念嘅體驗真係非常之開心，都建議大家可以係啲慶祝日子嚟呢一度試吓！…查看更多

呢間轉專食和牛放題燒肉餐廳，但係午餐都有好多抵食嘅套餐，有百鬆啲蚊㗎燒肉餐，如果唔食燒烤嘅話，都有其他嘅定食選擇！由$68至$98不等一個定食餐，銅鑼灣來講真係幾抵！後來上菜之後就發覺佢所有用料真係高質！每一個定食你都可以揀湯或者蕃茄沙律同埋三文魚刺身或日本餃子而且侍應仲同我哋講，有餐後甜品，係雪糕仲可以揀唔同口味，超出預期！其他我唔記得咗影，我叫嘅係$78燒牛肉定食我揀咗沙律同埋餃子，最後仲有Movenpick雪糕真係超抵！註： 三文魚刺身，淨係買上嚟都估唔到幾十蚊嘅餐都咁靚，我朋友都話係非常之高質，充滿肥膏美味，入口溶化抵食抵食！…查看更多

本來冇諗住嚟呢間，見到環境都唔錯試吓啦！唔係咁鍾意食德國菜，因以前嘅經驗唔係幾好！但係呢度令到我對德國菜完全改觀！必食推介德國鹹豬手呢度做得係200分！1. 佢切埋俾你，件上2. 皮係薄脆，連皮連肉食！哇濃香味又唔油膩3. 啲肉質嫩，絕對冇好實好鹹！有啲人可能覺得唔夠鹹4. 酸菜：從來未食過咁好食！好特別嘅酸菜….你係想不停食！唔係勁酸嗰隻，少少酸好開胃，有一種好特別嘅味道，你要自己試過先知5. 配菜嘅烤薯仔同蘿蔔都係好甜炭燒牛扒呢個性價比高！我都會比90分！冇諗過呢度嘅牛都咁好食，炭香味出，牛扒嘅質地適中，有牛脂味！性價比非常之高，二百幾蚊出邊食唔到咁大塊牛扒！10oz!德國雜錦香腸呢個我都比100分以前食過其他地方啲香腸我真係以後都唔敢再食！但係呢度啲真係每一種都好好食，我唔知點解呀總言之就係好食囉！其餘嘅就算係side dish 炒椰菜仔都係好好食！一啲都唔硬，仲係好嫩！而且其他譬如蟹餅都係值得推介！仲有試咗一杯柯華田香蕉Smoothies 裏面係我估冇加糖㗎！所以絕對好適合注重健康嘅你！真係好好飲喎！你哋下次嚟一定要叫！…查看更多

偶然遇到呢間充滿摩洛哥風情（有啲人覺得係峇里）嘅樓上Cafe，好開心！好開心！當年今日去咗峇里旅行，今年今日真係有旅行嘅感覺！cafe主要分三個區域，室內有水池打卡位，另外有一個沙灘休閒打卡位，仲有室外休閑度假嘅好多打卡位！呢間Cafe嘅食物都係好有驚喜，非常之有質素！推介：原隻軟殼蟹鹹蛋忌廉意粉成隻軟殼蟹係炸得好脆！但係一啲都唔油膩，意粉有淡淡的鹹蛋味，真係好好食！份量係啱啱好，我都係比一百分💯跟餐嘅南瓜湯都係好好飲！好香濃南瓜味真材實料！加$30有杯白咖啡，我就叫咗Latte!呢度嘅咖啡都係好啱我口味啊！用咗係nutty有朱古力味嘅咖啡豆，好香！沖得好好同埋個拉花都好靚！下次約埋姐朋友嚟或者公司喺度搞小派對都可以…查看更多

今日又有新發現對於我嚟講喺淘大都有好多唔同類型嘅餐廳，見到呢一間就好似另外一個同類品牌，但係呢間嘅份量用料同埋價錢都係好好多！性價比高好多！好少見到拼盤大份係低於$100，呢個大拼盤有六樣嘢都只係賣$82！價錢非常之合理！而且六樣都係非常之好食！除了咖喱醬比較辣之外但係個咖喱係好香，如果適合一般香港人，可能個咖喱減一半辣會比較好啲！蒜蓉炒菜一般，雖有啲菜變黃左，但係份量係非常之足夠！最後勁推介就係馬來西亞肉骨茶好味道啦！夠熱，而且有三條排骨！湯入邊仲有好入味嘅冬菇，呢個真係一百分喇好味！…查看更多

