唉，見中環新開間雲南菜，環境確實幾舒服，坐得幾好。服務員後生仔女都幾有禮貌，落單、加水都算勤力，呢點要讚嘅。 講到食物，真係大失所望，伏味濃郁！首先，個「古法銅鍋油燜雞」真心唔掂。啲薯仔煮到一pat pat咁都算，最離譜係加熱極唔均勻。有啲位硬掘掘，明顯唔熟，咬落去生澀；但有啲位又燶燶哋，顏色發黑，望落去仲有啲似就嚟爛嘅感覺，搞到成碟嘢都唔敢食多幾啖，怕肚痛！完全冇晒油燜嘅香濃，得陣燶味同生薯仔味，$198蚊碟真係食到一肚氣。點咗個「過橋米線」，賣相普通都預咗，但湯底怪怪哋，完全冇鮮味，配料又少又普通，索價成百幾蚊碗，真係離晒大譜！仲試咗個炒飯，乾爭爭，冇鑊氣，味道仲好寡，同茶餐廳碟頭飯比都嫌輸蝕，但價錢就貴幾倍。仲有其他小菜，味道都係平平無奇。 呢餐真係食到好唔開心。環境同服務係好，但食物質素同價錢完全唔成正比，性價比極低
中環地段貴租就預咗，但食物咁嘅水準，真係講唔過去。…查看更多
中環地段貴租就預咗，但食物咁嘅水準，真係講唔過去。…查看更多
