burntpotato的个人专页

趁仲有得堂食 就係公司附近試吓呢間露面啦! 冬天凍冰冰首先就叫返兩碗野生松茸鮮雞湯($38) 非常足料 滋補健康嘅感覺 飲完成個人暖晒最鍾意食辣野嘅我當然要試吓佢嘅口水雞($58) 層次豐富 辣中帶香 香中帶麻 雞肉嫩滑 好有水準 值得一試瑞士雞翼($36) 鮮甜潤澤 肉質嫩滑 好味道~撞正下午茶時間 就試下佢嘅下午茶餐d($58)啦! 粒粒巴蜀大餛飩 啖啖肉又惹味 傳統開陽蔥油拌麵望落樸實但食落唔簡單 每一啖都係多層次嘅香氣 不得了 加左$6配豆漿 成件事啱啱好…查看更多

屋企附近原來有間台灣小店 呢排疫情嚴重 就買外賣試吓~作為芋頭愛好者 我首先要咗個3號套餐($65)揀咗肉鬆芋泥吐司 仙草一號 同埋無糖茉莉綠茶! 超級抵食 平時呢個價錢淨係食咗芋泥仙草都要! 肉鬆芋泥吐司嘅肉鬆足料 配埋芋泥一鹹一甜 配合得啱啱好🥰 好掛住台灣早餐店嘅蛋餅 見到呢度有芝士肉鬆蛋餅($38) 當然要嗌黎試吓 鹹鹹香香 芝士加肉鬆加蛋呢個組合一定冇錯另外仲要左個芋泥仙草大滿貫😍份量滿滿 款式豐富 見到都好開心! 有煙煙韌韌三色芋圓(即係紫薯圓 番薯圓 同埋芋圓) 另外仲有包餡芋圓 入面有有芋泥 另外仲有紅豆小布丁 水晶 同仙草 每食一啖都好似尋寶咁樣…查看更多

最近勁多朋友都話呢間牛大人好好味又好抵食 難得放假就同男朋友去試下!除了有肉類可任點任食外，呢度仲有大量火鍋配料可以自己任拎，仲要大部份係台灣直送，例如鴨血、手打花枝漿、鹽酥雞、蛋餃等，可以一解大家既旅行隱！牛大人紅燒牛骨鍋係原汁原味既牛骨鍋，一上枱就香到我地口水直流，原來係由牛腿同牛肋骨慢燉而成，鍋面見到好多肉桂枝、紅棗、八角、香葉等，勁真材實料，牛味濃郁又香甜，而且唔會太油。安格斯一口牛肉粒肉質鮮嫩， 油脂分佈平均，油花密度高，牛味濃郁，正。澳洲頂級M9和牛牛丸係台灣製造既牛丸，用澳洲M9級數和牛作為原材料，個樣望落同普通牛丸一樣，但食落完之後唔同，一咬落去，油脂同肉汁湧出，味道濃厚，估唔到食牛丸都可以食到滿口脂香。和牛M5 牛肩卷牛肩卷姐係牛既後頸 ，油花分布更均勻，肉味濃郁，肉質軟冧，脂肪甘香。手切封門柳封門柳姐係牛橫隔膜肌肉，每隻牛只有一條，所以好罕有！油花少但肉質都腍，肉味好重。安格斯牛小排牛小排肉質結實，口感很鮮美唔肥膩。水蓮見到香港好少見既台灣水蓮菜，點可以唔嗌！食落纖維感好高，質感係菠菜同韮菜花之間，吸哂湯底，好正。好鐘意呢度有好多自家製茶飲，可以係個飲品櫃度自己拎，我最鐘意就係洛神花茶，清新消膩。…查看更多

