Cheerland的个人专页

行街嘅時候想搵啲野食下，聽聞呢間好出名嘅小食店重開，今次就有機會試下。下晝兩點左右，野食即叫即整，好彩唔係好多人，唔洗等好耐就有得食啦。加厚繽紛樂榛子格仔餅要試就試啲平時少見嘅口味啦，繽紛樂榛子格仔餅，本身諗住叫普通正常版，但係老闆就建議食加厚版。等左5，6分鐘左加就有得食。格仔餅大大份，新鮮熱辣辣，加厚版大概係平時厚一半左右，外脆內軟，入面有榛子朱古力醬之外，仲真係有一粒粒一格格嘅繽紛樂，仲有少少花生碎，成個加埋真係有啲邪惡。但係由於格仔餅外層唔屬於厚粉，唔會感覺食左好多澱粉，就算係自己一個食曬成個都岩岩好，未至於飽飽滯滯。小食店除左格仔餅之外，仲有雞蛋仔，而且有好多唔同口味可以比大家選擇，另外仲有魚蛋等其他小食，雞蛋仔同格仔餅款式同口味咁多，睇黎都要黎多幾次先得啦！…查看更多

生日就係明正言順食好啲啦，今次就黎左同樣都係牧羊少年咖啡店餐廳旗下餐廳，但係感覺就好唔同啦。呢一間餐廳感覺同氣氛比較 fine dinning 一啲。位於文化中心地下位置，都幾私密。明太子康提芝士蟹肉墨西哥夾餅墨西哥夾餅餡料好豐富，有大大條明太子之外，仲有蟹肉牛油果，Taco亦脆卜卜，樣樣唔同口感，明太子配埋少少辛辣，清新又開胃。海膽黑魚子醬蟹肉貓耳朶粉海膽汁好濃郁而且杰身但順滑，仲可以包住每一粒貓耳朶粉，貓耳朵粉粒粒彈牙，間唔中食到幾粒黑魚子醬，咸咸香香，帶來小驚喜外，仲無咁膩亦都唔太滯，睇落份量唔多，但兩個人share 嘅話岩岩好啦。澳洲M4安格斯西冷及香烤蔬菜佐牛燒汁M4 唔油膩，西冷五成熟啱啱好，無筋仲好易咬開，蔬菜配左牛燒汁亦都惹味。蘋果批伴雪糕最後甜品叫左蘋果批，presentation 精緻，雪糕大大球。蘋果批熱辣辣，雪糕凍冰冰配搭得好好，蘋果批唔太甜之外，外層唔會好厚。事前問左職員幫手寫上生日快樂字句，朋友都好開心！…查看更多

慶祝生日係要食好啲啲嘅，呢到初初開嘅時候黎過一次，都覺得唔錯。所以今日同朋友慶祝生日帶埋佢黎試吓。可能因為舖位問題，舖頭分左兩邊，不過裝修同氣氛都幾好，唔會似 food court 咁開揚。今次就安排到窗口位，隔離落地玻璃隱約都睇到海景。Scallop & Tuna Tartare先叫前菜，擺盤都幾精緻，有帶子，有吞拿魚，仲有青瓜，牛油果，香草，全部切到一粒粒，仲有花花同跟埋法包。帶子同吞拿魚都唔算腥，加埋青檸汁都好清新，不過法包白雪雪咁，無點處理。Blue Mussels in Traditional Style呢到餐廳名叫 Mussel ，當然要叫個青口啦，Traditional Style係白酒煮青口，青口放係鑄鐵鍋入面，底下有香草白酒汁，跟配薯條。薯條可隨個人喜好，沾白酒汁又得，問職員 拎茄汁都 OK。鍋仔細細都幾多青口，粒粒都有肉有開口，冇呃秤，都鮮甜同肥美。US Prime Flank Steak主菜叫多左個五成熟牛扒，牛肉切開粉紅色，配菜仲有薯仔，蘆筍等其他蔬菜，賣相吸引，牛扒調味岩岩好，唔會太咸，都腍身，叫五成熟岩岩好。Coffee Opera Cake 餐廳職員好給力，甜品做埋生日蛋糕。預先打左電話比餐廳職員，想提早落單甜品同可以寫句生日快樂。成餐飯職員都無穿煲，仲時不時留意我地張枱食飯嘅情況同進度，食完牛扒就好西利咁自動上左個插左爉燭嘅甜品，生日甜品驚喜大成功呀 !…查看更多

