cyrusfish 的个人专页

平日午市，雖然冇得OpenRice 隨手㩒，都有得預先WhatsApp訂位，填寫貴姓、日期、時間、人數、電話，等一分鐘已收到確認。去過觀塘分店，大埔呢間似乎更free。地下上一層樓梯。同樣平日午市，呢間超時半個鐘都未被催走，而且樓底較高，燈光較明亮，油煙味亦較薄，離開時亦冇一身離遠都聞到嘅油煙味。二人枱有啲迫，卡凳同枱距離緊貼外，枱面中央烤爐外，枱邊仲攝咗位有火鍋電磁爐面板，所以一次過放多幾碟嘢，要接近俄羅斯方塊咁堆砌，或碟疊碟向高空發展。一樣冇手機落單，咩都自己離席攞。中途冇人得閒收骨碟，需自行掉去餐清理，不過中後段有職員主動問駛唔駛換隔油紙。收得每位$168加一任燒任打任食已經係好實惠，所以拎刺身要貼張刺身貼紙喺身去搵壽司吧等職員配給，每次只能揀三款每款三片（大虎蝦每次只能攞一隻）。壽司就喺旁邊任攞。志在同friend吹水燒時間，佢唔食牛都仲大把選擇：一口牛之外有一口豚、雞翼（土匪、咖哩、韓風香辣）、雞軟骨又三款醃法、燒金沙骨好難控制火候，件頭每多太大件，唔易燒得靚。乳酪軟雪糕都係放題通病：冇純牛奶味，用，似奶粉或煉奶開水雪凍。掛住食魚生燒肉又係繼續將個小火鍋接近閒置，只係臨尾用嚟烚吓菜。…查看更多

去完附近李鄭屋漢墓作常識科參觀，一條東京街之隔，轉入青山道x誠超市幾個舖位就到。啱啱撞正換招牌。聽講餐廳停工一排，今日開番。位置不算隔涉難搵，裝修新淨四正。大部分預設二人枱，近舖尾廁所一排枱面壁。快餐模式，先點餐付款，等叫號再自行拎餐。試咗溫泉蛋系列-「招牌生炸雞髀飯」，日式照燒擺咗喺脆肉瓜蘿蔔底，就算篤穿溫泉蛋撈埋，喜歡汁浸飯始終稍嫌汁唔夠多。不過重點炸雞髀真係超鬆脆，加上已經少見呢類以麵包糠式炸髀，幾令人食指大動。餐單應該加番條🌶俾「韓式泡菜肥牛炒意粉」，已算小辣，雖然配菜都係脆肉瓜菇菌，炒得有少少汁唔會太濕。兩個餐份量都係標準夠哂每人食，所以點多個「芝士肉醬焗薯蓉」（雖然都幾好樣）有啲過咗，而且薯蓉都唔細，幾乎等於食多份意粉。…查看更多

墟冚都不得了。12點半未夠，已經入座七成，並且開始有人流蜂擁而至，有外賣有等位。限時60分鐘。二人枱面均比較的式，自助手機落單，坐嘅89號比較適合一人，因為其中一張凳背靠電製醬料櫃，耐不耐就有侍應店長嚟攞嘢開櫃門，開櫃門多數會撞到椅背，相當不勝其煩。寧舍有選擇係$38「燈籠古早滷肉飯（小碗）」，size係平時住家飯碗白飯咁大，滷肉（東坡肉碎）肥瘦參半，預咗要自己加餸。牆上貼住仲係試業階段，選擇唔多，揀咗個另類送飯選擇——「奶油芋泥、肉鬆、起司之人氣蔥抓蛋餅」$56。覺得面頭浸章魚小丸子醬可以撇走，唔夾，蛋捲嘅餡料味道已夠豐富：鹹肉鬆、厚重夾滑甜芋泥，芝士下手不重，味反倒比蛋淡。飲品冇跟餐就有輕微乸脷。「（熱）清新冬瓜鮮草檸檬」單點盛惠$28。杯係某些茶記用嗰種半漏斗型熱飲杯，檸檬係台灣青檸，冇篤過都好夠檸檬味，可能加咗檸汁打底。仙草作為熱飲都唔怪異，以為會半溶其實依然呈塊狀。…查看更多

