豬仔1號的个人专页

機緣巧合下黎到呢間小店，雖然細，大概坐到12人左右，但冷氣夠，唔會逼，唔會坐得唔舒服。老闆娘好熱情，坐低左會推介食物，但唔會hardsell，社恐人士可以安心幫襯。舖頭好似主打海鮮，好多海鮮可以揀，不過我自己唔係好食海鮮，所以冇叫好多。我地唔食辣所以大部份野都走辣，但個汁本身已經好味。海鮮夠鮮味，松葉蟹甲羅燒連我少食海鮮都覺得好食。所有野燒完都唔會乾身，例如：魷魚筒又嫩又彈牙，雞泡魚乾好味有咬口。叫左9樣野，連埋3樣野飲，加老闆娘請既雞泡魚乾，冇加一，埋單$603。…查看更多

厚福街美食多，呢間泰式車仔麵船麵都成日有foodie講。星期六12點幾，難得條街未開始旺，冇咩人，所以就揀左呢間餐廳，諗住終於有機會試下。點知……完全唔明點解IG成日都有人推介如果講價錢平既話，都只係比同街既沾麵拉麵平，人均七十幾蚊，其實都有唔少更好既選擇。個湯底唔係熱辣辣，好似濃郁醬汁味咁，小的不才，食唔出咩味，亦冇覺得特別好食。豬紅有少少腥味，蘿蔔偏硬冇味。丸、肉……所有食材都冇乜味，好似快速白烚咁，淡然無味。春卷油到狂滴油，有圖有真相。泰式奶茶係偏多奶，冇乜茶味。…查看更多

唔知係因為疫情緣故定係熱潮已過，唔駛等位兼且冇咩食客我想食同飲既野都冇，失望。想食400次牛角窩夫同想飲焙茶冰樂，但冇窩夫，冇冰樂熱食得意粉，得4-5款，冇影menu唔記得。如果有薯條/雞翼呢類小食會好啲。意粉份量唔多，兩位女士一人一份share都handle到，值得一讚係每條意粉都沾滿汁同有咬口。Pancake一份兩塊，我本身對pancake冇特別喜愛，係為左試牛角窩夫而黎。個pancake都好食既，幾有蛋香味，唔會好似食空氣咁，但唔會令我驚豔或想再黎食。…查看更多

外賣返黎，炸物熱，漢堡凍。炸雞外皮唔係好夠脆，入面嫩同有少少肉汁；炸魷魚圈外面有啲乾，有啲硬同痴埋一舊。跟炸物既係一小盒打邊爐嗰啲胡麻醬，有啲稀，同炸物唔係好夾。兩個漢堡，包冇溫度，生菜同蕃茄有少少凍，菇同炸蝦餅冇溫度。燒烤汁芝士啡菇漢堡，除左啡菇仲有蘑菇同好似鴻禧菇咁既菇，菇既份量好多。成個包有好多汁，但啲汁凍左搞到好似好稠咁，有啲膩。菠蘿蝦堡，包中間既炸蝦餅淋哂，而且唔夠蝦味，整體黎講某連鎖漢堡店既蝦堡仲好食而且仲抵食。…查看更多

對呢間野唔會話有好大期望，但真係沒有最差只有更差。肉骨茶超油，淡而無味，入面有草菇、菜、杞子、肉丸、豆卜……未見過咁hea既肉骨茶。成間舖得收銀一個人，冇人執枱，餐具同水都係自助但完全冇人refill，食客要搵人拎野就要烏低身喺出餐位同職員講。等野食期間有兩枱食客鼓噪話等左半個鐘。我自己叫左肉骨茶配白飯、菠蘿油、菜同兩杯野飲，野食等左20分鐘左右。除左有兩個人間中係廚房出黎路過，基本上唔會有人係樓面。出菜位取餐嗰度有張枱，係喺廚房出面。有食客自己執枱，將上手既餐盤擺低喺嗰度，職員一出黎見到就叫個食客唔可以擺盤喺度。個食客冇理佢就返埋位坐，個職員收完啲盤喺樓面倒廚餘落垃圾桶。有兩個人間中會喺廚房出一出黎，冇留意佢地出黎做咩，但見到有次，個女職員趴喺個門框度同收銀唱山歌式講野，覺得佢周圍摸完又返入廚房做野，唔係幾衞生，不過好多時出街食飯都係眼不見為淨既。點知另一個男職員仲誇張，就係頭先喺樓面處理廚員既男職員，佢用上手用完既「雲吞」抹枱，上一手舊紙巾抹過咩，冇人知，但就比佢抹哂落枱，同沾染左喺佢既手套度………………野食、服務同衞生都嚇親我，所有分店我都唔會再幫襯。…查看更多

