lamslams25的个人专页

此店位於地鐵站附近的力生廣場內，場內滿是印尼店舖及東南亞人，所以需經過一番擠迫才能進入食店。由於光顧時間尚早，店內只有一枱食客。餐廳裝潢富泰式風格，但又帶點森林感覺，頗特別。食物種類不少，價錢大眾化。由於食客不多，上菜十分迅速。 Blanc1664生啤($38) 帶有果味的生啤，感覺清新。青咖喱牛肉($58) 牛肉已被梳打粉嗱至淡粉紅色，完全沒有肉香及質感。青咖喱香料味道頗重，但欠缺椰香，味道帶甜。質感較稀，不夠濃郁。冬陰功炒飯($48) 雖然顏色很橙，但只帶有淡淡的冬陰功味道。沒有冬陰功的酸辣刺激感，相反甜味較重。配料方面不錯，有不少蘑菇及鮮蝦。飯則略嫌淋了點，亦缺乏鑊氣。串燒﹝雞、牛、豬﹞($30) 每片肉也四四方方，相當工整。燒烤感不重，相信肉是先烹調至熟後才將表面微燒。肉質腍而入味。沙爹醬不夠濃郁，有點稀。燒雞翼($13) 香口入味，皮微脆，整隻雞翼也熱辣辣，可算是整晚最出色的食物。飯後有甜品奉送，味道不過不失。 整體來說質素只屬一般，食物大多不太熱也沒有鑊氣。店員服務也不太親切，奉上菜時總感覺是突然“拋”於枱上便立即離去。難怪於星期日晚也沒有太多食客光顧。…查看更多

稻香也順應潮流推出麻辣雞煲，為了加點特色，雞以外加了豬軟骨，同時贈送6罐啤酒，此舉更能吸引男食客光顧。星期六晚約8時，雖不至於大排長龍，但確是坐無虛席。此店面積頗大，枱已放至密麻麻，不難發現櫈貼櫈的情況。店內設有自助醬料及飲品吧，提供多種醬料如日式麻醬及麻辣醬等，食客出入不停，令環境更添熱鬧。熱辣豬軟骨雞煲（$88） 這次是為雞煲而來，甫入座便先點雞煲。不久店員已奉上雞煲，鍋子不細，為令賣相更有睇頭，雞及豬軟骨外還加了不少魚肉豆腐。煲內配料份量不少，而且相當濃郁及入味，初吃時較重麵醬的甜味，慢慢湧出川椒八角的麻辣口感，愈吃愈惹味。不過再吃多了卻嫌味道有點過濃，是時候加水了。火鍋料選擇不少，部分更有半份供選擇，十分貼心。肥牛及餃是必選項目，加上半份嚮鈴、蟹柳及雪花蚌，又是肚滿腸肥的一餐。安格斯肥牛（$88） 賣相尚算不錯，但每片頗薄身，口感欠奉。慶幸肉質軟腍及帶有微微牛香，以這價錢來說還不錯。雪花蚌（$58） 還是初次點雪花蚌，每片一口份量，質感煙韌有咬口，帶有淡淡鮮味。嚮鈴半份（$10） 只是一般在市場售賣的質素，不脆也不香口，有點失望。水餃半份（$24） 皮厚餡也不豐富，肉太多，欠缺鮮蝦木耳所能帶出的鮮味及口感。韭菜餃半份（$24） 也是皮太厚，餡料易散，韭菜及肉的份量尚算均勻。雪場蟹柳（$28） 也是一般市場售賣的貨色，雪味略重。整體而言還算不錯。縱使火鍋料是一般貨色，雞煲倒是有點驚喜。但奇怪是整晚不斷加湯後味道依然相當濃郁，不知用了那些秘方烹調。另外，自助吧枱上的飲料甜品均是預先包裝，由店員refill，感覺不太新鮮。於營運成本不停上漲的情況下，相信新鮮製作的食物將愈見珍貴。…查看更多

