Ashley Yang的个人专页

睇完openrice食評慕名而來，但並沒有俾到什麼驚喜。叫咗三款咖喱，分別係馬沙雞，牛同羊咖喱，最好食係個雞。睇落好似份量不大，但我哋5個人叫咗一份原味餅，一份芝士餅，一碟飯已經夠食，但可能係我地食量偏細。我最期待係羊肉，食落無比到驚喜，羊肉暗騷，第一啖唔覺騷，慢慢先食到騷味，牛咖喱味道最差，牛肉同咖喱唔係好夾。餅算係好食，尤其芝士餅，又軟又香，但對於曾經食過新鮮出爐既新疆饢餅既我嚟講，當時既饢餅淨食都香過依個好多倍。所以，係我依度個餅唔算過關。單叫既飯係普通白飯，唔係薑黃飯，d米唔算靚，都唔夠乾身，比起之前係澳洲一間印度餐廳食過既長米都要渣，整體嚟講叫做平平實實。…查看更多

突然想食炸雞，朋友推薦話試下依間。但其實餐牌得3款炸雞。半份甜辣醬炸雞，4個人每人都食到大概2大塊，份量足夠，甜甜哋既醬料好開胃，雞肉嫩口，唔會有一大塊肥膏，但可惜太少花生碎，食唔到花生香。朋友想食年糕，於是叫咗個泡菜年糕，我個人本身好唔鐘意食年糕，所以興趣不大。但公平d講，依個年糕本身都唔好食，一大罪係食落口感差，有夾生感，煮得又唔係好透，硬得嚟唔彈性，又無米香，醬汁唔可以完全包裹，食落就係d超低質年糕味。魚膏偏薄身，再加上普通韓國拉麵，成碟嘢毫無價值可言。完全睇到個廚師手勢幾差。再跟openrice熱門菜式叫咗份豬腳，再次見到個廚師功底唔夠。豬腳本身無大問題，單食係寡咗d，但無話唔好食。但係d配菜就出晒事，個碟類似大醬既配醬點小小就好鹹，齋點依個食鹹到pk，要包菜先減到小小鹹味，d泡菜夾豬腳又唔係話好食，完全唔覺增色，可有可無，尤其個款醃白菜，好明顯淨係攞鹽醃過下就算，個白菜本身都唔係咩靚白菜，極難食。到五花肉煎餅，五花肉好似煙肉既厚度鋪係餅底，個餅得d泡菜味，就咁食應該無夾到魷魚個d海鮮，食唔到肉香，我食到第3塊都唔覺自己有食到五花肉，配既醬汁又係一頭霧水，睇得出係自己揀嚟配既，但又係對碟嘢無幫助，不要也罷。再講服務，我地3個人叫奶昔，一個人叫啤酒。佢先嚟一杯奶昔，食到一半都未見其他野飲，追完單終於上多兩杯oreo奶昔，但我唔明d冰點解大粒到可以塞住枝珍珠奶茶飲筒，可能我太頸渴，兩啖飲晒都仲想飲水，唔多飲到oreo味，張圖有跟既兩塊oreo都唔見。回歸正題，最神奇係杯啤酒要係追第2次單時先記得上，但個時我地已經接近食完，我fd最後要齋隊啤酒。個度環境又擠逼，抽風好差仲要用開放式廚房，搞到成間餐廳一入去就一大陣油煙味，走時又成身油煙味，差過去食燒肉。總括而言，不可一不可再。…查看更多

