蕃茄醬與卡卡醬的个人专页

大家會覺得我寫了很多次六福菜館，自從我病了之後就只能去西貢，如果其他地方有車都是勉強可以去的，她是之前在南寧地方她替我針灸的，所以她難得到香港幾天都要好好招待她，今天她的表妹也一起來，首先帶她去我朋友的船上遊玩，然後去連續十六年米芝蓮一星的六福菜館吃晚飯。我們點了西貢地道魚湯(一窩，$248)、椒鹽奇脆豆腐(6件，$60），椒鹽鮮魷($188)、米湯低溫慢煮元貝(每人一隻，每隻$126.7)、 椒鹽焗大連鮮鮑(每人一隻，每隻$136.7)、椒鹽瀨尿蝦一隻(七両，$495)、蒜蓉粉絲蒸茄子($148)及豉油王炒麵($168），另外我又叫了一支水($22)，連3位茶芥共$54，之後連加一共2,391，連香港的朋友表妹也說是合理價錢。其中一個名物：西貢地道魚湯，是由廿幾種雜魚與蕃茄薯仔湯底一起煲成的，好難不好喝；而另一個名物：椒鹽奇脆豆腐，基本上豆腐做得內脆外軟，吃時要小心很熱；這裏的椒鹽菜式是有信心的保證，其他也做得很好，所以我點了椒鹽鮮魷；米湯低溫慢煮元貝，TVB的陳煒也都吃過的菜色，米湯味道剛好，而且元貝都弄到剛剛熟，朋友都大讚；椒鹽焗大連鮮鮑，我知道這裏是全港第一、二位做椒鹽焗鮮鮑的地方，之後坊間就有很多人都模仿他們的做法，但可以模仿到多少成相似就只有經常去的食客才知道，這個也是朋友讚不絕口的其中一個菜式；椒鹽瀨尿蝦一隻，這裏有一個特別服務，就是會替我們剝掉瀨尿蝦殼，因為經常吃，所以只給她們兩表姊妹吃，而我亦見到她們吃得津津樂道；蒜蓉粉絲蒸茄子，茄子是本身是我喜愛的，好難吃不完；最後一樣是豉油王炒麵，麵炒得夠乾身，加了芝麻更好，而且味道當然很好，整體而言她們都非常滿意這一餐。…查看更多

在呢度食海鮮午餐、晚餐就多，都係睇你識唔識叫嘢食，你識點菜就唔算好貴，其實我都無留意，原來依家有個仲平啲嘅午市套餐(每位$198，最少2位起，已包茶芥加一)，仲要有唔少選擇，份量也不少，而且水準都唔差。午市套餐有分A)-F)項，A)項必定是粟米魚肚羹及F)項必定是上湯浸時蔬；B項可以有5款選擇，有蜜糖雞翼、芥末鮮雲耳、涼拌四季豆、黑醋拍青瓜及醬爆虎皮尖椒(3位客人內就選2款，而4位客人起就可以選3款)；C項同樣有5款選擇，可以選擇其中1款，有椒鹽焗大連鮑魚、豉椒炒蟶子皇、蒜蓉粉絲蒸元貝、天婦羅桶蠔及椒鹽鮮魷；D項就有8款選擇，如果有4個人起就可以選擇其中1款，有梅菜蒸肉餅、三色蒸水蛋、醬爆尖椒牛肉、蒜蓉粉絲蒸茄子、照燒汁炒雜菌、豉油王炒腸粉、蜜糖欖角骨及山扣北菇雞腳；E項同樣有8款選擇，可以選擇其中1款有鹹魚雞粒炒飯、瑞士汁炒牛河、鮮黃薑菜粒炒飯、濃湯肉碎泡飯、欖菜肉鬆炒飯、鮑汁炆伊麵、蟹籽海鮮炒飯及瑤柱蛋白炒飯。由於我們4個人，所以點了4人份量，B項就點了芥末鮮雲耳、黑醋拍青瓜及醬爆虎皮尖椒；而C項就點了名物椒鹽焗大連鮑魚；因為我們有4個人，所以D項可以點1款，於是我們點了又是名物的蜜糖欖角骨；而E項我們就點了瑞士汁炒牛河。其實我已經食過好多次六福嘅海鮮及小菜類，反而這個午市套餐我都係第一次食，首先A)是粟米魚肚羹，以六福的水準來說，當然是不錯；跟住是B）芥末鮮雲耳、黑醋拍青瓜之前已經經常食，水準依然保持，而醬爆虎皮尖椒我都是第一次食，朋友又喜歡吃辣，她說水準不錯；以這個便宜的價格可以食到C)這個名物椒鹽焗大連鮑魚，而且每人都有一件，基本上可以保持到平時的水準，已經值回票價；而D項就點了名物蜜糖欖角骨 ，每人一件，朋友都讚好食，名物果然是名物 ；而E項就點了瑞士汁炒牛河，六福的炒粉麵飯不嬲是可以的，牛肉也不少而且算軟熟，瑞士汁河粉炒得很均勻；最後F項的蒜蓉上湯浸生菜也絕不馬虎，非常爽甜，而且呢度會將啲菜頭菜尾去掉，淨係要靚同好嘅部份，所以保證食到最好嘅。人老了，當食到有味精(會好口乾)同唔好味的食物會不再幫襯，而這裏嘅食物我已經食過好多次都唔會覺得唔好食同唔會覺得口乾，記住呢個午市套餐好似由星期一至六(非公眾假期)，由六福開門至下午3時前都可以得叫，呢次埋單$792，$800可以有找，仲要食得飽，又可以用微信支付，你話算唔算係平價嘅米芝蓮一星餐廳？…查看更多

