yvonne050210的个人专页

傳說中最出名嘅天婦羅，朋友同我久仰大名一於去試吓，滿心期望着又香又脆的天婦羅，誰不知⋯⋯⋯⋯鰻魚天婦羅個size 大就真係夠大，可惜個脆漿粉係淋嘅，鰻魚味道，亦都唔係真係咁出色，其實個墨魚都算新鮮但係亦都係淋晒。我真係唔明白啲人點解講到咁勁，其實嗰間舖頭啲招呼又唔係特別好，啲嘢食叫做「中規中矩」，亦都唔係出邊招牌寫得咁勁，突然間諗起之前去過銅鑼灣某間出名食自助餐，即炸即食天婦羅仲正！個餐包前菜，湯等等，冇乜賣點！…查看更多

呢間野比我一種感覺係好「亂」，哈哈，唔好誤會我覺得佢好差，應該係「亂」得嚟又幾搞笑。入到去有幾個明顯冇乜做飲食生意經驗嘅韓國人忙住招呼人，走來走去團團轉，起菜但係D柯打又亂晒籠，say sorry ，一輪韓文鬧嚟鬧去之後，😂又再等好耐廚房都出錯野，出D前菜之後又等好耐先見主食。仲有一個露台仔方便食煙人士，或者想呼吸下新鮮空氣嘅，驚喜特色！前菜有8小碟，食晏嚟講係好有心，價錢非常合理，人蔘雞好正，各類麵食，石鍋飯都有，食住晏又有免費「韓劇」睇，我反而覺得好得意，成套「人生如戲」做比我睇😝😝！…查看更多

抵食一定唔係，食物方面合格嘅，唔好expect太多，地方特色有房，飲野都可以嘅。呢啲中餐係煮比鬼佬食，所以賣相係一流嘅，味道就不如去大排檔好過啦，起碼夠煱氣！今次公司攪function 勝在有一大間房可以容納40-50人，又中西合璧就唔係咁多間可以揀。講真如果為咗食味道就唔去啦，食情調，地點，歴史特色，順便行吓大館，氹女朋友開心等等都可以嘅！順便一提，喺扶手電梯上去嗰邊嗰入口係最近嘅。總體感覺係，「到此一遊」！明嘅就明架啦！…查看更多

呢間餐廳輪裝修、食物質素、菜式、味道及氣氛其實都係性價比高。味道方面未必有驚喜，唔係話可以去到味蕾爆炸嘅程度，但係一般法國菜所做到嘅水準，佢都做到。Portion大小適中，味道剛剛好，作為慶祝節日生日，又唔想去到太貴嘅餐廳，呢個係好選擇。食完飯之後可以去出邊有個好細嘅露台，可以食煙飲酒，適合二至四人，大班人就唔可以啦。如果你去慣高級餐廳，呢度嘅招呼係比較local，如果英文唔係太好，呢度唔會令你太難堪。…查看更多

朋友介紹去食啲奇方異菜，簡直好似去咗金國睇佳麗一樣，好新奇、好有趣！首先講吓個場地，啲裝修非常之唔錯，打卡之選！成個環境氣氛都令人地好relax，可以坐低食餐異國風情嘅晚餐！口味類似中東菜，有好多用豆類磨成嘅醬，點naan bread 食，呢間係我食過嘅中東菜之中比較好食嘅一間，入口係好意，同埋用料都相當新鮮，所以食到嗰種誠意。我平時口味都屬於大路，但都覺得呢間餐廳做出嚟嘅菜非常之易入口，個烤雞味道非常唔錯，整體來講賣相+味道+氣氛+價錢，我都會比高分，值得推介！…查看更多

個人感覺係呢間野名大個實，出邊條隊好長等好耐先入到去，入到去好似大家樂咁要自己買飛，食完就快啲走，因為好多人等位。講到食物嘅質素，主要係冰底，跟住加咗唔同款式嘅芋圓，有啲條狀，有啲球狀，有啲方方地幾得意，在面上加舊雪糕，加啲煉奶，係咁上下啦！有啲款式會加啲綠豆紅豆納豆，我諗會飽肚啲，所以食完碗野都幾飽，可以兩個人食一款都夠食。嗰日我同個朋友兩個人食一盤，食完之後第日仲肥咗一磅，你都咪話冇份量呀！哈哈！各位姊妹，奉勸你一句如果減緊肥就唔好去啦！…查看更多

呢個餐廳好lively, 啲waiters 好開心，食物水準都非常之好！係Calimex小食店之餐廳版，有現場即做Guacamole，現場即做嘅當然係新鮮又好食啦！同超市買嗰啲無得比！八爪魚海鮮沙律Mexican style, 都幾好食，味道淡D，唔似得泰式沙律咁惹味，再加杯Caipirinha，Friday night 放工後好選擇呀！個碗芝士dip好飽肚，但又超好味，減肥可以聽日先😂！氣氛好好，兩個人或者成班人去都掂！ …查看更多

公司請食飯，梗係要揀餐好㗎啦，呢間牛扒真係正！價錢就一定係貴㗎啦，但係論裝修，論排場，論服務質素，以及食物本身嘅質素都係一流水準！　個海鮮平盤賣相一流，味道唔及得上最好，若果有睇開我寫嘅嘢就知道我覺得lobster bar嗰個海鮮拼盤係超級好食，相比之下呢個嘅味道係差咗啲，但係整體亦唔算太差！個牛扒真係要讚一下，牛味濃，煮法非常特別，應該係用焗爐焗嘅，我哋order左唔同程度㗎熟度，起菜的時候每一件牛扒都標籤得清清楚楚，呢個認真嘅態度值得令我哋欣賞，亦都比到客人一個保證。…查看更多

