or#Tm65186314的个人专页

喺大壩街新開的小店，同同事放lunch時係門口睇下餐牌被老闆熱情打動，決定試一試，點知咁有驚喜，真心要特意寫個好評比佢！餃子香口好食無味精薄皮，雞肉伴麵勁多雞肉，一啖麵一啖肉重點加左佢地自家整既麻辣醬，成件事好夾，極有食慾，午餐都係約$50-$60連飲品雖然食物選擇品算好多，但貴精不貴多，feel到老細有心製作，將最好既食物比提供比客人新開張仲有88折，同事們都覺得超值，已經入左心目中恆常餐廳之一…查看更多

係附近返工，新開個陣已經幫襯過覺得款色多，環境又唔錯，食物質素又高所以有時想近近地都會揀食呢間最近係fb睇到有宣傳，夜晚叫set餐可以有任食甜品，所以放工同同事即刻仆去食啦呢到d野食真係幾出色，我地頭盤叫左吉列蠔同雞翼，兩款都好好食，好香口，即叫即炸，又有沙律菜做伴菜，中和返主菜我同同事揀左明太子意粉同埋蕃茄大蝦意粉，兩個都好食，大推，無野挑剔，份量正常呢到我地最期待既甜品，我地食左好多款，其中推介係辣味朱古力蛋糕，藍苺芝士蛋糕，佢地d件裝蛋糕全部都超級好食，用料好，勁高質，正！但有個地方可能要留意既係有d甜品雪得有小小硬，要放一陣先食，不過總括呢講真係性價比高，以呢個價錢食到咁高質既晚飯，係好值得！最後想講呢間餐廳服務態度係100分，夜晚招呼我地個女仔，好得意😚，人又nice，又熱心，要係到讚一讚佢，我係女仔都要對住佢心心眼…查看更多

原本想去同一幢食韓國炸雞，點知正要去嘅時候，樓下姐姐好熱情咁比左張傳單我，見到新開88折加上湯底特別，所以決定試一試👍🏼環境我會比100分，舒服，坐得闊落，唔會迫。食物方面，我同朋友叫左$228個餐，肉類會多小小選擇，但有出現漏單情況，不過同職員講左都好快處理返。雖然係任食，但d牛都幾高質素，好好食！當中有好多台式既配料選擇，例如鴨血、滷水牛肚牛筋、熱食又有炸雞、台灣腸、甜不辣。真係有台灣既感覺出左黎。值得一讚係佢地有冷泡茶比顧客選擇，好似咁多間任食第一次見👍🏼👍🏼希望佢地會keep住有，打邊爐之餘都可以下一下火😂，埋單前仲有movenpick食🥳新開期間除左88折，like facebook仲有黑糖鮮奶茶送。大家可以去試下…查看更多

一家大細嘅西餐選擇，但食物真係麻麻佢啲餐前包都幾好食，尤其個muffin，order多左一個食，微暖，鬆化。薯片都keep到水準，香脆，加左芝士同煙肉，大人細路都岩食。但主菜真係失左水準。。。個pork rib 勁咸，雖然整到好淋身，但個汁真係食完要飲好多水。之前食個陣無咁咸另外叫咗個牛扒，叫medium，但煮到medium well。真係唔係咁值。但個粟米伴菜唔錯，好香，應該加左唔小牛油。埋單都要成千蚊，但呢間西餐老字號黎講，都係差左小小…查看更多

依家食烤魚邊洗咩返大陸，去元朗就得啦呢間餐廳同一班朋友聚會非常之好，因為條魚既份量都幾多下，如果情侶黎食叫左條魚就無得試埋其他，因為我覺得佢d燒物同小食都非常好，推介。今日同朋友放工黎食飯，叫左條青椒魚，燒生蠔、蒜香茄子茄子同炸魷魚鬚。條魚嘅配料我哋叫咗凍豆腐、萵筍、午餐肉、娃娃菜全部都係吸味既配菜，吸哂辣味同魚既香，一個字，正！仲有燒生蠔蒜香茄子同魷魚酥都係即叫即整，熱辣辣，要攤一陣先食到，生蠔同茄子都鋪滿蒜頭辣椒等等，好香同大陸買嗰啲一模一樣。總括來講都好推介大家食呢間餐廳，唔使去到大陸咁遠！…查看更多

好味既意粉唔一定要貴食，就算平都可以好好質素。呢間小店非常值得推介俾大家，位置喺荃新天地附近鱟地坊巷仔。本人已經食過無數次，絕非打手。喺荃灣區附近住或者返工嘅朋友仔可以試吓呢一間，雖然鋪頭賣嘅種類唔算多，但係勝在第一老細用料靚，味道好，第二價錢經濟實惠。平時我同啲同事都會叫whatsapp落order，拎返公司食，今次我地叫左3個意粉(黑松露蘑菇意粉、三文魚蕃茄意粉、芝士肉醬意粉）同雞翼加一個湯total都係$90蚊，份量多，味道好，同事們次次食完都好滿足，試問而加$90去西餐廳食到d咩。我諗一個沙拉已經係咁既價錢。就算大x樂，大x活個d都收緊大家$40幾$50一個意粉啦。係人都知香港租金最貴要生存真係唔容易。想繼續食到好野，最實際嘅支持行動就係多啲幫襯咁有heart咁良心既店鋪啦👍🏼亦都比自己一個機會食到又平又正既野啦😗…查看更多

