hollisss的个人专页

喺元朗附近做嘢就順便揾下有咩食店試下，見到有人話呢間啲梅菜蒸鯇魚幾滑（雖然佢餐廳名賣燒鵝），咁就試一試佢。入面係普通茶餐廳格局，一張大圓枱可以坐4～6人，繁忙時間有機會需要同人搭枱。入舖一坐低就唔多諗直接叫梅菜蒸鯇魚，配凍飲+$3，店員會主動問你想要咩部位，我就一定㨂魚腩，而個餐跟例湯，當日應該係椰子雞湯，都算夠味、唔似味精湯。大約10分鐘左右之後就上埋蒸魚，睇落條魚應該係即蒸，啲肉嘅口感係新鮮，唔似某啲餐廳一早蒸定、啲肉霉霉哋/嚡熠熠。食飯途中都有其他人叫蒸鯇魚，可能真係呢間舖嘅招牌菜之一。…查看更多

喺附近搵食，見呢間咁多好評，而台式餐廳通常無伏，咁就入去試下佢。六點幾入去時得2枱人（之後七點左右入多3、4枱人），台式裝修都唔錯，但實體餐牌同scan QR code入面menu啲菜式名有啲出入，腦內掙扎咗一陣最後兩個人揀咗香蔥油嫩雞乾伴麵&花雕醉雞&紅燒白蘿蔔&滷排骨&柳丁紅茶。一開始上咗花雕醉雞，聞落都有酒香而味道都算唔錯，跟住上埋柳丁紅茶，我第一眼就覺得有啲奇怪，橙汁喺底紅茶喺面，即係要我自己攪勻？以為自己飲緊咖啡dirty攪勻後飲落唔錯嘅。第二道-紅燒白蘿蔔，望咗幾眼，紅燒？邊度紅燒實情係普通滷水白蘿蔔，不過都夠淋嘅，但味道較淡口。第三道-香蔥油嫩雞乾伴麵，再一次黑人問號，嫩雞塊變雞絲，問過店員話轉咗雞絲但無改menu, 好在我唔係做海關，如果唔係佢哋即場斷正，不過轉咗都唔重要，但嚡熠熠雞絲同嫩雞真係無親戚關係，啲麵亦有少量未煮開。最後一道滷排骨（食咗一塊先記得影相），肉質軟腍有汁，係幾好食嘅，推薦推薦。整體嚟講味道算係唔差嘅，不過食到拗晒頭，希望之後會有進步，暫時唔會有打算二訪。…查看更多

早排睇啲social media吹捧就一定要嚟試試，之前第一次去先知要分時段排隊攞籌，而當時下一輪籌要隔好長時間，結果要敗走。今次去到就無咗上次嘅攞籌情況，無特別諗嘅情況下我揀咗三文魚奶油意粉（寬扁意麵）&小牛肉配吞拿魚醬&橙汁，等咗大約10分鐘左右就已經有得食。前菜嘅小牛肉配吞拿魚醬無特別擺盤，我覺得味道可以嘅，肉質正正常常。我比較期待個餐重點-意粉，我選擇嘅係三文魚奶油意粉，揀咗寬扁意麵，食咗頭一啖就心諗：「唔通正宗意粉係咁嘅質感？」，個質感實而有少少粉粉哋，又唔算係未熟，但食到痴晒牙咁，而三文魚就正正常常，醬汁方面味道就唔錯嘅。結論係無下次…查看更多

夜晚喺葵廣巡咗一圈，最後揀咗呢間舖，排隊排咗半個鐘左右就有位入。原來係坐細枱，細枱會坐得有啲侷促，而枱底有細勾可以勾起啲袋。之後店員見有大枱空出嚟就安排我哋兩個人轉枱，而下一個只有一人就坐我哋原本坐嘅細枱，店員都識靈活安排。兩個人最後總共叫咗3樣：砂鍋桃膠雪梨椰子雞，砂鍋水煮雞，雞湯蘿白。佢哋嘅出品同舖名一樣係湯同雞，首先湯底夠雞味，係好味嘅，唔似味精湯，其次啲雞都算唔錯，小食蘿白有驚喜，食到好飽，如果遲啲有機會嘅話會二訪。…查看更多

星期六下午1:30左右開始排，大約排半個鐘終於入到去。餐廳個環境幾新淨亦幾有泰國feel嘅，不過地下有輕微跣。兩個人最後叫咗泰式牛肉船麵+泰國龍眼水+沙嗲豬串燒+泰式青芒沙律+芒果糯米飯，每個飯麵主餐都可以配set lunch飲品。豬串燒味道幾驚艷，整體味道係唔錯，應該會二訪，不過船麵&泰式沙律都有唔少芫荽，唔食嘅朋友落單時可能要預先叫佢哋走芫荽（見到好多人叫火山排骨，諗住下次試下就問下店員，但佢話火山排骨係落芫荽+芫荽汁）。…查看更多

喺OpenRice search附近餐廳見到呢間新開台灣嘢就行去試下，去到見間餐廳有空枱但無安排人入去坐，可能人手應付唔到/出菜慢。排咗一陣，兩個人坐低點咗「大甲芋泥芝士肉鬆蛋餅」&「麻吉三小碗」。第一道上枱係蛋餅，食落口就覺得有啲伏，個蛋餅係常溫唔熱，裡面仲落咗沙律醬，啲芋泥味係無嘅。之後等咗半個鐘左右，三小碗終於上枱，三碗份量唔多，適合只得一個人但想試幾道菜嘅人：墨汁鹽酥雞都係常溫，炸嘢都可以係常溫咁可能係預製品但翻熱唔夠，味道亦普普通通；麻吉滷肉飯係微暖，味道係唔錯嘅；蚵仔麵線一樣係微暖，如果有喺台灣食過阿宗麵線就知道係邊種麵，不過裡面有蚵仔&豆卜，麵線味道唔錯嘅。總結嚟講，敗筆在於食品似預製品，廚房亦唔知係咪加熱器材不足，唯一優點係侍應服務態度好，亦會主動加水。…查看更多

咁啱經過附近諗lunch食乜，見有間小店就幫襯下。中午時間初時得2、3個客，之後有5、6個人就開始feel到冷氣爭啲。叫咗個雙拼麵：牛腩+蔥烤豬扒，雪菜湯底，再加杯豆漿，總共$49+$6=$55。豬扒雖然已經薄切但仍feel到「鞋」，反而牛腩夠淋夠入味，叫做拯救返半碗麵，而個湯底都幾有味。豆漿就咁啱聽到隔離枱問，樓面話係有加糖，不過我感覺唔算特別甜。期間有個客拎外賣又拉住個手推車，樓面阿姐好主動去開門比佢，服務+1。整體嚟講都唔錯（撇除個豬扒），要求唔高嘅可以支持下小店，不過要注意佢哋只收現金。…查看更多

要排一陣隊，睇嚟有一定人氣。雖然環境唔係十分寬敞舒適，但至少唔算迫。職員態度亦積極有禮。坐低無耐就叫咗個咖喱吉列廣島蠔蛋包定食+黑蜜椰奶紅豆豆乳。咖喱吉列廣島蠔蛋包定食：隨餐附送綠茶&味增湯，綠茶清淡，適合唔鍾意太苦嘅人，味增湯亦味道適中。至於主角，蛋唔會過熟，咖喱味都可以，吉列蠔雖然算唔上好juice但亦夠蠔味。黑蜜椰奶紅豆豆乳：一開始飲都有少少椰奶、豆奶味，但啲冰開始融之後就偏淡，建議大家叫少冰，整體味道係唔錯嘅。…查看更多