今日放假同媽咪行完街，想食少少野，又唔想食正餐晚餐咁飽，所以覺得去食班戟都係一個好選擇。幸福班戟我始終覺得梳乎厘班戟黎講，原味先係最試到味道，亦係最穩定之選。落單到出餐 15分鐘左右，新鮮整出嚟，顏色同賣相都保持到水準，加埋蜜糖同牛油，香氣同味道都有升華。始終都想食少少咸野，所以都叫多左另一個口味。全麥班戟配芝士蘑菇奄列咸班戟已經唔係到到都有，仲要係梳乎厘 Pancake 就更加少，比起甜梳乎厘班戟，咸梳乎厘班戟質地比較實淨，燕麥香味亦都好濃，自己都喜歡食燕麥，呢個濃郁香氣令我 supprise。除左疏乎厘 Pancake 仲有奄列同沙律菜，感覺健康，營養均衡。麥盧卡蜂蜜 Roll cake擺盤好靚都精緻，roll cake 大大件，仲有小紅莓同 granola同忌廉伴碟。Roll cake 外層有食到有麥盧卡蜂蜜獨特香味，厚度都適中，軟熟唔乾身，中間whipped cream 就稍微遜色，欠缺香滑口感，亦欠缺奶香，幸好底層有小紅莓，granola同忌廉，為roll cake提供唔始層次搭配。…查看更多

每日返工都會經過好幾次，不論睇招牌同裝修都覺得佢淨係食曲奇同飲咖啡，原來其實佢地都有 lunch set 同其他野食架。今日撞岩朋友出黎食晏，早 D 拎定位，可以試試啦。其中要試又點少得大家都知嘅海鹽焦糖蘋果西多士！西多士就食得多，平時都係花生醬，果占，又點會諗到呢到就好似蘋果批 mix 西多咁樣整個份量都好大，又鬆軟，蘋果餡料都好足，雖然無話好甜，不過一個人食都會好膩同飽飽滯滯，我地一人一半真係岩岩好啦，做埋lunch 之如熱量夠都唔會好邪惡！另外就叫左個健康之選， everything bagel with poached egg !呢到嘅 everything bagel 加左少少牛油，熱辣辣真係又香又脆，感覺上同平時出面食嘅唔同，有强烈嘅蔥香同蒜香。Poached egg 一 篤穿橙金色嘅蛋黃流出黎，加埋香脆 bagel，簡簡單單，整體成餐 lunch 咁樣嘅配搭岩岩好，好滿足呀！…查看更多

好多時去天后都cafe 都要行到入大坑，原來只需要 2 分鐘路程，過條馬路就有一間又 chill ，野食又好味嘅 cafe 啦。Cafe setting 環境氣氛都好舒適，用左好多淺色同木色，仲有路少乾花報置，有一種令人立即放鬆嘅感覺。星期日嘅下畫，人流未算好多，未至於要等位，不過都座無虛席，我地就岩岩好最入面有一張大枱。Cafe Menu 選擇好樣化，意粉，多士，三文治，Bagel，甜品，應有盡有。首先就更係食啲咸野填填肚先啦！Bagel 有得揀 everything 定 黑麥，總覺得食咸 bagel ，everything會夾啲咁，牛肉有驚喜，原來唔係平時嘅煙燻牛肉，而係兩大塊薄牛柳片，汁燒過仲要好 juicy，一啲都唔乾，仲好有牛味，加埋 sour cream，味道好夾，配菜仲有沙律添。沙律大大份，所有食材都好新鮮，雞肉又嫩又淋，沙律醬用左蜜糖芥末，又清新又好味。呢個係甜品新品 special，賣相精緻好吸引，頂層鋪左深橙色既粒粒芒果，中間 tart 芯用左 yogurt ，酸酸甜甜又light又健康，味道清新一啲都唔膩，tart皮都做得好好，有牛油香氣次外，仲唔易散開。Single Origin Chocolate - Congo 70% | Latte…查看更多

