wooddot的个人专页

九龍城假日，無論大舖小舖都大排長龍，估唔到呢度唔洗點排隊質素都唔錯喎！以後去九龍唔洗淨係諗到泰國菜喇！呢間海南雞飯都唔錯，雖然係快餐店形式，但呢個錢價，係超值左既。我地5個人，叫左個4人餐，加碗油飯，好夠飽，又冇野剩，真係好抵食！香手刴咸魚蓉肉餅，香脆可口，咸魚加上薄薄既肉飯，煎得非常香口，送飯當然一流啦！油飯有少少炸香既蒜粒，令本身都好香既油飯更加惹味。例湯就一般，那天係南瓜湯。馳名滷水西貢狀元蹄，都几大隻下，煮得又夠淋，見到D骨膠原就好開心喇! 雖說是滷水，但又唔係好食到滷水味，但好味就夠啦！至於主菜呢，起晒骨賣相已經好吸引，雞皮有少少肥，但肉滑就好香滑。…查看更多

新店乾淨，佈置蕳約，而且地方濶落，坐的好舒服。我地5個人食左7個甜品，仲要估唔到佢碟碟都咁大碟，食捧住個肚走。店名有合桃2字當然要試下有几堅啦，我地共叫左3碗，首先係最大寄望既沙沙合桃糊，有少少失望，合桃糊上既合桃粒本來係寄望卜卜脆，噢，但點知淋左！然後發現紅豆同合桃個味唔係好夾，但同芝麻就好得喇，2種味道都又香又濃，總括合桃糊係好味既！然後就係榴槤拿玻崙，好大碟，榴槤味比較清淡，加埋拿玻崙餅底，中和少少甜味，不錯。榴槤龍眼雪樂冰，又係好鬼大碟，有龍眼中和了榴槤的味道，有點點refresh 的感覺。蜂巢薑汁二重奏，我都係第一次食蜂巢，是真是假我唔識分，但口感都几奇怪，一入口有香濃蜜糖味，然後發現蜂巢很難咀嚼，沒有味道之後只剩滿口蜂巢渣。底層既薑汁布丁都几辣，加埋雪呢拿雪糕黎食就岩岩好喇！抹茶紅豆係用半價飲品，除了個雪糕球好有抺茶味之外，其實下面既都係冰和好淡紅豆水，可以不試。…查看更多

晚上7點半唔洗排隊, 只有5-6枱客, 以為因為價錢都唔平, 所以小D人幫襯, 見佢用清湯腩黎做店名, 諗住實有D料到, 但試完之後明白, 我都唔會再回頭, 完全唔值呢個價錢....招牌清湯腩河粉 ($38), 細細碗5-6片薄牛腩, 湯底湯到好似係味精粉開咁, 河粉係滑既, 但牛腩超鞋又靱, 好鬼痴牙, 味道只是非常普通, 香港仔魚蛋好過佢多多聲.......金牌巴基斯坦咖喱牛坑腩飯, 先講個汁, 完全唔辣, 老公話大家樂做得好過佢, 而牛坑腩超肥, 太多肥膏, 牛坑腩雖然好淋, 但就食唔到牛既味道, 都几失敗, 連埋杯咸檸七, 賣$67 蚊, 真係去大家樂好過喇!…查看更多

慶祝10月舊同事生日飯，訂了6:30 的枱，安排了我們坐獨立房，既舒適又寧靜，岩晒我地成班女人高談濶論呀！我地叫左個6人餐，再加左隻北京烤鴨同埋小籠包，好豐富呀！雞絲粉皮，普普通通，粉皮有點厚。招牌燻魚，意想不到還是暖的，有酸酸甜甜的味道，好好食。花雕醉雞，醉味重帶苦，雞肉好滑。清炒蝦仁，是我吃上海菜必吃的，這裡的有點油，但都好爽口，配上香醋，仍舊非常味美。小籠包，皮算薄，湯汁豐富亦夠熱，味道不錯。賽螃蟹嫩滑可口，加埋香醋，正！鐵板京葱爆牛肉, 京葱太大堆頭喇，鐵板上枱，好香好香好惹味。翡翠鮮魚羹，略嫌太多芫茜，魚肉有少少鯹。火腿炆津白，中距中規，津白很甜美。北京烤鴨，正呀！師傅刀工都又好，每一片都好平均，上枱仲暖既，皮還脆。高力豆沙，皮太厚，豆沙太少，如果可以轉拔絲香蕉就好喇！$1600 / 7個人，真係好抵！…查看更多

