pigpoon's Profile

講到高質燒肉，荔枝角嘅銀座炎藏燒肉真係唔可以唔試！今次我點咗佢哋招牌嘅$588炎藏和牛極致6點拼盤、$188海鮮三味、$98上等牛舌同埋、$128石燒和牛拌飯，每樣都驚喜滿滿！和牛極致6點拼盤真係值得推介，嚴選唔同部位嘅和牛，肉質鮮嫩，油花分佈完美，燒得微微焦香已經好滿足，每啖都係極致享受！海鮮三味有帶子、大蝦同魷魚，超新鮮，燒完香甜多汁，絕對係燒肉以外嘅好選擇。上等牛舌切得厚薄適中，咬落煙韌又唔會太硬，配埋檸檬汁一流！最後嘅石燒和牛拌飯用上滑嫩和牛，飯底香口，拌勻後每啖都好滋味。環境高雅有日式格調，店員服務細心，即燒即食絕對係燒肉迷嘅天堂。鐘意高質燒肉嘅朋友，銀座炎藏燒肉一定唔會令你失望！…Read More

觀塘一直都係好多美食聚居嘅地方，呢日就黎食呢間神木日本料理。餐廳裝修偏日系，有多款日本唔同嘅料理可以揀，串燒、刺身、壽司、冷食熱食都有，啱晒鍾意食唔同種類嘅日本美食嘅我😌神之特上刺身$198刺身擺盤好靚，有六種唔同嘅刺身，刺身好新鮮同好鮮甜，尤其是係牡丹蝦同埋拖羅刺身，拖羅刺身超級肥美呀～食完眼都發晒光～蒜蓉燒生蠔$10/隻呢個係晚市期間限定嘅優惠，我哋特登嗌咗六隻試吓，味道都幾好。雜錦燒物$162我哋特登揀呢個雜錦燒物，因為佢會隨機咁揀七款串燒俾我哋，其中包括五款肉同兩款菜，好好玩咁～最後嚟嘅串燒全部都好好味，有牛肉串燒、雞肉、雞軟骨、魷魚、青椒、大蔥等，全部都好入味，完全冇後悔揀咗呢個～夜繽紛$98呢個係平日夜晚限定嘅優惠，好抵食呀，$98有三串串燒同埋有三款刺身仲包一罐汽水，唔係唔係嘛😌總括而言，呢間餐廳坐得舒服，嘢食好味又唔會太貴，大家可以得閒嚟試吓～…Read More

作為資深貓奴，總會時不時會有想偷食嘅癮，每次想偷食嘅時候就想嚟呢間舖，因為入面嘅貓貓全部都好乖好可愛！而且收費唔貴，$118已經可以玩成日仲包埋野飲！呢間Cafe搬咗過嚟眾安街，地方更大，可以比客人坐嘅位置更加多，亦有好多互動區比貓貓同客人玩。Cafe嘢飲變左自助形式，有熱飲同汽水可以選擇，餐廳亦有提供好多boardgame同埋漫畫，鬼滅之刃嘅漫畫都有！當然，小妹係嚟玩貓嘅，呢度嘅貓貓真係有好多好多種類，隻隻都好乖，啲毛超滑，任摸唔嬲。不過要小心，有啲喵喵係因為有腎病/過肥而唔可以食零食，佢哋條頸都有掛咗牌提醒大家，大家餵貓貓零食嘅時候就要注意啦。值得一讚嘅係，餐廳入邊嘅員工都好勤力清潔地下同留意客人同貓貓嘅互動，佢哋會主動提醒我哋唔同貓貓嘅習慣，同點樣同佢哋玩，令到我哋可以更有效咁享受同貓貓嘅互動。喺同佢哋嘅傾談之間，完全可以感受到佢哋對每隻貓貓嘅喜愛同了解，好有愛～冇見一年，佢哋都仲係咁肥咁可愛～第一次黎嘅客人仲可以睇貓貓嘅簡介，了解每隻貓嘅特性，仲要有分中文同英文版本，好貼心～下次我偷食貓癮起嘅時候，會再黎探你哋架！強烈推薦鍾意貓貓嘅朋友黎呢度享受同唔同貓貓玩嘅樂趣！…Read More

