bokwong的个人专页

今日同大家介紹灣仔呢間文青Cafe「in:joi」，位置就喺皇后大道東恆山中心地下，白色簡約門面加上溫暖木系裝修，成個空間充滿住悠閒舒適嘅氛圍。店內以Baby Blue做主調，柔和燈光配上輕音樂，真係一個完美嘅慢活空間，無論係一個人嚟享受me time定同朋友聚會都咁啱！今次試咗佢哋嘅經典早餐，真係豐富到不得了！好味煙三文魚、creamy嘅牛油果、香脆煙肉同新鮮沙律，配埋自選炒蛋同迷你自家制酸種 Begal，營養均衡又夠飽肚，朝早食完真係成個人都滿足晒！最令人驚喜係佢哋將港式經典重新演繹嘅創意料理！港式菠蘿酸種包配鵝肝牛油真係創意爆棚，酥脆嘅菠蘿包面下係軟綿綿嘅酸種包，搭配自製鵝肝牛油同燉糖漬蘋果，味道層次豐富得嚟又唔會膩，絕對係打卡必點！甜品方面，港式奶茶焦糖燉蛋將港式奶茶嘅香醇同法式燉蛋嘅幼滑完美結合，面層嘅脆薄焦糖令人一試難忘，搭配埋豆腐雪糕，真係傳統同創新嘅完美邂逅！飲品都絕不馬虎，沖繩手摘香檸本地蜜糖梳打清新怡人，天然蜂蜜甜味同香檸酸香平衡得啱啱好。Flat White咖啡香濃順滑，拉花仲好靚添！in:joi無論環境、食物創意同味道都令人印象深刻，完美演繹港式fusion料理嘅精髓，絕對係灣仔區一個值得encore嘅文青打卡cafe！…查看更多

今日同朋友去咗土瓜灣呢間「茶舍」，真係有驚喜！餐廳環境光猛，坐得好舒服。而且服務員好親切，見好多街坊都落嚟食飯，就知係好嘢！我哋叫咗個鐵板Sizzling Sizzling餐，首先上枱嘅係湯同沙律，羅宋湯好足料，沙律菜都好新鮮，開胃啱啱好！特別推介大家升級試吓新上市嘅洛神花山楂蜜，酸酸甜甜好開胃，仲好滋潤㗎！鐵板龍蝦牛柳配扁意粉真係不得了！見到龍蝦顏色咁鮮艷已經好開胃，牛柳叫咗五成熟，煮得啱啱好。配埋黑椒汁同扁意粉，個配搭出奇地夾，誠意十足！另一道大蝦煙肉卡邦尼長通粉都唔輸蝕，醬汁creamy得嚟唔會膩，大蝦新鮮爽口，煙肉嘅鹹香更加提升咗成個味道。小食方面，避風塘辣雞翼炸得香口惹味，微辣嘅味道令人食到停唔到口。七味軟殼蟹炸得酥脆，七味粉帶出咗蟹嘅鮮味，連殼食真係好滿足！飲品我哋叫咗凍檸檬茶，茶底香濃，檸檬份量啱啱好，解膩一流！茶舍無論環境、食物質素同價錢都令人滿意，絕對係土瓜灣區一個好好嘅用餐選擇！下次再嚟一定會encore佢哋嘅鐵板系列！…查看更多

喺荔枝角工廈入面發現咗呢間專做外賣嘅「杞醉」，雖然舖面細細，主要做外賣生意，但佢哋嘅杞醉濃湯雞煲真心值得推介！包裝非常細心，外賣紙袋外面會加多個膠袋俾你笠住，好穩陣，而且裡面仲有張清晰嘅食用指示卡，教你點樣煮最好味，夠晒貼心。🍽️ 豐富二人套餐分享我同朋友叫咗個二人套餐，真係超豐富！首先試咗兩款冷盤小食：· 杞醉蝦：蝦肉超鮮嫩多汁，而且已經貼心哋剝咗殼，食起上嚟非常方便，加分！· 杞醉花甲：花甲肉質鮮甜無沙，配上店家特調的醉汁，不錯。主角杞醉濃湯雞煲果然無令人失望！落煲一煮滾，落埋佢哋嘅杞醉純酒，已經係超香酒嘅味道，但食落一啲都唔苦，反而係好香甜。湯底用咗四款各具特色嘅花雕酒，再加入杞子、蟲草花、圓肉等材料調配而成，酒香濃郁而唔嗆喉，甜甜哋好易入口。半隻雞嘅份量都幾多，雞件煮完依然保持到嫩滑啖啖肉，正！火鍋料仲有美國安格斯肥牛、手工菠菜豚肉餃子、手打墨魚滑+蝦滑同蔬菜盤。點埋佢哋招牌醬油：有杞辣醬油同爆炸蔥醬油，肉味更有層次！最後仲有米線同手工芝麻湯圓，米線吸收晒湯汁精華真係好好食，估唔到用湯圓打邊爐做甜品係咁夾，甜甜的結尾超完滿。杞醉嘅性價比高，包裝妥貼，食材品質有保證，尤其個醉雞煲真係做得好好，絕對係秋冬想喺屋企打邊爐嘅好選擇！…查看更多

