mandyau1993的个人专页

接完老公放工就係旺角搵好野食, 我地兩個唔算大食, 平日都好少食放題, 好似牛魔呢種套餐就最適合我地。一人一個套餐就夠晒飽，又唔會話太滯。牛魔三重盛宴呢個餐有牛舌、牛五花、牛板腱，肉量我覺得係足夠，每種肉都會有三片，肉質素不過不失，望落同食落都係新鮮有牛味，上到枱亦都唔會見到佢雪到硬晒，唔算太薄，燒起上黎都要少少時間先熟，個爐都幾大火，要小心控制火喉，建議教最細火就夠晒。成餐最不得了嘅就係蘭王鵝肝炒飯，舊鵝肝係煎炸過好脆，再配蘭王蛋真係好惹味，雖然係有啲邪惡，不過配埋個柑橘特飲又好似清返少少熱。和牛自慢系列-豬頸肉套餐見到有和牛真係流晒口水，再豬頸肉送飯真係一流，同樣係每種肉有三片，個餐又有菜又有湯其實清晒成個餐係一定會飽。肉量依舊係不過不失，望落新鮮，食落都有肉味，豬頸肉啲肥膏望落真係好正!…查看更多

已經有好幾年無幫襯過Delifrance啦，最近搬左出黎住，再屋企人煮飯就梗係要出街搵又平又抵食嘅餐廳啦。行過Delifrance發覺原來佢地menu都唔算好貴，二人餐重幾抵食添! 又有湯又有主菜包埋甜品嘢飲都唔洗$200，重要唔係細細份，真係食得飽人，性價比幾高!是日餐湯 - 蕃茄忌廉湯 其實我都幾驚飲蕃茄湯，因為我好僧食蕃茄，但佢呢個湯好creamy好滑，唔係煲得好酸我又接受到喎!跟湯送埋嘅餐包都幾好食。紅酒燴牛尾意粉 啲牛尾都幾多，食晒啲意粉都重未食得晒啲牛。紅酒汁好香，一啖接一啖好惹味。香蒜海鮮意粉超濃香蒜味，佢係香到食完之後重有陣香蒜味係個口到，中意食蒜嘅人真係唔好錯過!有超多蜆肉無沙嘅，果兩隻蝦都幾大隻都煮得好彈牙，意粉係我中意嘅口感，有啲彈牙嘅口感唔錯。迷你雪榚牛角酥一人一件唔會太大件，牛角酥脆卜卜超好味!加埋雪榚好邪惡，為呢一餐劃上完美嘅句號!凍芒果熱情果梳打男友話呢杯芒果同熱情果味好濃，加左梳打超解暑，勁適合而家開始熱嘅天氣!檸檬蜜檸檬加蜜糖真係好潤喉解膩，亦都唔會好甜，食完雪榚之後飲佢都無違和，好正。口痕試埋佢個雞脾仔，細細隻唔會好漏，連啲骨都入味，差啲想連骨都食埋。又搵到一間平靚正食堂啦，自己煮又要洗又要切，計落每人唔洗$100真係好抵。…查看更多

拍拖有時都會想搵下啲有mood嘅餐廳傾下計食下好西，難得搵到一間裝修好特別嘅pub。睇餐廳相已經覺得好特別，去到同相一樣唔會貨不對辦，好多打卡位，個書櫃牆好英倫風，坐埋去影張相即刻覺得自己好文青咁睇得啲嘢食都要食得嘅，我地兩個細食，叫左兩個主食已經好飽，食物份量都算適中，如果會飲酒嘅建議可以叫少個主食，叫多啲小食送酒。香烤10安士美國黑安格斯肉眼扒 $338係香港好耐無食過煎得咁香嘅牛扒啦，外面果層係真係煎到香脆，裡面又真係做到5成熟，平時自己煎唔到呢個效果，好想同廚師偷師。香辣蒜香白酒蜆肉扁意粉 $158擺盤好靚，意份好有質感唔會軟林林，蜆肉好大粒無縮水，好鮮亦都無沙，味道係小辣程度，唔食得辣嘅我都頂得順。Grassy Flash $88等同男友咁岩今日都唔飲得酒，所以就叫左兩杯Mocktail，呢一杯係有檸檬葉、茉莉、檸檬汁再加薑汁汽水而成。味道好fresh但又唔會好酸，可以去掉食物嘅油膩感。Salted Guava $88呢杯係葡萄綠茶、番石榴汁、青檸汁、酸瓜汁再加糖漿做成。酸瓜陣味好出，男友話令佢諗起M記魚柳包，同樣可以解膩，係一種無諗過會出現係飲品嘅味道，但又出奇地好飲。呢間pub環境幾舒服，位置唔多所以唔會好嘈，想同朋友聽下歌傾下計，想坐得舒服，食物又Ok嘅可以考慮下佢。我絕對會為左個牛扒再翻桌。…查看更多

