Hugh1128的個人專頁

賢記清湯腩｜全港最癲清湯脯！話說元朗大街後面條巷仔真係臥虎藏龍，呢間賢記門面似足舊式粉麵檔，入到去即刻比陣牛骨香勾咗魂！之前聽朋友講話佢哋朝早五點半開爐吊湯，用足料牛筒骨加數唔清幾多斤牛腩熬到湯色金黃，最癲係用騸牯牛，飲落喉嚨尾果油香真係其他清湯腩舖冇得比！飲完成個喉嚨暖笠笠仲有陣回甘，同某啲落重胡椒遮羶味嘅舖頭完全兩回事！叫左碗牛腩河，腩位分得夠晒刁鑽。崩沙腩肥膏位閃令令，咬落似食緊牛脂啫喱；坑腩連住筋膜位爽到啪啪聲，最正係啲肉淋身得嚟仲keep到絲絲纖維，浸完都唔會散！牛味濃到似食緊和牛刺身級數！重點嚟喇——嗰啲新鮮手帶牛成粒乒乓波咁大，同埋佢哋嗰個自家製嘅辣椒油真係不得了！成粒牛丸跟牛尾濃鬱得嚟係有層次呀,彈牙就唔使講啦,但牛肉牛腩牛丸食完你會有唔同牛嘅味道,你就知道人哋落咗啲功夫喺邊度！見到隔籬枱個熟客柯打「雙腩加底」，跟風叫多份牛爽腩，嘩！真係腩界天花板，半肥瘦位夾住層啫喱狀膠質，入口即刻化成陣牛油香，連平時唔食肥膏嘅女友都搶住夾。埋單兩個人食到捧住個肚都係$200有找，今次真係中咗清湯腩毒，食完第二日已經心思思想返轉頭！結論：由湯底鮮味到牛腩質感，呢間絕對係香港清湯腩嘅隱世天花板。某啲網紅店排長龍果啲，同賢記比真係差成條彌敦道。食勻全港十八區，敢講句——清湯腩王者，非賢記莫屬！（利申：食完即刻encore多碗外賣返屋企孝敬阿爸） #元朗真味 #清湯腩界MVP #食過返尋味系列…查看更多

有d菜色就係一餐飯的重點，係「一件事」，食片皮鴨就係「一件事」。呢件事係一個人做唔黎的，一定要約班朋友（個人覺得最少都四個人）,而且好食的片皮鴨餐廳一般都要訂位，好似呢間羲和雅館咁，一直想食但又冇咁神心去訂台，所以遲遲都冇試過，直到呢次疫情，終於唔洗book台可以walk in食啦。講開呢間餐廳,環境就真係一流，裝修現代而且間隔合適，每枱都有自己一個合適的空間，岩晒鍾意唔會同人迫的人。另外就係中餐一般俾人印象就係好嘈，因為除左人聲好大之外，杯碟碰撞聲都真係會令人心煩意亂，但呢d都冇係呢間餐廳出現，值得一讚。片皮鴨相信好多人都食過，所謂的一鴨四食近乎都係千篇一律，不外乎就係鴨湯，片皮，抄鴨肉絲，整埋個抄飯，唔係話唔好，物盡其用又食得飽你，但其實除片皮外果三食都係沒有特色平平無奇咁。但呢間的一鴨四食就真係估佢唔到，因為佢竟然片皮都佔左三食（拿，你可以話佢取巧，但事實人地又真係整到出黎俾你三種完全唔同的體驗）例牌鴨就係你面前切，佢切得唔算快，但唔係因為刀功唔好亦唔係俾時間你打卡，而係剛才講的要片皮都有三種食法所以個切法又同其他片皮鴨唔同，唔講咁多又睇下張成品圖先啦！由左至右有三種唔同的片皮，最左果邊係大家最常食到的皮連肉（事實上應該都同大家食開的有唔同，因為佢皮肉油脂比例她靚，只用脾肉）而另外兩款就係鴨胸肉同鴨皮，食的次序由最右開始食到最左，頭兩款不用皮來包，但食法配的醬汁都真係好唔同。最後一食係咩呢？估你唔到竟然係炸鴨骨，第一次食到，開頭以為冇乜肉有乜好食，但原來骨炸到脆連少少肉，食落香口唔油，送酒真係一流。其他小菜都很出色，特別要講隻雞翼，能夠幾麥芽糖完全煮到汁的狀態真係好花功夫，而且唔會死甜，雞翼亦有先炸過，真係要趁熱食，食過返唔到轉頭。食飯飯聚，係呢個時勢真係變得好奢侈，所以揀岩朋友揀岩人的，一定係要搵間好食的餐廳食下。…查看更多