幾年前去過成都同重慶，個段日子對於一個唔食得辣又嗜辣既人真係痛並快樂着，皆因當地人食辣水平太高好難就到我個食辣廢柴。終於係香港遇到《麻辣風雲》，全部叫最少辣，我輕鬆carry到既辣度。有人話四川菜唔辣點會好食，其實唔應該咁樣去評，辣係一種濃烈既調味，拎開佢依然展示到廚藝，咁先叫功底。唔係好熟川菜，但係四川都食過幾日，憑住記憶去叫，一碟涼拌皮蛋係我每次必叫，但依碟係失敗中既失敗，隻皮蛋十分難食，調味都救唔返。拌料有蒜蓉同辣椒醬，坦白講辣椒油味道唔夠亮眼，加埋蒜蓉令人疑惑，所以俾咗差評。最近迷上炸饅頭，嚟到見到又要叫，煉奶食得出唔係鷹嘜，失色，饅頭唔黏牙，唔會太甜或者太油，合格。全枱最香係干鍋鮑魚仔，一路燒緊一路滲出香味，眼見好多辣椒但其實一d都唔辣，師傅完全照顧到我既辣度，食得辣既朋友可以叫再辣d，應該會更好食。鮑魚仔份量好夠，都算入味，藕片好脆，爽，推薦大家試一試。京蔥牛肉份量好多，牛肉食極都有，嫩滑少筋夾住一片京蔥一齊食，好滋味，碟菜本身係唔辣，唔食得辣既朋友可以叫豬油渣炒時菜係我幾期待既一道菜，因為宜家唔係度度都夠膽用豬油渣炒菜，d豬油如果唔靚或者擺太耐會有油up味，炸得唔靚食落就會好油好膩，但其實豬油係川菜靈魂。依碟菜用既豬油無炸到好透，特登留到塊脂肪爽脆既口感，塊脂肪好靚，好新鮮，但我寧願佢用炸透既豬油渣，當然成本會高d，但炸透既豬油渣先夠香味，食完返唔到轉頭～到我最期待既毛血旺，新鮮或者無溝水既豬紅/雞紅切片煮完應該見到一個個氣泡窿，口感帶爽脆，我係香港未食到過，依間都係，口感偏硬，但大腸，毛肚，豬肚都唔騷唔臭，洗得好乾淨，份量都夠，但始終覺得要辣d先好食（超矛盾）鋪頭環境夠大，坐得算舒服，抽風好好唔會成間舖既味道混合埋一齊，但如果有個位擺袋就更好。同埋川菜餐廳，廁所好緊要！希望可以加強廁所設施同清潔～…查看更多

食日式料理我中意叫三樣嘢：海膽，玉子燒，燒大蔥。海膽唔腥唔苦，證明d來貨好新鮮，老細肯花心機；玉子燒係基本功，煮得好既都係踏實學過日料既師傅；大蔥如果辣口，一係來貨唔靚，一係燒得唔透。但依間野驚豔到我既係佢既多士鵝肝。唔係用薄脆多士，依隻多士厚身軟熟，質地夠濕潤唔會有唔新鮮既感覺，鵝肝夠稔夠香，唔會過肥油膩，兩者加埋非常完美，一件食完處於滿足同唔夠喉之間，依個時候停低就係最好既份量。我平時最中意既熟北寄貝刺身今次相較最失色，未食過活既（好少地方有），今次唔記得叫要留待下次。三文魚籽好夠份量，一啖落去食唔到飯味；海膽壽司應該用咗兩款海膽（唔識分邊兩種），海膽夠新鮮，但始終食到小小腥味，好淡無停留太耐；金目鯛名不虛傳，鮮甜肥口，先食金目鯛再食鰈魚邊，因為鰈魚邊既脂肪更濃厚更多，擺後d食先唔會蓋過金目鯛隻味。十分出色明太子玉子燒。侍應有事先提醒明太子偏鹹，但我覺得唔會，日式玉子燒無咁層次分明，偏甜口，夾一夾佢見唔到中間有未熟既蛋漿，食落好嫩口，對於唔中意食甜既我一大啖落去夾住明太子一齊食，完美無瑕。而且好夠份量。煤氣味海膽松葉蟹炒飯（笑）。成日有人笑黑松露係煤氣味，但我好中意陣香味，個飯好夠料，好俾面，食到最後已經飽飽地，但我都食咗3細碗，最欣賞d蒜片炸得啱啱好，細節決定勝敗。但都有唔好既地方，燒牛舌食到筋；燒大蔥最外層燒得太乾攝牙，而且食到條蔥偏老；用加拿大牡丹蝦，唔係話加拿大牡丹蝦唔好，但既然做得居酒屋，點解唔試下提供日本牡丹蝦，就算貴d我諗都有人肯俾，畢竟加拿大常有而北海道不常有。最後要讚下d冷氣通風，我地想等齊嘢先食，先上既壽司同鵝肝無因為擺咗一陣就凍冰冰，食到冷氣feel，又唔會焗，正。…查看更多

次次去串皇都唔記得影相，因為好食到完全諗唔到。串燒大串抵食，醬汁味道一流，“七里香”同雞皮絕對係必試，不過辣椒醬好夠辣，食唔到太辣既朋友都係叫bb辣好d。次次入元朗都要食先得…查看更多

