Ada L的个人专页

以前好想揾間近似日本仙台牛舌味道嘅店用餐,食過一間喺深水埗但味道唔同,最近揾到兩間,一間係吳留手居酒屋,令人間係呢間。我係牛舌發燒友,上一個食評寫過吳留手,今日就等我講吓秋嵐呢一間嘅牛舌專門店。極味厚切牛舌定食：整個套餐有八件厚切牛舌附有檸檬、雞肉蒸蛋、麵鼓湯、咖哩牛舌、沙律、白飯、醬汁包括葱汁、燒汁及鹽調味料。八件厚切牛舌：牛舌色澤粉紅,外層略為掃咗少許帶微甜嘅燒汁,肉質厚身彈牙多汁,同吳留手嘅厚切牛舌比較,食到最後嗰嚿都依然爽彈而不韌實,但味道方面,吳留手較香口,但食到最後兩三嚿就比較韌實。兩種調味我最喜愛葱汁,反而佢唔揸燒汁喺面頭相信味道會較佳。麵鼓湯、雞肉蟹柳蒸蛋：味道正常而不過鹹。咖喱牛舌：肉質爽嫩地但唔好期待食到牛舌真味,真味早已比濃濃嘅咖喱汁蓋過。呢間厚切牛舌口感同牛舌質素勝過其味道,兩間嚟講個人偏向吳留手多啲。…查看更多

原條厚燒牛舌芯定食（$158）--色澤粉嫩嘅牛舌芯聞落有陣烤過嘅香氣,啱啱熱食就最好食,軟嫩彈牙得來夠juicy,不過食到未就會覺得有點韌。厚切牛舌芯串燒（$68）--不及厚切牛舌芯定食啲牛舌咁好食,最敗筆係烤得過火喉,肉質過實兼太鹹。A5和牛定食（$158）--和牛肉片油脂甘香,軟嫩無比,係一塊A5上等牛肉,略嫌燒肉過鹹,若果將蛋汁撈勻,可減少過鹹味道。總括味道不錯,肉類貨真價實,由其A5和牛定食,以呢個價錢物有所值,十分推介。…查看更多

透過Openrice訂枱,睇完餐牌之後,決定叫個中價餐特上A5薩摩牛壽喜燒 （$349）餐牌上有110g同220g比食客選擇,當然價錢有分別,前者係$249,後者係$349,而我選擇後者嘅原因係我想食多啲,又唔想揀個太平怕肉質鞋口。前菜（薯仔沙律、木魚豆腐、芥末八爪魚）我鐘意食八爪魚,貪佢夠彈牙,所以前菜認為最好食係呢個,薯仔沙律令人醒胃,木魚豆腐就正常味道。壽喜燒嗰個鍋盤體積算細,食材擺得太滿啲壽喜燒汁會彈出嚟,因為啲汁係熱辣,所以有時比啲汁彈到整痛自己。呢個餐個蔬菜、豆腐、蒟蒻同冬菇份量算足,不過今次主角嗰兩碟特上A5薩摩牛,雪花紋理分佈綿密,正當我打算動手嘅時候,職員已經幫我將啲壽喜燒汁倒落個細鍋盤裡面,侍應主動服務我地,呢點值得加分。和牛呈剛熟程度就即刻挾起,每片都脂香肉嫩,沾上上等蘭王蛋汁,即時提升和牛嘅味道。我食咗一碟開始感覺半飽,但我無後悔叫多一倍份量,叫多一倍只為滿足我食和牛嘅慾望。其他配菜亦好吃。總括嚟講,喺肉屋能夠食到咁多份量嘅A5薩摩牛,實在心滿意足,其待下一餐再度光臨。…查看更多

