嘩華~的個人專頁

兩年無機會返其中一個家鄕，難免一見有新開既台式餐廳都會去試下。紅燒牛腩刀削麵湯底濃而唔喊，牛腩鬆軟而唔散，伴菜就小咗一啲，比多兩條菜會梗吸引。麵質岩岩好唔硬，就算浸耐咗都唔會冧晒，黎個就係刀削麵特質。拜托唔好夾硬要求煮冧啲麵，要食冧，不如食番幼或者粗麵。海苔肉鬆起司蛋餅得一個字「正」！就係黎個味道喇！好鬼掛住呀！起司用量岩岩好，有時唔係一味多就好食，肉鬆海苔根本就係絕配。下午茶黎既話，完全唔使點主餐，食佢攪掂晒！再黎既一定一定要番點QQ地瓜球分別有甜薯同普通地瓜，一口一粒，外面層粉幾似係酸梅粉，但我哋兩個人食晒成兜都唔知係咩，只係覺得甜甜地，個味好夾，好味到一粒接一粒咁食。酥炸魷魚初頭俾人嚇一嚇，話份量係一大隻，今次得兩條友食有諗過唔叫。因為忍唔住口，所以叫少咗個主食而換嚟佢。 好彩就係忍唔住，唔係會錯過咗咁好食既魷魚，口好食到不得了，脆而唔油，食完果張吸油紙都無乜油漬，應該真係唔油，而唔係我哋食得太快所以吸唔到油嘅。主餐碗麵都未食完就已經食晒喇。 鹽酥雞最後又點少得鹽酥雞同酥炸魷魚一樣一滴油都冇都無，味道又啱啱好唔喊，粒粒都係雞肉，唔會無啦啦有一粒、兩粒甚至三粒係得番塊雞皮。胚芽奶茶雖然係叫凍飲但係冇冰，甜度要咗5分，對我完全岩岩好。又或者小食全部都係喊味嘢，所以先唔覺甜掛 食完成餐飯都冇覺得勁行勁口渴。咁已經做得好過好多。可能鋪面細，數埋大約得10零個位，所以要都等咗好一陣架。但都值得既。…查看更多

想食扒餐，但又未必撞岩有朋友仔/同事仔岩食，話晒食晏，好多人都唔想食咁heavy。行到黎，見到餐牌有牛脷，就被吸左入去。之前有同同事黎過，今次一支公，但就遇上左其中一個至愛-牛🐮Set lunch 包餐湯（羅宋湯、洋蔥湯 同 粟米忌廉湯）跟蒜蓉包一片。湯料好足，夠晒味，絕對唔係加水翻煲再翻煲，片包邊係脆，但中間就冧，唔係全片都脆，另外蒜蓉醬可以再多D就正。主餐一上，嘩，好彩叫少意粉，因為牛脷既份量真係好多，大半條都有。醬汁夠，牛脷又冧，真係好好好食。意粉沒被𣺉上醬汁，感覺無咁heavy，不過意粉好快就凍左，口感自然就變得嘛嘛。Set lunch包熱飲，凍飲加$2。午餐$55起，又湯又餐茶，仲要好食，真係好抵架！餐廳仔，午餐都做三款餐湯，水準都幾好，真係好少見。但亦都係咁，不時有客仔攪錯，誤會洋蔥粟米湯係一款湯，今日就聽到有三枱客係咁。另一次黎食飯，最誇張一枱4人，全部都誤會晒，果次係羅宋湯、洋蔥湯和忌廉龍蝦湯，一人誤會洋蔥忌廉為一款，龍蝦湯為另一款；另一人就誤會洋蔥、忌廉、龍蝦分別為三款湯；最好笑係有一個落單時以為係湯料有得㨂咁，竟要求「湯要洋蔥加龍蝦」（佢真係咁講），落單既要逐個客解釋，我就聽到差D笑左出黎。…查看更多