經過過呢間舖頭好多次，一直心掛掛想去試。今晚男朋友話掛住日本，想食靚和牛，就入去試下啦。Niku niku作為一間高級和牛餐廳, 無論入面定出面既裝修都好有格調，枱同枱之間有充足嘅空間，坐得好舒服。店員專業而且服務周到，好鍾意佢地會主動幫手烤肉，而且對於各種唔同既肉都非常有認識，會燒到恰如其分既生熟度。感受到餐廳非常重視質素。材料方面，舖頭提供既頂級和牛(除咗內臟)都係刺身級別， 由老闆係日本親自挑選再真空打包番香港。廚藝方面，餐廳五年黎都係同一師傅主理，令到餐廳食物質素可以更加穩定。每個座位都有一早預備好既三款醬汁，分別係燒肉豉油、麵豉醬同柚子豉油，味道唔錯...但基本上都冇機會用到，因為餐廳提供既肉本身已經好夠味！另外想讚一讚，呢度提供既茶非常香，亦都有解膩作用。海膽和牛 $150上面既北海道海膽望落新鮮飽滿，入口即溶，味香甘甜，而且份量滿瀉，A5和牛刺身好香肉味，一啖放入口係雙重嘅滿足。和牛西冷薄切配蛋汁 $499薄切和牛甘香肥美，口感軟腍豐腴，咸咸甜甜既Sukiyaki 汁為其增加風味，沾上濃郁既日本無菌蛋蛋汁，層次又再昇華。雜錦內臟盛盒$200牛舌每次食燒肉都一定會叫牛舌，但呢度既牛舌同其他地方嘅好唔同，原來高級牛舌係可以咁柔軟多汁！真係好感謝店員為我地將佢燒到啱啱好。橫隔膜脂肪唔多但口感鮮嫩得黎帶咬勁，牛味非常濃郁，食落似肉多過似內臟。牛腸呢款係香港比較少見，但原來係日本人食燒肉是既最愛！望落油脂量非常多，但經店員專業地為我地燒過之後，唔少油脂已經滴落，食落冇想像中咁油膩，反而帶獨特既嚼勁，而且完全無腥味。和牛拖羅蓋飯 $175食過好多次生牛肉，但第一次食完全冇筋既生牛肉！和牛油脂分布平均，入口柔潤油香，真係有d似食緊肥美既頂級拖羅刺身咁，配上蛋汁同美味嘅白飯，呢份蓋飯非常令人難忘。和牛尾湯面 $165最後就係呢碗好多人推介嘅湯麵。望落平平無奇，嗅落香噴噴，先呷一啖湯色清澈既湯頭，發現超級濃郁！店員話呢個湯底係用和牛尾同牛骨熬左四至五個鐘，飲得出每一啖都係精華。湯頭鮮甜，牛香濃郁，口感清爽唔油膩。麵底口感清爽彈牙又掛湯，份量比想像中多既牛尾同少少附送既牛筋腩肉質軟稔，雖然湯的香味已經蓋過肉味本身，但成份牛肉湯麵質素非常高，而且份量比想像中多，我地兩個人每人都分到一碗半！…查看更多

竺扶朋友話灣仔有間新派燒味店幾好味，個老闆當年28歲就做左酒店總廚，仲拎過法國藍帶美食會會員勳章，好似好勁咁！今日難得經過，就斬料返屋企加餸，試一試啦。外面望落同平時嘅燒味舖一樣，但一入舖頭，就見到成排獎盃，牆上仲有幾有趣又中西合璧既卡通，最cute係連店員既制服都配合埋，成間舖頭嘅風格非常突出。重口味人士如我首先當然要叫份肥叉多汁啦！個樣勁靚，見到都好想即刻食😆原來佢既叉燒係用波蘭黑毛豬脢頭肉整，所以肉味濃郁又滿口脂香，仲有醃得好入味既蜜糖香。我最鐘意佢火喉控制得非常好，肉質保持到鬆軟之餘，仲有我最鍾意嘅焦香燶邊，好惹味😍 好耐冇喺酒店或者高級中菜廳外食到咁滿意嘅叉燒，呢個價錢，呢個質素，可以上神枱....我比滿分！豉油雞店員話呢度既豉油雞係用本地雞按古法製作架，當然要試一試。首先，冇諗過半隻雞豉油雞份量都會咁多架，望住外皮油亮，顏色均勻既豉油雞，忍唔住即刻起筷！一啖咬落去，肉質有彈性，口感嫩滑。豉油底帶有少少玫瑰味，提升左層次。店員仲好細心咁俾咗薑蓉我地，雖然佢地既豉油雞已經好夠味，但拎d 薑蓉黎送飯又係一流。鹵水豬腳仔聽講呢款唔係日日有，難得撞正有買當然要試吓！一打開個蓋就聞到好香嘅滷水味，望落睇唔出佢有幾軟腍，但咬落真係滿口骨膠原！最怕就係出面有d豬手豬腳炆得唔夠淋會超級難食，呢間絕對唔會，食得出係心機之作。總括而言呢間燒味舖真係超級有水準，價錢又非常合理，哥哥仔又細心，非常肯定我會再返去食！…查看更多

