Bosco.c的个人专页

鍾意食日本嘢嘅香港人，呢排應該留意到有間日本好出名嘅迴轉壽司喺香港開張，就係大名鼎鼎嘅壽司郎。聽過人話開門前已經會有一大條隊，所以今日11點幾就開始嚟排隊。嚟到嘅時候發現前面已經有超過100人，排隊嘅盡頭會係壽司店嘅門口，可以拎飛，之後大約時間返嚟就可以。我拎嘅係90號飛，大約1:30入座，可以俾大家作為一個參考。等候嘅期間有店舖嘅餐單睇睇，覺得佢嘅種類比正常迴轉壽司多，而且款式亦都有較為港式嘅風格，幾期待呢！終於入到餐廳，店員會先以日本人嘅方式痞低同你介紹電子顯示屏嘅用法同其他指引等等，令人有置身於日本嘅感覺。餐廳大部份嘅設施都係自助，杯、餐具、紙巾、濕紙巾都係可以自己拎，壽司除咗可以喺前面嘅迴轉帶拎之外，仲可以用電子顯示屏落單，以我哋兩人枱為例，每次落單可以點四件，之後大約幾分鐘內都會喺枱對上嘅輸送帶度送達。介紹吓我哋食過嘅壽司啦。個人好鍾意食蟹，所以叫咗兩款蟹壽司試試。水煮松葉蟹，蟹好新鮮，冇過分嘅調味，食得出鮮甜。另一款係蟹肉蟹膏壽司，蟹膏味道好重，鍾意食蟹應該喜歡。北海道八爪魚壽司，三文魚子軍艦，赤蝦壽司，有水準。炙燒鹽味三文魚，表面燒得香脆，食落入口即溶，肉汁保存到，推薦。醬烤日本產帆立貝壽司，本來以為係燒熟左成粒帆立貝，原來只係表面嗰浸熟，所以食落都係好似刺身咁，而且大大粒，鮮甜又有肉感。蜆肉味噌湯，蜆肉份量都唔少，味噌唔會過鹹，飲晒成碗都唔會覺得好膩。茶碗蒸嫩滑，材料有帆立貝同蝦等等。除咗平時都會食到嘅食物外，仲叫咗一啲比較特別嘅壽司，例如茄子田樂味噌，竹輪天婦羅壽司等。茄子味噌壽司估唔到又幾夾，味噌有畫龍點睛之用。竹輪天婦羅略嫌有點太厚，食落會有點粉。最後，見到甜品上面有一個好少見嘅名-卡達拉娜，好奇心驅使下叫咗嚟試吓。卡達拉娜其實係意大利嘅高級甜品，Catalana。表面上會有用砂糖烤成嘅焦糖，雞蛋同忌廉作為甜品嘅主要材料，食啦好似一個唔會溶嘅雪糕咁，又有啲似蛋糕，非常特別。食完買單，兩個人冇點睇價錢叫嘅情況下，每人大約$180，真係幾抵食！…查看更多

法式焦糖燉蛋Creme Brulee $50相信好多人都聽過Paul Lafayet嘅法式焦糖燉蛋好岀名，但價錢亦唔平，所以一直都未試過，今日有時間等等朋友所以就決定試下。本身係雪喺雪櫃嘅焦糖燉蛋，當你order嘅時候，店員會即時喺面灑上砂糖，再用火槍燒成焦糖，香氣四溢。選擇左堂食，所以溫度最正，整啖係又凍又暖。焦糖燉蛋嘅燉蛋非常幼滑，入口即溶，重要嘅係，焦糖燉蛋唔會好甜，所以平時叫野飲會少甜嘅我都覺得無問題。食過之後，覺得貴得有道理呢！…查看更多

上環有好多特色舖，行行下有點累，所以就搵左間cafe坐下，選擇呢間係因為見到門口幾靚。我叫左一個set，叫做Mango Dome，配野飲嘅可以加$10，我就加左一杯果汁，係蘋果汁加橙汁，飲落新鮮，味道很好。過左十分鐘左右就上了，望落幾有effect，elements好多，亦十分特別。首先有一個mango mousse cake，裏面有幾個layers，有海綿蛋糕，芒果mousse等等，味道濃郁，不錯。另外有一球芒果雪糕，香滑可口。最後有一小碗嘅生果，分別係蘋果同士多啤梨，食得岀蘋果有浸過糖水，唔會酸。…查看更多