每次lunch time經過門口都見到呢間海南雞飯有人龍要等位，撞啱今日要一個人食lunch，就襯呢個機會去試吓呢間人氣咁高嘅海南雞飯。當日好好彩，一位即刻有位入。因為舖頭座位唔算多，所以繁忙時間大部分人都要搭枱。海南雞肉食落好嫩滑，一啲都唔老，而雞皮就爽口得嚟仲好滑嘟嘟。不過就咁食就覺得唔算太夠味，配埋佢哋嘅醬汁就啱啱好。醬汁唔會太酸同太辣，仲可以用嚟撈飯食。同樣地，佢哋嘅油飯調味亦都唔算重手，有少少蒜香，唔會過份油膩。另外一提，跟餐可以選擇配椰子雞湯，不過就數量有限，遲左就冇晒。…查看更多

夏日炎炎，最岩去食冰啦，今日就黎左尖沙咀呢間雲朶打卡 cafe 啦。餐廳開 12 點，我地大概幾 1 點左右黎到，離遠已經見到有人龍啦。排隊係露天位置，好彩都冇太陽曬住，人龍都郁得快，等左 40 分鐘就入得啦。餐廳空間比想像中大，門口已經係打卡位，擺放左雲朶梳發，小茶几同幾種植物，色系就行北歐風，比較自然同舒服。餐廳除左甜品外亦有提供正餐咸食，未食晏嘅我地就岩曬啦。為左留返肚仔空間食甜品，咸食都唔敢叫太多，所以揀左一個意粉同一個薯條。蒜香明太子櫻花蝦珍寶帶子意粉意粉有兩粒大大粒既帶子，明太子同蒜味都濃，而且有別平時食明太子忌廉嘅味道，整體煮得比較乾身，食曬成碟都唔會飽飽滯滯。配料仲有煙肉，令成個意粉更加惹味。辣肉腸薯條薯條道揀左個清清地，有辣肉腸片同薯條，薯條熱辣辣脆卜卜，條條肥美冇炸空氣。Canele Affogato又想食 canele 又想食雪糕，呢個甜品就可以一次過滿足曬兩個願望啦。Canele 份量都幾多，外脆內軟煙煙韌韌，雪糕有香濃牛奶味，加埋咖啡嘅少少苦味，整體配合都好好。芋頭牛奶冰平時好似好少見到芋頭冰，所以今次就試試佢。紫色既芋泥配香雪雪嘅牛奶冰，放上枱面又靚又吸引，食到中間仲有驚喜，原來中間有大大舊芋泥，仲有芋圓添，每一啖都可以按自己喜好做配搭，食軟綿綿嘅冰又得，食煙韌嘅芋圓都得。…查看更多

辛苦搵來自在食，weekend 好好享受好，生活先平衡。今日就黎左 Somm嘆個靚 brunch啦！係 landmark 商場搭𨋢上 7 樓就到啦，Somm 設計同裝修比較暗，少少似小酒館咁，中間有半圈形 bar table，可以話係餐廳焦點，不過由於頂部都做左弧形設計，聲音比較集中，人多時候會比較嘈。Weekend brunch menu 就包括頭盤麵包，前菜，主菜，甜品同飲品。Menu 有 3 個選擇，都係 for two 同 for share，主要差別在於飲品方面。由麵包開始，分別有兩個牛角包同兩個法式扁平面包，扁平面包帶有香草同橄欖油香味，加埋蕃茄乾同烤瓜，味道唔錯，牛角包鬆軟，外層香脆，另外附送牛油同Jam。前菜主要係 cold cut 同咸點，有兩款火腿同一款香腸，咸點有三文魚肉醬配三文魚籽小撻，牛肉他他配鯡魚子醬薯仔小盒同皇帝蟹肉蘿蔔小卷。主菜揀左澳洲鱒魚配白蘆筍，鱒魚煎成半生熟，味道清淡鮮味，白蘆筍烹調時間岩岩好，有保留鮮嫩口感。另一款主菜就揀左炭燒鵪鶉配小麥菜青豆，炭燒過既鵪鶉肉質香濃 juicy，配菜清香。來到甜品尾聲先至係重中之重，甜品又點少得比稱為全港最好食既朱古力梳乎厘。梳乎厘口感輕盈，入面有流心朱古力醬，配埋朱古力雪葩，一凍一熱，啖啖朱古力味好滿足！另一個甜品就揀左覆盆子杏仁千層酥，千層酥充滿牛油香氣，忌廉軟滑，覆盆子甜甜酸酸，感覺清新不膩，為呢個 brunch 畫上最好既句號。…查看更多

