tingnah的个人专页

今日過咗灣仔行街，行到攰就諗住食個Tea ,見到利東街有間crepe delicious,之前已經試過旺角分店一次，幾好食，今次就決定再去試吓啦！我哋叫咗2個Tea set，加一個小食。Quattro formaggi mini puff pizza with french fries - 首先Pizza有啲似千層酥，外皮鬆脆香口，而啲餡料好多，再加上勁多芝士，食落去好香！薯條係我自愛嘅粗薯，炸得夠熱同脆！食到停唔到口👍🏻Roasted spring chicken with french fries - 先春雞外皮香脆，肉質嫩滑，雖然肉汁唔夠多，佢另外配上雞汁，用雞肉點返d汁嘅時候就變得好Juicy😋Arancini ball - 脆卜卜既球入邊包住芝士加飯粒，食落去口感豐富，而且好香奶油味，配上香濃嘅黑松露蛋黃醬，絕配！😍餐飲叫咗杯咖啡同pink lady,咖啡就一般，pink lady就類似士多啤梨奶昔，甜甜地幾好味❤️…查看更多

最近想搵間特別啲嘅主題餐廳去下，就上網search下，見到咦黃賭毒足球為主題嘅餐廳幾得意，同埋為咗就下老公，於是乎就揀咗呢間幾有特色嘅lockeroom 試吓！😊上到去雖然細細地，但都幾有足球氣氛，同感覺幾舒服，我哋叫咗兩個dinner set。首先沙律賣相有誠意，而且感覺乾淨，湯就一般，如果濃啲會更好。香烤美國熟成牛舌配青胡椒蘑菇汁- 賣相幾特別，牛舌外層脆卜卜，但入邊肉質好林，有雙重口感！👍🏻而且醬汁液好特別，咬到青胡椒時候辣辣地刺激胃口，越食越開胃😋香烤美國1855牛肉眼配法國鵝肝 - 鵝肝幾香，牛肉眼扒肉質鬆軟，配上醬汁好惹味😊餐廳整體來講感覺唔錯，而且位置方便，適合帶男朋友你朝聖下！…查看更多

雖然過咗聖誕，但都仲好有聖誕mood,總係覺得聖誕要食下炸雞，於是就去咗高質韓式炸雞店outdark食啦！位於尖沙咀嘅呢間分店方便，行完街就可以去食😉我地叫左：香蒜蜜糖炸雞（半份）$118雖然香蒜味唔算香濃，但蜜糖味好出！識落有少少平時bbq燒雞翼嘅風味😋而且份量都幾多，起碼有六七舊炸雞，配上唔同嘅薯條薯格，滿足晒食薯條嘅慾望👍🏻咬落炸雞好多雞汁流出，好juicy!😋海鮮辣炒麵 $108雖然個名叫炒麵，但係其實係湯麵，海鮮辣湯好好飲，最緊要係唔太辣，而海鮮亦幾多，有小八爪魚、青口、蝦等，份量夠大😉烤豬梅頭肉 $188首先肉質咬落去好鬆軟，而且醬料醃得入味！欣賞佢用鐵板上，食到最後都熱辣辣，金菇因為吸收左啲醬汁而變得好夠味！👍🏻我覺得完全唔使點醬汁已經好夠😊加多杯嘢飲已經好飽，每次嚟食都好滿足，大大碟質素高😍…查看更多

好耐冇食個放題啦！今日特登嚟到觀塘呢間大喜屋，聽聞佢好多嘢食，多選擇😆一入到去有一個好大嘅位任攞熟食，例如炸春卷、小丸子、田螺等，亦有好多沙律嘅配菜，最開心嘅係有好多飲品選擇！❤️其他嘢食就可以喺手機app落單，魚生方便都幾新鮮，值得推介嘅有赤蝦、三文魚、帶子刺身！👍🏻而熟食方面串燒牛舌、炸蠔、羊架、和牛火鍋都好食！壽司方面就一般，不過欣賞佢細細舊可以試多幾款😋咁甜品方面都好多選擇㗎，不過我最後都係揀咗佢嘅軟雪糕，奶味好香而且口感又滑，最好既係可以自己加唔同嘅toppings! 😍…查看更多

