kakaka3721的个人专页

三五知己簡單聚會，食得開心又抵食，食物豐富到位，正宗泰國菜，最緊要食物新鮮，最怕炸嘅嘢食返炸再返咋，佢呢度即叫即炸，上菜又夠快，完全唔耽誤時間，一樣一樣接上，食物夠晒熱度。去泰國餐廳必然會叫一個泰式拼盤，呢一個係最基本的菜式，但係要好食都要新鮮，佢嘅炸蝦餅就係最出色的，剛炸出來上枱熱辣辣的，咬落外皮脆，裏面軟熟蛋呀四炸春卷塞爆晒粉絲肉碎，一啲都唔油膩，最怕食到春卷係油淋淋，外皮鬆脆。酸酸辣辣芒果絲，再配上淡淡鱸魚肉，夾起幾條芒果絲再加鱸魚，會更加顯出鱸魚的鮮味，鱸魚炸得剛剛好，肉質不會太老，保留魚的肉質嫩滑，不會太實淨。炒菜看似簡單，但是一定要有鑊氣，一上枱渣渣聲，馬拉盞嘅香味已經飄到我鼻上去，香味濃郁，食落口蔬菜不太鹹，但又好濃烈嘅馬拉盞味道，再配上鮮甜的蔬菜，爽口美味。…查看更多

間中都會落葵芳食晚飯, 呢間泰國菜都食過幾次, 份量足, 價錢又唔貴.自己好鍾意食炸蝦餅, 所以係每次必點. 呢度既蝦餅炸得好香口, 外皮唔油膩. 而且蝦肉打得夠均勻, 咬落真係好彈牙, 就算熱氣都要食多兩件.泰式炒金邊粉又係不能缺少, 金邊粉炒得夠乾爽, 味道酸酸甜甜好開胃, 蝦又好大隻.同埋好鍾意飲佢呢度既沙冰, 天氣咁熱飲杯冰凍飲品真係好正, 唔會好甜.呢度keep住都會有附近街坊黎食飯, 黃金時間可能要等一陣, 但係都好快有位.…查看更多

海港城之前有COUPON, 唔想浪費左咁梗係要搵間貴d既餐廳用左佢, 見呢間日本菜既野食都好精緻, 就試試吧.我見食評好多人食壽喜燒鍋, 份量係比較少d, 得幾片牛同蔬菜豆腐等等, 但係佢既牛係好濃郁既牛味, 肉質好嫩滑, 收得貴係有原因既. 不過個壽喜燒汁就唔算好濃, 可能唔想搶左食材既新鮮味.其他野食就叫左鰻魚出汁蛋卷, 個蛋好香蛋味, 質感嫩滑, 鰻魚唔會太少, 兩者配搭好夾.仲有鹽燒豚肉配柚子蘿白蓉, 鹽燒豚肉燒得好香, 肉質無過火, 無筋無骨, 配埋柚子蘿白蓉食落無咁油膩, 口感好清新. 不過份量都係比較少, 大食應該唔夠. 全程侍應既服務都好好, 環境又舒服乾淨, 唔會坐得太迫.…查看更多

呢間日本過江龍炸牛店, 初初開果陣排隊食過, 最近經過少左好多人, 唔洗迫唔洗等, 所以一於再食.呢度既坐位其實好舒服, 2個人都可以坐到卡位, 望住出面既環境, 感覺無咁焗足.出夠食炸牛, 咁當然要食牛啦, 但我又想食埋其他野, 所以就要左個翼板牛伴鰻魚套餐.套餐有飯, 麵豉湯, 生菜絲, 可以添加既, 同埋好多款調味比你調味.個人唔接受牛肉太生, 所以叫侍應比左個爐, 自己再慢慢煎熟D牛扒.呢個翼板牛牛味好濃, 肉質嫩又多汁, 無筋唔韌, 個皮都算脆脆地既, 起碼唔會好林.跟住到個鰻魚, 鰻魚比較薄, 炸完出黎食好似無左鰻魚既味道, 可能鰻魚都係就咁食好D, 但都OK的.…查看更多

