媽咪姐的个人专页

尼間餐廳擺響個list度已經好耐，今日終於有機會一試。平時行過都睇到勁多人排隊，今日喺星期日，時間又早，果然可以不用等位，即刻入座。尼度喺用QR code 落單嘅，餐牌上嘅選擇都算頗多。一個人，就嗌咗個麻辣半筯半肉麵，一個滷水豆干同埋一杯檸檬柚子氣泡凍飲。麻辣牛肉麵嘅湯底濃郁，清甜，幼麵嘅份量啱啱好。牛肉有兩塊，肉炆得腍，好入味，至於啲牛筋我就嫌佢散咗啲，但入口既溶，味道甚好。個餐仲跟三小碟配菜，分別係甜酸菜，雲耳同油炸鬼。我覺得甜酸菜嘅味道好好，食落令人開胃。嗰鹵水豆干有驚喜。鹵水有少少甜味，同香港嘅鹵水有頗大分別。雖然話係豆干，但係其實唔係太乾身，豆腐切成方形，朔晒鹵水汁，食落充滿鹵水，口感好，俾人一種滿足的感覺。等待食物期間上嚟的食客越嚟越多。尼度食飯限一小時，好在嚟得早，唔係嘅話又要望門興嘆了。…查看更多

食完飯阿女話要食甜品，淘大商場附近都有好幾間選擇，睇咗餐牌，最後扑鎚食呢間金滿堂。間鋪唔大，坐得幾逼夾。餐牌上嘅選擇妥多，睇咗一輪，阿女揀咗個芒芒小丸子，阿仔嗌咗個金玉滿堂，而我就比較唔好彩，想要嘅甜品都賣晒，揀到第三次至揀到個「樂天」。啲甜品話都冇咁快就送咗上枱，大家嘅第一個反應都係話呢度嘅甜品好，因為真係唔係太甜。首先要講嘅係碗芒芒小丸子，除咗芒果同雪糕，仲有小丸子同大量嘅水晶珠，阿女就係睇中啲珠仔至揀佢的，加埋芒果汁底，話非常之滿足喎！阿仔嘅金玉滿堂其實係芒芒小丸子嘅升級版，比芒芒小丸子多咗龍眼同蘆薈，基本上佢哋兩個嗌嘅嘢其實都係差唔多。我要嘅「樂天」最後送上。呢個甜品係紫米露底，除咗有芒果之外，仲有啲清心丸同一個自選嘅雪糕（我揀咗奶茶味）。我一向鍾意紫米做嘅甜品，呢度嘅紫米煮得好，夠冧，加埋啲牛奶味道啱啱好，非常合我心水。好在我哋嚟得早，唔使等就可以入座，我哋走嘅時候出邊已經有一條人龍在等位。睇嚟呢間甜品店嘅人氣真係唔錯，有機會會再嚟試佢其他嘅甜品。…查看更多

好耐冇同啲仔女一齊出街食晚飯，因為今晚老公同朋友有約，我就約埋啲仔女一齊去淘大商場搵嘢食。行咗一圈，決定食呢間餐廳嘅定食。同好多餐廳一樣，呢度都係掃QR code落單嘅，因為係三個人，所以我哋叫咗一個二人餐，外加一個自選燒肉盒子飯定食。先上嘅係盒子飯定食，呢個係阿女揀嘅，自選燒肉佢要咗牛舌同牛腹腩雙拼，除咗啲燒肉，個定食仲有碗味噌湯，溏心蛋同埋一罐檸檬茶。至於味道，阿女話個牛舌有啲乾身，但係牛腹腩就幾好味。至於個二人餐，我哋就揀咗燒草飼牛腹腩同埋新潟松板雞丼作為主食。前菜我哋要咗一個溫泉蛋同埋一個溏心蛋，炸物喺炸釀海老，跟住仲要咗兩碗味噌湯，最後個套餐仲俾埋兩個細啫喱做甜品。如果問我，我會覺得個牛腹腩比啲雞肉好食好多，起碼啲牛肉係濕潤的，撈埋啲醬汁同飯一齊食係都幾好味。至於啲雞，因為係切成雞條，食落又乾又硬，一啲味道都冇，完全不知所謂，所以我一定唔會推介呢個飯。我要嘅溏心蛋都叫做OK，起碼真係留流心的，至於個溫泉蛋，啊仔就話冇乜特別。最後要講嘅係炸釀海老，又係超乾身，如果唔沾蛋黃醬就真係食唔落口。埋單344，冇加一。呢間餐廳嘅食物真係麻麻地，個人嚟講應該都冇下次。…查看更多