係附近同朋友食完好重口味嘅燒烤，好頸渴，行吓行吓俾呢度嘅裝修格局吸引咗，呢個商場以日系風格裝修為主，天花掛滿燈籠，好適合打卡。而呢間茶社同成個格局好襯，仲要係用富士山做logo，於是就揀咗入去買嘢飲。餐牌可以選擇嘅飲品種類都非常之多，好在餐廳分類得都幾好，我哋可以根據返自己想要嘅喜好揀返相關類別，不過心大心細嘅我哋都揀咗成幾分鐘Oreo朱古力芝士奶蓋$40芝士奶蓋上面鋪滿Oreo碎碎，杯嘢層次感好分明，顏值高，芝士奶蓋味好濃芝士味，啖啖都好滿足，越飲到下面朱古力味就開始慢慢出嚟，成個層次同埋味道都好夾，唔錯楊枝甘露$42第一次飲梗係試店舖嘅特調飲品。原本以為楊枝甘露入邊只會有少量芒果肉同埋柚子肉，點知呢度嘅楊枝甘露除左芒果粒仲充滿芒果味爆珠，每一啖都會有好多咬口嘅爆珠衝入黎，口感好豐富，味道亦唔會過甜，係用嚟解滯解渴唔錯嘅選擇餐廳有好多位置被客人選擇坐喺度傾偈慢慢飲，我哋見凍櫃甜品好吸引咁，所以另外嗌咗兩個甜品食。Tiramisu呢間嘅Tiramisu賣相好靚，肥嘟嘟脹卜卜咁，好得意好吸引人。而佢唔係剩係得個樣，味道亦唔錯。面層鋪滿朱古力粉，手指餅同埋酒味分布平均，幾好味。開心果芝士蛋糕蛋糕後面佈滿開心果碎，開心果味濃郁，鍾意食開心果嘅朋友仔可以一試。總括而言，如果行經呢度打卡，又想搵嘢飲嘅話可以試一試呢一間茶社，可以慢慢Chill飲同Chill食…Read More

朋友仔一向超級無敵鍾意食海南雞飯，呢日嚟到深水埗佢一見到呢間海南雞飯專門店，見到餐牌咁抵食，就狗衝咗入去喺呢個香港物價騰貴嘅地方，已經好少有咁平嘅堂食嘢食，一個海南雞飯講緊$58，其實外賣都好少可以做到。海南雞飯餐廳出餐嘅速度係極快，呢個價錢海南雞份量一啲都唔少，啲雞仲要好滑同埋好有雞味，睇得出老闆好有心機經營。黃咖喱蟹肉飯蟹肉超級多，用嚟撈飯好正，少少辣辣地咁樣，好開胃。炸蝦餅 + 泰式酸辣鳳爪每個餐可以另外加錢配小食，我哋今次就配咗炸蝦餅同鳳爪，熱辣辣上碟，味道都唔錯。鳳爪彈牙酸酸辣辣咁，開胃又解滯。泰式千層糕呢個千層糕完全唔甜，好香斑斕味，連唔好甜野嘅朋都食咗成兩粒總括而言，呢間海南雞專門店好抵食，食物質素亦都唔錯，侍應都好好服務態度，會再嚟食！…Read More