宜家冇得飛台灣，唯有千里迢迢去元朗黎呢間地道台灣食店 ，encore一下超級掛住既芋泥吐司！最嘆既係可以外賣返屋企坐低慢慢食，唔使同人迫，又唔使怕疫症期間喺街停留咁耐，咁就食得安心又放心! 肉鬆芋泥吐司 $40上次喺度食完呢個念念不忘，今次當然要再食！返到屋企再放佢入焗爐reheat, 焗過既吐司微暖，吐司搽左少少煉奶，配上芋泥同肉鬆，大大啖食落去好滿足。芋見紫薯吐司 $45今次咁早嚟到，當然要試晒三款每日限量既台式吐司！香芋同紫薯本身都係我既至愛，芋頭淡香、紫薯清甜，整體唔會膩，餡料係三款肚絲入面最豐富既，好大份好足料，絕對係令肚皮飽足，嘴巴又滿足既一款。Oreo紫薯吐司 $46軟滑綿密帶天然甜味嘅紫薯，配上脆脆既oreo增加口感，無唔好味既理由！炸地瓜球滾花生 $40上次黎到食過，今次再encore！呢個係台灣傳統喜宴必備嘅菜式黎架，係以黃色同紫色嘅蕃薯加入糯米粉磋成煙銀嘅麵團，入面係滿滿既芋泥，下面係好似花生糖碎，配上唔太甜嘅紅豆，好有層次！一口鹽酥雞 $42鹽酥雞好脆口，粉有少少厚，但好鐘意呢度既調味唔會死鹹，又唔油，食完唔會罪疚!…查看更多

難得有機會逃離爸媽二人世界一下，男朋友建議不如翻兜早幾個月去過既Bingo & Cook。呢個weekday晚上竟然全場爆滿，等位都要等三十分鐘，估唔到咁耐無黎呢度依然人氣旺盛，怪唔之得限時1.5hours就要交枱。幾鐘意呢度既裝修，特別係lip口牆上既壁畫，真係好有韓國feel。⁣⁣⁣生菜包肉好掛住上次係韓國食過既生菜包肉，見到呢度有，當然要食！白切肉唔會太肥膩，配上生菜、泡菜、青紅椒同醃蘿蔔等，包埋一齊外爽內嫩，沾上帶有香濃麻油味既韓國烤肉醬，真係忍唔住大嗌：好香好好味！鐘意生菜包肉既其中一個原因係菜肉比例岩岩好，唔會咁易滯。韓式原味無骨烤雞怕肥既我無叫炸雞，反而叫左韓式原味無骨烤雞。估唔到呢份烤雞會咁好味，雞肉 juicy嫩滑，烤雞外皮香脆又惹味，上面仲有一層薄薄既芝士，非常邪惡！配上甜辣醬同韓式醤油，令呢份烤雞昇華到另一個層次。總括黎講，呢度食物大大份又好味，性價比好高，價錢唔貴，地點又係鬧市中央好方便，好值得encore！…查看更多

