JoanneJoanne7045的個人專頁

呢間算是荃灣區老店，裝修後再開仲加咗其他食品，不過老闆仍是以前嗰位。果日我哋得兩個人，叫唔到好多，不過都食得滿足，已經諗定下次要食咩。重慶酸辣粉，係男友點的，水準依然靠得住。我食唔到辣，點了雲南米線，個湯底唔錯，食完都仲要飲多幾啖湯。配菜揀了好多種，全部無伏，份量足，有幾樣仲特別好食，豬腩片係又爽又滑的口感，唔係鞋拾拾的；牛腩夠稔又入味，好食過好多車仔麵嘅牛腩；鵝腸估唔到咁正，唔係漂到無晒味果種，口感好又有鵝腸的靈魂香味，喜歡食鵝腸的一定要試。 之後再點了其他小食試下：⭕️蒜香焗生蠔，好大隻，咬落去Juicy有蠔味，蒜香更加無得輸。⭕️燒白鱔我哋想點時app上找不到，原來係因為剛剛返貨，仲切緊穿緊，真係好新鮮，火喉剛好，彈牙脆皮。⭕️鐵板牛舌，份量足，鐵板上枱香噴噴，成為全場焦點，隔離枱都望住🤭，牛舌有咬口，洋蔥爆香過的，個汁亦十分好味，連洋蔥都食晒，其實已是小菜水準，十分抵食。⭕️涼伴墨魚頭夠爽夠鮮，蒜香十足，下次都會再點。⭕️燒羊架，睇相就知好食，火喉剛剛好，味道是恰到好處，唔會太多孜然，其實我好怕串燒樣樣嘢都同一個味，但係呢度唔會，令人樣樣都想試。 下次我想食鰻魚石頭鍋飯，因為見到隔離枱食緊，鋪滿鰻魚，上枱時熱辣辣好香😋。社交平台上見到原來呢度有派暖心米線俾長者，喺而家市道艱難時期仲回饋老人家，係值得支持既！…查看更多

已經食過三次覺得都唔錯，但之後睇返openrice，原來好多負評，相信係而家已改善不少。讚：服務算唔錯，有禮貌的，係晚飯時滿客就顯得有點人手不足，但都可接受。餸菜標價算正常，其實最貴係收茶錢，好似11元/位？仲要加一，限時1.5小時。好好味的項目：波士頓龍蝦伊麵底、客家鹽焗雞、乳鴿，食過兩次，兩次都好食，份量足。爽爽肉炒菜花：味道都唔錯，係微辣的。客家豆腐：係用盒裝豆腐，有點失真，味道OK。之前有食過蒸筍殼，魚的size不欺場，夠份量，火喉OK，魚夠滑。最唔好食係梅菜扣肉，上枱唔夠熱，已大大扣分，點菜時店員説有6片肉，但肉切得太薄，份量好少，下次唔會點。呢度用砵仔蒸飯，但個面硬曬，唔知放出嚟幾耐，如果咁樣出，不如用返電飯煲煲飯，有order才裝上碗仲好。希望店家睇到會改善下。…查看更多

原本只係食個午餐，唔諗住影相，但食物質素真係……，希望老闆睇到，出品有問題，自然就無客，星期日下午一點都只係坐得一半客。午餐焗牛脷意粉：全部幾件牛脷都竟然無剝皮，直接俾客食，圖1我已經咬走半圈的皮才影相，圖2脷尖的皮都唔剝！我自己都識煮嘢，牛脷層皮唔剝係好核突、噁心，唔係剝唔清，係件件都有皮黐住！我諗真係全港都無一個廚房會咁樣出俾客食！意粉係非常之稔，雖然對茶記唔會要求高，但啲意粉仲稔過大X樂，似幾十年前的快餐店水平，真係好懷舊！另一個午餐係點了炒飯，點了唔夠兩分鐘就上枱，唔熱，只係溫溫哋，明顯係炒定一大盤，有order就上碟，但係可唔可以整返熱少少才上枱？一係保溫做好啲吖！真係衰過食兩餸飯，兩餸飯都熱過坐餐廳食，但價錢又貴過兩餸飯，咁點會有客回頭？抵讚嘅係樓面哥哥好有禮貌、勤快，見到燒味好靚，應該好食，但廚房咁差真係要改善！…查看更多

