Jwong0408的个人专页

依間Café好多人話好食，但我對所謂人氣Café多少有啲偏見，試過太多得個樣，咖啡難飲🫣嘢食不外如是，但埋單至少幾百蚊。但！但！但係！依間真心值得推薦🫶首先咖啡好飲，加$5 轉 Fruity豆，個人口味，層次更豐富，帶果香嘅濃郁咖啡配合香滑牛奶、仲有綿密奶泡，Cappuccino☕️本應如此。凍咖啡同樣出色，無減少濃度，仲帶份清爽。主食嗌咗🍝2nd Best Carbonara（$112），麵條正中央有個鮮豔到爆嘅橙色蛋黃，一望而知正宗日本蛋。 本身麻麻依款意粉覺得好漏，但依間控制得唔錯，蛋汁香口，醬汁掛滿意粉但又未至於瀑布咁多，用叉捲起仍帶兩分輕巧。意粉Al dente口感，彈牙唔軟身，中心帶輕微韌度，夾埋厚切煙肉粒🥓食，完美。另一份自選Sourdough🍞 Set，本身有Herbs butter，另加$28份嘅Smoked Salmon, Bacon 同埋$25份嘅Avocado🥑。料理方式簡單，應該係預期中味道，但個麵包比想像中好味，酸度適中，煙煙韌韌但唔會好硬，烘得夠熱、夠脆，配合勁強香草味牛油同其他配料，又正又健康。煙肉最抵讚係唔會成碟油，仲有少少脆邊。最後，當然要試佢哋嘅招牌甜品Sesame Opera 同埋Matcha Cheesecake(好似$58@) 前者更有驚喜，餅底特別，帶啲朱古力香，唔似平時食到嘅馬利餅Feel，每啖都食到濃芝麻Cream、軟熟海綿蛋糕同微甜帶甘嘅脆餅底，非常滿足。後者抹茶味好強，但唔會太苦澀，保持到芝士蛋糕嘅軟滑咸香，平衡得唔錯，加上賣相超打卡，難怪咁多人Like。最後，就係佢服務唔錯，令人感覺舒服❣️…查看更多

臨時約食飯，誤打誤撞book到依間。去到樓下，見到商廈格局，仲怕中伏，點知好驚喜。店面很小，大概十來二十個位，絕大部份係吧台，可以睇住廚師料理，充滿氣氛。餐廳主打雞🐓嘅唔同部位串燒，刁鑽到暈，從食道、橫隔膜，去到掌心✋、雞冠都有（What），即管叫幾款試試。食道賣相似極幼身鵝腸，食落香脆、有少少軟骨感覺，比想像中好味。橫隔膜有小小「氣泡」🫧嘅口感，食落無咩特別，肉味偏淡。雞心一向係我最愛，依度整得焦香嫩滑無「蘇」味，如果你鍾意食雞腎，雞心你會鍾意❣️之後食返啲大路嘢，雞軟骨棒、雞軟骨、雞翼，全部都夠晒火喉，外脆內軟，肉汁豐富，調味偏淡身唔過咸，配上幾款味粉就恰到好處。雞翼仲比想像中大隻，開心。更驚為天人係牛舌🤯，粉嫩內心，微焦外表，肉味濃郁，少少BBQ風味，配埋柚子胡椒，要同朋友鬥快夾，手慢無！全晚最有趣嘅係提燈🏮，根據網上資料，係由母雞嘅輸卵管、卵巢及未成熟未有殼嘅雞蛋黃🍳結合而成。香港比較少地方食得到，雖然感覺有啲Creepy，都照試下啦。外形一如其名似箋燈，好似一個氣球🎈，表皮層衣好有韌性，要一啖食落肚唔可以整開，否則會爆汁。咬落去，瞬間喺口腔爆發滿滿嘅蛋黃香氣，夾雜少少甜味，鮮味無比，好似食緊超濃郁日本生蛋黃咁，一試難忘。此店最抵讚係樣樣嘢都用心做，食物熱到噴煙，一個普通嘅燒飯團🍘都十分有風味，熱辣辣，表面少少飯焦。廚師仲識得逐道菜上，唔會擺到一枱都係，暗中幫你排好進食次序，飽肚嘢上最後，亦無限時限刻趕你走。冰住清酒嘅冰🧊亦定時更換，保持冷飲溫度。最後喺我哋臨時要求下，佢哋都準備咗生日小驚喜俾主角，窩心！…查看更多