年初四阿仔嘅同學過嚟玩，因為過年已經食得太多糕點，所以中午食晏決定轉吓口味食西餐。唔想去得太遠，所以就揀咗大圍嘅Platform，平時週末或假期呢間餐廳都大排長龍，今次好彩竟然俾我哋攞到最後一張吉枱。雖然已經好耐冇嚟呢度食嘢，個餐牌依然冇乜轉變，阿女同我兩個都要咗港式煲蛋，阿仔要咗個紐約客，而同學仔就嗌咗個美式手撕豬肉，四個主食都配上餐廳出名嘅貝果麵包。飲品方面，我哋要咗cheese latte，peanut latte，long black 同埋 lemon ginger with apple。第一樣上枱嘅喺手撕豬肉，梗係因為啲料都係現成的，唔需要點樣製作。個餐都擺得幾靚，除咗有半碟沙律，仲有一堆青蘋果絲，此外仲用咗兩片芝士薄脆冚住啲豬肉。不過，當問同學仔佢嘅味道如何時，佢話其實啲豬肉有啲乾身，所以味道只係一般。跟住上嘅喺阿仔嘅紐約客。呢個睇落比較普通，只係個貝果夾埋牛肉、蕃茄、洋蔥等，當然都係有半碟新鮮沙律。等咗約十五分鐘，我同阿女嘅港式煲蛋終於到喇。呢個主菜用瓦煲仔上，感覺果然「港式」。煲嘅表面主要喺一層芝士，仲鋪咗幾片意大利腸同羽衣甘藍做裝飾。至於煲里面嘅餡，除咗有半熟蛋之外，仲有啲腸仔、蘑菇、薯仔等配料，同埋芝士貝果一起食，好味又邪惡🤣。兩杯latte各有風味，我杯芝士拿鐵，因為落咗玫瑰花瓣，所以除咗芝士淡淡嘅咸味之外仲有花香，甚得我歡心。至於阿女嘅peanut latte，花生落得太重，好似喺度飲花生醬咁，冚晒啲咖啡味，個人覺得唔值得堆介。埋單562蚊，冇加一，四杯飲品佔咗張單嘅三成二價錢，其實真係唔係好抵，好在都唔喺成日嚟，下次嚟都係就咁飲水算喇😅！…查看更多

同阿仔去荔枝角公園嘅嶺南之風影相行到攰晒，口渴想飲嘢，但係附近又睇唔到有乜嘢地方有嘢飲。因為從來未去過南昌站嘅V·Walk，橫掂一個站，咁就一齊去逛吓。在商場內行咗一輪，其實都係冇乜選擇，忽然間睇到呢間鮮芋仙，阿仔又話有少少肚餓，反正有位，所以就決定堂食，順便唞一唞。阿仔嗌嘅喺招牌仙草冰沙，佢話冰沙只能夠堂食，如果買外賣嘅話，返到屋企就變咗一碗糖水。除咗仙草，呢碗冰沙仲有原味同地瓜味芋圓，另外仲俾咗些少花奶，可以依照個人喜好添加。阿仔話碗冰沙甜味啱啱好，啲芋圓煙煙韌韌好咬口。我一向仲意紫薯，所以對杯紫薯紫米珍珠非常滿意。首先係啲紫薯搞拌得非常之爛，溝埋紫米同牛奶一齊，用飲筒都啜得到。啲珍珠俾得妥多，飲完杯嘢其實都覺得幾飽肚。找數$94蚊，阿仔埋單，多謝晒！…查看更多