因為之前病了超過3年，所以順便退休了3年，已經有3年沒有寫過食評了，胃口少了很多，以前每天都吃5-6餐，現在不能吃太多，每天只能吃1-2餐，由於最近相約了幾年沒有見面的一個香港朋友及一些大陸朋友來香港一齊吃午飯，談談最近情況，其實我之前已來吃過幾次，味道真的值得獲米芝蓮一星，而那些大陸朋友也曾經吃過大陸的米其林(香港叫米芝蓮)，來之前我已經跟他們說這是連續拿了十五年米芝蓮一星，他們好像沒有什麼反應，後來得知原來大陸的米其林跟香港的米芝蓮有些不同，因為吃過大陸的米其林沒有太大驚喜，反而這餐是幾年來他們說算是最有驚喜的一餐，不過又不幸的是我當天突然之間痛風，腳部非常之痛，所以不能吃海鮮，只能夠吃別的食物，那海鮮唯有靠我的朋友們吃了，而這些海鮮的味道及感覺都是靠朋友說出來的，他們本身是吃得不多的人，但他們說太好吃而比平時吃得多，而我亦只是拍下一些視頻及照片作為紀錄。由於我們是閒日午餐來，而且我們很早到，所以沒有太多客人，聞說星期六、日都是非常爆滿，下午時段都一位難求，首先侍應上了一些小吃前菜，一碟花生(我又不可以吃)及一碟鹹菜，味道不過不失，最後我們也點了另外的前菜、魚湯、海鮮及一些適合我吃的食物，再來的是一碗本店另一名物：西貢地道魚湯，是蕃茄薯仔魚湯，用了多種不同的鮮魚，再用魚袋裝住然後去煲成，所以只見到蕃茄薯仔，而沒有見到魚肉及魚骨，湯頭非常清甜，朋友說很有媽媽的味道；而有些朋友喝了魚蓉羮，侍應說是用了東星斑及菇類去做的，他們平時都很少喝湯的，這碗是百感交集，且他們都讚不絕口，整碗喝完。我們再點的有椒鹽奇脆豆腐(其實我也不能吃，但我知道這是在這裏有名氣的名物，所以….... 為什麼我連海鮮也不吃？🤣🤣🤣)、芥末鮮雲耳及，涼拌四季豆(應該又不可以吃)；椒鹽奇脆豆腐真的是其中一個名物，外脆內軟，外面炸得金黃鬆脆，裏面非常嫩滑，另外芥末鮮雲耳及涼拌四季豆都很爽脆，雲耳有芥末很惹味，涼拌四季豆都很爽甜，而且還配有浙醋，所以作為開胃菜算是不錯；之後上了本店多年的另一名物：椒鹽焗鮑魚，是3頭鮑魚，椒鹽香口，鮑魚彈牙而且又不會韌，侍應說前期時已做了一些功夫；之後再上了椒鹽瀨尿蝦，我真的不敢食(因為痛風)，原來現在還有一項服務，是替客人剝瀨尿蝦殼，這才是米芝蓮一星的服務態度，他們說瀨尿蝦肉質非常鮮甜，椒鹽香口無比，當然他們又讚不絕口；然後再上避風塘瀨尿蝦，我看到這隻瀨尿蝦膏比較多，他們說同樣鮮甜，很快就清盤行動了，另外他們說那些避風塘做法跟大陸有些不同，他們說這比大陸更足料兼且炒得更加香；再上是油鹽焗奄仔蟹，眼見隻蟹已經好靚，而且超級爆膏，當然我又吃不了，他們說膏非常香甜，那些油鹽焗的做法又與大陸不同，味道更加香濃(我不能吃，所以不下評論)。終於到我的主菜來了，西貢艇仔蒸飯，侍應說這個也算是其中名物，我看見只是普普通通的西貢艇仔蒸飯，算什麼名物？嚐一嚐艇仔蒸飯，已經加了醬油，飯上面好似有蝦乾、魷魚及臘腸，三樣食物配合超上飯都算夾，非常惹味，可能是我比較肚餓及少東西吃，差不多整個飯我都吃光光，最後我們吃了一個泰國侍應自家製的泰色甜品，只是椰汁西米糕，味道算不錯，因為給其他菜式比下去。總括來說，這一餐顛覆了他們對米其林的另一種想法，因為從前他們在大陸吃米其林是沒有驚喜的，甚至吃跟不吃都沒有關係，沒有損失，今次吃過之後完全對米其林改觀，這裏主要吃的是食物的味道及服務態度，他們對米其林又有另一種觀感，最後每人吃了港幣$1,200左右，他們說此餐非常物有所值，當然香港還有很多更好的米其林一至三星在，所以只要是食材品質、廚師對味道等，以及他們對烹調的技巧駕馭能力、料理中顯出每個人的個性、是否物有所值以及餐飲水準的一致性就可以………拿星，都是超級難拿的。…查看更多

台灣有海角七號，香港嘅九龍城都有南角叁號，南角道叁號，係一幢三層高嘅戰前唐樓，但最後未獲政府評級為古蹟，南角道叁號地下前身係一間叫「怡順榮機器五金」，已結業多時，而整楝大厦基本上已經無人住，因此南角Nan Kok老闆為咗想保留此特色唐樓，所以開呢間coffee shop，甚至施工裝修期間都盡量配合去保留返一些舊有嘅物品同特色結構，呢樣係設計畫圖前預計唔到，係要一路裝修到某部份先知某些位置可否唔拆或留返個懷舊特色，而「怡順榮機器五金」同「怡順榮」兩個舊招牌係分別保留咗響門外同店內。「南角」啱啱試業中，之前幾次經過見到其裝修時已經好期待，點解之前會成日經過？因為屯馬線嘅宋皇臺站B2出口(如果唔想行樓梯就用B1扶手電梯或搭lift)，一出行過對面馬路就見到，而正門嘅大鐵閘就係保留返之前多年嘅舊式鐵閘，未入coffee shop門口前已有一個好靚嘅打咭位，牆正中有「南角 Nan Kok」字樣，字上面有盞燈，而櫃上面就有一盆盆栽及一部舊式電話，見好多人攞住嘢食/飲嘢放響度狂影，一入門口左手面係沖咖啡位置，再之後位置就係開放式廚房，而右手邊近牆位置有十幾張2人至4人嘅枱，可先量體溫，再選擇用「安心出行」或填寫個人資料後便可入內。如果堂食，服務員攞埋menu再帶你去揾位坐低先再揀食乜飲乜，由於我入門口前睇咗同已影低咗menu，所以好快就從坐位行出去收銀櫃位度落單，點咗一杯Iced Pandan Coffee斑蘭咖啡($52)同一客Sourdough Bagel with Cream Cheese酸種貝果($36)，埋單$88，之後返位度等，可能新開關係，中午時段已經開始要等位，眼見水吧加樓面有3-4人，廚房好似又係3-4人(無特別數，可能有啲係老闆，因為見到佢哋好忙)，等咗5-6分鐘左右，杯斑蘭咖啡由服務員奉上，值得一讚嘅係無任何號碼牌提示下服務員可以準確地將我點嘅飲品送到，我有見到送錯過，因為有人自己調咗枱。凍斑蘭咖啡，杯頂浮住一球椰子雪糕、浸住雪糕嘅就係咖啡、底部係椰子汁，仲有一大塊斑蘭葉，顏色同賣相配搭都幾靚，門口打咭位經常有人，所以我揀咗最入邊另一個打咭位，有一個仿古式嘅櫃，上面放咗一個舊款電視機、一個舊式轉盤電話同一盞古老款式嘅燈，快快影完返埋位時，件酸種貝果就到咗了，今次響枱快快影完之後就先用飲管攪一攪勻杯咖啡，再用匙羹去食椰子雪糕，雖然放咗一段時間，只係溶咗少少，雪糕仍然細滑，椰子味都幾出，咖啡同椰子汁撈勻之後都唔算太甜，有咖啡同椰子汁味之餘亦有斑蘭香味。有朋友問去新嘅咖啡店唔係應該飮人哋店嘅熱咖啡咩？其實識我都知我唔係好飲咖啡同熱嘢，凍嘅咖啡有時都會飲，所以我覺得呢杯斑蘭咖啡幾好飮；酸種貝果，Bagel外面都幾煙韌，用刀叉都可以切，裏面包身都算軟熟，如果多啲忌廉芝士就更好。坐坐下look look下社交平台見到日本代購達人紅先生響九龍城飲緊咖啡，傾兩傾佢就已經過咗嚟，我已經轉咗去返門口第一張枱，我哋唔知幾多年無見，我去咗收銀嗰度落單，本身佢想點芒果莎莎，但無哂芒果，最後佢要咗一樽Cold brew, Single Origin(Bottle，$48)，我就要咗一杯Ice Chocolate Maniac 凍朱古力($46)，佢飲咗之後都話味道唔錯，話價錢仲幾抵，而我杯凍朱古力，係有朱古力雪糕同Oreo，首先朱古力味夠香濃同夠冰凍，朱古力雪糕夠香滑，Oreo碎又有嚼口，各有各嘅甜味，最緊要夠凍，下次試下食早午餐/甜點先。…查看更多