天氣漸涼，來一碗熱騰騰的酸辣米線確是相當窩心。坊間米線食店愈來愈多，就以這「黃色招牌」的雲南米線也為數不少。雖然各店的招牌設計、店內裝潢及餐牌均十分相似，店名卻有「雲桂坊」、「雲桂川」、「雲南過橋米線」之分，而且各店食物質素各有參差。到此店定必選擇小鍋米線，由於辣度不穩定，故只選中辣，不夠辣時可自行加辣油調味。配料方面，推介腩肉，另外選了豬軟骨及大腸。  某些分店中辣已很搶喉，此店的辣度則較溫和。湯底濃郁，微酸中帶甜。配料份量不算多，每款只有3-4小片。腩肉是我每次必點的配料，每片均是薄薄的，8成瘦肉、2成脂肪，肉質軟嫰，味道香濃入味，醬汁令湯底變得更惹味。此店的腩肉可算是眾米線店中最出色的一店。豬軟骨肉質則較鞋，當中的軟骨亦比較硬。大腸烹調時間不夠火候，仍是有點韌，不夠入味，還是太子貴香園的大腸更出色。至於米線方面，略嫌有點淋，不夠爽口。此店最值得改善之處是食物水準的穩定性。光顧了數遍，每次質素總有參差，能否吃到美味米線也有點靠運氣吧。…查看更多

很享受假日可跟家人一起上酒樓飲茶，但現在已有點厭倦一些連鎖酒樓擠逼的環境、服務員可怕的態度及每況愈下的食物質素。聽說某些酒樓已將點心製作轉至國內工場進行，所以點心不夠新鮮，不知此事是否真確。想找一間好一點的酒樓，想起家附近的不倒翁好像也有茶市，於是立即訂枱。到不倒翁大多是火鍋，飲茶卻是第一次。之前曾光顧此店，總覺食物質素次於尖沙咀及銅鑼灣店。環境方面倒不錯，裝潢以木色為主，富日式風格之餘亦高尚雅緻；座位寬敞，坐得舒適。預約時向店員表示因有BB同行，故希望座位遠離出入路口位置，店員亦能安排，十分感謝。此店店員服務比銅鑼灣店優勝，雖然還稱不上殷勤，但總比該店有禮得多。點心選擇不多，也沒有花巧美點，大多是一般大眾化的食物。價錢不算太貴，由小點$20.8 至特點$35.8 。由於此店為中日式食店，點心以外有壽司刺生提供。  黃沙豬膶腸 皮雖不算薄，但倒是頗滑及帶點煙韌；豬膶切成粒狀，軟滑爽口。兩者配拾得宜，口感不俗。金珠咸水角  賣相不太吸引，看上有點油膩。皮鬆化，外脆內軟。餡料份量一般，肉碎帶少許醬汁，頗惹味。奶皇流沙飽 餡汁帶淡淡蛋黃味，不算濃郁，也不夠流心；飽卻頗軟熟。潮式蒸粉果 皮製作得不錯，晶盈通透且煙韌彈牙；餡料也豐富。鮮蝦燒賣皇 火鍋時我必點燒賣餃，所以對此店的燒賣也絕對有信心。粒粒非常飽滿，蝦鮮味彈牙，配以適量豬肉，更能增加口感及鮮味。烹調時間適中，能保持肉汁。鴕鳥肉炒河 份量十足。鴕鳥肉每塊都頗大，腍身但略欠肉香。河粉幼滑，差不多每條亦分開，不會叠在一起，但又不覺油膩。獻汁帶醬油蠔油味，但淡了點。除點心外，最欣賞此店的XO醬，有大量瑤柱及有點辣椒，鮮味中帶辣，十分美味。午市比晚市更多人，最好先訂枱。店內細枱較少，但店員毫不計較，即使4人也會安排入座大枱。整體來說各方面質素不錯，午市還有甜品贈送，為今個weekend作一個好開始。…查看更多