好耐都冇嚟深水埗覓食，先至發現深水埗而家痛好多各式各樣嘅特色餐廳，鍾意食包嘅小妹見到呢間漢堡包店二話不說就衝入去試吓。餐廳漢堡包嘅種類有好多款，小食亦都有好多種可以選擇，套餐可以自由搭配。芝士漢堡+炸薯條第一次食嘅餐廳一定要試佢哋最signature嘅款式啦～平時食芝士漢堡會覺得好重口味，因為通常店舖都會落勁多醬，加埋塊芝士就會好咸好重口味。但係呢度嘅芝士漢堡嘅味道比想像中健康，唔濃味之餘，仲多咗兩層菜。最特別嘅係佢選用本地嘅有機菜，上邊嗰層係羽衣甘藍，而底嗰層仲有生菜，第一次食羽衣甘藍整嘅漢堡包，估唔到完全冇苦澀味，仲好爽脆。牛肉漢堡嘅牛味都好出，但完全冇好油膩嘅感覺，食食吓唔經唔覺就食晒一個而完全冇罪惡感呀～開心～炸薯條係屬於粗薯條，味道不過不失，店舖貼心提供茄汁、芥末醬同沙律醬俾客人自己加料。焦脆雞堡+黃金炸魚條呢個雞堡有成兩層雞扒咁多！同樣係有兩層菜夾住，咬落去有陣香浪碳燒味同好Juicy。另外炸魚條係驚喜嘅，佢個質感有啲似炸魚蛋，但口感又好特別，味道都好唔錯～總括而言，呢間漢堡包性價比好高，普通平均一個餐都唔使$130就有齊漢堡包、小食加嘢飲，係依家香港呢個物價高昂嘅地方，算係好少有，經過嘅朋友可以一試～…Read More

大家都知荃灣好多好嘢食，今日同朋友嚟到荃灣廣場，喺OpenRice見到呢度食評錯就嚟試一試。首先想講餐廳其實好靚，成塊牆以至天花板嘅佈置裝飾都好有心思，坐嘅位置又闊落舒服，好有Cafe嘅feel～呢個裝修來講，佢嘅晚餐套餐性價比都幾高，$148已經包咗前菜、主食同嘢飲，仲要好多款選擇添。煙三文魚凱撒沙律：唔好睇佢細細碗，凱撒沙律應該有嘅嘢佢全部都有，味道不過不失。龍蝦湯（+18）：超級鍾意食龍蝦嘅朋友二話不說加錢嗌咗龍蝦湯，入邊超多龍蝦肉，朋友話都唔錯。香城和牛漢堡配薯條：和牛漢堡一嚟嘅時候，我不自覺嘩咗聲，因為真係好大個！我冇expect到$148嘅餐會有咁豐富嘅主菜，塊漢堡扒仲要係流緊汁㗎！熱辣辣咁食超級好味，餐廳仲好貼心俾埋手套，咁就唔驚食到污糟邋遢啦～另外薯條都好大條， 外脆內軟，唔係空心軟淋淋薯條，正！伊比利亞豬肩肉：呢個豬肩肉係可以揀唔係全熟咁食，不過驚驚嘅小妹就照揀咗全熟，全熟食落都唔會柴，仲有少少肉汁，建議點埋蘋果蓉一齊食，味道即時升級！附送嘅配菜同埋薯蓉都好味，可以解下滯～柚子氣泡玄米茶：超級無敵推薦呢一個嘢飲，佢真係好似個名講咁樣，一啖飲落去會有柚子嘅香味，跟住慢慢滲出嚟有少少玄米嘅獨特味，再加上後勁係茶嘅苦澀味同氣泡感覺，成個味道層次都好豐富，係好新奇刺激嘅特別味道，推薦大家一定要試！總括而言，呢間餐廳無論裝飾、性價比同食物質素都好高質，經過荃灣覓食嘅朋友，真係可以一試。…Read More