由於限聚令關係，有些餐廳響晚上10點無堂食，不過有好多市民為咗良知同公民責任(定為咗抽獎？)，已經或陸陸續續去打疫苗，所以有些餐廳都開始營業至凌晨12點，尋晚夜晚11點左右響旺角經過幾間開咗好耐嘅茶餐廳都要等位，最後去咗一間無咁多人嘅細餐廳食炸醬麵；咁今晚差唔多10點左右，經過豉油街見到一間餐廳門口有啲花牌，原來係「新澳餐室」新開業，見到可以收凌晨12點，即刻衝入去試下，其實之前響紅磡民泰街另一分店已經食過沙爹牛肉麵，不過好普通，今次又試下新店嘅沙爹牛肉麵，睇下掂唔掂。呢度位與位之間都算寛趟，仲要冷氣非常夠凍(連我都用夠凍就真係好夠凍)，原來仲有用QR code自助落單，睇完餐牌即點「新澳招牌茶餐」嘅招牌沙爹牛肉公仔麵($54，配炒滑蛋/煎雙蛋，丹麥牛油酥包，奉上即磨咖啡或香滑奶茶，普通凍飲加$3)，要咗炒滑蛋、丹麥牛油酥包同凍檸茶(加$3)，而我4月中響紅磡食同樣嘅餐只係$48加$3(唔知依家有無加價)，原來開到嚟旺角要加多$6。凍檸茶先到，用不銹鋼杯好處係夠凍，茶底都算清甜，不過隻杯size就比較細隻；再到嘅係炒滑蛋、丹麥牛油酥包，炒滑蛋係碎哂(上次紅磡店食個蛋好食啲)，丹麥牛油酥包係凍嘅，唔係難食嘅。招牌沙爹牛肉公仔麵，沙爹汁都算香濃，仲食到有花生粒，牛肉都有4-5塊，都算大塊，幾好嚼口同入味，公仔麵都算係爽麵，整體好食過紅磡店，不過蛋就.......原來10點鐘後有「搶閘宵夜」，有食麵之選 - 招牌沙爹牛肉即食麵($42)，咁究竟公仔麵同即食麵有乜唔分別呢？我當然無問到，因為夜晚10點後開始多客人，佢哋都好忙。最後叫多咗一客「輕鬆小食」 - 千島吉列魚柳($38，配滋味粗薯條，奉上即磨咖啡或香滑奶茶，普通凍飲加$3)，凍檸茶依然夠凍，吉列魚柳望落去色水對辦，但炸得唔算脆口，魚柳肉都唔算滑，滋味粗薯條太過粉，都係唔夠香口唔夠脆，好彩我喜歡嘅千島汁攞返少少分數，希望下次水準可以好啲。…查看更多

疫情關係，船河又無得攪，所以呢一年都好少去西貢，今日悶悶地入去行下，食咗個好普通嘅沙爹牛肉麵之後，行行下發覺好多店鋪結業，但又見到好多店鋪開業。路經福民路高富樓地下附近已經好多轉變，見到有間好似文青路線嘅咖啡店，叫「小滿定律」，主打係賣乳酪雪糕、希臘乳酪、乳酪奶昔同翡翠檸檬特飲，原來只係開咗個多星期，由於約人未夠鐘又好熱，入去過一過冷河。點咗個最貴嘅乳酪雪糕($48)，可配3款配料同1款醬汁，配料有生果、餅類、脆脆、朱古力、翡翠檸檬、其他或每周限定，好多款都想揀，花多眼亂，最後我揀咗生果：芒果、脆脆：海鹽焦糖同其他：咖啡蒟蒻，而醬汁就揀咗甜嘅：美祿恐龍。賣相都唔錯嘅，吸引到有人入嚟問嘢時都影咗呢杯乳酪雪糕，仲要影先過去，咁我又好快影完就開始食，乳酪雪糕都算滑溜，而乳酪上面嘅美祿恐龍唔係真嘅醬汁，只係美祿粉末(我當然知道乜嘢係美祿恐龍，我去馬來西亞好鍾意飲)，味道就係美祿味；海鹽焦糖脆脆算微脆帶少少黐牙，甜度都可以；芒果比較酸，不過都合格，點解最後先食咖啡蒟蒻，因為唔知點解響旁邊嘅中間位置，可能成軟滑啫喱狀，響乳酪雪糕旁邊空位滑咗落去，蒟蒻係健康食品，夠哂滑捋捋，咖啡味都夠濃，感覺上都幾得意，下次會試其他。…查看更多

