Hitman47的个人专页

這天行經水務署附近，見這間店是旺角比較少見的星馬菜，便和女朋友來試試。 1) 原味肉骨茶(小)$39藥材味不太重，都幾好味。另外，我們那時不知要飲埋啲湯的，但個伙記(可能是老闆)教我們成碗肉骨茶最重要是碗湯，一定要飲埋，而因為啲湯已經凍咗的關係，所以佢還幫我們放入廚房整番熱佢。對於佢的服務態度，我覺得絕對抵讚。 2) 招牌雞(例牌)$42這個應該是豉油雞，味道都幾好，但份量不是太多。 3) 馬拉盞炒菜飯$39味道還可以，但份量都適中。總括而言，價錢不算貴，食物的味道不錯，份量都適中，值得推介。埋單連加一總計$132。…查看更多

從未去過這間出名食雪花冰的食府，便來試下。我們9:30pm來到，都有不少人排隊等候，幸好等了10分鐘就有位。之後，我和女朋友share 一個雪花冰來食。 1) 香蕉秋香$35這個真的幾好味，感覺很棉很軟，份量又大，好抵食，差點想再叫多一個。…查看更多

和女朋友行完虎豹別墅，聽講這是老牌扒房，便來試下。間店個外圍格局都唔錯，入面都OK，但佢始終是老牌餐廳，不能要求太多。我哋7:45pm便到，都唔駛等位，入到去周圍啲枱仲有很多是空的。睇完個餐牌，好多扒都好貴下，全部都超過$100。咁樣唯有試下佢既特餐啦，$88有餐包、湯、主菜、雪糕和飲品，價錢都可以的。我哋兩個人分別叫了兩個特餐： 1) 羅宋湯及雞廉湯一般的紅湯和白湯，無乜特別。 2) 免翁牛柳據說免翁牛柳是牛腰部的牛柳最中心一段位置。塊牛柳食落去都可以的，但不是話特別好食。 3) 美式什扒老實說，味道其實和普通餐廳的什扒無甚麼大分別。 4) 雪糕一般的雪糕，無乜可以講。總括而言，價錢偏貴，食物一般，份量不是太多，唯一可取是有古舊的味道，但我應該不會再去這店了。埋單連加一總計$194。…查看更多

之前都幫襯過這店買章魚小丸子，但無寫食評。今次剛遊完濕地公園，便再幫襯這店買章魚小丸子及雪糕。1) 章魚小丸子5粒$5雖然我見右面那間「三和小食｣賣緊$5七粒章魚小丸子，但我選擇再幫襯這店的原因如下：1)這間店的章魚小丸子比較大粒。2)我在旁邊觀察兩間店整章魚小丸子時，發覺這間店落得比較多料。3)這間店排哂隊，而「三和小食｣就不需點排隊。通常比較多人排隊的應該比較好食。4)我還聽到一對情侶的對話，女的問男的為何不去「三和小食｣買，那裏同樣價錢有7粒小丸子，會抵啲。但男的回答話這間店好食啲。睇佢哋應該是住天水圍的，既然本地人都咁講，這間店的小丸子應該好食啲。講番個小丸子，價錢好便宜，味道仍然咁好，味咬開後見內裏有好多章魚，好足料，不是只得個外皮。 2) 雪糕5元兩球價錢便宜，其實新北江商場的小食店多是這個價。味道幾好，而且都很大舊下。總括而言，價錢便宜，食物好味，份量又多，值得推介。註：之後我也幫襯過「三和小食｣買章魚小丸子，發覺仍然是這店的章魚小丸子好食啲。(見「三和小食｣的食評」…查看更多

來過幾次天水圍食章魚小丸子都是幫襯這店左邊的「日昇小食甜品｣，咁巧今日我在這店右面的「冰山之國｣買咗十元日式冷麵，話有優惠可加$3到這店換購章魚小丸子7粒(原價$5)，便試下幫襯這間店了。1) 章魚小丸子7粒$3(原價$5)價錢好便宜，有7粒丸咁多，仲有一個膠盒和膠袋裝住。可能見$3咁平，我見都有很多人買。啲丸味道都幾好的，但對比起「日昇小食甜品｣，粒丸比較細，而且啲料無咁足，比較少章魚。之前，大家都是$5，我見啲人多數都去「日昇小食甜品｣的。總括而言，價錢便宜，食物都好味，值得一試。但如要原價$5的話，我會選擇去隔壁「日昇小食甜品｣以$5買5粒比較足料和大粒的小丸子。…查看更多