荃灣嘅商場有一間裝潢幾靚嘅餐廳，主打台灣菜，感覺不錯，於是就入去試試。鹽酥雞比菇，比平時嘅炸雞比菇少一分油煙，無上炸粉。每粒都炸得香脆，外脆內軟，仍然保持juicy，調味亦正常。塔香炒海瓜子，海瓜子即是香港的蜆，數量幾多，但上到菜時已冷了，唔清楚係放左喺廚房好耐定點。味道有點太重，必須有飯一齊送先得。香酥雞扒蛋炒飯，香酥雞扒十分脆，雞肉亦幾嫩，但蛋炒飯又係唔熱的，亦無乜調味。招牌冰水果茶，茶底足味，亦多生果可以食，不錯。冰蜂蜜檸檬四季春，蜂蜜同檸檬嘅味道都好岀，野飲嘅表現好過菜式呢。…查看更多

一向鐘意去red Mr唱karaoke，因為食物質素有保證，今次嚟左唱k lunch，所以叫左兩個lunch set。Lunch set有配餐湯，另外每人一杯野飲。第一個係鐵板西冷牛扒伴薯菜，牛扒煎得少少過熟，但可接受。薯菜份量唔少，亦付上黑椒汁，食落味道不錯，整體份量亦幾足，食得飽！另一個主食叫左石鍋牛仔骨飯。牛仔骨有3,4塊，夠食，而且每塊都有醃過，味道不錯。另外飯份量亦好夠，加上黑椒汁，味道okay的。但係，黑椒汁份量唔多，只係撈到一半飯左右，其實嘅，就變得好乾。湯真係好似粥咁，唔使飲。…查看更多

每個過澳門玩嘅朋友都一定聽過呢間餐廳，就係大名鼎鼎嘅贏到粥。試過膽粗粗直接walk in，當然係無位啦。於是今次早一個星期上Facebook book位，終於book到了。溫馨提示：大家book位嘅時候可以留定手撕雞同埋卜卜蜆，咁就一定有得食。兩個人去無叫太多野食，叫咗一碟手撕雞同一窩卜卜蜆，另外叫咗少少配菜食卜卜蜆嘅湯底。卜卜蜆幾大盤，而且蜆唔係好細隻，全部都有中上嘅size。面頭有好多蒜粒。過咗幾分鐘，蜆肉開始熟，主要都係由中間嘅開始食起。湯底其實冇好多調味，主要都係食蜆肉嘅鮮味再加上蒜蓉嘅香味。唔錯嘅係每一粒蜆都會食到蒜蓉，啱晒鍾意食蒜蓉嘅朋友。手撕雞亦都好快上菜，雞嘅份量有半隻，Wasabi嘅味道好濃，而且有其他嘅配菜，所以食落好有口感。每啖都食到wasabi嘅香濃，喺食卜卜蜆嘅同時加上一份清新。…查看更多

餐廳經常好多人，不過翻桌率好高，所以每次等10分鐘內都會有位。每次想食芋圓都會照等！紫薯雪樂冰芋圓西米露，海記出名嘅一定係芋圓，所以每次黎都會食。呢度嘅芋圓係做成圓形嘅，咬落好彈牙，紫薯雪樂冰幾特別，食落幾重紫薯味，感覺足料，但係甜度太高，必須溝埋西米露同芋圓一齊食，而食到最尾亦會覺得太甜。淨豆腐花，望落有點兒碎，唔係特別滑，正常啦。其實唔落糖都OK嘅，因為佢本身糖水都有少少甜味，所以幾啱我戒緊糖嘅朋友。…查看更多

天仁飲就飲得多，但雪糕就未試過。今日入左赤柱放狗，天氣炎熱，所以買左杯綠茶霜淇淋試試。本身已經係綠茶嘅fans，所以對佢地嘅霜淇淋都幾期待。聽到杯雪糕要20幾蚊都嚇一嚇，不過原來有咁大杯都okay嘅。見到牌上寫綠茶霜淇淋係用日式煎菁精製而成嘅御選綠茶粉，色澤翠綠，淡雅清香，試過後覺得綠茶味幾濃，而且望落顏色幾不錯，但認真食嘅時候會發現雪糕唔夠滑，會食到少少粉狀嘅口感，有少少扣分，幸好味道搭救！知道佢地仲有岀鐵觀音霜淇淋，一於下次試下有無綠茶味咁香濃啦。…查看更多

食晚飯前有點餓，所以想喺街頭搵啲小食。行過見到呢間辣嗎？美食，有一堆人企喺度食野，於是行過去望下。辣嗎？美食有好多選擇，例如脆皮雞蛋仔，混醬腸粉，香脆夾餅，麻辣雲吞，魚蛋燒賣等等。我就叫左混醬腸粉加燒賣$13，超抵！腸粉係好滑的，而且每種醬都香濃美味，加上少少辣醬，超好味！而燒賣嘅口感幾好，有咬口彈牙唔會成口粉咁。可以選擇拎走或者企喺度食嘅，由於新鮮食實係最好味，所以我地買完就企旁邊食，見到大部分人都係食腸粉加燒賣或者魚蛋，可見係必食呢！…查看更多