唔知幾時開始多咗好多「乜乜關注組」，咁我就好鍾意食雲吞麵同沙爹牛肉麵，咁我今日去緊尖沙咀海防道臨時街市食完沙爹牛肉脆脆麵之前，行經亞士厘道同宜昌街交界，見到地下有好多花牌，原來有間叫「香港餐室 Hong Kong Cafe」今日正式開張，之前呢個位係一間開咗四十幾年嘅「大阪日本料理」，不過年多前因租約期滿而搬咗去尖東某酒店。食完沙爹牛肉脆脆麵，行咗一陣約5點25分再次經過亞士厘道，咁望下個餐牌見到常餐有沙爹牛肉麵又再加新開張，咁就入去試下，地下有一個酒吧位同幾張枱，可以響度happy hour，通上樓上係有一條好長嘅樓梯，我未行到上去已經爭啲暴毙，上到去回緊氣期間由店員指示我去一張卡位坐，呢度啲卡位都幾寬躺，除咗卡位外，見到仲有一啲細圓枱，原來呢度下午6點後做任飲火鍋，仲有VIP房。一坐低都未睇餐牌，服務員已經話送碗紫薯湯我飲，咁我當然點咗常餐($43)嘅沙爹牛肉麵，餐set咗跟火腿奄列同牛角包，飮品就凍檸茶(加$3)，跟住服務員話無哂牛角包，改做牛油麵包。首先到嘅係凍檸茶，跟住係火腿奄列同牛油麵包，之後好快就連沙爹牛肉麵亦到埋，個餐賣相係麻麻嘅，另外唔知點解我咬咗一啖時發現上下兩塊麵包係完全大細不一，起碼爭一截，不過塊麵包係幾軟熟嘅，而火腿奄列裏面都有啲蛋汁，唔係全熟，又未算難食。沙爹牛肉麵，沙爹汁係有花生嘅，但就唔算濃味，牛肉醃得少少過火，但又未算難食，麵質已經開始變腍，咁又未至於難食嘅；最後凍檸茶茶味可以清少少。火鍋係任食，二百幾蚊一位，下次有機會試下火鍋，火鍋店名字叫「味火鍋」。…查看更多

早排窮L幫主P先生生日，有朋友C小姐相約安排生日飯局，地點就揀咗大家都近嘅旺角區兼啱啱由L'Hotel改咗名做Nina Hotel旗下旺角薈賢居(Lodgewood by Nina Hospitality) 嘅Canton Pot，自限聚令，已經好耐無打過邊爐，雖然依家有返晩市堂食(只可去到晚上10點)，但只限4人，第4位朋友就係K先生，C小姐就booked咗一間細VIP房，回想當年響呢度打邊爐，我哋係成8個10個一齊，成枱嘢食先夠震撼，唔知幾時先可以一大班朋友坐埋一齊食飯。人未到齊，先點咗一壺竹蔗茅根水同一壺洛神花茶，竹蔗茅根水清甜解渴，而洛神花茶我就無飲到，之後仲叫咗枝Estrella Damm Inedit嘅啤酒，由窮L幫主自己一個隊哂，不過仍然戒緊酒嘅我就當然無飲；未點湯底前先混一混醬，有2行共12款醬料，其中一行有蔥花、蒜蓉、豆瓣醬、日式胡麻醬、金蒜粒同鮮洋蔥粒，另一行就有指天椒、廖孖記腐乳、自家製麻辣醬、花生醬、潮州辣椒油、同自家製沙爹醬，另外再叫服務員攞最近市場上人氣急升嘅食材：芫茜，無芫茜點打邊爐呀？湯底就點咗花膠燉響螺湯拼韓牛肋骨湯，牛就有點咗本地新鮮牛頸脊、美國頂級無骨牛肋片同騸牯黃牛吊龍，豬就有西班牙橡果黑豚肉，海鮮就有海中蝦，仲有四寶丸、精選餃子拼盤、響鈴卷、酥炸魚皮，蔬菜就點咗皇帝菜、有機菠菜同山藥，最尾加咗一客三色麵拼盤。湯底一滾，率先飲咗花膠燉響螺湯，湯頭清甜、花膠嫩滑，人越嚟越大，就要補一補；再食埋另一邊湯底嘅牛肋骨，肉質細嫩，夠哂入味，真係一分錢一分貨。食咗3款牛，本地新鮮牛頸脊、美國頂級無骨牛肋片同騸牯黃牛吊龍，牛頸脊係牛頸位下橫膈膜後嘅部位，肉質鮮嫩爽滑，肉味濃郁；牛肋片肩腹肉後方嘅部位，油花均勻，肉質嚼勁；吊龍，牛嘅兩邊腰脊肉，又叫肉眼邊，油脂豐富，香滑可口。西班牙橡果黑豚肉，係食橡果嘅豬，令到豬肉帶有獨特嘅榛子芳香，味清不燥；海中蝦上枱時仲識郁，非常新鮮，肉質彈牙鮮甜。四寶丸有鯪魚球丸、豬肉丸、蝦丸同墨魚丸，全部都自家製，肉嫩彈牙，我較為鍾意係蝦丸同墨魚丸；而精選餃子拼盤有羊肚菌豚肉餃、海皇餃同泡菜野菌餃，喜歡食餃子嘅我，皮薄餡鮮，全部都好食，我比較鍾意嘅係羊肚菌豚肉餃，裏面餡料足又夠多汁。另外響鈴卷同酥炸魚皮，響鈴卷新鮮即炸，一上枱已可即食，熱辣辣酥脆香口；酥炸魚皮一樣脆香惹味；而蔬菜我只食了山藥同有機菠菜，山藥健脾補肺，仲要唔係咁多火鍋有得食，想食爽脆嘅山藥就唔好淥咁耐，而淥耐啲就會有粉嘅質感，視乎自己想食爽定粉；有機菠菜健康又爽甜。最後追加咗一客三色麵拼盤，有蕎麥麵、菠菜麵同蝦籽麵，單看麵嘅乾爽程度已經覺得啲麵好食，全部麵都爽口彈牙，我就比較鍾意蝦籽麵，可清楚食到蝦籽嘅鹹香味，基本上我真係好鍾意食麵，可以一日5餐都食麵。已經非常飽，想點甜品/糖水之時，爭啲忘記咗仲有窮L幫主嘅生日蛋糕，好彩截得切啲糖水，唔係就浪費，生日蛋糕係芒果拿破崙，芒果鮮甜，千層酥皮仍然酥香鬆化，吉士醬質地濃厚，甜度適中，窮L幫主P，生日快樂。…查看更多