聽屋企人講閣樓間分店裝修完，好喇是日中午突然心血來潮，一人前到豪隍填肚。裝修前後分別唔大。估計最少要等10幾分鐘，唔知真係好運，定係咪真係好多人去咗旅行，剛好有一張二人枱，免等位（平時一般午市要喺樓梯等餐懵）。坐低開咗茶，發覺有午市套餐，$49一主食、一點心，可以加錢轉西式飲品。而我只點咗一個燒排骨湯米線、高湯鮮竹卷，加埋茶錢盛惠$55，以觀塘商貿區嚟講相當抵食。燒排骨湯米線先上，但發覺排骨俾我想像有些少出入，本以為係燒臘舖嗰啲長條型燒骨，實物現形似紅燒排骨。雖然多半係急凍排骨，但食落啲肉質彈牙，感覺唔到有雪味；湯是清湯加了腐皮，提升咗湯汁層次，值得推薦。至於高湯鮮竹卷，味道較清淡，餡料裡面啲蔬菜佔大比數，如喜歡清淡何妨一試，感覺唔到有味精，食完唔會狂灌茶灌水。…查看更多

電話預訂，講明6歲以上人均消費要$120或以上（唔駛擔心實過，往下碌就知），分午、晚市時段。訂座當日前一日會有短訊要求click連結確認訂座。所揀嘅晚市時段係6:30-9:30。如果貴公子姑娘年屆7歲或以上，未必合適，亦未能盡興，皆因此年齡層對於所有餐廳內之兒童設施：諸如沙池（沒有沖身設施，大部分玩家都倖免周身沙）、滑梯等之幼兒地帶）均只能遠觀不能褻玩。而又基於上月尾5-11歲疫苗通行證之執行，變相5-6歲之所謂未齊針者又再排除出嚟，於是乎儘管翌日紅日，場內都係七成枱滿。只得隔岸觀火都照嚟呢棵大樹🌳，唔係貪佢好遮陰，係緣於遲來嘅心底承諾，也源於好奇，欲踩一趟親子餐廳。規矩略見怪。7:45pm截單唔能夠再點餐；8:15pm已經打定單夾定單夾叫客埋單；8:30pm見仲未埋單，侍應就「溫馨」提示個客好去埋單嗱吓招呼亦見異。三人入座，侍應只俾兩杯水；點好哂餐，冇預設順理成章醒醒目目擺定3隻分餐碟嚟，而要客揚手去提，侍應先施施然拎嚟。如果咁唔想攞，倒不如弄個自助醬料餐具架，俾客自助攞好過。部分侍應係幾托兒所職員feel，會幫忙𥄫實、扶實啲幼小玩家；部分就企哂喺收銀、送餐區附近幾個圍埋chat，是何等有默契之團隊精神⋯⋯我要求想要幾隻碗碟嘅舉動似乎打擾到佢地傾偈嘅雅興，謹此致歉！部分餐具藏喺枱面藤盒。湯係番茄南瓜湯，幾滑，7成番茄3成南瓜味。跟餐限$38飲品，蜜桃茶係twinings。煮法明顯分咗大人細路兩者口味。兒童餐之「番茄高湯牛肉燴飯拼照燒三文魚」$158係汁煮軟飯，成份餐調味清淡啱哂老少平安。大人前嘅碟頭亦明顯較deluxe。「和風海鮮明太子炒烏冬」$198，明太子扒埋碟邊呈扇形，明太子唔係太鹹唔太夠味。整體調味啐夠。覺得好中式炒麵格，因為啲蔥段切嘅長度十足豉油王炒麵或豉椒牛河嗰種格局。枱枱都嗌豬手咁滯。「紅燒德國鹹豬手配酸椰菜佐黑松露薯蓉」$278，皇牌咁嘅價錢，質素總算擔當得起。首先件頭起巨型，難得冇好似其他舖頭煮鹹豬手一味鹹到鹽醃咁，並且做到皮有脆邊，唔油膩。酸椰菜撈落黑松露薯蓉完全唔襯，一唔留神仲以為啲薯蓉變壞變酸，即時用叉扒走，酸菜都係返歸去返酸菜魚好喇。嗱收得呢個價錢呀👆🏻，嘢食包埋玩樂費，唔玩得唔好嚟。後記：縮水阿伯覺得兒童餐都$158，自己又超齡冇得玩，好唔抵咁話。…查看更多

