Cobi媽的个人专页

每次去荃灣，我同Cobi爸都好鍾意泊車響大屋街，勝在兩旁多咪錶位，每次夜晚走人果陣都見到珠記門外已經開左幾張枱，好驚個車頭「high到佢地呀」，都好有大牌檔feel，響荃灣大嘅我從來都冇幫襯過，經Cobi爸嘅引誘下，一於帶埋Cobi婆婆一齊去試菜，店內好有舊式飯店嘅氣氛，3面牆身都寫滿菜式，連菜牌都唔洗望，小菜最平$40都有交易，都好經濟下。蠔餅碟頭普通，唔算好大碟，蠔仔亦唔係好多，不過入口好香，食得出用鴨蛋唔係雞蛋，不過蛋太多而薯粉太少，所以質感帶實；色澤就略為深左少少，D油要換下啦…蠔仔肉碎粥好大碗之餘，仲好足料，蠔仔亦見肥美，好「蠔」味，肉碎令整碗湯飯增添口感，湯底又冇過咸，好鮮甜；飯粒軟硬適中，剛剛好爆花，吸收哂蠔仔同肉碎嘅鮮味，好OK!蓮藕餅又係大大碟，不過外表就略油，薄薄的一塊，目視已經見到1粒粒嘅蓮藕，但同時亦見到肥豬肉，煎得略嫌有點過火，太「金黃」啦，蓮藕同豬肉嘅比例唔係好平均，肉多蓮藕少，有D仲係肥豬肉，點左喼汁食都感覺好肥膩，唔係咁like。缽仔雞蛋焗魚腸雖然我從來都唔食魚腸，唔係因為佢cheap，而係有童年陰影，小時候見過Cobi公公洗魚腸，實在太「乾淨」啦，所以就算係住家菜都唔敢去嘗試，不過就知道呢味餸要花好多事前功夫，常言道入廚最高境界就係將九流的食材，烹成一流美食！Cobi公公整嘅焗魚腸好多人都大讚，不過sorry，我真係未試過，只係偷過師啫；Cobi公公以前用鯪魚腸而唔係用鮠魚腸黎做，佢話鯪魚腸比鮠魚腸入口更軟滑肥美，而現在坊間多數用嘅係鮠魚腸，貪佢較易清理。講番缽魚腸，外表唔多得，一黎焗得唔夠乾身，二黎面頭有D墨綠色嘅東西，應該係魚肝，Cobi爸食左一啖，佢話魚腸太少，魚肝太多，所以缽野咁嘅色，而且仲有少少味…我覺得冇heart之餘，水準亦唔合格，所以食淨左成一半…@@秘製貴妃雞肉嫩，冇咩皮下脂肪，不過就冇咩雞味，好一般嘅貴妃雞，完全睇唔出係點秘製法。九菜豬紅豬紅嘅質感得，唔會一夾就散，味道好濃，辣辣地，而且幾大碗，九菜嫩綠冇渣，OK。九菜花炒蝦乾上枱時陣陣嘅香味飄至，未食已叫人食指大動，九菜花好爽口，完全冇渣，可見材料非常新鮮，蝦乾亦好鮮味，又鑊氣夠，腰果炸得香脆可口，總之非常惹味。啫啫通菜煲 oil菜有點老，而且油左D…麻麻地…我明白到響小店食飯係唔可以太多要求，不過如果知道力有不逮的話，咁就唔好咩都加上菜牌到，自己做唔黎，客人又食得唔開心，何必呢~7個人叫左8個小菜，$75一個人，今時今日仲係呢個價錢叫做好平，擺明係做街坊生意，份量亦見足夠，可惜用料只屬一般，多人幫襯都未必係好野，總括黎講，得個平字!…查看更多

天氣涼涼地，一覺醒來已經2點，Cobi同Ella又好乖，過哂開飯時間都唔黎嘈我地；餵飽佢地之後就要餵飽自己，所以一家4口齊齊去西貢市行街街兼搵野食。Cobi爸突然醒起，有同事提過西貢市有間小小泰國菜，佢地嘅泰國海南雞飯都幾出色，YEAH！一於去試下！我倆著住拖鞋行入窄巷，巷內有點擠迫，而且放滿枱枱凳凳，不過已經3點，所以唔係太多人，衛生環境唔算太差，對我同Cobi爸呢2位街坊都還可以接受，不過如果坐滿人嘅巷仔，我想像得到都會幾嘈下…都冇乜望個餐牌已經叫野食~串燒 - 豬、牛、雞每樣2串一上枱已經聞到有陣陣炭燒香味，外表夠juicy，上枱時已經淋上左沙嗲汁，都幾大串，個醬汁有濃濃嘅花生香味，少少辣之餘又甜甜地，惹味非常；不過肉質就麻麻地，豬肉還可以，雞肉就較為嚡口，牛肉就有筋、帶韌。泰式海南雞飯賣相幾吸引，鮮黃色嘅雞皮下有juicy嘅雞肉，入口嫩滑有彈性，雞皮下冇太多脂肪，忍唔住食左1件雞皮，好邪惡嘅美食^^，再點一點微辣嘅醬汁，好味！油飯都頗出色，顏色唔係太黃，粒粒飯都有好香嘅雞汁，煮得夠乾身又唔油膩，入口好香，真係想order多碟。炭燒豬頸肉唔知係咪3點幾嘅關係，件豬頸肉燒定左好耐，入口又乾又硬，好難食…@@呢D環境，收呢個價，唔值囉……查看更多