以前華記潮州滷水車仔麵係響界限街單數號地鋪主打做外賣，最近搬咗去斜對面嘅鋪位做埋堂食，咁好耐無食過，經開太子又順道支持下，依家係自己剔低想要啲乜嘢食/飲，咁我就揀咗幼麵、豬紅、牛小腸同牛肺，汁就揀咗重口味推薦(即係滷水汁、咖喱汁同腩汁)，三餸車仔麵$48，之後加咗罐雀檸$7。當侍應同我覆單時問我駛唔駛走芫茜時，我即刻定一定神，望住佢話唔該多茜，可以嗎？佢話係可以嘅，之後佢就用電話落單，咁既然本身無對有芫茜嘅期望，就唔會對芫茜有多少而去失望，咁我又睇返餐廳所有嘢都係無任何「芫、茜、荽」嘅字出現過的。點知碗車仔麵一上枱時居然有驚喜，啲芫茜份量都唔少，仲要比起依家市面上某啲餐廳話重茜～～甚至要加錢先多茜嘅更加多茜，而對於我自己嚟講，芫茜嘅份量係合格嘅，餸都一樣份量十足，而且味道都唔錯，但價錢就比呢區附近貴咗少少。講返碗麵，平時我食車仔麵就好鍾意點公仔麵，不過呢度主打滷水汁，所以點咗幼麵，因為生麵可以更加索汁，甚至可以掛住大量芫茜一齊食，非常滿足，餸就點咗豬紅、牛小腸同牛肺，豬紅夠鮮嫩(但唔夠滑)、牛小腸肥膏夠邪惡又好嚼口、牛肺夠彈牙，汁係重口味推薦(滷水汁、咖喱汁同腩汁)，全部餸都滷得非常入味，啲汁夠濃味，仲有少少辣。唔知下次食仲會唔會免費加咁多茜？又或者俾香港芫荽黨知道之後，佢哋又幾時會開始加錢先可以加多茜呢？去得華記，唔係唔tag阿Bob呀？…查看更多

10月某日下晝響尖沙咀做完嘢期間，撞到多年同學Sam，佢話帶我去銅鑼灣試法國菜，原來響登龍街新開咗一間法國餐廳，叫Les Papilles，當時仍然在試業中，得知響尋日(8/11)已經正式開業了。入門口位置有自助測量體温儀器，量完體温之後我哋坐咗響一張2人枱，眼見全餐廳有16個位，見到枱與枱之間均有分隔措施，餐廳梳化上面牆上有一幅好長嘅畫，係一班相信係法國人響湖邊飲下酒、放下狗同跳下舞，簡單又舒服。坐低後，Sam點了一枝紅酒飲：Chateau Amandiers Corbieres Grande Cuvee 2016($298)，如果響一間法國餐廳用$298飲到一枝紅酒都真係幾抵，佢仲話幾好飲，不過咁早我真係飲唔到酒。同學叫咗少少嘢食去送酒，店長攞咗一小籃，內有3個細嘅牛角包，牛角包係熱辣辣、外皮鬆脆、入口酥香、牛油味濃。咁Sam首先點咗個頭盤皇帝蟹肉配海膽伴芹菜頭泡沫(Crab and Sea Urchin, Celeriac Foam, $198)，用匙羹一筆入口，好鍾意呢個咁creamy嘅食材響口腔度停留嘅感覺，皇帝蟹肉同海膽已經夠鮮甜，creamy嘅感覺就係由呢個芹菜頭泡沫度出嚟，真係有百感交集嘅感覺，下次我嚟一定要再食過。再嚟另一個頭盤：煙燻油浸三文魚配法國魚子醬牛油果青瓜沙律(Lightly Smoked Salmon, Caviar, Cucumber Salad 􏰃 Avocado Puree, $188)，店長將三文魚一上枱時打開玻璃蓋，係一個煙燻嘅效果，我即刻問主廚係咪響香港銅鑼灣某間法國餐廳做過？不過要等主廚忙完之後會出嚟解答，咁講返食物先，呢個煙燻油浸三文魚配法國魚子醬之前我響銅鑼灣嘅法國餐廳(依家搬咗去灣仔)，佢哋係用42度低温慢煮個三文魚，不過呢度我就無特別問用幾多度，聞到煙燻味夠香濃，面層鋪滿燻過鹹香法國魚子醬，三文魚一切落去都夠嫩滑，牛油果青瓜沙律可以清一清三文魚嘅膩感。主菜出場，脊翼牛扒配香草牛油配鵝油炸薯條(Steak Bavette 􏰊􏰀􏰂􏰈Tradition Black Peppercorn Sauce􏰃 Montpellier Butter,􏰃 Goose Oil Fries, $328)，先食鵝油炸薯條，鵝油脂肪含量低、而且營養豐富，用鵝油去炸薯條仲好健康，食落都幾香脆；脊翼牛扒即係後腰脊翼板肉，係非常瘦但又非常軟嫩嘅部位，未食已經聞到好香嘅黑胡椒醬汁同香草牛油，一叉起食時牛扒好軟嫩又好嚼口，黑胡椒醬汁同香草牛油直頭佈滿響每件牛扒上面，真係好邪惡。大廚Jeff終於忙於出嚟傾下計，傾計得知佢曾經響米芝蓮二星嘅Amber、1881之前嘅St. George任職過，最近又有幫Town Gas教Disciples Escoffier課程，其實傾傾下得知我哋幾年前已經識得，因為佢同我朋友之前響銅鑼灣一齊拍擋開過法國餐廳，原來我仲識佢太太，世界真係細。今次同學請客，多謝老闆，我見到張單連加一$1,1xx(2個頭盤、1個主菜加1枝紅酒)，我哋係叫A La Carte，所以份量比較多，下次真係要試下成個set，只係$680一位(另加一服務費)，已經有我食過嗰三樣，咁份量當然少啲。開頭聽到響銅鑼灣登龍街地鋪開間中高級法國餐廳真係藝高人膽大，心諗乜嘢料呀？成條街都無乜太多貴嘢食嘅餐廳，以呢個價錢同餐廳位置通常都只做熟客，好少walk in客，但當晚真係有熟客訂咗枱之餘又真係有人walk in入去食A La Carte，4個人埋單平均每人$500+，我響餐廳一post IG story已經有幾個朋友話要去食，加上當我知道主廚嘅背景之後就無咁擔心了，因為佢哋以前都係靠熟客起家，當年佢哋間餐廳都唔係咁易訂到位，所以實力勝於一切。…查看更多