呢間餐廳喺大埔已好一段時間，總覺店名及店外怖置好特別，今日終於有機會一試。甫入店後感覺裝潢似曾相識，木色檣身及餐枱、黑色梳化及牆上大電視；再細看餐牌，竟然跟附近海星相同。店員奉上餐紙刀叉，原來真是海星，只是用別名另設食店而已。兩間餐廳同樣提供印式咖喱、大碗飯及麵餐，呢度更有焗飯可選擇。餐牌標題十分有心思-啖啖滋味 香脆無比；warmth & crispy，如此吸引，便點了焗豬扒飯。奶油豬仔飽起初並未為意飯餐包括奶油豬仔飽，店員奉上後才看到menu原來已寫上。麵包外脆內軟，焗得十分有水準；包面掃滿煉奶及牛油，每口也甜蜜蜜。相信這就是香脆無比的意思了。茄汁焗豬扒飯賣相吸引，剛奉上時可看到茄汁仍在沸騰，可見食物焗得相當熱。飯面滿佈茄汁，味道濃郁中又帶點酸甜。有少許芝士作點綴，但芝士味不太濃。豬扒亦烹調得很出色，表面沾過薄薄的蛋漿微煎，香口有口感，肉質亦嫰滑，味道不錯。整個飯焗得透徹，由外至內亦熱辣辣，但若是炒飯底相信更美味。甜甜嘅奶油豬再加熱呼呼又美味嘅焗飯，食完相當滿足。加上整潔骨子嘅環境及服務態度友善嘅店員，絕對值得再光顧。…查看更多

傷心酸辣粉擴展迅速，由最初只係設店於深水埗至現在遍佈全港有十多間分店。分店數目增加，食物種類亦較以往多。現在竟然有丁麵提供，雖然感覺有點奇怪，但都想試一試味道如何。繼較早前嘅豬膶麵後，現推出麻辣一丁，有湯及撈麵選擇。今次揀咗湯麵，小辣。主要以肉碎及花生作配料，惹味嘅同時亦帶來多種口感。丁麵一向都好食又彈牙，但今次有點煮唔透。湯底小小麻，但太淡，未能帶出川味；幸好桌上有豉油辣油，只是各加了點，即時惹味得多。整體來說味道不過不失，不過要留意嘅係點內環境及衛生，還有店員服務質素，此店呢幾方面都需作改變。其實有多啲選擇都係好事，只要味道吸引，總能吸引消費者光顧。…查看更多

呢排頻頻外勤，多咗機會先嘆個早餐再作戰。今日要去荔枝角開會，一出地鐵站有間幾大嘅茶餐廳，一於入去試吓。除咗有西式早餐外，亦有點心可選擇，而最特別係有阿姐推架點心車周圍行，完全冇諗過喺茶餐廳見到呢個情景，非常有風味。點心雖吸引，最後都係揀番我最愛嘅沙嗲牛麵，配餐飽及餐肉煎蛋，加埋凍飲，只係$26。堂食仲有蛋撻送，不過送完即止。食物好快送到，真係有蛋撻，非常豐富。蛋撻係曲奇皮，也不錯；飽就係一般餐飽仔。沙嗲牛肉麵沙嗲牛好黑，有少少懷疑沙嗲醬嘅質素。不過沙嗲味挺濃，拌勻後整個麵也充滿沙嗲味。牛肉腍身，麵亦不過不失。餐肉煎蛋煎蛋賣相有啲差，餐肉都係standard貨，ok啦！店內環境裝潢雖然唔新，但尚算乾淨；茶餐廳嚟講呢度算好大，有卡位亦冇嘜油煙味，hea吓都唔錯。…查看更多

已有好一段時間沒有到美孚，印象中這裡食肆不多，所以也沒花心思選擇食店，只是隨隨便便走進其中一間茶餐廳，吃過早餐便開始工作。食店沒有開揚的廚窗，甫進入店，感覺有點舊及不太乾淨，亦有油煙味。店內大部份都是大圓桌，即使吃早餐也要搭枱。每次吃茶餐廳的早餐只會選擇沙嗲牛麵，這次配煙肉炒蛋。等候中，突然有點事情需外出一會，幸好店員也容許我在沒有付款情況下離開片刻，回來後才進食。麵條起初有點硬，但過一會已ok，只是溫度有點不夠。沙嗲味不算濃，牛肉則為一般被梳打粉嗱過的滑牛。煙肉有點黑，似乎用於煎炸食物的油已翻用過數遍。炒蛋則太薄了。雖然各方面只屬一般，多士倒是不錯，十分脆口。整體來說不過不失，但環境則需多作改善。…查看更多