因為生日果位朋友仔佢只係鍾意食中菜，又少入新界，我同Cobi爸就提議不如入屯門食炭燒乳豬啦~咁就一行8人，浩浩蕩蕩入屯門!已經係第3次到訪，每次都會叫嘅一定係炭燒乳豬、其次係大勝雞、冰淋醬烤骨、豬肺湯，呢4樣已經響之前嘅食評comment過，今次水準依然，所以唔長氣啦~日式介未牛柳粒我同Cobi爸食牛肉都係好咀刁，真係好少對街外整嘅牛肉太讚，呢到都唔例外，牛柳啲質素只是一般貨色，食唔到有鬆肉粉，但係同時亦唔見有牛肉味，入口只係知道自己食緊一粒有wasabi味嘅肉粒，冇咩驚喜可言。豉椒味菜炒鵝腸依家好多菜館都好少供應鵝腸菜式，處理工序又繁複，又要洗得乾淨，我地D客人先食得放心。呢碟鵝腸炒得非常爽脆，裡面的肥羔唔算好多，不過入口就非常惹味，攣攣曲曲嘅鵝腸掛滿醬汁，食到個個「索索聲」，好得！膽固醇?咩黎架?!檸檬沙律醬蒸烏頭呢排同烏頭結下不少「仇怨」，鹽焗烏頭、鹽燒烏頭、泰式明爐烏頭、咸檸檬蒸烏頭!檸檬沙律醬蒸烏頭?未試過，當然要叫黎試下，以醬汁黎講幾得意，酸酸甜甜頗開胃，不過食唔到有沙律醬味，反而多左D好似紅莓響上面，但論魚嘅質素就麻麻地(咁近元郎都唔入D好野)，雖然冇泥味，不過就唔夠大條，欠缺左肥美嘅黃油，絕對稱不上係一條靚烏頭，不過肉質尚可接受，蒸嘅時間都準確，呢味只係緊緊合格。黃金蝦炸得夠乾身，蝦背有界刂左1刀，較易熟同時，亦可以令鹹蛋黃味道更容易滲入蝦肉中，色澤亦夠金黃，鹹蛋黃推得夠開，每隻蝦都薄薄地黏上幼滑嘅鹹旦黃，香口惹味，蝦殼又炸得香脆，好味到叫人忘記咩叫膽固醇呀!記憶中，第1次食黃金蝦，都有成over 10年前啦，地點仲記得響北角嘅東竇，一食就驚為天人，不過開始年紀黎，食野方面都要節制下囉~~~炒唐生菜菜好嫩，唔太鹹，又大碟，又夠鑊氣，不過油就多左少少啦…記憶中，上次嘅服務麻麻地，今次亦唔見有咩大躍進，待應仲好老實同我地講，D碗筷一定要搵熱水沖沖佢呀…咁即係點呀? 叫D客自己帶私家碗筷呀? 咁都有嘅? @@…查看更多