臨近聖誕又係同朋友聚會嘅好時間！今次double dating嚟到我係城中其中一間最愛嘅餐廳La Paloma，貪佢食物質素有保證，環境又舒服唔擠擁，chill chill地幾適合傾計，加上餐廳設計氣氛唔錯，色彩斑斕幾適合節日黎聚會黎架！-Red sangria嚟到西班牙餐廳，當然要一人一杯Sangria！Sangria係西班牙傳統飲品，主要用紅酒、白蘭地、水果等製成，La Paloma非常細心提供有酒精版本同無酒精版本嘅Sangria，我哋當然要在最傳統嘅以紅酒作base既版本，一飲落口即刻感覺到 果甜鮮香，望一望杯中豐富嘅水果，睇得出餐廳真係有花時間同心機將水果浸於紅酒，唔係呃人㗎。整體黎講容易入口，又非常解渴，就算係唔係成日飲酒嘅女仔都一定會鍾意。-Chorizo $98西班牙最出名就係豬肉，個個都知佢地既火腿舉世聞名，但其實佢地既肉腸都一樣咁正架！ 其中紅噹噹既Chorizo就係西班牙最具代表性的肉腸，佢既鮮紅色係黎自紅甜椒 paprika，咸香帶辣。呢度就有新鮮的Chorizo食，我每次黎都一實會食架，經sherry wine火焰處理過嘅Chorizo油香滿溢，伴碟嘅細細塊吐司仲可以沾番碗底既油食，真係邪惡得黎又好吸引！-Ceviche de vieiras y coco 138日本刺身級既帶子肉身富彈性，，味道鮮甜，酸香的芒果醬令呢道菜更鮮甜開胃，配上香甜醇滑既coconut dressing，帶有東南亞風味，整體清爽不膩。-Sardinillas $60係咁有情調既餐廳竟然食橄欖油浸沙甸魚？價錢當然絕對比平時士多買嘅沙甸魚貴，但味道亦完全係值回票價。唔講唔知，原來我地由細食到大既油浸罐頭沙甸魚係黎自西班牙架。呢道bb 沙甸魚質感油潤幼滑 ，味道鹹中帶鮮，配上番茄冷湯 Salmorejo同黑橄欖，有好好既balance。-Bacon con queso $28 per piece細細粒既air-baguette是鼎鼎大名既西班牙分子料理教父Ferran Adria 既得意之作，到宜家好多Fine dining餐廳都會見到佢嘅出現。薄身空心既air baguettes口感香脆，加上鹹香惹味既煙肉，一咬落去流心既芝士慢慢溢出，叫人食到唔捨得停。-Costillas de cordero $198Romesco 係西班牙加泰隆尼亞地區非常地道既醬料，係用磨碎既烤番茄、烤大蒜、烤麵包、烤乾紅椒，加入磨碎的杏仁、榛果，再加上橄欖油、醋、鹽和胡椒煮成，質地濃稠順口，感覺好似就係紅色微辣版本既pesto咁，惹味又濃郁，基本上配咩都咁好味。 呢度既Lamb short ribs 煮到啱啱好，配上鮮甜既padrón peppers同Romesco醬汁，無唔好味嘅理由。-Fideuà da marisco $388由細到大，天使麵都係我最鍾意食嘅意大利粉品種，估唔到呢度搞搞新意思，用天使麵去代替西班牙海鮮飯中嘅米飯。天使麵配上大蝦、蛤肉、帶子同青口，非常足料，上菜時熱辣辣，嗅到既係濃厚既烤海鮮味，入口時天使麵帶有雙重口感，部份酥脆帶麵香，部份又有彈性得來大有海鮮香味，配上蒜味蛋黃醬，令呢一道菜更昇華，增添左豐潤既口感。-Crema de maracuya con coco y menta $60以透明玻璃樽承住滿滿既香甜濃厚既椰子泡沫，底下係清新既熱情果忌廉，酸甜融合得相當完美，口感輕盈，為呢餐晚飯馬上完美嘅句號。…查看更多