地點比較偏，旺角東落好似會方便啲。雖然店舖比較細，但都安排四人枱比二位既食客，唔駛比啲野食逼住食野。鴛鴦鍋（$175）湯底好足料！酸菜白肉鍋，有肉有菜仲有薯粉，份量十足，湯底仲好夠酸，中意酸既人一定要試！沙嗲麻辣鍋，有蜂巢豆腐同鴨血，叫左小辣，唔會覺得好辣，不過就冇乜沙嗲味，但食菜索哂湯就幾辣。麻辣鴨血（$28）唔知鍋入面已經有鴨血所以仲另外點左，鴨血煮好耐都夾唔散，好滑。御用手切肥牛 (小) （$155）牛肉條紋好靚，唔多筋，質感嫩滑。黑豚肉 半份（$66）本身酸菜白肉鍋已經有豬肉，可以唔駛另外叫都得。薄切，爽口有肉香。響鈴卷 半份（$35）即炸響鈴配搭酸甜醬，可以即食，不過都係中意淥一淥，好薄但過一過湯都唔會好淋，有淡淡既豆香。皇帝菜 半份+娃娃菜 半份（各$28）黑松露墨魚滑（$58）爽口彈牙，但可能湯底比較重味，食唔到黑松露味。手工啤 立秋+小滿 （$69+$66）立秋係東方美人茶釀製既手工啤，而小滿就係冬瓜茶釀製既手工啤，唔講未必飲得出係茶味，但就冇一般啤酒既味。唔記得影贈送既腐竹雞蛋湯水沙冰，因為仲有45分鐘先交枱，食得如火如荼既時候送上黎，店員話係送既湯水，我地就擺埋左一邊，到食完想飲既時候已經溶哂好甜。Book位既時候話只可以book 18:15或者20:15，限時兩個鐘，book左18:15，照計應該食到20:15，就算我早左入座都應該照計兩個鐘（早左唔到5分鐘），但店員話我地8點要離座，溝通完，店員check完話可以食到20:15，但到8點又有第二個黎催………查看更多

揀左一人一鍋，得鴛鴦鍋，所以一人揀兩個湯底，好處係可以試兩款口味，唔好處係本身個鍋已經細，仲要好淺，分一半就好逼，窄到擺舊芋頭/細麵餅落去就已經郁唔到，淺到擺舊大魚蛋落去都浸唔過。湯底偏淡，我個人點左香辣湯同豬骨湯，香辣湯完全唔辣，自己去左調味料區加辣椒，豬骨湯亦冇味。每枱有個細壺比人自己加湯，一枱4個人，加一次都唔夠，叫人又叫好耐先有人應。加既湯係鏗魚昆布湯，目測係清到水咁既湯，再加啲白色粒粒。牛肉分4個價位，第一級睇相都覺得好肥，所以揀左第二級特上肥牛，$228，但覺得唔值，又薄又輆。野食種類主打都係蔬菜類，但當日7點左右入座，好多都空空如也。手打丸類其實算ok。調味料區有好多選擇，即食熟食有南瓜湯有飯有咖哩，咖哩睇落都幾濃幾足料。唔係話好差或者劣食，但呢個價錢可以有其他選擇，我就唔會再encore。勝在有得電話book位，如果唔食牛，唔介意湯底淡味/要自己調味，其實都可以接受。…查看更多

用openrice book左位，12點半開門，早左到，門口有啲位比人坐得等，夠鐘就入得，仲有9折。餐廳環境同服務都ok。三個人叫左三樣野。食炸雞既地方都係食炸雞開心啲！天國的榮耀係牛扒加炒雜菜，當日冇肉眼供應所以呢個係西冷。小鐵板上，熱辣辣，肉汁流落盤度撈雜菜。可惜牛扒太薄身，鮮味同肉味欠奉；菜略嫌太生硬，感覺只係靠牛扒既肉汁吊味。性價比偏低。麥芽啤酒蝦唔會食到啤酒味，但麥芽啤酒帶出左蝦既鮮味，都算大隻既。但係嗰種鮮味有少少似好新鮮既蝦白灼都做到既味，係好食既，不過就掙咁啲特式。同埋性價比真係偏低，望落好大盤，其實得6隻，其他全部都係薯角。雖然個薯角都唔錯，薯仔既質感厚實，亦炸得金黃香脆，但主角應該係蝦。蜂蜜芝士（無骨）本身想食半半炸雞，可以試兩位味，但人懶，想食無骨雞，又冇類似既配搭，所以揀左呢款蜂蜜芝士無骨雞。（食到一半先記得影呢盤雞）薯條係雞既配菜，份量岩岩好，香脆得黎就算擺凍左都唔會好淋嗰隻。每件雞都沾滿左甜甜地既蜂蜜，但係乾身既，唔係濕漉漉咁。係香脆乾身得黎咬開會有啲肉汁。白色既應該係芝士粉，不過芝士控表示覺得唔夠芝士香。香芋沙冰香芋味濃，沙冰細滑，唔會有碎冰又唔會好快溶到變水。抹茶拿鐵朋友表示抹茶味濃郁，creamy。…查看更多

