cmc120的個人專頁

專做韓式外賣嘅店，除咗有多款即製嘅韓式餐點，仲賣凍肉同其他特色食品，啱晒鐘意韓國味嘅朋友。另外，佢哋仲有火鍋package，一包已經有齊晒材料，省時又方便。烤牛肉紫菜飯卷每一口都食到嫩滑嘅烤牛肉，仲有爽脆嘅青瓜同紅蘿蔔，份量適中，完全唔覺油膩，清新又飽肚。韓式炒粉絲粉絲彈牙而且有嚼勁，唔會煮得爛，配埋紅蘿蔔絲、菠菜同雞蛋絲，味道清新又唔會太重鹹，非常健康。韓式海鮮嫩豆腐湯（跟白飯）湯底辣味啱啱好，辣中帶鮮，飲落好暖胃，嫩豆腐滑溜得嚟唔會散，仲有蜆肉等海鮮，雖然唔算好多，但食落新鮮又有層次感，配白飯一流。韓式牛肉炒飯牛肉炒得香口，飯粒乾爽分明，辣度適中，非常惹味。…查看更多

皇牌咖喱牛腩煲啲牛腩好腍，入口即化，咖喱汁濃郁但唔過辣，拌飯一流。椒鹽一支骨外皮炸得香脆，入面啲肉仲保持嫩滑，而且椒鹽調味好惹味。吉列魚柳配薯條吉列外層炸得金黃香脆，魚柳鮮嫩冇腥味，配埋薯條同埋佢哋特製嘅醬，幾簡單但好滿足。紅豆冰冰室必叫！紅豆煮得好腍但又保持完整，唔會太碎，粒粒分明，每一啖都食到啲紅豆嘅天然香甜味。底層係幼滑嘅淡奶同糖水，甜度啱啱好。加$10轉套餐有例湯、白飯同飲品，真係抵食，例湯係老火湯，味道濃郁，夠暖胃。加$18有白灼菜心苗，清爽健康，平衡晒成餐嘢嘅油膩感。…查看更多

餐廳內嘅光線偏柔和，燈光係暖黃色，營造出舒適同溫馨嘅感覺，非常適合家庭聚餐或者同朋友慢慢傾計。座位安排得好有私隱度，坐得好舒服。蟹粉海皇翅湯底濃郁，蟹粉新鮮，海皇翅食落口感滑溜又有層次，唔會太稀，亦唔會過分濃稠，味道啱啱好，真係好暖胃。紅燒乳鴿金黃色嘅外皮閃閃發亮，聞落已經有陣陣撲鼻嘅香氣，令人食指大動。佢嘅皮燒得非常脆，啱啱好係嗰種入口即化嘅程度，完全唔會覺得油膩。鴿肉本身非常嫩滑，汁水豐富，咬落去每一啖都充滿肉香。鐵板西班牙叉燒鐵板上枱嗰陣嗞嗞聲好吸引，叉燒帶有少少煙燻味，肥瘦適中，肉質鮮嫩，仲有啲微微甜味。臘味炒芥蘭用咗三款唔同嘅臘味，有臘腸、潤腸、同埋臘肉，炒得好香，芥蘭爽口，臘味鹹香同菜嘅清甜融合得幾好。生磨蛋白杏仁茶仁味濃郁，唔會太甜，仲有蛋白攪成嘅綿密口感。薑茶湯圓姜味夠哂辣勁，湯圓煙韌，黑芝麻餡香滑。張公館不單止係食物出色，仲有一個無敵嘅地理優勢——餐廳嘅窗口位可以飽覽維港嘅迷人景色，絕對係一個加分位！如果你揀到近窗嘅座位，就可以一邊品嚐精緻嘅佳餚，一邊欣賞維港嘅壯麗景致，真係一種視覺同味覺嘅雙重享受。…查看更多

It offers a unique dessert experience that truly stands out! The freshly baked croissant cone is crispy and warm, perfectly paired with creamy yogurt, creating a delightful hot-and-cold combination. Their pistachio ice cream is a highlight—rich, nutty, and smooth without being overly sweet. The banana waffle is made fresh, emitting a delightful aroma and achieving the perfect balance of crispiness and softness. It’s also pet-friendly, providing adorable cups for furry friends. Plus, they’re open until midnight on weekends, making it the perfect spot for a late-night dessert craving!…查看更多

