大頭貓的个人专页

當酥妃開業初期我食過幾款撻，覺得啲酥皮真係香、酥、脆、唔油膩，係好食嘅！事隔兩個月，今日咁啱又經過，想食蛋撻，所以就買左個返到屋企打開盒近睇，個撻邊啲酥皮好似唔多似以前，之後咬一啖，噢！點解個皮唔夠酥又唔脆，有啲實，仲比較油同黏口，同之前幾次食，相差咁遠嘅....... 雖然蛋撻餡味道依舊，但少左好味嘅撻底襯托，成件事倒扣晒分囉！無諗過咁快就keep唔住水準，定係一時失手呢？ 總之今次就失望........ …查看更多

今日下午茶時間經過此店，諗住未試過，所以入去試試.叫左個名爐燒鴨拉腸同招牌第一拉腸（菜脯、肉碎餡），寫住'即叫即整，耐心等候'，但不到三分鐘，兩碟一齊上檯.先試招牌拉腸，'即叫即整'但碟野係微溫，腸粉無米香又唔滑，個餡就ok野味，之後再試燒鴨拉腸，一入口又係微溫，嘩！果陣鴨蘇味一剎那充滿成個口腔.....，心諗咁好彩食中果舊鴨肉蘇啫，再試其餘兩條，全部鴨肉都勁蘇......我有理由相信佢地因為想成本平而用'鴨下欄肉'，真係未食過咁難食，$23一碟把x腸粉，真係天下第一！！！…查看更多

前個星期經過石排，見到有間新開食店夜晚都有點心食，咁啱今日蝦餃癮發作，於是叫阿娘唔使煮飯，去頂頂癮！e間店係食點心、粥、蒸飯、炒粉麵.我地三個人叫左及第粥、油炸鬼、咸魚雞粒炒飯同幾款點心.蝦餃皮薄餡多、炒飯唔油又夠鑊氣、粥 夠綿又足料、其他點心都正路，仲有杯奶茶，連我唔鍾意飲奶茶嘅人都覺得'得'！ 整體都幾好，好過好多酒樓tim！食左八樣野，埋單先至一百五十，抵啦！住山景嘅街坊，第日想食宵夜就有著落喇！ …查看更多

因為我在大興邨讀幼稚園及中學，所以經常都會去新華食野，中學畢業後比較少去大興邨，但每當想食粥麵時，就會返去！今日無啦啦又挑起條"麵筋"，所以又走去食.等食時突然諗起，原來我都幫襯左三十年........喇.......！老鬼......今日叫左碗牛雜水餃麵雖然價錢貴左少少，但起碼俾番足咁多料，唔會又加價又減料，雙重加價！湯底同牛雜味道同細個食嘅一樣，牛雜好香；麵爽、無乜鹼水味；水餃又足料，筍、菇、木耳、蝦、豬肉有齊，有齊應該材料嘅水餃先至有水餃香味，依家已經好難食得到！ 大滿足～希望佢地可以繼續keep住依種味道，因為佢嘅舊有味道，令我有好多兒時回憶！…查看更多

每次經過此小食店，總會聞到好香嘅味道，亦知道好多人話佢d漢堡包好味，但奈何每次都趕住做野，未能一試！今日終於得閒行下街，專程行過去買個黑椒漢堡包試試.漢堡包即叫即造，睇住佢烘包煎扒，大約等左五分鐘.個包餡料好簡單，就只有牛肉加茄汁，但聞落好香，塊漢堡扒都幾厚！大啖咬落去，漢堡扒帶有濃濃香辣黑椒味，又有肉汁，肉帶有筋，有咬口（但可以有人覺得un）不過啱我！ 好味～簡單又好味嘅一個港式漢堡包現在已經買少見少，實在令人懷念又滿足！…查看更多

今日下午茶時間經過此店，入去試試.$8/$12一碟，因為平，所以無抱期望咁試.叫左蟹籽沙律、三文魚壽司、韓式火炙牛肉壽司、油甘魚壽司. 先黎蟹籽沙律，係蟹籽蟹柳及生菜，因為即造，生菜爽脆，雖然簡單但味道對版，之後試壽司，都唔錯喎！食物新鮮，魚有鮮味、飯有醋味，幾好！最後個韓式火炙牛柳壽司反而有驚喜，生牛肉輕輕火炙過，肉質嫩滑，有牛肉味，上面有少少脆蒜粒，配合得好好！整體都唔錯，而且價錢平，絕對好過爭鮮囉（無理味道，唔知食緊乜....）！…查看更多