今日和女朋友去濕地公園玩完便搭車到元朗一帶食飯，見這間有不少好評，便來這間店試下。我們7點左右就到，等咗5-10分鐘左右就有位了。舖內環境都可以，啲侍應仲主動拿張椅俾我哋擺袋，服務都算唔錯。我們叫了以下食物：1) 自選迷你壽司一客(16件)$108$108有16件壽司，仲有60款選擇，係就係算平的。既然是以件計，我哋當然叫啲比較貴的，無理由仲叫三文魚，故就叫咗甜蝦，油甘魚，劍魚腩，章紅魚及希靈魚等。可是，啲壽司嚟到後就發覺啲飯比起一般壽司店大舊，食起上來真的很失望，啲飯完全唔好食，而且啲味比較怪。我從未食過啲壽司是咁既樣的，其他元朗壽司店如「金田長壽司｣或「麻布十番｣都無這問題。至於飯面啲甜蝦，油甘魚或劍魚腩之類亦不見得新鮮。2) 巨大挪威三文魚壽司$20 飯和自選壽司一樣唔好食。而且也不見得很巨大，飯就大見咗既，但三文魚只大件少少。3) 串燒雞軟骨$7 價錢都算平，但雞軟骨好硬，一啲都唔“軟”，可能炸過龍了。我仲見隔離枱叫咗成兜雞軟骨，唔知佢哋點食了。4) 鹽燒牛舌串$11 這個比起雞軟骨好得多，味道都可以。總括而言，價錢雖然較為便宜，但食物唔好食是最大的致命傷。以咁個食物質素，我應該不會再去這店了。埋單總計$146。…查看更多

今日和女朋友去濕地公園玩，便先到新北江商場食嘢。這間店我以前經常去，故重臨舊地，但我發覺食物的質素差了許多。 1) 擔擔水餃麵$25麵太腍身了，一啲都唔好食。水餃的味道都麻麻地。 2) 四川擔擔麵$20 麵太腍身了，一啲都唔好食。 3) 鮮肉小籠包一籠(5只)$20 小籠包用錫紙兜裝著，怪模怪樣，皮又好厚，唔掂。4) 豆漿1杯$3 一般的豆漿味道，無乜特別。總括而言，食物無樣掂，不值一試。埋單總計$68。…查看更多

平安夜不想食自助餐或其他貴價餐廳，便book了這間café食聖誕大餐。二人聖誕餐有1個前菜、2碗湯、2個主菜、2個甜品和2杯飲品，價錢是$298，限時兩小時，都算係咁了。這間Café有一間大房和一間細房，我們被編排到細房，細房有3個兩人枱，2個四人枱，落單要按側邊的鐘仔。開頭個侍應安排我們坐最埋邊的一個二人位，不過張木椅就不好坐，由於未有其他人到，故我們換了另一張有sofa椅的二人位坐，這張就比較舒服。Café整體環境算係咁，都有不少聖誕佈置。不過我們張枱就望不到風景(其實成間細房都望不到，只有大房有得望)，但卻可睇電視補番數(剛好可以睇某電視節目大結局)。1) 芝士焗意大利雲吞雲吞加薯蓉，味道都可以。2) 蟹肉海鮮周打湯/意大利雜菜湯一般的紅湯和白湯，無乜特別。3) 炭燒紐西蘭肉眼扒我睇了之前的食評話叫了7成熟的肉眼扒，會好似10成熟咁，變得很「銀｣。所以，我叫了5成熟的肉眼扒，幸好無「很｣的問題，味道都幾好。可是，我們後面那枱情侶就無咁幸運，佢哋投訴塊7成熟的肉眼扒好「銀｣，個伙記(應該是老闆)解釋一輪話側邊可能比較熟，而中間就無咁熟，叫個客在中間界開，如界得開和見到血，就無問題。最後，佢哋都無換到塊扒。不過，之後個男仔就被女朋友鬧點解唔換過塊。4) 挪咸煙三文魚配黑松露菌墨魚麵味道都不錯，有一定水準。5) 法式焦糖燉蛋味道都不錯。6) 飲品因為個錢只包$16的熱飲，故我們加錢叫了兩杯$18的凍綠茶，飲品的味道都可以。總括而言，食物的質素不錯，價錢可以，環境不錯，可以一試。埋單連加一總計$333 (餐$298 + 飲品差價 $4 + 加一$31)。…查看更多