黃店，五大訴求，缺一不可。另一間黃店「轉角 見」就係隔離，因為「轉角 見」既招牌太顯眼，所以差d漏左對面間留白。店舖舖位少，所以好多都係室外位，對於夏天幫襯既食客係好大考驗。咁啱近窗bar台位有位就坐咗個度，磚牆木台高腳櫈係幾有feel，如果唔係太熱既話……本身想食全日早餐，但得一款Benedict 同素食揀，於是試試Benedict 啦，再加一杯焙茶鮮奶。Benedict 煮得幾合格，硬身麵包點滿流心既蛋汁，混合芝士既味道都算精彩，沙律菜好食，煙三文魚都合我心意，整體可以俾高分。焙茶夠香，溝鮮奶就係為咗唔好太甜，佢做到，唔知唔覺飲晒一杯。朋友叫咗煙三文魚bagels, 係唔明點解嚟到變牛肉，但係我兩個人都唔覺既情況下被撥散咗，最後當然係食咗。但有驚喜。牛肉煮得好香，又夠嫩口，麵包配上肉汁好出色，尤其面頭點滿藜麦，好香口，醬汁熱口水，最後我清晒盤連汁都唔放過。至於抹茶鮮奶，朋友評論話好飲，我諗都有一定水準。最ticky既位係我地坐窗邊，咁啱係出菜位，所以唔知點解店家會係裡面遞碟菜叫我哋幫手出俾隔離位。我地就唔計較，但換轉第二d客人就唔好咁啦。…查看更多

約咗fd收工chill一下，最近想食漢堡，佢就book咗依間。自己叫咗個菠蘿煙肉漢堡，高得滯，一啖食唔晒，唯有拆散慢慢用刀叉切嚟食，懶斯文就係差咗feel，食漢堡都係粗豪d更正。塊漢堡好正，夠厚身，攞刀押一押已經出汁，牛味濃厚，無辜負價錢；菠蘿係罐頭菠蘿，無咩特別，煙肉無煎到脆身，但質素都唔差，煙燻味幾香，整體嚟講個漢堡係幾好食。單叫一個牛油果薯條，芝士醬好夠，薯條脆身，又軟熟，熱辣辣，牛油果蓉無咩特別，薯條最配都係番茄，就算係配茄蓉都好食。仲有特別叫一枝coron啤酒😂，一般般。買單兩個人每人食一個漢堡，share一份薯條，加杯野飲，差唔多200蚊。放工輕鬆一下係幾好。btw，侍應講中文。…查看更多

本身諗住午餐過隔離小娘惹，點知小娘惹星期六唔開，搜附近見到依間，好評好似幾多，就成班人一齊嚟試試。話晒太古坊附近，都預咗會貴，坐低後自己叫咗食評推介據講好有鍋氣既新加坡炒貴刁，同行叫咗喇沙。先評論貴刁，我成碟食晒，純粹係因為我唔揀食，同埋78蚊+10%唔捨得浪費。依隻貴刁比河粉闊，厚身，更有韌性，但唔差，唔會好粉好實，就炒野嚟講唔差。重點嚟啦，碟貴刁有5，6塊臘腸，而d臘腸係唔好食既；又有d洗到脆既蝦仁，個人好憎食依隻蝦，但我知坊間多數中意落太白粉洗，d蝦完全無味，同d炒過既貴刁好唔夾；又有d魚片，切到薄薄地，好普通，又係同炒過既貴刁好唔夾，好彩得兩塊。碟貴刁食到最尾都幾膩，仲有！個竹碟甩毛，有條竹絲插咗入牙肉搞到我牙肉發炎。再講加個2蚊既杞子雞湯，其實即係海南雞會跟既湯，飲多兩啖都係唔掂。而且係茶杯装，仲衰過跟海南雞😂再講個喇沙，80蚊+10%，椰子湯底，入口小小辣，我係面頭舀咗羹都食到唔知椰子定香茅渣。第一啖係幾香濃，但飲完無餘韻，仲有d水味。至於個米粉……眼望都係普通米粉。朋友話唔好食，差過隔離小娘惹（利申無食過小娘惹，唔係做廣告）。唔知openrice咁多好評點得嚟，d嘢係勉強合格，但咁既價錢都係留比太古坊既朋友仔食啦。…查看更多