唔知大家知唔知西九入夜之後無乜人，坐係海邊睇住個海傾密計其實係幾浪漫呢? 偶然我同男友放工之後都會去西九抖下氣，今日就順便去圓方食個靚飯先去拍拖啦!鹽燒秋葵 $28我就唔食秋葵嘅，不過男友好中意，佢話呢個燒得好香好新鮮。牛油燒北海道帶子串 $46聽到個名都覺得正啦!黎到燒得岩岩好，裡面係岩岩好熟好juicy唔會好硬，外面燒得個樣都好靚仔啊!十分新鮮有海水味。松露蘑菇濃湯 $72唔飲得凍野所以我就叫左個湯，松露味勁濃，黎到淨係聞都聞到超香，超多磨菇粒粒，飲完都幾飽肚，中意菇味真係唔可以錯過。越式香茅烤豬頸肉 $128覺得食泰國菜係一定要有豬頸肉，不過食過好多間都好硬好乾身，呢間幾抵讚，佢每一舊厚度適中，燒得岩岩好，肉好軟林唔會硬，味道唔會過鹹或者過淡。泰北青咖哩脆炸軟殼蟹意大利飯 $236黎到個樣勁靚仔，好似成件藝術品咁，軟報蟹好似一棵樹，下面有好多青草同埋石頭，紫藍色花令到成碟飯色彩更加豐富。味道方面，咖哩都比想像中辣，不過平時食開清湯嘅我都受得最後都清到碟。 軟殼蟹有兩隻，一人一隻岩岩好，亦都唔會太細隻，炸粉唔會好多好漏。食完真係好飽，呢餐完美落幕。Witch’s Apple 毒蘋果 $70一餐好嘅飯就一定要配一配完美嘅飲品，呢杯毒蘋果個名已經好吸引，呢杯mocktail係無酒嘅，佢係由蘋果汁、檸檬汁、蝶豆花加梳打做成。味道比想像中好，蘋果味好濃，檸檬汁淡淡嘅酸味可以中和返食炸野嘅膩。造型又靚又大杯，一杯都夠兩個人飲。佢估唔到圓方都唔係間間餐廳咁貴，呢間都算係性價比高嘅餐廳，造型又靚，岩晒大家打卡。…查看更多

我同男友最中意食日本菜，今日黎到尖沙咀搵左一間個岩好有戀愛感覺嘅餐廳。menu都幾多選擇，單價價錢都唔算好貴，同場重有中式菜單可以叫，不過我地今次想食日本野，留意到隔離位係日本人，連佢地都話食物好食。日式炸豆腐 $48細細份前菜，炸得好香口，裡面豆腐好香豆味，質感都好嫩滑。三文魚燒飯糰 $58味道唔錯，三文魚肉都幾多，重有淡淡嘅梅味解膩，飯糰燒得好香，加埋紫菜好惹味。日式蕎麥麵 $68之前去大阪食過一次之後食過翻尋味，下次都唔知幾時再去日本啦，係香港見到就要叫黎試下先!都唔錯，麵質唔會煮到林晒，都有淡淡蕎麥味，份量都足夠兩個人食。油甘魚鮫豆腐野菜鍋 $158無諗過兩舊油甘角鮫咁大舊!加上大量嘅菜同埋豆腐,呢鍋真係好夠飽!加碗白飯就已經夠晒，個汁都開胃!清酒煮蜆 $108清酒味超濃，中意清酒嘅人一定唔可以放過呢道菜，個汁真係好似飲緊熱清酒咁，加埋蜆嘅海水味勁清甜!一夜干 - 鹽燒花魚 $138一夜干聽得多，今次都係第一次食。燒完之後魚肉好香甜，有落鹽去燒所以唔會無味，加上魚好新鮮，魚肉都好實淨唔會霉晒，呢一條魚又係可以送一碗飯。呢間餐廳都幾大間，座位好闊落，同朋友可以傾密計唔怕格離位偷聽到。味道好食，又有空間比我慢慢談情，自然有戀愛嘅味道啦!…查看更多