今年既結婚週年結念日，冇事前特別準備，就快速在網上搵間BUFFET 試下啦! Buffet 時間由6:30pm 到 10:00 pm, 雖然我地7點半先去到，都唔洗趕頭趕命。一開始當然是試下d冷盤先啦，開邊龍蝦都几鮮味，但肉質就比較鞋喇!另外，我試左長腳蟹，鮮甜味美，藍青口size夠細，所以都算鮮嫩滑口，重要是無渣。沙律吧佈置得好吸晴，整整齊齊又多元化，材料都好新鮮，亦有供應多款醬汁。HAM既款式少，而且並不吸引，所以無試。即開生蠔雖然細細粒，但爽甜味美，海水味濃。刺身有4-5款，三文魚，北寄貝，原隻甜蝦，鮑片等，都好新鮮，但就少款式，三文魚特別好味，魚味好濃。而壽司就只得卷物，所以冇試。遇岩懷舊老香港主題，真係有好多兒時既零食，睇見回憶下都好開心。菲林卷，砵仔糕，馬仔，糯米糍，雞仔餅，合桃酥，冰條，冰糖葫蘆，山楂餅，白糖糕仲有車仔麵，生滾粥，茶葉蛋，仲有D涼果，同埋自助懷舊汽水，以前响D辦館買汽水，就係自己伸隻手入去凍冰冰既水入面拎汽水再自己開蓋架喇!繼續就係熟食類，有鵝肝多士煎得夠燶。扁皮鴨睇住師傅即場扁，所以每一件都仲暖同埋D皮仲脆，而塊粉皮就用蒸爐一直蒸住，保證每一塊都暖笠笠，唔會又乾又硬。燒羊架好鮮嫩，多肉汁又唔羶。另外威靈頓牛柳就爭D喇，首先酥皮同埋牛柳分離左，同埋牛柳都几羶。還有印度食物，雖然我唔嗜辣野，但佢地酥餅真係好好食，唔點咖哩就咁食都好好味。雪糕是 Movenpick 有多種口味，我揀左榛果同埋朱古力味，本來對榛果甚有期望，榛果雖然濃郁但太甜了，反之朱古力冇咁甜，仲好香濃。臨近尾聲，侍應送上祝福句子的心太軟，我地又拿拿林走出去拎個雲尼拿雪糕先似樣架嘛，呢度既心太軟果然夠軟，一畢落去朱古力醬流晒出黎，正！味道偏苦，好好食，之後我地出去再攞多2個，真係好好味!甜品種類都几多，但個人覺得唔夠精緻同埋味道一般。跟餐既咖啡我地揀左cuppacinno 好香濃，泡沬豐富，餐後配上一杯這樣的熱咖啡，無疑係一種享受。…查看更多

呢日星期六，8個大人加2個唔食野既人仔，叫左個半席圓桌歡聚宴，有滙豐信用咭優惠，加左碟叉燒同埋東坡肉，冇叫白飯，改為三文魚砵仔飯。呢度 PROMOTE 緊客家菜，我地呢餐有几味都係客家菜，老爺係客家人，雖然味道一般，但佢都食得好開心。蜜汁叉燒先上枱，好好食，好叉燒難求，肥瘦厚薄適中，蜜汁味香甜濃郁，絶對係一碟好叉燒。雲耳小瓜炒花枝崧，普普通通。上湯焗加拿大龍蝦 (伊麵底)，龍蝦雖然細細隻，但都食到鮮甜味，只係份量太細。東坡肉，肥瘦一層層分明，肉質感覺結實，色澤美麗，入口融化滿口油香。醬皇金蒜雞，睇落好濃味，但食落就剛剛好，金蒜好香口，雞肉嫩滑。蝦乾肉崧浸娃娃菜同埋鮑螺片，2碟都好大碟，1個餐有2碟咁大份量既菜，仲有碟雲耳小瓜炒花枝崧，3個都係瓜瓜菜菜，實在太誇張，亦有呃秤之嫌。蠔皇鮑螺片，唔好食，個汁又唔好食，個鮑螺片太淋又冇味，又唔好食。三文魚焗筒飯，加左油鹽同埋三文魚碎黎蒸，再加埋葱，几香口。襌衣脆魚卷，外層酥脆，內裡魚肉略嫌太結實，同埋咸左D。清蒸花尾躉，蒸得剛剛好，肉質都几滑，也有魚香味。魚型芒果布甸，一般啦，人工開粉的味道。…查看更多