難得放假去揾男朋友食lunch，就叫我帶佢去平時同同事食飯嘅食堂試下啦！呢間棋哥燒鵝地點都幾就腳，一入去感覺比平時嘅燒味舖形象年輕...d poster都幾有趣🤣🤣首先叫咗一份我地最鍾意嘅化皮乳豬例牌($168)。烤乳豬排列整齊，乳豬望落去色澤均勻，豬皮皮光油亮，金黃酥脆，可見師傅控制火喉功夫到家。在喺側邊望一望，一層肥肉夾住一層瘦肉咁樣，肥瘦適中，叫人口水直流。咬落豬皮入口酥化，最重要嘅係肉質滑嫩可口，而且乳豬嘅醃料啱啱好，唔會遮掩左豬肉味，係我是日嘅最愛。另外我哋仲叫咗一份白切雞同燒腩仔雙拼($108)，雖然呢度嘅燒味係凍住上，但一樣好好味。白切雞口感嫩滑，雞皮好香好滑溜，脂肪比例啱啱好，雞嘅鮮味配上蔥油，好味！脆皮燒腩仔有明顯分隔，由頂層脆皮、肥膏、嫩肉、到最底層的瘦肉，層層分明。每塊燒腩既外表都烤得金黃酥脆，味道鹹香入味。…查看更多

難得早放工，經過呢間餐廳發現竟然唔使排隊，即刻同朋友衝左入黎happy hour！坐咗一陣黎到食飯時間人就開始多，不過亦都開始有live band表現，氣氛熱鬧。值得一題呢度嘅侍應都好helpful，見到隔離枱有人生日，佢哋會主動幫手預備生日驚喜，live band仲會好配合咁演奏生日歌，同埋真係感覺到佢哋嘅熱情，同平時嗰啲冷清清然後尷尬地播生日歌好唔同，氹到壽星女好開心。-南瓜湯與香草包(跟餐)首先嚟到嘅係餐湯同餐包。講起餐湯一定會諗起平時嗰d求其製作嘅紅湯白湯好唔同架，但呢度嘅是日餐湯竟然係南瓜湯！一放入口第一個感覺係口感絲滑，濃濃既南瓜香配以輕輕既甜味，仲有淡淡奶油味道，食材比例剛剛好，唔會太甜或者太膩。是日餐包係香草包，一上枱已經聞到香噴噴，配上黑醋同橄欖油，絕對係比想像中嘅餐包好味。-北海道鮮帶子配柚子汁(跟餐)識食一定係食黎自北海道既帶子！入口軟嫩，鮮甜味美，同柚子汁既清新微酸甚為匹配，後者有提鮮嘅作用！-烤德國鹹豬手 $238呢度嘅豬手大大隻，性價比高，極之適合同朋友分享。豬手皮脆肉嫩，外皮脆而不干，帶有入口即溶既肥膏，入面嘅豬肉鹹香惹味，唔會好似某d餐廳咁烤到變乾柴，仲配以酸椰菜幫助消化，食晒成隻都唔會覺得油膩。-烤150天殼飼澳洲黑安格斯肉眼牛扒 (套餐價$288)呢份牛扒選用來自澳洲的穀飼牛，唔講唔知，全球最出名最好味嘅黑格斯牛肉正正就係黎自澳洲，因為當地既天然牧草環境加上獨特既地理優勢，配合舒適既氣候環境，再加上經計算既科學的谷飼營養攝入， 係屠宰前餵飼d牛食相對上能量高既穀物同玉米等糧食，谷飼期既最低標準是100日，呢份有就係經過谷飼150日既成品！雖然成本比較高，但產出既牛真係油花分佈特別多，肉質多汁細嫩、肉香滿溢，烤過後牛扒面層薄薄焦脆，味道濃香，口感柔嫩多汁。 再配以蒜香法國雞油菌、菠菜同松子仁，口感更加豐富，配備嘅紅酒燒汁有助減低油膩感。-grasshopper (happy hour $78, 其他時間$98)發現Menu又唔唔少適合女仔飲嘅cocktail同mocktail，見到竟然有Grasshopper，忍唔住一定要嗌！ Grasshopper係一款黎自法國嘅after-dinner drink，由cream、薄荷甜酒同白朱古力甜酒調制而成，可以想像到味道就係好似液體狀嘅甜品咁樣，上枱時口感有d似岩岩融化左既mint chocolate ice cream，隨著溫度升高，綿密泡沫加上逐漸明顯既奶味，令到有飲奶昔既感覺，口感絲滑，加上酒精濃度唔高，味道香甜，啱晒我呢d唔飲太飲得走嘅甜魔！…查看更多

