Takaneko的个人专页

搬走咗一年好少返入西貢，今次同朋友難得返嚟，記得以前都做得唔差嘅所以帶朋友嚟食吓。四個人冇其他位，要坐响一個好奇怪嘅風口位（兩條冷氣管唔知點解裝响客人面部位置），阿姐將旁邊張六人枱拆開但迫我哋坐入面嗰四個位，好冇禮貌咁大聲對我朋友話「坐嗰度啦唔會整到你架」，咁我哋當然盡量移返開少少張枱，點知嘢食嚟到，阿姐一個屁股好大力撞入兩張枱中間，強烈感覺佢似係嫌我哋張枱阻住，想撞返入去咁，大力到枱上熱水杯打翻，整濕咗朋友阿仔半身！當下真係好後悔帶朋友嚟食，本身係行去後面飲茶的呢！除咗服務，食物都… 叫麻辣雲吞又冇，串串都冇！我先醒起，呢間嘢成日冇串串賣，結果本來叫咗辣辣粉就冇其他配菜要變咗食齋。 朋友叫土豆絲飯都唔係好滿意，土豆絲切到土豆條咁粗。食完去俾錢個阿姐雖然有再次道歉，但我覺得失望多過嬲。根本一開始就錯咗，夾硬拆開嗰兩個位又冇人坐，人又唔夠位行，又一個貪心想多做生意卻得不償失嘅例子。冇影食物相，因為全部都唔係自己想食嘅嘢。…查看更多

一路睇好多好評話必食，然後見到一個寫完全相反嘅評語，於是都係半信半疑去試。坐低填好點餐單叫嘢俾錢先，店員都好友善，不過收銀妹妹搞好耐先落好單，最後都係發現漏咗隻溏心蛋。蛋$8唔係半熟，係未熟，裡面蛋白溶嘅，而且唔係橙黃色蛋黃，成隻蛋有陣好鹹嘅味，但個味又同個拉麵湯唔夾！講返碗麵，份量看似同一般拉麵屋差不多，但竟然用個啱啱好嘅碗嚟裝，湯無法俾多，飲咗一啖湯成碗已經變咗撈麵嘅樣。 平時食辣麵嘅我，第一次食於是叫咗招牌濃蝦湯麵試咗先，聞落去聞得出蝦味，但食落去冇乜，然後越來越重甜番茄味，好似落咗好多茄汁咁(唔係茄膏，茄膏酸啲香啲嘅)，平時食麵會飲幾啖湯今次飲一啖都唔想飲，完全唔係日本拉麵嗰回事！！嗰碗麵唯一可取嘅係嗰三塊叉燒，份量合理，入口即溶。 可惜只為嗰幾塊叉燒的話，都唔夠意欲想响呢間食。第一次試嘅拉麵店，除咗麵，一定會叫煎餃。 呢度得炸餃子，都試吓吧。 但佢個樣，一睇就覺得硬，食落口真係好硬，皮好厚，仲好似翻炸咁。最後講樓面，店唔大，坐嘅位都好open(伸咗出舖外)，但唔明小小的bar枱點解要放個遊戲機响度，啲細路企响隔離，你一路食嘢佢一路响旁邊拍打部機喧嘩，張枱仲要係連住震嘅，真係唔明店主諗乜要整蠱客人。觀塘咁多嘢食，我真係好唔相信呢間係觀塘拉麵之最。…查看更多

之前叫過Keeta印象都唔差，日前Halloween晚行行吓經過，於是試吓堂食。先講嘢食，叫咗個雞燉湯加白飯(本來想叫蹄花湯佢又冇，烏雞湯佢又冇)，個湯比一般常見燉湯大一倍，熱辣辣，有隻嫩肉雞脾，送飯都唔錯，而且可以免費添飯，覺得價錢好合理。樓面方面… 都唔知點講，一入到去就有個幼稚園妹妹喊到拆天扭計，店內超級應聲，淨係聽到個家長同佢講再嘈會被店員趕佢走，卻冇心自行抱出去幫佢冷靜，於是係咁嘈係咁嘈，另一面店內系統又間歇大大聲報接到keeta單，然後又不停有電話響，樓面得兩個店員，已經好好脾氣爽手做，但感覺真係好嘈好混亂，直到個妹妹走咗先開始靜落嚟。食完之後覺得下次想食都係叫外賣算了。…查看更多

响第二啲區食咗好幾次，呢間第一次去。一入去播住和諧音樂幾relaxing咁，但坐低就開始聞到一陣陣臭渠味，原來呢度做緊臭臭鍋，理解到做生意嘅，但同和諧音樂就唔多襯 xD 叫咗一個麻辣牛肉麵一個紅燒牛肉麵，最後俾咗兩個紅燒牛肉麵 -.- 見樓面好繁忙咁，麵又同價就費事換。 但啲湯底淡咗好多，啲紅蘿蔔同白蘿蔔又唔入味，淨得牛肉似啲樣。 叫咗杯黑糖珍珠奶茶又係冇味嘅，搞到成餐嘢唔知食咗啲乜…加埋一差不多$300，真係唔多抵。…查看更多