自從樂怡在山景開業後，我已經無再幫襯其他連鎖麵包店，因為樂怡d麵包真材實料，包包有質感，餡料又多，食一個已經夠晒飽！今日試左個新款包，不過唔記全名，洛xx紅豆包 ，$8.5一大個（有六吋幾直徑）包面有層薄薄酥皮，包包質地紮實實，最驚喜係紅豆餡，初時以為只係紅豆蓉，點知切開發現係大大粒原粒紅豆！！ 餡料香甜有咬口，配埋酥皮香味及包包質地，整體感覺好夾，好好味.個包份量又大，一個包同阿媽兩份分都好夠！依家好在仲有d貨真價實嘅舖頭，我地先食到用心製作嘅食物，真係要多d支持！！…查看更多

原本e餐晚飯係去利寶閣食o既,但因為訂位問題搞到火都o黎,所以最後去番花園食!叫左個套餐,大約有燒味併盤、煎海中蝦(酸甜汁)、海鮮卷、蒸海斑、金磚西蘭花炒雙蚌(唔記得個正確名稱)、炸子雞,仲有羹有菜.有一排無去花園食飯,今日覺得佢地d食品有番水準,樣樣餸都好足料,我覺得最正o既係"金磚西蘭花炒雙蚌"(金磚即係椒鹽豆腐),炸得外脆內嫩,,獻汁又唔會太多而整淋d豆腐,雙蚌又好爽口! 開頭仲以為e碟餸唔多夾,但食落又比想像中好! ~正~ 各樣食物o既味道都幾好,唔會過咸過淡!屋邨酒樓價錢比較公道,而最重要係服務好過利寶閣好多,侍應有笑容,做野快手,連坐位都無利寶閣咁迫夾,食得舒服o既一餐!…查看更多

我早幾日都有同 jimmytse 一樣o既經驗!話說,屋企人4日前已經打電話去book檯(book 1月1日7:00pm 8位),酒樓知客1月1日下午仲打電話o黎comfirm booking. 咁我地當晚6:50去到攞位,門口個知客話要等一等,我當時見到有人o係度擺酒,都心知不妙ga喇! 因為e間野每次間開半間酒樓o黎擺酒,我地坐另一邊o既散客就慘喇,坐得勁迫、出菜勁耐、連埋單都要等九年........ 奈何當日係假期,度度都無位,想去第2間食都有難度!!!!唉......等左十幾廿分鐘,有幾個"熟客"行埋去同個知客講"我姓x,之前同黎小姐book左 7點鐘 7位",跟住個知客睇下張訂檯list,之後即刻俾位佢地...... 我地見狀當然即刻出聲嘈啦,我地話"佢地訂7點,我地又訂7點,但點解我地等左咁耐都未有位,佢地一o黎到話向邊個訂位就唔駛等?",個知客話"因為係佢地訂位先!", 聽完真係火都o黎呀,我地即刻指住佢張訂檯list話"你張list都寫住係我地訂檯先,點樣佢地訂先呀?",之後個知客入返酒樓搵救兵,有個高級小小o既部長出o黎話"唔好意思,其實係訂檯o既同事疏忽,原本今晚晚飯應該分兩輪時段,6:30及8:30,但同事無事先講清楚.........",咁我地話"你地下午打o黎confirm果陣都唔講??咁你即係將d檯俾晒d熟客啦? 咁訂位o黎有咩用呀?" 個部長無解釋,只係話唔好意思........(當時我地已經企左接近30分鐘,有老有嫩一齊罰企......) 當時門口仲有一大班訂左檯又無檯o既人,其中有d人話佢早一星期已經訂左檯喇..........個個都媽媽聲!!!!!!!!之後,我阿叔行左入酒樓入邊睇,佢出o黎之後話檯檯都係o岩o岩開始食,都唔知等到幾時.......(果陣已經7點8喇! 老人家又唔餓得ga嘛!!)跟住我唯有行返去海富"花園"睇睇,等左5分鐘就有位,於是全家就去返"花園"食lu!真係唔明白,間利寶閣都開左成10年啦,但每次無論飲茶定食飯,訂左檯都要等起碼半個鐘或以上,真係點管理ga???????…查看更多

