迷妹公主Karson的个人专页

韓國韓印紅新開嘅韓式餐廳嚟咗香港喇！主打多種海鮮鍋類同人蔘菜式，款款都咁吸引。職員服務非常好，好多都係韓國人，會主動介紹啲菜式種類同埋主動幫手。服務超級周到！同埋唔使怕同韓國職員溝通唔到，佢地好多都識講英文同廣東話，亦都有本地嘅職員幫手㗎！啲嘢食都非常好食，款式又多，特別係個炸人蔘魷魚同蟹鍋，兩個喺出面都好少見。人蔘魷魚好入味，蟹鍋好鮮，非常推介。三文魚沙律嘅味好特別，酸酸甜甜咁，喺出面好少食到呢個味道嘅沙律，下次再嚟會再食呢幾款菜！…查看更多

放工約咗朋友喺中環食飯，被呢間湖水綠外表嘅餐廳吸引著，於是抱住嘗試心態入去試下。餐廳有兩層，下層就對住門口，會有啲熱，上層就私隱度高啲，同埋裝修擺設都睇得出有花心思落去。講返食物，有水準，睇得出對食物有要求，非常驚喜同滿意！香辣炸雞漢堡呢個必試！中間層炸雞脆得嚟又唔會好膩！同埋其實唔係好辣，呢隻辣係接受到嘅。不過一個人未必食得晒，女仔嚟可以兩個人share一份就啱啱好。薯條就同出面嘅差唔多，正正常常。蒜香橄欖油大蝦扁意大利粉呢個都好推薦！同出面嘅橄欖油意大利粉唔同，佢無咁油膩但好有橄欖油香，啲蝦都煎得剛剛好，唔會太老。黑松露忌廉雜菌意大利飯黑松露控嚟到可以試呢一個，啲Risotto口感煮得好好，唔會話好淋身。啲雜菌都煎得好香，仲有少少脆口。重點係啲黑松浸味真係好香，唔會好似出面有啲餐廳嘅黑松露飯咁咁攻鼻，同埋啲忌廉一齊煮真係好夾！Hidden Coconut呢杯野不得不提，有驚喜，啲味調配得剛剛好，唔會太重酒味但又有啲甜味。本來仲以為cafe嘅cocktail會好普通，無諗過都整得好好！Camaricano其實即係士多啤梨酒再溝其他嘢，酒味有點重，唔太飲得嘅都係叫返其他飲品好啲。雜莓PancakePancake底好重牛油香，但食完唔會話即刻覺得好飽好膩，正！啲果醬味道都剛剛好，莓味夠，唔會太甜又唔會話好淡味。蟹肉班尼迪蛋配牛油多士班尼迪煮得好好，唔會太熟，有流心！牛油多士就好夠牛油味！前菜叫套餐就會有前菜，係Parma Ham配沙律菜再加黑醋汁都幾好味！…查看更多

難得同朋友入嚟元朗，就查下元朗有咩好野食。見呢間台灣菜就排喺第一位，所以我地就特登避開繁忙時間過嚟呢邊食。嚟到見到呢間舖頭有兩個舖位，座位都尚算鬆動，今次就試咗最多人推薦嘅肉鬆芋泥吐司，再加紅燒牛肉麵同魯肉飯。食完呢幾款野食之後都有同一感覺，就係名過其實，可能係好評太多令我地期待過高，不過整體上都叫做可以滿足一吓掛住台灣食物嘅欲望。不過如果下次嚟排隊遇正人多嘅時候我諗我地都未必會排了。肉鬆芋泥吐司：店舖內嘅招牌菜，一個人食會有啲飽，建議同朋友兩個人分一份。味道幾好味，肉鬆同芋泥都有味，但有啲啲乾，需要配飲品。魯肉飯配台灣香腸：就係一道好普通嘅台式魯肉飯，唔算話特別好食，勝在夠飽肚，同台灣嘅都係有一點點距離。紅燒牛肉麵：就係一碗賣相同味道都非常普通嘅牛肉麵，牛肉有少少鞋口，不過湯底都同台灣嘅有啲似，所以都尚算不錯。…查看更多

趁住生日同屋企人嚟試試呢間日本A4和牛燒肉放題，$388加一呢個價錢食到A4嘅和牛放題我覺得算係相當超值！其實本來對呢間餐廳真係抱住一個嘗試嘅心態，因為普通嘅燒肉放題真係食得多，但和牛放題真係未試過，仲要呢個價位嘅。所以一開頭真係無咁高期待。我哋5點開始入場，呢個鐘數無乜客人所以即刻就有位坐。環境唔錯，唔會太大油煙，但啲座位有啲污糟，可改善。一埋位，職員就極快手咁拎左一碟 A4和牛拼盤俾我哋，仲好貼心咁係上面加左標籤。爐都好夠力，唔使等好耐個爐面就熱晒。由於個爐夠熱，所以其實每塊和牛都係燒2-3分鐘左右就食得，但一定要睇火，唔係嘅話就好易燒得太熟，韌晒就唔太好食。仲有一樣野值得一讚嘅係，呢間餐廳係點幾多就俾幾多你，唔似得出面某啲餐廳咁會偷偷地扣你幾舊。呢度係叫十件就真係嚟十件，呢樣野係我最估唔到，所以最後食到有啲飽得濟，哈哈。另外要讚嘅係佢地嘅上碟速度極快，基本上落order後五分鐘內就會送到，非常出乎意料。講返啲和牛先，雪花均勻同幾靚，燒到7-8成熟嘅話就有入口即溶嘅感覺，牛味好夠，好好食。最推薦嘅係牛三角，牛味夠之餘啲油脂味勁香，仲要入口即溶，我哋都encore左好多round。仲有其他肉類海鮮都試左少少，但佢好多野都要同香草牛油一齊拎去燒，我本人就麻麻麻香草牛油浸味，有啲濃味，食完要飲幾啖野都未必沖得走浸味，呢樣係美中不足嘅地方。 但其他嘅食物大致上都係正常水平，羊架都好抵食！飲品同甜品方面就普通左啲，都係個啲罐裝飲品，但呢餐主角係和牛，所以都唔係好介意。但佢甜品個度就孤寒左啲，每個人只限叫一份，仲要係普通維記雪糕，其實唔係好care甜品食啲咩，因為只係最後用嚟清清個口，但限左每人一份件事就有啲唔好睇。呢間餐廳我地一定會再嚟！…查看更多

仲記得好細個成日都會買屋企附近嘅粒粒雪糕，但之後除左係韓國就無再見過了。無諗過今次係長洲可以見到佢嘅出現，老闆人好好，好有禮貌，雪糕嘅質素同我之前係韓國食到嘅一樣，個口感好特別。加上佢有唔同嘅味可以選擇，我就試左波子汽水、曲奇同棉花糖，波子汽水同曲奇都好好食，棉花糖味就普普通通。舖頭仲有其他野食可以揀，但我地已經食左飯了，就無試到，舖頭出面仲有位可以坐係條街到，一邊望住條街、一邊享受食物，下次有機會一定會試埋其他野食！…查看更多