StupidA的个人专页

尋晚大約7:30同男朋友去食地道菜，過一個casual嘅周年紀念日😆 一入到去已經好興奮，因為成間餐廳好有氣氛，啲姐姐又熱情，個個都好開心咁笑口常開，令到人好有歸屬感。同男朋友睇咗個Menu一次又一次，真係選擇困難症，但其實我一早已經有個Target就係佢嘅剁椒魚頭，因為我好鍾意食魚頭雲，又鍾意食魚頭，未食都係圖片行先，覺得呢間應該唔會錯得去邊，所以就決定咗嚟呢間。所以揀餸第一味一定係呢一味模擬！之後就樣樣都想食，肥腸啦，菜花啦，羊肉啦，魚雜啦…… 樣樣都好吸引！而且做法亦都係選擇困難！我又鍾意食水煮又鍾意食泡椒又鍾意食乾炒，最終揀咗剁椒魚頭，大盆菜花同埋乾炒肥腸。第一樣嚟到嘅係肥腸，勁香賣相勁吸引。有一個小鑊鏟俾我哋鏟吓炒香啲。因為嚟嘅時候有一個爐仔做配套，我同男友分別作狀炒肥腸影咗啲張相，好低能但好好玩😂 之後梗係即刻開餐啦😏 啲辣椒好好食，又甜又香！肥腸軟熟，外脆內軟唔會乾爭爭！簡直一流！色香味俱全！鹹鮮鹹鮮🤗 我同男朋友都係重口味，所以覺得非常對口胃😍而且鑊氣十足！之後第二度係大盤花菜，呢個比肥腸更好食🤤 屋企都成日煮花菜，但完全煮唔到呢一種鑊氣，乾身菜花好香食得出係新鮮，有少少五花肉渣仔，勁好食！成盆菜我同男朋友一邊食一邊讚停唔到口，終於知道點解差不多每台都有叫。開頭我仲心諗呢個價錢可以買到好多個菜花食，真係唔抵！原來食過之後覺得物超所值🤩食完之後等咗好耐個魚頭都未嚟，追咗姐姐兩次，仲要再等多一陣先至嚟。我問佢係唔係漏單，佢少少口冇正面答我，其實一定係啦，冇理由食完兩個餸都差不多一個鐘頭後個魚頭先嚟。喺屋企整豉椒蒸大魚頭，四個字之半個鐘都已經搞掂，呢個差不多成一個鐘好明顯就係漏單啦！不過唔緊要，嚟到連Gas爐一齊上，一路食一路熱住。其實姐姐行過嘅時候我同佢講你哋大辣都唔夠辣，跟住姐姐笑住同我講你都好食得辣，我就笑笑口話咁應該係啦！原來湖南嘅大辣喺香港已經調校到唔太辣，但係呢味剁椒魚頭係會越食越辣越鹹香，有少少料到，好嘢，但我都覺得可以再辣啲，而且多少少湯汁會好啲，就可以點住啲汁嚟食更加好食。魚頭雲真係好好食，食完一大個魚頭都意猶未盡，但冇辦法真係好飽了！我相信冇幾耐我心癮起就會去再食，同埋好多菜式我都好想試，下次試吓其他先😌仲有佢杯特大檸檬茶可以再多啲檸檬就好，或者啲檸檬切返厚啲，因為而家唔夠檸檬味😔嘥晒😫…查看更多