我地order左個god father take away，14吋同16吋只係相差$10，所以唸都唔唸就order左16吋(貪心)，已經唔係第一次黎食pizza，不過上次就買左1件就咁企響門口食，辣住個咀就咁放入口，感覺好free，好自在，今次就攞走。等pizza期間(30分鐘，因為walk in order)，望住櫥窗個24吋pizza，1 件都大個你塊面，真係超大件，心唸「幾時搵夠人一齊試下呢?」店內環境窄長，只有4-5台2人枱，門口就放左2張4人枱，感覺好有小鎮風味。望住職員整自己order啲pizza，感覺都幾有趣，當落cheese啲時候，Cobi爸就一路細聲叫「more more」! 個廚師好似聽到，真係落左好多cheese比我地，好開心呀! 攞左pizza之後立即9秒9返屋企，新鮮出爐啲pizza真係好鬼香，仲響後坐不斷傳黎陣陣啲香味，搞到Cobi爸分哂心揸車。對於一個on diet啲人黎講，pizza簡直就係一個邪惡啲化身，不過我天生就係一個受唔到引誘啲人，所以一定要同人分享呢個邪念，分左2大件比鄰居，盡量減低自己啲罪惡感…有咩料? 總之好多，味道最為特出啲我覺得係黑水欖，好香~而且更能帶出番茄啲香甜，同意式肉腸啲咸香，雖然響個pizza盒到焗左15分鐘，個pizza底依然香脆，cheese味亦夠香濃，最重要有拉扯出黎啲感覺嘛~我同Cobi爸每人食左3件16吋，好膩，不過好滿足，好飽(其實14吋咪夠囉，真係衰貪心!)，下次會搵多幾個friend向24吋挑戰! 我唸大家淨係見到咁大個pizza已經笑到傻左啦~…查看更多

對呢間新疆菜有印象，係來自09年啲工展會，是關響香港搵唔到有孜然粉買，上堔圳買落黎又唔係咁放心，但係竟然比我響工展會上見到(雖然都係國產野，唔知點解就係會放心D)，當然要入下貨啦，雖然幫襯左只係10元8塊，但係肥仔老板依然好好招呼，所以對老板好有印象，當小儀同金剛啲節目一出街，好記性啲Cobi爸就立即記起呢位肥仔老板，仲話要去試菜添。因為知道自己會早食晚飯，所以冇訂位，不過6:30pm去到果陣已經坐左8成人，都好旺場啵~我地全部都order左同羊有關啲菜式，一於黎個小啲全羊宴呀！羊肉串將羊肉切成丁方，入口容易，羊肉粒同羊肉粒中間冇咩虛位，視覺啲效果好充實，再加埋我同Cobi爸都十分鍾情啲孜然粉，香氣十足。不過入口就發覺個羊肉串唔夠熱，但依然好juicy，調味亦見適中，試完孜然粉再試辣椒粉，好夠香辣，好有響王府井掃街啲感覺，不過2串收$44，就略為貴左少少。羊肉Pizza6吋大，2個人食剛剛好，批底有D似葱油餅，入口脆脆地，羊肉處理得宜，好嫰滑，又唔韌，cheese味亦足夠香濃，最重要D芝士比到我有拉扯出黎啲感覺嘛~清真古法燒羊鞍一上枱啲感覺係…咁大件啲? 可能係自己一相情願食新疆菜啲羊鞍一定會用蒙古羊仔架，但以我食蒙古羊咁多年都係比較細件頭，唔通係大羊羊? 咁會唔會韌架? 由外觀而論，D羊架係燒好至cut開一件件，因為咁至可以做到肉身just pink啲效果，因為羊鞍啲香氣已經刺激緊我啲口水分泌，影完相後就立即加孜然粉放入口中，羊鞍被燒到外脆內嫩，而且仲非常juicy，混合埋D新疆孜然粉，好match~食到最後，我連帶骨部份啲肉都唔放過！係廚師出色? 還是羊鞍本身啲肉質好呢，令到我好似變左Cobi咁，竟然拎住支骨食到咁滋味…果然係必食菜式！手抓羊肉卷個菜式冇咩特別，同平時食開啲肉卷都差唔多，只不過材料就完全唔同，由1塊油酥餅卷住D羊肉碎，配合埋D香料、花生碎、青提子乾、生菜，入口有少少騷味，but I like it！個油酥餅軟熟得黎又唔太油，如果可以配合多1片生菜，可能個口感更見清爽，依家食1件就夠哂。羊奶涷賣相好奶白色，未入口時好怕有羊奶騷(羊肉騷就一D都唔怕)，入口時感覺好滑，好似食緊日本D牛奶布丁咁，唔係太甜，都幾好味。雖然我未去過新疆，未食過地到啲新疆菜，所以我唔可以評價佢正唔正宗，不過轉少少材料又或者係改變下佢地啲烹調方法黎適合香港人口味，令大眾更容易接受，又何樂而不為呢? 總括黎講，呢餐係令我同Cobi爸都滿意啲一餐。有特式的食物總叫人着迷，值得推薦比大家一試。p.s.而且仲有一個令人滿意啲洗手間，唔錯！…查看更多