最近Airside新開咗個室內衝浪場，連住一間泰菜餐廳，即管一試。餐廳座位好近衝浪區，絕大部份位置都可以無遮擋睇晒人哋衝浪，頭幾分鐘好得意🤪，好快就覺得幾嘈下🤯，水聲大到唔係好聽到隔離位朋友講咩。食物方面，水準以上，有點驚喜。泰式牛肉沙律🥗（$158）份量不少，沙律菜新鮮，醬汁酸辣，牛肉約三成熟嘅粉嫩，入口軟綿綿、少少炭燒味。黃豆醬炒椰菜仔（$128）驚喜在唔係原個椰菜仔上（原個賣相可愛，但我啲牙唔係幾好，覺得少少硬）。佢係碎開一小嚿咁，混合蕃茄、類似蝦米仔嘅脆脆一齊炒，十分香口惹味。青檸辣椒蒸盲鰽魚（$258）條魚新鮮、夠大條厚肉，算對得住價錢。只係火略嫌太猛，好快就煮老了，有啲鞋。另外如果你食辣（ME譚x 2小辣），請大膽加辣🌶️🌶️🌶️，因為原味完全唔辣，調味偏酸。芒果🥭糯米飯（好似$78）唔知係唔係時令問題，芒果唔甜唔香、口感好淋，嚿飯同樣問題，好似一嚿痴笠笠嘅麵團咁，上面嘅椰汁都無味道，不建議叫依道甜品。整體環境舒服闊落，幾有東南亞渡假feel，但室內比較嘈，如果想靜靜哋傾下偈建議坐室外。服務不得不失，叫做合格。…查看更多

太子分店人龍消失，即興入去試食，覺得無人講到咁劣，但亦未到神仙級數。🐷豚x雞白湯拉麵($105)湯頭好濃, 有雞肉既味道, 唔會好咸。地雞🐔鹽味拉麵($108)依款麵湯頭望落油膩,食落還好, 唔死咸, 都幾香。配料方面, 豚肉薄身香口, 唔會有「so」味, 岩我夠瘦唔會好肥, 口味問題。可能有人唔鍾意無油花。雞肉好滑, 入口有煙燻🚬嘅味道, 層次豐富, 幾驚喜! 蛋合格, 麵🍜偏淋身, 岩我心水。(我煮麵都碌到好軟先食) 如果想食有咬口, 可能要提一提廚師。 最後, 鍾意佢有紫洋蔥碎, 惹味。荀片合格, 個人更喜歡再硬身一點的。至於環境, 有少少焗, 店面細坐得迫就旺區餐廳通病, 都無得講。服務尚可, 幾友善!…查看更多

不嬲最憎食粥，𠵱間隱身舊式公屋嘅大排檔令我改觀。艇仔粥熱辣辣，材料豐富鮮甜，最緊要係粥底米香十足，濃淡適中，唔會杰撻撻劣版潮州粥咁，又唔會稀到水咁，幾驚喜。炸兩唔係脆卜卜嗰啲，少少淋，但腸粉同油炸鬼本身出色，唔油膩又香口，救得返。最正係 醬同芝麻都任加，自己溝到最啱心水，𠵱樣都值得加分！反而炒麵同叉燒腸無乜特別，可skip。整體來講十分值得嚟，樓面招呼周到，價錢仲時光倒流咁，夫復何求！…查看更多

聞名不如見面❣️今日終於嚟到𠵱間茶記食燒雞。真係佩服👍🫶$88有半隻雞，配飯/意粉🍝/薯條🍟/沙律🥗，港味十足。隻雞上枱熱辣辣，噴哂煙，捉都捉唔住，皮脆肉嫩，當之無愧，仲要肉汁豐富，一搣開隻雞髀就爆出嚟，嚇親隔離啲人呀真心😹最抵讚係，雞胸都唔算鞋，只係一個女仔食，都有啲大份，食完好飽算唔算缺點😂😂…查看更多