講到深水埗長沙灣一帶其實真係數之不盡嘅美食打邊爐來講，我非常推介大家嚟食呢一間。地點近長沙灣宇宙商場，唔難搵點解我咁推介呢間，係因為性價比高，$200有多種海鮮食例如蟹、鮑魚、蝦、蠔、貝類有時介會有比較特別既海鮮我諗要視乎返當日有咩新鮮(按人頭計算）。今次同朋友叫咗番茄湯底，海鮮全部都好新鮮好鮮甜，啲蝦跳到要用碗蓋住。食哂海鮮之後建議可以飲小小個湯底，因為個湯底已經比d海鮮煲到好鮮甜，好正。食完海鮮啲員工會好自動咁俾其他火鍋配料你👍🏼其實食到呢到已經開始飽飽地食哂啲火鍋配料之後仲有個脆米飯加落個火鍋湯底到，雖則真係好飽，但我都唔小心咁食咗一碗多啲，因為個湯已經吸收晒所有嘅海鮮精華真係好好食👍🏼👍🏼👍🏼…查看更多

放假去旺角個邊行街，之前見到有人拍片介紹呢間餐廳，好似好抵食，所以今個星期日既其中一個活動就係試呢間餐廳自助形式，睇岩就去點餐，好似唔係好夠人手，d人走左都隔一段時間先執野返野食，我同朋友叫左卡邦尼意粉同牛角包。意粉方面，真係大大碟，3個人分黎食都仲得，但預左味道唔會特別好好味，但都唔錯。牛角包加炸魚，牛角包如果焗耐返小小，有d脆會更好，不過以呢個價錢既話，我覺得幾合理。但個炸魚唔太推介，食落去苦苦地，加左小小蜜糖搞到仲奇怪。所以大家可以揀返其他配菜。最後就係，食完之後好口渴，要即刻買返支水飲，唔知係咪因爲d野落左蒜頭。如果想又平又食得飽既cafe可以揀呢間…查看更多

首先要長氣小小要講返呢間鋪頭既歷史。呢間鋪頭真係非常老字號，並唔係一間新開嘅鋪頭。以前喺前一條街度開咗20年有多。細細個已經同屋企人成日去食晚飯，因為味道好，抵食同好有香港個種舊有人情味。可惜係4年前執咗開左生煎包終於4年後係附近開返，原本一心諗住同男朋友食x記車仔麵，點知見到隔離大大隻字寫住上海萬家村，仲要見到以前個老細係門口招呼客人。個種既回憶......我真係忍唔住沖去同佢講你地開返啦！個老細仲同我笑住咗講多謝支持。所以今日既晚餐好快咗轉左做呢間😂今日叫左鱔糊炒粗、牛腩擔擔麵同埋生煎包。1）鱔糊炒粗，味道真係非常好同以前一樣，保持返原有水準,d鱔糊同麵既比例係1:2，好多料！對比起大型連鎖嘅上海鋪頭，呢到真係價錢合理，無花無假。2）牛腩擔擔麵，個牛腩可以話係驚為天人。夠膽講一句，真係暫時未食過咁好食既牛腩。呢個我都係第一次試係男朋友點既，入面大概有6舊到，仲要係唔係細！咬落去嗰種滿足感真係令人垂涎三尺🤤我食完一舊之後，男朋友已經食左一半😂3）生煎包，原有味道，$45/5隻，大大隻，有湯汁。正！同埋想講嘅係，老細真係太有佛心，因為凡惠顧都有免費飲品送。佢仲好唔吝嗇咁同我講唔夠出聲😂真係好得太過份！所以一定要為佢寫返個好評，比更加多嘅人知道呢間餐廳👍🏼👍🏼👍🏼其實仲想食埋個豆沙鍋餅可惜真係實在太飽因為每樣野都好大份。下次一定一定會再幫襯…查看更多

講到最多美食嘅一定係深水埗。呢間越南菜係一年前幫襯過，之前諗住食嘅時候佢冇開，聽講老闆娘有時會唔開一個星期返去越南，所以如果要去食嘅話佢打個電話會好d。今次同朋友叫咗一個番茄蟹膏湯檬，越南米紙卷同埋越式法包先講講個番茄蟹膏湯檬個湯好濃郁好大陣蕃茄味夾蟹膏食真係一流好香而且個湯檬入邊有扎肉同埋豆卜嘅配菜吸晒啲精華，個口充滿住番茄同蟹膏既味道🤤第二個就係越式法包因為我唔食芫荽所以走咗芫荽個包入面有唔同嘅配菜，蘿蔔絲，紅蘿蔔絲，扎肉，生菜青瓜，蔥。感覺上幾健康👍🏼最後越南米紙卷包得好紮實唔會散開每份都有兩隻大蝦係入邊，平時食米紙卷係會用嗰隻酸辣汁點，但佢呢度係用唔辣嘅秘製花生醬，好特別👍🏼👍🏼👍🏼好好食…查看更多