一出𨋢攞位，知客已經用慌死你聽唔到嘅聲量話兩人多數要搭枱，見環境擠迫，兩枱凳背幾乎互相貼住，差啲想打退堂鼓，居然俾到張近窗邊挨牆得二三人坐得落搭唔到枱嘅獨立枱就𦧲飯應。座無虛席。可能基於此原因，又或秋燥，啲伙計都幾好火，例如擺杯碟碗大大力硴啦硴啦咁聲；喺我背脊櫃位拎枱布大力沉重地掃過我膊頭都不以為意；隔鄰枱剛入座已見有茶壺，於是同其中一個陀對講機瘦削嘅咩哥講話驚壺茶唔乾淨，叫佢換過壺普洱，個咩哥燶哂面大聲答話唔知個客講唔乾淨咩意思，最後心不甘情不願去茶水部打個圈攞壺新茶返嚟⋯⋯如此這般舊式酒樓職員態度之情景，以為返咗去七八十年代。連電視都標榜有做懷舊菜例如金錢雞、蝦多士之類⋯⋯因見首次嚟而且見咁嘅招呼，於是只維持嗌番啲茶樓恆常嘢就算。迷你紅棗蟲草花雞飯，落咗單先話冇，夾硬塞兩碗「迷你鳳爪排骨飯」嚟。鮮奶蛋撻仔，微溫，冇嚟蛋味。之後陸續嚟嘅春卷、叉燒腸粉（啲叉燒係鮮橙色）、鯪魚球、灌湯餃（皮就大大幅，餡料少）普通料，都唔多贅述。壓軸嘅「炸魷魚鬚」，望落已啞色，食落知翻炸，魷魚仲要冇用鹽或任何調味，只能夠點乾點淨碟細碟喼汁，𦧲哂啲隔夜炸漿，勉強食幾舊。仰望四周，九成退休人士，並無不敬，但我若老來都仲覺得呢度嘅食物㗳落好味，我會自憐且感悲哀。…查看更多

排太子區熱搜頭位，見圖示左上角有條紅帶，又試透過開飯㩒訂即晚6:45位，估唔到咁巴閉，翌日唔係紅日嘅普通一個星期一都會爆滿，冇訂位二人大概要坐吧枱冇椅背高凳。聲稱唔俾加單，原因係限時食90分鐘，中途加單要廚房急煮而個客又未必限時內食得切，因此有咩請一鋪過點哂佢，同埋要預先付款，之後等侍者上菜。為更準確及更有效率，用手機備忘錄打字打份菜單稿列哂要咩要咩，埋到櫃枱show俾收銀睇就一覽無遺一目了然。主張慢煮，但上菜好快唔駛10分鐘，唔通慢煮變快煮？以慢煮嚟講，仲係略嫌唔夠熟⋯⋯表皮嗰陣香草蒜鹽幾好調味，配薄荷香草醬，切開粉紅肉，有啲甚至生到咬唔開嘅位要摒棄。唯一啲羊架質素唔差，比一般羊架大舊啖啖肉冇臭羶味，但食牲口肉（除咗牛、日本食嘅某啲雞肉外）唔熟顛覆我三觀。曾有股衝動想叫廚房再煮多陣先再上菜，諗起佢免收加一（自助去水吧對面攞調味料、斟水），心理上唯有冒住腸病毒感染嘅感覺食落去（距用餐時間十幾個鐘，暫時未感不適）。有啲搲頭點解會推介豬仔骨，如果以尋晚質素嚟講⋯⋯表皮個燒烤BBQ汁係唔錯，但一切開，髀仔肉好鬆散，甚至呈罐頭吞拿魚肉嗰種碎感，咬開冇味，好淡，明顯冇用吓香草鹽醃吓，單靠外皮嗰浸掃上去嘅燒汁根本滲唔到入去咁厚嘅肉質，配碟嗰件粟米望落有啲萎縮，但切開哂粒狀食又唔錯，幾爽口有牛油香粟米又甜。見鄰枱舊粟米又係個尖端、冇緊幾粒粟米嗰截，係伴碟唔會俾粗嗰截定界定為該餐廳伴碟特色？不得而知。「牛油果三文魚薄餅」係做到效果，餅底脆、芝士夠厚又拉絲、牛油果新鮮基本冇死錯、三文魚唔算俾得少。全場意粉類僅得蜆肉蝴蝶粉，友人唔想揀，所以揀多個「芝士排包」，兩手掌咁大，望樣諗住會幾脆，但軟多過脆。之前落單時見櫃枱有「岩鹽焦糖芝士蛋糕」黑板。嚟到薄薄一件，唔太甜鹹香鹽味又夠焦糖香。資料話有兩層，但睇勻全場唔見有樓梯通上去，個個都係迫哂底層坐，反而樓底就真係高嘅，目測約三米，枱枱傾偈都唔會好嘈雜。…查看更多

