sav.zzz的个人专页

出左尖沙咀行街，行到餓想食韓式炸雞😺揀左呢間李家，佢鋪位位置比較偏僻，都搵左一陣路先搵到。我哋兩位未到六點嚟到，唔洗等位，坐低有前菜椰菜絲同醃蘿蔔送👍🏼今次目標係炸雞，我哋叫左半份(蜂蜜蒜香)×半份(蛋黃醬香蔥)嘅無骨炸雞，另外見芝士雞蛋卷好似好吸引，就加多左份試下！蛋黃醬炸雞好脆好多醬，雞肉好嫩滑👍🏼蜂蜜蒜香炸雞都一樣好脆，好甜，但無咩蒜味，覺得蜂蜜汁唔太似蜂蜜味，味道同想像中嘅唔同，有點失望。芝士雞蛋卷賣相就好靚，不過雞蛋就係好普通嘅雞蛋卷嘅味道，而入面舊芝士做到超拉絲效果，但食落就只係一大舊芝士。份雞蛋卷好大份，但味道就好一般啦。半份加半份嘅炸雞，份量好多，半份都已經有十幾件，再加上咁大件雞蛋卷，我哋得兩個人，唯有打包返去繼續食啦！…查看更多

同朋友去開西灣河，想食川菜辣味野，黎左呢間試下！我地叫左烤魚（小辣）食，條魚皮脆肉滑，隔離有啲芽菜、木耳，入哂味，好食！小食叫左「跳跳魚原條茄子」同土豆絲，茄子都夠哂淋夠哂入味，土豆絲酸酸辣辣，好開胃！…查看更多

今次黎到荔枝角，又要搵野食，食下台灣野先。😄黎荔枝角食野通常都係D2 Place，一係億利工業中心，夠方便。好耐之前己經聽過有朋友話黑布小巷好食，一直都未有機會試，今次終於有機會試下。坐低掃 QR code點餐，落單一次過俾埋錢，夠哂方便。👍睇餐牌其實無咩選擇，主要得吐司同滷肉飯揀。因為同朋友食晚飯，想食飯類，所以就揀左食滷肉飯。講到食台灣野梗係要配埋小食，我地加$28一人配左一個小食share，台灣腸同花枝丸，再加$5配佢地自家制嘅冬瓜茶。滷肉飯滷肉好好味，仲有兩片酸蘿蔔，酸酸地夠開胃！台灣腸咬落去爆哂汁，超好食！花枝丸揀左辣粉味挑戰下，花枝丸炸得脆卜卜，辣粉真係好辣，辣到我地係咁飲冬瓜茶…😆個冬瓜茶唔算甜，有清涼甘甜嘅感覺，好好飲。👍下次再黎荔枝角，想食台灣野一定會再黎黑布小巷食返個滷肉飯！…查看更多

打工仔LUNCH TIME又喺上環覓食，平時午餐黎開呢間印度餐廳，鐘意佢夠哂地道，另一個原因係因為佢午餐夠哂抵食。隔左一段時間再黎，發現餐牌唔同左，套餐價錢比之前貴左一截，凍檸茶竟然要加$10。食開呢度咖哩雞／咖哩魚／咖哩牛嘅咖哩都唔一樣，平時鐘意食咖哩雞，咖哩味香，或者食咖哩魚，椰汁味較重。不過加價後就唔知食物質素有無變啦，下次有機會再試過！以前咖哩牛比雞／魚貴少少，留意到轉餐牌後統一左牛／雞／魚套餐嘅價錢，今次就揀左咖哩牛，一如以往配印度薄餅、跟餐叫左餐湯、熱檸茶。呢度嘅餐湯都係偏重香料胡椒，飲落夠哂暖胃。咖哩香料味重，無乜辣味，牛肉有５—６粒，薯仔粒１—２粒，牛肉夠入味，可惜太多筋好難咬，口感好差。印度薄餅黎到熱辣辣，唔係脆口嘅薄餅，質感有啲似麵包，但點咖哩咁食夠哂惹味！同場加映，友人點左印度烤雞，黎到係出哂煙，烤雞味好香，好似串燒咁嘅香味。試食左一塊雞肉滑嫩入味，好香燒烤味，但因為無汁，配飯／薄餅都會覺得有啲乾。總結，午餐加左價，性價比自然覺得低左。食物方面，咖哩牛一般，唔推薦，但印度烤雞係好味嘅！…查看更多