今日去銅鑼灣辦啲事,經過禮頓道突然醒起喺youtube度有人介紹過呢間壽喜燒有提供北海道呢個產地嘅十勝和牛,自己又未試過,不過最吸睛係佢地個$178嘅A4十勝和牛套餐,仲要無加一其實性價比幾高,係香港,呢個價錢嘅套餐已經好少見。一坐低,侍應急速咁介紹醬汁,其實我聽唔切。納過餐牌,自己最想食係$298北海道十勝A5和牛西冷,向侍應點咗呢個餐。端上嚟嘅鍋放入兩嚿脂肪起鑊,再爆香日本京葱同洋葱,然後倒入壽喜燒汁等個汁滾咗,最後放入A5和牛就大功告成。北海道十勝A5和牛油花超靚。我曾經喺銅鑼灣食過一間望落超靚,食落口竟然無和牛味嘅和牛,但呢間係好對版。呢間嘅和牛有大理石花紋,紋理分佈細緻平均,牛味濃郁,油脂四溢,肉質亦很軟嫩,的確係一塊有質素嘅靚西冷。套餐除咗有八塊A5和牛之外,仲有烏冬同蔬菜冬菇,蔬菜新鮮,倒啲壽喜燒汁+昆布一番汁落去啲烏冬,再將烏冬同和牛沾上蛋漿同食,牛脂同啲蛋香交織著,真係人間美食。最後埋單$298,食得我地好滿足。…查看更多

最近去左壽司郎光顧咗米芝蓮一星廚嘅自創壽司,今日又係時候光顧吓元氣壽司,有幾款壽司我嚟襯都必點嘅,包括北海道帶子、炙燒生蠔、拖羅、而最最最重要嘅中拖大拖同左口魚群邊係每次必點嘅。今次發現有一個問題,嚿壽司挾起諗住輕輕點少少豉油食啦！我都已經好小心咁挾,但嚿嚿壽司挾起點豉油嗰陣都散,結果要喺碟豉油到執起嚿飯食,次次係咁點掂呀！壽司郎唔係未試過有咁問题,但無咁誇張,希望好好訓練吓呢間店啲員工點樣整到嚿飯實啲唔易散,呢點對鐘意食壽司嘅食客好掃興。…查看更多

嚟到壽司郎唔係為咗食佢地嘅味道,而係為咗食米芝蓮一星廚兼澤良太嘅名氣。佢設計咗多款嘅壽司,例如特製柚子香大蜆高湯、Royta特製牛肉與生海膽海苔天婦羅配特製醬油、Ryota特製呑拿魚與生海膽海苔天婦羅配特製醬油、Royta特製炙燒中呑拿魚腩配蘋果芥末醬及特製松露香氣壽喜燒牛排等,全部我都試過哂,除咗松露香氣壽喜燒牛排,好遺憾嚟咗三次都無得供應。仲叫咗炙燒特選大吞拿魚腩配柚子醋蘿蔔蓉、極上海膽海苔包、炙燒焦糖鵝肝壽司、炙燒天然金目鯛、特盛紅楚蟹腳配蟹羔及綠茶巴菲總括所有壽司,我認為奢華級A5黑毛和牛壽司同焦糖鵝肝壽司最好味,若果下次有星級厨嚟設計壽司,不論味道我仍繼續嚟食佢地嘅名氣。…查看更多

今日去開太子,經過甜品店門口,見到有張好耀眼嘅甜品相,相中係一碗開心果西米露。果仁之中計夏威夷果仁外,我最鐘意食就係開心果,以前一得閒,就會自己親自動手整西米露,但最近好忙,所以無整好來啦！今日門口見嗰張開心果西米露嘅相,望落好似幾好味,於是入去試吓。等咗幾分鐘,厨房好快就整好放喺我枱面,呢次係我人生第一次食嘅開心果西米露,試一啖係我鐘意嗰種稠度,面頭灑上似乎係炒過嘅開心果碎,啖啖嘅開心果味,同煙韌嘅西米露融為一體,口感濃滑軟糯而不過甜,我呢個開心果迷,食完感覺心情大好。…查看更多

今晚星期六,嚟咗呢間串力ツ 專門店叫咗幾條炸串燒、炸蛋、鰻魚蛋卷,但今主要係為佢地嘅牛腸鍋同煙燻生蠔而來。若有數隻帶有輕味燻味嘅煙燻生蠔,蠔身飽滿,蠔味鮮濃,呢個值值得叫。但今次主要嚟係集中去食佢地嘅招牌博多牛腸鍋。今次叫咗個味噌湯底,我唔好芽菜所以我一條芽菜都無食,為免芽菜重量令湯底漏瀉,我拿走所有芽菜,再續啲放入牛腸,滾二十幾秒再從湯底內挾起。今次主要嚟係集中食佢嘅牛腸,食到唔夠喉再額外加多碟。牛腸脂香軟滑,牛脂香氣浸淫喺口腔裏面久久不散,喺香港有供應博多牛腸鍋嘅居酒屋以經唔係好多,能夠嚟呢度讓味蕾沉醉喺牛脂嘅香氣,實在係人生一大享受。…查看更多