朋友推介呢間「蘇三甜蜜」真係有驚喜！舖頭以70年代懷舊香港為主題，玻璃同枱面裝飾係港式復古主題，仲播住唔同年代嘅廣東歌，一入去就好似穿越返去拍拖嘅年代，勁有feel！無論係裝修定係食物，都做到傳統同中式融合嘅甜品，好有特色。🍧 蜜柑桂花酒釀雪燕冰蘇呢個冰蘇真係無得輸！基底係椰汁沙冰，入口好綿好滑，椰香好出～面頭鋪滿蜜柑果肉，仲有不同配料可以加，豐富到差啲滿瀉！桂花嘅清香同酒釀嘅微酸，加埋滑溜嘅雪燕，一啖食落去有齊唔同口感同味道，又清新又解膩，真心推介必試！第一啖食落去，蜜柑嘅清甜即刻爆開，跟住桂花香同酒釀味慢慢湧出嚟，加上雪燕滑溜溜嘅口感，層次豐富到呢！呢個組合又滋潤又清爽，真係必點！🍫 蘇三茅台朱古力布丁諗住朱古力布丁普普通通？錯啦！蘇三呢個茅台布丁裝飾完美結合茅台原素，打卡一流！面頭再淋少少茅台酒，一入口係濃郁朱古力味，跟住茅台嘅酒香先慢慢滲出嚟，兩種味道撞埋一齊，高級到不得了！🧀 酒釀蜜柑芝士布丁芝士布丁本身已經好香滑，加咗酒釀同蜜柑之後，味道即刻升華！酒釀嘅微酸帶出芝士嘅奶香，蜜柑嘅甜味平衡返個口感，食完成個人都開心晒！🌶️ 秘製辣汁魚蓉燒賣（8粒）估唔到甜品店嘅燒賣都咁出色！魚蓉燒賣彈牙，辣汁唔係死辣，而係香辣中帶啲甜，同燒賣出奇地夾，食完一粒接一粒停唔到口！🐣 八珍薑醋蛋仔薑醋蛋仔真係創意爆燈！鵪鶉蛋仔外脆內軟，薑醋味唔會太嗆，溫和得嚟仲有啲甜醋汁掛面，食完成個人暖笠笠，好適合女仔！🍵 黑薑母茶（壺）黑薑母茶茶色好深，薑味好出但唔辣喉，飲落好順口，飲完成個胃好舒服，勁推薦俾手腳冰冷嘅朋友！最抵讚係學生有半價優惠！咁高質嘅甜品竟然半價就食到，仲唔快啲約埋班friend過嚟試下！…查看更多

放題唔一定淨係食花巧嘢，對於鍾情傳統江戶前風味嘅壽司迷來講，「瀧本」嘅常規壽司選擇一樣有驚喜。醬油漬吞拿魚係我嘅最愛，吞拿魚經醬油輕漬後，鹹香得嚟更加帶出魚肉本身嘅鮮味，比普通吞拿魚刺身味道層次豐富好多。洋風三文魚腩用咗洋蔥絲同酸酸地嘅醬汁調味，減低咗魚腩嘅油膩感，更加開胃。玻璃蝦雖然係常見款式，但勝在夠新鮮，食落鮮甜唔霉。油甘魚肥美甘香，呢個價位嘅放題可以食到質素唔錯嘅油甘魚，算係有驚喜。雖然係放題，但壽司嘅飯團握得鬆緊適中，醋飯嘅酸度亦調教得恰到好處，唔會太酸搶味。每件都體現到日式料理對傳統壽司嘅尊重，絕對唔係隨便求其撻嚿飯上去就算。…查看更多