店內，播住903晴朗。晨早依然想食崩沙腩坑腩，偏偏冇，話最快要朝早10:30先有。唯有嚟一碗普通牛腩，揀個蔥油味嘅重慶小麵。估唔到招牌腩又唔曳，首先慶幸佢俾到偏肥嘅腩嚟（冇半肥瘦我寧願要肥，倪匡先生話齋：「食雞要食皮；食肉要食肥」同意至極：「否則冇嚟聞味」），牛腩三四大舊，腍身，肥膏有牛香，麵係扁麵線，好索汁，撈埋撮肉燥，喺生蒜多蔥情況下，完全唔寂寞。嗌碗麵已當跟餐，飲品冷熱都係加$4。濃郁滿足一碗早餐。…查看更多

禮拜日，下午3點喺開飯app訂位只得番6點場，立即打電話訂，最彈性係唔一定訂搭半或整點，隨口訂6:45都侵我玩。1分鐘後已收到短訊指示㩒入連結確認。抵埗見門口人山人海，攞手機show訂座截圖，職員面面相覷，原來忘記留位⋯⋯好在等咗5分鐘騰到張吉枱出嚟，仲要係尾位六人卡位（我等四人），總算好物沉歸底。限食75分鐘。4人同行有優惠，3人每人一丼，剩番只要點以下餐牌其中丼，該丼半價，不過就冇配菜得麵豉湯。可惜當時已冇性價比高嘅明太子丼喇。正價丼飯都跟配冷豆腐、牛蒡絲（幾好嚼口又夠牛蒡味，想食多幾碟）、醃瓜、攰豉湯，成套顏值望落都不俗，堪稱大碗飯，夠哂充飢。肉系之生薑豬肉、小食照燒雞件調味控制得宜。「蛋包飯帶炸池魚定食」炸魚連尾有手掌心咁大塊，細骨好少，蛋包飯蛋只係緊緊夠包飯冇剩邊角，冇半凝固蛋汁，未夠香濃，有大量日式照燒汁遮掩呢個缺點。「六色刺身定食」即大虎蝦、三文魚、吞拿魚、油甘魚、帶子、三文魚籽六味，除咗吞拿魚肉質有啲鬆散外，總體尚鮮。尷尬係兩片切片檸檬，又似裝飾但又厚身但又因形狀所限難以唧出檸檬汁⋯⋯臨味手機下單嘅「茶味雪糕盛合」抹茶烏龍茶兩球，嚟到已半溶，茶味唔算濃，食得頗急。臨走見附近枱有啲似小型鐵板燒嘅爐，啲油煙不斷湧出，至少有3枱叫同樣嘅嘢，強烈油煙味散唔到因為餐廳冇類似韓燒嘅抽風機，亦冇燒烤區分隔，有啲焗促。*餐牌太多頁甫唔哂。…查看更多