有雜誌推薦呢間黃店，大大隻秋生個樣話好食，過咗好耐終於同朋友嚟一試究竟。兩個女子食量少，所以叫嘢就住就住，只試咗幾樣。首先上枱係一煲魚湯，天氣凍又落雨飲熱湯最正。依個係細份，兩個人都每人飲到3碗，但係！好腥！上枱非常滾燙，但依然聞到好重腥味，飲落更加係腥，湯係好飲，但怕腥既朋友最好“不了”。飲住魚湯，一碟貴妃蚌都上枱，跟人頭一人一隻，係平時都可以食到既好味，不過都跟平時一樣食到砂，唔知係咪每間既貝類都有依個問題。仲有碟芝士撈公仔麵無影到，點解？因為太好食，影唔切。本身想叫烏冬，但朋友唔鍾意食烏冬，於是叫咗邪惡既公仔麵，我本身對芝士無特別喜好，但今次如果唔係要矜持，我一個人可以食兩碟。最後上枱一份“don't 升班”骨，呢個真係有斑，唔使俾食環告。上枱前老細話會好細件，但本身唔係好食得就叫佢即管上，嚟到又唔覺。未試過慢煮其他野，但就呢件骨嚟講我覺得好油，包括臨上碟前淋既熟油，有d扣分，但整體嚟講係好食。骨煮到透，可以嚼，但始終件骨唔細，唔可以成件煮到擺落口。敗筆係d蔥同豉油，淋油個時淋d唔淋d，好多蔥上枱仲係生，個陣辣味同碟菜完全唔夾，對於我依d鍾意食蔥既人好唔友善。其實仲有一籠菜心，叫咗最普通個隻，本來以為會係原味，點知上枱係蒜蓉菜脯蒸，而且一餐飯食完先蒸到比我，我諗如果唔係我催單，老細可能仲慢慢劈緊柴。菜心係幾甜幾嫩，但我唔鍾意個菜脯同蒜蓉，始終睇名係無預期會咁重口。鋪頭好細，裝飾幾靚，但個廁所門開咗，坐係度聞住廁所味食飯都幾無癮。個頭都好多餐廳，呢間可能要再加把勁先可以突圍而出。埋單每人都過200，抵唔抵就見仁見智啦。…查看更多

上網見到有人推薦周月，收工就過去試下。疫情期間，非常冷清，入門口前度體溫，搓手，店員帶我入去搵張枱坐低，有個牛皮紙袋裝口罩，個袋好香🤭第一次食，就叫咗同名沾麵“周月沾麵”，價錢超過100蚊，日子久遠無乜印象。個人會覺得日本湯底通常偏鹹，所以叫咗（淡湯，熱麵），湯底始終偏鹹，而且味道單一，唔覺濃厚滋味，有幾件方形五花肉，好香唔騷，筍既份量都足夠。麵方面，個人口味中意軟麵，呢隻麵軟身得嚟彈牙，幾好食，男仔可以挑戰300g份量，但好似收費唔一樣，落單時可以問問。值得一提係糖心蛋好好食，我個人好怕蛋腥味，呢隻完全接受到。沾麵最重要當然係湯底，而呢個同名沾麵湯底頗為一般，需要考慮要唔要俾“second chance”。 …查看更多

收工臨時決定同媽媽去撐台腳，大概六點去到，店內稍顯冷清，店家比左張三人枱，坐得舒服闊落。第一次試食，睇完Openrice推介叫左蒜蓉蟶子，泰式象拔貝，麻辣鮑魚和鹽燒䱽魚，但睇menu有深海泥鯭，因為是剛剛才落單，即時叫店家幫忙改單，店家都樂意幫忙，再遲些都唔好意思叫店家改單了特意叫齊唔同醬汁試味。蒜蓉味發揮到水準，非常香，襯得海鮮更甜；泰式味有小小帶酸，見到明顯辣椒仔，所以都有返咁上下辣味，但媽媽似乎更喜歡蒜蓉；水煮麻辣味也很不錯，令我想起在四川食的麻辣火鍋，煮鮑魚呢d冇乜味既野襯到絕。我食到少少辣，整體調味我完全接受到，但好辣既人可能要落單時講明加辣才會過癮。自己叫左碗白飯，海鮮撈飯好食到停唔到口。最後同媽媽encore一輪貝類和蟶子，兩個人總共叫左7樣，媽媽來之前有食下午茶，我自己叫碗白飯都叫飽，埋單每人$130，食得非常開心。佐敦一出行5分鐘就係到，之後會再encore，下次可能食得再放d😂…查看更多