sᴛᴀʀᴛᴇʀ 1: ᴀɴᴅʀᴇᴀ’s ᴄᴏʟᴅ ᴄᴜᴛs風乾豬肩頸肉🍽️味道唔會死咸，食到濃濃嘅豬味，咸香咸香咁，配餐包食都唔錯😉sᴛᴀʀᴛᴇʀ 𝟸: ᴘʀᴀᴡɴ sᴀʟᴀᴅ大蝦沙律🍽️大蝦係有沙律醬包裹住嘅，整體味道不過不失，不過略嫌啲沙律菜切得有啲碎，share黎食夾得比較麻煩，跌到成檯都係😂ᴍᴀɪɴ 𝟷: ᴛᴀɢʟɪᴏʟɪɴɪ ᴛʀᴜғғʟᴇ (+$𝟹𝟻)鮮刨黑松露細扁麵🍽️身為黑松露之鬼嘅🐱，就算加錢都要食呢個黑松露扁麵😆事實證明係冇加錯㗎～成個麵都勁好食！我哋都知呢間餐廳出名係即製意粉，但估唔到呢個即製嘅扁麵係咁好味。麵身彈牙得黎仲要充滿蛋香，🐱從來冇食過呢一種味道嘅麵，配埋黑松露獨有嘅濃郁味道，簡直一流！極力推薦🥰ᴍᴀɪɴ 𝟸: ʟᴀsᴀɢɴᴀ ᴄʟᴀssɪᴄᴀ (+$𝟷𝟻)經典千層麵🍽️朋友推薦食嘅，面層鋪咗好厚一層脆脆嘅芝士，入邊鋪咗好多層牛肉醬同埋自製嘅闊面，多重口感同味道，的確係幾經典幾好味。ᴅᴇssᴇʀᴛ 𝟷: ᴛɪʀᴀᴍɪsᴜ🍽️重頭戲嚟啦～😸其實呢間餐廳除咗自製嘅面出名之外，佢嘅Tiramisu亦都係好出名! 蛋香好重又唔甜，配埋比酒浸過嘅蛋糕底，層次豐富，值得一試～ᴅᴇssᴇʀᴛ 𝟸: ᴘᴀɴɴᴀ ᴄᴏᴛᴛᴀ意式奶凍🐱其實一直都比較鍾意呢一個甜品，因為食完咁多意粉類嘅嘢之後會覺得有啲滯，呢一個甜品面頭嗰層果Jam酸味可以幫手解滯，清一清口腔嘅濃味，推薦俾鍾意食酸嘅甜品嘅你哋😋…Read More

咁啱同朋友一齊放假，去觀塘附近買嘢，行經呢間餐廳又令到我旅行後遺症發作，掛住日本嘅嘢食。餐廳午市定食有好多款選擇，價錢由一百幾至三百幾都有，豐儉由人。由於小妹實在太掛住日本嘅拖羅，二話不說就揀咗特上刺身拼盤定食。每個座位都會有綠茶粉，客人可以自己加水同埋調節自己想要嘅茶嘅濃度，任飲唔嬲。特上刺身拼盤定食：等咗一陣拼盤就嚟啦！拼盤一上來嘅時候我同朋友都嘩咗一聲，因為上面嘅拖羅同埋海膽實在太肥美啦～淨係望到個樣都已經好滿足呢個刺身拼盤，主要由六款刺身組成，拖羅、深海池魚、金目鯛、牡丹蝦、赤貝同海膽每款各兩片。另外配有特製飯，同刺身都好match。每啖刺身都係肥美嘅油脂味，超正！附上朋友嗌嘅特上壽司拼盤，賣相同埋味道都幾好㗎！整體而言，全部刺身都好新鮮肥美，滿滿嘅幸福感，經過嘅朋友可以食下，午市套餐都幾抵食。…Read More

一早上網搵到呢間餐廳想食，收工就即刻狗衝去開大餐。打開餐牌見到有龍蝦二話不說就揀咗呢個餐，因為我有龍蝦不能抗拒症😂依家仲做緊promotion，龍蝦二食先至係448蚊，點可以抗拒！波士頓龍蝦刺身：圍住仙氣嘅波士頓龍蝦刺身一上檯，忍唔住即刻起動！刺身鮮甜爽口，食得出好新鮮！食完刺身之後，侍應會拎走個蝦身，拎入廚房在整成湯飯，超級期待！日本啤酒拉麵：呢個我上網見到嘅時候已經好想食，佢係將成個拉麵擺咗落一個巨型啤酒杯到，仲要面頭鋪咗好多忌廉泡泡，營造到好似真啤酒咁。忌廉泡甜甜哋，配埋拉麵食，味道幾得意。天婦羅茄子田樂燒：份量超大，茄子外層炸到脆卜卜，入邊軟熟，忍唔住食完一舊又一舊。石鍋龍蝦泡飯：終於嚟啦！成隻龍蝦鋪喺石鍋上，揭開個蝦頭，仲要見到好多膏，撈飯一流～另外仲有龍蝦鉗可以食埋入邊嘅啖啖肉芒果烏龍熊茶：熊茶係因為真係有隻熊喺上邊，好鬼得意呀！總括而言，邊間餐廳嘅環境、食物質素同埋服務態度都好好，路過嘅可以試試！…Read More