相約舊朋友聚舊團年, 佢帶我黎左呢間重開新店既皇后飯店, 地點位於黃竹坑港鐵商場.先要個蟹肉牛油果沙律, 綠悠悠好健康. 蟹肉夠鮮甜, 加埋牛油果既香味, 好開胃.主食要忌廉蘑菇意大利貓耳朵粉, 一睇個菜名覺得好得意, 所以叫黎試下. 貓耳朵粉其實都係意大利粉既一種, 圓圓地口感煙韌, 每粒耳朵粉都掛上creamy既忌廉汁, 十分好味.仲有招牌皇后芝士焗豬扒飯, 豬扒肉質軟嫩, 配上拉絲既芝士, 芝士味濃郁且香, 兩樣加埋係絕配. 飯底唔會焗到好乾, 一粒粒仲好軟綿, 菜式雖然簡單但又係好好味.…查看更多

以前響葵芳讀書, 都知道球場對面仲有好多食肆, 今日黎開呢頭做野, 一於搵間餐廳食野懷緬下.見呢間泰星匯最多人, 而且泰國菜都好啱我口味.Menu既第一頁已經見到呢款泰式芒果絲脆炸鱸魚, 個人好鍾意食魚, 而且比起一般既明爐烏頭特別, 所以叫左試下.一上枱已經比佢疊到成坐山既芒果絲, 洋蔥絲填滿眼球, 不禁嘩左出黎.炸鱸魚炸到非常脆口, 一舊舊肉起好晒, 而且起晒骨, 食既過程完全無食到骨, 非常貼心, 啱晒唔識食魚既人.炸蝦餅又係泰國菜必食, 炸到熱辣辣, 蝦肉夠彈牙, 唔會一咬散開既感覺. 點D甜酸醬仲特別開胃.仲有泰國菜必備既椰青, 夠晒清甜又解渴.見餐廳門口仲寫住晚市9點後入座有85折, 下次會夜少少再黎.…查看更多

雖然坊間有好多麻辣雞煲既餐廳, 但係最鍾意既始終響呢間. 就算唔黎堂食都會買個外賣返屋企.不過今晚約埋幾個好友, 所以直接走黎鋪頭食, 夠晒原汁原味.因為自己唔算食得辣, 所以呢度既麻辣雞煲小辣剛剛恰到好處, 小小麻味唔會太搶喉, 而且落左大量既花椒八角等香料, 蒜頭洋蔥大蔥之類絕不吝嗇, 所以個辣味係好香好香, 令人食指大動, 追住一舊一舊係咁食. 而雞件既肉質夠滑, 一路食一路炒都唔會好乾, 所以一隻雞好快就KO.食到咁上下就加上湯開始打邊爐, 邊爐配料當然唔小得本地手切肥牛, 紋里分明切到肉質夠晒彈牙, 牛肉味又濃.仲有比較小有既新鮮黑牛柏葉, 唔係度度有, 入口新鮮爽口, 吸收雞煲既汁真係非常正.而且呢度有即炸脆響鈴, 夠大條又夠鬆化, 餐前小食有炸泰式蝦餅, 好香脆彈牙.其他配料仲有手打牛丸，手打蝦滑，鮮雞子，芝士腸，金菇菜，魔芋絲, 食晒真係飽到頂住個肚, 每次黎食都非常滿足.…查看更多

聖誕將至, 各大商場都佈置得充滿聖誕氣氛, 而餐廳就陸續推出聖誕大餐. 唔想同人迫, 所以約埋好友提早慶祝聖誕, 順道睇燈飾.餐廳環境好靚, 夠古典氣派, 有皇室貴族feel, 令人感覺似去左歐洲, 啱晒打咭.呢度既聖誕餐包括餐湯或沙律, 主菜, 同埋最出名又吸睛既蛋糕.主菜係烤龍蝦尾牛柳燒春雞, 牛柳夠晒豐厚, 外面煎得剛剛好, 但入面肉質仍保持軟嫩, 一D都唔韌.龍蝦尾夠晒彈牙爽口, 不用太多調味, 龍蝦肉已夠鮮味. 燒春雞肉質夠嫩, 唔鞋口.蟹肉南瓜忌廉湯, 濃郁既南瓜味, 口感夠creamy, 而且入面都幾多蟹肉.最後就係最期待既蛋糕, 為左配合聖誕主題, 意式薩赫蛋糕上面加左鹿角, 夠晒得意. 香濃既朱古力外層, 食落好滑唔會太甜, 入面係軟棉棉既海綿蛋糕, 夠軟熟. …查看更多