今日要慶祝拍拖記念日，所以特登上網搵咗一間有情調嘅餐廳❤️ 又想試吓新野，於是就入咗太和呢間西餐廳chill下😍首先入到餐廳感覺溫馨而高雅，好舒服。坐低之後就叫咗：香煎北海道帶子黑松露薏米飯北海道帶子煎得外皮香脆，肉質爽口，有雙重口感。而黑松露香濃，每啖飯都好creamy! 真係好好食！😋威靈頓牛柳賣相一流！半碟做得好仔細，吸引食慾，牛樓肉質柔嫩，外皮香脆，牛油味甚重，配合埋牛嘅香味，真係忍唔住食咗幾啖❤️焦糖蘋果雪糕蘋果雖然切得好薄，但都好爽脆，焦糖中和左蘋果嘅酸味，配埋雪糕口感特別！Sexy on tree特別推介呢杯mock tail ，係店舖嘅signature，本身平平無奇，但之後會變咗個大水泡喺上面，好得意！而且飲落有陣陣嘅果香，啱晒女士打卡😍…查看更多

因為好耐冇食過中餐，又想兩公婆坐得舒服啲二人世界下，於是就上網search左呢間高級嘅潮州菜館「金燕島潮州酒樓」，仲要米芝蓮推介添😆佢位於尖沙咀寶勒巷，所以極之方便！😉一入到去環境舒適，由於有訂位所以可以坐卡位，私隱度極高，而且店員服務態度又好，食得好愉快😍我哋叫咗：竹笙響螺頭湯呢個湯好好飲！首先完全冇味精，因為有竹笙同響螺頭，令到個湯非常清甜，鹹度適中❤️川椒雞球雞球唔算大粒，但係可以啱啱好一啖食晒，勁香辣油同辣椒味，但食落又唔係好辣，所以食幾多都唔怕👍🏻佢半碟嘅炸紫蘇葉超好食！脆卜卜好似薯片，同雞粒一齊食口感豐富😋香煎蠔烙呢個真係值得推介！首先勁多蠔仔，口感鮮嫩多汁，又唔腥，夾係薄薄地嘅蛋餅入邊，多到夾唔晒😊配埋雨褸同胡椒粉真係好出色！👍🏻👍🏻魚蛋紹菜煲估唔到魚蛋同魚片都可以咁彈牙！以上湯亦清甜可口！鴛鴦甜晶包係紅豆蓉同黃蓮蓉嘅水晶包，兩款嘅蓉都好滑，個人特別喜歡紅豆蓉，唔甜得來又唔膩😍福果清心丸豆爽呢個就比較甜，所以食咗兩啖就俾老公食😆但老公話以潮式甜品來講算做得唔錯😊總括嚟講食物質素好高，環境又夠舒適，所以真係值得再黎呀😋…查看更多

今日過海整啲嘢，順便喺天后附近食lunch，搵到間價錢親民嘅越式嘅，就以下一度嘅心態入去試吓。入到去感覺都算舒適，座位與座位之間都幾闊，我哋叫咗：意大利黑醋汁蒜蓉牛油雞翼首先雞翼炸得鬆脆可口，蒜蓉味突出，配上黑醋汁出奇地配合，酸酸甜甜幾好食😋法式咖喱豬頸肉油香飯法式咖喱比較香濃，有陣陣嘅蘿蔔香，而且豬頸肉肉質鬆軟，個人比較喜歡油飯同咖喱分開食，因為咖喱會蓋過油飯嘅飯香😉火五火車頭牛肉粉最正同值得推介嘅係呢個火車頭粉！首先大大碗料又足，而且湯底濃郁，牛丸爽口彈牙，牛肉亦好入味！🤗最正係有好多芽菜，真係好滿足！整體來講午餐幾抵食，個人推介河粉類！真係唔錯嫁！ ❤️…查看更多

今日帶個朋友仔去荃灣試新野，就係有得玩又有得食嘅任食串燒燒烤場！之前上網見到好似幾得意，有得自己即場捉啲蝦上嚟燒，又好似幾多嘢食咁。去到見到裝修幾新潮，感覺乾淨舒適，唔大煙味。佢係自助形式，自己出去夾嘢食。食物質素算唔錯，尤其係海鮮真係好新鮮👍🏻，而且款式多，海鮮例如魚，魷魚，白鱔，扇貝，花甲，蠔等等，串燒有雞牛豬肉，腸豬扒，丸類等。肉類味道都唔錯，醃得好夠味！😊個人比較鍾意食白鱔，虎蝦同扇貝，新鮮燒起嚟真係冇得頂！👍🏻😋總括來講性價比都幾高，仲要係任食，而且飲品種類好多，又有雪糕食，真係啱晒一家大細邊食邊玩！…查看更多