聽朋友講大坑一間性價比極高嘅日本料理，晚餐嘅二人前omakase都只係$680，今日趁有空就黎試下。-一坐低店員就為我地奉上枝豆，新鮮既枝豆經過簡單烹調，加上少許鹽巴，帶出枝豆既鮮甜味，好食!-三款前菜，分別係螢光魷魚、日本高糖蕃茄同三文魚軟骨，份量都唔少架-omakase中有三款刺身，今日嘅廚師精選分別係銀鱈魚、油甘魚同深海池魚，每一件都厚實滑嫩，而且好新鮮， 三款刺身都非常高質素。首先食咗深海池魚先，唔講唔知，原來深海池魚同池魚係兩個完全唔同既品種黎！而深海池魚出名清、甜、爽，絕對比普通既池魚更鮮甜，肉質細緻鮮美!呢度既油甘魚一樣高質素，一望落已經見到色澤紋路分布均勻，肉厚肥嫩，魚肉細緻甘甜，油花均勻的散佈於每絲刺身當中，有入口即溶既感覺。銀鱈魚刺身勁唔常見，但其實佢嘅回甘、油份或肉質都絕對能夠媲美吞拿魚。色澤光潤既銀鱈魚，望落泛着油光，入口肉質軟綿， 魚油極為旺盛，呑落去之後仲有餘韻縈繞口腔，感覺上係藍鰭吞拿魚既平價版，叫人非常回味！-接下來黎到手卷，是日精選嘅手卷係蟹肉手卷，非常足料，食到底都仲有蟹肉。-呢度既鴨胸同平時喺街食到嘅鴨胸好唔同，有醃制過嘅感覺。-食完咁多凍嘢，店員為我地奉上花蜆湯暖一暖胃，花蜆既湯汁完美融入高湯中，湯頭非常清爽。-之後係炸物天婦羅，分別有南瓜、番薯、茄子等蔬菜天婦羅，同軟殼蟹天婦羅，炸漿薄身，廚師功夫非常不錯， 油粉比例岩岩好，令金黃酥脆既天婦羅保持清爽唔油膩，上枱時由內到外都係熱辣辣架。幾款入面我最鍾意就係炸軟殼蟹，細細隻但識落絕對係酥脆多肉，重點係非常新鮮 -山藥泥冷蕎麥麵，係日本非常地道嘅菜式。帶有黏稠性的山藥泥增加左麵既滑順度，所以係令人沒有食欲的炎熱夏天別受歡迎。冷蕎麥麵經過凍水既既沖洗，唔會好似熱蕎麥麵也咁軟爛，反而形成爽滑彈牙既口感，山藥泥蕎麥麵滑順的口感容易入口，味道清爽得黎口感又豐富，並且營養滿分。-最後店員為我地奉上抹茶雪糕，為呢一餐畫上完美嘅句號。…查看更多