元朗有名甜品之一 -《泛后甜品》重開，渣車入去都要幫親。位置係舊舖對面，非常易搵。重開消息係FB得知，亦都知道只做外賣無堂食，但去到發現有三、四張細摺枱，唔好問「又話無堂食？」，去開元朗又新街搵食既，你明喇。價錢好似平左，但絕對無將價就貨芒果西米露，好足料，西米底唔係水汪汪，羹羹都食到好多西米，又唔會煮唔透一舊舊；冰糖雪耳木瓜，甜度適中，木瓜清甜。今次食飽飯過去，所以只食甜品，無試小食，下次一定再黎再試。…查看更多

午飯時間，個個都趕住搵食，行過幾次都見唔爆人，一直以為貴夾唔飽，今日忽然心血來潮想食越南野，膽粗粗試下。午市套餐選擇幾多，有辣有唔辣，粉麵飯樣樣有，仲包凍、熱飲，望落價錢都唔貴吖。唔算餓，叫左個青咖喱香茅雞翼飯 + 咸檸七。每次係越南餐廳都必叫咸檸七，雖然係平平無奇，仲好多地方都有，但就其怪，係越南餐廳叫既就係好飲D一上菜，成碗咁青既野係咖喱？比起其他餐廳，黎度嗰青咖喱既顏色有D似蜜瓜雪糕。食落好香椰汁味，不過個人就覺得無乜辣味（p.s. 本身係唔食辣既人），雞翼有5隻咁多，午餐計，真係好多！個餐可以轉豬扒/豬頸肉/雞扒，即係任均選擇。係度食，記得問佢攞收據，因為張單寫明「憑單下次堂食有九折」！！雖然要加一，咁下次咪平番比你。…查看更多

旺角行街，搵間唔係集團食市越黎越難，女人街兩邊仲有好多小店，忽然想食韓式，但唔係韓燒。行過比個menu 相吸引左。韓式唔食韓燒，就離不開石頭鍋飯、辣豆腐湯飯、部隊鍋、飯卷等等。因唔算太餓，簡單叫左海鮮辣豆腐湯飯、牛肋骨湯飯同鐵板炒三式-豬、牛、雞。一般韓式都先上前菜，黎到都一樣，但除左泡菜係韓式，其餘兩款芽菜同魚片直情可以話係港式。首先上既係鐵板炒豬牛雞。心諗咁快既？！感覺就似大X樂，你叫乜，就係扒爐執上碟一樣咁快！鐵板上，都預塊鐵板係做樣唔會熱得去邊，但原來仲可以係凍。牛，係一般肥牛，碎上，份糧係最少。雞，有4件雞球。豬既份糧有半件豬扒既份糧。但味道就一般中式菜一樣，豉油、蠔油味，洋蔥仲生。牛肋骨湯飯。味道唔錯，湯底唔喊，仲有4件牛肋骨，菜底都唔少。不過碗飯就唔多熱。再黎海鮮辣豆腐湯飯。一上枱，個湯紅到唔可以再紅，心諗一定勁辣，一試，不出所料，好辣，但成個湯都係得個辣字，又完全唔足料！得一兩粒碎左既「蜆仔」、兩條切細到無可再細既魷魚鬚、半塊豆腐、雞蛋、芽菜同黃芽白。唔知以為大厨唔記得放材料，定傳菜上錯素菜湯飯。價錢唔係貴，鐵板、湯飯@$7x，但唔值。是晚仲有好笑野，隔離枱三個大男人，亞姐幫佢地落單，當時無為意人地叫左乜，等左陣上左個石頭鍋飯，其中一個男食左半，其餘兩男先覺得奇怪未有得食，先追問。問又問得攪笑「點解得一個？」亞姐又答得趣緻「叫一個，上一個」，來來往往幾句，先知原來人地叫三個石頭鍋飯，但亞姐聽錯只落左一個。我地就諗，點解落單時，亞姐唔多問下其餘兩個大男人食乜？成半個鐘都唔落單又唔追問下既？雖無話最底消費，唔通黎到都慣左比人唔食野任坐？？…查看更多