今年第三餐生日飯(11/5)，響2個鐘前先食完一餐生日飯，中間未夠鐘仲去飲咗杯嘢，再到呢餐係生日宵夜飯局，有人曾經話香港無宵夜，咁當然香港大把宵夜啦，嚟到佐敦偉晴街「S2鐵板燒」去揾「樂師傅」，咁入門口都係量體温嗰啲嘢啦，開頭得我哋一枱客，之後嚟多一枱，電視播住「S2鐵板燒」廣告，仲見到電視播住TVB「揾食飯團」嘅坤哥，吳業坤。因為之前午市宵夜時段有5折，所以訂位時已預訂咗一客北海道原隻毛蟹紐西蘭羊架套餐及一客海膽焗原隻龍蝦北海道帆立貝海鮮套餐(每客都係一人前，原價$1,380，優惠價$780，現午餐及宵夜時段再5折)，不過當晚聽到宵夜時段5折只會做多幾晚。我見到所有套餐都會跟時令沙律及三點刺身盛合，今晚沙律係鴨胸沙律，三點刺身盛合係三文魚刺身、北寄貝刺身及赤蝦刺身，赤蝦刺身尚算大隻彈牙，其他算普普通通，不過不失。另一早已預訂咗S2名物：18層海膽杯(原價$498，現優惠價$368)，最底層開始係：鮮海帶碎、北海道紫海膽、北海道松葉蟹肉、北海道紫海膽、三文魚籽、北海道粒貝、藍旗吞拿魚拖羅蓉、北歐花膠、凍磯煮鮑魚、櫻花魷魚、北海道紫海膽、牡丹蝦、明太子沙律、帆立貝、沖繩海葡萄、北海道紫海膽、黑魚籽、燒白飯魚脆片；$368算係抵食嘅，主要都係用嚟打咭嘅，北海道紫海膽、三文魚籽、藍旗吞拿魚拖羅蓉、黑魚籽係鮮甜好食嘅，某些食材都算夾，有些食材就唔算好夾。北海道原隻毛蟹紐西蘭羊架套餐沙律：時令沙律刺身：三點刺身盛合主菜：北海道原隻毛蟹兩食時令貝類紐西蘭香煎羊架日本原隻鮮魷魚筒食事：S2特色黃金炒飯(蟹籽/三文魚/黑松露/蟹膏/鵝肝/鰻魚/牛肉/煙肉/櫻花蝦)選一款或稻庭芝麻冷烏冬麵燒野菜/焗雜菌吸物：S2特色紙包花膠蜆湯甜品：精選季節性甜品海膽焗原隻龍蝦北海道帆立貝海鮮套餐沙律：時令沙律刺身：三點刺身盛合主菜：鐵板海膽醬芝士焗原隻龍蝦北海道黑松露帆立貝招牌脆皮煎鰻魚食事：S2特色黃金炒飯(蟹籽/三文魚/黑松露/蟹膏/鵝肝/鰻魚/牛肉/煙肉/櫻花蝦)選一款或稻庭芝麻冷烏冬麵燒野菜/焗雜菌吸物：S2特色紙包花膠蜆湯甜品：精選季節性甜品食前菜期間，已見到樂師傅開始燒一些海鮮，有北海道黑松露帆立貝、日本原隻鮮魷魚、海螺、招牌脆皮煎鰻魚；帆立貝鮮甜肉嫩、黑松露味唔算太出；日本原隻鮮魷魚，鮮嫩惹味、煙韌彈牙，食唔哂要打包；海螺，尚算大隻，煙韌又好嚼口，配瓜粒一齊食又唔錯，反而呢個現場食哂；招牌脆皮煎鰻魚，外皮煎得非常香脆，鰻魚剛熟肉質嫩滑，個人最喜歡其中一款。肉類有燒紐西蘭香煎羊架，羊架肥瘦比例算適中，油脂滿佈，肉算嫩。進食期間，師傅已將燒野菜完成，有番茄仔、秋葵、甜薯，可以減去一些油膩感，又係食唔哂要打包。另一主角出場：北海道原隻毛蟹兩食，見到樂師傅好用心機去燒每一件毛蟹及蟹蓋，毛蟹肉嫩鮮甜、蟹蓋蒸蛋夠滑溜，配上蟹膏嘅鹹香又另一種風味，其實已經好飽，食唔哂要打包。再另外一主角出場：鐵板海膽醬芝士焗原隻龍蝦，燒龍蝦時嘅情境同用火槍時已經好震撼，香氣撲鼻，海膽醬加芝士半溶狀態，邪惡非常，龍蝦肉嫩彈牙，係好食嘅，但實在太飽，只試了一件後又打包。錫紙焗雜菌，直接打包，不過最後呢個我第二日都係無食到的。到S2特色黃金炒飯，又係直接打包，第二日食依然好食，飯粒算分明，應該食到有三文魚、鵝肝、櫻花蝦等食材。呢包S2特色紙包花膠蜆湯幾特別，直接用透明紙包放上鐵板煮，因為食咗咁多嘢，都想飲返啖湯，湯頭清甜、花膠算大件嫩滑，冬菇肉夠厚，飲完之後，店員話原來呢個湯都可以打包。甜品：泡芙，一啖一口，現成貨，無乜特別。食咗2個餐、1杯18層海膽杯及1枝啤酒，如果本身已做緊嘅優惠價埋單要$2,1xx，依家5折咗後埋單接近$1,400，我就覺得抵食，因為食物份量都真係算幾大份。打包咗2盒分别有鐵板海膽醬芝士焗龍蝦同S2特色黃金炒飯、1盒日本鮮魷魚、北海道毛蟹及野菜、1盒錫紙焗雜菌，我就攞咗第1款1盒同第2盒，就算第二日生日正日食都好好食。…查看更多