今次喺銅鑼灣做完運動，想補充下蛋白質，諗起之前食過龍城冰室早餐覺得唔錯，就試下佢下午茶啦！呢度下午茶好多選擇，因為今晚要食晚餐，就唔食粉麵飯，嗌左份瑞士汁雞脾配薯條。🍗🍟本來想試下香辣脆炸雞脾，不過侍應就提一提我要等20分鐘，而瑞士雞脾就5分鐘有得食！今次太肚餓，唯有下次再試炸脾啦！瑞士雞脾夠哂入味，好食！😋 薯條跟左兩包茄汁，係茶記薯條嘅味道，夠脆口不過就要自己落鹽。奶茶就澀左喲，勉強飲左半杯就頂唔順。呢餐一個人黎食，食左$42，雞脾係好食嘅，下次再黎銅鑼灣搵食，再黎試下其他野食啦！😉…查看更多

繼續搵靚早餐食呢一日胃口一般，想食個清清地嘅早餐。黎到鰂魚涌，呢一間喺大馬路嘅茶餐廳港鐵站出口行2分鐘就到，地點真係好方便。呢間店鋪仔細細，裝修簡單，大概得二十個位左右，9點30早餐時段，都見到有半數座位有客人食緊早餐。呢度有養生淮山蓮子粥做早餐非常特別，亦有提子乾牛奶麥皮好健康！佢個鮮薑汁鮮雞湯麵都喺出面未見過，今次無揀到佢，下次再黎一定要試下！我揀左鮮忌廉雞湯配仿鮑魚火腿絲通粉 配鮮奶炒日本蛋＆厚多士。鮮雞湯好有鮮味，湯底好有驚喜！鮮奶炒蛋果然特別香滑！好味！ 唯一可惜係個多士唔夠脆口。價錢黎講呢度嘅早餐唔算平，但睇返食物質素，呢個價錢都算值得一試～今次早餐好滿足，俾個個湯底先，食完靚早餐又要出發活動一日啦！…查看更多

一向鍾意四圍搵野食嘅我，又去一早出門搵早餐食沙嗲牛肉麵係我早餐至愛，試過好多唔同地方嘅沙牛，今次一早過到黎灣仔，搵到呢間茶餐廳好似幾多笑哈哈，就試一試先。期待滿滿咁準備食一日嘅第一餐…好可惜沙嗲牛肉麵個麵係淋嘅，牛肉無牛肉味，沙嗲味道平平，一路食都唔係好食得出自己食緊啲咩。炒蛋，唔難食，食普通嘅炒蛋。多士，都係淋嘅……我飲過好多地方嘅奶茶都係唔好飲嘅，奶茶又澀又唔香．而呢杯奶茶就係一杯唔好飲嘅奶茶。呢個早餐一啲都唔滿足，食完成個餐只能用難食黎形容，真係好失望………查看更多

Lunch time 搵食經過信德中心，見到呢個鋪位好似同之前唔同左，就諗住試試佢！MENU好多選擇，有米線/酸辣粉、點心、燒味等等、午餐Menu仲有焗飯/意粉、川菜、炒飯，仲有燉湯！食物類型都幾多。本來心思思想食酸辣粉，但點餐前見到隔離枱出左原條饅魚炒蛋飯，好大份、而午市包熱飲價錢只係$68，感覺好抵食，賣相亦好吸引！即刻決定要試一試佢！平時出去食鰻魚飯，閒閒地都六七十蚊，但通常只係得幾片鰻魚，第一次見原條咁上，一上菜己經覺得好滿足．佢蛋嘅份量都唔少，我估計應該至少用左３隻蛋。份量黎講，超級抵食又夠飽！味道方面，炒蛋味道正常，都好夠滑。鰻魚黎到暖暖地，可惜以正常速度食，食到一半已經開始凍，口感同味道就同平時超市買雪藏蒲燒鰻魚一樣，不過不失咁啦。以呢個價錢黎講，性價比係高嘅！…查看更多