記得當年仲讀緊書，冇錢去日本旅行，就嚟呢間餐廳食嘢，貪佢無論環境同氣氛都有浸濃烈嘅東瀛味道。依家出咗嚟做嘢，去咗幾次日本，依然好鍾意呢間餐廳！聽講餐廳既大廚係日籍，連食材都係由日本新鮮即日運送到香港，所以每次都食到我津津有味。-鹽檸檬highball($58)嚟到日本餐廳當然要飲日本嘅國民cocktail- highball! 口味灼辣既whiskey，加上soda water，酒感立即變薄，碳酸氣泡令人感覺清涼，配上鹽檸檬，口感清爽，味道refreshing。-梅酒加冰($48)另外又叫咗一杯梅酒，酸酸甜甜，果香濃郁，啱晒女仔飲。-刺身五盛($280)今日嘅五款刺身分別係帆立貝、油甘魚、赤身、三文魚同海膽，全部都係厚切，一啖放入口真係非常滿足！帆立貝鮮甜彈牙，油甘魚油潤豐膄，赤身肉質緊實，三文魚新鮮肥美，海膽甘香軟滑。-壽司盛盒($268)呢份壽司盛盒非常豐富，包括吞拿魚，帆立貝，蝦，鰻魚，三文魚子，海膽，甜蛋等。呢度既壽司飯比出面嘅香，聽店員講原來係因為用咗赤醋。-焱丸活貝大盛($368)終於黎到我最期待嘅燒海鮮，真心覺得貝殼類海鮮嘅最佳烹調方法絕對係浜燒 ，因為最能夠成功逼出佢地既鮮甜。好鍾意呢度嘅店員會親手為我地燒海鮮，始終佢哋比較專業，可以好好控制火喉同埋時間，唔怕浪費咁好既食材。上菜嘅時候鮑魚新鮮到仲好生猛咁郁，令我地更加期待。一放入口係滿滿既鮮味，口感彈牙帶焦香。帶子磯燒一樣係燒到香噴噴，非常鮮甜。呢度既燒蠔大份又肥美，蠔味濃郁，每一口大大啖咁放入口，超級滿足。蜆肉大大粒非常飽滿，跟住頭啱啱熟蜆殼打開既時候店員立即加入了清酒，令到蜆肉唔乾身之餓仲帶有香醇既酒香味，味道係眾多海鮮之中最令人有驚喜既。-日式甜醬牛肉鍋配烏冬($108)牛肉鍋湯底味道濃郁，裏面有大量既蔬菜同粗身粉絲，吸收左湯底精華，非常鮮甜。呢個set仲包括麻醬配凍豆腐，雜菜沙律，燒玉子同一隻可以打入牛肉鍋嘅生蛋，分量多到差d食唔晒。…查看更多

今次嚟到位於觀塘嘅登堂 同朋友一齊慶祝生日，知道餐廳出名只有新鮮肉汁同菜湯等天然調味，啱晒我個對味精敏感既朋友，所以我哋特登選擇呢間餐廳！入到黎發現呢度真係比想像中大，環境幾cozy，仲有人即場現場，氣氛唔錯。-snowvocado($78)同朋友首先一人叫咗一杯野飲，我一係menu見到snowvocado($78)即刻心心眼，佢係由椰奶加上牛油果打成，椰香濃滑，飲落有d似pina colada嘅變奏版，伴礏既菠蘿乾又精緻又好味-fruitea punch($45)朋友既雜果冷泡茶非常足料，有好多唔同嘅生果係入面，果味豐富，茶底帶有橙味，好開胃-鵝肝多士($138)鵝肝煎到外脆內軟，一放入口係陣陣的脂肪香，烘得脆身既多士吸收晒香噴噴嘅鵝肝油，配上無花果，減低油膩感-Roasted Australian lamb rack pistachio provencal($308)呢份烤焗澳洲羊架開心果寶雲蘇係今晚最令人驚喜嘅一道菜，廚師將火候控制得啱啱好，外層既pistachio provencal 酥脆又惹，啖啖肉既澳洲羊架係五成熟，呈現好靚嘅粉紅色，肉質細緻嫩滑無渣，味道唔羶又唔膩。作為配菜嘅紅蘿蔔好鮮甜，配上青豆泥令到味道更有層次。-12小時低溫慢煮烤乳豬($238)慢煮完再焗既乳豬比一般嘅做法更加外脆內嫩，外皮香脆得黎帶有煙韌口感，入面既既肉質非常嫩滑，用到輕輕一切就骨肉分離，伴碟嘅蔬菜新鮮，薯角帶有微微煙燻嘅味道…查看更多