今年叫做第二餐正式生日飯，又可以係5月12日生日前一晚嘅第一餐生日飯，其實今年真係無特別攪生日飯、生日派對、飲酒parties等，但唔知點解忙過上年好多，我自己都好混肴，都唔知自己講緊乜？多謝馬老闆帶我去九龍尖東富豪酒店1樓，多年獲得港澳必比登美食推介，米芝蓮車胎人美食嘅「錦 Nishiki」食串燒，入餐廳前當然要先量體溫及唧酒精搓手液，之後由店員安排座位，隨即放下熱茶、熱毛巾、醃漬物及白蘿蔔蓉，老闆主場，點菜佢發板，未點菜已點一枝純米大吟釀：一品(之後共飲咗1大1細枝)，平時夜晚10、11點後先飲酒嘅我，生日月就破介早啲飲，不過都唔係晚晚咁早飲。先上佐酒小食，有燒三文魚乾、燒三文魚翅(印象中)、毛豆、芥辣八爪魚、燒白飯魚乾、螢光魷魚、芝士酒盜，全部都係佐酒嘅美食，大部份都好好食，我最鍾意就係味濃嘅芥辣八爪魚、螢光魷魚同芝士酒盜，而香口嘅有燒三文魚乾、燒三文魚翅同燒白飯魚乾。「錦」嘅名物免治鷄肉腸出場了，先將日本蛋撈勻再塗上鷄肉腸去食，蛋汁嫩滑，鷄肉腸外微微煎香，內裏肉質細嫩、味道適中。燒鷄肝，人老了，大家share一串便可，燒得外脆內粉，膽固醇萬歲。燒牛肋骨肉，剛剛好7-8成熟，肉嫩仍好嚼口。燒煙肉蠔卷，煙肉微脆仍算軟身，蠔肉剛熟、仍能保留蠔汁。燒鷄翼，鷄翼已拆開燒，會比較容易處理同控制，火喉算不錯。喜之次一夜干燒，窮L嘅我有得食喜之次，唔好理佢新鮮定冰鮮，都係燒得幾好食。燒豬柳，又係膽固醇萬歲系列，油脂分佈夠充足，如果唔夠肥真係唔好食㗎。最後一樣到燒鰻魚了，邊度產地就唔考究啦，不過鰻魚係夠大件同夠肥美，美中不足只係有少少碎骨，下次嚟係會再點。店員問要唔要飯、粥、烏冬？平時一定要食澱粉質，因夜啲仲有另一餐生日飯，所以都係夠了。…查看更多

早兩日相信係因為中暑，昏迷咗12個鐘，諗住終於又再儲到錢去灣仔會議展覽中心食米芝蓮必比登美食推薦嘅新滬坊，所以嗰朝起身發現自己未死得先敢去訂新滬坊食晏，點之最後變咗朋友請食生日飯。依家新滬坊午市做緊四式點心拼盤，分別有A及B(只在星期一至五供應，公眾假期除外)、另有其他精選點心、廚師精選、仲有星期一至日都有供應嘅$138午市套餐：四式點心拼盤及飯麵揀其中一款、甜品(凡惠顧午市套餐，可用優惠價$25加一客精選甜品，依家推廣期內，星期一至五免茶芥(公眾假期除外)，供應時間上午11時30分至下午2時30分。轉咗午市新菜單後，依家見到新滬坊嘅師傅響透明玻璃底下嘅廚房俾大家見到佢哋努力咁整緊點心，咁當然新滬坊嘅名物拉麵依然係即拉即煮的。朋友未到，我坐低一陣經理就問我駛唔駛整枝可樂俾我飲住先，成2個月無嚟，估唔到經理仲記得我要飲可樂，細玻璃樽裝係特別好飲的；之後朋友到了，首先點了A($68)及B($98)嘅2個四式點心拼盤，再追加了塘坢高湯金魚餃($58)及牛肝菌煎帶子貝包($52有2件)，其實我係啱啱先食完早餐一陣，朋友細食，所以我哋無點飯麵。首先四式點心拼盤B先到，有上湯蟹肉灌湯餃、水晶螢素菜餃、翡翠香菇燒賣、魚籽醬百花春卷，因為A及B都有翡翠香菇燒賣、魚籽醬百花春卷，所以大家都唔駛爭，不過分開咗先後次序食，而我朋友就食咗上湯蟹肉灌湯餃、翡翠香菇燒賣同魚籽醬百花春卷，因為我掛住影嘢同未算肚餓，所以只食了水晶螢素菜餃，素菜餃比較細隻、一啪入口就完、餃皮煙韌、蔬菜粒鮮甜爽口。之後到塘坢高湯金魚餃，賣相已經有90分，真係好似見到有3條金魚響魚塘游緊咁，金魚餃嘅蝦肉同豬肉比例剛好，肉質鮮嫩彈牙，我想連清甜嘅湯頭都飲哂去，連嘴刁、偏食同唔喜歡食蝦餃嘅朋友都讚好食。再之後四式點心拼盤A，高湯小籠包、翡翠香菇燒賣、魚籽醬百花春卷、鷄蓉咸水角，朋友只咗食高湯小籠包，服務員叫要佢要襯熱食，但又要小心小籠包裏面好熱嘅湯汁，而我就食咗其他3樣，翡翠香菇燒賣肉質扎實；魚籽醬百花春卷超脆口、超脆嘅春卷已經蓋過咗魚籽醬嘅鹹香；鷄蓉咸水角，啤梨型賣相已不錯、外皮脆而不韌、餡料惹味。到牛肝菌煎帶子貝包了，貝殼嘅賣相造型又係靚到不得了，貝殼型嘅係包、裏面有片帶子、碟上有牛肝菌汁包圍住貝殼，包身係軟熟、帶子煎過微香而且腍身肉嫩、牛肝菌營養豐富、味道鮮美、將貝殼包及帶子沾上少鹹又帶甜嘅牛肝菌醬汁一齊食更添美味。唔好甜品嘅朋友居然點了香草雪糕蜜糖脆麻花($58)去食，我哋share食，朋友唔食香草雪糕，所以我食哂，香草雪糕冰凍香滑，但佢又食哂雪糕上面塊脆焦糖、蜜糖脆麻花酥化又唔會太甜、點埋橙味嘅泡沫一齊食有中和作用。朋友唔算係新滬坊粉絲，但佢睇完母親節memu後，走時佢居然去訂某日嘅午晚共兩餐，好彩仲有8人枱(見到有12人菜式係會分開6個一枱咁坐的)。本身呢個午市套餐，星期一至五(公眾假期除外)已經優惠免茶芥，多謝多年好朋友埋單，以米芝蓮必比登美食推薦餐廳嚟講算係抵食。…查看更多