專注用雞嘅唔同部位製作串燒，仲結合咗酒吧元素，環境相當闊落，燈光柔和，氣氛舒適，無論同朋友聚會定係約會都啱晒。餐廳主打係慢工出細貨，將雞嘅美味發揮到極致，值得一試。慢煮松露雞卷肉質鮮嫩，松露嘅香氣滲透到每一口，真係回味無窮。雞肝茶碗蒸成個碗底鋪滿咗滑溜濃郁嘅雞肝，配埋嫩滑嘅蒸蛋，口感豐富。稀有部位串燒雞軟骨燒得香脆，咬落仲有啲微微嘅煙燻香氣；雞腎內裏滑嫩，味道濃郁，帶少少獨特嘅鮮甜；至於雞腳筋就彈牙爽口，咬落嚟特別有嚼勁，完全係口感控嘅天堂。嚴選部位串燒雞翼皮脆肉嫩，啖啖都充滿肉汁；大葱雞肉串燒結合咗大葱嘅微甜同雞肉嘅鮮香，兩者味道互相平衡，唔會過於油膩；而雞皮就係燒鳥經典，外皮燒到微焦香脆，油脂豐富但又唔會太膩，香氣十足，非常滿足。素菜串燒秋葵串燒同青椒串燒煙燻香氣配上蔬菜嘅自然甜味，令人一試愛上。慢煮三黃雞白湯湯底超級濃郁香甜，充滿雞嘅鮮味，飲落勁暖胃!!!雞蛋蓋飯用上滑溜嘅溫泉蛋鋪喺飯上，再加上自家製醬汁，簡單但好出色。香蕉雪糕配抹茶蛋糕雪糕香甜細膩，配埋濃郁嘅抹茶味蛋糕作結尾，完美劃上句號。整體嚟講，鳥駅真係一間好值得再訪嘅燒鳥店，無論係食物質素定係用餐氣氛都一流！…查看更多

餐廳設計時尚簡約，暗黑色調配合柔和燈光，營造出一種高級又舒適嘅氣氛。另外，餐廳仲設有一個露天位置，面向中環高樓林立嘅城市景觀，非常適合情侶浪漫約會或者朋友聚會chill一晚。服務員非常細心，對每一道菜式都會仔細介紹，令人感受到貼心嘅待客之道。Akagai 海螺鮮甜，口感彈牙，配上精緻嘅醬汁，味道清新而層次分明。Shredded Celtuce Salad 萵筍絲爽脆，酸甜嘅調味令人食慾大開，係一道非常適合作為前菜嘅選擇。Caramelized Pumpkin 焦糖香味濃郁，入口軟滑，甜而不膩，完全改變對南瓜嘅印象。Charcoal Grilled Eel 外皮經過現場炭燒，香脆惹味，內裡鮮嫩，味道層次豐富，非常適合打卡。A4 Wagyu Cutlet Charcoal Sando，牛肉入口即化，配上微微焦香嘅炭烤麵包，每一口都令人回味無窮。抹茶芝士蛋糕 細滑綿密，抹茶味濃郁而不苦澀，完美平衡咗芝士嘅香濃同抹茶嘅清新，入口即融，層次感豐富。而 迷你蜜瓜大福 外層糯米皮軟糯Q彈，內裡包住甜美多汁嘅蜜瓜果肉，清甜滋味瞬間沖走之前嘅濃郁口感，為整餐劃上完美句號。Jade 以茉莉花茶為基底，散發出淡雅嘅花香，入口清爽酸甜，輕盈而不失層次，令人感到舒適清新。Onyx 則以煙燻風味為特色，入口時濃厚嘅烈酒基底帶出煙燻同草本嘅香氣，尾韻豐厚圓潤，非常有深度。總括嚟講，AOAO餐廳喺環境、服務同食物上都表現得非常出色，無論係視覺、味覺定氛圍，都令人感受到細膩同誠意，絕對值得一試！…查看更多

主打湯底同米線，選擇多，價錢算係灣仔區好親民，特別啱上班族快快手解決一餐！花膠濃湯雞米線魚腐湯底係比較清淡嗰種，但勝在唔會太鹹或者太油膩，飲落幾舒服。雞肉份量多，魚腐幾彈牙，米線份量啱啱好，食落飽肚又唔會太重負擔。酸辣金菇滑牛米線，酸辣味道啱啱好夠開胃，滑牛肉片唔會太老，金菇分量足，整體食落順口。秘製雞翼雞翼炸得幾香口，皮脆肉亦嫩，當米線配菜就啱啱好。整體嚟講，環境又乾淨企理，啱晒一班上班族中午快手飽肚，係灣仔區一個不錯嘅入門選擇！…查看更多