今日去甜記朝聖，聽聞佢係「餃子界天花板」，到底真唔真？🧡椰菜冬菇雲耳豬肉餃🧡未食過咁大粒餡料嘅餃子，直情食到一粒粒冬菇，一嚿嚿菜，口感十足，份量夠但唔會過多，比例準確，清新可口，大推。🧡香芹芫荽豬肉餃🧡近年坊間好多芫荽產品，好多都係有個問題，就係份量拿捏得唔好，一係太少，一係多到苦多到無哂其他食材嘅味道。佢就將兩種味道獨特嘅食材溝埋一齊，仲平衡得好好，脆卜卜菜粒食落過癮，芫荽🌿香夠出。🧡南瓜忌廉雞肉餃🧡以為蟹黃咁嘅色水！爆餡，綿滑得嚟保留南瓜🎃粒粒，配上雞肉🍗營養豐富，十分滿足，唯一缺點係食得多會好飽滯。淺嚐即可。唯一美中不足係前菜麻辣雲耳，偏咸同死辣，同菜脯一樣無咩層次得個辣字，豐信嘅菜脯就好食得多，鮮辣香俱全。但甜記勝在湯底清甜，無咁喧賓奪主，餃子大細亦比較合理，個人覺得呢兩點比豐信好。不過，兩者都係叮噹馬頭，兩邊都咁高分❤️‍🔥…查看更多

生日飯係最好嘅放肆理由。今日嚟到Bluhouse，早於年中試過其「貴價版」The Dining Room，今次試埋「平價版」比對下。前菜⭐CARPACCIO DI MANZO⭐ ($268)生黑安格斯牛肉片，新鮮嫩滑，略嫌味偏淡，這一點The Dining Room 嘅BEEF TARTARE($308) 出色好多，調味更精準，用料更上乘。牛肉片上係大大片巴馬臣芝士，夾埋茶樹菇、榛子碎同芝麻菜沙律，口感十足，層次分明，食得過癮。⭐POLPO E OLIVE⭐ ($260)八爪魚沙律配切里尼奧拉綠橄欖，估佢唔到份量幾足，5、6個人都分到幾塊，食落軟綿綿帶鮮香，淋上初榨橄欖油，油潤飽滿，每粒都閃閃發亮！主菜⭐MARGHERITA⭐ ($98)性價比之王，必點。餅片薄身極香脆，麵粉香撲鼻而至，面頭鋪滿鮮蕃茄醬，夾雜住原件蕃茄，增添口感，阿傑羅拉牛奶芝士好滑，奶味濃但唔會有騷味，配埋新鮮羅勒，直情好似去咗意大利！⭐GUANCIALE⭐（$110）豬頸肉薄餅配菇同焦糖化洋葱，依個較重口味，但唔會肥膩，豬頸肉烤得香脆，少少似煙肉，同洋蔥好夾。⭐ROTISSERIE CHICKEN — SALT & ROSEMARY／Whole⭐（$788）最期待嘅招牌燒雞上場，餐牌描述吹好大：✅走地黃油雞✅不含抗生素或生長激素✅以鹽水醃製 6 小時，然後以明火慢烤結果無令人失望，雞有雞味，連雞胸都十分嫩滑，淡淡香草調味已足夠帶出其鮮味，恰到好處，連雞翼尖焦脆度都剛好。全雞保留到充足肉汁。雖然唔係同樣肉類，The Dining Room嘅米蘭風味小牛扒就無太大驚喜，只可以話係正常發揮。（但記憶中超過$520）。另外配菜薯仔、蘑菇都唔Hea，煎得好香口，薯仔外脆內軟，冬菇唔會油笠笠，好味道。PS:全隻分兩盤上⭐BACCALA ALLA ROMANA⭐（$398）依味燴銀鱈魚佐料係白酒、番茄、洋蔥、葡萄乾、松子、手指薯仔，聽落好多，但全部融埋一碟，就咁望落似蕃茄煮魚。魚肉唔鞋口，但亦唔算好突出。最後不得不讚佢嘅Tiramisu，酒香點綴不搶FO，奶香蛋香並駕齊驅，配埋濃厚朱古力粉，啖啖Creamy，好快清碟。另一個檸檬蛋糕酸味唔明顯，忌廉有少少喧賓奪主，不太推薦。另外佢杯cappuccino 都十分出色，甘香細滑，帶少許果酸平衡，為依一餐劃上完美句號。…查看更多

