ninjaming的个人专页

我同啲朋友一向好鐘意周圍食好野，雞煲來講都食過幾間，但食到呢間之後就無再轉過。無他，佢最好食，仲要任添呢下屈機。去第間逐樣計，一班人叫一個全雞煲，加少少火鍋料一般都百幾蚊落樓。呢間一個價錢，150蚊，雞煲火鍋全部任食，仲有汽水任飲仲有雪糕任食，真係抵過食放題。味道方面每次都保持水準，雞煲個汁好惹味，香料夠香，雞夠滑，煎起上黎香味四溢。我地四個人加埋食左6、7round雞煲無黑面，加埋火鍋料，自己煮分分鐘都要呢個價，其實我都唔知佢賺咩😂。不過有個矛盾就係無得一路食雞煲一路打邊爐。你一加水，之後再叫雞煲，一倒落啲湯咁啲雞汁就洗走哂無咁好味。咁嘅情況識食一定唔會加水打邊爐，就咁落啲火鍋料用雞煲汁煮。有咁惹味嘅雞汁，嗰啲豉油呀沙爹醬通通唔需要點。老細都讚我地識食，佢都話雞煲一定係咁食，十個客得一兩個識食。就憑佢呢句，平時有好野我一定收埋收埋，今日就破例為你寫個食評啦。當然都要真係好食我先會俾好評嘅。唔好意思我吹大左，我個acc無咩級數，但我自問係一個嘴刁又識食嘅星級食家。但我真係會幫你寫食評希望你唔好介意！其實我本身去開大角咀嗰間，點知去到唔知裝修定執左，你唔會明白我當時有幾傷心，好彩上網search仲有呢間分店，第一次黎食，水準一樣好。可以改善嘅地方就係其實我想食多啲洋蔥，洋蔥索左啲雞汁黎煮，自己又有洋蔥汁嘅甜味，根本洋蔥先係成個煲嘅精華！可惜我問左好多個伙記都話唔俾加，咁奇怪嘅，雞咁貴就可以任加，洋蔥反而無得加。最後我死心不息問多次先有個靚仔哥哥加多少少俾我。如果下次食可以加大量洋蔥就好啦！ …查看更多

因為某啲原因，我都上唔少女僕cafe。我成日覺得如果你係為左食物而上女僕cafe就算吧啦⋯因為試過咁多間，整體俾我感覺第一就係好貴，差不多要近200蚊落樓，第二就係好難食，你可以去同一間野點同一樣野食但可以次次唔同味，好似擦擦卡咁你永遠唔知會抽中咩俾你食。第三亦都係最重要就係永遠唔夠飽，你點都估唔到俾成200蚊都可以食唔飽。所以去女僕cafe講到尾主角都係女僕。但其實我覺得佢地重點擺錯哂，一間餐廳無論係咩主題都好，食物先應該係主角。講返正題，呢間A.T. Field 首先環境方面啲嘈，有部電視係咁播動畫，如果想似一般cafe咁靜靜睇下書可能你會失望，但我可以話你知一般女僕cafe都會有啲嘈，總有一枱毒撚係附近大大聲玩遊戲傾計，但相對地都幾有家嘅感覺，有時三五知己上去嘅話又唔洗太怕嘈親人，有時岩咀形嘅走埋去隔離枱玩都無人會話你。話就話限坐兩個鐘，但過左鐘都無人趕你走，呢一點比一般女僕cafe寬鬆。食物方面我覺得中上，每次食都可以煮返同一樣野出黎我覺得抵讚，特別係廚師推介簡中會有啲新菜色水準唔錯，最近試左個蘋果燴飯，畢起飯粒之間會有啲糖絲痴住好得意，呢個菜係出面未食過，作為女僕cafe可以係菜色方面有突破好難得，唯一可改善嘅係落油有啲重手，浪費左蘋果應有嘅清新。出餐速度ok,唔算慢。抵讚嘅係份量都算唔細，仲有絕大部份嘅飯或意粉竟然可以加底！仲要只係加兩蚊！大食嘅可以加個底甚至加兩個底，保證食得飽。唔洗俾人老屈叫多個餐，呢個褔利一般cafe都唔會有。價錢方面，叫個飯叫杯野飲，一般都係百零蚊，其實都算公道，一般cafe無女僕招呼你都差唔多呢個價，但食物又可以，唔會差過加勒比海。女僕方面就各花入各眼啦，我唔敢講話個個都model咁靚，但次次去都總有一兩個靚女嘅～最重要係佢地都幾好笑容，有時見你一個人坐係度悶悶地都會主動過黎撩下你傾計，或者玩下遊戲咁，幾好笑容幾熱情，呢方面滿意。特別有個叫Vivi嘅真係好kawaii 。平時都見唔少熟客經常上去坐下，因為價錢ok, 食物唔錯，女僕又可愛熱情。有時一個人，weekend無人約，都係想搵個朋友傾下計消磨下時間姐。因為上呢間cafe而同其他客混熟左，識到幾個朋友係意外收穫。完。…查看更多