又食元氣啦，點解食極都唔悶？因為佢地成日都岀新野啊！今次嘅新野叫做夏之味覺，期間限定由6月27日做到7月17日。試咗極辛三文魚卷同胡麻冷麵。三文魚卷新鮮，加上辛味，幾特別！胡麻冷麵嘅醬汁香濃，麵條爽口，唔會過淋痴埋哂，爽！另外仲叫左食開一直保持水準嘅野食。元氣嘅蟹膏幾重蟹味，所以叫左蟹肉蟹膏唔夠，仲叫左甜蝦蟹膏。另外叫左炙燒牛油熟帶子，個人鐘意食熟帶子多啲，味道更岀。小食方面叫左麵豉湯，日式海鮮燉蛋同帆立貝裙邊，味道永無失準，正！…查看更多

喺MegaBox附近工作嘅人就會知道呢間拉麵lunch Time永遠都超多人，想食嘅話最好就夜晚或者下午茶時間嚟。今日收工過咗MegaBox行街，見到餐廳唔多客人，所以就去試吓。樂拉麵同好多拉麵店一樣，麵可以選軟身，正常或者硬身，而每碗可以選豚腩同豚肩。我地叫左兩個櫻花蝦龍蝦湯拉麵，選咗硬身嘅麵，一碗選豚腩，一碗選豚肩。好快就上菜，一嚟到有幾香龍蝦味，但係望落湯底比較清淡，飲落都冇乜特別嘅味道。麵係個人鐘意嘅幼度，但都加唔到分，因為掛唔到湯，都係無味。溏心蛋普通，無乜味。連塊炸蓮藕都係淋嘅。一碗收$89，太多更好嘅選擇，唔會再食。…查看更多

喺莦萁灣附近食完飯意猶未盡，所以同朋友入左間舊式小食店坐低再傾下計。我從來未聽過呢間店，但朋友就話呢間舖好岀名，入到去見到牆上好多店主同明星嘅合照呢！叫左一個魚肉碗仔翅雙拼同一份魚肉燒賣。魚肉碗仔翅雙拼十分足料，最鐘意佢地將冬菇切得好大塊好厚，食落好有口感，唔會好似飲緊水咁，加上木耳等配料，正！另外嘅魚肉燒賣，同平時街邊買到嘅燒賣好唔同，因為真係好有魚肉味，咬落去就知唔係得粉造成，係有真正魚肉，推介比鐘意食魚嘅朋友！走嗰陣仲買左杯椰汁，幾香濃，唔水，可以一試！…查看更多

相信飲開天仁嘅人，呢排都見到有人拎住一杯好紅嘅飲品，原來係紅龍果綠茶，一向對天仁嘅果汁類綠茶好有信心，平時最鍾意飲香橙綠茶，今日就試吓紅龍果綠茶啦！見到店員用新鮮嘅紅龍果同綠茶打埋一齊，好快就有得拎啦。飲落去發現都幾甜，但係我已經叫咗7分糖，即係話紅龍果本身都已經有足夠甜味，怕甜嘅朋友建議你可以叫半糖添。飲落有好重嘅紅龍果味道，可見非常足料，亦有淡淡的綠茶香！味道清新亦能解渴，向大家推介呢款新產品！…查看更多

Starbucks成日都會出新野，今日有時間坐低等等朋友，所以就試吓佢哋呢排出嘅新野。見到有士多啤梨星冰樂同埋士多啤梨冰茶，標榜嘅係用新鮮原粒士多啤梨去打，於是叫咗杯士多啤梨冰茶試下。等左5分鐘左右就ready啦，飲落去幾重士多啤梨味，但係茶味就飲唔到，比較似係士多啤梨汁多過士多啤梨冰茶，所以有點失望。見到有人叫士多啤梨星冰樂，相信杯沙冰同埋cream味道會比士多啤梨冰茶出，唯有下次試吓士多啤梨星冰樂啦。…查看更多

呢間餐廳位於深水埗，但唔係近黃金嗰頭，而係近布街，附近唔多餐廳。望到門口就知值得期待！午餐時段有多過10個人喺門口，而且外賣都有3,4單，可見餐廳非常熱門。最岀名嘅係豬潤麵，所以叫左一碗，再加牛肉。叫左麵生，而且豬潤每舊都好大，食落啖啖肉，亦同一般嘅豬潤唔同，非常爽口，無腥味。牛肉就正常啦！食完就明白點解會吸引到咁多人啦！另外叫左一份油占多。牛油同果醬嘅份量剛好，多士烤得香脆，非常可口。配埋檸檬可樂，一個字，爽！…查看更多