老公生日晚上不在港，唯有食BRUNCH 黎慶祝。朋友介紹這裡食物質素不錯，由12PM 到2:30PM，又唔洗食得咁急，但已經冇左 wine free throw 嚕，不過唔緊要啦，我地又唔係真係好鍾意飲酒。這裡環境和裝修都好舒服別緻，等我先帶大家行一個圈先啦。冷盤枱上有一款切原隻火腿，這樣的HAM 才夠薄，食物種類也算多，冷盤當中美中不足就係沒有刺身和海鮮供應。甜品種類也很多，而且非常精緻，仲有數款汁料(朱古力，士多啤梨和雲尼拿) 可以自由配搭。仲有好得意既水果花藍沙律吧，材料新鮮，可以自由配襯。朱古力噴泉，同埋雪糕有小童玩樂區，地方寬敞，仲有小醜哥哥扭氣球波同埋有姐姐陪佢地玩。這個就係今次SUNDAY BRUNCH 既 MAIN COURSE MENU 喇!首先食左D HAM，呢度有比較少見既風乾牛肉，之前一直想試，今次可以响呢度試到都几驚喜。肉味比豬味香濃，但其實吃不到牛味的，配上parmesan芝士, 中和了咸味，增加了肉味的層次。雞肉沙律的醬汁好好味，另外有大蝦沙律都非常爽口彈牙。但係露筍就唔好食，太老有渣，同埋冇乜調味。吞拿魚汁火腿，吞拿魚味濃郁。其實還有几款HAM，印象中豬頸肉部份偏咸，PRAMA中規中距。冷盤有數款芝士供應，有藍芝士，牛奶軟芝士等等，仲有3款蜜糖搭配，不過我是個不懂芝士的人，沒有嘗試太多。仲有即開澳洲生蠔，每人每次可以取4隻，SIZE中等，蠔味不算很重，質地 creamy。有即煮既Pasta，老公好鍾意呢個Carbonara, 芝士味超級香濃。encoure 時要求少麵多料，仲正！然後黎到我地既 main course，我地揀左西冷扒同埋雪魚，份量很小的，細細件，西冷都几好味，雖是西冷，肉質處理得很好，不會鞋恰恰，但個雪魚就麻麻地喇，沒有雪魚應有既油香，調味清淡，整體賣相和味道也不合格。香煎鵝肝，第1轉煎得唔夠乾身，到第2轉特別要求乾身d燶d，鵝肝味好香濃，但用紅花煮既飯其實就冇味既，如果改做多士會更出色。朱古力噴泉，配上brownie, 意想不到沒有太漏的感覺，反而有多重朱古力香味，好好味，我一個人就吃了3顆。雪糕有4款口味，仲有十多款配料，又好玩又好食。生果都好新鮮，車厘子大大粒皮脆肉甜，但桃駁李和士多啤梨被糖水浸得太甜了。終於試到砵酒煮梨既味道，原來不是我喜歡的口味，有點苦澀感。食到咁上下，待應送上生日甜品。最後是跟餐的咖啡，我地都揀左cuppacinno，咖啡質地和味道濃厚，這樣靜靜地傾下計，過了一個安逸的星期日。…查看更多

之前看到朋友去各區的茶木，感覺悠閒舒適，好想一下，環境令人感覺放鬆，終於最近茶木黎到德福商場，就約埋班同事一齊去試下喇！6點半去到大排人龍，但都唔係等好耐，7點未到就入得，限時1.5小時，5個人被安排在4人卡位，都几逼下。店內嘈喧巴閉，感覺渾亂非常，服務員忙到跑黎跑去，氣氛令人感到焗侷，一點都不像CAFE，茶餐廳都冇咁嘈。凱撒沙律，不過不失，SOURCE和芝士既量有點小，同埋建議菜葉可以切細D，方便入口。紅油抄手，勁辣！我不敢試，同事話都几好食架。酥炸雞排几好味，外層香脆酥香，沒有油膩感，咸味剛剛好，內裡還有少少肉汁，沒有雪味之餘還有雞味。滷肉飯都几好味，有肥肉在裡增加油香，溏心蛋味道濃郁，生熟控制的剛剛好，質地細軟。五香牛肉麵都几大碗，同事話都几好食，牛肉味濃而且夠淋，五香湯汁鮮美，麵底軟硬適中。飲品，完全冇味，好似無落糖咁，係風味定係唔記得落糖呢? 我地要叫侍應全部拎番入去加糖。1.5小時，半個鐘前叫你埋單，本來好想試甜品，因為好似几靚咁，不過已經唔夠時間，而且唔會再有下次架喇，只嘆我地同呢度既甜品無緣啦！…查看更多