鹿鳴春係Cobi爸同我經常想去啲飯店，但每次得到啲答覆都係「滿座」，得知有位朋友仔係熟客，一訂就有位^^，朋友仔話原來鹿鳴春一定會留番2-3張後備枱，萬一有熟客黎到都一定有枱喎，不過都要成個星期前訂位，我就話之佢，總之有得食！Cobi爸一早就order左酒糟鴨肝同鍋燒肘子，而鹿鳴春食啲係傳統京菜，最為人熟悉啲一定係烤鴨，不過呢樣就唔洗訂，一定有，其他食物都係即時叫啲。6:30pm就坐定定，傾下計、再望下餐牌，order完食物之後差不多已經7:00pm，再望一望餐廳內，已經坐左7成人，場面真係好熱鬧。煙燻素鵝打頭陣的是煙燻素鵝，用腐皮包著甘筍、冬菇等配料而成，有淡淡啲煙燻香味，腐皮軟熟得黎帶點煙韌，而且香口滑溜，內裡餡料啲刀功亦見精細，完全同出面用油炸過啲素鵝冇得比，非常出色！和尚戴帽唔知係乜，見老店員熱誠推介，不防一試。上枱後眼見一塊煎到金黃色啲蛋皮，內裡還有肉絲(聽個名以為係素食)、甘筍絲、雲耳、筍絲、粉絲、大豆芽、冬菇絲等，炒得非常乾爽，味道香口而不油膩，條條絲都切得幼細，睇落就好容易，其實刀功同炒功都缺一不可。LIKE！酒糟鴨肝 (預訂)酒糟鴨肝係要預訂啲菜式，賣相只感一般，冇美感可言，不過一上枱就傳來陣陣啲香味，入口感覺鴨肝啲質地幼滑細膩，少少起沙，加上紹興酒同糟鹵，配答得宜，令鴨肝啲甘香更上一層樓，膽固醇?已經拋諸腦後，食完呢個菜式之後，口腔仍有淡淡啲酒香?定鴨肝香?已經分唔出啦，必食！鹽爆管庭管庭即係豬啲喉嚨，又叫豬天梯，本身對呢個部分無咩好感，上回食豬天梯啲原因係響老坑打邊爐，一黎白灼冇咩味，二黎果餐食得唔happy，食咩都唔好食，不過見朋友仔推介，比多次機會你啦！上枱見到佢又係「白奶哂」咁，以為都係咁上下，入口乖乖不得了，非常爽口，口感略帶煙韌，用鹽同芫茜大火爆香左啲管庭，伴以少許魚露更見鮮味，廚師啲炒功要一讚！北京烤填鴨今晚其中一個主角出場啦，師傅預先響我地面前show下隻烤鴨，睇落就烤得好夠火喉，色澤非常均勻，當時我已經感受到烤鴨熱騰騰啲香氣，而師傅亦好快咁響我地枱邊手起刀落，兩大碟啲片皮鴨好快就送到我地面前。只見烤鴨肥瘦適中，間中都有2片頗多肥糕，烤鴨皮外脆內軟，3分啲皮帶7分肉好有咬口，鴨肉嫩而有汁，而包鴨啲餅皮都OK唔太厚，配合甜麵醬啲濃香同京蔥啲辛辣可減去不少油膩，正！不過呢餐仲要留肚，3件已很足夠，果然係每枱必有啲菜式！鍋燒肘子(預訂)第2個主角都出場啦，鍋燒肘子又係一個需要預訂啲菜式，呢個菜真係要人多先至可以order，真係好大隻。呢個元蹄啲肥肉同瘦肉都好平均，表面個皮做到好鬆化，內裡啲肥膏入口即溶，不過下層啲瘦肉部分頗為「鞋口」，可能取材大隻啲關係，肥膏亦除之而增加，炸啲時間定必要長久一點，瘦肉變「鞋口」就冇可避免。其實整體啲感覺都係OK啲，冇多餘啲芡汁，味道方面香濃肥美，食完一件元蹄之後再食下肉邊啲菜，可以中和元蹄啲肥膩感。不過可能碟元蹄太大碟，或者係食左幾件烤鴨啲關係，實在太漏，不能多吃。炒西蘭花冇咩特別，炒得都幾翠綠，食完咁多肉之後黎個菜實在太好啦~小籠包一望就知個皮做得好厚，肉餡還算鮮味，不過唔夠湯，麻麻地。拔絲蘋果期待的拔絲蘋果卻令人失望，冰水放響枱面成10分鐘之後，侍應先至上果碟沾滿糖漿啲炸蘋果，熱騰騰的糖漿遇到冰水，立時變成脆皮，再快手從冰水內撈起，變成一件脆皮蘋果而唔係拔絲蘋果，點解?糖漿唔夠濃杰，炸起左一陣先上枱，碗冰水裡面又唔夠冰，好幾種因素下，老實講，我一D都feel唔到拔絲啲奇妙，咬落去還好，表面依然脆身，呢碟甜品極其量可以稱之為炸蘋果，同拔絲蘋果還有一段距離。上次食拔絲蘋果，已經係20年前，好懷念記憶中啲味覺。整體啲味道唔錯，而且上菜啲次序有條理，份量亦見足夠，人多share仲好，今次可能太貪心啦，又叫烤鴨，又叫鍋燒肘子，太多肉，食到個人好漏，可能明明好好食都變左唔好食。鹿鳴春響香港生存左咁多年，一定有佢啲道理。比個tips大家，去老店食飯一定要早食，師傅級啲廚師通常早休息，夜D啲order通常係比D師傅仔做啲，想食好野就記得要早食啦~…查看更多