家姐話想食蒸飯，諗起呢間點心店好似口碑唔錯，所以就到呢度買外賣。星期日下午一時多，店外已有人龍。廚窗外貼上一些得獎報道，好似真係好掂咁。門外有menu紙，有齊中英日文，十分國際化。點心價錢二十多元一碟，也算大眾化。選擇了兩個蒸飯，兩個點心，店員話等候時間約15分鐘。周圍逛逛，已20分鐘，仍未ready。比我遲來嘅人已取外賣，真係開始有點不耐煩。25分鐘、30分鐘、太耐了吧！已多次向店員查詢，竟然現在說由於其中一款蒸飯賣完，所以翻蒸需時，建議我轉另一款⋯最後等咗35分鐘花菇滑雞飯﹝$24﹞講真，真係毫無特別，跟一般蒸飯無異，唔明點解、亦唔值等咁耐。雞柳雖滑，但缺雞味；飯亦有點淋。章魚肉餅飯﹝$24﹞肉餅冇嘜口感，該是加入太多粉了。幸好還有章魚粒，尚算有點咬口。蜜汁叉燒腸﹝$21﹞皮較厚，只有少量叉燒，叉燒亦略乾了點，不夠蜜汁。蟹籽燒賣皇﹝$23﹞得獎嘅話相信只有呢個燒賣。每粒都餡料十足，以鮮蝦為主，配以少許豬肉；蝦彈牙，亦冇肥豬肉，真材實料，味道不錯。儘管燒賣唔錯，但其餘的點心只是好一般而已；加上店員如此待客之道，實在不值光顧。…查看更多

烹調咖喱是一門學問，品嚐咖喱也算是藝術吧。到訪不同咖喱店，做法各具特色，透過加入不同香料，每次品嚐總具新鮮感。而且並不是貴才可嚐到美味咖喱，很多十分大眾化的咖喱店也能烹調出令人回味嘅味道。生龍清湯腩喺大埔設了分店，經常坐無虛席。店面裝潢整潔新淨，食物種類亦不少，除了清湯腩外，有不少飯麵小食供選擇。巴基斯坦咖喱亦是招牌菜，聲稱以30多種香料及秘方配製而成，有大中小辣之分。咖喱雞扒飯-大辣一碗滿滿嘅咖喱汁，雖然唔屬於稠身的醬汁，但可看見汁內有不少香料及洋蔥蓉。先嚐一口，感覺唔太辣，但確有濃郁香料及咖喱味道，味道複雜有層次。正當我打算加點辣油之際，一股辛辣的aftertaste慢慢湧現，而且愈吃愈辣，相當刺激，十分滿足。雞扒有一大塊，微微煎過，調味適中，唔會搶過咖喱味道。飯軟硬適宜，配合咖喱汁吃，真是啖啖滋味。以呢個價錢及質素，難怪吸引不少食客。個人認為呢度嘅咖喱比國際咖喱館更美味，但當然種類則不及國際繁多。…查看更多

呢度原先係中興酒店，遙身一變已變成如今嘅彩虹酒店。途經時被酒店外嘅餐牌吸引住，想唔到喺呢啲舊區內也有意大利餐廳。但原來餐廳內有標示表明此並非酒店經營之餐廳，絕對是獨立營運。沿酒店內樓梯步上一層便是Oak Tree，裝潢比想像中更富格調，最特別係吧枱內嘅大焗爐，加上有兩位外籍廚師坐鎮，頓時意式風情大增。場內亦有人唱live，氣氛不錯。到訪時8時多，店內約8成滿，不乏一家大細嘅訪客。食物選擇唔算多，意粉或薄餅等約百多元；扒類則二百多至三百元，價錢不算便宜。晚市有set dinner，包括生蠔、沙律、餐湯、主菜、飲品及甜品。兩個人，點咗一個set及pizza，另外加一杯白酒。餐飽好香，表面滿是煙肉粒及香草。不錯。生蠔雖然較細，但尚算新鮮及清甜。凱撒沙律醬汁有點稠，味道怪怪的；蔬菜太濕身，有點梅的感覺。碎芝士味道不突出，麵包粒也是淋的。此時開始感覺不妙，連最普通嘅凱撒沙律亦做唔好，真係professional極有限。龍蝦湯呢碗小小龍蝦湯嘅等候時間頗長。溫度足夠，味道濃郁中又帶點酸，可惜沒有配料及略咸了點。不過我還是覺得pizza hut的龍蝦湯較美味。辣肉腸薄餅賣相一般，感覺較乾身。餅底尚算脆口，味道適中；但只有薄薄一層芝士及每件薄餅只有一小片非常薄嘅辣肉腸，口感只是一般而已，並未能令人回味。燒美國牛柳伴碟嘅竟然係茄汁意粉，感覺猶如食緊較高級嘅快餐。牛柳雖腍，但沒有質感及略欠肉味，相信是用了梳打粉吧。鵝肝香口及能保持juicy。雖然味道不錯，但真的不能接受食物嘅溫度⋯連暖都稱唔上。難道牛柳及鵝肝不是即煎的？真係忍唔住向店員反映。但，再拿出來嘅食物，只係喺我哋已切開嘅牛柳上再加上汁，而食物一樣係有點涼⋯再次向店員反映，然後奉上嘅食物連配拾都變埋。鵝肝及意粉變成一球薯蓉，慶幸今次牛抑終於變暖了。雖然牛柳暖了點，我哋有點懷疑這就是7成熟嗎？芝士蛋糕非常mini，冇芝士味，質感跟「蛋糕」一樣，真的有點奇怪。細心觀察下，感覺除了大焗爐及兩名外籍廚師令餐廳具意式風情外，整體店員及食物質素只屬普通水平而已。尤其是店員，真的很「茶餐廳」。食物價錢不算便宜，若決定走中上路線的話，真的要好好改善。…查看更多