大半年前幫襯過，今日再到這區，記得是幾好食，所以再來晚飯。不過今次有兩個菜就中伏，寫落嚟俾大家參考。芋頭臘味炒飯：點了唔夠幾分鐘就上枱，心知不妙，仲見到幾舊無炒開的白飯飯團（睇相都見到），真係太離譜，就算唔係即炒，都唔好咁求祈吖！炒飯只係微溫，唔係熱的，擺明係炒定一大盤，就咁上碟，晚市剛開始，就已經上啲唔熱嘅炒飯俾客食，劣！炸蝦棗拼炸墨魚餅：如果唔睇餐牌，係估唔到自己食緊名為蝦棗和墨魚嘅嘢，一丁點蝦同墨魚都感覺唔到，唔彈牙、唔知係咩，淨係食到有些爽口的粒粒，食一粒已滯，完全唔想咬多一啖！中大伏！以為呢啲係潮州名菜，點知原來係咁！有無人可以話俾我聽，潮州蝦棗同墨魚餅係唔係無蝦無墨魚㗎？？！其他小菜算OK，避開伏菜，仍是可以光顧的。…查看更多

這店同一條街開了三間店，新店大好多，坐得更舒服。食物質數不用多說，開了第三間，就知唔會差，新店保持水準，海鮮寬意粉的香蒜牛油汁夠香好味，海鮮有魷魚圈、青口、蝦、蜆、小貝柱，份量也夠。豬胺扒都唔錯，飲品同甜品都好味又靚。店內侍應人手充足，而且個個都好有禮貌，見阿仔一個大背囊同球拍，馬上拉多一張椅俾佢擺袋，餐桌服務也很到位，枱面清理及時，侍應都好勤力，仲要面帶笑容，十分抵讚，而且係無加一的，呢餐食得好滿意！…查看更多

星期六晚市滿座，最滿意係侍應的服務，咁忙咁多客都快手快腳，有一個菜已到，侍應問了知道我們點了一煲蕃薯飯，就幫我們跟進，回返我哋等多三分鐘就OK，因為係即整，好有交帶，之後再點了一個白飯未到，一追就馬上裝好送到，十分抵讚。餸菜都是好味的，熱辣辣即炒，但普遍分量就較細，最離譜係茶油炒土雞，份量少得可憐，門外的海報仲要寫住「滿滿一大盆才 $158」，十分誤導，盆是大，但盆只裝了3份1，配料很多，雞切得零碎，3個人食也覺得少。如果要食雞，不如食烤雞，一隻好像是$148，雞也是細隻那種，但起碼見到有一隻雞，好過那一盤炒土雞都唔知有無半隻。如果唔改善，相信好快 keep唔住啲客。…查看更多

星期六下午兩點幾去到，因為附近其他餐廳都排隊，見呢間唔洗排就試下，喺門口已見到有吉枱 (大枱)，吧枱都有位，店員話有張二人枱執緊，叫我哋等執好才入，點知等了一陣有另兩個人取了飛，店員就竟然叫我哋都取飛，明明係話執好就入得，而家變咗排第二，之後店員問我哋，有吧枱坐唔坐，咁我哋就話OK，點知問完我哋後，佢又去問攞了飛的那兩個人，對方又答無所謂，店員就話因為人哋張飛係先的，所以要俾對方先，咁你就唔好走嚟問我哋啦，我懷疑佢發緊夢都唔知自己做緊咩！ 入座後點了餐，足足等了廿幾分鐘才上餐，當時只約有6-7成客人，都要等咁耐，仲要限時一個鐘，仲要食物都唔係熱的，咁先至激氣！唯一OK係天婦羅夠脆身，但係入面是暖的，最離譜個天婦羅汁係冰凍的，從未見過係用雪凍的汁，點完汁後，外層是凍，入面是暖，真係唔知自己食緊咩！麵豉湯勁咸，我朋友都算係食開重口味的人，都話好咸，鰻魚飯同樣係唔熱，只係暖。另一差勁食品係所謂的和牛烏冬，其實都預咗只係肥牛，邊會有和牛俾你食，但連烏冬都差就真係劣！烏冬明顯係一早已煮定，我要用筷子摷散啲烏冬，因為已結成一舊舊，碗好細，湯好少，混在唔熱的烏冬中，整碗嘢只係溫溫哋，最勁係可以煮到啲烏冬好稔完全無咬口，收呢個價錢，用嘅唔係急凍烏冬，細細碗都要用cheap cheap 烏冬！ 我個餐是包甜品，原來係一小碟水果，但無餐具，問侍應攞，佢嘅覆回係：「我哋無叉喎，枱上有牙簽！」真係估佢唔到。服務唔洗講，梗係無啦，隔離枱叫斟茶，兩張枱咁細咁近，我哋兩杯都飲晒都唔會順便斟埋！一個set連加一要HK$180多，但食物係food court 質素，亦無服務，仲要限時一個鐘，無人排隊真係有原因㗎！…查看更多