一般聽到話食鮑參翅肚都會起中式高級酒家，一圍圍咁坐住。但係呢度係完完全全另一種玩法，第一次跟地圖行到鋪面的人都一定會懷疑自己有冇行錯路。無錯，就係咁樣一間賣乾貨的鋪頭（感覺仲好雜添，因為又有酒又有罐頭）入到裡面就仲奇怪，間鋪細到一眼睇晒，左邊就全面牆都係舊酒，右手邊就好唔夾咁有幾張卡位，D卡位其實迷李到似香港舊冰室，真係你身材肥少少都好難坐入去。其實到呢一刻都仲係覺得呢間咁的餐廳會唔會好伏的，你覺得成個格局佢賣公仔麵都有D唔穩陣，仲要係鮑參翅肚，有D野唔係平就得的喎。本人一直都覺得如果俾100食垃圾的話，我寧願俾500食好西。但講多無謂，都黎到咪唯有跟朋友試一次啦。首先，你估唔到係份MENU，真係她膠好平民，一堆無設計的A4過膠紙，排滿晒好誇張的菜式，其寶係有D難睇難揀的，有選擇恐懼的真係要搵定目標先好入。其次，上菜速度又真係比想像中快，可能就係因為一眼睇番係做4台客的關係。好啦，直接去菜式呢個係精彩，又係估你唔到，賣翅的地方好多人行入一黎第一件事問老闆的係仲有冇蕃茄， 食果日真係就有一對客人入黎問左冇就話下次再黎，真係好有妹仔大過主人婆的感覺。當然， 我食完之後都好明白點解會咁。一來真係好食，微酸帶甜，蕃茄都咁有層次， 真係唔講得笑。二來，呢個小食簡直係一個人打晒全場，點解？因為一開波唔洗講佢梗係用黎開胃啦，，到中段佢又起到中和重口味的效果， 到尾作為甜唔飯後果又係一流，所以真係唔好一開波就食晒碟野。主角鮑參翅肚，水準之作，你期望食到應該有的味道同唔質佢都有，唯一值得提的係份量，呢點你睇相都明，唔需要點講。性價比超高。反而呢個龍蝦伊麵真係要講下，圖中係全隻龍蝦份量，168餐牌的係半隻，真係好抵食而且重要係呢D菜最緊要熱食， 一煮完就起， 真係唔可以唔試。伊麵 一凍左就硬，龍蝦汁一凍左味道又變成太濃， 但呢道上菜時仲係滾緊，呢種狀態的伊麵真係未試過，試左好難返轉頭。…查看更多

初體驗係好重要正所謂的第一印象好多時都會變成終身印象。由於人生第一次食生蠔，真係食完肚屙幾日，一直都怕怕。以後食蠔都係唔熟唔食。但係由於食朋友飯局，佢大力推薦呢度食野，話唔食蠔都可以食其他，結果就改變左對蠔的睇法。首先呢度有所謂的特價生蠔，十蚊隻，之前都試過有其他地方的鋪頭做呢個優惠的，但係價錢真係反映質素，本身就冇期望，但黎到的南非蠔，真係除左係細隻d外，食落口果種creamy同厚肉又點會似十蚊，而且海水味適中。朋友同時叫左隻最貴的法國生蠔俾我試，外型真係標準的靚生蠔樣，大小適中，飽滿靚仔，而且蠔殼上仲有個Q嘜認證，睇落去都真係好高級。味道當然就冇得輸，而且第一次明白點解ｄ人話生蠔係有層次，原來靚野真係吃得出，ｄ味入口之後不斷有變化，亦明白點解食生蠔配酒真係一流。餐廳另一個好好的位係，佢每隻生蠔都幫你切好起左肉，方便一口就可以放晒入口，唔洗自己係咁刮刮刮。每當你食完一盤生蠔後，佢地就會問你再加唔加？而且原來十蚊生蠔係可以無上限任叫的，真係食生蠔的人的福音。當確認左你地食夠生蠔啦，佢地先會開始上熱盤，呢樣野我覺得好重要！凍熱野食的次序一錯，其實真係浪費晒ｄ野食我地果晚仲叫左佢地推介的炸啤酒薯條，頂，真係好好食，依家打番食評都已經又想食。炸豬手又係一流，其實個牛油果蟹肉沙律都好正，只係個份量你都見，幾個人分的話，一啖就冇，但又未好食到要叫多個。…查看更多

向來都覺得熟食市場唔會有什麼出色作品，而且一般環境本身就不太理想，所以聽到朋友推介去咩熟食市場食好西，一般都敬而遠之。但今次係由一位識食的朋友推介，而且又好近屋企，所以就試下。餐廳裝修就真係冇乜特別，不過其中一間房內的poster係幾懷舊，睇番牆上的報導先知間野原來都幾耐歷史，而且係後來先搬過黎觀塘呢度。朋友一口氣推介左佢個黑豉油系列，星馬野黑豉油真係唔可以唔試，而我仲揀左佢寫住招牌的大細腳黑豉油撈麵。豬腳雞腳都好林，黑豉油汁濃郁香甜，係重口味之選，日日食就唔得，但間唔中就會想回味的味道。另外不得不推介的一定係豬皮同蠔仔。豬皮真係啖啖骨膠原的感覺，而且非常乾淨，一條毛都冇，最怕食到豬皮有毛。蠔仔鮮甜，而且有一個豉油醬俾你點，畫龍點晴。最後不得不試的仲有佢地杯拉茶，非常好飲。…查看更多