好多間話好食嘅唔好食，唔掂嘅其實又唔算好差 LOL 呢間啲人話係好食過譚仔，雖然我唔係譚仔粉，但剛好已試咗同站(調景嶺)嘅譚仔三哥同譚仔雲南同一款米線：腩肉腐皮酸辣米線，就試埋呢間！價錢環境唔多講，只想試味道。攞到嚟見到湯底清成咁已覺不對路，第一啖就飲咗啖湯底，微酸微辣，冇乜大陸風味；腩肉應該係全碗做得最好嘅部分，幾大塊又新鮮又唔硬；腐皮同米線煮得硬度適中(上次三哥出奇地煮到硬得很！)；酸辣湯底…靠嘅係酸菜，點知食落口… 不單唔係三哥嗰隻普通酸菜(因為譚仔雲南先有老壇酸菜風味)，而且仲係街市一般賣嗰隻所謂「酸」菜，係甜架！！成碗粉變咗甜辣米線 =_= 完全唔係嗰回事，極其量係似茶餐廳客串做嘅米線！唔好同我講要大陸風味返大陸食，因為呢間係自稱「雲南」米線的。…查看更多

呢間餐廳啱啱開張嘅時候食過一次，嗰次食拉麵，覺得好似food court嘅質素，之後冇再去。近排聽聞佢哋做埋早餐，好似改咗少少，於是lunch又去食吓。今次叫咗個和風牛肉飯，本來送到嚟都冇諗住影相出評，只見啲汁杰杰地咁已心知不妙，食落口响汁唔多夠味，感覺有啲似食緊痰… 牛肉一般般就唔多講了… 食咗幾啖飯，發現好多結塊，有啲仲係乾咗黐牙嗰隻，就好似隔夜飯用微波爐翻叮又唔記得加水咁款，部分叮乾咗，而且食到一半啲飯已經唔熱。 結果臨走前影低咗因不能入口而食剩嘅飯。以咁嘅出品質素真係好浪費食物，大量增加廚餘。 咁嘅飯都學人收七十蚊，佢真係大膽！…查看更多

屋企人始終鍾意食呢間，所以嬲咗一排之後最近响冇咁繁忙嘅時間再去過兩次lunch。 冇咁多人，阿姐客氣返好多，於是公道啲再給評。 想食家常飯呢度確是好選擇之一，想避免遇到我上次嘅不快經歷，避開放飯時間應該就會好啲，阿姐仲得閒話歡迎你添飯。我通常嚟食木耳炆雞飯，一碟份量都非常夠食，炆得好入味，而家配有翠玉瓜，有菜有肉平衡得好好。 呢度個例湯同一般茶餐廳唔同，清清地咩料都有啲，夾埋一齊好夠味，比較接近屋企煲嘅湯，所以飲起嚟感覺健康啲。 …查看更多

去食嫦餐預咗要等是常識，但今晚實在有點過份。由佢哋响食街初開張已經幫襯，後來執咗有啲失望，因為覺得難得有家常便飯嘅風味。 之後重開，食物質素係差不多，但舖面明明比舊店大卻handle得混亂。 去過幾次都冇位，今晚有啲時間等吓，咁入到去見full咗但有啲未執枱，好禮貌咁問有冇位，阿姐話「稍等」，咁就响外面等啦，跟住等咗5-10分鐘阿姐走出嚟問我係我先定裡面嗰張枱嘅人等先，咁我答應該係佢哋(因我哋嚟嗰啲人已經坐响度)，跟住阿姐冇交待到就走返入去。常理叫我問一下即係要等多幾耐，因為阿姐之前答我時似乎唔知仲有人响前面所以先話等陣就有，於是我又好有禮貌問吓佢即係要等多幾耐，點知佢h哂面話「等多陣啦，如果太趕就下次先嚟食」，我冇諗到好地地了解吓都要被人h面，喂我冇催你喎你俾面色我睇做乜？等真係唔係問題但嗰度全部都未執枱又冇人起身似要走，係咪即係我要「等」到佢哋叫完餐煮完食完埋單先到我？你都有責任交代卦？次次見你樓面都係冇人，冇咁大個頭就唔好戴咁大頂帽啦！咁樣仲想叫人下次再嚟俾你再h面嗎？再咁做生意法遲啲你真係做得到fine dining啦，一晚淨做兩枱你應該handle到啦卦？星星只係俾返以前食過嘅味道，其實同自己煮係差不多，你個價錢已經算貴！到底係你個廚煮得慢定樓面阿姐得一個人做唔切唔想撈所以趕客，老闆有負責搞好佢，而家真係冇哂以前响食街邊煮邊招待客人的親切feel。…查看更多