搵個無限時地方食飯越黎越難，問左4、5間都話要限時，4個人都得90分鐘，邊食邊傾真係都幾趕下😒。問到炑八話星期一至四無限時，馬上訂枱喇！準時1830到達，入座時帶位既又話限時，我地表明訂枱時話無限先黎，佢就「放生」我地無限時。剛好有信用卡優惠，二選一，豬或牛，選擇唔多，岩食就得喇，有人為左隻八爪魚，所以揀左黑毛豬套餐。時間尚早，入座時都只得三兩枱客，上料就變得話咁快。望落唔錯，不過冬菇同南瓜就太少喇，雖然前菜同包肉既生菜係無限添加，但燒烤既菇同南瓜份量多番少少，可以平衡番肉既油膩感會仲好。餐牌寫有4款用，但無分別指明邊款打邊款，除左五花肉一眼就望得出外，其他咪就係豬肉囉我絕對唔係食品專家，食左都分唔出，加上唔知道係咪我加左大蒜、大醬一齊食，所以就更加分唔到。只能講眼見肥既地方，燒一燒，燒走晒肥油，食落一d 都唔肥，燒肉就係有黎個好處（完全誤導）。食左一半豬肉，係時候八爪魚下海。係餐箱入面，睇唔出隻八爪魚完來咁大隻。初頭都有擔心咁燒原隻爪魚會唔好食，但又唔係喎，不過又唔講得爽口就真既。五花肉太大舊，而㕑房刀工又真係勁，刀刀薄切，又可以切唔到底，係同個底既距離都幾遠，勁！應該成塊擺上爐燒，但太大塊喇，按佢個「薄切」位剪開，但生肉原來咁難剪，唯有一開三，燒熟再剪。係未熟透時剪開，再燒幾下，縮一縮，就燒到變左乾，可能太薄關係。好彩仲有大半舊肉，再黎過。整體黎講，肉新鮮，調味唔多，有機會既會再試下信用卡優惠既另一款。我地足足坐左3個鐘，其間都唔多人入座，成個場有約一半枱無人，所以唔太嘈，可能瓊華實在太多選擇。平日黎，唔使比人催交枱，慢慢食，慢慢傾，都係個唔錯選擇。…查看更多

每隔一排，不期然就想食台灣牛肉麵。《小王牛肉麵》喺一次無意中係九龍灣食過之後，有特登再去食既牛肉麵餐廳。屯門未有前，係荃灣、黃埔都有食過，屯門開左後，隨時想食就食。係屯門店湯底一直都保持到，不論原汁牛肉麵、半筋半肉麵係我既首選。原汁牛肉麵 - 粗麵、配小棠菜、正常份量酸菜友人同我既選擇都係一樣，不過佢就多左芫茜同蔥。我個人特別喜好台灣粗麵，有咬口，又吸到多d湯汁。都有試過幼麵，但覺得似食緊上海雲吞麵咁，同黎度既牛肉唔多夾。蚵仔煎第一次黎度食，完全同喺台北食既兩回事。表面上望落蚵仔幾多，但事實係少得可憐，仲係切到碎晒，好碎果隻，可能咁先望落有睇頭掛，又勁多蔥，完全唔使錢買番黎咁，成底都係蔥，如果唔食蔥既，真係唔好叫。而質感有d 似潮州菜既蠔仔煎，未到炸既地步，中間都有少少台式蚵仔煎果種透明啫喱狀QQ感，但已經唔係果回事。依家成底野完全變得香口左，但失晒台北蚵仔煎特色，個餸應該改名為宜蘭香蔥煎，宜蘭出名香蔥嘛，都係台灣地區，夾吖😅屯門分店有個幾大問題，我每次黎食，叫親小食，不論係同麵一齊落單，定係後追加，都一定漏單，次次都要追。今次蚵仔煎，你話要時間煎，ok 無問題；上次鹽酥雞，炸要時間，都講得通；但有次叫醉雞中翼，涼菜黎喎，老早整定，浸好晒，唔使煮喇掛，碗麵食左一半都未有喎，點先；仲有次叫花枝羹，又等到食左一半麵都未有，羹點計都無理由即叫即煮掛，又係要催。唔知我同黎間分店風水係咪唔夾，次次都漏單，仲真係只漏小食單，飲品同麵無事架，仲上得好快添😓…查看更多