唔係咩特別啲日子，只係突然好想食意大利菜，朋友仔又經常提及呢間餐廳，所以黎開餐，除左pasta之外，朋友仔千叮萬囑叫我試下個魚，因為我同佢啲口味差不多，對魚都係鍾情萬分。這面積不算大，滿室暖和的色調配以木製的陳設，紅磚牆壁上掛有意大利黑白風景照片，住家風味濃厚，予人一種「隨意」而「開懷」的氣氛，好warm、好輕鬆，令人不覺拘束，又坐得舒適。麵包自家製啲麵包又點會放過呢? 不過當然唔可以食咁多啦，要留番D位比主菜嘛~選擇左香草包、南瓜包、Brown bread。本身好喜愛香草包同南瓜包，質感軟熟得黎又唔會太鬆散，香草包油份夠，好香，如果搓到D香草平均分佈會更好；Brown bread好有質感，點湯好perfect；而每枱皆放有grissini，既有麵粉香之餘又夠煙韌，外皮脆卜卜，入口泛著淡淡芝士的香味。當然，以上啲麵包全部都點左我最like啲醋同橄欖油一齊享用啦。香橙甘筍忌廉湯香濃啲忌廉湯加入左香橙一齊烹調，大大減低左忌廉湯啲油膩口感，清新又香甜。利古里亞香草汁八爪魚沙律平時一定會叫啲Parma Ham做Antipasto，今晚絕跡枱上，改為由廚師推介啲八爪魚沙律。質感軟身得黎又唔太腍，八爪魚肉本身啲韌性完全消失，配上蕃茄、水欖、邊豆、薯蓉，加埋香草汁啲幽香，令人回味無窮，果然係呢到啲拿手開胃菜。鹽焗香草鯛魚伴沙律鯛魚先用海鹽包住焗熟，再敲開鹽包，取出魚肉，加上少許啲橄欖油的魚肉帶點鹽焗香味，鮮甜而嫩滑，製法簡約而不單調，冇多餘啲調味料更顯魚肉本身啲鮮味，非常啱我口味，碟上更伴以3種不同啲sauce，不但可以裝飾，亦提供多口味給客人享用，再伴上鮮嫩啲green salad一齊進食，要比10個like。博洛尼亞傳統肉醬千層麵Lasagne係一個好傳統啲意大利麵，自己都非常鍾情。材料連調味料over 20種，準備功夫又多，所以一有機會都會order呢個意麵一解相思之苦，當然…B沙咳個D完全係兩回事，唔係我杯茶。講番呢到，用瓦煲盛載的千層麵都係第一次見，waiter端上時已經聞到香氣撲鼻，醬汁濃郁，麵皮薄，Mozzarella同Cheddar Cheese渾成一體，更能帶出肉味的濃郁，入口美味難忘，唔怪得呢道菜亦係廚師推介，絕對係水準之上。心太軟當我同Cobi爸都一齊話「好飽」啲同時，當waiter行過果陣我地又按捺不住叫停佢「唔該我地想要個dessert menu」，咁滿意啲一餐晚飯，又點可以少左甜品呢~我地order左個心太軟share，熱朱古力蛋糕伴雲尼拿雪糕，賣相精緻，cut開少少之後，朱古力好「流」，蛋糕外脆內軟，甜度適中，再加埋個雲尼拿雪糕，冰火相遇，感覺好美妙，呢個心太軟絕對係今晚一個完美啲句號。埋單計數，每人約$500，貴錢中上，但更重要啲係，當晚無論食物與服務，我同Cobi爸均稱心滿意，值得大家一試。…查看更多