剛在港島做完野，朋友建議食日本菜，用手機搜尋了一下然後揀左呢間小店一試，貪的就是地方細而且位於寧靜一角，可以安靜放鬆咁食飯，其實對香港人黎講唔易。餐廳有一個對街的大窗可以打開，現在秋涼非常通風，爽。午餐提供的set都是丼，朋友分別點了燒鰻魚丼及雜錦刺身定食，我就唔想食飯，所以點左主menu的菜色，分別點到花魚一夜干及幾樣串燒，由於餐廳做緊推廣，所以我們一行三人點左半打生蠔（一隻$10）生蠔肉甜，肉質飽滿，有淡淡海水味，非常抵食。燒鰻魚丼，鰻魚肉厚，醬汁濃度合適，咬起來仍有肉汁，火喉控制得宜。雜錦魚生定食，有成七款魚生，款款新鮮，魚生厚切，超仁之選只係$158。花魚一夜干，經典日式菜，穩定高質，唔想食飯，配杯酒就一流，不過餐廳暫時未有酒牌，要飲的暫時要自己帶黎。總括黎講，抵食有質素小店，西營盤又一小確幸，九龍區都有多d就好。…查看更多

朋友住西貢一直都推薦呢間小小的麵店上星期又突然凍幾日，於日就搵左晚去試朋友推薦的胡椒湯底揀左雞肉再加凍豆腐，然後要左個粗麵條（粗幼選擇非常多，但朋友推薦叫我食寬麵條）麵質好彈牙，香口有質感，完全唔係普通麵條可以比（下次有機會再試埋其他麵條）雞肉份量適中，唔算太多但夠食，肉滑但唔算香，應該都唔係新鮮雞。但重點真係個湯底，非常好飲，好香而且唔係味精湯，一流！胡椒唔太辣，而且佢好好味，外面未食過呢個味道。食完成個人暖晒咁走，好滿足，我估以後都好難食番d連鎖米線餐廳啦！…查看更多

熟識搵食的朋友都知道大角咀一帶係好多好野食，價錢又唔太貴，所以成日都會去試下大角咀的小店。昨日如常同同事放lunch去搵食, 行到利得街竟然見到呢間新餐廳不經不覺間開了幕，從外面望入去真係有d靚到唔敢入，因為睇上去完全唔係一間會開係大角咀的餐廳，好在門口就擺放左當日的lunch menu, 一睇之下，價錢又完全唔貴，於是同同事決定試下新野行入去。原來餐廳真係試緊業，正式開張的日子好似係四月，但依家餐廳提供的野食選擇已經非常多，午餐有六款選擇而且提供前菜同餐飲，亦有素食選擇，順帶一提佢地的餐飲選擇非常多而且特別，同事見到都好興奮（因為日日都只係飲開檸茶檸水之類）最後我同同事揀左兩款野食，大蝦意粉同嫩煎半雞。點餐過程相當奇妙，因為待應的裝扮同態度都完完全全係高級餐廳的水準，搞到我都唔好意思，而同事（女）仲係咁望住人，搞到人地都唔好意思（花痴呀～～春天呀～～）。前菜原本以為都係沙律類，點知見到時真係完全唔知係咩野，竟待應解釋原來係蟹肉呀.......真係完全估佢唔到俾蟹肉做前菜你食，賣相根本就係去高級餐廳叫野食的賣相，估唔到午餐前菜都做番一樣的水準，蟹肉份量相當多而且十分新鮮味道濃郁，上面加左個唔知咩野汁同埋少少的芝士，連埋底的脆片一齊食，口感非常好，值得一試。（雖然好似冇得係menu就咁叫）同事的意粉上左先，一見已經覺得有d後悔冇叫到，因為賣相真係好吸引，而且香味十足，係聞到已經好想食，意粉的份量唔算好多但食落非常好食，好想知道係唔係自家整的麵條，因為同平時食開的真係好唔同。而且佢地雖然係叫大蝦意粉，但佢地個汁的香味係好似食緊龍蝦意粉的味，大蝦亦非常新鮮彈牙，整體質素完完全全超越左呢個價錢應有的質素。我點的半雞隨後亦到，點的時候係純粹因為見到有雞係最飽所以點呢個，但係都一直擔心精緻餐廳的份量應該唔會太多，唔知隻半雞會有幾大份呢？到上菜的時候我就知道擔心係多餘的，因為隻雞真係好大隻，見到隻雞上的時候個賣相已經相當有驚喜，個雞皮係睇得出的脆，但又唔會同肉完全分離，雞肉的部份仲有少少的微粉色，生熟程度係剛剛的好，肉汁相當多，肉嫩（完全符合商品說明條例）而且份量相當大，唔知係唔係剛開鋪關係，待應竟然會同我主動介紹菜色，話隻雞係傳統的磚頭雞的做法，用重物壓住隻雞黎煎，所以可以令到佢保留咁多肉汁（其實我初時係以為佢地隻雞係部份用左慢煮，然後先再煎）。餐飲同事叫左杯士多啤梨乳酪，同事話好飲但偏甜少少，而我就試左佢地杯美式咖啡，咖啡豆非常香，水準都相當好。…查看更多