剛去完灣仔冬日美食嘉年華，便搭車到銅鑼灣食飯。這間店一定要排隊等候，無得拿飛仔，幸好我們不到7點便到達，前面只有8-9人等候，排了20分鐘左右便入到去。個餐牌好似好多款咁，其實個組合來來去去都是：湯(可選鹽味、豬骨湯、味噌或醬油(魚味)等)+餸(可選叉燒，北海道牛油粟米，炸豬扒(好似係))+拉麵，我們最後叫了以下兩款麵：1) 豬骨湯叉燒拉麵$58叉燒的味道不錯，而拉麵都幾好食。豬骨湯都算咸，可能落了不少味精。 2) 鹽味北海道牛油粟米拉麵$63 拉麵好食，粟米老實說我食不出和普通粟米有甚麼分別。鹽味真的很咸，不過叫得鹽味就預咗了。總括而言，拉麵做得不錯，而價錢在銅鑼灣來說都算可以，值得一試。埋單連加一總計$133。…查看更多

由於除夕會和女朋友到尖沙咀海旁一帶倒數，故選了位於尖沙咀的這間店食飯。這天只有聖誕及新年套餐可以選，我們選了聖誕及新年二人套餐III，貪它價錢最平，有兩碗湯、兩個主茶及兩杯嘢飲。1) 帶子蘑菇忌廉湯味道一般，都可以見到有一粒粒帶子在湯裏。 2) 聖誕熱鍋：露絲瑪莉燒雞配闊條麵 這個應該燒過龍了，搞到啲雞成陣濃味。不過趕住去倒數，所以便無叫佢換了。 3) 聖誕珍寶雜錦薄餅有薄批和厚批選，我們選了厚批，這個味道不錯，比起個燒雞好好多。總括而言，價錢在除夕來說都算可以，而味道也可以。不過，因為個燒雞配闊條麵實在比較差，價錢又不便宜，所以都要俾負評這店了。埋單連加一總計$382.8。…查看更多

我和女朋友由盛屋村經髻山行山至天水圍，便順便到新北江商場行下兼食嘢填肚。 1) 日式冷麵2元一包價錢便宜，屯門的小食店要10元4包，這裏卻是10元5包。食物新鮮，味道也不錯，款式有：豬耳， 中華沙津， 雞軟骨， 青瓜，牛栢葉， 螺肉， 蜆肉， 魷魚鬚， 海蜇， 八爪魚及各款冷麵等。 2) 雪糕5元兩球價錢便宜，新北江商場的小食店多是這個價，但其他地方我還未見過咁平。味道不錯，款式有：鵪春蛋，黑芝麻，朱古力，呍呢嗱，棷子，忌廉曲奇，士多啤梨，薄荷朱古力，綠茶，咖啡，芒果，荔枝，香芋，紅豆及豆腐等14種選擇。另外，此店剛做緊優惠，買任何一款食品滿$10(例如：買滿日式冷麵10元或雪糕10元，但買雪糕5元加日式冷麵5元就不算)可加$3到鄰店「三和小食｣換購章魚小丸子7粒(原價$5)。總括而言，價錢便宜，食物都好味，值得一試。埋單一共$15(5包日式冷麵$10 +雪糕兩球$5)。…查看更多