星期六放下晝，就重遊舊地約返個舊同事仔食晏仔兼去香工行街。同事仔話當年幾乎個個星期去幫襯既「開花結果」搬左新舖重開，當然要去，睇下有無keep到水準先。新舖唔算遠，好易搵，地方大過舊舖好多！人手當然都多左，但依然要等位，不過都唔使等好耐。黎到最抵食一定係皇牌經典套餐，8款涵料、5款包，再加6款沙律任選兩款，自由拼砌，加埋飲品都只係$52！沙律仲要係大大份，並唔係大xx / 美x 果種雪糕球咁細份量。（上）香芒雞肉法包，菠蘿粟米蛋 + 什果沙律：芒果帶甜唔酸，雞肉滑，法包夠軟，仲好細心咁切成兩份。（下）蜜桃火雞香草包，吞拿魚火腿粟米 + 什果沙律：火雞本身無味，夾蜜桃食啱啱好，唔撞味，蜜桃又唔會「水滴滴」整濕個包。沙律依舊咁大份量，完全唔慳家，驚你食唔飽咁😂食到尾3款沙律都無出水，真係要贊！（左）凍香芋咖啡 / （右）熱柑桔蜜雖話凍，但黎到唔加冰，即原裝雪凍，所以飲幾耐都唔會飲到冰水味，不過夏天大熱天時，可能會覺得唔夠凍。黎到其實仲有意粉、湯麵、雞肶、游魚鬚等等小食，不過個皇牌套餐就最多人叫，唔係點叫皇牌。同舊同事仔邊食邊傾，講番起以前每逢有人請食tea，一定叫黎間，炸肶+沙律簡直無得彈，不過就叫10次，有8、9次都少不免漏野，可能當年我地叫得太狼死🤣依家我無機會試到佢既外賣下午茶喇，希望人手多左，唔會送漏野喇。…查看更多

Boxing day 友人都要返工開OT趕project，聖誕就簡簡單單，志在聚下，友人訂枱附近The One間越南餐廳，話午餐黎得多，食物唔錯，夜晚要訂枱架，因為太多人等候喎。1830到，時間尚早未見等位人龍，入座時侍應講明限時90分鐘，吓？唔緊要喇，反正友人仲要返公司趕工。餐牌推介有兩款，為追時間，就叫晒兩款，再加埋越南菜必食既串燒！再慢慢傾。青木瓜絲大蝦沙律黎到另上魚露，仲要唔細支，要幾多自己黎。但我就一唔小心成支倒晒，攪到食到尾有D「水浸」情況😆 大蝦幾爽身，青瓜唔太夠絲，食上黎硬左D，雞柳粗身而且唔多。如果青瓜同雞柳可以再切幼D就最好，依家唔多似沙律。越式拼盤份量岩岩好，蝦餅好大粒下，新鮮炸起，外脆，蝦肉夠爽，唔係成口麵粉果種👍🏻；春卷入面既粉絲就帶少少油，炸嘛，所以可以接受既👌🏼；豬頸肉望落好似燶左D，不過唔係乾柴柴，又不肥不膩，好食👍🏻；粉皮卷一向都唔係我杯茶，黎個仲有陣冬菇「噏」味，所以只係食左啖就放底左，不過友人就唔覺有噏味，而係完全無味喎😅串燒 - 豬、牛、雞（半打）串燒理應牛最好食，但黎到燒到燶晒，又硬又乾👎🏼雞串燒得尚好但⋯又無味既？唔通黎排聖誕食得多，食壞左條脷😳。最好食係豬，乾身得黎入面仲有肉汁。仲有不得不贊個花生醬，粒粒花生有咬口又香👍🏻👍🏻，不過可惜都救唔番D牛。其間見到左右隔離枱分別上個咖哩牛腩配法包同原個椰青焗海鮮飯，望落幾好，個椰青大大個又幾吸睛，應該夠三四個人食；而咖哩就幾香。我地預左轉場食甜品，所以就留番下次再黎試。唔知係咪聖誕忙關係，侍應個個都無表情，其中一個可能只識英文既非本地人/華人侍應，同我地落單，稍為講慢D，就「then…then…then...」。㨂嘢飲慢左，又再即刻黑面，不耐煩咁又不停「Then?…And then?…And then？」結果係被催促下㨂左杯以為唔會死錯既紅豆冰，點知就出左事紅豆原粒仲大大粒，不過又硬又無味（又無味？！），只得椰汁同冰味，連甜味都欠奉:(果位侍應都真係幾無禮貌，上串燒果陣，因為二人枱細，又水杯又野飲又汁，拼盤岩岩先開始食，沙律碟又未收，跟本無位放，初頭佢目無表情齊企度唔郁，友人望下佢，我地心諗，你唔係要客執枱呀？果位侍應見無人出手，好求奇用串燒隻碟推埋D碟拼盤，攪到差D推卸個豬頸肉汁，碟花生醬就直頭放係我份筷子上面😠 個侍應跟手收左沙律碟令轉頭走，但同時被隔離枱截停，用國語問佢有一杯仔芽菜同疑似九層塔放邊到食，唔知位侍應唔識聽定唔識講，望下個客就行左去個客再問行過既第二個侍應，黎個有反應，不過就唔知係咪又唔識聽/講，喺係咁意指下碗麵就算我友人好心就開聲答隔離個客，免得佢地問極都無人理喇。明白大時大節食市都係忙到不停手，客亦都唔係大晒，但果位非本地/華人連最基本既禮貌都無囉。我地1945未夠就走，因為越坐越熱，似無冷氣咁。行出門口，又真係好多人等緊喎。…查看更多