難得過海Staycation就一定要黎中環覓下食，去開大館打卡扮完文青，就過黎蘇豪食好西。我地兩個唔飲酒嘅，想搵間性價比高嘅西餐廳hea下。呢間價錢係蘇豪區黎講都幾貼地。Organic Sweet Corns Cream Soup with Grilled Prawn $68原本以為只係普通嘅粟米湯，入口好濃好creamy，飲得出係將啲粟米打碎加cream去整，上面隻大蝦重好鮮，一咬啲蝦膏滴埋落碗湯，撈埋黎飲真係一流。French Onion Soup with Sherry Wine & Cheese Crouton $68男友就簡左洋蔥湯，一入口係淡淡嘅洋蔥香味，唔會有辣味，再慢慢浮返啲濃濃嘅酒味上黎。呢個配搭幾特別，可能好少食西餐，飲過啲洋蔥湯好普通，呢個加左酒令成件事昇華左。Linguine with Clam, Chill & White Wine Fish Broth $158首先講左白蜆先，蜆無沙要讚，煮嘅時間岩岩好唔好硬晒好難咬，蜆本身帶有海水味好鮮甜。之後就要講下個汁啦，係濃濃嘅魚湯汁，加左蒜容去煮，一入口係香甜蒜容味，再之後就係蜆嘅鮮味，最後就係有陣白酒嘅味道，好有層次感好正!Uncle Gail * Duck Duck Mango 8inch $158呢間舖啲pizza好特別，全部都係用Uncle黎開頭。我地就簡左Uncle Gail。全因佢寫住有芒果salsa，重可以簡8inch size，我地兩個細食嘅人都可以多一個選擇，唔洗怕食唔晒! pizza上枱好吸引，好多火箭菜加埋芒果salsa黃黃綠綠咁好fresh，新鮮鴨胸焗得好香，肉質唔會硬好易咬開。餅皮都要讚，整得好香脆唔會林晒咁，好開胃!我地兩個唔飲酒嘅所以就無叫到啦，下次有機會蒲開中環都會再返黎試埋其他uncle(pizza)先!…查看更多

我同男友真係小鳥胃黎，每次食任食打邊爐都食得好少真係好唔抵，所以我地最中意發掘啲逐碟計嘅火鍋店，今次又比我地搵到一間啦! 適逢當日試婚紗試左3粒鐘又攰又肚餓，一早Book左位所以唔洗點等，餐廳望落唔大，原來係有兩層嘅，座位都幾闊落，枱夠大張擺配料一流。火鍋最重要就梗係啲豉油配料啦，呢樣就每位加$18，配料都算多選擇，最抵讚嘅係佢豉油係用熱水壺裝住，拎到返黎重係熱辣辣!呢樣好有心思，平時打邊爐啲豉油都係凍冰冰，試過有啲凍到好似岩岩係雪櫃拎出黎咁，食物點完豉油就涼左一半，唔夠熱辣辣無左個風味。招牌椰子雞鍋 (半隻雞) $248超愛食雞嘅我又叫左雞鍋，不過今次吸引我嘅唔係雞，係啲椰子。成份上黎好有氣，有兩個椰青加兩個椰子，職員好貼心咁比我影完相再幫手倒椰青水落鍋。第一轉係完全唔會加湯，真係原汁原味嘅椰青水! 職員將雞、椰子肉同埋馬蹄放落鍋，給蓋煮到佢出煙就可以將附送嘅漏斗倒轉計時，夠鐘打開蓋就食得!第一淡湯擺入口真係好清新，淡淡嘅椰香味充斥住成個口，慢慢果陣雞味就會散出黎，真係人間美味! 本來以為半隻雞會好少，不過佢隻雞都幾大隻，我地兩個都差啲食唔晒，雞肉好嫩，有幾舊我地食到差唔多最尾都唔會煮到好硬。牛魔皇拼盤 $298除左雞之外牛係打邊爐不能少嘅野，貪心嘅我叫拼盤就岩晒啦!咩都有! 呢個拼盤包左牛肩押、牛舌、牛骨髓、金錢肚同埋牛柏葉。牛骨髓好吸引，因為我地之前無試過，軟軟嘅口感好得意，但又會有淡淡嘅牛味，食過翻尋味下次都一定要叫返黎食。西洋菜 $28又黎到有西洋菜嘅季節，28蚊有咁大兜真係幾抵食!我地淨係食菜都已經夠飽，麵都無叫到。菜都好靚好甜，唔會有渣，呢個季節叫西洋菜真係無得輸。蓮藕 $38又係超大兜，好爽口唔會淋，超香唔會有好多絲，估唔到食菜都咁高質。飲品我地就無嗌啦，職員比左兩杯水都夠飲，黎打邊爐飲湯底都已經夠晒啦!最後埋單加埋一 $713兩個人，如果大家胃口大啲嘅叫佢二人餐會抵好多啊!可惜份量太多我地兩個一定食唔晒呢到位置都幾方便，出左佐敦站行5分鐘左右就到，食完重可以慢慢行上去旺角又得，行落尖沙咀睇夜景又得。…查看更多

