Kalium Liu的个人专页

話說喺社交平台見到某foodie推介，點知就中大伏。首先去到餐廳，同地下門口店員講book咗兩位，佢問我貴姓，我答咗佢三次佢都load唔到我姓乜，然後你眼望我眼，佢話你自己上樓梯。上到去，有個店員帶我地坐卡位，都幾逼，張枱頂腳。我地book枱時已買$456嗰個二人餐，揀咗五指無桃脆皮雞嗰個鍋。然後因為見到社交平台嗰個foodie話出示佢個post（佢個post係8月2日，我地去係8月10日）同店員講就可以有一杯價值$38嘅檸檬茶，咁我就問其中一個染銀髮嘅男店員，佢話冇呢啲咁嘅優惠㗎喎，然後仲講咗好多奇怪嘅說話，又挨到勁埋，總之令人感覺好不舒服。咁我就行咗出門口再問另一個應該高級啲嘅呀姐（因為見到佢喺度計數），佢話冇啲咁嘅優惠㗎，不過你想要今次咪做俾你囉。啲態度都有啲差。仲要佢突然間走埋嚟話，未煲茶，要等，成件事勁古怪。之後個煲上咗，本身想飲啖個湯底先，但銀髮個男店員話淥多三轉雞先飲會好啲，結果太聽話，咸到喊。啲雞好碎。成個套餐，最好食係啲蝦滑。個糖水好難食，好杰撻撻，食唔出咩味。然後，我哋想埋單嘅時候，發現個杯所謂免費嘅檸檬茶要俾4蚊加一，唔明免費點解都仲要加一，佢事先又無講，開頭搵咗個後生男店員，佢研究咗一陣就話可能入機時有但最後唔洗，但之後嗰個高級阿姐走埋黎，佢堅持個套餐已經冇收我哋加一，又free咗檸檬茶，我地要俾4蚊加一服務費。我心諗，為咗幾蚊，無咗個客，真係唔好怪人鍾意北上消費。成餐飯食得勁唔自在，果下終於明點解食飯時間可以得兩枱。成間店得一個帶cap帽嘅後生男店員係正常，其他人都係奇奇怪怪。…查看更多

佢個招牌係韓文，差啲搵唔到😂本身同朋友行入去見到得一枱客，已經心諗死啦星期日七點都無人，會唔會中伏，點知有驚喜喎！我地兩個人叫咗豬腳、三款煎餅同埋唔辣嘅燉雞湯。豬腳就一般，我地覺得偏瘦同乾，中意食肥少少。不過另外兩樣係幾好食，煎餅煎到好脆，海鮮煎餅無乜海鮮不過啲蔥味好香！燉雞湯好多蔥同蒜，好香，雞好滑，仲有年糕同薯仔，細煲都好大份。我覺得成餐飯令我最滿足係店員服務態度係非常好！又會主動問我地覺得啲食物岩唔岩食！好嘅服務態度真係可以昇華到食客對餐飯嘅滿足感。不過小小建議如果有免費泡菜前菜就更好（小小碟都好）佢有泡蘿蔔，不過個人中意食菜多啲…查看更多

話說我同朋友透過openrice訂座，6點入座有8折優惠。我地入座時雖然無人，都有講訂咗位，落單時confirm問係咪有8折，男職員有用電話影低相關証明，佢話7：30前埋單先有8折。但係到我地食飽時，舉手同一位女職員講埋單，佢話好呀就走咗入水吧，我地等咗好耐都冇人嚟，再舉手同開頭嚟影証明嘅嗰個男職員講埋單，佢先同我地講要出櫃枱埋，我同朋友即刻話：「啱啱又唔講？」好似想拖我地鐘咁，因為嗰陣就嚟到7點半。去到櫃枱，佢印咗張單係無計8折！！！好彩我有認真睇單，我問：「唔係有8折？」佢就問我：「你係x小姐？」先印張有8折嘅單俾我，感覺十分之唔老實！！！因為佢係有嚟影我地張8折訂枱證明，亦講得出我地姓乜，但偏偏一開頭就印張無8折嘅單俾我地，根本就係搏我地唔睇單！！！奉勸大家一定要check單！講返食物，我地叫咗招牌金邊粉、燒豬頸肉同香茅青蘋果茶。招牌金邊粉材料都幾多，湯底味道有dd苦。燒豬頸肉上菜時會有2秒噴火，味道正常，但比較細塊。香茅青蘋果茶無乜蘋果味，好淡。總結而言，唔會再嚟。…查看更多