呢度嘅鹽焗雞係相當出名嘅，慕名而來，雞肉滑嘅，唔係乾柴柴嗰種，鹹味啱啱好，不太鹹不太淡。賣相亦都相當唔錯，整體來講我會比8分以上！焗魚腸呢一道菜唔係度度有得食，呢度亦都整得相當唔錯，連我一啲平時唔食內臟嘅同事都食得津津有味，值得推介！其實個燒肉都唔錯，但係相比起鹽焗雞及焗魚腸就好似將佢比下去，顯得好普通。 仲有一樣值得睇，就係我冇擺相出嚟，其實這一個平平無奇嘅點心「蒸雞扎」，我好耐都冇食過一個雞扎係咁有雞扎味，真心推介，大家不妨試一試！…查看更多

無計啦！俾啲咁嘅價錢，就一定有相當嘅水準，啲蝦腸嘅蝦仁係大到冇得頂，蝦肉係彈牙！過松露蛋白炒飯非常香，就算你好飽都好似想食多碗咁，非常之危險，三高就千祈唔好叫呢個啦！😂籠燒賣有一小粒黑蒜係每一粒燒賣個底，叫做有特色囉又健康！最咪仲猶豫緊食唔食甜品嘅時候，我個朋友已經二話不說就叫咗蛋撻，個蛋撻真係幾好食幾新鮮，所以都冇話唔累事！haha!!整體來講成間餐廳嘅裝修，食物嘅味道質素，夥計嘅招呼水準，係令到成餐飯都好滿意㗎 ！…查看更多

呢間野已經難訂位，因為時代廣場用coupon嘅關係，大家都湧入黎抱着一試無妨嘅心態，如果唔係有coupon，我絕對唔會推介大家去試。講吓原因，首先門口嗰個帶位一啲都唔殷勤，完全冇禮貌，仲話如果我哋分枱坐嘅話，叫我哋下次先嚟都得，簡直係同公司倒米！入到去個場係非常之大，但係唔夠Staff，簡直要自己攞餐具，個個都唔得閒，一個打緊單，一個執緊枱，一個係bar近做緊嘢，呢間野話晒都係Gaia group嘅，但係啲招呼一啲都唔掂！啲食物質素係OK嘅，味道唔係特別出眾，勝在有新意例如海南雞飯配risotto,燒鴨飯啲飯裏便會加啲truffle, 所以食物其實係有新意，但係個招呼真係麻麻⋯⋯啲Pizza種類唔算多，講真味道尚可，唔係特別出眾，樓上嗰間PizzaExpress應該會好啲…查看更多

地方正，海景正，招呼亦都唔錯，氣氛亦都營造得相當浪漫，好適合情侶嚟食飯。頭盤係用咗北海道嘅scallop 做carpaccio配上truffle sauce 嘅cream，個cream嘅質地做得幾特別，有啲似雪糕嘅質地。跟住配一個蘑菇湯，非常濃厚嘅truffle味，其實本身個湯嘅味道都已經幾好，配個truffle基本上將整個湯嘅味道再提升一層。個牛扒煮得啱啱好，其實個味道係唔錯，但係肉質有些少靱，所以反而呢個主菜令到全晚失色咗少少。至於甜品，我覺得非常普通，基本上每樣都有啲咁，唔係太特別！整體來講，配合環境、燈光、氣氛、海景、食物我覺得係可以接受嘅。…查看更多

呢間小店嘅味道係唔錯嘅，個湯底係濃厚嘅味道，啲餸都好多，整體來講個份量係大，性價比高！啲河粉應該係靚嗰種質地，食落去係韌韌哋，有啲似嗰種大碌竹躂粉！雖然間店係細，但係招呼都算係咁，好似係幾個後生仔自己創業咁，好佩服呢啲人嘅精神，起碼唔係諗住等政府養呀！小食方面，我推介雞翼，雖然得三隻，但係個味道係幾好，同埋個醬汁好特別，可以一試！不過，如果唔食牛嘅話，喺呢一間房就少啲選擇，所以唔食牛嘅朋友基本上都唔需要嚟！不過要講一講，呢間舖頭非常細，啲位好窄，所以唔係坐得舒服嗰種，但係食個quick lunch冇問題嘅！…查看更多

呢間餐廳係主打法式越南菜，基本上唔係食碗越南河粉咁簡單，係法國殖民地式嘅越南菜。我最欣賞嘅就係個滴漏咖啡，飲完之後個口係冇酸味after taste。食個lunch加杯滴漏咖啡，平均每人都要$300 ，所以你可以將你嘅要求及期望提高一啲。前菜可以揀雜菜沙律或者湯，主菜不得不讚呢一個煎魚，個魚係新鮮嘅海🐟，魚味相當濃厚，食飯落係有些少彈牙所以係覺得新鮮魚。另外一個主菜就試咗佢嘅豬頸肉，其實個豬頸肉有啲似叉燒，不過本人覺得厚切左少少所以有啲韌。整體餐廳嘅服務都好有水準，上網又有得訂位，所以我會考慮再幫襯。…查看更多

食物質素係唔錯，有板有眼，有頭盤，二盤main course，仲有甜品。味道亦都相當有水準，上菜嘅速度適中，其中salami squid 係一個好惹味嘅前菜，相當有特色。我諗要提醒大家就係呢間餐廳嘅環境，窗口位係望海嘅，西環嘅海景係相當唔錯，但係整間餐廳嘅座位係比較迫夾，星期五晚客人多嘅時候係相當嘈雜，根本就傾唔到計，若果諗住拍拖就唔使諗啦，個氣氛根本就一啲都唔浪漫，有些少似大排檔。枱與枱之間嘅距離亦都唔足夠，有時講嘢大聲啲隔離都會聽到，所以食餐飯就只可以食餐飯，食完就快啲走。…查看更多