今日夜晚嚟到位於尖沙咀海港城港威商場嘅挽肉と米,未試過IFC店或日本店,呢次係我第二次光臨尖沙咀分店,排隊等候接近一小時終於輪到我, 呢度係預先點餐結賬,結咗賬先準許入座,點完餐侍應隨即安排我坐唯14個環繞住烤爐嘅枱坐,呢度入到去係昏暗一篇,覺得個設計好型。水呀、蛋呀係要自己出去攞,我向侍應點咗個$148挽肉と米套餐,,套餐附有三舊烤過嘅日本國產漢堡,麵豉洋葱湯,一碗白飯同一隻蛋。自己另叫一杯日本清森縣100%蘋果汁。等咗一陣,第一嚿嘅炭燒挽肉漢堡瞬間就送到我前面塊烤網上面,個烤扒職員温馨提示第一嚿原汁原味要襯熱食,我見嚿漢堡牛肉仲滴緊油,諗漢堡入面都應該幾juicy,於是我無落任何醬汁下,就咁就續啖續啖送入口食裏,每一啖都充滿住炭烤嘅香味,嚿漢堡肉好夠肉汁,唔過鹹,味道恰到好。但我環顧四周,大部份人都係將嚿漢堡點醬汁一齊食。我本來想效法youtuber放隻蛋喺漢堡上面打卡,但結果失敗咗。麵豉湯方面味道除咗似平時飲開嘅麵豉湯之外,最特別係落咗唔少洋葱去煲,呢個湯有驚喜100%青森蘋果汁未道正常總括嚟講,呢個套餐價好合理,味道同服務亦感滿意,唯一我後悔係order時無追加多嚿漢堡,我覺得四嚿先夠喉,追加多嚿都只係$38其實價錢幾經濟。…查看更多

一入嚟坐低就叫咗碟白灼雞腸,記得上次同老闆娘講請佢比啲肥雞腸比我,跟住老闆娘話佢同我一樣都係鐘意食肥雞腸,點知灼熟放喺我面前係碟清理哂脂肪嘅雞腸。今次我仲未吸取到教訓,隔咗半年之後再嚟光顧,老闆娘又係講返同一句說話,佢話佢都鐘意食肥啲有脂肪嘅雞腸,但結果同上次一樣比哂啲無乜脂肪嘅雞腸比我。指明想要肥雞腸,但比我嘅係近乎全部都係清理哂肥脂肪嘅雞腸,有無攪錯！我問你點解啲雞腸無乜脂肪,你答我因為呢批雞瘦,所以無乜脂肪,你唔早講話你無貨？接近成一百蚊,谷住度氣夾硬死埋佢,諗返轉頭我見到碟嘢應該起身即刻走人先啱,我覺得好貨不對版,佢既然應承我但達唔到我指定要求,拒絕付款即走係正確做法。老闆娘,你既然自己都覺得肥雞腸好味點解你唔分開兩批雞腸,一批清理咗雞脂肪而一批就係有雞脂肪去供應比兩批唔同要求嘅食客呢？你答我因為今次批雞瘦所以無乜脂肪,但貨源係你可以控制嘛！對嗎？我唔會再光顧呢間麵店,對呢間店實在太失望啦！…查看更多

牛舌係牛部位裡面我最喜歡食嘅部份,今日專登揾間食牛舌嘅專門店去試。入到去黑黑沉沉,光綠唔充足,只有幾枱食客,不過香噴噴令人好有食慾,店員安排我坐喺近門口位置,雖然光線射到入嚟,但仍然覺得昏暗。坐低即刻叫咗個二重牛舌同香蔥薄燒牛舌芯。二重牛舌--牛舌芯味道麻麻,似白灼加少許鹽嘅,味道,厚唔一定好食,反而牛舌尖彈牙有點牛香,比牛舌芯好味,蛋絲夾喺牛舌芯同牛舌中間,賣相唔錯,但蛋香唔濃,仲感覺有啲乾。香葱薄燒牛舌芯--係香口惹味,我所指係啲炸蒜同啲蔥,太濃味反而蓋過牛舌芯應有嘅原味,所以調味適中就可以。總括食物味道普普通通,但下次仍想試試其他,比多次機會我同間店。…查看更多