好耐冇去淘大，今晚屋企唔煑飯，就約咗老公一起去食嘢。淘大條食街多嘢棟，老公從街頭睇到街尾，跟住扑鎚食馬來西亞餐。雖然已經喺七點幾，餐廳人唔多，我哋睇咗餐牌，二人餐的食物唔啱我哋，所以決定散叫。老公嗌咗海南雞飯，我要咗個馬來椰漿飯配巴東牛肉，外加一個豬潤肉骨茶。海南雞飯最先上，俾嘅沾醬分別喺辣椒醬，黑豉油同薑蓉，我試咗少少辣椒醬，係正宗配海南雞飯的，幾好。油鷄飯望落唔係太油，除咗鷄，仲有青瓜、紅蘿蔔粒同花生等配料。老公話啲鷄肉都幾滑，最緊要係冇骨，但係啲飯就唔夠香。我碟椰醬飯到喇。首先要講嘅係巴東牛肉，煮得幾冧，辣度啱啱好，配上椰漿飯，非常之開胃。配料方面同海南雞飯一樣，亦都係青瓜、花生同紅蘿蔔粒等，呢碟飯仲俾咗一個可以依照客人要求烹煮嘅蛋，我就選擇咗要一個太陽蛋。另外仲另上一小碟辣椒，我本來以為喺參巴辣椒，但原來係甜辣醬，呢個唔正宗，要扣分。碗豬潤肉骨茶要讃。首先係啲豬膶，非常之爽脆，有七、八塊咁多，係屬於煮得啱啱好，咬落彈牙嗰種。至於個湯，因為係星加坡式，所以係胡椒湯底，佢非常之清甜，夠辣，飲咗成身暖笠笠，啱晒喺清涼的晚上飲，碗湯內仲有啲油豆腐，吸晒啲湯汁食落去真係好美味。因為係肉骨茶，所以亦都俾咗一細碗油炸鬼同埋醬油、鮮辣椒同蒜蓉等一齊食。呢個食法係正宗嘅，只不過啲油炸鬼唔新鮮，已經係硬繃繃，所以又係失咗啲分。埋單連加一共207，唔貴，值得推介👍！…查看更多

剪完頭髮，時間上有啲尷尬，因為係啱啱過咗下午茶時間，但食晚飯又太早，於是就搭車去馬鞍山商場行吓街先。先去超市巡咗一輪，一落樓就睇到呢間餐廳，反正一個人，咁就求其食啲嘢就算。晚飯餐牌上都係喇叻、肉骨茶、鷄飯等，睇到隔離抬碗叻沙好似幾好，所以我就嗌咗碗魚蛋滲滲喇沙。因為喺晚飯，叫嘢飲有優惠，我就加咗三蚊要咗杯凍薏米水。碗滲滲喇沙當然係麵同米粉兩溝，麵嘅份量極多，唔怕食唔飽。其實呢碗嘢冇乜料，只有啲芽菜，幾個豆卜，半隻雞蛋同埋四粒魚蛋，好在啲魚蛋都叫做爽口，但係60幾蚊一碗，其實絕大部份都係麵條。至於嗰湯底真係好一般，我嫌佢冇乜味道，只係個樣似叻沙，亦都唔夠辣。唔記得咗講，上枱嘅時候有半粒金桔擺喺個湯羹上，只不過得半粒，溝埋落啲叻沙湯內食唔到任何變化。呢間餐廳唔係差嘅，只不過今晚叫得唔好，如果真正想食娘惹美食，咁就真係唔好叫呢碗嘢囉。…查看更多

平時行過呢間餐廳都見到出邊有條人龍，今日就特登同阿仔去試吓佢。我哋到嘅時候約下午1:30，餐廳仍然係滿座，好在企咗冇幾耐就有人埋單，所以唔算等得太耐。餐廳用嘅係長形餐枱，所以客人們都係排排坐，坦白講，唔係坐得好舒服。我哋被安排坐喺餐廳里最入面靠牆的位置，要埋位嘅時候比較辛苦，因為實在係好逼夾，好處係食嘢嘅時候唔需要讓位俾出出入入啲人。餐牌上面嘅選擇唔算太多，我哋一心嚟食船麵的，咁就不作他想，就要咗兩個牛肉船麵。除此之外，仲要咗一個細分嘅阿叔拼盤，飲品方面，阿仔要咗一杯泰式綠奶茶，我就嗌咗泰式奶茶。牛肉船面到喇，先飲一啖湯，微辣，湯底濃郁，牛肉味重，唔錯，我鍾意。呢個船麵我哋揀咗金邊粉，始終咁樣比較似正宗嘅船麵。配料方面有豬皮、肉丸、芽菜、豆卜等，都係一般船面會食到嘅嘢。阿叔拼盤上有四個小食，分別係雞翼，炸魚餅，冇骨鳳爪同埋椰汁西米糕及椰子啫喱。坦白講，雞翼同埋炸魚餅都係一般，叫做中中規中矩，嗰無骨鳳爪酸酸辣辣幾開胃，因為唔想食甜嘢，所以兩個甜品就俾阿仔搞掂。至於兩杯飲品，因為唔記得咗叫少甜，所以我就嫌佢甜咗啲，不過茶味都叫做濃，所以係可以的。埋單連加一差唔多三舊水，唔算係平。但係今時今日喺香港，呢個價錢都係中位數，都叫做可以接受啦。…查看更多