有朋友突然話返嚟香港，咁我就帶佢去食啲特別嘅嘢。問佢想食乜嘢，佢話冇所謂咁🫠 我就喺度諗不如帶佢食啲特別嘢啦😌 有潮州菜（其實都唔係好特別😅）同埋墨西哥菜而家😍 最後我哋就去咗食墨西哥菜呶多啲🥳準時7:00到，朋友仔已經到咗嚕！咁佢哋兩條友仔都冇乜idea🙁 咁就由我發辦啦🙂‍↕️我叫咗個buffalo Chicken nachos呢個超好食，我哋一嚟已經食到唔停口再叫咗個Tuna Ceviche呢個嚟到好靚個底會冒煙🤩 吞拿魚刺身調味到酸酸咁，配菜洋蔥青瓜酸瓜又好食🤩 成個Appetizer好Fresh好開胃🤤我仲叫咗一個Snack佢其實係一個炸芝士波波入面釀咗Paella🤗 正正子🫰🏻Main course我叫咗個buffalo Chicken nachos，呢個超好食，辣辣香香，一嚟已經食到唔停口！另一個main course我叫咗免治羊肉Quesadilla，呢個我覺得係全晚最好食👍🏻👍🏻 免治羊肉好香調味啱啱好唔太鹹有少少辣香料都幾重呢點我勁鍾意！因為我哋有三個人，所以要嗌三個main course最後一個main course我就叫咗脆蝦牛油果Tacos，呢個我覺得麻麻哋，覺得三樣嘢都分開晒咁，粟米片還粟米片，脆蝦還脆蝦，一片厚切嘅牛油果還一片厚切嘅牛油果，大家都配合唔到🤔 而且我一啖好難食到晒三樣嘢囉😅 因為實在太厚太大件😅而且口感太乾，乾得來又唔香好平淡。飲品我要咗牛油果smoothie，呢杯嘢好滑好香，好牛油果好好飲，但係亦都好飽肚。上面有一小片薄荷葉，我將佢放入杯底篤佢幾下，嗰陣薄荷味溝埋成杯smoothie又係另一種飲法，好Fresh！另一個朋友仔，佢叫咗BIGBANG，呢杯嘢好受歡迎，眼見餐廳好多人都叫呢一杯，呢杯嘢酸酸甜甜，好重菠蘿汁味好易入口！另一個朋友仔叫咗Lucífer，呢杯嘢就好似Ginger Ale咁囉! 最後我哋食完嘢喺度吹水，我杯smoothie飲晒嚕，就叫多一杯嘢飲。因為第二日要返工，所以都係冇揀酒精嘢，冇得飲酒🍻 好健康咁叫咗熱情果smoothie。呢杯都係好好飲，好真材實料，香香酸酸咁🤗 但真係飽到上喉嚨椗嚕😂…查看更多

噚晚心血來潮想同男朋友仔出街撐枱腳，就冒點約咗佢去上環🤭。我早咗到就喺蘇杭街附近打個轉睇吓。嗰陣時差不多8點半乜春都收晒😅，只係淨返啲酒吧呀、日本料理呀、唔多想食既餐廳（入面冇咩人）。行行吓見到有間嘢食豬雜麵仲未收，就同男朋友仔入去。Openrice寫收九點，入去問事頭婆佢哋收幾點，佢話收得鋪嚟都10點我話我食得慢10點都可以事頭佢話收8點9，但收得鋪嚟都10點，我話我食得慢😅，佢問我一個鐘夠唔夠食，我梗係話夠啦，驚佢唔俾我食🤣！坐位唔多，當時都坐爆曬，我哋要企喺度等5分鐘左右啦，事頭婆就話幫我哋落單先，坐低即刻有得食。但係當時米線已經賣晒，剩返米粉、河粉同油麵。我要咗碗細既淨豬雜，男朋友仔就要咗碗大豬雜米。嚟到即刻試咗啖湯，好香胡椒味，熱辣辣正！豬大腸、豬肺、豬粉腸都好入味，口感好，冇異味。可能我唔識食，覺得豬心硬，細舊啲、薄啲既蝴蝶腩比較好，夠淋夠滑，但大舊啲厚啲既就好硬☹️食食吓食到幾嚿開始有啲鹹，最後仲越食越鹹，覺得有啲奇怪，我懷疑佢係用鹽水浸過啲豬雜，有啲浸得太耐太入味好鹹，我開頭食嗰幾舊可能浸得冇咁耐，所以仲食到豬什嘅清香味，食食吓仲開始有啲頸渴添😣，太鹹了。同男朋友仔講，佢都覺得係😔但我去開個頭都會俾多次機會佢，希望下次去食會好似頭頭食嗰幾舊咁冇咁鹹啦😌嗰幾舊真心好味！…查看更多

尋日同男朋友行完寵物商店，又行吓金魚街之後，大約7:30有啲肚餓，就去搵嘢食。琴日成日個心都想食車仔麵😌，所以行吓行吓，見到16座就去試試。其實食飯時間但喺門口見到得兩個人，都驚驚地，但心諗又真係好想食車仔面麵同埋呢間嘢都聽過吓，就是但啦試吓啦。入到去選擇困難症左一輪🧐，最後揀咗最原始既自選三餸車仔麵，要咗大腸、陳皮魚蛋同埋魚肚扒，豬骨湯底大辣配米粉。而男朋友要咗餐牌推薦既雞翼，魚肚扒同金沙青，麻辣湯底大辣配粗麵。等咗唔夠兩分鐘，哈！好快就有嘢食。第一眼我就覺得好少餸，試吓個湯，WHAT！勁咸😕仲好化學辣🤬我呢啲辣妹食開辣既一食就知呢啲辣好人工化！唔係天然！我男朋友嗰碗一樣又少餸、味又勁假、勁咸，最搞嘢係個粗麵好似無煮過咁，勁硬！仲食到入面有麵粉！多謝晒😩啲餸質素只有隻雞翼好啲，其他都好唔掂。魚蛋死實實可以掟死人，豬腸炆唔腍，個所謂嘅魚肚扒即係大塊啲既沙爆魚肚，正常應該係琳琳滑滑，但係佢係爽口嘅，口感好古怪🤪我哋仲每人要咗一支嘢飲，但係嘢飲提唔提都罷啦！我男朋友飲齋啡，我呢就要咗支咩新鮮鮮榨濃縮檸檬茶，個茶底唔靚就預咗，仲要又苦又澀🤢，好難飲😑最後埋單承惠$150，貼錢買難受☹️點解？因為我地兩條友食完個胃同肚即刻揦住，去咗兩次廁所🚽呀😒😒到第二日都仲係咁😒呢間嘢係咁先啦👋…查看更多