聽朋友講最近浸大有間餐廳好好食，咁岩今日要去九龍塘做嘢，放工可以同男友黎浸大尋找下讀書嘅回憶，雖然唔係浸大出身，不過行入大學都係滿滿回憶浮返出黎。本身行左入大學搵路有啲難搵，走果時發覺唔行入大學會易搵好多，夜晚好多同學仔都放左學無咩人，不過都有幾枱客係到，傾計好合適，環境播住90後一定聽過嘅英文歌，好有feel！睇到menu都係唔想煩，叫左個二人餐。63度溫泉蛋配松露忌廉汁炒雜菌超好食，蛋黃好靚，中意食蛋嘅一定要叫，個蛋篤穿撈均之後個汁勁滑，雜菌好香，份量以前菜黎講都足夠。風味薯條薯條勁大兜，黎到都嚇親，應該4個人都夠食。配左黑松露醬同茄汁，黑松露醬好開胃，一條接一條最後竟然食得晒。餐湯聽唔清侍應講，好似係西蘭花湯，好香好滑，上面係配左3粒蒜蓉包好香脆，吸左湯都唔會淋晒，好抵讚！巴馬火腿薄餅呢個pizza個皮我勁中意！係香脆嘅薄皮唔會食到好漏好飽，火腿好香唔會乾，配埋火箭菜口感好豐富，成件事會fresh左。鴨白湯手打意粉見menu呢個係推介，所以就點左，個湯好香蒜蓉味，鴨肉好淋唔會好硬，呢碟意粉最精華係個意粉！佢個手工意粉我無係第二到食過咁特別，唔會煮得好淋之餘重要有咬口，係有彈力果隻，好想知係咪佢地自己整！真係超好食！最後重有兩杯飲品，檸茶不過不失，檸檬新鮮。我果杯係熱杏仁北海道鮮奶，開頭以為同杏仁露會好似，但佢滑好多，重帶有日本奶果種甜味勁正。最重要係呢個餐真係好抵食，埋單先$427已經加左一。如果係呢頭返工返學想搵地方聚會傾計吹水，呢間真係首選！睇Menu見到佢地有活動tag share follow ig同fb就送飲品，大家去幫襯前可以做下功課先啊！…查看更多

今日拍拖拍到黎荔枝角，平時呢個小區晏晝就好旺，一入黑大家放左工之後就開始好靜，同lunch hour嘅熱鬧情況相比都好唔同。平時都好少食西餐，今日我地兩個想食得正宗啲，呢間餐廳有啲平時好少見嘅菜式。西班牙蔬菜桃凍配山羊芝士 $79未試過食山羊芝士就叫左黎試，我呢啲平民係hk真係少啲機會試到，天氣咁熱叫凍湯試下真係透心涼啊！不過山羊芝士就唔係個個都受到，始終有陣騷味係到，而我係覺得可以接受嘅，咁大個人咩都要試下啦！南瓜湯（是日餐湯）$79南瓜湯奶味好濃，係我中意嘅味道，平時飲嘅南瓜湯都無呢到咁滑，中意奶嘅人真係唔可以放過呢個湯啊！湯就有玩到餐包嘅，餐包上有欖欖，餐桌都有醋同欖欖油，味道唔錯，包焗得外脆內軟，好開胃！凱撒沙律配無激素雞胸肉 $109無諗過呢份沙律咁大份，兩個人食好似有啲多，雞胸真係無諗過咁好食！有陣炭燒燒過嘅味，配落沙律到好fresh，一啲都唔漏，健康配搭OL岩晒。燴牛臉肉配意大利飯 $169牛臉肉又係出面比較少見嘅菜式，估唔到肉都幾大舊，牛肉超級嫩，肉味好濃，意大利飯係屬於creamy果種，十分之夾，食到舔舔脷。無激素燒春雞配 蘋果芥末醬 $259燒春雞出面果啲真係細隻到食完都唔飽，但呢到份量係足夠飽嘅，雞肉味好濃好嫩，皮燒得好香脆，伴碟嘅青瓜唔知廚師係點煮呢！煮得好fresh配搭蘑菇真係好夾！最後以兩杯餐飲作結。呢到一碟嘅份量都幾多，好適合三五知己上去相聚，環境示正寧靜，傾密計岩晒，無人騷擾食物質素又好…查看更多