餐廳位於商場頂層，坐擁180度靚城景，入夜因反光略微失色。嗌咗個all day($188):慢煮澳洲和牛板腱、胡麻菠菜、牛蒡漬、蘿蔔漬、紅芝漬、炒蛋、自家製酸種麵包🥖黑松露日本本菇。炒蛋色水咁淺又稀，少少水謝謝，未食都心知不妙，食落無想像中咁差，係無咩味，好淡口。漬物正常發揮，菠菜份量唔錯，麻醬可以再香啲惹味啲。個牛又係沾滿麻醬，有啲唔襯，牛可再嫩一點。麵包幾出色，算係外脆內軟，可惜凍冰冰。另外嗌咗和風煙薰辣茄汁配慢煮和牛面頰手工意大利🇮🇹寬帶麵（$188）。個名夠哂長夠哂霸氣，麵條係好食，煙煙韌韌，帶蛋香，茄汁🥫清新帶出食材鮮味，個牛淡淡哋，口感嫩滑但爭緊啲牛味。最後叫咗mocha($50) & 西村抹茶🍵牛奶($60)，不過不失，特別mocha無乜朱古力味。總括嚟講，咩都爭啲，合格但無乜誘因令你好想回頭(可能我哋無嗌佢啲招牌甜品啦)。唯服務貼心友善，環境舒服😌，如果想喺鬧市搵個位傾吓偈，都不失為一個好選擇。…查看更多

朋友生日，俾個藉口我食好東西。要親身去book枱嘅すき焼 森夠晒大牌，試過就知名不虛傳。午餐每位600蚊，我哋再加$100要咗份牛舌(4片)。套餐包括4片牛，有佐賀A4和牛肉眼、西冷、肩胛，仲有一盤日本直送野菜。另外有前菜、甜品、咖啡等。前菜以楓葉🍁點綴，充滿季節感，涼拌菠菜、黃色花瓣🌼仲有菇片，微酸開胃。茶碗蒸少有使用紫菜入撰，新鮮。主菜上場，席前有師傅逐片煮俾你食，每片牛都會配上唔同嘅菜，有輕輕講解食材同最佳食法，鍾意依種淡然唔over嘅招呼方式，恰到好處，唔會阻住你哋傾計。只見師傅熟練地加醬油、灑糖，罪惡感同期待嘅喜悅湧上心頭☄️第一片牛牛味偏淡，但雪花多，入口油脂四溢，沾上蘭王生雞蛋🥚同吃，滑不溜手，是幸福的感覺。之後師傅端上一小碗烤蔬菜，有豆腐、冬菇、紹菜，全部都好入味，飽滿醬油香，但唔會好膩。接下來嘅牛愈食愈濃味，肩胛最濃郁，配上香氣特出，甚有個性的春菊，減低油膩感，加返兩分清新。食牛舌前品嘗咗日本蒟蒻，師傅提醒點蛋食，蛋液混和吸飽醬油嘅蒟蒻絲，真係前所未有咁好食😋。另外仲有淡路島洋蔥🧅，想像不到嘅清甜，師傅建議從外圈開始食，咁就從淡至濃味順次序食。未嚟之前上網爬文話唔建議叫牛舌，好在最後有叫。煮得剛剛好，滑嫩有嚼勁，但唔會似橡筋，牛味亦足🐂，灑少少香蔥食，真係值得一試。食到大半飽就上和牛粒粒炒飯，師傅爽快地下了幾隻蛋炒，真係地獄級罪惡——食完再減。炒飯偏濕，個人鍾意乾身嗰隻炒飯，但啖啖都食到牛粒、蛋絲，份量又剛好，唔算差。最後甜品大驚喜，綠茶雪糕比好多主打綠茶嘅餐廳做得好食太多，微甘不苦澀，茶味出，但唔過火，同濃香牛奶巧妙平衡，口感細滑，想追住食。店方仲好有心為生日朋友準備小驚喜，滿足打卡需要。🤗餐後咖啡同熱檸水就合格有突，沒甚麼可挑剔。唯一美中不足相信係個白飯，另一位曾經嚟過嘅朋友講得啱，係爭個飯，無採用日本靚米，食落梗係少少削，唯一扣分位。…查看更多

星期六難得條龍唔算長，姑且一戰🫡🔸美國安格斯牛肉煮烏冬配老店傳統味噌（ $108 ）🔸牛肉普通料，無煮得太老但食落無味，味噌湯比想像中濃郁厚身，掛湯度💯，唔會太咸，只係麵豉味好強烈，唔算好啱我口味。🔸吉列豬扒煮烏冬配黃金鰹魚清湯（ $108 ）🔸話清湯其實唔清，一樣濃到深不見底，但入口幾鮮味清爽，無前者咁膩。吉列豬扒又係普通料，香脆唔算好熱，無乜調味，似港式日本餐廳🍴貨色。主角烏冬偏硬身有嚼勁，如果想淋啲可以用鍋蓋焗一陣或者等一陣先至再食，口感食得出手打嘅感覺，都幾特別。但俾我揀我鍾意好軟滑嘅麵條。個小食日式炸豆腐（ $28 ）夠熱，調味係最充足嘅一樣嘢，外脆內軟，比主菜更驚喜。有樣嘢值得讚係佢原煲上，夠滾熱辣，凍凍哋食好舒服😀（商場冷氣有時真係Cls咁凍)。如果唔使排隊，都可以再嚟嘅。最後，其實佢翻枱速度十分之快，排隊無想像中耐，我等嗰陣前面十幾人，最後15-20分鐘內入座。…查看更多