之前幫襯過下午茶今次係母親節晚餐！食物雖然嘅種類唔多，但老實講差不多每樣都好好食！呢度嘅招牌沙律我係推介嘅！每次食親都覺得用料好，而且份量都算多！基本上每一樣嘅份量都好好！松露薯條好好食香脆鬆脆黑松露味亦都好重青口真係有啲失望囉，份量係可以嘅，但係有啲腥同埋肉質太實樣同味道都OK，但係實在太細件囉性價比唔得，太誇張喇，大概兩吋咁長！呢個薄餅就一般正常冇乜特別如果嚟呢度食都係推介大家要叫主餐牌嘅主菜。黑毛豬扒真係非常之好食，肉質有質感但有肉汁，入味！呢個辣蝦意粉就所有屋企人都勁讚！少少辣好惹味！春雞就見佢賣相都好好！連埋皮嘅髀同埋有皮嘅肉會比較香口一啲！如果淨係食中雞胸部份呢，就啲肉質麻麻哋啦！其餘嘅配菜黑松露薯蓉都係好正！呢個封門柳我覺得係必食！以咁多樣主菜來講，呢個嘅性價比係最好！肉質好好！牛嘅香味亦都非常之重！同埋份量都算係足夠同樣所有主餐牌嘅配菜都係差唔多，有啲菜同埋都係黑松露薯蓉但係好好味！仲有一個係叫做薯粉粒，呢度唔夠位放相，但係嗰個都係有驚喜嘅冇諗過居然係咁好味！如果叫粉面類，值得叫推介因為比較特別！甜品最好食係芋頭窩夫！同埋係口感做得非常之好！外脆內軟橙味嘅cream brûlée就偏向比較甜，一般另外嗰個粉紅星球就玩味比較重啲，但係非常之靚！打卡一流！食嘅味道都可以，個殼朱古力唔太甜㗎，多人分都可以！攞嚟影相就一流啦！整體來講成晚嘅晚餐都係值得有8.5分！平均每人大約差不多$300晚餐差唔多！…查看更多

查實香港有好多新嘅地方可以逛逛！嚟到啟德站一帶有好多唔同嘅餐廳，冇特別預備，喺地圖見到有一間西餐廳就去睇吓…..呢間西餐廳有戶外座位，我哋坐喺近戶外有冷氣之餘亦都見到出邊嘅天。雖然隔離係地盤但係都不失為一個休閒嘅地方！我哋午餐就係主餐牌叫咗兩個主食。結果係十分有驚喜，一個係Classic特色漢堡包，有沙律有薯條跟上，另外一個係虎蝦海鮮意大利飯！呢個burger係充滿炭香味！無論個包，烤得好香，漢堡扒都係Juicy之餘有牛肉嘅油香味！亦加埋佢本身嘅煙肉成個整體嘅口感都係好滿意，不停講咗好多次「好好食」！ 配菜沙律都係新鮮嘅不過略為少少油！薯條就差咗少少比較霖，如果薯條都炸脆香口啲就102分！呢個係好似有少少誇張真係我食過嘅海鮮意大利飯裏面最好食嘅一個！你見到佢嘅虎蝦係真係真正大虎蝦，而且燒得好好味⋯⋯有蝦膏味，仲有真正唔同嘅海鮮粒，大大粒嘅，混入左喺個飯裏面。飯裏面仲有有蕃茄粒同埋蘆筍，用料係非常之豐富！值得推介大家可以試一次如果你去啟德站嘅話！…查看更多