今日路經上環，記得附近有一間出名賣麻糬波波嘅舖頭，所以順路去咗買嚟試吓！去到嘅時候係朝早9點半，啱啱遇到朱古力味新鮮出爐，買咗之後即刻趁熱食咗一粒，麻糬波波外皮脆脆地，裡面仲有流心嘅朱古力，朱古力味好香濃，而且一啲都唔甜。另外仲買咗肉鬆味，中間放滿肉鬆餡，外皮加咗黑芝麻，令味道冇咁單一，呢個鹹味嘅麻糬波波都值得一試！整體來講，呢度嘅麻糬波波口感唔算非常煙韌，但係好夠份量，外皮香脆夠厚，中間唔會係空心。…查看更多

月山環境非常優雅清幽，但比起尖沙咀嘅姐妹店-日山，呢度嘅裝修就比較黑。好彩職員安排咗窗口位，所以都有日光伴隨呢餐佳餚。好多人都會選擇食Omakase, 不過今次想慶祝一下，所以選擇咗食貴少少嘅Tasting Lunch Menu，包7款精緻菜式。第一道菜先有松葉蟹茶碗蒸，蒸蛋嫩滑，蛋味唔算好濃郁，配合鮮味十足嘅海鮮。第二道菜係北海道雲丹金槍魚腩杯，賣相精緻，刺身鮮甜，可以配搭放係一旁裝飾嘅紫蘇花一齊食。第三道菜有吉列A5和牛，外脆內嫩，口感唔會好油膩，而且配搭嘅醬汁都非常特別。之後第四道菜係慢煮北海道鮑魚，鮑魚肉質軟嫩，特別欣賞佢配合用鮑魚內臟打成嘅醬，鮮味十足。第五道菜係煮物，職員未介紹之前以為係牛頰肉，但原來係煮得非常入味嘅金槍魚鮫。金槍魚肉質又軟又嫩，湯汁味道香甜。最後嘅主食係海鮮丼，刺身同配料種類非常豐富，而且每款刺身都好鮮甜，飯量唔算多，但係非常滿足。甜品係日式菓子，麻糬皮好煙靭，包住來自沖繩嘅菠蘿，另外仲有清甜嘅蜜瓜配寒天。…查看更多

一直都知道灣仔有一間好出名嘅泰國菜，之前襯天氣開始轉熱，想趁「熱」感受吓夏天嘅氣息，weekend專程出咗去食呢間泰國菜！舖頭開12:00，12:30到嘅時候已經坐滿咗，要等下一輪先有位。但係職員好好，排緊隊嘅時候派咗杯冰水俾大家飲！入到去第一時間叫咗最出名嘅船麵！湯底香甜濃郁，和牛肉身超級嫩滑，仲有通菜、炸蒜同炸豬皮做配菜。雖然份量唔多，但係喺咁熱嘅天氣食一碗船麵，感覺剛剛好，仲有胃口可以食埋其他小食！闊河粉質地軟燸煙，火喉調味怡到好處，唔會太過油膩又非常惹味。睇賣相以為豬頸肉質會好乾，食第一口反而覺得唔錯。豬頸肉切成條狀並以炸蒜頭調味，入口啖啖肉，非常有咬口。呢個甜品好似係每枱嘅必食，食完濃味嘅主菜，食返一個椰子味嘅甜品，的確係解膩之選。飲品冇提供飲筒，可以大大啖飲，飲嘅時候覺得充滿泰國特色！…查看更多

第一次去 Ninety 時候係幫襯灣仔店，當時佢地仲未有分店，仲記得嗰次咖啡好飲，食物好食，裝修服務等都高質。知道佢地開咗新分店，一路都好想再試，所以下午同埋朋友嚟左食個 early dinner。 可能因為我地入座時間都唔咸唔淡，食 Tea 太遲食晚飯又太早，所以仲有得叫 Day Menu 同 Brunch Board 之外，又可以睇下Night Menu有咩好食。 而且佢地主打澳洲式，過往經驗，澳洲菜都好飽，所以呢個時間可以食得 Light d 都幾好 !Brunch Board 都幾得意，一個 set 按 item 收費，一 Set 包括麵包，肉類海鮮，蔬菜，蛋同奶類。我地就揀左 Sourdough 配牛油果，三文魚，炒蛋，薯餅。一心以為佢會係三文治咁樣，點知來到好似定食咁，仲樣樣都好精緻。牛油果好新鮮，Creamy 又甘甜，三文魚肥美配埋醬汁一啲都唔鯹，炒蛋香滑仲帶有松露香味。另外仲加左個 Mixed Berries Yogurt Bowl ，生果乳酪的配搭，甜甜果香低卡又飽肚。…查看更多