之前試過呢間餐廳，感覺良好，今日又去灣仔，於是乎再度光顧。呢度係於灣仔橫街內嘅小店，店內只有約5張4人枱。除1人係香港人外，其餘都係泰藉店員。本人比較鍾意幫襯呢類形嘅泰菜小店，感覺比連鎖餐廳正宗。比起其他連鎖店，呢度十分抵食。午市主要提供炒粉麵飯，約$40一碟，小食亦只係$30一碟。加$6有冷熱飲品。晚市則有小炒提供。香辣肉碎炒河（$40）即叫即炒，新鮮熱辣。河粉非常粗身，食落更有口感，而且不覺太油膩。配以肉碎及香葉，帶點惹味。調味以醬油味較突出，若能以更多香葉烹調，味道定必更佳。青咖喱炒飯（$40）飯炒致乾身，軟硬適中。配料有雞柳、茄子及豆角等。雞柳味道較淡、茄子爽口；奈何青咖喱味不足，只能靠少量香葉帶出惹味口感。炸洋蔥（$28）有別於平時喺西餐廳食嘅炸洋蔥圈，呢度所用嘅脆漿較硬... 其實有點過硬，小心牙硼。洋蔥太幼及薄，未能食出洋蔥嘅清甜。跟以往一樣，所有出品均即叫即做，保證熱辣及有鑊氣。店員態度亦親切友善。但今次覺得食物比上次好像稍遜一點，相信主要係香葉味道弱了點吧。…查看更多

可以喺返工前去茶餐廳食個早餐確係賞心樂事，奈何揀錯咗茶餐廳就冇得怨人。是日去西環開會，特登早啲到去附近嘆個早餐。平時好怕啲油煙味好勁嘅餐廳，經過呢度見環境唔算差又有卡位，所以就入去充吓電。入到去發現好多食客都係國語人。早餐來來去去都係得幾種，沙嗲牛係我嘅favourite，雙併埋豬扒，配熱檸水。雖然係簡單麵餐，都要等約8分鐘。碗麵睇落冇嘜唔妥，但食落得人驚。麵條型狀方及扁，一嚐之下發覺毫無麵味且粉中又帶少少「膠膠地」，配合埋冇嘜味嘅湯，真係食到心情都差哂。豬扒有四件，件件大骨，唔知係咪調味料好貴，豬扒亦係冇嘜味，好彩沙嗲牛肉尚可接受。真係驚嘆點解可以煮啲咁嘅嘢出嚟！…查看更多