呢度雖然店仔細細，但門口都有數個魚缸，有好多生猛海產，我地自己揀左花蟹，蜆，貴妃丰，鑽石丰，鮑魚和海蝦，，後加牛肉，雞(加烏冬底)，日本甜薯，3寶丸，同埋油炸鬼。等食物期間見到廚房都有出小菜同埋海鮮，賣相都好靚架，下次都可以一試。侍應在最底層先放了咸肉同埋已浸過既白米，每張枱都有特別既蒸鍋，在枱底放了蒸餾水，而放米呢一層都係用蒸既方式，所以唔會燶底。我地以為好似打邊爐咁，自己想食乜就蒸乜既，但原來玩法唔同既，每張枱上都有計時器，由侍應操作，侍應話要食完一樣先一樣，咁樣時間先岩岩好，又岩喎！好！我地好聽話既，你話點就點啦！先黎個蒸蜆先，3分鐘，果然非常鮮甜，豉油真的可以擱一邊了。再來是貴妃丰和鑽石丰，同樣的鮮味多汁，但量較少，相對我覺得蜆比較抵食。輪到海蝦，入鍋後仲有几隻响度紮紮跳，SIZE 都OK 大, 好生猛，肉質爽脆甜美。然後黎個三寶丸，我地將鯪魚球換左左豬肉丸，手打丸確係唔同D，仲要蒸得時間岩岩好，好彈牙，調味也剛剛好。我地要左4隻花蟹，1人1隻，雖然唔算好大隻，但都几多膏，肉質都尚算結實，而侍應話個湯底要夠甜，就係靠蟹同埋蜆喇！然後叫了$198/碟牛肉，這個反而有點失望，價錢都唔平，肉質被鬆肉粉整到冇晒質感，蒸好後滑散散咁，牛味都好淡，就好似吃滑牛粥的牛肉咁。日本甜薯，估唔到几好食喎，連埋皮咁食，質地煙煙靱靱咁，又香又甜。蟲草花蒸雞半隻，侍應本來建議我地加拉麵底，但咁岩拉麵賣晒，咁侍應就建議我地轉烏冬底。用蟲草花調味既雞，提升左雞肉既香味，烏冬又索晒 d 雞油雞汁，所以都好好味。最後黎到個粥底喇，質地又線又軟，但所期望既鮮甜就真係爭左ｄ，同我地預期既有出入，可能期望過高啦，其實唔錯既，但唔好期望係好正果種啦！我地有預留左油炸鬼，但可以不試，因為油炸鬼完全唔抬又唔脆又靱。…查看更多

在雜誌上看到黑色的炸魚柳，深被吸引，找個機會黎試一試。星期六的下午兩點鐘，店內人不多，店內裝修簡樸時尚，我們坐在一個角享受這個寧靜的下午。原來下午只有 BRUNCH SET，沒有炸魚柳確係有點失望，BRUNCH SET 選擇也不多，只有ALL-DAY BREAKFAST 和4款餐選擇。跟餐可配沙律或餐湯，沙律菜新鮮爽脆，沙律醋很酸，但配著清甜既哈蜜瓜吃，產生化學作用，極之清新。是日餐湯係洋葱湯，香濃的洋葱香味，配了一小塊有香蒜牛油的黑色小方飽，非常惹味，激發胃口大開。侍應説西冷扒是預設5成熟的，但郤不是很像，比較像7成熟吧，西冷牛味濃郁配了黑醋汁，味道不錯，但呢塊西冷既肥膏部份就太大了。伴碟的薯仔，茄子等等有獨特的香味，但我吃不出是什麼香料。炸雞扒原來內有乾坤，黑蚊蚊既脆漿內是嫩滑的雞肉碎呈粉紅色，然後是1層火腿芝士，接著核心就是香軟的芝士，但整體味道一般，有感脆漿太厚太硬。餐飲我選了咖啡，比較苦澀，配上有打過既鮮奶，有誠意！…查看更多

丼丼屋本來有留給我几好既印象, 但今次一役, 徹底改觀了!放工時間唔洗排隊, 果然有D野, 價錢算中價, 我本來都有D期望, 但質素比起几年前, 確確實實下降了。雜錦魚生丼，份量太少，而且佔了3/4碗都只是雞蛋，三文魚，吞拿魚等平價食材，只有2粒帆立貝，絶對係好唔抵！三文魚芝士焗烏冬，面頭既芝士同埋三文魚都几好食，但內面既烏冬真係嚇親人，勁多水，又冇味。蕃茄牛肉麵，都几攪笑架，有咖喱味，點解呢？滑蛋吉列豬扒丼, 個份量又勁大, 同雜錦魚生丼相比, 差唔多係DOUBLE 份量, 係豬扒有少少鞋, 味道算係呢餐最好架喇! …查看更多