如果問番零零年代迫緊深水埗黃金商場附近，當時仲係一間重慶薯粉小店嘅傷心酸辣粉吔緊碗小辣都辣到變膶腸唇嘅紅薯粉嘅我，真係劈頭都諗唔到今時今日小店已可說成集團式多區有分店，仲要搞埋放題！坊間平均稍平嘅放題/自助餐一般都盛惠二三百蚊，呢度係三百幾係3位人頭價，限時90分鐘。如閣下個胃鯨吞量有番咁上下，$108正一塞到肚飽，固然係實惠過去大x樂活一人打邊邊都收接近$80一鍋。當然食品質量自然就價。譬如蟹柳係用透明膠套套住嗰款明顯機切長方形起角嗰種假蟹柳；魚肉燒賣係食唔到豬、魚肉味，靠嘅係味精撈麵粉，工場整成成個泥膠樣嘅燒賣；然後，串串蝦係比赤米更細（佩服員工咁幼嘅蝦都穿到條竹簽入去👏🏻）但零蝦味亦缺乏彈牙肉質⋯⋯另，員工會俾個透明膠杯，稱竹簽用完請放杯內，亦不時推餐車收碗碟，唔駛怕成枱迫爆冇位擠嘢。當然亦有可取自處，否則唔會7點幾起門外排大堆人等位。譬如主打嘅豬肚雞煲，豬肚多係淺啡彈牙嘅肚件，好少深啡硬口。嫌雞件唔夠，出面仲有得自添；嫌肥牛肥，仲有鮮牛肉。去番原點，都係灼灼碗薯粉。灼咗一分鐘鬆啲，已經吸收哂鍋之湯汁，唔駛再點自調醬汁已眾味紛陳。滿足窮食放題願望。…查看更多

酒樓，始終仲有生存空間，如果唔係難食到回吐，始終唔多限時坐位闊落方便吹水依然係有回頭客。九十年代去鴻星用餐係有感去高檔次嘅酒樓，點心亦明顯比坊間酒樓造型精美具創意。日復日，當其他酒樓啲食品價位都起勢飆時，反而拉近咗同鴻星嘅距離。相對係侍應態度始終比一般酒樓殷勤，起碼啲夥計講嘢斯文啲。望住假期嘅餐單都係選擇困難，手指一篤都係指向套餐。$328兩位用都夠3位食。「脆皮燒肉拼蜜汁叉燒」叉燒俾瘦叉，覺得麻麻，而且厚切唔啱瘦叉，變相又硬又嚡口；燒肉就每舊都脆皮，肥瘦每層相間。預咗「鮮果咕嚕肉」都冇幾多間真正整到酸甜有緻、外脆內軟、肥瘦有道，呢碟亦流於平庸，酸味佔咗最大篇幅，肉質略瘦唔得豐腴。「四季豆牛柳粒」都似用包裝雪藏一口牛，不過好多舊都最少兩口先咬得哂。搜尋一下，原來執剩呢間同觀塘分店，不禁感覺無奈要隨波逐流。…查看更多

朋友話食得多新x榮，想試吓呢間。問題嚟喇，唔知係俾新x榮姐仔記養到條脷純咗，總覺呢間啲調味鑊氣都欠啲⋯⋯但先嚟嘅「薑蔥霸王雞半隻」明顯唔關先入為主事，同枱一眾都覺得做乜咁少得一小撮薑蔥？！預咗會用雪藏雞但如果連薑蔥呢啲幫手辟雪味且帶出雞味嘅低價食材配料都要慳的話，咁碟雞都唔慌會好食。果然，雞，冇嚟聞味，甚至髀、背都唔夠滑。之後嘅小炒「魚香茄子煲」、「豉椒炒花甲」（起碼冇肉少過殼）只屬不過不失，冇難忘印象。「炸蜆蚧鯪魚球」表現稍為好番啲，個頭酷似長洲大魚蛋大細，熱到辣嘴，唯始終鯪魚肉味都係唔夠，又令我諗起食到流口水嗰間喺川龍⋯⋯都係麒麟徑路邊小炒，但點都有分別。…查看更多