今日大約1點半入座，唔需要等位，店員安排左我同屋企人三個人坐一張圓枱，十分闊落。我地叫咗豬手船面、冬蔭公雞肉船面、菠蘿炒飯同一份炸蝦餅。豬手夠冧，不過就淡少少，不過都可以接受。冬蔭公雞肉船面幾香，雞肉係烤過好香，有燒烤味，都幾滑，而冬蔭公湯唔太辣，我覺得幾啱我口味。菠蘿炒飯都幾大碟，好多粒魷魚粒。蝦餅有4件，好熱辣辣好脆，不過辣咗少少又細件咗dd。like social media會送雲呢拿雪糕，但嘟佢個code唔知點解like唔到，店員有耐性幫我地。個雪糕好滑，有啲脆片，好食。overall有驚喜，唔差…查看更多

今日係年初五，葵廣三樓嗰間章魚燒未開，二樓嗰間排勁多人，咁啱見到一樓開咗依間新嘅就諗住試吓啦。等嘅時間唔算耐，都係5-10分鐘左右。店員態度都幾好嘅，叫號都唔該前唔該後。不過食物就真係中伏了本身想食三文魚他他但賣曬，就叫咗明太子。就咁睇啲章魚燒係偏細粒，但每粒入面都好大粒章魚，明太子味都無問題，最大問題係個皮，非常硬，係真係硬，唔係脆。應該係太燶了。第一次食章魚燒係只食曬啲章魚無食個皮，真係搞唔掂，無下次。…查看更多

深水埗依頭都有好多糖水店，今日因為一班人去食，見佢比較多位，糖水都算多款式，就揀咗佢，就中咗伏啦。食物除咗味道，我諗賣相都係好影響食欲。我諗大家對喺糖水舖嗌雪糕都會期望佢係一球球，就算唔係一球都起碼𢳂得靚仔少少，而家依個賣相我覺得就真係好難令人接受，仲衰過食自助餐自己𢳂果個樣，仲要朱古力色真係聯想到啲咩你諗下。雪糕西米露都好難話會難食，佢個朱古力雪糕叫做好啲嘅地方係有朱古力碎碎，都有啲啲口感，只可以講真係個賣相影響整體感觀。…查看更多

依間想試好耐，但總店成日好多人排，今日經過2.0見無乜人就試下啦。但發現真係名過其實。叫咗灼餃八隻，味道可以，但問題係細隻、餡料少。平日八隻我都夠飽，今日食完要再叫小食。而且分湯上，啲餃再浸湯都係唔夠熱。小食叫咗沙薑雞翼，大隻，但淋得濟，似煮咗好耐。芝士蛋糕味道正常，未到要專登嚟食佢，而且又係太細舊。啲枱亦唔太好坐，本身店員叫我坐四人枱，枱太矮凳太高。後來有其他食客，我搬咗去bar枱，張櫈同枱都唔多穩陣，而且近門口都好熱下。店員唔夠，成日想搵人時都發現樓面無人。…查看更多

