yolofood的个人专页

朋友介紹，話旺角熟食中心有檔海南雞飯店出名，已經好多年無去過熟食中心，所以決定今日去試吓。12:30pm左右到，檔口前已經有超過10人等飯/等外賣。店舖各式各樣嘅泰式食品都有，eg海南雞飯/青咖哩黃咖哩/豬手飯/湯麵炒麵..而今次第一次試，所以穩陣啲，揀咗佢個海南雞飯。雞飯$45，轉雞髀+$14，再加$1外賣盒。滿滿嘅雞，可能因為加咗錢嘅關係，個人認為雞嘅份量好足夠！雞煮到剛剛好熟，又香滑又有口感，唔似冷鮮雞。油飯亦好香濃，份量超多。而海南雞除咗雞重要，佢嘅泰式辣汁亦係一個點綴，令整個飯更出色！小總結💬$60一個高質嘅海南雞雞髀飯，物超所值！完全可以再encore！(滿分為🤤x5)好味指數: 🤤🤤🤤🤤抵食指數: 🤤🤤🤤🤤🤤回頭指數: 🤤🤤🤤🤤…查看更多

一直唔識欣賞bagel，始終口味係好personal ，而且bagel口感唔係我喜歡嘅chewy麵包。就算食過幾次人人都讚嘅”享樂烘焙”bagel，我都覺得還好，可能要焗熱食會更好味。但直至試過留白嘅bagel，確實令我180°對bagel改觀，原來bagel可以咁好味😍先講bagel口感，可能因為有略略加熱/烘烤過，佢唔會變到好硬。而且口感係有啲似食緊baguette咁，少少外脆內軟，個人嚟講好喜歡呢個口感。而且包面有啲黑芝麻，令個bagel加點層次。而配料方面，最喜歡佢用咗cream cheese去襯托煙三文魚，令兩者夾住食都唔會覺得漏。再加上蕃茄洋蔥沙律菜，令整個bagel都有清新嘅感覺。呢間cafe另一要讚就係以cafe/coffee shop嚟講，佢嘅飲品價錢係非常合理。flat white 只需$38，hot chocolate latte只需$35！性格比超高。小總結💬喜歡佢嘅bagel，價錢合理。會想再去試埋佢嘅慢煮牛bagel！而且飲品都好味，令呢餐食得好滿足。(滿分為🤤x5)好味指數: 🤤🤤🤤🤤抵食指數: 🤤🤤🤤🤤回頭指數: 🤤🤤🤤🤤🤤…查看更多

每個入嚟嘅客人都問有冇爽腩，相信佢嘅爽腩應該真係好出色！平日12點半去，幸運地今日少人唔洗排隊就入得。本身想跟人試爽腩，可惜店員話爽腩要晏少少先有。清湯牛坑腩幼麵 $70牛坑腩始終會痴住啲肥膏，所以望落以為啲腩好肥。但佢每件相對幾爽口，唔痴牙，易入口唔洗咬好耐！麵質彈牙，生菜又有幾片！清湯崩沙腩河加牛丸崩沙腩相對瘦，條條分明嘅感覺，肉質結實但同樣無痴牙，一樣有牛味，份量十足。加上牛丸同樣出色，彈牙又有牛油香，難怪亦係必加項目！$8/2粒，正常價錢。河粉通透，正常！不得不提，其實最出色係佢嘅牛骨湯。唔係出面粉麵舖嘅深色腩汁，飲得出佢係又清又濃牛味嘅牛骨湯。唔會好肥膩，唔會好油，唔會過咸。難怪好多人食完個麵都會好似食拉麵咁清埋個湯，而最正係食完成餐，唔會有好口渴嘅感覺！牛骨湯真係值得大讚！！！另外佢有2款辣椒醬同樣要試，一款有沙嗲味嘅辣醬，一款係出面餃子店會有嘅菜脯辣醬。個人喜愛沙嗲風味！小總結💬大讚牛骨湯！每款牛腩都好味，而且牛丸真係必加！雖然價錢唔算好平，但一分錢一分貨，佢嘅食物係出色。如果唔洗成日排長龍就必定會成日返嚟食！(滿分為🤤x5)好味指數: 🤤🤤🤤🤤🤤抵食指數: 🤤🤤🤤🤤回頭指數: 🤤🤤🤤🤤🤤…查看更多