12月特別多飯局，之前一直留意OpenRice 有推過黎間，一直想黎試試，但價格不太符合各好友每月一聚定價。今次因為臨時變掛，得番小貓三隻，適逢接近聖誕同做冬，無乜邊到仲有位，打黎問仲有，就黎試一試。㨂食其間，侍應分別埋黎過兩次，一次問要唔要水，後面有句聽完全聽唔到佢講乜，我地三隻小貓你眼望我眼心諗點解咁問，侍應又唔再出聲，dead air 左幾秒，侍應指下枱面支水，原來係問要唔要有汽既水😓我地話唔使，佢就以9秒9收走。第二次埋枱既另一位侍應，邊放低餐前餐包，邊勁細聲講左句唔知乜，個場唔嘈架，但就係聽唔到。餐前餐包配黑醋橄欖油有人相機未食就自己先食😆麵包都幾燶下，外硬內脆，真係硬，差d界口添。仲食到一枱麵包碎。龍蝦海鮮拼盤（半份）黎個份量岩晒三隻小貓，各款海鮮都好鮮甜，龍蝦爽甜，生蠔仲有咸水味，但就唔creamy，翡翠螺爽，數數下，樣樣都雙數，但點解得一隻鮑魚既海鹽炭燒12小時慢煮美國一級自然牛小排 配粗薯條非常好食，慢煮肉雖然全熟，但依然冧，唔鞋唔靭，肥肉位都變得爽唔肥原本係㨂配甜蕃薯，但見個經理不停因不同原因周圍嘈嘈閉話班侍應，又唔係唔食，為免麻煩，所以無出聲要求換。意式牛肉三重奏濶條麵酸甜適中，汁岩岩好黏晒上麵度，就算食完都無多餘既汁同油剩係碟黎到雖然係旺角，但餐廳室內環境調情好，眼見好多一對對呢。但服務就有待改善。有位侍應疑似經理，不停叫咪叫其他侍應留意邊枱邊枱，要推介嘢食，叫推貴野，話個客應該食得起；轉頭又叫咪話邊枱客就食完推下甜品；成日係咁跟住上菜嘅侍應問跟左咩餐具；一見有枱食完又係叫咪收碟，有個侍應埋我隔離枱收，個客示意未食完，侍應回咪「人地未食完呀」，我地聽到笑左出黎。嗰位經理把聲唔細，我地傾偈不時比佢把聲吸引左去聽佢講乜，坐我地隔離左右都聽到，都幾騷擾。教上菜，留番開門前教；叫推食物，唔該細聲d，仲要推得咁有「目標」添😒。收碟又收得太快，一見個碟食晒，即有人埋黎收嘢，好似好服務，其實都係騷擾，仲以為廚房唔夠碟用趕住拎番去清。情調或多或少比黎d服務破壞左。…查看更多