三個人去，兩個食得辣，我就只可以小辣，所以就我點了小辣中麻的毛血旺江團烤魚，再加了豆花、海苔響鈴同黑牛柏頁，仲有乾鍋紫蘇田雞。⭕️毛血旺江團烤魚個鍋上枱時滿滿食材，十分足料，毛血旺有鴨血、午餐肉、黑牛柏頁、土豆片、蓮藕片，江團魚也足夠三人食，小辣辣度剛好，唔會太淡，食到辣也夠香。⭕️豆花一定要點，豆味香濃，食後豆香留喺口中久久不散。⭕️海苔響鈴雖不是即炸，但用嚟吸湯汁食，也十分滋味。⭕️黑牛柏頁火鍋必備，爽口⭕️乾鍋紫蘇田雞田雞用薄粉炸過再炒，外微脆肉嫩，紫蘇香，有水準。⭕️至尊水果茶、芒果沙冰足料又好味，解辣，食辣嘢絕配。⭕️服務幫我哋影相的小姐姐，十分nice有心機，我們一家三口的合照影得好靚，而其他服務員都好主動，見到少湯就主動加湯，個火食到剛剛熄了，佢仲快過我睇到，主動加燃料，好細心，抵讚。因為只得三個人，食完以上已經飽飽，下次要再試其他😊😊…查看更多

見到成日有人排隊，以為好好食，試完只覺普普通通，唔值得去排，座位好窄好迫，入座一張二人枱，張枱又窄又短，中等身材坐落去，會掂住對方膝頭😅😅 ，如果唔識嘅，真係好尷尬，影相要用廣角才影到，可以想像到有幾窄🤣🤣雞白湯拉麵，最大問題係湯唔夠熱，拉麵口感OK，湯有點鹹，伴麵一齊食還可，淨飲飲不下，太鹹，仲有啲似金華火腿的鹹味🤣🤣，食完口渴。雞肉同豚叉燒都係慢煮，我哋仲追加一份豚叉燒，做到軟嫩口感，但味道普通無驚喜，溏心蛋正常發揮。由於湯唔夠熱，我哋都趕快食完，半小時完成晚餐，埋單走人。…查看更多

呢間都算成日幫襯，但最近兩個月，外賣湯餃啲湯越嚟越少，啲湯浸唔到餃子，餃子好易變凍，而且湯係標榜可以飲嘅湯（粉葛鯪魚湯），點解唔俾返正常湯量？其實外賣已經慳咗座位同招呼，仲加了外賣盒錢，已賺得多過堂食，就唔好俾唔足！呢間只係比同區嘅豐信餃子平一蚊，人家外賣都唔會扣湯！…查看更多

好耐無食炑八了，今日去黃大仙呢間食，1：30去到都差唔多坐滿了，仲要好多枱都食烤肉，可能因為係星期六可以慢慢食，不過我都係掛住呢度嘅鷄扒蛋包飯，睇下咁耐無嚟有無退步先。⭕️ 鷄扒蛋包飯真係好吸引，無退步喎，鷄扒煎得香，鷄皮一定要食埋，48蚊包湯包前菜，性價比超高。⭕️ 芝士泡菜五花肉拌飯阿仔最鍾意食呢個，小辣夠入味，五花肉嘅份量好似仲多過以前。全餐加了一杯柚子蜜梳打，埋單只係$118，平過茶記又坐得舒服，唔怪得咁旺場。望到好多人食燒肉，下次都要試下先😊😊…查看更多

一向嚟呢度都係食晚飯，今日食午餐，叫咗鹹魚鷄粒炒飯同乾炒牛河，估唔到都幾有水準！⭕️ 鹹魚鷄粒炒飯一上枱已聞到香噴噴，好香鹹魚味，鷄粒有爆過，啲飯粒粒分明但唔乾，唔多油，好有功力的炒飯，好耐未食過咁好食嘅鹹魚鷄粒炒飯😋😋⭕️ 乾炒牛河炒得都唔錯，幾好食，炒河嚟講唔算太多油，如果再鹹返少少就更好，牛肉份量都OK.午餐呢個價錢包飲品都抵食，不過晚市就貴，要62蚊一碟唔包嘢飲，比同區茶記貴，同區的晚市大約五十幾蚊包例湯。比起同區，呢間個廚係特別有水準好食，但係偏貴，晚市七、八十蚊一碟小菜偏細碟（淨小菜，唔包白飯、例湯或飲品），尤其係肉類小菜，一家三口食，每人都食唔到幾舊，鷄煲就比較抵食，所以間中想食好味啲先至嚟呢間。…查看更多