香港天氣太熱，所以本來諗住食乜都無所謂。而之前去過旺角分店食lunch，覺得唔錯，所以決定入去食dinner。好彩都算早入座，所以人相對少。香港地食飯，仲要係尖沙咀，所以唔可以期望環境會係大。生牛肉湯河: 湯底本來還好，但河粉又粉又林。香茅雞翼撈檬: 香茅雞翼好香，但無味，好似無醃過咁。越式炸春卷: 春卷即炸夠脆，但好多粉絲。小總結💬整體好失望，完。(滿分為🤤x5)好味指數: 🤤抵食指數: 🤤回頭指數: 🤤…查看更多

本身都好喜歡食餃子，所以今日去咗呢間北角同大埔都有分店嘅逸東餃子。呢間餃子小店位於廣福道旁嘅橫街，傳統麵家蔡潤記斜對面。淨係睇餐牌，呢間餃子小店定價算親民，平均$4x/6隻，$5x/10隻！所以為咗可以一人一碗湯，2人份我哋點咗2份6隻湯餃同1份6隻煎餃！香辣榨菜鮮肉湯餃: 食到少少榨菜嘅口感，帶辣但可以接受，唔會辣到食唔到。麻香三椒鮮肉湯餃: 椒味重，都麻辣口感，感覺幾清新。本來唔太喜歡食青椒，但佢嘅麻香係會令人想再食多隻。粟米芝士鮮肉煎餃: 好多粟米同果然重芝士味，選擇煎餃因為煎餃先食到芝士餃拉芝嘅精髓。蕃茄薯仔魚湯: 魚湯呈奶白色，好有家嘅味道。小總結💬所有鮮肉餃肉質相對較出面嘅餃子實，但每隻份量都好足料。餃子皮厚度適中，加上包得實，不論煎煮過後都無散到。煎餃煎得香脆可口，都好出色。重點個湯好好味，飲完成碗唔會好想不停飲水，所以好值得推介！(滿分為🤤x5)好味指數: 🤤🤤🤤🤤抵食指數: 🤤🤤🤤🤤回頭指數: 🤤🤤🤤🤤…查看更多

呢間越南菜小店已經榮升我嘅跑馬地必食👍🏻每份點餐都係即叫即整，好想再次推介俾大家👍🏻首先，必點一定係牛油雞翼‼️價錢同一般越南菜店相若，因為order得越南小食就知一定唔平，但最緊要係好味！雞翼即叫即炸，所以需時大約15分鐘。然後廚師會用牛油煮一煮新鮮洋蔥，再將炸雞翼放入鑊炒一炒。呢份雞翼嘅奇妙之處係上碟時炸雞翼保持到超級脆口，唔會有油浸到濕哂嘅感覺。加上牛油香中帶點蒜味，非常出色！所以呢份雞翼真係必點‼️‼️呢碗生牛肉pho上次都講過好正！湯頭濃，略嫌少少油，但唔會食得好辛苦。洋蔥香葉等配料好足夠，而牛肉選用安格斯牛肉，個人好喜歡呢款牛肉，因為無咁肥，又有咬口。另外今次試咗佢嘅香茅豬頸肉湯河。湯底比生牛河少咗份牛肉味，但清得嚟都好美味。加上豬頸肉非常香口，可惜選用嘅豬頸肉偏肥，喜歡肥膩口感嘅人會覺得入口即溶。但本人偏好較瘦嘅肉質，但嫩口反而覺得好似食梗肥膏。小總結💬牛油雞翼同生牛河真係必食！(滿分為🤤x5)好味指數: 🤤🤤🤤🤤🤤抵食指數: 🤤🤤🤤🤤回頭指數: 🤤🤤🤤🤤🤤…查看更多

假日有機會到跑馬地覓食，幸好趕得上3pm落場前做最後一批客人。呢間係跑馬地嘅小店，店內嘅位不足十個，但受歡迎程度係3pm都有人排隊等住食。河內安格斯生牛肉湯河🐂食越南pho最緊要先品嘗個湯！雖然呢間越南店嘅湯相對”瀆”，而且可能因為用上安格斯牛肉，所以湯底嚟講係相對油，但味道上係非常美味同非常出色，好重牛香！另外再加上少少青檸汁，湯頭會變得更清甜。而上餐時生牛肉仍處於半生狀態，加上用上安格斯牛肉，肉質非常軟嫩，完全唔會”鞋口”。越式蒜蓉牛油炸雞翼🧄蒜蓉牛油雞翼講到明製作需時，但真係非常值得期待。加上$88只有6隻雞翼，價錢都唔平。每隻雞翼嘅size都算大隻，加上即叫即整。蒜蓉香加牛油香，雞翼又醃得好入味，所以雞翼上枱時係又熱又脆又juicy，非常出色！小總結💬小店空間有限，所以peak hours真係應該要等。加上小店服務時間都需要留意，因為會有落場時間。生牛肉pho同雞翼都非常出色！！！！有機會真係要再試埋其他食品。(滿分為🤤x5)好味指數: 🤤🤤🤤🤤🤤抵食指數: 🤤🤤🤤🤤回頭指數: 🤤🤤🤤🤤🤤…查看更多