星期六晚度度都難搵食，收工都唔早，又忙到一頭煙，攰到唔想再嘥時間排隊等位，行過見黎間得一枱客等，又開左咁耐都未幫親過，一於試下。打開menu 花多眼亂，就點左兩個季節限定-壽喜燒同石鍋飯，再加個壽司拼盤。落單個職員好細心，話張枱細，所以會先上壽司，到食完先再幫我地上熱食；又建議個壽喜燒追加$20加烏冬或者韓式粉絲，咁會好食d；兩個建議都幾貼心。等食同食緊其間，職員不停主動加茶，看似基本，但越黎越少餐廳做到。等左十幾分鐘，壽司黎喇。特上壽司拼盤 - 蛋卷香又唔死實；魚生樣樣都好新鮮；魚子就偏咸同有少少腥；飯粒就一粒鬆一粒實，應該唔係出自同一師父手😅牛肉壽喜燒 另加烏冬 - 話加$20加烏冬/韓式粉絲，但上枱就兩樣都有。到底本身就有粉絲，定加錢兩樣都有呢？無人答到，算喇，無黎錯就得。但就麻麻地，牛肉過熟，烏冬過冧，湯唔夠熱。真心覺得和民既壽喜燒仲好食。再黎一個黑豚肉泡菜石鍋飯 - 黎個夠晒熱，上枱果陣仲有煙架。有泡菜既微辣，又有少少飯蕉，豬肉唔肥膩，但要d時間先可以咬開吞到。😑食物黎講，個人覺得壽司值得外，其餘兩個都不必再試。未試既，可以慳番，㨂第二款。入座前有個小插曲，前台派飛安排入座位職員，同店內職員態度簡直係兩極。先係我問佢攞飛，職員完全無尾音答我「自己撳」，心諗，撳邊度呀？望左兩望，佢先施施然攞開d menu，原來個撳飛機比佢用d menu 遮住晒😠果下我以為截客唔做生意，但明明8點半咋喎😒隨後另一個等緊枱既人問無尾音職員「有冇果個套餐⋯⋯」都未講完，無尾音職員搶答「無套餐」個客繼續講「唔係喎⋯⋯」無尾音職員再截停「無做套餐」個客都唔弱再問「之前下晝食過⋯⋯」無尾音再三截斷人，答「夜晚無」，個客串串咀回佢一句「原來夜晚無套餐～」兩個一來一回簡直係到打羽毛球咁，你一板我一板。😓點解個無尾音職員唔可以等人問完，聽清楚再好好地咁答呢，比人串喇，幾無引。其實門口接待既好重要，黎位無尾音職員態度其實幾趕客，店內職員做得再好都無用喇。希望有機會有職員睇到/知道，同黎位無尾音培訓下。…查看更多