老師住馬鞍山，拜完年，順便就響嗰度食晚飯。行咗商場一圈，就扑鎚食呢間馬來西亞餐。唔知道係咪因為過年，餐廳內嘅人並唔多，除咗我，只有另外兩枱。餐廳風格簡約，牆上有幅畫，畫咗幾個著住娘惹衫嘅女人，都叫做有啲馬來西亞風味。一個人食飯，冇辦法食太多嘢，就嗌咗一個巴東牛肉飯同一份油酥餅。巴東牛肉煑得幾腍，亦都妥辣，啱晒鍾意食辣嘅朋友。除咗牛肉，仲有些少花生，青瓜同半個蛋做配菜。巴東牛肉嘅份量唔少，足夠撈哂成碟白飯！👍油酥餅喺我嘅情意結。喺香港唔容易搵到好食嘅油酥餅，馬拉文叫做Roti Canai，所以每逢睇到有呢個小食，就一定要試一下。可惜呢度嘅油酥餅都似其他餐廳咁，非常之一般，完全唔似我在馬來西亞食到嘅味道。不過我已經預咗係咁，所以亦都冇話特別失望。呢度嘅餅硬硼硼，一啲都唔鬆軟，反而係個咖喱汁幾好。總體來講，呢間馬來西亞餐廳都叫做唔錯，尤其是在香港，以咁嘅價錢可以食到啲特色食物都算係咁啦。…查看更多

新年喇，又係要食啲乜糕物糕嘅時候。一時心血來潮，今年想食啲潮式糕點，就特登去上環呢間老字號買糕點過年。當我仲怕佢哋冇開門嘅時候，事實上佢哋喺忙到停唔到手，原來已經有好多人向佢哋訂咗糕點過年。我因為冇事先預訂，所以只能夠買佢哋當日未有被人預訂的糕點。因為時值午飯時間，睇到佢哋餐牌上有個炒潮式糕粿，我已經好耐冇食呢樣嘢啦，於是就嗌咗一碟當作午餐。記得阿叔仲望咗我一眼，話「好喇，我炒俾你啦！」，都唔知喺唔喺本來都唔準備開爐。我等咗一陣碟嘢至上枱。糕粿喺東南亞一帶，尤其是在星、馬係一個非常普遍的食材，係由米漿同沾米粉溝水蒸出嚟的東西，佢嘅口感有少少似蘿蔔糕。潮式炒法，通常就係同啲雞蛋、韭菜、甜豉油一齊炒，係個非常之經濟又飽肚的食物。呢度嘅糕粿偏腍，阿叔炒出嚟嘅糕粿係好味嘅，只不過油膩咗啲，如果冇落咁多油可能會更加好。下次嚟呢度買嘢嘅時候會試吓佢第啲潮式小食。…查看更多

終於買完年貨，正在愁唔知道一個人要食乜嘢嘅時候，咁啱就俾我睇到呢間台灣麵。喺出邊望吓個餐牌，有獨食套餐，再上OpenRice睇睇，食評都似乎唔錯，咁啱餐廳又有位，於是就入去試吓囉。間餐廳係數碼落單嘅，研究咗一輪，決定個獨食套餐要個酸辣湯、紅燒牛肉同滷肉飯，至於個飲品就要咗個熱檸水。間餐廳其實都幾大間，亦非常旺場。等緊嘅時候，睇吓墊枱紙上其他嘅介紹，諗緊如果下一次再嚟，應該食啲乜嘢嘢😅。最先上嘅係酸辣湯，我係一個好喜歡飲酸辣湯嘅人，喺香港亦都飲過唔少酸辣湯，貴嘅平嘅都有。呢一碗酸辣湯雖然唔係話最好味，但係味道調較得幾ok，酸同辣嘅平衡做得啱啱好，豆腐絲同木耳絲等料都落足。再上嘅係紅燒牛肉同滷肉飯。嘩，碗飯真係大碗囉，我諗我老公都未必食得晒。碟紅燒牛肉一共有四大塊，啲肉炆得十分之腍，鹹味適中，非常可口。碗飯上面的滷肉甚多，撈埋啲飯一齊食令人十分開胃。尼個餐只係收$80，點都諗唔到佢嘅份量竟然有咁多，CP值真係夠高。杯熱檸水俾嘅檸檬都算多，唔似一啲餐廳俾嗰一、兩片，連檸檬味都飲唔到。呢間餐廳「掂」，一定會有下次👍！…查看更多