一向係炸甜不辣嘅愛好者，所以難得去荃灣午餐，就周圍搵吓有邊間台灣嘢有炸甜不辣食。openrice search完發現喺荃灣廣場斜對面有間高rating嘅台灣菜館，即管就去試一試！荃灣廣場對面嘅大壩街同享和街出面多餐廳，所以食飯時間嚟一定周圍都係人。跟住google map，果然係會行過籠！所以記得望清楚街號。餐廳有上下2層，入面有舊台灣風格嘅裝修，值得打卡。平日午市時段多一個套餐-$10嘅優惠！本來想試一試牛肉麵，但睇相俾紅糟肉吸引咗！所以最後點咗紅糟肉便當同凍峰蜜檸檬椰果，另外加咗一份炸甜不辣。凍峰蜜檸檬椰果🍋已經揀咗微糖少冰，但可能係峰蜜嘅關係，仍然係超！級！甜！飲咗一半後真係頂唔順，加咗水沖淡先ok！但整體其實味道好好，加上椰果份量都多！紅糟肉便當🍱正宗嘅台式紅糟肉會用五花腩，店內嘅紅糟肉同樣肥瘦參半。現炸所以外層非常香脆，加上可能切得細細條嘅關係，咬落完全唔似食梗肥膏。再配上帶甜嘅醬汁，感覺就似食梗炸蜜汁叉燒，食完一舊就會停唔到想食下一舊！台式便當通常會跟幾款配菜，今日有涼拌椰菜花，炒蒿筍片，炒大豆芽，跟半隻鹵蛋。配菜不過不失，有啲蔬菜食吓都係好事。炸甜不辣🍤甜不辣嘅叫法源自日本的天婦羅，實際係似炸魚漿/炸魚糕。個人喜歡口感十分”膠”嘅炸甜不辣，愈”膠”愈鐘意。因為假如你要有魚味，咁食炸魚蛋就可以，唔洗食炸甜不辣。魚漿要愈起膠就愈有咬口，所以要搵到夠”膠”嘅炸甜不辣都唔容易。呢份炸甜不辣雖然唔算非常膠，但都可以滿足到食炸甜不辣嘅癮。配上椒鹽粉，帶辣，可惜有啲過多，蓋過炸甜不辣嘅味。至於份量嚟講其實好ok，$32有十幾件！所以整體cp值都高！小總結💬紅糟肉似炸叉燒，喜歡食炸豬扒同炸叉燒就可以點！可能始終紅糟肉帶甜，個飯食到一半開始會有甜到膩嘅感覺，所以怕甜嘅人要小心。至於炸甜不辣都值得推介，係一份不錯嘅小食。(滿分為🤤x5)好味指數: 🤤🤤🤤🤤抵食指數: 🤤🤤🤤回頭指數: 🤤🤤🤤🤤…查看更多

本來唔係太好內臟，仲要牛雜聽得多，豬雜真係比較少。但經過見到keep住有街坊幫襯呢間豬雜粉，所以膽粗粗坐低試吓！店內坐位唔多，款式亦都係餐牌上見到嘅。但個人認為種類唔需要多，只要煮得好味就夠哂數！加上貨源聲稱係本地自設豬肉檔，元朗街市就有得買，所以先可以保證內臟新鮮！大豬雜粉:超級有驚喜！因為每款內臟都覺得係爽口，口感唔覺得粉，亦無乜內臟味！除咗瘦肉，仲有齊豬膶豬肺豬心豬腰豬橫利，再加一啲唔知係咩嘅豬雜！配埋炸蒜加湯一齊食，好出色！直頭想再加豬雜！另外跟粉可以加$10有3隻手工餃，揀咗韭菜水餃！同樣十分出色，好足料，$10/3隻嚟講仲要好大粒！豬膶米線:本來點豬膶米線係因為驚豬雜粉唔啱食，豬膶應該最穩陣。下次一定點豬雜粉！小總結💬豬雜粉超級出色！清湯配上炸蒜，令成個粉再昇華！所以呢個價錢食到碗咁出色嘅粉，超級推介！(滿分為🤤x5)好味指數: 🤤🤤🤤🤤抵食指數: 🤤🤤🤤🤤🤤回頭指數: 🤤🤤🤤🤤🤤…查看更多