咁多人好評，但原來係一個伏。。。。。。話說本身攞位時已經覺得侍應態度好差，佢係寫住人齊入坐咁我未齊人，我都好乖喺門口等，突然有個侍應叫我入咗去先，咁我咪入去坐。過左五分鐘，入到去佢有另一組客人攞位，佢想趕返我出去，我想講再差嘅餐廳都唔會衰到想趕返個客出去。好彩朋友及時嚟到。但啲侍應喺間鋪入面勁大聲冷嘲暗諷，成餐飯食得極唔舒服。又唔係我自己主動要求要入嚟坐住等食物水準都十分茶餐廳，叫左個海鮮豬肉豆腐鍋，佢寫預設係中辣，但真心淡過水。雖然唔係貴，但真心食左都一肚氣，無下次…查看更多

兩三年無食過柳氏家，睇到報導話佢就結業就同朋友一齊再嚟食。以前係食完炒雞先再韓燒，所以我地為而家都係咁，一坐低就qr code落單二人份炒雞，等咗廿分鐘先嚟，點知好似廚餘咁嘅樣真係好過份，就執笠都唔係咁樣上枱掛。一個人食都嫌少，點樣兩人份？炒雞都係柳氏家嘅賣點嚟，咁嘅賣相仲要無味道，唔夠熱，真係非常失望。其他韓燒食物都正常，五花肉係比較好。而炸雞都好juicy，但我如果只為食韓燒炸雞又無乜必要嚟依度。…查看更多

成日覺得樓上cafe啲野食都唔太好食，志在同朋友舒服咁有個地方吹下水，點知依度又有驚喜喎！一入到去就見到好多minions公仔～餐廳安排咗我同朋友坐喺近窗角落位置，夠私隱度同坐得舒服～食物我地叫咗漢堡、忌廉汁雞肉闊條麵，上菜速度快，而且好香好好味另外叫咗小食炸蟹餅，有6件，好脆好香口，不過我覺得係炸龍蝦丸😂 飲品叫咗凍鮮奶朱古力，都ok！都夠香濃唔係溝勁多水嗰種見到佢有boardgame提供，不過疫情就廢事攞嚟玩～希望之後有機會再嚟～…查看更多

本身見咁多好評，價錢又好進取，都好有期望，但食完係好失望。首先講飲品，叫咗strawberry yogurt smoothie + 柚子yogurt smoothie。58蚊杯，都算大杯，前者正常，後者係藥水味。食物叫咗人蔘雞湯，完全顛覆我對人蔘雞湯嘅印象，入面得兩隻雞脾、幾粒菇、一隻鮑魚同幾條粉絲，無乜蔘所以兜湯係無蔘味，完全可一不可再。另外叫咗海鮮泡菜煎餅，依個幾好都幾脆，材料都幾多。仲有叫咗甜辣芝士烤雞，餐牌寫可以揀辣度，問店員有咩辣揀，佢答我「正常辣囉」，我真係黑人問號咗，正常辣即係有幾辣？？？味道係ok嘅，微辣甜甜地，有獅子狗係入面都幾有趣。食完依三樣嘢同朋友都覺得唔夠飽，再叫咗芝士泡菜溶岩炒飯，飯有少許硬，味道亦過咸。如果價錢around100蚊我會收貨，但差不多200蚊一道菜我就真係唔收貨。特別想講佢上菜係極慢！！！食完一樣等勁耐先有另一樣，所以成餐飯個感覺係食得好空虛，唔知自己食咗乜，亦唔太飽唔滿足嘅感覺。服務亦好麻麻。四個人埋單過千蚊，唔值。…查看更多

