EuniceLau_的个人专页

好耐都食過韓燒啦！係OpenRice見到呢間係旺角嘅任食韓燒餐廳，地點咁就腳，就即管試試～我哋兩個人都安排咗一張大圓枱俾我哋坐，空間好夠，而且隨身嘅物件，倒如手袋可以放喺凳下邊嘅空間，非常貼心。一坐低職員就會送上三碟前菜，分別係大豆芽、泡菜同埋海帶。三樣入面我最鍾意食泡菜😋佢嘅味道唔會太辣，啱晒我呢啲唔食辣嘅人，而且冇乜我平時最唔鍾意韓國泡菜嘅嗰陣酸味。餐廳入邊嘅自助醬料區有好多醬料可以選擇，而我哋就揀咗韓式辣醬、大醬同埋蒜蓉～雪櫃入邊有好多唔同種類嘅嘢飲，我就叫咗每次食韓燒必叫嘅忌廉溝鮮奶啦，而家好似越來越少地方有得飲🥲除咗唔同肉類之外，餐廳仲有好多韓國小食可以揀，我哋試咗嘅水冷麵、韓式炸雞同埋炸魷魚鬚都幾好味😋食韓燒梗係最梗要啲肉啦😂呢度嘅選擇都好多，有豬、牛、雞、羊同海鮮～而且蔬菜嘅選擇都唔少～呢度嘅肉類同其他韓燒餐廳唔同嘅係，調味得比較輕手，唔會一食落去就好鹹或者好重口味，比較可以食到肉本身嘅味道，呢點我係好欣賞嘅👍🏼為咗可以食得冇咁有罪惡咁，我哋跟咗韓國人嘅食法，叫咗一盤生菜包住啲肉食😂食完飯之後，每位食客都會送一份雪條，有四款口味可以選擇。我就揀咗芒果味，呢款雪條以前都食過，超級濃嘅芒果味，好似食緊原個芒果咁😂😂😂做飯後甜品真係好滿足呀～…查看更多

天氣開始轉凍，又係時候食雞煲打邊爐！上網搵咗呢間出名食雞煲嘅餐廳，係太和火車站行10分鐘左右，都算方便。除咗雞煲，餐牌仲有好多其他款式嘅煲。不過今次一心想食雞煲，所以就叫咗花膠雞煲(半隻雞)。同我一樣唔食得辣嘅朋友，可以試吓微辣，有少少麻味同辣味，惹味得嚟又接受到😋• 花膠雞煲(半隻雞) $228半隻雞嘅分量兩個人食啱啱好！而且花膠嘅分量都唔少，大概有6-7塊，每塊都大大塊，絕對足料。雞煲嘅醬汁係有少少甜甜地，好濃郁。雞件索哂醬汁嘅味，而且一啲都唔老～• 八妹拼盤 $82呢個好有驚喜！全部蔬菜都好新鮮～打邊爐除咗食肉，都要食啲菜先得嘅😂• 手切肥牛(小) $208打邊爐必叫嘅肥牛😂今次奢侈少少叫咗手切肥牛，牛味幾濃，而且肥瘦比平時嘅肥牛均勻。• 羊肉卷 $58呢碟羊肉幾抵食～$58份量都幾多。而且估唔到羊肉同雞煲湯底都幾夾😆• 鴛鴦滑 $108左邊白色係墨魚滑，右邊係蝦滑。兩款都好有鮮味！而且就算滾耐咗都keep到好彈牙😋• 三拼(萵筍/准山/蘿蔔)一盤有哂得我打邊爐必叫嘅配料，三樣食材都係越滾越入味，可以吸哂湯底嘅精華😋餐廳嘅飲品選擇都幾多，今次就叫咗杯凍檸柑桔($32)。味道同酸梅湯有啲似，鹹鹹酸酸，入面仲有兩粒話梅😂$32大大杯，啱晒打邊爐飲。…查看更多

朋友介紹咗呢間cafe俾我，個位置都幾隱蔽吓，要搵吓路先去到😂～超級鍾意食蛋嘅我，見到餐廳個meun真係好吸引！我哋叫咗最高人氣嘅法式蛋卷同港式煲蛋🤪同埋甜品敲我朱古力🍫法式蛋卷嘅蛋煎得好鬆軟，好似疏乎厘咁～入面包住菠菜、煙肉同車厘茄，夾埋鬆軟到爆嘅麵包，簡簡單單但真係好好味😋港式煲蛋有兩隻半熟蛋，上面鋪咗勁多芝士同辣肉腸😋話明係港式，煲蛋入面仲有蕃茄薯仔湯嘅蕃茄同薯仔😂好有驚喜😂係一間會返兜嘅cafe😋～～～…查看更多