我好中意飲茶，好多可以飲夜茶嘅地方點心都唔平，竟然比我搵到間性價比咁高嘅餐廳！籠仔鳳爪排骨飯 $35佢個份量係勁大，我同男友兩個人都夠食，鳳瓜有兩隻，排骨份量都唔少，亦都好大舊，肉量夠唔會舊舊都係骨，食落唔覺好油亦都唔會鹹。蝦餃 $16 （兩粒）蝦餃好大粒，皮唔會好爛，入面竟然有3隻蝦！蝦味好鮮，好抵食！薑蔥牛柏葉 $26呢一碟份量都幾多，牛柏葉好淋，唔會好硬咬唔開，薑蔥味好濃，勁惹味！燒賣 $15 （兩粒）豬肉燒賣好多肉，都好大粒，有咬口唔會淋晒。黑蒜螺片燉肉排湯 $38我同男友都超愛飲湯，未簡好食乜就已經簡好要咩湯，呢間餐廳有兩款湯，本身想試晒兩款，可惜已經賣晒，淨係叫到一款黑蒜湯。無諗過咁足料！真係有粒黑蒜係入面，味道好清甜，當晚無好口喝嘅感覺，應該無落味精！燒汁釀茄子 $23我超愛食煎釀三寶入面啲茄子，每次見到都一定要叫，茄子同上面舊魚肉都好大舊，魚肉唔係粉，真係有魚肉味架！茄子煎得好簡，陪埋啲豉油食真係天堂啊！蜜汁叉燒腸 $25叉燒好大舊，腸粉皮有啲似布拉腸粉果種，最正係黎到熱辣辣！整體黎講真係好滿意，佢每樣上菜果時都係熱辣辣，點心真係要襯熱食先正嘅！兩個人食左咁多嘢埋單都唔洗$200，有飯有湯有點心真係超抵食！…查看更多

Happy Friday又係拍拖嘅好日子，好耐無食過串燒，重發現有花甲粉，毫不猶豫咁叫左黎試，無諗過質素咁好！多春魚 $45多春魚有6條，每條都燒到好香脆，雖然有骨不過好易離肉，超多春勁好味！雞腎串 $28有兩串好抵食！雞腎有咬口，但又唔會好難咬，鹹鹹香香咁。雞心串 $28同樣係有兩串，同男友一人一串唔洗爭。係hk我好少搵到雞心黎食，呢到竟然有！質素好好，無內臟臭味，有咬口又香口！牛舌心 $45比一般牛舌大舊啲同埋厚好多，唔會好難咬開，啖啖肉牛味又好濃，食完牛舌心唔會返到轉頭！翠玉瓜 $15食咁多肉梗係要食下蔬菜平衡下罪惡感啦，翠玉瓜好新鮮，好爽甜。冬菇 $16冬菇好大隻！上面重舖滿左好多蒜蓉，食得出蒜蓉係落左牛油去炒過，勁惹味，大家黎到呢樣係必點啊！花甲粉 $65黎到重頭戲花甲粉啦，其實本身黎係想食串燒嘅，點知發覺花甲粉同樣出色，我其實唔太食得辣，當日串燒都簡左走辣，花甲粉應該本身都係辣所以無走到，後來發現佢係花椒味好濃，所以好麻，辣得好過癮！花甲好多，無實際數過不過目測至少有廿隻，份量好多，我同男友兩個食完都已經夠飽。飲品我地就簡左檸檬茶（$12）同埋If椰青水 （$16）。飲品選擇好多，如果大家會飲酒黎呢到配串燒真係一流啊！…查看更多