食物方面都係普通一般BBQ野食，腸仔、雞翼、粟米、牛扒、豬扒、雞扒、豬頸肉、翠肉瓜、茄瓜，所謂啲海鮮得秋刀魚、多春魚同D尤魚仔，青口都有D啲…蝦?唔見啵@@，味道只係一般，不過就從來未食過咁難食啲豬頸肉，不但肉質淋，又有雪味…encore啲只有雞翼、粟米同翠肉瓜，冇食「海鮮」，費事搵個肚黎玩啦；熱食方面有羅宋湯、生菜、沙律菜、仲有其他野，不過見佢樣衰衰咁冇掂到，個生菜好想食多少少，不過比好多豉油浸住，咸到死，encore唔落，最唔滿意就係連麵包都冇，咁容易安排啲食物都冇，失敗!環境方面對開係九龍公園、彌敦道夜景，絕對OK；室內安置左好多部電視，可以一邊睇MV，一邊食野，本來好好地，佢又開放埋比客唱K，其實問題不大，如果安排好D的話…唉~我果晚就唔多掂，後面枱客飲大左(見到佢地自己帶左2支威士忌上黎)，食左1粒鐘之後開始上身，嘈巴之敝不特上，仲攞左支咪唱K加大聲亂講野…，D waiter又唔敢去攞番支咪，你地想想個場係幾咁差抽風?唔可以話冇唧，有D啦，不過係九流唔係一流，真係唔知之前一篇唧朋友仔打錯字定係「梅」啦…總之D抽風就好似去左10幾年前D韓燒咁，返到屋企就比Cobi爸叫「你快D去沖涼啦，D味好勁呀!」@@我都唔想架，我都係比人老點架咋…Friday night要$158加一，入座時話加$38可以坐到零晨4點，BBQ就得3粒鐘，完本想同好朋友傾下心事，點知到11點un頂亞po，搣左!總括一句，no return!…查看更多

Cobi爸好鐘意食小籠包，我地試過好多間，覺得呢間算唔錯，價錢適中，味道又唔錯，幫襯過呢家店好幾次，覺得服務及食物水準都keep到，唔錯~我地2個人，叫左個2人餐，有小籠包，担担麵，干煸四季豆，酸辣湯，雞絲粉皮，高力豆沙，個餐本身都夠食，但奈何我好想食蜜汁火方，忍唔住加單… 食物亦好快送黎。小籠包每次來都必定order，皮好薄，肉餡好juicy，有一大泡肉汁，係一個可以「打千秋」啲小籠包，正！担担麵花生味好濃，少少辣，不過湯底唔算杰，麵亦有質感，整體算中上，Cobi爸啲至愛。干煸四季豆炒得非常乾身，夠鑊氣，爆透左啲橄菜非常惹味，而四季豆本身好嫩口，係一個好好「餸」飯啲小菜。酸辣湯酸辣湯係一個非常平常啲湯羹，差不多係Cobi爸每次啲指定菜式，材料都幾豐富，有冬筍、冬菇、肉絲、木耳、豬紅、嫩豆腐、蛋花…顏色夠，亦夠酸，可惜唔夠辣，要加辣椒油頂上。整酸辣湯唔係太困難，要做得好，刀功啲要求就比較嚴謹，樣樣材料都要切絲，尤其個豆腐絲，自己整啲話，真係切絲都切到手仔軟架! 所以都係出去食好囉~雞絲粉皮青瓜份量足夠，好爽口，粉皮淋身得黎又唔爛，味道唔錯，可惜麻醬太少，唔夠撈…蜜汁火方好鍾意食呢到啲蜜汁火方，主角金華火腿當然做到非常出色啦~瘦肉部分佔3/4，肥肉部份約佔1/4，配角係卜卜脆啲窩巴，嘩！有驚喜！再配合埋濃稠啲桂花糖，甜度適中，再用包包卷住一齊食，感覺好爽！咸鮮而帶重甜，真係回味無窮呀！高力豆沙炸啲甜品一向都係麻麻地，除左…高力豆沙外^^~蛋白打得夠起，入口唔覺油膩，只可惜豆沙份量唔夠，糖粉又太少…環境方面，地方都算乾淨，可能空間有限，略為嘈左少少，食物都算滿意，招呼都OK，幫襯過好多次，質素依然。…查看更多