如果你覺得青口意粉間間都差唔多？咁你就錯啦！「Enchanté」呢度嘅青口意粉，絕對係會令你改觀嘅級數！成隻鍋仔上，熱辣辣，煙霧彌漫，香氣撲鼻！望落去，啲青口又多又大隻，舖到滿一滿，絕對唔會孤寒。醬汁係嗰隻好靚嘅奶白色，濃稠度啱啱好，掛住喺每條意粉上面，睇見都已經知道唔簡單。急不及待試隻青口先！一啜入口，嘩！真係不得了！隻青口超級肥美嫩滑，一啲都唔老唔韌，咬落去係爆汁嘅感覺！最正係個鮮味，濃郁到不得了，完全無雪藏味，個汁嘅酒香同蒜香完全逼咗入去青口裡面，鮮甜得嚟又唔會蓋過本身嘅味道，真係食到停唔到口！至於啲意粉，師傅功夫好好，有咬口得嚟又唔會太硬。蒜片同香草嘅香氣好突出，仲有啲檸檬嘅微酸吊一吊味，令到成個感覺更加清新，食極都唔會覺得膩。「Enchanté」呢碟青口意粉，由食材質素到醬汁調味，再到烹煮火候，都係高水準之作。絕對對得住佢個價錢！為咗呢一鍋鮮味，我已經決定咗好快就會再返嚟！誠意推薦俾所有鍾意食海鮮嘅朋友，信我，你一定會中意！…查看更多

今晚同班friend去咗旺角「咩記打邊爐」開心gathering！呢間位於通菜街樓上舖嘅餐廳，環境寬敞又乾淨，牆身貼滿充滿地道風情海報。最正係佢哋嘅串燒系列，一坐低就可以先嗌幾串送酒，慢慢揀火鍋料，夠晒貼心！我哋試咗三款串燒：鹽烤蝦大大隻鹹香鮮甜，猛火肥仔蠔燒到啱啱好爆汁，蒜香扇貝蒜味濃郁又彈牙。一路食住串燒，一路飲返杯冰凍啤酒，真係未打邊爐已經氣氛滿分！火鍋湯底揀咗招牌卜卜蜆濃湯鍋，一上枱香氣撲鼻，湯底奶白鮮甜，蜆肉又夠肥美，飲完個湯即刻暖笠笠。火鍋料方面，招牌高鈣羊肉真係名不虛傳，嫩滑唔臊，羊味濃郁；另外仲有羔羊後腿肉同百日羔羊肉，後腿肉肉質結實有咬口，百日羔就更加嫩滑，羊味溫和，三款各有特色！本港鴛鴦蝦滑墨魚滑真材實料，食到粒粒蝦肉同墨魚；桂花蚌同黑柏葉新鮮爽脆，口感一流。特別要讚新品廚師推薦-雞雞子，入口creamy又夠鮮；鮮豬豬膶片切得薄身，輕輕一灼就食得，嫩滑無比；鴨血滑溜溜又入味，正！食返啲蔬菜平衡下，皇帝菜吸晒湯汁精華，雨衣鮮竹笙索滿湯汁超好味！飲品方面，咸檸七酸甜解膩，忌廉嘅甜味又同濃味火鍋出奇地夾！最後食埋個炸魚皮同響鈴，點埋佢哋自家製醬料，完美！咩記火鍋加串燒雙重享受，環境舒服，食物質素高，仲有齊啤酒清酒任君選擇，絕對係旺角晚飯聚會首選！…查看更多

朋友介紹，銅鑼灣怡和街呢間開業三年嘅「洪記三陽號」，係附近街坊同佢哋一班蟹癡嘅私藏愛店！每年一入秋，洪記三陽號就專注做當造大閘蟹，專門店格局乾淨光猛，啲蟹全部生猛活躍，隻隻都眼仔碌碌、手郁腳郁，睇見就知新鮮度爆燈！佢地啲蟹全部都係用幼繩，啲繩唔吸水，唔使驚俾人呃秤。同埋銅鑼灣有大型門市，絕對放心，信心保證！今次試咗佢哋$120隻、五兩重嘅大閘蟹，真係抵食到震！返屋企跟足指示蒸15-20分鐘，一開蓋，嘩！真係爆膏爆到癲！蟹蓋裡面金黃色嘅蟹黃同橙紅色嘅蟹膏滿到瀉出嚟，視覺效果震撼到不得了🦀！宜家正好係食蟹乸嘅最佳時機，橙黃色嘅蟹黃非常豐滿，質感似蛋黃，口感豐腴。而蟹公嘅蟹膏呈乳白色，吃來有種黏口的感覺，比雌蟹甘香。洪記嘅蟹無論公乸都超爆多膏，隻隻肥美有蟹味。食落口，蟹膏甘香黏口，那種豐腴滑膩嘅感覺喺口腔久久不散！蟹肉鮮甜到不得了，連蟹腳都充滿結實嘅肉，咬落去Q彈有咬口，仲要好有蟹味，完全唔會空心或者霉爛！食完之後成個口都係蟹嘅餘韻，真係滿足到不得了！洪記三陽號嘅大閘蟹性價比極高，$120就食到五兩重爆膏蟹，仲要隻隻都保證生猛，絕對係今個秋天必encore之選！蟹癡們行過銅鑼灣記得去掃貨啦～…查看更多