同朋友仔shopping後有d 攰，路經此店諗住嘆個下午茶抖抖再戰。聽說這是一間星加坡的店，總店更是在星洲歷史悠久的，我求其叫左個比較輕份量既下午茶餐，我望住2隻半生熟蛋，然後朋友話要先落豉油攪拌一下，再點多士食。我當然跟住做啦，一心期待咁樣食究竟會發生咩野化學作用呢? 答案是沒有，一種奇怪的口味，多士索左蛋汁同埋豉油變淋了, 還非常咸，究竟為乜要咁樣食呢?咖啡偏苦，可能是比較醒神吧，但不是我杯茶。 算了吧，每個地方都有自己地道的食物，可能這就是他們的風味，只是不適合我而已。…查看更多

在大埔住了快3年, 也不知道此店, 身邊也沒有朋友提及過。有1天在facebook上見到朋友影左隻好得意既蛋，就是此店出品的，就決定搵日試一試喇！６點半的店內只有小貓三四隻，所用的桌是厚重的木枱，加上有1大片漫畫牆，看上去很日本FEEL，但後來發現枱邊有點髒，出入要隔外小心。店內樓面只見一位老婆婆和老板娘，老婆婆負責上菜和收拾，如果要落單，婆婆都會話要等老板娘黎落。當然我要試下果隻好得意既蛋啦，我同朋友一人叫左一碗叉燒拉麵，可以選花見月蛋或者溏心蛋，我揀左花見月，發現其實沒有特別，只是隻半生熟蛋，沒有特別調味，除了形狀特別，什麼也不是。拉麵味道同埋質地就唔錯，有蛋味同埋爽口，日式叉燒薄得像紙，而且成碗麵份量都几細。由於份量不夠，再來補几碟壽司，壽司質素跟元氣差不多, size 比元氣大些少，用料尚算新鮮。反而沒有影相的軟殼蟹手卷味道不錯，材料豐富。…查看更多

7月的生日飯局, 壽星人想吃放題, 咁岩搵到呢間, 仲有生日優惠添。點解擇呢度，首先閒日食放題，好多只有特定時段，6點第1場，8點半第2場，大家都是有家室之人，當然唔想食到咁夜啦，但6點又確係趕唔切。呢度就好在冇特定時間，隨時入座計2小時。我們6人被安排在店內小隱蔽處，我地可以靜靜地傾計，非常滿意。刺身雖然冇冰底，但冇漏單亦都好新鮮大件，上枱都几快手，我一向特愛赤貝，亦唔係間間放題都有赤貝，所有我勁食左几十隻，又爽又甜，正呀！ 甜蝦size 都几大，非常鮮甜。　其他鮮魚類都非是厚切的，非常新鮮。壽司都几好，海膽軍艦上既海膽顏色鮮麗，狀態新鮮，味道甜美甘香，只是SIZE 較細，罼竟是貴價食材，也無可厚非。炸物同埋天婦羅都唔錯，熱辣辣上枱，天婦羅粉漿都几脆薄。飲品種類都几多，但甜品就爭d 喇！日式蒸蛋都好滑流，但味道偏淡。牛肉鍋湯烏冬(冇影相), 牛肉勁羶, 令到成個鍋都好羶, 唔好食。整體黎講選擇比較少，但質素都ok, 對得起這個價錢。…查看更多

得知太和路開了數間小店, 那天去完大埔中心辦完點事才5點半, 又是去小店不用排隊的好時間... 我和老公慢步過去太和路, 就選了這店, 人龍還未出現, 當時大概6點鐘, 但店內已有8成客人, 好! 就呢間!手打和牛漢堡個SIZE 都几大, 肉汁都几豐富, 但牛味不夠, 調味偏淡都几適合我, 整體賣相和味道不錯, 只是感覺欠缺特色.軟殼蟹卡邦尼蛋汁意粉, 份量夠, 我地仲加左$10雙色車打芝士, 成日食意粉好怕唔夠汁, 但呢個意粉令我地好驚喜好滿足, 佢用料十足, 炒過既洋葱, 磨菇和煙肉, 廚師亳不手軟, 再加埋雙色車打芝士, 令意粉味道豐富啖啖濃郁, 而隻軟殼蟹都好大隻, 熱辣辣之餘, 仲炸得剛剛好外脆內軟, 好多時其他地方既炸軟殼蟹都會炸到黑蚊蚊. 呢度真係做得几好, 好味!由於食物份量都几大, 而我地又太早食飯, 真係太飽了, 試唔到呢度既甜品有點可惜, 因為賣相都几吸引, 下次吧!…查看更多