位於通菜街兩旁嘅小食店，都算近地鐵站出口。假日中午時段去，去到好彩咁啱都有幾個吉位，其餘都好快就滿座。煎餃 $52/10隻(+$4雙拼)選擇咗店內特色餃: 蒜芯豬肉餃&韭菜蝦皮豬肉餃🥟估唔到蒜芯拎嚟包餃子又幾好味！滿滿蒜芯嘅香，蒜芯亦keep到少少嘅爽口，加上豬肉本身都整得十分juicy，所以呢款餃好值得推介！至於韭菜蝦皮豬肉餃，唔太食到所謂嘅蝦皮，但當普通嘅煎韭菜豬肉餃子食一樣香口好味，係好穩陣嘅選擇！醉炸雞翼 $35/5隻如無意外係將醉雞雞翼拎去炸，所以食落會帶有少少嘅酒味！外皮炸得剛剛好，望落似茶餐廳嘅炸雞翼，都幾特別，值得一試！餃麵 $51餃子: 招牌餃子貳號，有5粒。湯底: 豆漿蝦湯麵: 烏冬唔太理解點解招牌餃子係招牌，可能因為煎招牌餃會特別少少，但放湯揀招牌餃就變普通餃子。而且只有5粒，感覺唔太夠食。不過對個豆漿蝦湯幾有驚喜，清清豆漿中帶有蝦油味！加上店舖選用日本烏冬，所以加湯食都好味！😋小總結💬所有餃子都算皮薄餡靚，最impressive 同推介係蒜芯餃！所有食物份量就唔算太多，細細份咁，但始終係小店，所以都值得一試！(滿分為🤤x5)好味指數: 🤤🤤🤤🤤抵食指數: 🤤🤤🤤回頭指數: 🤤🤤🤤…查看更多

之前去大埔熟食中心，次次都懶得揀，一定係食東記豬扒麵。咁啱今次去，撞正佢無開，所以決定試吓世記嘅豬扒麵！餐牌上嘅食物，其實同東記無乜分別，連價錢都一樣。今次都一樣，點咗豬扒雞翼米線。份量其實同東記一樣，雙拼又係2隻雞翼加1塊大豬扒。雞翼味道大同小異，反而個人認為世記嘅豬扒相對東記嘅，較juicy，無咁乾身，口感相對鬆化少少！但佢就切到每塊都好大件。小總結💬雞翼同米線都同東記一樣不過不失，而豬扒就較東記好味。以平民食品嚟講，想又慳錢又飽肚，上熟食中心食碗$42豬扒雞翼米線已經可以好滿足！相信將來我再去熟食中心，我會轉食世記 > 東記。(滿分為🤤x5)好味指數: 🤤🤤🤤抵食指數: 🤤🤤🤤🤤回頭指數: 🤤🤤🤤🤤…查看更多

試咗一間openrice好多rating同好多人問我comment嘅川菜餐廳。晚市嘅餐牌主要有主餐牌，仲有毛血旺同干鍋揀。炸饅頭超級浮誇，好大架船，又會噴煙。即叫即炸嘅炸饅頭，$58有6件。你話好平就唔算，但以即叫即炸嚟講，外皮脆得嚟內裡保持到好鬆軟。難怪係餐廳熱門食品，見到枱枱都有叫。至於毛血旺，佢本身已經會有蒿荀，蓮藕片，芽菜同菇，而配料需要額外點至少5款。我哋就點咗魚蛋，鴨血，豬耳，雞腎，雞軟骨同薯粉。 鴨血：正常份量同口感，唔錯豬耳：好夠淋但無乜味雞腎：都算大粒，幾好味雞軟骨：有驚喜，佢有先炸過先放入湯。一開始食好有驚喜幾好味，但浸耐咗炸皮就濕哂會無咁吸引。魚蛋：超級失望！係超級超級超級失望！！！！從未食過咁難食嘅魚蛋！！！已經唔期望佢嘅魚蛋要好彈牙，但結果口感係實的的得嚟無魚蛋味，直頭係無味！！！比普通魚蛋更難食，太差！！！！直頭係劣食！！！！薯粉：佢係粗薯粉，好味道！毛氣旺本身嘅蒿荀，蓮藕片，芽菜同菇，份量都唔少，所以感覺好似幾抵食。而毛血旺嘅湯底味道都好好，加上唔會好咸，淡淡地。而我哋點咗嘅小辣又係可接受嘅辣度，所以其實都好易入口。小總結💬人氣食品炸饅頭係出色嘅！而佢嘅毛血旺各方面本來還好，但個魚蛋真係好出事！所以強烈建議小！心！點！配！料！不過餐廳仲有好多川菜，所以都會想俾多次機會佢，叫多啲朋友再試一次其他川菜。(滿分為🤤x5)好味指數: 🤤🤤抵食指數: 🤤🤤🤤回頭指數: 🤤🤤🤤…查看更多