行開啟德零售館，發現間好有心思嘅小店「本薑好物」！佢哋專注為顧客帶來各式各樣嘅本地品牌精選好物，係個尋寶嘅好地方。講到店內精選，不得不提榮獲「2025 世界金獎港式蜂巢蛋卷」蛋卷工房EGG N ROLL 呢個品牌。佢哋傳承咗40幾年嘅製餅傳統，由兩代製餅師傅精研數十道古法工序，以人手炮製，致力將最樸實無華嘅原始蛋卷味道傳承落去。佢哋嘅「蜂巢蛋卷」好特別，源於蛋卷表面有獨特嘅蜂巢紋路結構，同傳統蛋卷唔一樣，係由獨有嘅傳統手藝秘製而成。咬落去口感酥鬆，入口即化，層次更為豐富。今次試咗兩款特色口味：· 絲襪奶茶手工蜂巢雞蛋卷(HKD$78, 6 pack × 2 pcs)：將港式絲襪奶茶嗰種濃滑口感嘅風味巧妙融入蛋卷，食落有淡淡茶香，甜度適中，創意同傳統味道結合得恰到好處。· 薑汁撞奶手工蜂巢雞蛋卷(HKD$78, 6 pack × 2 pcs)：將薑汁撞奶呢款傳統滋補甜品嘅薑汁微辛、暖意與奶香交織喺蜂巢蛋卷裡面，味道獨特，食完成個人感覺暖笠笠。「本薑好物」匯聚咗唔少本地精選好物，而「蛋卷工房」嘅手工蜂巢蛋卷更加充滿驚喜，係自用或送禮嘅不錯選擇。下次想發掘多啲香港本地品牌好物，記得嚟呢度行下啦！…查看更多

最近發現咗個好正嘅養生品牌Moonwell，佢哋專為亞洲人體質設計健康產品，將傳統智慧同現代科技結合，令我哋養生都可以好輕鬆！其中最得我心嘅就係佢哋常溫湯包系列，唔使雪藏、唔使解凍，想飲湯隨時都得，真係忙爆嘅都市人恩物！✨ 杏汁白肺湯 - 女士恩物作為一個注重護膚嘅女仔，呢個杏汁白肺湯真係深得我心！湯頭濃香奶滑，飲落好順喉。最正係Moonwell幫我哋處理好晒最麻煩嘅洗豬肺步驟，省卻咗「啤水」幾個鐘嘅時間，確保乾淨衛生。採用龍皇南杏同北杏手工即磨成杏汁，加上白果、蜜棗、雞腳等滋補食材，滋陰養顏效果一流！尤其係最近流感季，飲完覺得成個肺都潤咗，感覺更加健康！✨ 章魚蓮藕牛蹄筋湯 - 膠原爆燈另一款章魚蓮藕牛蹄筋黑豆湯都係我嘅至愛，湯底呈現迷人嘅玫紅色，充滿章魚鮮味但一啲都唔腥。特別加入牛蹄筋熬製，飲完成口都係滿滿膠原蛋白，感覺皮膚即刻彈滑咗！配搭黑豆、蓮藕等材料，唔止好味，仲好有益，絕對係男女都啱飲嘅養生靚湯。Moonwell最貼心就係每個湯包都遵循中醫食療嘅黃金配比，成分天然，而且常溫保存真係超方便，屋企囤幾包，想補身隨時有得飲。養生，真係可以從此不費神啦！…查看更多

