Don 918的个人专页

所有嘢都好抵食，性價比高，沙律新鮮，尤其係牛油果同埋無花果都好新鮮好好食，牛扒整得啱啱好，各樣嘢埋調味都好恰到好處，只係牛骨髓個人麻麻哋上面啲牛肉，雖然咁樣會令到牛骨髓冇咁膩，但係就會冚咗骨髓嘅味道，就對比起其他菜式就稍為遜色少少。鵝肝非常出色，好食過好多鐵板燒嘅餐廳👍🏻👍🏻👍🏻👍🏻，性價比超高一定要試吓！跟煎魚套餐嘅自家製薯粒口感好好，嚶韌好食。疏乎厘好特別，好大個好開心，甜品係好rich嘅Cheese cake ，甜度啱啱好。服務員服務態度都好好，各樣嘢都好快手，好有禮貌，係一個愉快嘅晚餐，會再幫襯！…查看更多

之前去呢一間餐廳食過幾次，無論食物定係服務態度都好唔錯，隔咗一個月到，今日再嚟食，見到全部人轉晒，今日嘅體驗超失望。每次我都係呢一間度食貴啲嘅午餐（$880）服務態度方面，我1:34到，原本都係book咗1:30，佢話因為上一批客人遲咗到，所以要我哋等一陣，一等係等咗20分鐘，食嘅時候，廚師都冇主動介紹菜式，要我哋主動自己問，侍應仲不斷嘆氣。之前我都又係呢一間餐廳度帶過生果嚟食，其實已經係熟客，嚟咗好多次，之前嘅廚師同侍應都係免費幫我處理（呢樣服務好多間都有）但係今日佢哋攞咗我個生果，並且應承咗幫我處理，後尾就嚟食完嘅時候竟然同我講話冇時間處理，然後俾返我就算數，毫無責任心！之後2:44啲嘢食都未上完，就即刻迫我哋埋單，都唔緊要，我照埋單，埋咗單之後，3:00連我哋嘅手卷都未食完，湯同甜品都未上，就直頭開埋對門逼我哋走，叫我哋搬出去食，試問有冇人鍾意係未食完omakase嘅時候有人開左對門，企喺你背後完全唔走，咁樣間接地畀壓力叫人走真係好咩？我話食埋先行，佢就喺隔離一路jip，一路大力執碗發脾氣，喺度掟碗，服務態度咁差！非常離譜！其實食omakase平均時間都起碼一個半鐘頭至到兩個鐘，而家連一個半鐘都冇，就逼我哋走，食物都未上晒，真係非常過分。食物方面，食物水準降低左，本來頭盤同埋Sashimi都冇問題，但係壽司飯一夾就散，並且太多Wasabi同toppings，有啲魚都鮮，但係比佢哋蓋住，但係最失望嘅係，有啲壽司仲要用魚生上面啲toppings蓋住魚嘅腥味，真係強差人意總括來講，今日嘅體驗真係非常之差，服務態度完全係一粒聲都唔值，食物嘅質素唔值呢一個價錢，本身我兩個月前都係成日去呢間食，嗰陣真係唔錯，廚師好nice有同我地有講有笑；完全估唔到9月再嚟，以前見過嘅廚師＆侍應都唔見曬，今日見到嘅都真係…可能大X樂嘅嬸嬸都冇今次某位waitress咁冇禮貌同埋串😹，大家考慮清楚去唔去…查看更多