有朋自遠方來，話想試吓上海麵食，就帶咗佢哋嚟呢度一試。果然係有名氣嘅食店，平日未夠六點鐘已現人龍，好彩唔算等好耐已可入座。由於今次係為麵而來，我哋一行三人竟然點咗4碗麵。由於朋友愛辣但又食唔到好辣，一啲原本係3隻辣椒嘅麵被改為1隻辣椒。担担麵湯底富濃郁花生醬味道及較稠身，微微麻辣風味中帶點微酸。麵條亦軟硬適中，保留一份嚼勁。整體配搭得宜，味道十分吸引，難怪成為皇牌麵食。炸醬麵炸醬甜味較重，唔似平時食開嗰啲甜中帶酸。主要以肉片及蔥花等作配料，整體味道偏濃。但作為麵食醬料卻頗匹配。紅油牛肉麵味道唔太突出，只是於清湯中加入辣油製造出微辣口感。牛展反而烹調得更出色。牛展切成厚片，軟中帶點咬口，很有口感。而且相當入味，可品嚐出陣陣醬油味道。水煮牛肉麵有別於一般嘅水煮菜色，湯底較重醬油味，慢慢才滲出花椒嘅辣味，愈食愈見川菜風味。牛肉則為一般滑牛，吸收唔到「水煮」味道。四款口味也是同一麵條，最合我口味非担担麵莫屬。店員也稱呢個係賣得最好嘅麵。朋友亦相當滿意。順帶一提，食麵前記得徹底攪勻湯底，因為好多調味都沉喺底部。如果打算share嚟食，可叫店員先剪麵，否則好難夾斷麵條。…查看更多

呢間亦係由尼泊爾人經營嘅fusion菜，菜式揉合咗多個國家嘅特色。之前試過附近嘅小酒窩同Seasons都覺得好有驚喜，所以對呢度亦充滿期待。星期六差唔多8點，座無虛席，正好有張二人枱準備埋單，稍等片刻即可入座。店內燈光略暗，甚有格調。可惜枱與枱之間空間太少，頗為侷促。菜色種類其實同之前食嗰兩間差唔多，有pizza、pasta、咖喱等食物，價錢大多$100內，而且不設加一，十分化算。店內有特色飲品同酒精類飲料，數十元1杯。Hoegaarden 1 pint ($62)店員漏單，要催先即刻準備。啤酒剛到0.5L位置，其餘則由泡填滿，如果冰凍啲可以更滿足。木瓜青檸smoothies($36)微微木瓜味中帶有較強嘅草青味；唔算好creamy。炭燒雞及豬肉串($72)Standard每份10串，可以半份雞半份豬。以鐵板上菜，稍微保持肉嘅溫度。雖然被稱為串燒，但並唔係以竹籤上，可能呢種係尼泊爾風格之一。雞件同豬肉片size較細，加埋大約10小件，份量唔算多。肉質嫰滑，帶有較重嘅香料味道，但有點過咸。肉有微微燒過嘅痕跡，但食時唔覺香口。有椰菜絲、洋蔥絲等蔬菜作配料，味道比肉更適中。雙併薄餅($100)選擇眾多，有好幾款都想試。原來連薄餅都可以雙拼，服務貼心。賣相非常吸引，睇見滿佈配料同被又濃又軟芝士蓋上嘅pizza真係口水流。招牌薄餅Topping包括辣味香腸、辣雞肉、香腸、洋蔥及青椒等等。雖然有一流嘅賣相同有相當豐富嘅配料，可惜太咸，仲要係咸到覺得條脷都嗱埋，完全分唔到其他味道。泰式咖喱雞薄餅配料包括雞柳、紅椒、香茅及羅勒等。咖喱及香料味道濃郁，相當有泰菜風味。但亦係略咸。巴辣羊($82)羊肉以東方香料配以薯仔烹調，味道似較濃郁嘅咖喱，texture亦較杰。羊肉烹調致入味且腍身；香料味重，唔覺羶味。辣度適中，更能帶起汁嘅惹味。不過都係嗰句，咸咗啲。芝士烤餅($28)配合巴辣羊，點咗芝士烤餅。烤餅質感煙韌，中間夾著一層薄薄奶酪芝士，味道並唔突出。但喺食咗咁多“重口味”之後，頓時覺烤餅味道均勻。不過還是上次喺咖喱寶食嘅酥餅出色得多。睇得出廚師製作用心，店員亦嘗試表現對客人嘅關心。奈何今晚所有出品都咸味過重，遮蓋咗食物完本嘅味道；而店員亦欠缺份親切笑容，呢兩方面小酒窩及Seasons優勝得多。…查看更多