下午喺佐敦揾飯食,行行吓見到放喺門口張蟹皇麵相相當吸引,於是就決定走入去試試。雖然接近下午一時,等了大若五分鐘就有位。店子坐得很劑迫,店員安排好一個入面最後排的兩人搭檯位比我,一坐低就有七彩蝦片供應,這個有點驚喜,而蝦片脆口新鮮。等咗大若7至10分鐘左右,店員好快就端來蟹皇麵,雖然邪惡,蟹粉面前,膽固醇呢家嘢暫時拋諸腦後先,我成碗蟹皇續啲續啲續啲倒入麵到撈勻。蟹粉相當足料,蟹肉蟹羔鮮甜美味,帶微酸嘅湯好滋潤。總括呢餐性價比高,我揾日會返嚟呢間再encore。…查看更多

今日要去北角處理啲公事,下午就喺北角匯一間韓式燒烤店食埋個午飯,侍應安排窗邊卡位比我，一坐低感覺枱櫈唔太乾淨，油油地,於是就攞咗張濕紙巾抹枱抹櫈，果然一抹之吓有帶啡色嘅污漬，衛生方面可以做得更好嘅。以下係我點嘅花卷五花肉套餐--花卷五花肉：薄薄嘅五花肉片肉嫩油香，邊位燒得焦脆加添一份惹味,無乜油膩嘅感覺濟洲黑毛豬肋肉：擁條狀大理條紋嘅豬肋肉肥瘦均勻,肉汁豐溢柚子汁：味道正常,但自己慣咗唔用紙飲管飲,因為味道會變得難飲，希望下次侍應唔好私自插支飲管落飲品度。…查看更多

記得初初開業叫雞白湯拉麵附送一支梳打水,那時拉麵上嘅炸牛蒡都放得特別多,但日子來咗,發現配料上嘅牛蒡一次比一次少,直至最近再光顧,己經無咗炸牛蒡,我算得上係佢地嘅長期客戶,希望老闆可以加返幾條炸牛蒡點綴吓碗麵又或者附費當配料我都願意比。言歸正轉,話明熟客就梗係覺得佢地好食先經常嚟幫襯,呢度港大學生、街坊同附近返工嘅打工族幫襯最多。叫咗個每次都必點嘅雙湯頭雞白湯+櫻花蝦鰹魚湯底嘅海鮮配料拉麵,柚子麵連濃滑鮮味嘅湯頭一起吃,感覺幸福無比。佢地嘅瀨戶內海生蠔同蜆整到剛剛接近熟嘅狀態好鮮味,未曾有一次食到肚子痛,超讚！我還是選擇有牛蒡嘅雙湯頭雞白湯+櫻花蝦鰹魚湯底嘅海鮮配料拉麵相片放喺度作永久懐念,最後再一次重覆希望老闆從新考慮加入炸牛蒡喺碗麵度,附費也沒所謂…查看更多

香港有雞腸麵供應嘅嘅舖頭已經越來越罕有,入嚟就緊係要叫返碗雞腸麵啦！有啲人好怕食動物脂肪,其實生桐飲食減肥都係主張高脂低碳,所以我唔係好怕食呢啲高脂內臟,食腸唔食脂就幹脆唔好食算了。從前食開尖沙咀某間老字號雞腸麵店,老實講,唔比較鼓油嘅話真係唔及呢度好味。記得一年前嘅一月未寫過三蘇記嘅食評,當時主要係彈佢個麵易稔,今次去食比我感覺個麵彈牙咗,比上年有進步。雞腸份量可以接受,佢個雞腸依舊爽滑,一啲異味都無,最鐘意係雞腸連住嘅雞脂食,呢度嘅雞腸嗰種令人齒頰留香嘅味道一試難忘,我覺得佢地嘅雞脂味係濃郁油香過尖沙咀嗰間老字號,堅係好食。…查看更多