頂手喜善，開咗兩三個月。以前門口左面個標誌「大錦鯉魚缸」（依家「潮」字位置）已改建做儲物房。紅日嚟講場面都比較靜，估計係好多人未知emax又有番中菜食。裝修沿用喜善舊裝潢冇大變，仲係企理。據知單頁套餐餐牌每周換一次菜式，反而覺得套餐選項每層加多幾個菜式俾客多啲選擇實際啲。三人行，二人套餐其實已好夠食。「潮州鹵水雜錦拼盤」鵝件、紅腸、豬大腸、魷魚、酸菜，少少哋乜都有啲，鵝件係有啲偏鹹外，其他可以。「點心拼盤」分咗兩籠一碟，份量唔少，牛肉燒賣有啲牛味又夠熟；粉粿餡唔多但冇大大劈黏稠狀嘅嘢算幾爽口；煎堆仔係豆沙餡。「滑蛋蝦仁炒河」有啲河黐埋一細舊變硬，欠足夠芡汁有啲唔夠撈河。唔好當係啲好pro嘅打冷，當普通坐得舒舒服服唔催客走又相對寧靜嘅菜館或酒樓係ok。…查看更多

食評唔多，圖像左上角又有綠條，以為新店，一問之下，已開業踏入四年，只係老闆易手，廚、侍不變。此餐牌是日剛好新鮮出爐，每套餐追加一項，呢部分算幾抵。先嚟嘅「 極上牛肉黑蒜油烏冬」，飲啖湯底，好鹹，但黑蒜油嘅黑油偏少，出現較少喺湯麵類現身嘅溫泉蛋（湯麵似乎用番溏心蛋合適，溫泉蛋一𢳂即散遇湯即化較合撈丼飯），有大量嘅粟米粒同海苔。食唔到牛肉質量係咪所謂極上，因太鹹都掩蓋咗。「特上海膽當」名就咁叫，但海膽真係冇乜擔當，僅得一小截舌頭嘅大細咁多。而且整碗丼個size 係兒童份量嗰種，一望已知唔能夠填肚，定必要追加。掩不住好奇臨尾追加個「海膽天婦羅」，似係用紫菜包住蛋漿皮內藏少許海膽肉去炸，兩份切開四件，得四條拇指粗、中指長嘅炸海膽，剩番一條綠色物體係炸幼辣椒，總體算好食但要催眠自己係食緊有海膽嘅嘢，實在含量太少，收$108略嫌咋舌。補充番，晚市係冇單上面寫嘅前菜麵豉湯沙律附送。…查看更多

追月日，初十六。先去正門左方梯級上的櫃枱買飛。實體餐牌都係呢度攞嚟睇。一般大部分小菜$90，預設接近六至八人份量，所以望落好大碟。俾完錢會收到個號碼枱牌，自行棟去自己坐嗰張枱。自己出去拎餐具、碗。員工只負責賣餸飛、傳菜、完餐後清理。粥、飯任𢳂。𢳂粥去室內飯堂，粥煲得好綿滑帶淡淡白果香，好受食客歡迎，預備要排隊。室內外都有提供枱凳，自行攞位。室內長期迫爆，體感二五六度左右，預咗要企喺人哋坐緊張枱食完就攝位同預咗如三四人以下要同陌生人搭枱。室內主餐廳兩旁就係室外枱凳。當日爭秋奪暑，一有太陽冒出，室外就體感三十三四度，靠兩三把牛角扇、吊扇吹住當日戶外嘅暖風好過冇。好處：唔駛搭枱；唔駛感受背後等自己坐緊張枱嘅人眼神嘅無形壓力。三十幾度坐室外，夠凍汽水啤酒必備。七彩素拼盤——有齊酸齋、蠔油齋、素鮑片、素鵝、素雞、素叉燒、素魚片⋯⋯調味唔嗆喉，好快掃哂。豉椒炒田螺——本身都食過呢種素螺肉，甚至曾經買過自煮。cute cute哋係幾似，呢度豉椒炒濃味度都直迫大牌檔。竹笙扒四蔬——寧舍要$145，雖然竹笙相對貴價，但份量俾得十片八片又唔多啱道理。最唔抵食。食完唔好嘥咗啲景，建議行去入面行個圈，有廟、亭台樓閣、孔子像、荷花池，唔少中式打咭位。牌坊附近備有室外停車場，據知免費。附近就係流水響。本身搭城巴新線78x喺高埔落，對面馬路巴士站搭個去坪輋嘅綠頂小巴話喺雲泉落就嚟到。…查看更多