今日lunch同阿媽去試下,我地12:20入去,完全唔駛等位,因為一枱客都未有!睇睇餐牌,午餐有8款,但唔包餐飲,要餐飲加$5,咁我地諗住要熱咖啡啦,點知,侍應話未有檬茶、檸水及咖啡,只得汽水等凍飲............無咖啡都算啦,竟然連檸水都無?? 對面就係惠康,去買兩個檸檬都唔怕死啦...........!!!我地叫左一客碎魚生飯($38)同一客壽司set 8件($32),先o黎兩碗麵豉湯,一飲,兩母女一齊皺眉,碗湯無麵豉味唔鮮唔好味,好似一碗淡鹽水咁..........勁難飲!!!!!!!!! 過左一陣,飯到喇,阿媽試一啖再睇睇d飯,發覺唔多似珍珠米喎,再睇清楚d,原來係大部份普通米溝少少珍珠米 魚生都算新鮮,但鮮味就.........我碗魚生飯要不斷落豉油先夠味囉! 呢間野o既食物質數中等,係唯一裝飾得幾好,但好睇唔好食囉! 真係唔明點解,新張期間都唔做好少少吸引下人流?! 阿媽都話應該無下次!…查看更多

琴日放假去o左睇戲,諗住睇戲前食d野先,於是就去左食粥.我叫左碗艇仔粥同炸兩. 先食一口炸兩,but...死火...點解咁差ga?? 炸兩入面o既油條一d都唔香,又唔脆,仲"un"o既?? 一團粉咁!! 跟手搞一搞d粥,.....點解d料少到咁ga? 得3條發到好似浮屍咁大條o既魷魚,3條豬皮,仲有d米粉碎,但碎牛肉就丁丁都無??!! 以前仲有炸花生同蔥花ga去晒邊?? 碗粥食落無味道無米香,唯一係d魷魚同豬皮有好重鹼水味........有無搞錯呀,加o左價仲要偷工減料成咁......!!!!…查看更多

昨日去食過燒牛肉凍檬及椰汁冰,碗凍檬等左好耐都未o黎,隔離枱d人同我同一時間落order,佢地都食完喇,我碗野至剛剛到! 碗粉得好少,牛肉無香味! 杯椰汁凍更加稀到.......! 得個甜字!!D侍應禮貌就OK,但唔得醒囉!總之,無下次!!…查看更多

早幾日經過e間小食店,想起好多網友話e間d沙翁好食,於是我就買o左一串無餡及一個荳沙餡o既沙翁試下啦! 當時d沙翁仲暖暖地ga! 用手拎起一粒,發覺勁多油,放入口一咬....un到呢....! 好似唔多掂喎,仲差過麵包店o個d!! 我食o左兩啖,最後成包掉晒! 臨掉之前望一望個膠袋底,嘩!幾粒沙翁溜o左成擔油出o黎呀!…查看更多

今日同同事去食lunch,食物方面普普通通啦! 但我地見到d女侍應o既服務就真係好差囉! 客人叫佢就扮聽唔到,又成日漏單,叫佢地跟下d單,佢地會好唔願做咁款ga! 今日呀,仲見到佢地咀miu miu咁"頂"客人咀tim呀!明明係佢地唔o岩,仲要串番客人轉頭??!! 真係有無搞錯呀.............!…查看更多

e間店我食過兩次,但兩次都貨不對版! 經歷一:上星期見佢新開張,於是同同事食lunch去試試.原本想叫"越南米網春卷湯檬"($28),點知佢地無檬粉,於是我改要河粉啦! 等o左一陣碗粉o黎到喇,嘩!超大碗呀,個碗??!!但d粉得好少,仲要個春卷係公仔點心o個隻,而碗粉仲係淡而無味tim,我當時已心諗有無搞錯呀,咁都得?!而同事食個"白汁雞肉意粉"就ok喎!經歷二:由於今次有另一位同事話未試過,於是前日我又食多次!咁我諗住今次叫"白汁雞肉天使麵"($34)應該會ok啦,點知碟天使麵o黎到(當然都係碟大粉少啦!),我試o左一啖就發覺好奇怪??因為我發覺o個碟根本就唔係天使麵,而係同天使麵差唔多粗幼o既米粉o黎ga!!全完無意粉應有o個種質地,反而係米粉o個種爽同易斷o既質地....!佢地真係當d客係傻ga!好似當d客人未食過天使麵咁! 雖然天使麵o既成本係貴過米粉好多,但都無理由咁搵笨ga!!e間o野o既價錢已經比附近餐廳收得貴ga喇,但係都咁貨不對版,而且d食具都幾污糟,好似無乜點洗咁,所以我地以後都唔會再幫襯ga喇!…查看更多