「Nene星級炸雞漢堡伴脆炸薯條」薯條正常，Burger個包烘得幾脆口，個醬汁都幾辣。「炸雞達人」七件唔同口味既無骨炸雞。見到有啲雞紅色醬、橙色粉……，侍應完全唔知啲雞係咩口味，餐牌亦冇寫。餐牌相同實物掙得幾遠下，例如餐牌相入面有兩件雞係舖滿大蔥之類既野，但實物完全冇呢樣野。圖中右下嗰件係勁辣，其他冇咁辣/唔辣，有咖哩、芝士、原味……其他食唔出係咩。「脆炸紫菜蝦卷」成個卷從外面既紫菜到入面既炸蝦都唔脆，甚至老土啲講句，可以話食蝦冇蝦味。「蘑菇炒粉絲」味道一般，以配料味道吊味，好多菇，好多蛋，仲有雲耳、蘿蔔絲……韓式粉絲但配料偏中式，有啲唔夾，粉絲炒得唔好，啲粉絲痴埋一住住。所有食物上桌都只係微暖。午餐餐牌上，漢堡同炸雞拼盤都冇辣椒仔既圖示，但餐牌上有其他餐點係有辣椒仔既圖示。服務方面，問侍應關於食物既問題，唔知道就靠估，亂答完就算。用餐期間仲曾經有一位女侍應彈跳式咁喺走廊跑過去同事堆度傾計。餐廳3點半清場，啲侍應好似完全唔知咁，3點25分先開始通知在場客人同出單。呢間炸雞係香港都開左一段時間，分店亦都有好幾間，但從餐牌、服務到食物味道質素都令人意想不到。…查看更多

同小朋友食完飯，諗住去Häagen-Dazs食雪糕，但outdated既我完全唔知東港城既Häagen-Dazs冇堂食。諗起呢間新開左一段時間既西餐廳好似主打窩夫，所以就借呢個機會諗住試下，點知兩個小朋友見到門口餐牌上既刨冰就被吸引咗。當時其實已經4點幾，所以都好多位，直接入座。兩個小朋友睇完menu都係揀返刨冰，真係令我哭笑不得。根據經驗，刨冰冇次食得完，我仲要有兩個刨冰咁多，所以我都係同佢地share好啦。刨冰一黎到果然冇令小朋友失望，賣相好好睇，唔係透明或者求其一堆醬咁。同餐牌既相一樣，又大又靚。菠蘿刨冰仲有驚喜，有菠蘿圍住伴碟。味道方面，兩個刨冰都係外面既冰冇乜味。因為啲醬比較集中哂喺「雪山」入面，可能係為左營造視覺效果好睇啲。入面既冰就冇咁乾噌噌同冇乜味，好甜但唔會好漏同好假！不過始終冰太凍，加上餐廳毫不吝嗇既餐點份量，所以都係食唔哂。大件夾抵食，只針對刨冰，希望下次有機會試下窩夫。…查看更多

前一晚先book位，open rice冇得book，但電話book位一樣得，一去到就可以入座！唔好見人均三百蚊就以為唔抵食，其實係我地得兩個人，但眼闊肚窄叫左4樣餸，仲飲左幾支啤酒。蠔餅大大塊，蠔仔都算大粒，但粉多左啲同唔得乾身，一定要襯熱食如果唔係就會油同淋。豬紅爽滑，唔會夾爛；小炒皇足料香口；鹵水拼盤都幾入味。服務方面，雖然係老店，但前一晚book位接聽電話既姐姐、當日收銀處既姐姐、甚至廚房叔叔（我搵唔到廁所行錯路去左廚房門口）都nice，唔似好多老店既大哥大姐咁粗聲粗氣，值得一讚！反觀樓面既服務比較遜色。每次飲完啤酒想叫人比多支，啲侍應明明係我正前方冇幾遠但都要招手招好耐先睇到我。甚至有次係佢地傾緊計望到我都唔理，然後叫另一個執緊枱既樓面黎應我。總括黎講都抵食同好食，如果想打冷都係個唔錯既選擇。…查看更多