打風前一日同媽媽撐枱腳，朋友介紹話麗豪酒店入面呢間富豪坊啲嘢幾好食，好岩同長輩黎試下。地點都算方便，對面就有巴士站，食完行去格離就有好多巴士走，如果想去沙田行下商場都唔洗行好耐，估唔到食物質素真係幾好。沙律軟殼蟹 $128我同媽媽都超中意食軟殼蟹，見到有就一定要試下啦！如果大家食過元氣同壽司郎嘅軟殼蟹都知佢炸皮都有啲厚嘅，呢到嘅軟殼蟹有驚喜，個炸皮好薄，好新鮮又啖啖肉，食完差啲想叫多一份。黑魚籽鮑汁煎蠔 $288呢一味係餐廳嘅招牌菜，標榜日本蠔，真係好大隻蠔，我同媽媽一人三粒食完都好飽，黑魚籽鹹鹹地，帶起左蠔嘅鮮味。北菇棉花雞 $55棉花雞係好易整，但要整得好食就唔容易，呢到雞件唔會細舊有雞味，啲棉花又整得好爽，唔會淋晒成啖油咁，勁出色！重點係黎到熱辣辣睇得出係即蒸，唔似出面啲酒樓蒸完擺左係到好耐遊埋花園黎到都凍晒。大澳碎炸雞 $98我以為呢道菜會好似炸子雞咁，點知黎到有啲似韓國果啲炸雞件，但食落好香南乳味，食完一舊又接一舊，最正係無骨又香脆，真係勁正。香麻煎堆仔 $45以前細個父母成日帶我去美心飲茶，好懷念佢地煎堆仔嘅味道，估唔到呢間酒樓做到！既香脆又夠芝麻味，食到我同媽媽不斷回味以往嘅日子。生磨杏仁露 $42食返碗糖水黎個完美嘅Ending，杏仁味好濃亦都好滑無渣，不過我本身唔食得甜就覺得甜左少少，整體黎講係幾出色。原來黎沙田唔係淨係得乳鴿架！偶爾飲下茶都有驚喜。…查看更多

事源係早幾日去元朗行街食過一次桂花小幸，今日同同事過黎將軍澳做嘢要試埋佢呢間分店！秘罈酸菜魚米線 $78上次元朗試左一次已經好念念不忘，上次男友試左飯，今次我試下啲米線。酸菜魚一樣唔會勁辣，唔會酸到入唔到口，魚片好新鮮亦都好多，菜都好好食，啲米線索晒啲湯汁真係超開胃，我個人黎簡會比較中意食米線多啲。特濃蕃茄雞排米線 $70同事超級中意食蕃茄，佢過蕃茄湯勁濃，重要有蕃茄肉好fresh，配埋雞排食都唔會好漏。雞排炸得好香脆，但唔會好乾，入面重有肉汁好juicy。桂花雞翼 $42呢間舖叫桂花小幸，想試下佢地個桂花汁係咪咁出色，雞翼炸得好唔錯，炸粉唔會好厚，雞翼都唔會好細隻無肉食，桂花汁好甜好香桂花味，真係一隻接一隻停唔到口！鐵觀音珍珠鮮奶茶 $58今日想試下飲珍珠奶茶，估唔到佢啲珍珠都幾有咬口唔會淋晒，黑糖味都重，唔會成舊膠咁，鐵觀音都好香，食完炸嘢再飲奶茶都唔會好漏。將軍澳黎講食一個午餐呢個價錢都唔算貴，味道質素重要咁好，下次黎呢頭做嘢都要再翻桌！…查看更多