前幾日同中學聚會，諗住係九龍城是但搵一間泰國菜食，點都唔會伏，點知原來真係有😅有些小失望。當晚叫左五樣嘢，total $500買單到，唔算平係九龍地黎講1）泰式生菜包呢個算係滿意嘅一碟，夠味夠夠鑊氣，份量都幾多，我地仲額外叫多份生菜2）馬拉盞炒通菜 完全唔夠味，懷疑廚房唔記得落鹽，同平時第二到食既差好遠3) 酸辣鳳爪合格，幾開胃，但份量略少4）蝦餅拼春卷Size較細，香口，食個陣仲好熱，都唔錯既5）黃咖哩牛肉呢個真係最唔推介，d咖哩有d水，無咩咖哩味，牛肉無味，配個蒜蓉包淨係食到個包味😅有d失望總括嚟講唔值得推介因為九龍城有好多出色嘅泰國餐廳好過佢hahaaa下次都係唔好亂入一間。…查看更多

好掛住韓國嘅燒肉，但同男朋友有冇假期去旅行，唯有喺香港食返啲地道韓國燒肉滿足返心靈。呢間燒肉係香港算係出色嘅一間，因為啲肉好高質素之外d小食係好岩口味而且好地道，配菜好好食仲要無限添，所以基本上食燒肉都係揀佢🤤首先，基本上一入去坐低就會比啲前菜你食唔好睇小啲前菜，個大豆芽同泡菜係會回味無窮👍🏼今次同男朋友叫咗磚頭五花腩，一碟雪花牛同埋豬頸肉磚頭五花腩係一次必點，因為燒到外皮好香脆包埋生菜食一流，而且每次去基本上店員都會幫我地燒埋加剪埋，好方便😂另外雪山牛同豬頸肉都係好高質素食得出啲牛係好腍身同埋燒豬頸肉係我最愛，唔可以唔叫☺️我哋仲叫咗個自暴自棄即食麵，話明係自暴自棄即係唔肥唔識食🤣個面本身加咗芝士同埋腸仔好好食，又唔係成日食所以冇所謂啦🤣唯有係咁安慰自己！…查看更多

呢一間係我個人非常之推介既米線，冇分店得荃灣一間返工成日都食佢，食到個老細都認得我😂之前同老細傾過計，佢同我講全部米線都係叫完之後即整同埋係落鑊煮，雖然係平民價錢既一碗米線一啲都唔馬虎👍🏼食米線最重要係個湯底，佢個湯底真係會食上癮同埋唔會係口渴，推介大家可以試下豬頸肉米線。豬頸肉燒完再煮好香口配米線一流同埋佢個越南春卷加辣味墨魚咀都好好食，值得一題係個墨魚咀，好入味好爽口唔會咬唔爛加埋秘製嘅辣汁真係好開胃架🤤…查看更多

上個星期慶祝屋企人生日 經同事介紹下 星期六一家大細揸車去食 同事介紹呢度除左食物唔錯之外仲有好多遊樂設施比小朋友 岩哂家姐個兩個小朋友👍🏼👍🏼👍🏼講返食物方便我哋叫咗一個pizza,海鮮拼盤，鱸魚，蝴蝶粉仲有一個焗飯Pizza係好熱辣辣而已好薄好脆，但一家人食每人分到一塊，有d唔夠喉海鮮拼盤同鱸魚最貴，但總括黎講都幾好味，個海鮮拼盤入面有蝦，貝類，蟹，魷魚，粟米，薯仔，但美中不足係份量唔太多。條魚都食得出好生鮮，而且職員幫同你起埋骨，好細心👍🏼最驚喜反而係個生日蛋糕😂原本以為係蛋糕黎，但其實係芒果雪糕加士多啤梨芭菲。個人好推介因爲甜而不膩，加上對live Band會上嚟同我地一齊唱生日歌，成個氣氛好好👍🏼總括黎講，呢間餐廳好啱一家大細聚餐，但大家要留意既係如果搭車過去會有小小麻煩，所以建議可以揸車過去…查看更多

第一次入重慶大廈就係為咗食7樓咖哩王 之前聽朋友講過話要食印度野就要嚟呢間 所以今次特登同男朋友嚟到尖沙咀試一試一入到去有兩個靚仔侍應招呼我哋 好好禮貌仲推介左幾款嘢食俾我哋 最後我哋叫咗三樣嘢當中最驚喜係個芝士麵包同咖喱雞。芝士包好香好濃芝士味絕對係真材實料同埋係即叫即整好熱辣辣點返個咖喱雞真係意想唔到咁夾👍🏼果然冇介紹錯🥰同埋我哋點咗個拼盤入邊有雞、魚同腸仔岩哂男朋友呢個食肉獸。同埋每款肉都用唔同嘅香料，非常刺激味蕾。👍🏼雖然重慶大廈係危險咗啲但係意想唔到嘅係有咁好食嘅餐廳，如果下次諗起印度菜我諗佢會係我第一選擇…查看更多