今次同大家介紹一間藏身於鰂魚涌「怪獸大廈」入面嘅人氣咖啡店——Ice Bean Cafe！呢度唔單止係遊客必到嘅打卡熱點，最近仲因為一款「-86 °C髒髒咖啡」而人氣爆紅，絕對係咖啡控嘅新朝聖地！☕️✨一踏入Cafe，就感受到佢哋嘅年輕活力同悠閒氛圍。鋪頭雖然唔算好大，但坐得好舒服，好適合同朋友嚟度過一個chill爆嘅下午。嚟到重點！呢杯-86 °C髒髒咖啡真係不得了～原來佢哋用咗醫用級冷凍櫃，將隻杯雪到零下86度先拎出嚟用。我哋試咗原味同開心果味，兩款都正到爆！原味層次感超豐富，而開心果味就可以揀燕麥奶，飲落仲有陣陣堅果香。記得要30至40秒內飲先至正，凍杯遇上熱咖啡，個口感滑到好似食緊雪糕咁，真係未飲過咁正嘅咖啡！除咗咖啡，我哋仲試咗佢嘅芝士豬柳牛角包窩夫。個窩夫外皮香脆，仲有少少牛油味，夾住濃郁嘅芝士同豬柳，口感豐富到震，同杯咖啡簡直係絕配！Ice Bean Cafe無論環境同食物都令人好驚喜，特別係嗰杯-86 °C髒髒咖啡，真係飲過返尋味！行開鰂魚涌一定要去試下！…查看更多

同朋友喺上環行街，喺禧利街轉角發現咗呢間叫Fish & Chick嘅小店！門面以藍白為主調，簡潔明亮，帶點現代英倫風。最得意係佢哋個理念好清晰，專注做兩樣嘢 - 魚同雞，果然專注做好一件事真係特別出色！我哋叫咗個「精選二人套餐」，真心抵食！首先上枱係秘製炸蟹球配沙律，蟹球炸得金黃香脆，入面係滿滿嘅蟹肉絲，點埋wasabi mayonnaise，微微嗆鼻好過癮！跟住係白酒汁煮鮮蜆，蜆肉大大隻，份量十足，用白酒同香草煮完之後鮮甜到不得了，個汁帶少少微辣，我哋幾乎連湯汁都飲埋！主菜先係戲肉！原味烤雞半隻一上枱就知無揀錯，雞皮烤到金黃香脆，一切開肉汁即刻湧出嚟，雞肉超級嫩滑，完全唔乾柴！旁邊嘅薯蓉絕對係神來之筆，口感綿密之中仲保持到粒粒口感，奶香十足，份量多到嚇親，超驚喜！另一道主菜傳統英式炸魚配薯條先係鎮店之寶！原來佢哋堅持用每日新鮮運到嘅本地魚製作。有多款魚可供選擇。我哋今日呢個鱸魚，魚肉厚身又雪白，外層炸漿薄脆得嚟一啲都唔油膩。最正係可以跟足英國傳統食法，點埋麥芽醋食，真係一秒去咗英國咁！佢哋話係跟足英國傳統配方，連薯條都係用優質薯仔即叫即炸，熱辣辣脆卜卜。飲品我哋叫咗新鮮現做薑汁梳打同雜果賓治，薑汁梳打薑味夾埋檸檬，清新又解膩；雜果賓治香甜清爽，同咁豐富嘅大餐簡直係絕配！今次喺Fish & Chick嘅體驗真係由頭滿意到落尾，原來專注做魚同雞真係唔講得笑，水準高過好多大酒店！環境舒服，食物高質，絕對會再嚟encore！大力推介！…查看更多

同朋友喺旺角行完花墟，不約而同諗起「丼燃食堂」。今次我哋專登嚟食佢哋嘅招牌「乜蟹都有丼」，個名真係無改錯！一上枱，成個碗鋪滿咗唔同種類嘅蟹肉，有蟹棒、蟹肉、蟹膏、蟹籽、蟹鉗、蟹蓋，仲有絲絲分明嘅蟹肉，撈勻選配嘅海膽醬，每啖飯都充滿蟹嘅鮮甜，口感豐富到不得了，簡直係蟹控必點！朋友叫咗「九公丼」，係鋪滿咗九種唔同海鮮嘅豪華丼飯，有三文魚、帶子、海膽、牡丹蝦、蟹肉、拖羅蓉、三文魚籽等等，樣樣都新鮮鮮甜，睇見都流口水！我哋仲加咗「芥末八爪魚」做前菜，八爪魚爽口彈牙，芥末又唔會太嗆，超級開胃。飲品方面，「桂花鳥龍」清香解膩，淡淡桂花味同烏龍茶好夾；當然唔少得凍「可樂」配丼飯，夠晒爽！「丼燃食堂」食物質素高，份量又足，價錢親民，絕對係旺角區一個高性價比嘅日式食堂。下次再嚟，一定會再encore佢哋嘅爆餡丼飯！…查看更多