同朋友去e-max睇戲，睇完落樓下商場搵好野食😋商場有好多餐廳，我哋揀咗呢間cafe，可以坐得舒舒服服～餐廳嘅環境好闊落，坐座之間嘅距離好足夠，而且有好多得意嘅插畫裝飾，幾啱同朋友坐低食個飯傾下計～＊有機藜麥文里醬烤焗鮮三文魚柳配刁草忌廉汁 $208三文魚柳烤焗嘅時間掌握得好好，表面好香脆而且內裏非常嫩滑。魚柳表面一粒粒嘅藜麥增加咗菜式嘅口感。而且旁邊嘅配菜一啲都唔馬虎，有烤焗過嘅薯仔、牛油蒜蓉西蘭花、蘆筍。絕對唔會因為係配菜就好求其😝＊慢煮巴馬火腿黑松露釀雞卷 $188呢個係朋友叫個菜名幾得意所以叫😂估唔到又幾有驚喜喎～雞卷嘅雞肉好嫩，完成唔老，入面釀咗火腿同埋黑松露野菌，口感層次好豐富呀😋＊法式班戟 $68最後嘅甜品時間！我哋叫咗最穩陣嘅榛子朱古力口味😂班戟入面除咗有滿滿嘅朱古力醬，仲夾咗香蕉，表面就有切咗片嘅士多啤梨～上枱嘅時候暖暖哋，再加埋啲忌廉，真係食到幾飽都仲可以食一碟😋😋😋好推薦大家睇完戲可以去試吓呢間餐廳！環境舒服，店員服務都好好～當日有其他客人幫朋友慶祝生日，餐廳職員好配合咁幫手播埋生日歌，真係好難忘😂👍🏼…查看更多

首先我必須要讚一讚呢間餐廳嘅裝修👍🏼餐廳位於商場嘅角落，係會有少少難搵，但餐廳嘅環境好闊落，而且設計幾靚，啲碗碟都好有心思，絕對唔hea！食物方面，我哋今次叫咗麵包焗咖喱軟殼蟹、飛天通菜同串燒沙爹。🇹🇭麵包焗咖喱軟殼蟹咖喱味道香濃，而且軟殼蟹分量都ok，啲麵包點埋咖喱好好味呀～呢個推薦！🇹🇭飛天通菜通菜就正正常常，少少辣幾惹味🇹🇭串燒沙爹(豬、牛、雞)醬汁嘅味道係甜甜哋，三款肉之中覺得雞肉嘅味道最好。牛肉食落會有啲似叉燒😂…查看更多

最近興green monday，今日都特登搵左間素食cafe嚟試下😛都聽過呢個餐廳好多次，知道會好多人排緊，所以幾日前已經book定位～食飯當日果然好full，有興趣真係要早啲book位，記住用餐時間限時90min(如果可以多少少就好啦🤪)。都聽聞過餐廳嘅食物幾大份(meun上都有寫到)，所以我哋3個女仔只係叫左2份主食+1份小食。香蒜芫茜意粉(唔記得影相😂)好啱我哋口味，除咗我哋都幾鍾意食芫茜之外，啲配菜例如粟米芯，蓮藕片都好好味！而且啲意粉嘅質地亦唔會淋batbat🤩另外我哋叫咗一碟冬陰意大利飯，味道小小辣，冬陰公嘅香料非常香，鍾意試特別野嘅朋友可以試下～小食我哋揀左黑松露蛋黃醬蕃薯條，$68份量都幾多！蕃薯好香甜，我覺得點唔點黑松露醬都好好味🤩…查看更多

聽過好多次Flat Iron嘅大名，今次終於有機會試吓😂沙田新城市呢間扒房主打Flat Iron平鐵牛扒，西冷、肉眼就食得多，Flat Iron真係第一次食～不過其實我唔係好食得出唔同部位嘅唔同🤪但單單就呢塊牛扒而言，味道係好食嘅😋meun上面寫推薦5成熟，而我覺得呢個生熟程度真係啱啱好！平時最怕啲牛扒好韌或者好多肥膏，但呢塊完全唔會！而且牛味都幾香幾濃～仲有任食嘅黑松露粗薯條🍟側邊仲有黑椒可以任加啱哂我😝…查看更多