其實呢度除咗有「奔之食堂」，仲有一個鋪位係叫「恆之茶居」，都係屬同一集團的，主打港式地道小食、點心及飲料，我哋亦都有點一啲去試下，得知呢度嘅主廚「甘哥」甘志遠曾經響香港某知名高級酒店任職過點心主管，咁真係要睇下佢嘅食物水準有幾好了？其實佢哋集團響台北信義區，上年已經開咗一間「恆之茶居」了，當地店嘅行政總廚就係曾經響台灣歷任3屆嘅國宴主廚杜日福，而香港嘅甘哥則為廚藝顧問，佢哋為嘅就係要將香港嘅地道美食帶到去台灣。呢間店面望落去只係似一間外賣麵包店，店內環境見到有唔知幾多十年前嘅舊香港街道相、古老版電話、風扇、雀籠、時鐘等等，牆上仲見到一幅李小龍，「龍爭虎鬥」嘅電影海報響度，但其實「恆之茶居」除咗有甘哥叉燒餐包、菠蘿油、菠蘿包、酥皮蛋撻王外，一樣有香港人去酒樓飲茶都會點嘅蝦餃同燒賣，不過佢哋以平民價去做出貴價版點心，就係分別加咗松露同海膽，除此之外，當然少不了香港人超級地道美食，混醬腸粉、咖喱魚蛋、豬皮蘿蔔同魷魚，更有蒸飯同秘製咖喱牛腩飯、飲嘅就係地道奶茶同檸茶。由於胃納有限，只點咗少少去食同飲，我哋點咗甘哥叉燒餐包(1個，$8)、松露蝦餃(1籠3隻，$32)、海膽燒賣(1籠3隻，$32)、特製混醬腸粉($16)、秘製咖喱四寶(魷魚、魚蛋、豬皮、蘿蔔，$20)同手沖檸茶(凍，$19)。甘哥叉燒餐包，第一round點咗6個、第二round點咗3個，叉燒餐包外面望落去有少少似墨西哥包嗰款酥皮，但其實係菠蘿包嘅酥皮，外皮咬落去係酥化，裏面叉燒係熱辣辣的，皮薄餡靚，非常足料夠惹味，一定要襯熱食，雖然微暖都仍然好食，但熱辣辣食嘅真係比下去。松露蝦餃，蝦餃嘅蝦肉加入咗松露醬，蒸熟後再將松露油注入蝦餃中，一入口就已經食到松露味，蝦餃皮少少煙韌，蝦肉餡料爽口彈牙，一口一粒，正。海膽燒賣，蝦同豬肉嘅比例適中，蒸熟後放上新鮮海膽，再去回蒸20秒，燒賣本身已經係美食，依家咁樣可以帶出到海膽嘅鮮美，令到有更豐富嘅層次感。特製混醬腸粉，我諗香港都無乜人未食過混醬腸粉呢啲街頭小食，由兒時響小販檔食到依家入哂鋪，真心而言，腸粉質素固然重要，更重要就係個混醬，但其實係食個兒時回憶，呢度嘅腸粉係屬於厚身，食落係軟嫩，甜醬、辣醬、豉油、麻醬同芝麻，真係少一樣都無咁好食，呢度係合格以上的。秘製咖喱四寶(魷魚、魚蛋、豬皮、蘿蔔)，因為手慢，我只係食到我同類嘅皮：豬皮同飲咗啖咖喱汁，呢度豬皮爽口彈牙，而豬皮其中一個特式係非常吸汁，而呢度嘅咖喱汁係惹味又係可以食到港式地道嗰種味。手沖檸茶，有人知道我鍾意飲凍檸茶，即刻幫我點.....2杯，茶底夠冰凍又未算過甜、係有少少濃，如果茶底可以清一點就更好，其實兩間餐廳都仲有好多嘢未食，下次一定要嚟再食，遲啲好似話會有專業咖啡師進駐，喜歡飲咖啡嘅你..........…查看更多

香港網絡唱作歌手龍小菌同朋友新合作之新店「奔之食堂 Pun's Food」剛於尖沙咀力寶太陽廣場開設分店，身為朋友嘅我緊係要去支持支持，而「奔之食堂」嘅總店響於約2年前進駐銅鑼灣至今，店舖主要大部份沿用返台灣食材及由台灣聘請返廚師等員工，所以係響香港經營台式餐廳非常難得、真真正正嘅台灣直送。由於其中一個合夥人係做建築行業的，所以店內環境之設計同擺設都整到好有古老台灣嘅特色，牆上更可見到有幾幅台灣嘅舊式電影海報，而小菌亦都為「奔之食堂」作咗首新歌，但由於疫情關係，所以團隊未能遠赴台北拍攝MV，等完成MV後便能面世。雖然只新開幾天，但午市時段係坐無虛席的，入門口量體温加酒精搓手液，呢個時勢係少不免，見到枱與枱之間有隔1.5米或用分隔措施，我影呢張相係等中間2座枱嘅客人一走先影的，一坐低我哋先點幾款前菜及台式小食，包括有前菜話梅小蕃茄($38)、南投竹山雲筍($38)、台式小食有宜蘭鹽酥鷄($48)、士林炸花枝丸(5粒，$38)及滷蛋(1顆，$8)。話梅小蕃茄，酸酸甜甜又多汁，令人開胃又醒神；南投竹山雲筍，台灣筍係我最愛台灣食材其中之一，雲筍脆嫩可口，微辣惹味。宜蘭鹽酥鷄，外皮金黃酥脆，裏面鷄肉細嫩；士林炸花枝丸，外面微脆，內裏足料入味又彈牙；滷蛋滷得夠入味，有少少肉燥放咗響蛋面，可能我無同麵或飯撈埋一齊食，所以覺得少少鹹。食完前菜及台式小食，飲返杯愛文芒果沙冰(季節限定，$52)，愛文芒有幾出名我相信唔需要再多講，沙冰微酸透心涼，杯頂嘅芒果肉香甜扎實，仲要係季節限定，所以大家唔好錯過。枱上面有自家製鹹酸菜同辣椒油提供，更加能感受到台灣嘅風味。點了店內名物：犇之三寶麵(牛腩、牛筋、牛肚，$86，如星期一至五午餐時段：11:30am-2:30pm，$96包普通熱飲一杯)，食麵通常先飲啖湯，湯頭夠清甜，麵條係我食開嗰款台灣粗身麵，牛腩肥瘦適中，算腍又好嚼口，牛筋好咬口又有韌勁，牛肚又夠軟腍，真心係幾高水準嘅犇三寶。犇之滷肉飯($48)，我開頭以為滷肉飯係用台灣米，點只原來係用日本新潟米，新潟米號稱全日本第一位嘅米，黏性強同甜味十足，滷肉鹹度同份量適中，重本有誠意之作。其實呢度除咗「奔之食堂」，隔離鋪位仲有一間「恆之茶居」，係同集團的，主打港式小食、點心，我哋亦都有點同試到一啲食物同飲料，會響另一篇食評介紹。…查看更多