一直想食呢間餐廳好耐，呢日特登提早訂左位同男朋友嚟補祝佢生日。餐牌有好多任食放題套餐選擇，我哋懶得諗直接就揀咗人氣No.1嘅極上牛小排海鮮放題，有成139款任食！未開始食先興奮～揀咗餐之後，店員會先上一個雜錦精選拼盤，有牛小排、牛頸脊、封門柳同牛肋條，淨係望到啲花紋都流晒口水。其他嘅配料可以scan QR Code喺電話度落單，值得一讚嘅係呢間餐廳一撳落單好快就有嘢食上嚟，完全唔會嘥時間，店員服務態度亦都好好。開始燒肉啦！牛小排好食就唔洗講，估唔到連牛肋條呢啲咁高難度嘅嘢都好易就燒到好好食，入面係充滿肉汁，輕易燒到外脆內軟，正到癲！超級無敵推薦月見汁！喺其他舖頭未見過，用黎點燒肉食簡直一流！豚肉嗰啲不過不失，但係粒帆立貝超大粒，鮮甜好味，魷魚亦都厚身彈牙～甜品方面推薦大家食榴槤糯米糍，中間個榴槤味超濃，鍾意食榴槤嘅你就唔好錯過啦！每人最後會有一個MovenPick雪糕，為成餐燒肉畫上完美句號。一個字：滿足！總括而言，呢間餐廳嘅性價比都幾高，每種食物嘅質素都偏高，任食放題黎講做到呢個質素都冇其他嘢可以挑剔，心思思嘅朋友不妨黎試吓～…Read More

是日係我同男朋友嘅周年紀念日，兩個星期前已經book位去呢間朋友介紹嘅餐廳，如朋友所講，成間餐廳嘅格局同佈置都好梵高，一行入去即刻令人眼前一亮，充滿打卡位～晚餐以套餐為主，我哋嗌左一個龍蝦餐同一個晚宴套餐。龍蝦餐頭盤：煙三文魚帶子塔帶子係屬於刺身級，鮮甜，配煙三文魚同沙律好夾。龍蝦餐前菜：普羅旺斯式炒田螺，田螺彈牙，薯蓉綿滑。晚宴套餐頭盤：哈密瓜配Parma ham唔會輸，沙律醬好味。龍蝦湯：龍蝦味好濃，份量都好多，仲有熱辣辣嘅餐包配埋，好正！野菌忌廉湯：呢個係加$38轉嘅，果然冇令我失望，個湯全部都係磨菇茸，極豐富嘅口感同味道，鍾意蘑菇嘅話千祈唔好錯過呀！主菜：波士頓龍蝦伴法國香蔥忌廉汁意大利飯好大隻龍蝦，龍蝦用芝士焗，爽口彈牙又鮮甜，好豐富嘅口感，意大利飯充滿龍蝦味，成口都係龍蝦嘅味道，大滿足！鮮墨魚汁意大利粉: 帶子、大蜆同虎蝦都好大隻好新鮮，但最令我意想不到嘅係個墨魚汁意粉。以往我食嘅墨魚汁意粉多數都係得咸味，呢個墨魚汁意粉係充滿層次嘅忌廉味，仲有少少鮮味。我超鍾意呢種感覺，而且佢份量係超超超超級大，我諗廚師應該用咗一包意粉去做。最貼心最令我欣賞嘅係，佢特登將啲意粉整成蜂巢咁，令到入邊嘅意粉保持住溫度，唔會好快成個意粉凍哂。甜品：最後甜品有芝士蛋糕同泡芙，畫下完美句點。離開嗰陣可以同門口隻雀仔講拜拜。總括而言，我覺得作為一間主題餐廳黎講，呢度啲嘢食性價比都算高，同埋個墨汁意粉真係好好食，鍾意梵高嘅話可以一試。…Read More