每次去老麥食野經過果陣，都見佢鬼咁多人等位，星期五仲勁，不過Cobi爸話想食上海菜，映山紅就成日食，不防去金滿庭一試啦~ (我去行街，佢等位…嘻~)好奇怪…一間有裝修啲菜館，竟然問我地願唔願意搭枱? 真係O哂咀，你收我茶餐廳價錢呀?! 搭枱!入坐之後叫左壺碧螺春，幾清香，冇乜青味，都還可以。每枱都有碟蝦仔做餐前小食，食落幾惹味，而且D蝦殼帶軟身，可以連殼食，不過都有幾隻梅梅地…素鵝素鵝最先來，金黃色啲外觀好靚，外層啲腐皮煎到好脆口，內裡餡料有冬菇絲、筍絲、甘筍絲、最鍾意有馬蹄粒，好爽口，而且唔覺得油膩，不過要快食。鍋貼一碟4件，底部煎得金金黃黃，而且夠香口，內裡餡料充滿肉汁，但不油膩，OK~百頁小唐菜先試下個白色湯底，幾鮮甜~ 再試埋個百頁同白菜，兩者都索哂上湯啲鮮味，百頁淋身得黎又唔爛，感覺都幾清新，OK~宮保蝦球用啲蝦球都算大隻，醬汁亦唔太杰，炒得夠干身。個肉身好爽口，唔係太辣，好惹味，不過略為覺得少左兩隻紅辣椒作為伴菜，起碼可以增添辣啲視覺嘛~鍾情食蝦啲朋友仔都不防一試架~整體都算唔錯，環境幾舒適(唔計搭枱)、幾乾淨，服務就一般，此店食物唔錯但冇驚喜，服務又一般，而且收費唔平，唔值得排長龍去食囉。…查看更多

4月至食過依家又再encore，冇他啲…好食又抵食之嘛~Cobi姨媽生日，佢點名話要再黎，所以又1行7人再黎大食囉，今次比上次仲癲，叫左18碟~~~其中有7味(蟹籽肉鬆沙律、三文魚剌身、8吋長鰻魚壽司、鹽燒鯖魚、炸蝦天婦羅，蕃薯天婦羅、蒜片鐡板牛柳粒)已經響之前啲食評comment過，今次啲水準依然，所以唔再咁長氣啦~先黎冷盤~原板海膽刺身已經唔記得係幾時開始愛上食海膽，見經理推介，今次人又夠，不防order 試試。原板海膽刺身連紫菜上，入口好香滑好cream，而且尚算鮮甜，OK~三文魚反卷三文魚蓉好香，加上少許啲芝麻，細細粒咁一口一粒，又唔會咁易飽肚，so good~牡丹蝦剌身賣相唔錯，size夠，肉色都好通透，入口只覺肉質彈牙、味道鮮甜，掂呀!細鱗活魚刺身即叫即劏，薄切成刺身，肉質好爽口、好新鮮，不過唔知係咪養魚? 味道只屬一般，亦冇咩魚啲鮮甜，可以不吃。蟹籽沙律壽司D飯細細粒、又暖暖地，加上D日式沙律醬酸酸甜甜咁，唔錯~芒果軟殻蟹反卷個人好鐘意將D熱啲同凍啲野一齊食，感覺好爽，呢個反卷不單比到我呢種感覺，同時仲可以咸味同甜味一齊enjoy，yummy~再黎燒物串燒牛脷牛脷好爽口，厚薄適中，味道濃郁、好香，牛脷啲味道冇比個醬汁淹沒，佐酒一流。串燒雞軟骨用左雞肶啲軟骨，食落好有口感，軟骨上啲多餘脂肪比火燒哂出黎，食之前記住要加少少啲檸檬汁，可以減少肥膩感，入口卜卜脆，真係多多都食得落!燒羊架肉質方面OK，好嫩，有少少羶味(我成日話食羊唔食羶不如唔好食)，個人覺得overcook左，7成熟就最perfect~其他魚粥食左條細鱗刺身，剩餘啲部位當然唔好嘥，用黎煲粥就啱哂，可惜個粥底嘛嘛地，本身條細鱗又鮮味缺乏，個粥梗係唔得啦~手打冷烏冬手打烏冬一向都是我啲至愛，健康又美味。呢個烏冬放響墊左冰啲木盒內，賣相唔錯，加埋D山葵、蔥花同蘿蔔茸，食起黎口感好清新，夠凍，夠滑，又煙韌，食到我地雪雪聲咁，好滋味。今次1行7人，所以book左間房，每人最低消費$200，到尾聲果陣，個經理亦先同我地計定哂數，所以我地條數剛剛好，唔錯；房間位置亦坐得舒服，唔擠迫，不過就擺放左一D雜物響到，視覺就麻麻地啦~…查看更多

選擇食為先都係貪佢方便，響東門附近，食飽飽就可以出發行街街。得2個女仔，都唔可以叫到好多野，4個點心都夠哂~蝦蛟皮好薄好晶瑩，蝦肉亦鮮味，而且多筍絲，有點肥肉不過仍然可以接受，食落唔會乾爭爭，不過師傅手勢麻麻，D蝦蛟皮有D裂裂地。炸兩D炸兩卷得好整齊，同香港D粥店比較呢碟美觀好多，腸粉略為厚左少少，不過都拉得滑溜，而且加入左少量啲蔥花，入口有米香，OK! 裡面D油炸鬼仲脆，可惜唔夠豉油。飽汁鳳爪鳳爪炆到好入味，又唔太咸，鮑汁濃到起膠，要趁熱食，凍左會結到一舊舊。蔥油餅煎到過火，內裡啲麵糰又硬身，雖然好有蔥味，不過呢味唔合格。格局都係一般內地啲樓茶格局。因為地點方便，會再黎幫襯啲。…查看更多