市區人真係好少會入元朗，今日難得同男友入黎元朗郊遊遊，去到元朗廣場嘆冷氣就順便搵嘢食。餐廳所在呢個商場都幾多餐廳，星期日眼見幾乎間間餐廳都要等位，而桂花小幸都一樣。我地兩個人大約等左15分鐘，貼心係餐廳門口有張櫈，行到腳軟都有櫈坐黎等位，抵讚！秘罈酸菜魚湯飯 $78男友餓左成朝頂唔順要食飯，估唔到都幾大碗飯，酸菜魚都幾大兜，我就唔食得辣嘅，但食落都受得住，男友話7小辣咁上下辣度，酸味都足夠嘅，我自己就好怕食酸嘢，我覺得係可接受範圍。三盛紅燒牛肉麵 $85呢碗麵入面有腱心牛肉，牛腩同埋牛筋。肉煮得好淋好入味，幾抵讚佢啲麵可以簡湯底，我簡左雞湯好濃雞味！如果唔想食台灣麵重可以簡米線，選擇好多，手機落單重可以簡走芫荽，好貼心！台灣烤香腸 $35我男友真係好中意食台灣腸，幾乎去台灣餐廳都一定會食，呢間烤得好香脆，甜甜脆脆咁好開胃。仙氣柚子茶 $32呢間餐廳重附有台式飲品店，餐廳用餐可以叫廢水飲超正！柚子茶係真係有新鮮柚子肉係入面，男友話想飲果時我重以為係沖出黎果啲。可以簡甜度，但呢款唔可以簡冰度，我覺得半甜有啲甜，但啲冰溶多左之後就還好，酸酸甜甜咁呢個天氣飲好消暑。仙草冬瓜茶 $26呢個真係無諗過會咁好飲！原因係好多地方冬瓜茶都無得簡甜度，呢到竟然可以簡微糖，岩晒我呢個勁怕飲甜嘢嘅人！呢個天氣真係好消滯去暑，仙草都唔會好硬，份量都好足夠。下次再去郊遊遊一定要再黎搵食！…查看更多

一開始聽到朋友話想試呢間大公雞以為係食傳統中菜嘅，因為個店名真係好霸氣，亦都令我諗起由細到大用開嘅雞公碗。黎到原來係食台灣野嘅，價錢都好相宜，雖然店面唔大，但座位好闊落坐得十分舒服。四寶手工麵(雞中翼，牛筋，牛腩，大腸) $65所有嘅配料都好多，大腸都有3,4舊，雞翼有兩隻，牛筋都有兩三條，牛腩都有兩舊，配料除左多之外重好入味，唔會淡某某咁。麵係手工麵黎，好中意食呢種麵底，唔會令人好漏，亦都索到個湯汁好正!香香雞扒肉燥撈麵 $55黎到見到超多肉燥係個麵上面真係令人好興奮!撈完之後每一淡都有肉燥真係好幸福啊!!肉燥食落唔覺好多肥豬肉，亦都唔會好油好肥膩，麵底都係手工麵，不過今次呢隻係幼麵黎，反而更容易令肉燥掛上麵，份量望落好似唔係多，但其實配埋咁大塊香香雞扒我相信一個大男人都應該會飽。講下香香雞扒，佢真係炸得好香亦都炸得好透，炸皮唔會好厚，食晒之後都唔見佢隻碟好多油，相信餐廳係有特登索一索啲油先再上碟。雖然叫得香香雞扒都係預左減唔到肥架啦，但如果食完見到咁多油內心都係會有罪惡感。炸花枝丸 $42花枝丸真係好好食!炸得好香，無另外加炸粉都已經好香口，炸完陣花枝味飄晒出黎真係會令人想一啖吞左佢。最怕食花枝丸好似一pat粉咁，佢入面有花枝肉勁有咬口，唔錯!肉燥菜心 $25菜心好靚好新鮮，都唔大棵煮得都易咬，可以解一解食香香雞扒同炸花枝丸嘅罪疚感。仙草奶茶跟麵加 $15朋友話奶茶好香好重奶味，仙草都好易咬唔會成舊涼粉咁，仙草味都好濃。龍眼冬瓜茶跟麵加 $6無去台灣咁多年，已經好耐無飲過冬瓜茶啦，天氣咁熱真係好想叫返杯涼浸浸嘅冬瓜茶解下暑。我都無叫到少甜佢都唔算係好甜，如果大家怕甜嘅飲冬瓜茶建議大家都係叫凍飲唔好少冰或者走冰啦，有多啲冰佢係會無咁甜嘅。食完炸野飲一淡冬瓜茶，相信今次唔會爆瘡啦!平時唔係呢頭返工，原來黎呢間餐廳都好方便，地鐵站有直接出口上天橋行過黎就係商場，同層重係美食廣場咁超多選擇!好羨慕朋友係呢邊返工啊，平時放lunch一定煩少好多野。…查看更多