平日行海之戀都會經過依間餐廳，覺得裝修好好，環境氣氛都好舒適，所以就決定試一次晚上6點入座時無乜人，侍應都有問我地想坐邊個位置，outdoor近海邊好靚，但天氣咁熱就梗係揀indoor近窗邊。當日三個人食飯，坐一張小圓桌係有dd逼，不過上菜唔係一次過上曬所以都ok!我地叫左明太子海鮮意粉、大蝦三文魚意粉、一份medium嘅牛扒。明太子海鮮意粉好creamy，帶子煎得啱啱好。大蝦三文魚意粉就有dd失色，因為三文魚好薄，所以煎得好乾下。牛扒都一般、正常啦。服務方面，店員其實都勤力嘅，會主動幫我地換碟。但係，佢行埋嚟問我地「依碟仲要唔要」嘅次數實在太多，好似成日想趕我地走咁，明明無人等位又有吉枱。我會期待環境咁好嘅餐廳係可以chill住咁食，同朋友可以傾耐dd，而唔係好似食茶記咁食飽個肚就算。同埋，雖然環境好靚，但係太多射燈，影人像呢係會影到成隻鬼咁😂，所以我唔會話依間餐廳好適合打卡…查看更多

今日母親節，收費特別貴就預咗，叫咗幾碟點心份量都唔少，尤其排骨、雞紮、牛柏葉都都相當大碟。但係質素呢，碟牛肉腸粉話到俾你聽，一咬成舊生粉未溶喺入面，咁都攞出嚟俾人食，正常人都唔會就咁食一大啖未溶嘅生粉啦。。。。。之後請部長處理退款，佢話話到事嗰個唔喺度，只可以換過同價錢嘅俾我。唯有換籠流沙包，起碼唔會落生粉嘛。流沙包個味道還好啦環境好一般，唔會感到好乾淨。但特別想講成個場非常熱，一路食一路滴汗，食到成頭汗。無下次了。…查看更多

第一次嚟食，見openrice上以往comment好似幾好，就試下首先上咗南瓜湯，可能我本身唔太中意食南瓜，覺得好麻麻，比較淡叫左紅酒汁牛扒配薯蓉，好大份，好欣賞都配咗沙律菜，可以解下膩。但塊扒都幾多筋，而且太厚又煎得太熟，好難切又都幾柴下。不過味道都唔錯嘅，但又無其他食評講到咁好食。不過70幾蚊都值嘅餐飲加11蚊叫左凍朱古力，超級伏，甜到呀媽都唔認得，我飲咗兩啖就算另外想講下環境，枱與枱之間擺得好密下，要行出行入會影響到隔離枱，我都唔係幾好意思。而且枱比較細，疫情又有擋板，感覺超逼，我切牛扒時好辛苦，要就住就住咁結論係不過不失，下次可以再試下其他嘅…查看更多

本身見到佢農曆新年3-6pm優惠所以先想食，去咗青衣分店等咗個幾鐘一張飛都無郁過就決定轉去荃灣分店，點知就中伏啦去到唔洗等位，我地揀咗129加一食90分鐘。自助區十個兜九個空，依個情況係到我走(7點)都係咁，完全無refill，淨返嘅都係啲非常普通嘅白魚蛋同龍蝦丸，烏冬都俾人夾到一條都無。特別一提佢嘅丸類係未溶雪！前菜嘅泡菜勁難食，千其唔好攞！飲品區嘅冰又係一粒都無。甜品櫃又係得返幾件甜品，轉過頭都無曬。食嘅當晚係有晚市，依個零refill嘅狀態點捱到晚市？諗住出面無乜嘢食，不如嗌多一兩轉豬牛雞。第一次上嘅豬一碟4片，牛就5-6片，雞就6件左右。雞最正常，牛偏肥，豬較柴。再叫多咗一round，叫咗2牛2豬1雞。豬同雞同第一round份量一樣，但最嚇死人係一碟牛有成廿幾片，個份量多到咁點食啊......同埋第二round嚟嘅牛豬都係未溶雪，痴埋曬一齊，真心好差服務又係麻麻。途中我有一次上加湯，店員話無湯住叫我等下先，過咗陣佢突然喺我身後出現倒湯落我個煲，倒之前可唔可以出句聲先......以前我都幾中意食牛摩，但一兩年無食可以差到咁，等位又耐又無嘢食仲要唔好食，之後都唔會再嚟…查看更多