keung303的个人专页

網上見到唔少讚好食評就專程去試下，唔知係我唔好彩定係有啲人收咗著數，個人評價就真係好差囉。我哋兩個人午餐叫咗兩份 set，分別係日本宮崎和牛漢堡扒配黑咖哩蛋包飯，呢個餐另加$98配咗個北海道帶子虎蝦海鮮配茶壺龍蝦湯；另一個餐係吉列豬扒配日本黑咖哩蛋包飯連基本餐湯，兩個餐都有甜品同餐飲。首先講個龍蝦湯，摸落個茶壺仔嗰時只感覺微暖，倒落個有帶子同蝦嘅碗時完全冇煙嘅，碗內海鮮係凍嘅，結果成碗湯跟本就係室溫，已經同美味講唔上關係；吉列豬扒又鞋又柴乾爭爭，和牛漢堡冇牛油香亦冇乜牛肉味，啲飯亦都唔熱之餘又濕又爛，難食到一個點！只能講就係啲黑咖哩味道叫做正常，但都係唔熱嘅！最後講埋個“甜品”，原來就係旁邊嗰塊曲奇餅，冇嘢好講，只係一塊非常唔好食嘅曲奇餅。最後埋單差不多四百，唯一可取之處就係三個鐘免費泊車，食完同女友慢慢行吓順便買咗幾件衫。…查看更多

朋友介紹，雖然有啲遠但都去試下，可以講係不枉此行。清湯蘿蔔牛腩煲：湯底清甜，牛骨香氣濃郁，未開始已喝了兩碗；牛腩非常入味，淋身唔柴口亦沒有渣，就算肥膏都是滿滿的牛油香，一絕！手打鯪魚球：幾乎是我食過最好嘅，肉質既滑又彈牙，口感是我喜歡比較結實嘅一種，最怕就是有啲店啲鯪魚球雖是滑的，但口感似綿花，咁就唔係純正鯪魚球了。豬膶併粉腸：豬膶亦係我食過最好之一，每片都厚實飽滿，淥一分鐘左右就得，入口爽脆彈滑，不得了！但粉腸就相對遜色，主要是無論怎樣淥都是比較韌口，還好新鮮度滿滿，所以味道是非常好的。鮮蝦水餃：難得蝦味濃郁，餡料有大地魚粉，所以材料是水餃，但食味有點似雲吞，個人是欣賞嘅。儘管幾乎爆滿，但兩位姨姨啲服務都好熱誠，有問必答之餘更笑面迎人地提供意見，香港已好少見；呢間店我會繼續幫襯，大推。儘管幾乎爆滿，但兩位姨姨的服務都很熱誠，有問必答之餘更笑面迎人地提供意見，香港已很少見；這店我會繼續幫襯，大推。…查看更多

今天偶然路過，和女朋友叫了一份二人套餐，包括半隻去骨海南雞，一碟咖哩豬扒，兩碗雞油飯，兩碗湯，一碟菜，另外加錢要了兩杯特飲。海南雞皮脆肉嫩，雞是腌過表皮的，非常冶味，很久沒吃過這樣出色的海南雞，雞油飯算中上，菜乾湯是老火的，咖哩豬扒更是驚喜，豬扒嫩滑，咖哩既香且辣，忍不住外帶回定明天再吃。埋單二百多一點，個人覺得非常超值。這家店雖然在彌敦道鬧市，但品質絕對不是只做遊客生意，非常有誠意的一家食肆，大推。…查看更多

今日同女朋友去食午餐，本來想試佢哋個自家手工 pasta，可惜冇貨，唯有兩份 all day breakfast，套餐要咗沙律，餐飲再講。沙律非常新鮮，個醋非常冶味搶口，我就好鍾意。呢個 all day 算係我近來最好食嘅，內容雖然大致上都係嗰啲嘢，但就每個材料都有用心去做，唔似好多餐廳就係將唔同食材放上隻碟就算數，值得一提就係啲煙肉，一啲都唔咸仲要越𡁻越有煙肉香，冇得彈。至於飲品，女朋友要咗個特飲，因為食套餐所以半價，但我只係要齋啡，熱嘅唔使錢，但凍嘅要補$21，呢樣就有非常過份，希望餐廳可以改改佢啦，有冇離譜啲！…查看更多

網上大推，今日專程揸車入馬鞍山試下，不試由至可，一試把鬼火！叫咗 Signature Sick! Burger 撚手牛肉漢堡，黑啤蔥油洋蔥圈及金沙黃紫菜薯條。首先間店比我想像中細，只有5個座位，冇問題，反正我都鍾意幫襯小店，入到店內一陣濃烈油煙味，心諗食完返屋企即刻要沖涼洗頭，都算，裡面周圍放咗好多澩澩嫪嫪嘅嘢，同埋周圍都好污糟，印象分基本己經係零！漢堡包：樣就靚呀(不過睇樣個包唔係新鮮嘅，食落去都覺得係尋日淨底)，但全個包由上至下都係室溫，包括件差不多一公分厚嘅漢堡牛肉，煎蛋，煙肉，同埋麵包，全部都係室溫，差過老麥！件牛肉漢堡唔熱之餘可以講係完全冇牛肉味，如果佢肯煎香吓效果應該唔同啲，可惜完全唔用心制作，神仙都救唔返，食完個袋剩低大約1-2湯匙嘅汁水，可以想像食緊嗰時幾論盡，最後我係用叉食嘅，因為用手食唔到！印象中係我食過最差嘅漢堡包，沒有之一。黑啤蔥油洋蔥圈炸漿偏厚，但因為偏厚反而夠脆之餘仲有啲咬口，炸漿味道調得唔錯，但跟餐36蚊得三條似乎真係貴咗啲，但考慮到個食味係接受嘅。金沙黃紫菜薯條都係跟餐嘅，但呢個份量就相對驚人，但問題呢，唔好食嘅你俾一桶我都冇用！咸蛋黃味太重完全冇薯仔味，最慘係炸得過火，部份仲似係翻炸過咁，乾得嚟開始收身，因為薯條表面都係咸蛋黃，所以極其索油，最後個結果係，外面油淋淋，裡面乾噌噌，難食到一個點，最後只食咗兩三條就唔食。口味的確好個人，但啲基本嘢都做唔到就真係好離譜囉！…查看更多