近期香港興起食croffle，即係將croissant好似waffle咁，用waffle機嚟烘烤。本身已經好鐘意食croissant，所以croffle未食都已經估到會好好味！今次去嘅小店叫kroffle，留意返，openrice上地圖顯示嘅位置係⚠️⚠️⚠️有問題⚠️⚠️⚠️實際位置應該係元朗廣場內嘅KFC對出嘅巷仔！只要你搵到元朗廣場，再搵到地下嘅KFC，就會見到呢間kroffle！小店不設座位，但店外有小bar枱。店內嘅kroffle有分咸甜。因為始終係當下午茶小食，所以試點咗最基本嘅$32/2件basic croffle。$32只免費包#1-#5 一種經典醬，所以最後我+$3要多一款醬：朱古力醬加榛子醬。預製好嘅牛角包即點即放上窩夫機焗。幸好單唔算多，croffle好快就整好。醬係另上自己淋上croffle。鬆脆嘅牛角包，用窩夫機壓過後少咗空氣感但仍然保持脆口。加上即點即焗，成個croffle熱食都好出色！加上朱古力榛子醬mix埋更加無得輸！！！唔洗幾啖就成個croffle食哂！小總結💬Croffle香脆可口，食極都唔會厭！$32 for 2 croffle其實性價比已經算好高！如果出面餐廳食肯定唔係呢個價，所以好值得再返嚟食或推介俾朋友！(滿分為🤤x5)好味指數: 🤤🤤🤤🤤抵食指數: 🤤🤤🤤🤤回頭指數: 🤤🤤🤤🤤…查看更多

好多人都話肥仔米線好出名，所以今日專程去試吓。星期六嘅中午一點半，店內仍然full house，店外排隊等堂食同等外賣嘅人依然不絕。始終因為係小店，座位有限，所以喺門外排隊等咗大半個鐘先可以入座。雖然餐廳出名，但價錢合理夠平民，欣賞！一於試吓肥仔推介嘅豬軟骨，豬軟骨夠淋，夠入味，份量又剛好，所以都值得推介！至於食酸辣米線好多都都會點腩肉，肥仔嘅腩肉唔係譚仔嘅五花腩片，反而係似豬肉片，份量還好但有啲乾同鞋，所以唔太推介。2碗米線只點一個餸就係因為想試吓佢嘅酥炸排骨。即叫即炸，需時至少15-20分鐘！熱焫焫上碟，排骨所用嘅脆漿好特別，但嫌佢太大件，如果可以細件少少會較方便進食。而且排骨炸到根本睇唔到邊度係肉，邊度係肥膏，邊度係骨，所以整體感覺一般，無想像中出色。總括成餐肥仔米線，老實說肥仔酸辣米線嘅湯底係偏甜，即使只點小辣，酸味不足，反而食到好甜，所以有啲失望。加上可能點錯餸(?)，覺得佢啲餸唔算出色，炸排骨亦太大舊又唔多用。所以如果想食米線，應該唔會再返嚟排隊食。(滿分為🤤x5)好味指數: 🤤🤤抵食指數: 🤤🤤🤤回頭指數: 🤤🤤…查看更多

個個去德昌都係食魚蛋粉，但老實說，魚蛋粉以外都有一樣食品非常出色，佢就係：炸魚柳包。佢採用嘅麵包係意大利嘅ciabatta。雖然唔肯定餐廳嘅ciabatta係自家製定訂貨返嚟，但個人嚟講本身好鍾意ciabatta ，因為佢有意大利麵包酥脆嘅外殼，內𥚃就係充滿氣孔的麵包，鬆軟得嚟帶點煙韌。而當ciabatta 襯落肉類/海鮮做漢堡包咁食，口感就會變得好滿足。而每次點呢個魚柳包，佢都係即叫即做，魚柳食得出真係即叫即炸。再加埋沙律醬帶出炸魚柳嘅味道，全個魚柳包就變得剛剛好，非常出色！！非常值得推介！(滿分為🤤x5)好味指數: 🤤🤤🤤🤤🤤抵食指數: 🤤🤤🤤🤤回頭指數: 🤤🤤🤤🤤…查看更多