以往概念食潮州野都剩係識食鵝片, 蠔仔煎, 韮菜豬紅之類, 呢日約左個客, 咁啱佢係潮州人, 佢叫左D平時都唔識既正宗潮州菜黎食.潮式凍龍蝦, 凍蟹可能會食得多, 凍龍蝦第一次食. 清蒸後再急凍, 低溫即時鎖住最鮮既味道, 肉質飽滿結實, 每一口都感受到龍蝦新鮮彈牙. 凍食食到龍蝦最鮮甜, 唔似熱食芝士焗或者上湯焗蓋過晒海鮮既鮮味, 越食越開胃.潮式南瓜餅, 呢樣係潮州好鍾意既糕點, 將南瓜蓉加糖之後蒸, 凍左之後再煎到兩邊金黃色, 外表脆脆地, 入面就軟腍腍. 好香既南瓜味, 甜甜地唔漏, 係一味又健康又好味既飯後甜品.…查看更多

女人唔補好易老, 閒時都會買燕窩黎食, 去開老行家買野, 見到呢款新產品燕窩果醬, 又買番屋企試下.果醬有兩款口味, 係官燕蘋果玫瑰及雪梨桂花, 我買左官燕蘋果玫瑰, 一打開蓋, 玫瑰味已經撲出黎, 加埋蘋果味夠晒清香. 因為里面加入燕窩, 所以質感好飽滿, 唔似普通既果醬.塗上麵包食, 充滿住燕窩既口感, 份量十足, 絕對唔會係燕窩碎, 好足料.而且味道清甜, 好易入口.價錢祗係百幾蚊, 但可以分開好多次食, 每次又可以吸收到燕窩既精華, 非常抵.…查看更多

普通既中菜好難吸引年青一輩, 但今晚朋友帶我黎呢間酒樓, 就有好多新派既中菜, 味道有特式又美味.兩款開胃小食, 香梅脆碧綠, 個瓜雪凍左涼涼地咁食, 好爽口, 帶點梅味酸酸地, 兩者好配搭又夠醒胃.藍梅鮮准山, 咁樣食准山係第一次, 口感腍腍地爽爽地, 准山本身無咩味, 但配埋藍梅汁既酸酸甜甜, 夠開胃. 而且准山同藍梅都係好有莽既食物, 呢個餐前小食食多D都唔怕.仲有呢度既糖水都好特別, 唔係紅豆沙, 芝麻糊呢D普通野, 呢個係北海道桃膠柑露, 桃膠係高纖食物, 高蛋白質, 口感腍腍地, 糖水唔會好甜, 其他配料就係西米露, 椰果之類, 凍食易入口, 無飽濟感.晚飯要食飯先夠飽肚, 見到有櫻花蝦炒飯, 一碟夠晒幾個人食, 炒飯D材料都幾多, 主角櫻花蝦好多隻, 真材實料, 味道唔腥又唔會好咸, 個飯夠乾身, 就咁食已經好好味.新派菜式帶來驚喜感, 下次會再黎食下海鮮.…查看更多

約了幾位好姐妹飯聚, 人多最好就係食放題, 任食之餘又可以揀自己鍾意既食物. 姐妹提議呢間尖沙咀新開放題, 地點就響金馬倫道附近, 好易搵好方便. 一星期前已打電話訂位, 新開都幾爆. 我地被編排坐鐵板燒既位置,已經有幾位廚師就位.呢度既主要係刺身同鐵板燒既食物, 款式跟一般放題類似.快速地點好, 先上既係刺身, 先來一round咩都有, 蝦好大隻好粗, 有手指咁粗, 食落好彈牙, 蝦味濃. 赤貝, 北寄貝亦都好鮮味.油甘魚, 三文魚, 吞拿魚等魚脂豐富, 肉質夠嫩, 仲有帶子鮮甜.輪到主打既鐵板燒, 鰻魚即燒即上, 熱辣辣既, 燒至微微焦香, 配上鰻魚汁甜甜地, 鰻魚好肥美, 啖啖肉無骨的.蔥花牛肉, 係牛肉包住D蔥煎香, 口感特別清新.仲有鹽燒口舌, 唔韌好爽口, 味道濃香, 厚薄得宜, 唔錯.燒帶子, 帶子燒至微焦, 大大粒好爽口.燒雞脾蘑同翠肉瓜, 好多汁好juicy, 加左少少鹽黎燒好惹味.呢個天婦羅蝦都唔弱, 係即炸所以外皮好脆口, 皮薄餡新鮮, 唔油膩.清酒煮蜆. 蜆肉唔算多, 不過可以再叫, 無所謂吧, 個湯都好鮮甜.前菜都有幾款, 份量足好開胃.最後當然係食雪糕, 呢度有haagendazs, 任拎唔洗配給, 不過好飽所以祗食了一杯.…查看更多