見過不少所謂 KOL/foodies 介紹過呢間，終於去開旺角就試下，排咗約20分鐘入座。兩人點咗三味餸，分別係招牌牛柳牛丸河，越式三文治及燒肉丸米紙卷。招牌牛柳牛丸河，話係招牌當然有期望，何況咁多 foodies 都話好食。湯底：真心認為好普通，唔夠清甜，牛骨味亦唔夠，唯一可取係夠熱；河粉：香港大把新鮮河粉供應，但佢哋就選擇用乾貨，成本考慮？大佬，你碗粉賣$105喎，非常失望；牛柳：真係得啖笑，啲牛肉碎到整碎牛粥都得，你話係牛柳，我就話係下欄嘢；牛丸：非常普通嘅貨色，又係嗰句，你碗粉賣$105，攞貨都攞啲靚貨好卦，唉！越式三文治算係正常發揮，法包唔係靚嘢，但尚算外脆內軟，餡料正常，唯獨鵝肝醬用好差嘅貨，完全沒有丁點鵝肝香味，長沙灣有間外賣店好過佢哋10倍，但平一半。燒肉丸米紙卷最大嘅問題裡面並非真正肉丸，係圓條形開半，中間有條坑，並非肉丸，又係入埋啲垃圾貨，完全冇口感完全冇香味，其實肉丸自己整自己燒香去真係好容易。呢間餐廳俾我嘅感覺就係呃錢，貴唔貴當然見仁見智，但$105一碗粉應該冇人會話平，你收得咁嘅價錢就應該交足功課，你廚藝幾叻都好，如果你用埋啲劣質食材根本唔會有好嘅出品，但我亦睇唔到佢哋有乜嘢出色廚藝；日排夜排可能唔係好多香港人識越南菜，所以俾佢哋呃到。…查看更多

網上評語靠不住！叫了一碗蕃茄濃湯豬潤銀針粉及油渣麵，豬潤銀針粉算不過不失，豬潤是新鮮的，有些少酒香而沒有太多薑味，這是我喜歡的，雖然是新鮮豬潤但卻並不算很爽滑，煮的時間略為久了一些吧，所謂蕃茄濃湯並不濃，蕃茄味薄弱沒層次，主要應該就是湯頭並不是什麼好貨色！豬油渣麵就是伏，上枱時迎面而來就是冬菜及香菇味，但湯頭極普通基乎就是咸味之外其他欠奉，上海麵本身乏善可陳，些少豬油渣非常爽脆但不香口，坦白講半價都不值，跟大角咀那家相差不止一個天地！…查看更多

睇影片分享平台某飲食頻道介紹，專做私房火鍋同埋西餐餓媽家姐，講到間店點有 heart，素來最欣賞呢樣嘢，一於試吓。西班牙海鮮湯唔夠香濃，似乎用咗啲瓜蓉，所以口感唔滑亦唔厚，西餐嘅濃湯羹係應該愈滑愈好，鬼佬叫 creamy，呢個湯望落去夠杰㗎，但口感水汪汪又一粒粒。月式蒜蓉包超好食，不過呢啲係交返嚟，唔係自家烘焙。蕃茄什菜沙律第一度菜就係沙律，一上枱見到個沙律就知今餐已經中伏！錢大媽10蚊一大袋貨色，都算，沙律汁自家調製都好卦，又係超市20蚊豉油咁大支貨色，唉！JIM 炸雞翼大快活下午茶餐隻炸雞翼好味過佢，死未？薯條併黑松露醬薯條好食，外脆內軟有薯香，不過都係來貨，只可以話炸得唔錯！香煎北海道帶子配日式麵豉汁帶子半成熟(一成都冇)，問佢佢話係咁，西餐通常唔食生帶子，除非你餐牌講明，不過你話係咁都冇計，面頭用麵豉汁煎過下，些小咸，帶子原隻比較厚身，故此幾乎冇乜味道。下面有一件沾咗脆漿嘅薄片炸物，睇落似蓮藕片，但油溫控制差，一咬成口油，都感覺唔到裡面係乜。法式牛油汁焗蟶子蟶子冇貨唔出聲，上枱先講係北寄貝，個売就熱到不得了，但粒北寄貝只係室溫，水汪汪冇味道。慢煮南非鮑魚配牛油肝汁眼高手低，想複製日本磯煮鮑魚仔，但一成都做唔到，味道不倫不類，口感寡到一個點，索性去海洋三(唔明就問黎明)入貨效果仲好。烤美國頂級封門柳柴，只食咗兩片蒜香茄汁蝦意粉啲蝦超級爽，因為啤水啤到完全零蝦味(大佬，有壳蝦都冇味真係大鑊)，意粉佢想做 al dente，可惜口感係生嘅，亦冇蕃茄味，唔知佢想點。甜品唔錯，不過都係來貨嘅總結：叫返嚟嗰啲都唔錯(蒜蓉包薯條甜品)，自己做嘅就出哂事，對西餐似乎一知半解，都係俾心機做返火鍋算啦，何必吹到咁大，完。…查看更多