好耐之前已經食過一次，覺得性價比都幾高，今日難得又入開將軍澳，當然要再食啦！原來而家有優惠，6:30前入座，第二位半價！今次我哋叫咗澳洲和牛肩肉餐，一個係南瓜水軍湯底，另一個係雞白湯。先講吓湯底，雞白湯就似普通雞湯，反而有驚喜嘅係南瓜湯，南瓜味濃郁又清甜，而且入邊有兩隻青口同魷魚，所以幾抵食！👍🏻另外澳洲和牛肉質鬆軟，脂肪比例算平均，所以咬落一啲都唔「柴」口😋而阿古豬梅花肉亦好好食，切得夠薄，因而入口即溶，正😍其他配料方面，蔬菜好新鮮，尤其鍾意食山藥，唔係度度都可以任食。丸類方面，日本芝士丸同黑椒牛丸都好好食，值得推介👍🏻最後甜品梗係要自己整返個窩夫，配上雪糕同其他toppings, 真係好滿足！😍個人認為每次來大將都覺得好抵食，火鍋配料同甜品配料都好多選擇，真係值得推介㗎！…查看更多

今日去完黃金海岸個沙灘散步，就睇吓黃金海岸有咩食，發現有間「星小宴」，好似幾有情調咁，就係試吓啦。因為今日天氣清涼，就揀咗坐出邊望海位置，貪佢夠氣氛🤗我哋叫咗：羊腩煲首先羊腩煲好足料，勁多羊肉，肉質偏林，冇咩蘇味😋而且粉葛好入味，好好味！食完成煲暖粒粒❤️食完之後仲可以加水打邊爐，所以又叫咗啲打邊爐嘅配料，有鴨血、手打爽滑牛肉丸、爽口貢丸同鱸魚片。特別要推介嘅係手打爽滑牛肉丸，咬落去超彈牙，同好多汁，而且牛肉味重，真係唔錯👍🏻而且鱸魚片亦好新鮮，配埋羊腩煲嘅汁好好味😋其實黃金海岸真係幾有情調，可以坐出邊，成個用餐過程店員服務又好，真係好享受😍…查看更多

之前食過炑八嘅限定套餐，覺得幾抵，今日經過見到有聖誕節套餐，就即刻要入去試吓！我哋今次揀咗月見和牛奇妙套餐，好多牛呀😍😍先講吓佢嘅牛肩肉扒，好大塊，燒出嚟油脂特別香，而且肉質鬆軟，配上特別嘅醬汁（半熟蛋加甜醬），口感特別！👍🏻不過個人喜歡塊牛就咁加鹽就已經好好食😋而另外兩款牛肉牛小排同韓牛夢胸肉較厚身，咬落去好有質感！而且牛味重，有另一番風味😊特別有驚喜嘅係豬助肉，經過醬汁醃製，好入味！而且肉質比牛更鬆軟，真係食唔停口😋另外佢嘅蔬菜有南瓜同菇類，雖然款式唔算多，但都幾新鮮。總括嚟講計埋啲配菜無限添加，芝士同蛋都係，真係幾抵。仲有餐廳職員着咗魷魚遊戲嘅服裝，仲有得玩椪糖遊戲，贏咗送碟五花肉，可惜我整爛咗😆下次再玩過！…查看更多

今日去咗大角咀大全街附近整野，跟住發現原來呢條街有好多野食，就揀咗一間黎試吓！見到呢間酒燒弄裝修幾有特色，有少少懷舊feel，幾得意。我哋叫咗：烤和牛上肩柳配拉麵 $118牛柳肉質都幾林，又有牛味👍🏻拉麵都可以，醬油湯底，食完呢個都飽飽地😆另外都叫咗啲串燒，比較特別嘅係雞皮$23同厚切牛舌心$48。雞皮燒得香脆可口，雞油出晒嚟，勁正！而牛舌心肉質煙韌，好重牛味，值得推介❤️而燒秋葵$23都幾好，燒完出嚟嘅秋葵口感特別，外皮爽脆，混合咗少少炭香更吸引😋另外和牛橫膈膜$88 都唔錯，和牛燒得啱啱好，中間係粉紅色，所以外皮少少脆，但入邊好嫩滑，有雙重口感！最後叫咗杯巴打等熱情果梳打，食完串燒，飲番杯梳打勁解渴！正😄總括嚟講餐廳幾有特色，最正嘅係唔使加一🥰抵👍🏻…查看更多