約左朋友仔北上食飯、按摩、行街街，選擇咸亨係因為貪佢方便，響正國貿地鐡站上面，離我地去開果間骨場又近，食飽飽行過去都係大約10分鐘咋~睇完網上啲食評，覺得有D好誇張…同西湖春天比較，咸亨係較為遜色，但都不至於好難食囉…因為只得2人關係，朋友仔又細食，所以都係叫左4樣野:咸亨鹽焗雞北上食飯我就最鍾意食雞，貪佢有雞味，又一定係新鮮雞，而且食落冇乜皮下脂肪，雞肉啱啱好，夠熟又嫩滑，又有骨香，而且仲好入味添，咸咸香香咁，好吸引；就算唔係浙江菜又點? 依家啲食市興fusion嘛~百頁豬骨煲見到個湯底奶白色咁靚，已經忍唔住先黎試飲個湯，豬骨味好濃，有淡淡啲胡椒香味，唔辣，味道剛好，D豬骨仲有少少肉連住，再試埋D百頁，嘩! D百頁索哂D湯，淋身得黎又冇爛，好味~薑汁芥蘭個芥蘭好嫩口好甜，又夠薑汁~ 不過我就未食過呢個look啲芥蘭，雖然我好鍾意食芥蘭啲枝，不過炒粒粒啲食法此終有D怪怪地囉~香煎韭菜餃隻餃好大隻，煎到剛剛好，非常香口，咬落熱辣辣、又多汁，韭菜同豬肉啲比例OK，唔會太多肉，而且仲用左隻熱pan上菜，非常有誠意~侍應啲服務都欣勤，一叫就應，有時仲主動同我地添茶~同我國啲其他飯店啲侍應比較算係唔錯，不過個洗手間就有”好”大啲改善空間……查看更多

Day 2勁食之旅第5站 - 蝦籽撈麵由大馬路 > 行上大三巴 > 再經果欄街 > 去埋大碼頭街啲時香買蝦籽/魚皮花生 > 食到第5站…終於到左祥記麵家。慕名而黎，行到過黎差不多5點幾，下午茶時間過哂，晚飯時候又未到，所以都唔算好多人，入去已經有位，不過依然要搭枱~但由於真係太飽啲關係，我同Cobi爸只係叫左一碟蝦籽撈麵 + 油菜 + 2枝大可樂~蝦籽撈麵啲碟頭好迷你(平時啲我一定彈佢細碟，但食濟左啲我就讚佢啱啱好~哈哈)，聞到陣陣啲蔥油香味，而據了解D麵係用鴨蛋打啲，所以好有蛋香，全冇鹼水味，廚房響出菜前加左少許啲醬油+豬油淋響D蔥花上面，簡直香噴噴到冇人有，最後當然要加上第2個主角蝦籽啦~入口只感覺麵質果然好彈牙，麵條睇得出係人手製做啲，有粗有幼，自家製啲蝦籽鹹鹹地鮮鮮地，非常惹味，不過略為唔夠乾身，蝦子份量適中(太多的話會苦…)。總括黎講，祥記啲蝦籽撈麵都算好食，鍾意食竹昇麵啲粉絲們順路經過黎食都唔錯，如果話要等成大半個鍾黎食個麵就好似勞師動眾左啦。走果陣買左2樽蝦籽做手信…嘩!一D都唔平，成$85一樽，不過都獲得好評。(自己都試過加左落個炒飯同白粥到…正!)…查看更多

Day 2勁食之旅第4站 - 洪韾椰子雪糕夏日炎炎，食雪糕最好不過，響豆腐榮行前少少就會見到… 嘩! 要成$12一杯? 都幾貴啵，但見一場黎到就試下啦，Cobi爸唔食椰子，咁就唯我獨尊囉…「不」落去感覺質地比軟雪糕硬，椰子味好香但唔係太濃味，有少少椰子肉，仲有DD冰沙添，其實味道只屬一般，唔見得特別好食，如果同HD記比更加冇得比，不過如佢所講係手做啲雪糕，現在實在少見，夏日炎炎下，不防一試。不過食還食，影相果陣要小心D，因為佢響馬路邊，一定要睇車呀~…查看更多