氛圍感滿分！燈光昏黃柔和，裝修用咗好多木質元素，好似真係置身日本嘅居酒屋咁，適合同朋友輕鬆飲飲食食，真係好Relax！爆蔥吞拿魚蓉玉子燒串玉子燒軟嫩滑溜，配埋鮮味濃郁嘅吞拿魚蓉，仲有爆香嘅蔥花，入口層次感好豐富！唐揚池魚仔炸得外脆內嫩，魚仔細細條，鹽味適中，當小食一流，配啤酒簡直完美！芥末鰈魚邊呢個係驚喜，鰈魚邊肉質嫩滑，芥末味帶微微刺激，唔會太搶味。青瓜長片明太子小龍蝦沙律清新又開胃！青瓜爽脆，配上咸香濃郁嘅明太子醬同小龍蝦肉，食落非常滿足，係道好適合夏天嘅菜式。鷄肝（香濃嫩滑），鷄肉提子（肉汁豐富，提子微甜好解膩），墨魚香腸（彈牙又入味），同 燒豆腐（表面微焦，內裡滑溜又吸味）！明太子燒飯團 外層燒得微焦，飯粒咬落香口，配埋咸香嘅明太子，簡單但好味！屋台廣島蠔炒麵麵條炒得乾身，蠔非常鮮甜又肥美，口感豐富。鴨胸鹽味拉麵湯底清新，鴨胸煮得啱啱好，肉質嫩滑，鹽味簡單襯托出鴨肉嘅鮮味，係一碗令人放鬆嘅拉麵。燒到微焦嘅菠蘿釋放出天然嘅甜味，食完主菜後用嚟清口最適合唔過！整體嚟講，酒間一杯喜真係一間值得一試嘅居酒屋，食物水準高，選擇多元化，氣氛又好，下次一定會再嚟試其他菜式！…查看更多

雖然地方唔大，但係開放式廚房，全部即叫即整，睇住師傅手勢利落，環境仲好乾淨，服務員態度親切有禮。德式燒咸豬手（特大）絕對係必點！外皮燒得香脆，入口脆卜卜，肉質保持到嫩滑又juicy。分量真係超足，一份一家人食都夠飽！慢煮醬烤肋骨（珍寶） 係另一個驚喜，肋骨煮得好入味，醬香濃郁，肉質嫩到一夾就散開，完全唔使點力咬，啲骨都可以乾淨到冇肉剩，真係無得彈！德式烤腸仔飯配黑椒汁 香腸多汁彈牙，黑椒汁有層次感，米飯煮得軟硬適中，份量夠多！酒醉海蜇係即食包裝！呢個真係超方便嘅選擇，平時唔想煮嘢食，或者突然想嚟啲清新嘢解膩，開包即食，完全冇難度！整體黎講，呢間燒烤外賣店性價比真係超高，份量夠多，味道又好，而且環境仲乾淨企理，對於一啲想喺屋企輕鬆食好嘢嘅人，燒洒一族真係唔會令你失望！下次一定會再叫多幾款試下！…查看更多

雖然餐廳唔算大，但環境舒適，服務態度都好好。關西牛肉燒配牛肝菌意大利飯牛肉燒得啱啱好，肉質嫩滑又唔會太乾，牛味夠濃。牛肝菌意大利飯嘅飯芯煮得岩岩好，帶少少咬口，菌香同牛肉味真係好夾。厨師發辦 - 日式咖喱海鮮意大利飯配炸廣島蠔咖喱味唔會太重，帶少少日式甜味，配埋新鮮嘅海鮮，特別係大隻肥美嘅廣島蠔，炸得外脆內嫩，真係加分位。追加咗黑松露野菌湯（+$48），湯底好creamy，松露味香濃但唔會過頭，飲落去好暖胃。仲有杯檸檬茶同美式咖啡，啱晒飯後清口。甜品方面，有5-6款甜品揀，寫左落黑板度。我揀咗 Tiramisu 同 伯爵茶芝士蛋糕，兩款都唔會太甜，Tiramisu嘅咖啡味好出，芝士蛋糕就有淡淡嘅茶香，清新又唔膩。…查看更多

灣仔嘅一級商務食府，亦都係唔少商業精英鍾意嚟嘅飯堂。呢度嘅商務午市套餐性價比真係超高，兩個人$350左右就可以食到一級餐廳嘅水準，絕對係抵食之選！燒椒皮蛋係開胃菜，皮蛋入口滑溜，燒椒帶少少炭燒嘅香氣，微微辣但唔過火，配埋啲醋系幾醒胃嘅。之後上咗蓮藕湯，清甜啖啖滋潤，啲蓮藕煲到腍身但仲有啲咬口，湯底味道唔會太鹹，飲完覺得好舒服。主菜其中一道係十八秒牛肉，呢道菜真係出色，牛肉嫩滑得嚟有肉味，炒得剛剛好，唔會過熟，仲保留住啲肉汁，配個白飯真係一流。另一道砂鍋虎皮豆腐又係亮點，豆腐煎得金黃焦香，砂鍋入面嘅汁收得好好，帶有少少辣味，幾惹味。飯用嘅係東北大米，粒粒鬆化分明，飯香濃郁，配埋主菜真係好夾。最後嘅甜品係清清地嘅糖水，甜度適中，食完唔會覺得膩。…查看更多