和5個朋友約埋一齊聚會，就揀定這間泰國菜。一早已經book位，七點到，場內已經有唔少客人，一到對完資料即有位，唔使齊人入座。九龍城地處偏僻，預左交通不太方便，店家留左一入門口張大枱比我地，隨便坐，十分闊落，店家服務態度很好，幾個朋友遲到，我兩個人先落座都冇收到異樣眼光，上菜快，收碟好及時，小食拼盤跟一兜香葉，我不明白點配搭，問店家，店家雖然忙都願意答復，中間遇到差人抄牌，店家仲大聲通知食客哈哈。食物方面，除了甜品，樣樣都好食，尤其是炒金邊粉，最令我眼前一亮，金邊粉口感非常好，絕對要一試冬陰功湯都好飲，叫個細份每人一碗小嘗味道，很暖心。最受歡迎要屬生菜包肉碎，好食到未黎得切影相已經清兜，不過分量偏少。甜品要攞出黎批評。特意叫左甜品拼盤，但冇樣好食，樣樣失色，唯一合格就係芒果糯米飯的芒果和紫米，淋上面的椰漿都略失色，連我在泰國機場買的芒果糯米飯都樣樣出色過佢。這間確實煮得好食，但這種好食是出邊（例如旺角）都食得到的程度，需唔需要特意入九龍城食就見仁見智，或者等宋王臺站開左會來得多d（宋王臺站就在呢間鋪隔離街）。…查看更多

行完麥理浩徑直落韓燒真係好幸福既一件事。星期日七點左右呢間餐廳並不多人，三個人一入已經有位，餐廳播放一d潮流韓文歌，餐廳同一般韓燒店一樣，充斥著燒烤味，不過並不太攻鼻。坐低即刻有人送上小食碟，樣樣都風味十足，個人最愛拌沙律，沙律醤清新不油膩，平時恨不得走醬的我，直頭想食曬d醬。海帶反而有d腥，不過還可以忍受，其中一位朋友零舍喜愛，最後佢一個人食左兩碟。小食碟雖然寫明任食，但唔知係咪人手唔夠，d碟好容易一去不復返😂叫左個$6xx既豬牛套餐，整體份量偏少，中等偏上質素，d肉算係新鮮多汁，最中意食肥牛同豬五花，燒完點一點韓式辣椒醬，連兩片泡菜一齊包入生菜，香味十足！火炙牛肉壽司不值一提，醬，飯，肉都完全唔得。部隊鍋也是份量太少，鍋底應該係辛拉麵，都係普通部隊鍋會有既餐肉，面，年糕，腸等等。本來套餐應該係比四個人食（壽司有四件），如果用二人份計的話，價錢就相當唔抵，就算我地三個點肚餓都好，始終三個女仔，平時普通飯量，到最後我都係覺得差小小先飽，所以抵食程度真係一般。…查看更多

收工後食好野慰問自己就是現在最大的安慰和鼓勵#—_—朋友介紹的餐廳，旺角茶聊，完全值得一試！超回本龍蝦包，似乎將整隻龍蝦都塞進包裡面，一口咬下去，微融帶點冰涼的牛油驚喜地在口中與龍蝦肉纏綿……黑松露番茄干蘆筍天使麵，非常濃厚的黑松露香，好食但唔算上乘。火龍果四季香沙冰，原來茶和水果可以這麼合襯！第一次在食飽的情況下飲完整整一大杯。但最最驚喜的是我最不看好的梳夫厘，OMG，連伴碟的忌廉都好食到一個境界，從不食忌廉的我，完全吃光！更不用說主角：外彈內鬆的三層疊梳夫厘，一試難忘，好食到不想錯失任何一片，因而小心翼翼以免有小小黏在碟子上。當然，這只是誇張，但甜品好食的程度一點也不誇張！…查看更多

本身唔諗住食呢間，但點知原本個間Full Booking，盲中中走左黎呢間食，平安夜竟然即刻有位。7：30前離座更加85折，埋單每人$255。 整體唔錯，刺身一般質素，最好食係吞拿魚，蝦就腥腥地……炸物當然要食我最喜愛既榴蓮炸彈！唔錯，夠香甜炸雞翼高質，值得一試，麻麻地天婦羅所以冇試，燒牛舌唔錯，值得一試，最冇得頂既係個份蒜香安格斯牛柳粒，一定必試！蒜片香脆但唔苦，牛柳粒夠味！對於食肉怪黎講係好開心！最難食係個份壽喜燒……超甜！甜到嘔心……浪費左d材料！另外令人失望既係蒜心炒魷魚，魷魚唔夠爽，冇乜味……咖喱蟹都可以一試，不過會食到成口都係壽司就普普通通，冇乜印象。…查看更多