由於病毒怪又再次喺六點後出現，全港市民冇得再食堂食，唯有周圍去附近餐廳搵外賣嘢食。D2 Place呢間Pickabowl裝修雅雅，有多款嘢食比客人Mix and match，有魚生有水果亦都有蔬菜，成個感覺勁清新同埋健康。由於有選擇困難症，我直接揀咗最多嘢食嘅夏威夷四重奏，三文魚同吞拿魚好新鮮，佢嘅味道同平時食刺身唔同，因為有醃過，幾特別。大蝦酸酸辣辣咁，好開胃，啲蝦仲好彈牙，另外牛油果配搭一啲都唔奇怪，一種Crossover但又唔會唔夾嘅感覺。另外仲配搭咗菠蘿同烏冬，沾烏冬應該係稻庭烏冬，份量都唔少，配搭其他配料勁Match，好似食緊極豐富嘅冷麵咁，好滿足。總括嚟講，呢間店嘅嘢食好特別，如果搵想食清新啲冇咁Heavy嘅嘢食，絕對值得一試。…Read More

喺荃灣買完嘢，經過呢間外型幾靚嘅日式餐廳，見到入邊嘅格局都唔錯，就入去試吓。由於太耐冇去旅行嘅關係，真係特別掛住日本嘅海鮮丼，於是就嗌左個特上北海丼同燒牛舌。鹽燒牛舌：牛舌上菜嘅時候好有驚喜，因為坊間好多日式餐廳嘅燒牛舌都會好乾爭爭同埋比較偏硬身，呢間真係完全唔會！每一舊都係厚身仲要彈牙，一舊可以咬好耐但又唔係嗰種又唔開嘅感覺，醃料調味都好好，唔使落檸檬汁都好好味，大推薦！特上北海丼：啲魚生鋪得好靚，滿滿一碗，呢碗飯足足有七款唔同嘅海鮮，絕對滿足到我想食多樣食物嘅願望。刺身全部都好新鮮，牡丹蝦大大隻，係啖啖肉呀！三文魚籽食極都仲有好多，配飯一流～另外我最欣賞嘅係佢嘅中拖羅，花紋好均勻，入口係一種幸福嘅感覺，淨係呢兩舊拖羅我已經覺得值回票價！必食！總括而言，餐廳嘅嘢食質素偏高，性價比來講係合理，餐廳都舒適唔會好嘈吵，下次掛住日本海鮮丼嘅時候有多一個選擇啦～…Read More

同朋友經過觀塘大廈樓下見到六兩三嘅廣告，即刻醒起之前喺尖沙咀食過一次，印象唔錯，於是乎帶朋友再幫襯一次。之前食嘅六両三剩係得普通台灣菜式，呢間分店竟然有一人一鍋嘅火鍋，見天氣凍一於試吓。餐廳嘅格局都好闊落，有自助斟水區。落單都係用QR code自己落，方便快捷。我同朋友分別係做清湯同古早沙茶湯底火鍋，朋友嗌咗牛肩胛，而我就嗌咗黑豚肉。牛肩胛肉味都幾濃，黑豚肉就不過不失。除咗肉類之外仲有一款面同埋蔬菜盤，個蔬菜盤種類好多，值得一讚嘅係有好大舊嘅芋頭，芋頭打完邊爐入口即溶，超正！另外都推薦大家揀台灣麵，佢嘅質感有啲似讚岐烏冬，但又有啲唔同，煙煙靭靭咁，配埋沙茶湯底，好入味！餐廳仲要充滿良心味，靚到爆呀!!總括而言，餐廳質素同以往一樣都係咁出色，下次黎再食多次佢既招牌滷肉飯先得~…Read More