好朋友升職加薪, 係佢想左好耐既位置, 值得同佢好好慶祝一下, 特別搵左呢間日式鐵板燒.鐵板燒有二人前餐或者散叫, 我地都覺得餐既食材好吸引, 所以要左伊勢海老鐵板燒二人前.先來個沙律清清個口, 蔬菜好fresh, 酸酸地好開胃.之後今晚既主角就出場喇, 有伊勢海老, 和牛同白鱈魚.食法由清到濃, 所以先煮白鱈魚, 廚師好有心機地煎, 仲起左塊魚皮煎香, 魚皮好脆唔腥, 白鱈魚好滑溜, 油份適中, 食完成件都唔會好漏既感覺.食完魚就食海膽汁煮龍蝦, 海膽汁味道唔算好濃, 無蓋到龍蝦既鮮味. 龍蝦肉爽口彈牙, 好新鮮既食材, 廚師控制得非常好, 唔會太生或太熟.之後係特別料理, 按當時時令既食材, 呢日係奶油白露荀, 最初怕奶油好濃味, 但食落又唔係, 味道清清地, 夠creamy唔漏. 白露荀第1次食, 口感較綠色露荀硬D, 但食落好爽口.重頭係熊本A5和牛, 一入口好軟腍, 油脂豐富, 先唔加其他調味料, 好濃既牛味, 之後再食就加少少海鹽同胡椒, 帶出個肉鮮味, 非常有口感.驚唔夠飽仲有和牛炒飯, 炒飯夠乾身, 加埋和牛碎, 蛋碎等配料, 炒埋一碗都幾飽肚.最好就黎個清酒雞湯, 唔算好濃既清酒味, 加埋帶子落去淆, 有種鮮甜味道.甜品係鹿兒島士多啤梨, 食落酸中帶甜, 好香士多啤梨味.…查看更多

雖然而且米線鋪開到成行成市, 但我都係鍾情由細食到大既車仔麵.Foodcourt呢間新開車仔麵, 行過幾次都幾多人買, 今日終於有時間試下.至尊四餸麵盛為40蚊, 跟三餸麵祗差4蚊, 咁梗係要四餸麵食多樣.魚蛋冬菇牛腩豬皮配豬骨湯底加腩汁先講下個牛腩, 雖然唔係食牛什粉麵既鋪頭,但炆得都有牛什鋪既味道, 牛腩夠腍又入味, 唔會太多肥膏, 無咩渣.豬皮夠爽口都好入味, 魚蛋好彈牙, 好香咖哩味, 唔算好辣.冬菇亦都炆得好腍身, 入晒味. 而個湯底係豬骨湯, 加左腩汁, 清得黎帶D味, 唔會太油.個麵底亦夠爽口, 無粯水味.…查看更多

放假出街食晚飯多數黎九龍城, 食肆多選擇, 而且附近有停車場.呢間西餐廳之前同朋友食過午餐唔錯, 今晚試下晚餐先.呢度最出名係pizza, 款式幾多, 揀左鮮蕃茄水牛芝士pizza, 餅底屬於薄底, 即焗熱辣辣, 又特別脆口, 入面鬆軟. 有芝士帶少少咸, 蕃茄既清新, 就算食左幾件都唔會覺得太飽晒, 即焗係唔同D.另外仲有呢度出色既甜品, 又係即整, 唔係求期雪響雪柜既甜品.梳乎厘發到漲卜卜, 好靚好吸引.食落好鬆軟, 好香蛋味, 但又唔會太甜, 嗜甜品者可以食兩客.呢度樣樣食物都好用心做, 絕唔馬虎, 小有既良心小店.…查看更多