貴為竹園人，當然食過竹園餐廳。聽講呢間餐廳年紀大過我，開咗有40幾年，可以講話自從有竹園邨就有佢。放假我都會瞓都自然醒，最近天氣比較熱，都會早醒咗，所以只會瞓到11、12點左右，brunch呶！都會典吓典吓咁去樓下竹園餐廳食，因為都過咗早餐時間，所以最鍾意食佢既常餐，有時會叫假日特餐。入到去好有親切感，同啲叔叔姐姐都熟了，招呼會特別好，佢地通常會俾杯茶啲客，但佢哋知我會多要一杯熱水，有時我唔使講佢地都會自動波俾我😄今次就食佢既常餐，雪菜肉絲豬扒米，加杯凍檸茶走甜，茶ok香濃，檸檬🍋最近品質唔錯，汁多味香，前陣子就差啲，檸檬有爛味，搞到杯茶失色晒。好鐘意食佢嘅豬扒，係我鍾意既有骨豬扒，特別好食，尤其係骨附近嘅肉，正正子！個廚仲用刀𠝹幾嘢，保正熟透😏雪菜應該係調過味，唔係得個咸字，一啲都唔求其，份量又多，肉絲又軟，一啲都唔柴。配埋佢既辣椒油，食完個餐好滿足😌辣椒油可以香啲辣啲就更好，呢個佢地仲有好大既進步空間🤔…查看更多

呢間壽司小店，開張既時候我對佢無咩信心，可以係因為環境吧，見佢放魚生個櫃唔係好乾淨咁，玻璃唔明亮，好似唔係日日都清洗咁。但時間耐咗，見都幾多街坊買，而且每個買既量都唔少，心諗應該可以一試，支持小店，就開結咗幫襯。嫲嫲最鍾意食佢既鰻魚壽司，厚肉夠味，無骨又唔鯹，飯既大細、軟硬度都滿意。而我就鐘意佢既帆立貝、三文魚子、左口魚裙邊、油甘魚、吞拿魚腩同劍魚腩😌，好肥美😍，但最近呢幾次都唔多得，嫲嫲仲話唔再食。我就俾多次機會佢，唉😮‍💨…… 非常失望囉！飯偏實，無壽司醋味。油甘魚、劍魚腩有根！無咩鮮味！ 正正係大忌，食落口零幸福感，成個人down晒☹️，連火炙左口魚裙邊都有根，零魚油，一啲都唔肥美…..真係唔知點再俾機會佢🫤…查看更多

轉咗新工都半年了，而家喺九龍灣返工，嚟屋企都係3個地鐵站，勁近，可以瞓多9個字，車$又平咗，贊！原來九龍灣有好多隱世美食，我講既當然唔係商場入面嗰啲啦😏，係我公司附近，每日lunch都觸發起我既選擇困難症😹 仲越嚟越嚴重囉🙄今日去咗一間叫宏力既茶餐廳，門口隱蔽，麻甩但環境乾淨，冷氣夠，坐得都舒服ok，對我嚟講最緊要係嘢食好味😋叫咗芝士蕃茄焗豬扒意粉。姐姐送到嚟，嘩！勁香囉，又多汁，豬扒有兩塊，有一塊仲要帶骨！小妹我咁鍾意lun 骨，痴骨既肉係最好食🤤啱晒👍🏻 如果兩塊都帶骨就好了，下次request吓先😆豬扒半肥瘦，軟熟但唔似係用棚沙粉乸到咁，否則一定帶陣味，勁憎😒個汁係重點之一，我係超級汁怪，對汁要求特別高，呢個汁唔係太多芝士而且唔濃芝士味（啱我，我唔太受到濃芝士but又學人食🤭），有蕃茄味之餘仲食到美極味，好特別。阿哥（team manager)話呢啲係舊式茶記既味道，買少見少了，因為好多都已經接晒☹️意粉仲可以有啲Al dente ，勁！無發漲無淋晒，仲應該事先用個汁炒過再加汁同芝士去焗，唔會乾鯁鯁或痴埋一舊，加分啦。佢有勁多選擇，下次食佢既燒味先，見多人食，仲好大碟餸🫢…查看更多