齋睇外表裝修，得個靚字，其實吸引唔到我入去食，估都係九成都係為呃like而食既餐廳唔會有咩好食，食唔飽人（雖然我唔大食🤣）友人叫大膽尐試下喇，咪咁out！ok，就即管試下，食我唔飽，下場你既！2人set dinner價錢3xx，包晒沙律、前菜、主菜、意大利飯/意粉、pizza/burger，都多野食喎，但就唔包飲品。沙律-烤南瓜松子仁雞絲沙律  /  蟹肉牛油果蘋果青瓜沙律前者南瓜好冧，好食，但雞絲就少得緊要。後者以杯上，份量對一個細食女黎講可能都唔夠開始擔心之後既份量，唔通真係要盤算下場去邊到再補食？！前菜1 - 德國腸  凍肉  芝士拼盤Menu 寫明套餐每款前菜係半份上，望落都唔少既，個樣都夠2人分享。整體無咩特別。前菜2 - Girl’s  分享盤又係睇名唔知係乜，見半份上，有選擇困難症就岩晒，樣樣有嘛薯條分別係粗薯條+甜薯，仲另上芝士粉，比埋個紛紅紙袋你大玩shake shake。其他原來係以雞為主，雞肉餃子；炸芝士波-無芝士味，得薯仔味；煎雞翼；雞軟骨棒棒。黎個拼盤一上一定要即食，唔知天氣凍定佢本身唔係好熱，好快就凍左，攪到雞翼同雞軟骨棒只食到油味，連應該係即炸既薯條都好快凍晒。連續兩個拼盤都一般，真係要搵定下場食乜，邊到未閂門，使唔使去打番個邊爐？？未諗完，主菜就到。主菜 - 低溫慢煮三文魚  烤露筍  薯蓉  香草荷蘭汁有前面兩個餸都快凍既經驗，黎碟一上，相機食左一野，就那那聲到我起筷。嘩，終於有熱食喇！魚油香，薯蓉滑，叫得主菜係唔同d，定係我一直思維都攪錯晒，前菜唔應該係熱食既呢？緊接黎就係尾聲既意大利飯/意粉、pizza/burger我地㨂左個龍蝦burger，套餐點選黎個係要另加$28，有龍蝦食，加錢都接受到既。先黎賣相都幾討好，仲一陣陣麵包香撲鼻，急不及待動刀。包真係好軟，包外面搽左蜜糖再烤焗，香香微脆，龍蝦肉爽甜。完全係必食推介！意大利飯/意粉就㨂左煎帶子芝士蘆筍意大利飯份量唔少，芝士溶晒入意大利飯入面，芝士控既岩晒口味，真係食唔停口。Set dinner 唔包飲品，但可能幾款主食都有芝士，開始喊，係時候要搵野飲下，分別叫左一凍一熱。蜜桃荔枝沙冰  &  Goodnight  tea。一上枱，非常吸精。套茶壺茶杯簡直係美女與野獸入面茶壺太太與茶杯仔仔Goodnight tea 原來薰衣草加蜜糖，薰衣草有安睡作用，個名好貼切。飲落好舒服，感覺真係好安靜。蜜桃荔枝沙冰，都好吸精喎，黑色既！點解既？？由個名睇黎，無樣野係黑色架，問staff 會唔會黎錯，因為佢有第二款飲品係竹炭+荔枝，個人好直咁諗，炭係黑色，整出既係黑唔出奇。但staff又話無黎錯，我問點解係黑色，佢話設計係咁，咁算。預左十問九唔知架喇。好飲既，但飲黎飲去都係得荔枝味，所以硬係覺得佢黎錯，只係死口唔認。（哈，又自己亂黎發揮想像時間）上菜好快，未食完就上第二度菜，但餐廳大部都係圓枱設計，仲偏細添，可能咁，就有個好鬼吸精既層架。快樂時光好快就完。黎到有限時架，7:30入座，要求8:45離開，時間上有d緊迫，諗住都係呃下like飯局就算。到上茶時其實都過晒鐘，可能無人等枱，無被人請走。慢慢暵埋杯茶，坐到人地閂門（10:30）整體對女士黎講一定夠食既，但男士黎講就⋯⋯算喇，男人老狗，唔係拖埋另一半黎，點會㨂黎到吖😂😂結論係，為影相，一定要黎；為食既，可以列入考慮之列但排中間列序；再黎既，都100%係為左龍蝦包…查看更多

上年尾做到年頭，工作排山倒海未停過，要約朋友食飯放風抖下氣。一早睇定食評，黎間幾好咁又就腳，決定試一試。晚飯時間岩岩開始，唔使等，仲大把位㨂。枱與枱之間唔迫，座得舒服，樓底高唔侷促，唔太嘈。食物非想像中咁特別，一般一般，有落差。先黎個香芒蟹肉飛魚子沙律，好清好清，芒果粒好碎。如果芒果粒大番d，或者加d沙律醋會仲好味。壽司當然唔少得，唔算有特色食得壽司當然唔少得手卷，海膽手卷，唔該！鵝肝芝士軟殼蟹卷，好食既，但鵝肝係邊？？全晚覺得最好食：蒜香厚燒牛舌。外邊脆，肉嫩，一咬即化。墊底既牙菜出奇好食、好爽口再黎多個熱熟食：和風香蔥牛柳粒。但黎個唔掂，唔熱，無牛味，無肉汁整體黎講食物平平，無驚喜。但服務就真要檢討再培訓！由入門口帶位個小姐、到接order 紙落order 既、再到上菜既、直到埋單既，全部都黑口黑面，乜家陣黑面代表高級d咩？叫我埋單位先生仲搞笑，一埋黎就問上晒菜未，跟手就隊埋張單上枱，話夠鐘，晚飯限1.5個鐘。夠鐘？我地完全唔知有限時，帶位既完全無講過，嚴格黎講係無人講過野。算喇，難得食飯唔好搞喎心情，比卡埋單。等卡單期間，見枱面仲有少少唔想做大嘥鬼，食埋先，岩岩隊單埋黎位先生又出現，仲好唔客氣講「小姐，夠晒鐘，要離開喇，出面大把人等！」前後都唔夠5、6分鐘啫，使唔使咁！再算，心諗星期五晚人多，明既。但行到出門口，得一家三口係到等緊，咁叫「大把人」等緊？定係佢睇到d 我睇唔到既野呢？食市除左食物要好，先會令到客再黎；服務一樣要用心先會有客想再黎。黎間，無下次，一定無下次！多謝晒…查看更多