過中環做嘢，忽然間好想食叻沙，記起蔡瀾曾經介紹過尼間在上環嘅餐廳，於是特登搭車過嚟試新嘢。我唔熟悉上環，喺地鐵站出嚟用Google map 搵咗陣至搵到。間餐廳喺條橫街，俾泊喺路邊嘅車輛遮住晒。去到嘅時候係中午十二點，餐廳里已經半滿，侍應都係啲上咗年紀的伯伯。睇咗餐牌，叻沙價錢唔平，決定要碗正宗叻沙，目的就係睇吓佢有幾正宗。叻沙好快上枱，第一眼嘅感覺良好，顏色同叻沙湯嘅稠密度都似樣，最緊要嘅係上面嗰幾隻獅蚶，係香港真係冇乜地方有。試吓叻沙湯底，非常之唔錯，唔太辣又鮮甜濃郁。麵嘅份量唔多，配菜方面有魚片、蝦、豆卜同蛋，都係好一般但正宗嘅配搭，整體來講，同我喺馬來西亞食嘅叻沙不相上下。找數90蚊，唔平，畢竟係特色午餐，加上好味，抵俾…查看更多

剪完頭髮，睇到附近開咗間賣健康餐嘅餐廳，餐牌上嘅選擇妥多，咁又走去試一試。時間係下晝六點幾，人流唔多，餐廳內除咗我，只有另外一台客。我揀咗D.I.Y.，肉類要咗三文魚同鷄胸，蔬菜要咗彩虹組合，配上黃薑椰菜花，另外仲要咗個三文魚菜湯。呢個唔係我食到最好食嘅健康餐，食材算喺新鮮，味道上來講我覺得佢偏淡，雖然視覺上係唔錯，但係味道並唔吸引。至於個湯都幾重三文魚味，唔係好慣飲魚湯嘅人可能會覺得有少少腥。沙田區嘅健康餐廳少，雖然堂食嘅人唔多，但係都睇到app喺度密密送，所以應該生意都唔錯。…查看更多

因為要攞報告，所以晏咗食飯。咁啱行過尖沙咀K11，記呢度有間想試嘅星加坡餐廳，喺門口睇到冇咩人，於是乎就入去食返個午餐。坐落侍應俾咗個午餐餐牌，有樣嘢叫做月光河，因為從來未聽過，於是乎就嗌咗佢。午餐仲包埋一杯飲品，我要咗杯凍桔仔特飲。話係晏晝，其實已經到咗下午茶時間。雖然餐廳入面人唔多，但係我就要等咗成15分鐘碟河粉至上到。講真嘅，碟河粉份量頗多，除咗有隻蛋（所以叫月光河），仲有豆腐，魚蛋，魷魚，蝦等海鮮，成百蚊一碟粉，都叫俾足料，只係食落去味道一般，冇鑊氣，連中規中矩都講唔上。至於杯飲品，啲桔子又細又少，飲落似飲清水多過係桔子水，如果唔係跟餐尼杯嘢要28蚊，真係會覺得中伏。總的嚟講，今餐食得並唔滿意，希望以後有機會再嚟食第啲嘢嘅時候會賺返多啲分數啦！…查看更多

週末同阿仔去深水埗買嘢，順便食埋飯至返屋企。上OpenRice睇咗，咁啱呢間餐廳就係附近，OpenRice上嘅食評亦都幾好，咁就同阿仔一齊去試吓啦。間餐廳真係好細，得嗰十個位，坦白講，真係坐得唔舒服。食物方面，選擇亦都唔算多，不過因為喺家庭餐廳，食物正宗同埋好味至係最重要。餐廳有二人餐，因為唔係好啱口味，所以決定散叫。我哋要咗個飯卷同埋一個韓式湯，仲嗌咗半份炸雞。凡韓國餐廳都一定會送前菜，今晚嘅前菜係泡菜同大豆芽，兩個都幾好味。紫菜飯卷，我哋嗌咗牛肉，一共有八大件。啲飯卷都幾足料，有雞蛋絲、蘿蔔絲等，配埋飯每一口嘅飯餸都好平均，唔錯。泡菜豆腐湯係我想要嘅，仲跟一碗白飯。個湯唔算太辣，豆腐非常之滑，食落都幾開胃。最後嚟嘅係炸雞，原來係冇骨嘅，雖然味道係OK，但係我覺得佢炸得唔夠香脆，失咗少少分。兩個人食找數239，冇加一，同叫二人套餐咁上下價錢。家庭作業，在深水埗區，咁嘅質素，值得推介。…查看更多