Airside近排咁紅梗係要去行吓。試咗間西餐，比想像中好味😋-牛肉他他（$178）好出色，調味恰到好處 鮮嫩無比，橄欖油令佢滑溜香口，醬汁又令佢有少少酸甜，減低膩胃，追住食。西班牙風味烤八爪魚（$158）🐙有誠意，配料多，有辣肉腸、酸豆、橄欖🫒、幾種蕃茄🍅，淨係顏色都夠晒繽紛，望落開心又開胃🤤八爪魚軟綿少少煙韌，唔會嚼到牙軟，腸仔粒香噴噴唔死咸，惹味。龍蝦焗芝士通心粉（$198），係美國人comfort 🍲 food升級版⁉️熱辣辣，芝士🧀偏淡身，唔會愈食愈膩，啖啖龍蝦🦞肉新鮮扎實，份量都還算對得住近二百蚊嘅價錢。招呼不過不失，有點生硬，大概仲係新開張，但環境闊落，冷氣適中，坐得十分舒適。-最後叫咗兩杯嘢飲lemon and lime bitters （$58）and Mimosa（$85），即係西柚加sparking wine ,酸甜夠氣，無咩好挑剔。…查看更多

星期日下晝搵食，撞正過雲雨，誤打誤撞入咗𠵱間街角小館。環境精緻，感覺悠閒舒服，音樂啱聽，店員無一般文青cafe嗰隻串嘴（明就明),未食先開心。-🔸弄堂茶燻雞（$92）配茶事荷葉餅（即台式刈包）、藜麥柚子醋沙律🥗🔸驚喜❣️個雞好香濃煙燻木香，仲有淡淡茶味🍵，調味香而富層次，唔死咸，肉質嫩滑，雞🐓皮都滑捋捋，真係肥都要食。配菜都唔輸蝕，個包好熱好軟熟，有comfort food嘅感覺，沙律茶新鮮爽口，夾住雞件食，中和肥膩，減低罪惡感。-茶事沙律($78)配香烤酥餅，菜嘅種類同份量都多，食落一啲都唔空虛。茉莉花抹茶柚子梳打（$48）、蘇打紫（$58）又係有驚喜，好夠氣，夠凍，同時茶味勁，真係飲得出佢提到嘅材料，又唔會十分甜，正。最後叫多個甜品🍮港式鴛鴦奶油戚風蛋糕（$58）果然名不虛傳，做茶嘅嘢難佢唔到，茶味繼續出衆，唔死甜，蛋糕實淨有彈性，令人好滿足。…查看更多

位處商場open area嘅韓國🇰🇷cafe開揚舒適，服務幾細心，食物就不過不失。-燒醬油黑毛豬白切肉紫蘇飯($128)食物微暖，始終爭啲。豬肉肥瘦適中，煙煙韌韌，口感不俗，個飯就無乜特別，微微辣。醬燒牛肉飯卷（ $82 ）淡口乾身咗啲，無乜味，但餡料豐富，白飯唔會死實實，都收貨啦。蟹籽雞蛋🥚薯仔蘋果沙律🥗（$68）有家的感覺，似一般茶餐廳/屋企自己撈嗰啲沙律，份量唔細，求特色就免啦，如果想食comfort food都唔錯。聽聞佢啲甜品出名，有機會再試。…查看更多

𠵱間餃子店隱身🫥觀塘工廈，卻早已略有名氣，星期日過咗食飯時間去都滿座，要等下位。-白菜豬肉溝芫荽豬肉湯餃（$58/8）餃子十分飽滿扎實，啖啖肉，八隻足夠飽到上頸。人氣金湯即係西式南瓜奶油湯，色澤金黃，入口都幾香南瓜🎃味，但配餃子有少少唔襯，仲有啲漏，建議配另一個湯試吓。香辣榨菜豬肉溝鳳城蝦🦐蝦餃煎餃（$68/8）煎得香脆可口，餡料同樣豐富，大滿足😌酥炸花枝丸配台灣腸（$38）食到最後一粒先記得影，炸得唔油膩，價格相宜，都無咩好挑剔。…查看更多