今次係第二次嚟食，上次食過覺得好味，但無點紅豆冰，之後見到隔離枱杯紅豆冰好吸引，所以再嚟食😄上次都係星期日，因為要去元朗要轉車，所以過嚟呢頭食晏，估唔到星期日嘅工商區，呢間餐廳中午都咁多人，12點40分嚟到已要等位，好彩餐廳夠大，等一陣就入得，雖然我哋得兩個人，都獲配卡位，坐得舒舒服服👍🏻⭕️ 紅豆冰一人一杯紅豆冰，大大杯，好滿足，奶夠多，紅豆夠稔，甜度同冰嘅份量都適中，咁大杯都飲清，好味😋⭕️ 公司三文治有用心整，方包烘到金黃色，午餐肉煎得夠香，生菜同蕃茄都新鮮夠爽，如果多啲牛油仲正，滿意收貨😊⭕️ 焗牛脷飯有4大塊牛脷，唔羶夠稔，飯底有炒唔濕，蕃茄汁甜酸剛好，好開胃。作為一間茶記，已經非常稱職，如果唔係點會星期日工商區都要排隊？附近其他茶餐廳都無滿座。走時見到其他人食嘅午餐，焗芝士西蘭花海蝦球飯，見到啲蝦都幾大隻，而咕嚕肉飯係一碟咕嚕肉+一碗白飯，碟咕嚕肉都幾多，抵食，下次再去試其他嘢食先，不過要再早少少去，否則就要排隊。…查看更多

假期起身搵嘢食，行過見到呢間就入去試下，估唔到咁好食👍🏻⭕️ 生煎包首先嚟到，我哋兩個人，因為張枱有啲細，諗住唔洗要店員俾碗仔，但店員好好，堅持叫我哋用碗仔，因為爆曬汁，果然係好多肉汁，邊食邊漏汁，個底脆卜卜，唔油膩，好正👍🏻⭕️ 小籠包，細細個，又係爆汁的，肉饀味道都好食。⭕️ 紅油韮菜餃，比較細咗啲，餃皮稔咗啲，味道都OK既。⭕️ 古法豬手菜飯，三大件豬手，夠稔夠入味，而且豬手處理得多乾淨，我最怕有毛既，味道有家的感覺，菜飯亦都好正，有豬油香味。⭕️ 口水鷄菜飯，份量OK，鷄唔算滑，但有鷄味，個汁都唔錯。要讚一下店員非常有禮貌，會主動問啲嘢到齊未和跟進，主動執枱。可以食到好味的食物，同有禮貌的服務，整天心情都開心曬😋😋…查看更多

呢間開張兩個月左右，其實我已幫襯過好多次，外賣同堂食都試過，太子附近嘅餃子店我都食過，呢間嘅水準唔差，有少少嘢希望可以改善到就更perfect，希望老闆睇到啦！餃子我食過幾款，肉同菜比例係肉多啲，大概7：3，新鮮，餃子皮唔會太軟，食過咁多次，包括外賣都唔會爆皮，包餃子手勢力度OK，皮同饀都唔會散，個人口味我最鍾意食芫茜豬肉餃，煎餃煎得夠香，湯餃個湯都唔差，我飲唔到鯹味，食完都無口乾，我次次都飲曬，外賣碗比較細，10隻餃子好迫，變相湯亦少咗。大澳一字鷄翼，非常香的蝦醬味，唔會過鹹啱啱好，外有薄粉炸香，外酥脆內鹹香，推薦👍🏻👍🏻重慶涼麵有待改善，唔香唔麻，個汁竟然係全流質，無蒜蓉、無芫茜、無蔥，除了自點加的餸外，就係得麵、青瓜絲、汁水，完全無重慶小麵風味，要改善下咯！口水鷄米線同蔥油鷄米線都好食，賣45蚊，鷄的份量OK，可以試！最衰竟然無汽水，食辣嘢最想飲汽水，佢竟然無😳有樣嘢諗唔明，外賣生餃子價錢點解唔會比堂食平？生餃子唔洗煮、唔洗湯、唔洗佔坐位、唔洗洗碗、唔洗堂食招呼，太子另一間旺場餃子店都係咁，其實我自己買返屋企煮，係因為路程遠，唔可以買已煮熟的，同堂食生意互不影響，點解定價唔可以合理啲，做埋生餃嘅生意。…查看更多