鐵板牛舌，有成10塊咁多，而且口感唔會太韌，香口又夠惹味。羊架亦都係必試，肉質嫩滑，啲香料滲入得好入味！蒜蓉焗金菇，蒜香味濃郁，金菇爽脆。芝士蘑菇拉絲效果一流，配埋蘑菇嘅香氣，好滿足。至於蒜蓉焗生蠔，份量幾足，蒜香味濃郁但唔會搶走蠔嘅鮮味，值得一試。翠玉瓜串燒清新解膩，食完重口味嘅串燒後嚟一串，啱啱好中和返。主食方面，特上虎蝦鍋燒手打烏冬真係好出色，虎蝦又大又鮮，烏冬彈牙，湯底係餐廳自己熬製嘅，濃郁但唔會太膩。麻辣燙亦係亮點之一，真係料足到爆，大大碗，價錢平，啲配料新鮮又多選擇，辣度可以調節，鍾意辣嘅朋友絕對唔可以錯過！最後仲想讚下佢哋下午茶時段嘅優惠，凡惠顧雲南米線系列，加兩個餸仲送凍飲品，性價比極高！總括嚟講，呢間餐廳無論係味道、份量定價錢都好值！…查看更多

無論係食物、環境定服務態度，都係一次超滿足嘅體驗！試咗八府巡按套餐同九品芝麻套餐。每人一個蒸氣鍋，自己蒸自己食，衛生又健康！而且有蒸煮時間嘅指引，每款食材幾分鐘最好食，一目了然，初次嚟都唔怕手忙腳亂。八府巡按套餐嘅海鮮真係超豐富，有白蜆、北寄貝、鮑魚、元貝、貴妃蚌、鮮魚片、龍蝦半隻同蟶子皇，仲有泰式生蝦作頭盤，啲海鮮真係超鮮甜，蒸完啲肉質嫩滑，一啲腥味都冇！另外仲有安格斯牛肉、雞肉同豚肉片（3選2），再加三寶丸（牛骨濃汁牛丸、薑汁皮蛋貢丸同招牌墨魚丸），每樣都好彈牙又多汁。最後仲可以加麵或者粥，我加咗蟹肉蟹膏粥，吸晒啲海鮮精華，味道超濃郁，真係完美收尾！至於九品芝麻套餐就簡單啲，海鮮種類少啲，冇龍蝦、蟶子/蟹，但價錢平啲，性價比仲係幾高，適合想輕鬆試下嘅人。最後甜品係Haagen Daz雪糕，食完海鮮嚟個清新甜品，Perfect！餐廳環境好舒服，燈光柔和，服務一流，真係好貼心。最正係而家打卡仲可以抽獎，有啲小驚喜，真係加分！我竟然中左鮑魚，真係超開心！…查看更多

試咗佢哋嘅「極上盛宴二人前A餐」，貪佢乜都有啲咁。整體嚟講，呢個價錢有呢個質素算係幾好。個Set選擇都幾齊全，牛舌、和牛、豬肉、雞肉、蝦、鮑魚、帶子都有。和牛油花分佈算靚，又唔會太膩。牛舌都係必試之選，燒到微微焦香，咬落又彈牙又多汁。仲有個蔬菜盤，食完肉可以解下膩。前菜櫻花龍蝦沙律豆腐同金目鯛刺身沙律都好新鮮，幫助解膩之餘又幾開胃，份量都足。最後個草莓牛乳凍奶味濃郁，係個好好嘅結尾。環境舒適，地方寬敞。…查看更多

正常飲茶環境，服務員態度熱情，啱晒一家大細或者朋友聚餐。滷水鵝片就係潮州菜嘅靈魂，鵝肉片薄得嚟啱啱好，滷水滷得入味，鹹香味濃但唔會死鹹，食落有少少中藥嘅香氣，感覺好傳統。除左潮州菜外，其他菜系都有得食，唔怕只係食潮州菜咁悶。川椒龍鳳球有蝦球同雞肉，川椒嘅麻辣勁香但又唔會太搶味，係啱啱好嘅辣度。椒鹽鮮魷炸得香脆爽口。鮑魚雞粒海皇燴飯都多鮑魚同瑤柱，海皇汁濃郁得嚟唔會太膩。整體份量足料，同菜式選擇多。…查看更多