一直以嚟都無食早餐既習慣，就算以前返學或返工都無食。但近幾年開始改呢個壞習慣，因為聽到話有醫學證實早起身而唔食早餐會好容易有膽石😰，驚驚⋯ 開始時好難頂，因為真係食唔落，個人都未瞓醒，點食喎😩 ！但迫吓迫吓就慣咗呶！新工喺尖沙咀海港城，所以就喺附近食早餐。食過附近幾間茶餐廳同熟食市場入面既茶檔，最鍾意都係合香園😍！記得第一次一入到去見咁多人食呢間，心諗應該會幾好食，就試吓啦！早餐無咩選擇，一係公仔麵一係三文治。咁早真係食唔到一大碗麵，所以揀咗餐蛋治烘底，仲要姐姐大火同多牛油😌！加多杯凍檸茶走甜，烘底竟然唔使加錢😳 抵晒！見好多人買外賣，等咗陣杯嘢飲到先。茶味啱啱好，有4片檸檬，飲得出好新鮮，重檸檬味，唔會拮到手軟都無味😑！勁憎嗰啲不知所謂既檸檬。飲多幾啖，份三文治到喇🤩 烘得夠火喉，見到即刻好肚餓🤣！攞上手熱辣辣，揸住未食都感覺到脆卜卜！好開心！一啖咬落去熱親個咀添🥲 蛋又厚滑又香，午餐肉無煎過火變柴！最正竟然係我最唔鍾意食既白麵包，外脆內軟喎⋯⋯真心無諗過咁普通既茶記三文治原來可以整到咁好食😋！佩服😏 會朝朝去食直到唔想再食先算😙…查看更多

新工喺尖沙咀，中午去海防道熟食市場食晏。環境乾淨，好多人，又熱鬧😮。最鍾意食鴻記既雲吞麵，雲吞大大粒仲好足料，啖啖蝦肉又鮮味😋，有4大粒，如果好似平時啲潮州麵鋪咁有5粒會比較夠喉囉😕！湯底顏色合格，唔混濁，好鮮香，飲到大地魚同蝦子既咸香味，正吖！加埋腩汁再香濃啲添😙！我食潮州麵一定會要求多蔥多腩汁，食過一次之後再去，個姐姐已經記得我 —> 阿妹你要多青多色吖嘛😂 ！姐姐，咁多客點解會記得我嘅？乜我好麻煩咩🥲呢度既辣椒油係自家製，仲食到有蝦米香，好味幾特別，但要$80樽🥲⋯⋯好爭扎！聽到老闆同個熟客講炒辣椒油真係好辛苦，間鋪從佢媽媽開始做就已經自家整辣油，所以佢都會依然咁做，係辛苦，但客人鍾意食都有返啲安慰。我係個辣怪，食過第一次後就勁想買，但我怕佢會有好多渣，一半油一半渣我都唔係好想，最好8成油2成渣就perfect喇，純粹個人喜好🤣，等我問吓老闆可唔可以special一樽俾我先，可以既話我一定即刻乖乖俾$買😈…查看更多

今日同男朋友同伯友去食下午茶，一早已在網上預訂咗個大口仔tea set，所以去到馬上可入座。QR落單，未叫就先嚟咗訂嘅tea set，原來要每位最低消費$150，叫大口仔主題熱飲先可以帶走隻杯，已經覺得有被坑嘅感覺因為之前啲宣傳都無咁介紹，無奈我哋再叫多兩杯熱野飲，連餐嗰兩杯共有4杯嘢飲。個餐嚟到好靚好可愛！但非常唔好食，連西餅店普通嘅西餅都好食過佢。伯友要食飯，咁就叫多個飯，點知個飯嚟到又唔熱，米又未熟透，生米嘅！同侍應講，佢即刻收返話再整過俾我哋，之後就冇嚟過喇！個飯影都無埋⋯仲聽到廚房有條女俾說話我哋聽，大聲講有人話啲飯唔熱喎！態度勁差！真係不知所謂！等咗半個鐘，連嘢飲都飲完，咁緊係走啦！同個侍應講取消個飯，佢好順攤，擺明冇整過俾我哋！呢間嘢唔會再去囉⋯ 最後先知冇得即時有大口仔杯俾我地攞走，要12月再去攞返，好很麻煩😡…查看更多