旺角多食市，但樣樣都差唔多，諗住是是單單食，見有網上訂枱，又有優惠，仲係即晚都有位就即管一試。地方唔算大，旺角人個個大情大性，所以嘈左少少，可以接受既。個名咁「街坊」以為都係一般茶記，試過就知非一般。港式地道食品夾西餐煮法，唔算太驚喜，但味品唔錯。飲品名，有心思，今晚唔小心就拼左個「女神」「當我想起你」食得幾飽都一定要試甜品，簡直無得輸！服務員個個又有禮貌，上甜品時發現出錯，唔知係落錯單，定係送錯枱，都無夾硬要個客要左佢，要贊唯一敗筆，是晚一部冷氣因爲滴水要閂左，我地又坐近厨房，雖未食到出汗，但又真係熱左d，希望攪攪佢喇。…查看更多

係荃灣韓舍食過幾次，仲食到抱住個肚走，服務又好，食物不停補。今次為就朋友收工，就去元朗韓舍試下，諗住同一集團，應該唔會差得遠，點知⋯⋯訂枱9:15，9點兩人打算先報到，齊人再入坐，點知接待小姐完全無理，邊帶位邊以講野無尾音講入坐開始計鐘，唔知以為我得罪過佢咁，見有其他人等位，又唔差得十分鐘就算。燒左15分鐘，食物好似無燒過咁，連煙都無，隔離左右火光紅紅，仲已經食緊，舉手搵人問，完全無人理，果位帶位小姐疑似見到扮睇唔到唔理，有位執枱既行過叫佢睇睇，是但扭下個爐制，爐光時光時暗，仲答「係咁架」就行左去。好，再等10分鐘，個爐依然無「起色」，要求轉枱都好正常啫，行埋去問帶位小姐，一句「無枱」又走左去，真係爐火唔起我火起！大佬你收我錢仲係限時架，係咪以前得罪過你我又唔記得，家陣報復！有個疑似經理行過，當然捉住佢投訴，結果枱調左，但成晚有果位帶位小姐超住咁伴住食囉。講番食物，生、熟、甜品種類都好似唔夠荃灣分店多，特別係鯖魚，荃灣原條上，元朗分店就一碌碌兩吋長咁上；部份生料好重味，原來元朗朋友食得咁喊？！加$45任飲啤酒，但唔夠凍，汽水就無氣。未夠10點半，其中一款啤酒機仲話壞左無得飲，生料有幾款已經無補，甜品本來就款少，晏左梗賣少見少：杯仔啫喱-唔係無味，就太濃縮；超迷你果撻仔-粒生果仲細過女仔手指頭，荃灣大大碟既朱古力蛋糕、mousse cake等等，元朗影都無，而變左一粒粒唔夠1吋既精緻蛋糕仔，真係要讚下人地刀工好，切得咁細。11點疑似經理叫埋單話食物11點半就收，都好正常，人地都要收工啫，邊埋單，朋友跟手出去加野飲，點知另一款啤酒都無埋，汽水就出現有超甜陽光檸檬茶怪味，洛神花茶、五花茶就冰水多過乜，魚生檔收左，係咁不如埋單時就講已cut晒食物喇。唉～食飯食到一肚氣又唔盡慶真係第一次，仲第一次帶朋友黎，一向相機食先既朋友都話連佢部機都無引，真係醜死人。下次真係比多幾蚊搭車，行多幾步路出荃灣韓舍補多句，如果服務評分可以比零，我比得出！…查看更多