每次經過呢間餐廳，都見到有好多人排緊隊🙈難得今次見門口冇人，就去試下佢嘅下午茶！話明係燒鵝餐廳，梗係要試下佢最出名嘅燒鵝～我叫咗油雞拼燒鵝米粉，燒鵝要+$5。米粉份量超多！係偏爽口嘅類型，咁大碗女仔可能會食唔晒。油雞味道唔錯，肉質幾滑，比街市燒味舖嘅好食😂而且咁啱切中雞胸部分，真係啖啖肉～至於最出名燒鵝，真係燒得好香，塊皮非常脆，唯一美中不足嘅係真係冇嘢肉食😂可能係我哋遲去，啲靚鵝比人食晒🥲但咁嘅價錢都算唔錯，值得推介！…查看更多

雖然沙田新城市廣場附近嘅糖水舖選擇唔多，但呢間舖頭嘅位置真係有啲唔就腳，所以一直都未試過😅見到有唔係好多地方有得食嘅龍眼冰，就即刻揀咗呢款「花之戀人」！龍眼冰嘅龍眼味唔會太假，配搭埋豆腐花，真係幾夾😋同埋配料真係幾多，有芋圓、珍珠、小丸子同埋一款隨機配料……超級豐富～…查看更多

公司近九龍城，放工就約埋朋友嚟九龍城食泰國菜。7點半去到，原本想去嘅另一間泰國菜餐廳排哂長龍，就轉戰小曼谷！不過去到都要等15至30分鐘先有得入。我哋俾安排去餐廳旁邊嘅另一個舖位，嗰邊嘅空間比較狹小， 坐得都幾迫夾。而且最大問題係餐廳要用手機落單，但我哋坐得比較入根本收唔到數據，呢樣嘢我諗餐廳要改善一下。講返啲食物先，我哋叫咗一個燒海鮮套餐。A款揀咗牛油蒜蓉燒青口，味道不過不失。但如果下一次有機會，我可能會想試燒帶子多啲。至於B款就揀咗泰式燒盲鰽，肉質燒得啱啱好，點埋個泰式醬汁酸酸辣辣仲好味😋兩個人再叫多一碟馬拉盞炒椰菜苗。除咗食泰國菜，都好少機會會食到椰菜苗。呢碟菜味道ok，但冇太大驚喜～…查看更多

想睇戲之前食個快餐，見去耐冇食過Mos Buger，就去咗火車站上層嗰間。以前一直都係食開最傳統摩斯漢堡，今次想試下新口味-北海道南瓜漢堡。呢款漢堡素食人士都可以選擇，而且味道都好唔錯，比起醬汁濃郁嘅漢堡包，佢相對會清新一啲😋啱哂啲唔想食得咁heavy嘅朋友仔！…查看更多

約咗朋友過河畔花園食lucnh見個面，最後揀咗呢間之前都試過一次嘅越南餐廳。餐廳環境都算大，週末lunch time都唔使等位，同朋友食飯傾下計都坐都幾舒服。Lunch time有lunch set可以選擇，主要都係以越式湯粉為主，亦有少部分飯類。而且加＄8就可以轉飲特飲！價錢都算好平易近人。呢碗番茄蟹膏蝦丸扎肉湯檬已經係我第二次encore。同第一次食嘅味道差唔多，最鐘意佢係蕃茄湯底入面真係食到淡淡嘅海鮮味，而且蕃茄落得幾足，夠哂味！啲蝦丸同扎肉味道都唔錯，比起普通扎肉多左啲咬口～湯粉可以自由配搭金邊粉／檬粉／河粉，朋友今次就揀咗金邊粉。牛肉肥瘦均勻，而且碗粉份量都唔小，＄53真係幾抵！…查看更多

夏天熱辣辣嚟到坪洲，朋友搵到一間cafe坐低食個lunch。cafe嘅環境係行簡約舒適路線，座位唔算多，位同位之間嘅距離都好夠寬闊，抵讚！食物種類同普遍cafe大同小異，不過價錢就比市區平少少。我哋order咗一份香蕉蛋糕、牛油果莎莎多士同埋鴨胸pizza。唔好咖啡嘅我哋就各叫一杯orange soda同埋香茅檸檬茶。牛油果莎莎多士同香蕉蛋糕都好有驚喜！Orange soda非常啱夏天嘅天氣，好清新！有機會再嚟坪洲，一定會再去食！…查看更多