想來這間店很欠了，之前都因訂不到位而嚟不到，所以今次在該天下午2時已訂定位(在星期六、日或公眾假期，無訂位的話，夜晚基本上都Full)。食物有不少款式，如：刺身類、壽司類、炸物類、燒物類、鐵板燒類、一品料理類和沙律冷盤類。但可惜的是無飲品送，只有得叫面士湯。刺身類我每種都有叫，味道都不錯，但賣相就有待改善，因好似胡亂擺上個碟到咁。壽司類我只叫了蟹籽壽司，味道一般。炸物類叫咗一口芝士、鱆魚小丸子、芝士年糕、吉列日本生蠔和炸蝦天婦羅。以上啲炸嘢味道都一般。燒物類叫了秋刀魚、鯖魚、多春魚、蜜汁黑椒豬肉腸、芝士焗蠔、牛舌、雞軟骨、燒羊鞍和栗米。秋刀魚和多春魚的味道認真不錯，好好味，值得推介。而鯖魚、蜜汁黑椒豬肉腸牛舌、雞軟骨、燒羊鞍等都不錯。而芝士焗蠔的味道都可以，但隻蠔似乎比較細。粟米好似無乜燒過咁，凍ga，唔掂。鐵板燒類叫了魷魚鬚、薄燒牛肉、蒜片牛柳粒、大阪燒餅。魷魚鬚、大阪燒餅薄燒牛肉的味道都可以。而蒜片牛柳粒味道只屬一般。一品料理類叫了枝豆、粟米粒粒燒、關東煮、日式蒸蛋、味噌汁和朝鮮泡菜豆腐鍋。日式蒸蛋和味噌汁幾好味。粟米粒粒燒和朝鮮泡菜豆腐鍋的味道就一般。關東煮好難食，獅子狗和蘿蔔等全部淋哂咁，我哋食咗少少就無食。枝豆都不太知食到啲乜，不好食。沙律冷盤類叫咗小女子魚干和日本水雲醋物。小女子魚干的味道都不錯，而日本水雲醋物就味道一般。這間店幾乎沒有時段限制，由下午6:30去到晚上10:30，我想夠哂食有餘。價錢來說，就有點貴。星期五、六，$208一位，星期日至星期四就$198一位，要加一，不過恒生信用卡就有95折。兩人就$408 x 95% + $408 x10% = $437。…查看更多

我和女朋友見這間店在長洲眾食店中位列榜首，便來這間店試試，幸好一去到便有位，不需等位。我們倆叫了這店最出名的二款甜品： 1) 心太軟$28這個心太軟做得很不錯， 一切開佢， 中間啲朱古力漿立即流出來， 出面脆脆地， 入面軟身，口感好好。 2) 火焰雪山$24店員送上這款甜品時， 會先關燈以營造一個黑暗環境，再將已點火的酒倒入甜品上， 咁成個甜品就著咗火。有得食， 又有得睇表演， 絕對值得一試。總括而言，價錢適中，食物也很好味，絕對值得一試再試。…查看更多

迪士尼樂園的食店全都不便宜，比較便宜的是火箭餐廳和這間店了。我和女朋友都不想食火箭餐廳啲漢堡包和薯條，便光顧下這間店。這間店整到成個Food Court 咁，要拿咗嘢食後，才去櫃位俾錢。我們叫了一個皇室海薄餅[$60]和一個皇室海薄餅套餐[$78]，分別只是套餐多了一支汽水(500ml芬達或其他汽水)。而無論是否叫套餐都會有一碗雜菜湯送。皇室海薄餅個薄餅整成一個米奇模樣的，都幾得意。薄餅屬薄批，但份量都好夠，午餐夠哂食了。而薄餅的味道也很不錯，算係咁了。雜菜湯湯內有幾粒米奇模樣的意大利粉，味道都可以。下次去迪士尼的話，我想我都會再光顧這間店的。…查看更多

見這間店在openrice的觀塘區組別排名第一，便和女朋友幫襯下這間店了。那時是星期日晚上8時30分，等了約十分鐘便有位了。我哋被安排入座細房 (真的是很細的房，得張細檯和L型Sofa)，坐得比較舒服，真好彩。 食物：1) 椰青海鮮焗飯$78這碟飯很好味，有啲椰香味滲入飯中，特別開胃的。另外，這碟嘢的制作時間標明需25分鐘，所以要點的話，便要儘早落單了。2) 青咖喱豬頸肉$68這碟餸都幾好味，但份量比較少。3) 馬拉盞通菜$48味道中規中矩，並非特別好味。總括而言，雖然價錢略貴，但環境和食物也不錯，可以一試。埋單連加一總計$213.4。…查看更多