去到戲曲中心，一個咁有文化氣色嘅地方，食嘅4野都要有Ｄ文化氣色啦！係就係有文化，不過食既係香港地道文化！呢間茶餐廳，除咗裝修內外懷舊富中國風外，食嘅野仲好有特色，其中一樣就係早排成為熱話既芫荽麵！一坐低梗係睇睇芫荽麵係咩來頭啦～原本係車仔麵嘅形式，可以按照大家嘅喜好去選擇湯底同配料，所以就算唔食芫荽但又想嚟睇下戲曲中心再醫肚都無問題。配搭幾多，仲有另類選擇，例如花膠，鴨血，黑枝竹等。 而我地就揀咗黑枝竹、墨魚丸、牛腩，湯就更係揀芫荽湯啦！職員擺碗麵上枱仲心諗又話芫荽嘅，都冇料到。點知真係芫荽沉歸底，用匙羹搞搞下，一下成個湯都染綠了，Magic moment 就係咁簡單。個湯之外都仲有好多芫荽做配料，咪睇佢青青綠綠咁樣，濃稠適中之外，味道岩岩好亦唔會太腥，手工麵嘅質地煙韌都彈牙。 除左車仔麵之外，餐廳食品種類都好多，早午晚下午茶各有各精彩，而撞啱下午茶既我哋，梗係試埋經典西多士同芫荽滑蛋煙三文魚多士啦！西多士金黃色方方正正，厚厚地小小舊，樣子可愛，入面搽好均勻花生醬，淋埋糖漿，吸引到流晒口水芫荽滑蛋煙三文魚多士，炒蛋都幾滑，滑得嚟唔會太生，唯獨煙三文魚味道相對較濃，有少許蓋過芫荽味。 而野飲又點少得茶餐廳必備嘅凍檸茶，仲有新嘢阿華田脆脆。 整體嚟講，餐廳食物質數同服務態度都幾好，職員好有禮貌，亦會適當地做出小推介，價格以茶餐廳衡量較同行略高，但考慮到地區和賣點嚟講可以接受。…查看更多

上次行過睇到個大招牌已經好有興趣，淨係睇名就睇唔出食咩，但總係覺得喺呢到食夜晚好似好有feel。今日準時收工，約埋朋友去睇吓究竟係咩葫蘆賣咩藥！門口嘅霓虹燈招牌好有特色，既有舊式味道又有新式Modern感覺，所以好多人都會嚟打吓卡。門口有放置大型餐牌同推介菜式，原來呢到係食泰國fusion菜！到步嘅時候啱啱開始晚飯時間，都有一兩個人等緊位，但暫未見有人龍。餐廳樓高兩層，用霓虹燈同香港地道設計作為舖頭主題同裝飾。 樓上空間都幾闊落，不過燈光偏暗而且枱比較細。餐牌食物種類唔算好多，但一般常見嘅菜式呢到都有，仲有做晚市套餐。我哋最後叫咗一個主食同一個dinner set，細細哋又可以試吓唔同嘢。睇落賣相都唔錯，人哋話夾埋蒜頭一齊食可以殺菌，但點都要試吓原汁原味先嘅。就咁食，生蝦少咗蝦味亦都唔係好夠鮮甜，個酸辣汁調較得尚可，點咗嚟食可以帶出蝦味。以為沙律細細地，點知都幾大份！木瓜爽口但唔會太硬，除左木瓜之外都有好多菜。套餐都係一人用，所以小食都一件起兩件止，但味道都唔錯。炒金邊粉個樣配埋個盤感覺舊式又地道，蝦嘅大小中等爽口彈牙，而且都幾多。亦都幾欣賞某幾樣重味嘅配料會放碟邊，例如辣椒粉同花生，可以因應個人口味自己混合適當份量。套餐仲包一杯指定飲品同一個小甜品，或者可以加錢轉其他飲品都得。 食咗個細細嘅椰青大菜糕唔係好夠喉，所以最後嗌多咗個食泰國嘢必食嘅芒果糯米飯！糯米飯砌成小山丘，上半係青色嘅椰汁斑蘭味，下半係蝶豆花味。芒果切好放兩邊，雖然睇落色水偏淺同乾身，但味道清甜帶少少芒果香，配埋椰汁飯甜度啱啱好。…查看更多