呢間有驚喜Cafe係再次幫襯㗎⋯⋯今次嚟到有兩大驚喜！再次嚟到都係坐得返我上次坐嘅中圓枱，喺最好嘅角落，望晒餐廳嘅全景同埋玻璃窗外嘅景致！Cafe Latte 就必叫㗎喇! 今次驚喜有2:1. Caffeine Lover Waffle Waffle係跟咖啡啫喱同埋一個咖啡雪糕！鍾意咖啡嘅你呢Mix埋咁多樣嘢一齊食就係最好嘅建議！2. 娛記正傳角落 - 張國榮最後一格的經典另外一個驚喜就係原來呢度有一個娛記正傳嘅角落，介紹張國榮名為張國榮最後一格的經典！展覽咗少部份昔日哥哥嘅一啲唱片、cassette帶同埋有啲tees 同 tote bags 賣！哥哥嘅fans可以嚟嘆吓咖啡同埋嚟呢度欣賞一下！…查看更多

而家疫情都盡量搵啲餐廳係有室外嘅，一來舒服啲，二來亦都感覺空氣流通一啲！喺海濱滙呢間餐廳就有室外嘅空間，喺鬧市來講都係比較舒服！ 今日雖然假期但我哋過咗最繁忙嘅中午時段先至入座，就已經可以坐近室外嘅空間，非常之舒服！假期仲有brunch 選擇比住主餐牌平一啲仲有跟餐飲！只係可惜餐飲只可以揀汽水或者茶冇咖啡如果要咖啡需要加$18！另外有選擇可以加湯或者沙律加$15！餐湯係蘑菇濃湯好好味如果熱啲就比較好啦兩個主菜我哋試咗1. 牛面肉黃姜飯面肉係炆得非常之霖，好入味！好味！但係黃姜飯就略嫌啲飯比較硬！2. 西冷牛扒配薯菜首先講啲配菜呢，係用炭火煮，好有炭香味唔錯唔錯。牛扒呢，嘅七成都做得好好！可惜牛扒本身冇乜味，而跟牛扒嘅gravy 都係略嫌淡咗啲！但係個質地係OK ！百零二百蚊來講都算係可以！最後我叫咗奶茶囉因為冇咖啡跟！反而奶茶原來有驚喜喎！佢係似茶餐廳嘅濃奶茶！唔錯唔錯！唔係一般Cafe嗰啲淡淡嘅，所以如果嚟呢度可以嗌奶茶！…查看更多

湊湊火鍋一向我都係捧場客！今次就要試吓銅鑼灣嗰間。雖然地方冇尖沙咀咁大，但係仍然都係坐得非常之舒適，食物都係保持一向嘅水準！火鍋我就覺得係花膠雞火鍋比較抵食，性價比強！因為裏面有唔少花膠，同埋好多雞肉，仲有鮑魚！ 飲完個湯其實都已經飽！抵食方法建議：1. 叫一個比較有份量裏面已經有肉嘅鍋，譬如花膠雞窩2. 可以嗌幾樣小食，四個人就差唔多！建議可以叫午餐肉、叫蟹子蝦滑、魚滑蝦滑棒棒糖、響鈴等等唔一定需要嗌牛肉豬肉我哋今次就嗌左兩份豬肉一份牛，四個人其實都食唔晒！叫咗一盤大嘅蔬菜，其實覺得會建議大家唔需要嗌什錦蔬菜盤，可以散嗌就應該性價比會再好一D3. 多啲添食自助吧自助吧除咗各樣調味料有生果，有飯，有肉燥有小紅茄，最好味我最鍾意嘅就係佢個魚皮同海草前菜！4. 必叫大紅袍珍珠奶茶呢一定要飲佢出名嘅大紅袍珍珠奶茶，本身幫襯已經半價可以叫飲品。建議可以叫一個大嘅珍珠奶茶，然後叫佢分兩杯細上，已經可以等於兩杯標準裝夠兩個人飲。這樣性價比仲更加抵，大概$7一杯！哇去邊度搵呀呢度最好係仲有沙冰俾你同埋一個一定要食滿分嘅係梅子茶凍如果你唔叫牛肉豬肉我諗大概每人百多元應該可以$200有找！因為午餐時段六時之前結帳仲有八五折！…查看更多