有個住大埔嘅朋友推介左間區內唔錯嘅串燒酒吧，今日見得閒就去試吓。舖頭雖然細細地，但裝修別緻，幾有氣氛🥰介紹其中幾樣較特別嘅嘢食：蒲燒原條鰻魚珍珠飯 $118賣相非常好，而且份量幾多，鰻魚汁好香，配上珍珠飯好好味❤️石燒prime牛小排 $148舖頭好有心思，用咗酒樽當碟，勁靚😍牛小排肉質柔嫩，肉燒到粉紅色啱啱好，而且好有牛味，抵讚👍🏻紐西蘭羊架 $72羊架雖然賣相一般，但咬落有驚喜，肉質鬆軟得來又夠林，配上獨特嘅香料一齊燒好好味🥰串燒方面就叫咗幾款，特別要推介嘅係鵝肝串$68，串燒BB露筍$26同牛舌$28，鵝肝好香，入口即溶，蘆筍新鮮細嫩，燒完都唔「柴口」，而牛舌肉質鬆軟，燒得啱啱好😋最後叫咗兩支果酒，好易入口冇咩酒味，好好飲😍慢慢飲酒傾吓計食下串燒真係好寫意😎…查看更多

好耐冇去南瀛水產食嘢啦，一如既往氣氛好，店員服務態度又親切有禮🤗。上次去主要食魚生刺身，今次見佢有新嘅熟食，就試下叫啦！我地叫左：雜錦天婦羅盛合 $198包括天婦羅蝦、冬菇、茄子、魚、南瓜等，外皮炸得鬆脆，又夠熱，配上天婦羅醬汁，好好食！而且量都幾多，所以感覺幾抵食😊A5宮崎和牛壽喜燒 $438首先佢有8塊大和牛，和牛肉質超柔嫩，油脂分布平均，勁香😋然後個鍋勁大，入邊好多配菜，例如娃娃菜、冬菇、豆腐、芋絲等，全部都好新鮮！和牛粒炒飯 $168炒飯炒得唔錯，驚喜嘅係和牛牛肉粒肉質都好鬆軟，同埋大大粒有口感❤️唐揚炸雞 $68呢個值得一讚！首先賣相好特別，將雞炸成一個大雞球，咁就可以鎖住肉汁，好Juicy! 如果多啲沙律醬會更好🥰帆立貝刺身 $88刺身食落感覺新鮮，如果切得大粒啲會更好！燒物方面，就有帆立貝$78，蟹味增甲羅燒$78 同活鮑魚$78，店員好熟練咁係你旁邊燒，燒完之後即刻食，特別鮮味！特別要推介嘅係蟹味增甲羅燒，在鵪鶉蛋同蟹膏蟹子攪勻一齊食，鵪鶉蛋令蟹膏更香更滑，正❤️其實兩次嚟食嘅野雖然唔同，但兩次嘅經驗都好好，食物質素有保證之餘服務又好😊…查看更多

今日行開尖沙咀，發現原來山林道都幾多嘢食，行完一次之後就揀咗呢間JUST’er，一黎佢係食西餐，二黎上網睇到好似幾多人推介，就入去試下啦😆我地兩個人叫左：垃圾八爪魚 $48見個名幾有趣就叫咗黎試下。一嚟到埋上有驚喜，好似花咁，八爪魚仔咋得鬆脆可口，而肉質亦夠彈牙，配上沙律醬都幾好食😋水牛城雞翼五隻 $52雞翼醬汁甜酸辣度都適中，略嫌雞皮唔夠脆。不過雞翼大大隻都幾抵食😊英國國菜1997 $113其實就係炸魚薯條，整體來講炸魚同薯條都揸得好脆，尤其係薯條，勁香口😋而炸魚肉質唔會散晒，亦有陣陣嘅魚香，證明幾新鮮👍🏻醬油風白汁三文魚扁意粉 $112呢個值得推介！食落去白汁甜甜地有驚喜，而且亦好creamy!三文魚粒都好多，抵食👍🏻最後叫咗杯岩鹽櫻花奶昔，甜度適中，少少岩鹽帶出櫻花嘅香味，好適合女仔飲😉整體來講性價比偏高，食物質素高得來價錢又大眾化，如果座位闊啲會更好，就可以坐耐啲慢慢享受美食。…查看更多