慢活食肉獸天堂！K11隱藏版日式fusion丼飯，和牛入口即化～喺尖沙咀K11行到攰攰哋，俾我哋發現咗間幾有格調嘅餐廳——SLOW COW。餐廳環境光猛開揚，裝修帶點工業風混合木系溫暖感，坐得好舒服。服務員姐姐好友善，非常耐心解釋餐牌配搭，未食已經加分！今次專登嚟會一會佢哋嘅A4+ 日本和牛丼，仲要係每日限量，梗係要搶番碗！一上枱，賣相已經贏晒，粉嫩嘅和牛鋪到成座山咁高，仲要跟埋蛋黃同香脆蒜片，誠意十足。將蛋黃撈勻，將油脂豐腴、入口即化嘅和牛，同埋佢哋特選嘅珍珠白米飯一齊放入口……正啊！真係幸福到唔識形容！自己揀嘅砵酒黑椒昆布汁味道好夾，帶出咗和牛嘅鮮味，又唔會太搶。旁邊嘅自家製鮮忌廉口感輕盈，意外地同牛肉好夾，解膩一流。朋友叫咗個SLOW COW招牌套餐，揀咗慢煮極上日本豚。豚肉煮到超級軟淋，一啲都唔韌，配上蒜香醬炒泰國絲苗米飯，香氣撲鼻，忍唔住都偷食咗幾啖。個芥末籽肉汁好有驚喜，微微嘅辛香刺激味蕾，令人胃口大開！小食方面都絕不馬虎，日式炸雞外脆內嫩，肉汁鎖得好好，點埋個咖喱醬，超級加分；經典脆炸薯條熱辣辣，邪惡但好滿足。加配嘅半熟日本溫泉蛋當然係亮點，撈飯簡直無敵！飲品除冷熱飲品外，仲有酒精類可以揀。我哋最後飲埋杯可樂同冰凍嘅道地玄米茶，貪佢清爽解渴，咁就為呢頓豐富嘅晚餐畫上完美句號。SLOW COW絕對係一間有心思嘅餐廳，由環境到食物同服務質素都令人滿意，係尖沙咀區一個高質又舒服嘅覓食好選擇！一定會再encore！…查看更多

同朋友喺銅鑼灣搵食，發現咗呢間「毫無分串」串燒酒場，個名已經夠晒盞鬼！舖頭裝修充滿地道港式風味，仲有霓虹光管招牌點綴牆身，絕對係收工吹水、睇波、啤一啤嘅好地方！今次試勻佢哋十幾款招牌菜，首先要瘋狂推介佢哋獨創嘅「維他奶奶醬」系列！維他奶芝士免治雞肉條肉汁豐富，維他奶芝士翠玉瓜同維他奶芝士豆卜索滿醬汁，維他奶芝士獅子狗同維他奶芝士小甜薯鹹甜交織，維他奶芝士芝士年糕更係邪惡之最，拉絲效果勁誇張！成個系列將港式情懷同串燒完美融合，創意滿分！其他串燒同樣出色，惹味辣雞腎爽口彈牙，鹽牛舌心厚切夠咬口，老銅牛叉燒蜜味香濃（試過就知有幾正！）。蒜蓉燒蠔半打大大隻，蒜香爆棚！腐乳多士脆到不得了，腐乳醬香濃惹味。另外一定要試嘅係佢哋自家研發嘅「唔L同沙嗲牛麵」，話說係班後生仔嫌普通沙嗲牛唔夠重口味，自己調製出嚟嘅版本，濃郁香辣，真係同出面食到嘅唔同，晚巿價都係$58，夠抵食！最後飲返杯維他奶奶凍紅豆冰同維他奶奶凍黑芝麻冰，香甜冰凍，為呢餐豐富盛宴作結。原來佢哋仲有午市優惠，加五毫子就可以轉加大勁量凍飲（1L），大大杯夠晒解渴！「毫無分串」將創意同地道風味結合得恰到好處，每款食物都有驚喜，係銅鑼灣食飯宵夜必試之選！…查看更多