難得第二日放假，就訂咗位同朋友嚟到pizza max bistro 食個飯，貪呢度冇限時可以慢慢傾計。-黎過呢間餐廳幾次，外藉店員熱情又有禮貌，餐廳天花有好多波波燈，氣氛唔錯，食物款式又多，價錢唔貴又好味。-Capresse Salad ($125)呢款沙律係其中一道我最鍾意食嘅意大利料理，基本上材料只有番茄、mozzarella同basil三樣，再配上鹽同橄欖油調味。正正因為材料簡單、做法直接，基本上整得好唔好味唯一影響因素就係食材新唔新鮮，呢度既番茄脆口鮮甜，mozzarella奶味濃郁，配埋一齊又fresh又好味。-Crumbled deep fried Camembert cheese served with balsamic Cranberry Sauce ($105) Fried Camembert cheese 一定要上枱即食，炸到外脆内軟，邪惡得黎又係難以抵抗地誘惑！味道較水牛芝士重，配上cranberry醬，就有好好既balance-German style pork knuckle ($209)德國豬手係我嘅最愛，呢度既豬手燒到岩岩好，外層鬆脆唔會過份油膩，入面肉質軟腍入味又juicy，肥膏既份量啱啱好，真心好食過好多德國餐廳…查看更多

天氣開始凍，又係時候打邊爐喇！今次黎到旺角瓊華中心既牛大人，主打台式火鍋，入嚟第一個感覺係格局舒服闊落，環境乾淨！好鍾意嘅係落單方法係scan QR code，咁就唔怕漏單同唔記得自己叫左咩啦-佢地做緊promo，like facebook 就送一杯黑糖珍珠奶茶，本來都冇咩期望，始終佢哋唔係專做珍珠奶茶，點知有驚喜！我叫咗少糖，感覺幾好唔會太甜得黎又有黑糖嘅香味，同街上面嘅有得揮👍🏻黎到戲玉啦，我哋叫咗鴛鴦鍋，分別係台灣鳳梨雞鍋同牛夫人秘方麻辣鍋，雞肉鮮嫩，湯底有鳳梨、老薑、苦瓜、乾香菇、土雞腿肉、小魚乾，飲落好香好清甜，一啲味精既感覺都無，又溫補祛火，天氣涼涼地飲最岩！個辣鍋都好食，係用牛骨先烤後煮，配上大紅袍花椒同辣乾等增加辣味，再混合三十幾種中藥熬製而成，味道豐富唔會得個辣字。點菜時店員好細心問我地食辣嘅接受程度，建議返我哋應該食大、中、小辣邊樣。鴛鴦鍋係要加$50嘅，個人覺得呢個質素絕對抵比！作為牛魔皇，當然要試吓佢個特級安格斯套餐，任食既肉類有多8款！特別要讚下個安格斯特選牛板腱，非常嫩滑，多汁鮮甜無腥味，一口咬落都係滿滿牛肉香，正！其餘既食材都係十分高質素，望住菜單上過百款火鍋料，真係花多眼亂，作為台式火鍋，不可或缺嘅當然係台灣直送嘅台式蛋餃、澎湖花枝漿，秘製滷大腸、士林豬血糕、台灣魚滑等，比較特別嘅係呢度仲有得食滷牛肉飯、牛媽秘制滷牛筋、士林鹹酥雞，，豐原排骨酥等小食，而丸類中必嗌既係M9和牛牛丸。飲品係任飲，仲要有台灣直送既支裝冷泡茶，食完仲有Movenpick雪糕，多到每樣試少少都飽到食唔晒！…查看更多