朋友周六也要上班，特意來找她午膳。選擇光顧這間店是因為有朋友喜歡的all day breakfast。可是這個早餐實在令人失望。（重點是聊天所以忘了拍照）餐湯口感不幼滑，味道不香濃。早餐方面，薯絲都燶了、菇很油且味淡、煙肉又乾又硬、蛋沒有味道……腸和蕃茄是最正常的了。一心來吃全日早餐，沒想過這家店的早餐是如此不濟。我們另外點了個炸薯條，沒有太多評語，就薯味不重和有點空氣感。甜品方面，我們點了Tiramisu，同樣令人失望，cream的比例太多，吃一口，滿口都是cream。飲品方面，我點了一杯lemonade，尚算清新但略嫌不夠。總結，失望。感覺浪費了跟友人的美好午聚，因為午膳後大家又各自去上班/加班了。順帶一提，整體環境尚可，但始終店子比較少，枱也放得比較擠迫。因為跟朋友都吃不多，所以我們都是點了再share，問侍應拿了兩個碟子，兩個都有漬，是可以刮下來的那種。有點潔癖的我實在有點反感。…查看更多

即興約食飯，係openrice睇中呢間馬來西亞餐廳。行到去皇室堡，有人派緊優惠券同傳單，係一張十蚊現金券同埋一張送薄餅既優惠券（兩張可以同時使用）。星期三晚七點左右去到，唔駛等位，不過座位就逼左啲同張枱細左啲。揀左傳單上面既龍蝦喇沙，88蚊（好似係），勁大碗，味道都唔錯，唔會淨係得一浸辣味，龍蝦好多肉，肉質鮮嫩。薄餅雖然係送既，但一啲都唔馬虎，好軟熟。馬拉盞通菜夠味得黎唔太辣，正最正係炸蝦餅！熱辣辣又香又脆，啖啖蝦肉仲大大碟！仲有杯酒5x蚊勁大杯食到捧住個肚，埋單都係三百蚊唔駛，好抵。值得再去！…查看更多

以雲為主既韓式餐廳其實頗可愛的，但以味道評分的話則有點令人失望。顧客以女性為主，環境的確不錯，氣氛舒適，還有露天茶座。seoulmate柚子橄欖沙律加炸薯絲沙律正正常常，但薯絲真的要以「嚇死人」來形容，完全是咬不開的「一餅野」炸魚薯條薯條係蕃薯條，頗香口，不錯。至於炸魚，皮脆但比較鹹，顯得魚身冇咩味。牛粒蘑菇薄餅餡料ok，牛味香濃足料，但餅皮邊好乾好硬。一舊Seoulmate雲下的泡菜炒飯外層的雲是蛋白打成的軟綿綿泡沫，切開則是流心蛋黃和泡菜豬肉炒飯。但炒飯份量不算多，而且泡菜味不夠濃。一心為這個菜式前來，可能期望過高，所以有點失望comic dancer韓式手工啤，酒類飲品中性價比看似較高。果味頗香濃，但與一般啤酒的弱點一樣，就是一定要趁凍喝光。Oreo年糕多士這個甜品有個很冗長的名字，大概是什麼韓妹年糕多士與雪糕大戰。棉花糖偏甜是意料中事，但沒想到多士硬得連砌開都很困難。嘗試吃了一口但硬得我刮傷了口腔上顎，實在不能接受…查看更多

在荒蕪的黃竹坑裡，這餐廳實在是不可多得的一個美食點。之前有來這裡用過午膳但沒有拍照，有機會再造訪才再拍照分享。這次要介紹的是朋友買給我的蛋糕，分別是伯爵茶蛋糕和焙茶芝士蛋糕。伯爵茶蛋糕滿滿都是淡淡茶香、口感幼滑的忌廉包圍著鬆軟的蛋糕，感覺清香可口而不膩，伯爵茶控絕對不能錯過。焙茶芝士蛋糕略嫌焙茶味不夠突出，如果朋友沒有預先告訴我，我還以為是奶茶之類的茶味蛋糕。但此蛋糕勝在芝士質感結實並富有淡淡芝士鹹香，芝士蛋糕迷值得一試。…查看更多